1, 2. а) Мар сярысь вераськиз Иисус дышетскисьёсыныз кулон азяз? (Учке статья кутсконысь суредэз.) б) Малы тодамы возёно мугъёсты, малы ми ӟеч иворез вераськомы? в) Мае ми эскеромы та статьяын?

 КУЛОН азяз ӝытэ Иисус кема вераськиз апостолъёсыныз. Со вераз соослы, соосты туж яратэ шуыса. Кызьы тодӥмы кылем статьяысь, Иисус аслаз дышетскисьёсызлы виноградпуд сярысь мадён вераз. Озьы со соослэсь мылкыдзэс ӝутӥз «трос емыш» вайыны, яке сётскытэк азьланяз но Эксэйлык сярысь ӟеч иворез вераны (Иоанн 15:8).

² Иисус дышетскисьёсызлы мар кароно шуыса гинэ ӧз вера, нош вераз на малы сое кароно. Со соослы вераз мугъёсты, малы соос ӟеч иворез тодытыны кулэ вал. Малы милемлы со мугъёсты тодамы возёно? Со юрттоз сётскытэк ӟеч иворез вӧлмытыны, «вань калыкъёс мед тодозы шуыса» (Матф. 24:13, 14). Та статьяын ми эскеромы Библиысь ньыль мугъёсты, малы ӟеч иворез вераны кулэ. Со сяна, ми тодомы, кызьы Иегова юрттэ милемлы чиданэнымы емыш вайыны.

3. а) Кыӵе муг сярысь, малы ми ӟеч иворез вераськомы, гожтэмын Иоаннлэсь 15:8? б) Мае возьмато виноград пурыос Иисуслэн мадёназ но малы со тупась ӵошатон?

³ Лыдӟе Иоаннлэсь 15:1, 8. Милям потэ Иеговаез данъяммы но солэсь чылкыт нимзэ берыктэммы. Со валтӥсь муг, малы ми ӟеч иворез вераськомы. Иисус Атайзэ, Иеговаез, виноград будэтӥсен ӵошатӥз. Ассэ Иисус ӵошатӥз виноградпудэн, нош дышетскисьёссэ — вайёсын (Иоанн 15:5). Соин ик мадёнысь виноград пурыос — со емыш, кудзэ ваё Христослэн дышетскисьёсыз, яке тодытон уж, кудзэ соос быдэсто. Иисус вераз апостолъёсызлы: «Тӥ трос емыш вайиды ке... соин Мынам Атае данъямын луоз». Виноградпуд трос емыш вае ке, виноград будэтӥсез данъяло. Озьы ик ми но, куке кариськомы ваньзэ, мае быгатӥськомы, Эксэйлык сярысь иворез веран понна, ми Иеговаез данъяськомы (Матф. 25:20—23).

4. а) Кызьы ми Инмарлы чылкыт нимзэ берыктӥськомы? б) Кыӵе шӧдонъёсмы кылдо, куке малпаськомы, милемлы Инмарлэсь чылкыт нимзэ берыктыны дан сётэмын шуыса?

⁴ Кызьы ӟеч иворез вераммы Инмарлы чылкыт нимзэ берыктыны юрттэ? Инмарлэсь нимзэ ми чылкытгес карыны ум быгатӥське, малы ке шуоно со котьма ласянь чылкыт ини. Но учке, мар гожтӥз Исаия пророк: «Саваоф Кузё-Инмарез гинэ, дун-сьӧлыктэм шуыса, сӥлы каре» (Ис. 8:13). Ми Инмарлы пӧртэм сямен чылкыт нимзэ берыктӥськомы. Одӥгез амал, кызьы ми сое лэсьтӥськомы,— ми солэсь нимзэ мукет нимъёслэсь висъяськомы но юрттӥськомы адямиослы валаны, солэн нимыз чылкыт шуыса (Матф. 6:9). Кызьы? Кылсярысь, ми вераськомы адямиослы Иеговалэн умой сямъёсыз сярысь но вераськомы, Инмарлэн малпамезъя, адямиос райын пырак дауръёс ӵоже улозы шуыса. Озьы ми Инмарлэсь нимзэ утиськомы, малы ке шуоно Шайтан, Инмар сярысь кыл вӧлдыса, солэсь нимзэ сьӧдманы тырше (Ул.-выл. 3:1—5). Со сяна, ми Инмарлэсь чылкыт нимзэ берыктӥськомы, куке ми палан улӥсь адямиослы валаны юрттӥськомы, Иегова «данлыкез, сӥ-данэз, кужымез басьтыны ярась» шуыса (Усьт. 4:11). Тани мар вера Руне вын-агай, кудӥз 16 ар пионер луыса ужа-тырше: «Куке мон малпасько, мыным луонлык сётэмын вал шуыса быдэс Дуннеез Кылдытӥсьлэн адӟись-ивортӥсез луыны, сюлмы тау каронэн пачылме. Со мынэсьтым мылкыдме ӝутэ азьланяз но ӟеч иворез вераны».

5. Кыӵе муг сярысь верамын Иоаннлэсь 15:9, 10, малы ми ӟеч иворез вераськомы? б) Кызьы Иисус пусйиз, макем кулэ юн кыльыны?

⁵ Лыдӟе Иоаннлэсь 15:9, 10. Ми сюлмысь яратӥськомы Иеговаез но Иисусэз. Таиз мукетыз муг, малы ми Эксэйлык сярысь ӟеч иворез вераськомы (Марк 12:30; Иоанн 14:15). Иисус дышетскисьёсызлы шуиз: «Мынам яратонэным улэлэ». Нош малы? Азьланяз но Христослэн дышетскисез луон понна, чидан кулэ. Иоаннлэсь 15:4—10 Иисус виноградпуд сярысь мадёнэз валэктэ. Отын со трос пол  «улыны» кылэз пӧртэм формаосын кутэ. Озьы Иисус пусъе, макем кулэ юн кыльыны.

6. Кызьы возьматоно, милям Христослэн яратонэныз улэммы потэ шуыса?

⁶ Кызьы ми возьматыны быгатӥськомы, Христослэн яратонэныз улэммы потэ шуыса но ми солы ярамон луиськомы шуыса? Со понна Иисуслэсь курон-косонъёссэ быдэсъяно. Аслаз кылъёсыныз солэн верамез потэ вал: «Кылзӥське мынэсьтым». Иисус куриз милемыз карыны сое, мае со ачиз каре вал. Со вераз: «Мон но Аслам Атаелэсь курон-косонъёссэ быдэсъяй но соин ик Солэн яратоназ улӥсько». Та удысын Иисус милемлы пример возьматэ (Иоанн 13:15).

7. Кызьы яратон но кылзӥськон сям ог-огенызы герӟаськемын?

⁷ Иисус пусйиз, кылзӥськон сям яратонэн герӟаськемын шуыса. Со вераз апостолъёсызлы: «Кин Мынэсьтым курон-косонъёсме кабыл басьтэ но соосты быдэсъя ке, со Монэ яратэ» (Иоанн 14:21). Иисуслэн курон-косонъёсыз Инмар бордысь пото. Соин ик, Иисуслэн ӟеч иворез вераны косонэзлэсь кылзӥськиськомы ке, возьматӥськомы, Инмарез яратӥськомы шуыса (Матф. 17:5; Иоанн 8:28). Милесьтым яратэммес адӟыса, Иегова но Иисус милемыз но яратозы.

8, 9. а) Вералэ эшшо одӥг мугез, малы ми тодытӥськомы. б) Кызьы Иеговалэн кылъёсыз, кудъёсыз гожтэмын Иезекиильлэн 3:18, 19 но 18:23, милесьтым мылкыдмес ӝуто тодытыны?

⁸ Милям эшшо одӥг мугмы вань на, малы ми тодытӥськомы. Ми вераськомы адямиослы, Иеговалэн нуналыз матэктэ ини шуыса. Библиын Ной «тодытӥсь» шуыса нимамын. (Лыдӟе 2 Пётрлэсь 2:5.) Ву тудӟон азьын тодытыкуз, со адямиослы вераз, вылды, ӝоген лек дунне быдтэмын луоз шуыса. Малы озьы шуыны луоз? Учке, мар вераз Иисус: «Кызьы дуннеез ву нюртон нуналъёс азьын, Ной пыжаз пырытозь, сииллям, юиллям, кышнояськиллям, бызиллям, малпаллямтэ но, бадӟым ву лыктыса ваньзэс быдтытозь,— озьы ик луоз Адями Пилэн лыктонэз но» (Матф. 24:38, 39). Адямиос сое ӧз кылзэ ке но, Ной соослы Инмарлэсь иворзэ верамысь ӧз дугды.

 ⁹ Туннэ ми Эксэйлык сярысь ӟеч иворез вераськомы, ваньмыз мед тодозы шуыса, мар кароз Инмар азьланяз адямиос понна. Иегова сямен, милям но туж потэ, адямиос со иворез мед кылзозы но пырак дауръёс ӵоже улыны мед быгатозы шуыса (Иез. 18:23). Со дыре ик, куке ми коркась корка ветлыса но трос калыко интыосын тодытӥськомы, ми тросгес адямиослы вераны тыршиськомы, Инмарлэн Эксэйлыкез сьӧлыклэсь кышкасьтэм дуннеез быдтоз шуыса (Иез. 3:18, 19; Дан. 2:44; Усьт. 14:6, 7).

10. а) Кыӵе муг сярысь верамын Матфейлэсь 22:39, малы ми ӟеч иворез вераськомы? б) Вералэ, кызьы Павел но Сӥла Филиппы карын пытсэт возьмасьлы юрттӥзы.

¹⁰ Мукетыз муг, малы ми ӟеч иворез вераськомы,— ми матысьёсмес яратӥськомы (Матф. 22:39). Милемлы сётэм ужез быдэстэмысь ми ум дугдӥське, малы ке шуоно ми адямиосты яратӥськомы но валаськомы, соослэн югдуръёссы воштӥськыны быгато но соос ӟеч иворез кылзыны быгато шуыса. Тодамы ваёмы, мар луиз одӥг пол апостол Павелэн но Сӥлаен. Филиппы карын соосты пытсэтэ куштӥзы. Уйшоре музъем зурказ но, тюрьмалэн ӧсъёсыз усьтӥськизы. Пытсэт возьмась, пытсэтын пукисьёс пегӟизы кожаса, ассэ быдтыны малпа вал ини. Но Павел, бадӟым куаразэ поттыса, шуиз: «Астэ эн быдты». Куалектэм пытсэт возьмась Павеллэсь но Сӥлалэсь юаз: «Мар мыным кароно утиськон понна?» Соос солы шуизы: «Кузё-Инмарлы Иисус Христослы оскы» (Ап. уж. 16:25—34).

11, 12. а) Кызьы пытсэт возьмасен луэм учыр тодытон уженымы герӟаськемын? б) Малы милям азьланяз но ӟеч иворез вераммы потэ?

¹¹ Кызьы пытсэт возьмасен луэм учыр тодытон уженымы герӟаськемын? Висъялэ саклыктэс: пытсэт возьмасьлэн зэмлыкез тодэмез потӥз но со Павеллэсь но Сӥлалэсь юрттэт куриз музъем зуркам бере гинэ. Туннэ но куд-ог адямиос, кудъёсыз азьло Библиысь иворез уг кылзо вал, кылзыны кутско, куке улон соосты умой-умой «зуркатэ». Кылсярысь, кин ке но ужтэк кылиз, кудаз трос аръёс ужаз. Кин ке но кузпалэныз люкиськиз но нокызьы буйгатскыны уг быгаты. Нош кин ке но доры мур кайгырон вуиз, куке со висёнзэ тодӥз яке солэн матысь адямиез кулӥз. Курадӟонэн пумиськыса, куд-ог адямиос улонзы сярысь малпаськыны кутско но сыӵе юанъёс сётъяло, кудъёсыз сярысь соослэн кылэмзы но уг поты вал. Но ми соос доры лыктӥмы ке, соос, оло нош, нырысетӥзэ кылзозы ӟеч иворез, кудӥз оскиськон сётэ.

¹² Соин ик, ӟеч иворез верамысь ум ке дугдӥське, ми пумитаны быгатомы соосты, кинъёслы буйгатон кулэ но кинъёслэн милемыз кылзэмзы потоз (Ис. 61:1). Шарлотта, кудӥз 38 ар вань дырзэ сётыса ужа-тырше, вера: «Адямиос туннэ мар карыны паймемын. Соослы ӟеч иворез кылыны луонлык сётоно». Нош тани мар вера 34 ар пионер луыса ужась-тыршись Эйвор сузэр: «Туннэ адямиослэн мылкыдзы тужгес но куашкамын. Мынам соослы туж юрттэме потэ! Тӥни малы мон соос доры мынӥсько». Зэм, адямиосты яратон — со туж кулэ луись муг азьланяз но ӟеч иворез вераны.

13, 14. а) Иоаннлэсь 15:11 верамъя, мар юрттэ милемлы ӟеч иворез вераны? б) Кызьы ми, Иисус сямен ик, шумпотыны быгатомы? в) Кызьы шумпотон ужаны-тыршыны юрттэ?

¹³ Кулон азяз ӝытэ Иисус вераз апостолъёсызлы, мар соослы чиданэнызы емыш вайыны юрттыны кулэ вал. Мар сярысь со вераз но кызьы со милемлы юрттыны быгатоз?

¹⁴ Шумпотон. Луоз-а вераны, Иисуслэн ӟеч иворез тодытыны косонэз — со секыт уж шуыса? Уз, малы ке шуоно, виноградпуд сярысь мадёнэз вераса, Иисус оскытӥз дышетскисьёссэ, Эксэйлык сярысь ӟеч иворез веран соослы шумпотон ваёз шуыса. (Лыдӟе Иоаннлэсь 15:11.) Мукет сямен вераса, со оскытӥз, ми но озьы ик шумпотомы шуыса, кызьы со шумпотӥз, куке Иеговалэсь эриксэ быдэсъяз. Мае солэн верамез потэ вал? Кызьы верамын вал ини, Иисус ассэ виноградпудэн ӵошатӥз, нош дышетскисьёссэ — вайёсыныз. Виноградлэн пудэз ӧз луы ке, ву вайёсыз доры уз вуы. Со выллем ик ми но, Иисус бордын улӥмы ке, озьы ик шумпотомы, кызьы Иисус шумпотӥз (Иоанн 4:34; 17:13; 1 Пётр 2:21). Тани мар вера Ханне сузэр, кудӥз 40 арлэсь кемагес пионер луыса ужа-тырше: «Шумпотон, кудзэ мон ужаса-тыршыса басьтӥсько, юрттэ мыным ӟеч иворез вераны». Зэмзэ ик, шумпотон милемлы кужым сётэ но юрттэ Иеговалы ужаны-тыршыны отын но, кытын со капчи ӧвӧл (Матф. 5:10—12).

15. Мар сярысь вера Иисус Иоаннлэсь 14:27? б) Кызьы каньыллык юрттэ милемлы ужан-тыршонын емыш вайыны?

¹⁵ Каньыллык. (Лыдӟе Иоаннлэсь 14:27.) Кулон азяз ӝытэ ик, кӧнялы ке азьлогес, Иисус вераз апостолъёсызлы: «Аслэсьтым каньыллыкме тӥледлы сётӥсько». Кызьы Христослэн каньыллыкез юрттэ милемлы ужан-тыршонын емыш вайыны? Номырлы сётскытэк Иеговалы ужаса-тыршыса, ми сюлмамы каньыллык шӧдӥськомы, малы ке шуоно ми тодӥськомы, Иеговаез но Иисусэз шумпоттӥськомы шуыса (Пс. 149:4; Рим. 5:3, 4; Кол. 3:15). Ульф нимо вын-агай, кудӥз 45 ар вань дырзэ сётыса ужа-тырше, вера: «Ӟеч иворез вераса, жадисько ке но, со мыным туж бадӟым шумпотон вае,  но мон шӧдӥсько, улонэ юнме уг ортчы шуыса». Ми туж тау кариськомы сюлмысьтымы каньыллык понна!

16. а) Иоаннлэсь 15:15 верамъя, кыӵе луонлыксы вал апостолъёслэн? б) Мар кароно вал апостолъёслы, азьланяз но Иисуслэн эшъёсыз луон понна?

¹⁶ Иисусэн эшъяськон. Иисус апостолъёсызлы вераз, соос солэсь шумпотонзэ ас вылазы шӧдыны быгато шуыса, но валэктӥз, макем кулэ нырысь мукетъёссэ яратыны (Иоанн 15:11—13). Собере со шуиз соослы: «Мон тӥледыз эшъёс шуыса нимай». Малпалэ ай: апостолъёс Иисуслэн эшъёсыз луыны быгато вал! Азьланяз но солэн эшъёсыз луон понна, соос «емыш вайыны» кулэ вал. (Лыдӟе Иоаннлэсь 15:14—16.) Ог кык ар солэсь азьло Иисус вераз апостолъёсызлы: «Мынэлэ, Ин Эксэйлык матэктӥз шуыса тодытэлэ» (Матф. 10:7). Нош кулон азяз ӝытэ со соослэсь мылкыдзэс ӝутӥз мытэм ужзэс азьланьтыны (Матф. 24:13; Марк 3:14). Иисуслэн сётэм ужез капчи ӧй вал, озьы ке но соос быгато вал сое быдэстыны но азьланяз но солэн эшъёсыз луыны. Мар юрттӥз соослы?

17, 18. а) Иисуслэн кыӵе оскытонэз гожтэмын Иоаннлэсь 15:16? б) Кызьы со оскытон соослы юрттӥз? в) Мар юрттэ милемлы азьланяз но ӟеч иворез вераны?

¹⁷ Вӧсяськонъёсты кылзон. Иисус вераз: «Мынам нимыным мае гинэ Атаелэсь уд куре, Со тӥледлы ваньзэ сётоз» (Иоанн 15:16). Солэн кылъёсыз апостолъёсты юнматӥзы но кужым сётӥзы, луоз a. Соос пумозяз уг валало вал ке но, Иисус ӝоген кулоз шуыса, солэн кылъёсыз оскытӥзы апостолъёсты, соос юрттэттэк уз кыле шуыса. Иегова дась вал кылыны соослэсь юрттэт куремзэс но котьку юрттыны соослы, соос азьланяз но Эксэйлык сярысь иворез вераны мед быгатозы шуыса. Ӝоген соос ас вылазы сое шӧдӥзы (Ап. уж. 4:29, 31).

¹⁸ Туннэ номыр ӧз воштӥськы. Ужан-тыршонын чиданэнымы емыш вайиськомы ке, ми азьланяз но Христослэн эшъёсыз луомы. Со сяна, Эксэйлык сярысь ӟеч иворез веракумы шуг-секытъёсын пумиськимы ке, Иегова одно ик кылоз солэсь юрттэт курыса вӧсяськеммес (Флп. 4:13). Милям сюлэмъёсмы тау каронэн пачылмо, малы ке шуоно Иегова милесьтым вӧсяськонъёсмес кылэ но ми Иисуслэн эшъёсыз луыны быгатӥськомы. Со юрттэ милемлы азьланяз но ужан-тыршонын емыш вайыны (Иак. 1:17).

19. а) Малы ми ӟеч иворез верамысь ум дугдӥське? б) Мар юрттэ милемлы со ужез быдэстыны?

¹⁹ Та статьяын ми эскеримы мугъёсты, малы ми ӟеч иворез верамысь ум дугдӥське: милям потэ Иеговаез данъяммы, солэсь чылкыт нимзэ берыктэммы, Иеговаез но Иисусэз яратэммес возьматэммы, адямиослы мар луонэз сярысь вераммы но матысьёсмес яратэммы. Нош шумпотон, каньыллык, Иисусэн эшъяськон но Иегова вӧсяськеммес кылзэ шуыса тодон юнмато милемыз но юртто милемлы Инмарлэсь сётэм ужзэ быдэстыны. Макем шумпотэ Иегова, кужыммес жалятэк емыш ваеммес адӟыса!