1, 2. а) Малы милесьтым мылкыдмес ӝутэ вын-агайёслэн но сузэр-апайёслэн ужамзы-тыршемзы, кудъёсыз азьланьто ӟеч иворез вераны отын, кытын соосты туж ик уг кылзо? (Учке статья кутсконысь туспуктэмез.) б) Мар вераз Иисус «аслаз вордӥськем музъемаз» ӟеч иворез веран сярысь? (Учке сноскаез.)

 СЕРДЖО НО ОЛИНДА — 80 аресъем кузпалъёс. Соос уло Огазеяськем Штатъёсын но пионер луыса ужало-тыршо. Берло дыре, пыдъёссы висемен, соослы секыт ветлыны. Озьы ке но котькуд ӵукна сизьым часлы соос трос калык люкаськон интые лыкто. Серджо но Олинда трос аръёс озьы ветло ини. Соос султо автобус дугдылонни доры но вӧзтӥзы ортчись адямиослы Библия вылэ пыкиськыса гожтэм публикациосты ӵекто. Тросэз адямиос соос шоры уг но учко, но соос озьы ик интыязы сыло но шоразы учкисьёслы пальпото. Нуназе соос дыртытэк гинэ доразы берто. Мукет ӵукнаяз нош озьы ик. Та оскымон ужась-тыршисьёс арняяз куать нунал но араз дас кык толэзь ӵоже мылысь-кыдысь Эксэйлык сярысь ӟеч иворез верало.

² Серджолы но Олиндалы сямен ик, быдэс дунне вылысь вын-агайёслы но сузэр-апайёслы трос аръёс ӵоже  ини ӟеч иворез верано луэ сыӵе интыосын, кытын соосты кылзэмзы туж ик уг поты. Тӥ но сыӵе шуг-секытэн пумиськиськоды ке, милям тӥледыз сюлмысь ушъяммы потэ, тӥ чидаськоды но уд сётскиське шуыса a. Иеговалы оскымон ужамды-тыршемды троссэ юнматэ, соосты но, кинъёс трос аръёс ӵоже ини Иеговалы ужало-тыршо, озьы ик, ёросэз чакласьёсты но. Одӥгез соос пӧлысь вера: «Куке мон сыӵе оскымон вын-агайёсын но сузэр-апайёсын ӵош ӟеч иворез верасько, со мынэсьтым мылкыдме туж ӝутэ». Мукетыз но озьы ик шуэ: «Соослэн оскымон луэмзы мынэсьтым мылкыдме ӝутэ номырлы сётскытэк но номырлэсь кышкатэк ужан-тыршонме азьланьтыны». Нош тани эшшо одӥг ёросэз чакласьлэн кылъёсыз: «Соослэн примерзы сюлэмме шунтэ».

3. Кыӵе юанъёсты ми эскеромы но малы?

³ Азьланяз но Иисуслэсь сётэм ужзэ мылысь-кыдысь быдэстон понна, ойдолэ куинь юанъёсты эскеромы: малы куддыръя милям мылкыдмы куашка? Кызьы ужан-тыршонын емыш ваёно? Но кызьы со дыре ик сётскытэк улоно но чидано?

4. а) Кызьы Павел вылын шӧдӥське вал тросэзлэн еврейёслэн сое кылзыны мылкыд карымтэзы? б) Малы солэн сыӵе шӧдонъёсыз вал?

⁴ Куддыръя мылкыдды куашка ке, ӟеч иворез веракуды тӥледыз уг кылзо шуыса, тӥ апостол Павеллэсь шӧдонъёссэ валаськоды, луоз. Ог 30 ар ужамез-тыршемез ӵоже со трос адямиослы Христослэн дышетскисез луыны юрттӥз (Ап. уж. 14:21). Но еврейёс пӧлысь туж ӧжытэз Христослэн дышетскисьёсыз луизы. Тросэз еврейёс пумит луизы Павелэз кылзыны, нош куд-огъёсыз сое уйылӥзы-уллязы но (Ап. уж. 14:19; 17:1, 4, 5, 13). Кызьы со Павел вылын шӧдӥськиз? Со вераз: «Мон Христослэн адямиез, соин ик мае верасько,— со зэм. [...] Туж бадӟым кӧтӝожен улӥсько, чик дугдылӥсьтэм куректон мынам сюлмам улэ» (Рим. 9:1—3). Малы солэн сыӵе шӧдонъёсыз кылдылӥзы? Со ужан-тыршонлы вань сюлэмзэ сётэ вал. Со еврейёслы ӟеч иворез вера вал, малы ке шуоно соос понна туж сюлмаське вал. Павеллы туж вӧсь вал адӟыны, кызьы еврейёс Инмарез кулэ уг каро, кудӥзлэн соосты гажамез-жалямез потэ вал.

5. а) Мар милесьтым мылкыдмес ӝутэ ӟеч иворез вераны? б) Малы паймонэз ӧвӧл, куддыръя милям мылкыдмы куашка шуыса?

⁵ Ми но, Павел сямен ик, адямиос сярысь сюлмаськиськомы, соин соослы ӟеч иворез вераськомы (Матф. 22:39; 1 Кор. 11:1). Ми ас выламы шӧдӥмы, макем трос бакель каронъёс басьтыны быгато соос, кинъёс Иеговалы ужаны-тыршыны ужпум кутӥзы. Адямиос сярысь малпаськыса, ми вераськомы: «Кыӵе потэ, адямиос мед валалозы шуыса, макем трос соос ышто!» Соин ик ми выльысь но выльысь ӵектӥськомы адямиослы тодыны Иегова сярысь зэмлыкез но солэсь адямиос пумысен малпанзэ. Ми адямиослы тазьы вераськомы, шуыны луоз: «Ми тӥледлы дуно кузьым вайимы. Куриськомы, басьтэ сое». Паймонэз ӧвӧл, соослэн соглаш луымтэзы милемыз ӝоже уськытэ шуыса. Сыӵе шӧдонъёс кылдо ке, со  уг вера, милям осконмы ляб шуыса. Со вера, ми ужан-тыршонлы вань сюлэммес сётӥськомы шуыса. Озьыен, куддыръя милям мылкыдмы куашка ке но, ми ум сётскиське, нош чидаськомы но ужан-тыршонмес азьланьтӥськомы. Елена, кудӥз 25 арлэсь кемагес ини пионер луыса ужа-тырше, тросэзлэсь асьмелэсь шӧдонъёсмес вера: «Ӟеч иворез вераны мыным капчи ӧвӧл. Но мукет ужен мынам выреме уг поты».

6. Мае ми эскеромы?

⁶ Малы ми оскыны быгатӥськомы, кытын гинэ ми ӟеч иворез медам вералэ, ужан-тыршонын емыш вайыны быгатӥськомы шуыса? Та кулэ луись юанлы валэктон шедьтон понна, ойдолэ Иисуслэсь кык мадёнъёссэ эскеромы. Со мадёнъёсын Иисус вера, емыш вайыны кулэ шуыса (Матф. 13:23). Нырысетӥез — виноградпуд сярысь мадён.

7. а) Кин со «Виноград Будэтӥсь», «зэмос Виноградпуд» но «вайёс»? б) Кыӵе юанлы валэктон шедьтэммы потэ?

⁷ Лыдӟе Иоаннлэсь 15:1—5, 8. Учке, мар вераз Иисус аслаз апостолъёсызлы: «Тӥ трос емыш вайиды ке, Мынам дышетскисьёсы луиды ке, соин Мынам Атае данъямын луоз». Иисус Иеговаез «Виноград Будэтӥсь» шуиз, ассэ — «зэмос Виноградпуд», нош дышетскисьёссэ — «вайёс» b. Нош кыӵе емыш вайыны кулэ Христослэн дышетскисьёсыз? Та мадёнын Иисус шонерак со сярысь ӧз вера. Но со вераз сое, мар юрттэ та юанлы валэктон шедьтыны.

8. а) Малы Иисуслэн мадёназ емыш со выль дышетскисьёс ӧвӧл? б) Мар вераны луоз Иеговалэн куронъёсыз сярысь?

⁸ Атаез сярысь Иисус вераз: «Мынэсьтым котькудзэ емыш сётӥсьтэм вайме Со ӵогыса куштэ». Мукет кылъёсын вераса, Иегова милемыз аслаз ужась-тыршисьёсыныз лыдъя соку гинэ, куке ми емыш вайиськомы (Матф. 13:23; 21:43). Озьыен, та мадёнын верам емыш, кудзэ котькуд христиан мурт вайыны кулэ, со выль дышетскисьёс ӧвӧл, кудъёссэ милемлы дасяны оскемын (Матф. 28:19). Озьы луысал ке, Инмарлы оскымон Адӟись-Ивортӥсьёсты, кудъёсыз нокинлы но юрттыны ӧз быгатэ Христослэн дышетскисез луыны, ӵошатыны луысал емыш вайисьтэм вайёсын. Но озьы вераны уз луы! Адямиез Христос сьӧры мыныны ми кужмысь косыны ум быгатэ. Аслэсьтыз ужась-тыршисьёссэ, кудъёсыз ӧз быгатэ лэсьтыны сое, мае лэсьтыны соослэн кужымзы ӧвӧл, Иегова нокызьы но ярантэм шуыса лыдъяны уг быгаты, малы ке шуоно со яратӥсь Инмар. Иегова куре лэсьтыны сое гинэ, мае ми быгатӥськомы (К. Зак. 30:11—14).

9. а) Кыӵе уже пыриськыса, ми емыш вайиськомы? б) Кыӵе мадёнэз ми эскеромы но малы?

⁹ Соку мар со емыш, кудзэ милемлы ваёно? Со сыӵе уже пыриськон, кудзэ котькудмы асьмеос быдэстыны быгатӥськомы. Кыӵе уж матысь герӟаськемын емыш ваёнэн? Со Инмарлэн Эксэйлыкез сярысь ӟеч иворез веран (Матф. 24:14) c. Озьы вераны луоз, Иисуслэсь  кизись сярысь мадёнзэ лыдэ басьтыса. Ойдолэ тросгес вераськомы со мадён сярысь.

10. а) Мар со мадёнысь кидыс но музъем? б) Мар потэ чабейлэн модосысьтыз?

¹⁰ Лыдӟе Лукалэсь 8:5—8, 11—15. Кизись сярысь мадёнын «кидыс» со «Инмарлэн кылыз», яке Эксэйлык сярысь ивор. Музъем — со адямилэн сюлэмыз. Ӟеч музъеме усем кидыс уда, ӝужа но, кылсярысь, чабей модос луэ. Собере модос «сю полэс емыш» вае. Кыӵе емыш? Мукет пичиесь гинэ модосъёс-а? Ӧвӧл. Выль кидысъёс, кудъёсыз, дыр ортчыса, уданы но выль модос луыны быгато. Та мадёнын одӥг кидыс сю кидыс сётэ. Кызьы сое ужан-тыршонэнымы герӟано?

11. а) Кызьы кизись сярысь мадён ужан-тыршонэнымы герӟаськемын? б) Кызьы ми емыш вайиськомы — Эксэйлыклэсь выль кидысъёссэ?

¹¹ Пуктомы син азямы: кӧня ке ар талэсь азьло кин ке но Адӟись-Ивортӥсьёс пӧлысь яке анай-атаймы милемлы Эксэйлык сярысь зэмлыкез веразы. Соос адӟизы, ӟеч ивор сюлмамы пыриз шуыса, но шумпотӥзы. Иисуслэн мадёнысьтыз ӟеч музъеме усем кидыс сямен, та ивор сюлмамы пыӵаз, собере удаз, ӝужаз но чабей модос луиз, шуыны луоз, кудаз ю шеп потӥз. Озьы ик, кызьы модосэ выль модосъёс уг пото, нош ю шеп потэ, емыш, кудзэ ми вайиськомы,— со выль дышетскисьёс ӧвӧл, нош Эксэйлыклэн выль кидысъёсыз d. Нош кызьы ми со емышез вайыны быгатӥськомы? Кинлы ке Эксэйлык сярысь иворез вераса, ми азьланьтӥськомы кизьыны кидысэз, кудӥз куке но милям сюлмамы пыриз (Лука 6:45; 8:1). Озьыен, кызьы та мадёнысь адӟиське, Эксэйлык сярысь ӟеч иворез вераськомы ке, озьы ми ум сётскиське, нош чидаськомы но емыш вайиськомы.

12. а) Кыӵе йылпумъян лэсьтыны луоз Иисуслэн виноградпуд но кизись сярысь мадёнъёсысьтыз? б) Кызьы со тӥледын герӟаськемын?

¹² Кыӵе йылпумъян лэсьтыны луоз Иисуслэн виноградпуд но кизись сярысь мадёнъёсысьтыз? Кылзо-а адямиос ӟеч иворез, уг-а, ми емыш вайыны быгатӥськомы. Валтӥсез — азьланяз но сое соослы верано. Со сярысь ик вераз Павел но: «Котькудзы ужамзыя уждун басьтозы» (1 Кор. 3:8). Уждун ужамъя сётӥське, нош ужлэн емышезъя уг. Тани мар вера Матильда, кудӥз 20 ар пионер  луыса ужа-тырше: «Макем шумпотоно тодыны, Иегова тыршеммес бакель каре шуыса!»

13, 14. Кызьы Римъёслы 10:1, 2 Павел валэктӥз, малы со ӧз сётскы, нош чидаз, куке адямиос Эксэйлык сярысь иворез ӧз кылзэ?

¹³ Мар юрттоз милемлы чиданэнымы емыш вайыны? Кызьы верамы вал ини, еврейёслэн Эксэйлык сярысь иворез кылзымтэзы Павелэз ӝоже уськытэ вал. Озьы ке но со ӧз сётскы, нош чидаз. Учке, мар гожтӥз со еврейёс сярысь Римысь христианъёслы: «Агай-вынъёсы! Вань сюлмыным вӧсяськыса, Инмарлэсь курисько Израилез утьыны. Мон соос сярысь ивортӥсько: Инмар сярысь сюлмаськон-тыршонзы вань, нош зэмос валанзы ӧвӧл» (Рим. 10:1, 2). Мар вераз Павел, куке валэктӥз, малы со ӟеч иворез верамысь уг дугды?

¹⁴ Нырысетӥез, со вераз, еврейёслы азьланяз но ӟеч иворез вераны сое солэн сюлмыз косэ шуыса. Со шуиз: «Вань сюлмыным... курисько». Солэн туж потэ вал, соос пӧлысь куд-огез ке но мед утиськозы шуыса (Рим. 11:13, 14). Кыкетӥез, со вераз: «Вӧсяськыса, Инмарлэсь курисько». Павел Инмарез сюлворыса куриз, со еврейёслы Эксэйлык сярысь иворез кылзыны мед юрттоз шуыса. Куинетӥез, со пусйиз: «Инмар сярысь сюлмаськон-тыршонзы вань». Со адямиослэсь умойзэ адӟиз но оскиз, одӥг пол  соос Иеговалы ужаны-тыршыны кутскозы шуыса. Павел ас вылаз шӧдӥз, Инмарлы матэ кариськыны мылкыд каремез шонер ӧре лэзид ке, кылзӥськись сюлэмо адями Христослэн сюлмысь тыршись дышетскисез луыны быгатэ шуыса.

15. Кызьы ми Павеллэсь адӟем карыны быгатӥськомы? Вералэ примеръёс.

¹⁵ Кызьы ми Павеллэсь адӟем карыны быгатысалмы? Нырысетӥез, милям юн мылкыдмы луыны кулэ шедьтыны «быронтэм улон басьтонлы азьвыл дасямъёсты». Кыкетӥез, милемлы Иеговалы вӧсяськоно но куроно, со милемлы зӥбыт-востэм адямиослэсь сюлэмъёссэс усьтыны мед юрттоз шуыса (Ап. уж. 13:48; 16:14). Сильвана, кудӥз 30 ар пионер луыса ужа-тырше, вера: «Участокам мынэмлэсь азьло, мон нырысь Иеговалы, умой мылкыд курыса, вӧсяськисько». Озьы ик, ми Инмарлы вӧсяськиськомы но куриськомы, кылчинъёс милемыз кылзӥськись адямиос доры мед нуозы шуыса (Матф. 10:11—13; Усьт. 14:6). 30 арлэсь кемагес пионер луыса ужась-тыршись Роберт нимо вын-агай вера: «Кыӵе умой кылчинъёсын ӵош ужаны, малы ке шуоно соос тодо, мар луэ адямиослэн улоназы, кудъёсызлы ми ӟеч иворез вераськомы!» Куинетӥез, милемлы адямиослэсь умойзэ адӟоно но осконо, одӥг пол соос Иеговалы ужаны-тыршыны кутскозы шуыса. Тани мар вера Карл нимо тӧро, кудӥз 50 арлэсь кемагес пылатӥськемын ини: «Мон тыршисько адӟыны, адями ӧжыт ке но тунсыкъяське-а, уг-а. Кылсярысь, пальпотэ-а со, кызьы со учке яке юан сётэ-а». Зэм, Павел сямен ик, ми чиданэнымы емыш вайыны быгатӥськомы.

16, 17. а) Малы дышето милемыз Екклесиастысь 11:6 кылъёс? б) Вералэ учырез, кудӥз возьматэ, кызьы ужан-тыршонмы мукет адямиослы пайда вае.

¹⁶ Адямиос Эксэйлык сярысь иворез уг кылзо кадь потэ ке, кулэ ӧвӧл малпаны, ужам-тыршеммы адямиослы нокыӵе но пайда уг вайы шуыса. (Лыдӟе Екклесиастэз 11:6.) Тросэз милемыз уг кылзо ке но, соос адӟо милесьтым ӝикыт дӥсяськеммес, умой сямъёсмес но сюлмысь пальпотэммес. Дыр ортчыса, кин ке но валалоз, оло, ми сярысь малпамез шонертэм вал шуыса. Серджо но Олинда, кудъёсыз сярысь статьялэн кутсконаз вераськон мынӥз, сое ас вылазы шӧдӥзы.

¹⁷ Серджо тодаз вае: «Висеменымы сэрен ми огвадьсын дышем интыямы, трос калык люкаськон интые, ӧм ветлэ ни. Нош куке выльысь отчы лыктӥмы, адямиос юалляськыны кутскизы: „Мар луиз? Ми тӥледыз ыштӥмы“». Пальпотыса Олинда ватса: «Автобусъёслэн водительёссы милемлы кизэс шонало вал, нош куд-огъёсыз кабинаысенызы кесько: „Шумпотӥсько, тӥ нош ик татын шуыса!“ Соос журналъёсмес но курылӥзы». Одӥг пиосмурт, литератураен тележка доры лыктыса, Серджолы но Олиндалы тыршемзы понна тау кариз но соослы сяська кузьмаз. Со соосты туж паймытӥз.

18. Малы тӥляд чиданэныды емыш ваемды потэ?

¹⁸ Озьыен, вань кужыммес поныса, Инмарлэн Эксэйлыкез сярысь вераськомы ке, ми троссэ лэсьтӥськомы тодытон ужез азьланьтон понна (Матф. 24:14). Нош тужгес но валтӥсез — озьы ми Иеговалы ярамон луиськомы, нош со милесьтым сюлэммес шумпоттэ. Иегова яратэ вань ужась-тыршисьёссэ, кудъёсыз «чиданэнызы емыш ваё».