1. Малы куд-ог вын-агайёслэн но сузэр-апайёслэн Библиез эскеремзы уг поты?

 ТУННЭ адямиослы коньдон поттыны туж секыт. Тросэз вын-агайёс но сузэр-апайёс трос ужало, семьязэс сюдон понна. Куд-ог христианъёс нуналлы быдэ сюрес вылын кӧня ке часъёс ортчыто, уж доразы мынон понна но берен бертон понна. Нош кинлы ке но, трос кужымзэ поныса, секыт ужано луэ. Нуналлэн пумаз соос сокем жадемын луо, мае ке эскерон понна соослэн кужымзы но уг кыльы ни.

2. Ку тӥ дыр шедьтӥськоды эскерон понна?

² Озьы ке но милемлы дыр висъяны кулэ, Инмарлэсь Кылзэ но со вылэ пыкиськыса гожтэм публикациосты эскерон понна — мур эскерон понна. Солы луыса ми быгатомы Иеговаен матысь кусыпъёс возьыны но пырак улыны (1 Тим. 4:15, 16). Тае валаса, кин ке но котькуд ӵукна вазьгес султэ но эскерон ортчытэ, малы ке шуоно нокин но уг люкеты но изем бере йыр умой ужа. Нош куд-огъёсыз ӝыт кӧня ке минут висъяло, шыпыт интыын Библиез но со вылэ пыкиськыса гожтэм публикациосты эскерон понна но соос вылын малпаськон понна.

3, 4. Кыӵе воштӥськонъёс лэсьтэмын вал, печатлам но электрон публикациосты ӧжытгес поттон понна, но малы?

³ Тӥ соглаш луоды, вылды, эскеронлы дыр висъяны туж кулэ шуыса. Нош мае эскероно? Тӥ вералоды, дыр: «Мон уг вуиськы лыдӟыны ваньзэ, мармы милям вань». Зэм но, котькудӥзлэн ик уг пӧрмы лыдӟыны ваньзэ, мае поттэ Иеговалэн организациез, но учкыны ваньзэ, мар потэ сайтамы но интернет-телевидениямы. Кивалтӥсь кенеш сое вала. Соин ик ужпум кутэмын вал печатлам но электрон публикациосты ӧжытгес поттыны.

 ⁴ Кылсярысь, «Иеговалэн Адӟись-Ивортӥсьёсызлэн арлы быдэ потӥсь книгазы» уг поттӥськы ини, малы ке шуоно трос мылкыдэз ӝутӥсь учыръёсты али шедьтыны луэ jw.org сайтысь но интернет-телевидениын котькуд толэзе потӥсь программаосысь. Вӧлмытон понна поттэм «Возьмаськон башня» но «Сайкалэ!» табере араз куинь пол гинэ пото. Таӵе воштӥськонъёс лэсьтэмын ӧй вал, милям мукет ужъёсты быдэсъяны дырмы мед луоз шуыса. Соос лэсьтэмын вал, ми ӟечезлы, яке духовной ужъёслы, тросгес саклыкмес мед висъяломы шуыса (Флп. 1:10). Ойдолэ вераськомы, кыӵе ужъёсты нырысетӥ интые пуктоно но кызьы ми ас поннамы Библиез эскеронысь тросгес пайда басьтыны быгатомы.

5, 6. Мае милемлы эскерыны тыршоно?

⁵ Мае нырысь ик эскероно? Милемлы котькуд нунал Инмарлэсь Кылзэ эскерыны кулэ. Табере ӧжытгес луизы Библиысь люкетъёс, кудъёсыз эскерисько арня куспын ортчись пумиськонын. Солы луыса милям тросгес дырмы луиз лыдӟеммы вылын малпаськыны но со сярысь тросгес тодыны, публикациосмес лыдӟыса. Милемлы та кылбуръёсты огшоры гинэ лыдӟоно ӧвӧл. Нош милемлы тыршоно, Библиысь зэмлык сюлмамы мед пыроз шуыса но Иеговаен эшъяськонмес мед юнматоз шуыса (Пс. 18:15).

⁶ Со сяна, милемлы саклыкмес висъяно, «Возьмаськон башняез» эскеронлы но арня куспын ортчись пумиськонлы дасяськон понна. Озьы ик милемлы выль потэм «Возьмаськон башня» но «Сайкалэ!» журналъёсты лыдӟоно.

7. Малы сюлмаськоно ӧвӧл, куке тӥ уд быгатӥське лыдӟыны но учкыны ваньзэ, мармы милям вань сайтамы но интернет-телевидениямы?

⁷ «Умой,— тӥ шуоды, дыр.— Нош мар кароно соин, мар вань сайтамы но интернет-телевидениямы? Отын маиз но ӧвӧл!» Эскеромы одӥг примерез. Тӥ лыктӥды ресторанэ, кудаз ӝӧк выл трос сиён пуктэмын. Тӥ азьын сомында ческыт сиён, кудзэ бырйыны ик уд тодӥське. Но тӥ валаськоды: ваньзэ сиемды уз луы, соин ик куд-ог сиёнъёсты гинэ бырйиськоды. Озьы ик духовной сиёнэн но: тӥ уд ке вуиське лыдӟыны но учкыны ваньзэ, мармы милям вань сайтамы но интернет-телевидениямы, эн сюлмаське. Лэсьтэ сое, мае быгатӥськоды. Али вераськомы, кызьы эскеронэз ортчытоно но мар юрттоз сое пайдаёгес карыны.

8. Кызьы ми дасяськыны быгатӥськомы «Возьмаськон башняез» эскеронлы но кыӵе пайда со милемлы ваёз?

⁸ Эскерон — со кыӵе ке ужпумен малпаськыса лыдӟиськон. Эскерон дыръя ми огшоры гинэ ум лыдӟиське но валэктонъёсты гинэ ум пусйиське. Кылсярысь, «Возьмаськон башняез» эскеронлы дасяськыкуды, малпаське, мар сярысь вераськоз та статьяын, озьы ик эскере статьялэсь нимзэ, подзаголовокъёссэ но тодэ ваён понна юанъёссэ. Собере дыртытэк, малпаськыса лыдӟе статьяез. Лыдӟыкуды валтӥсь малпанъёсты шедьтэ (ӵем дыръя соос абзацлэн кутсконаз луо). Ӵемысь соос валаны юртто, мар сярысь абзацын вераськоз. Статьяез лыдӟыкуды, малпаське, кызьы котькуд абзац подзаголовокен но статьялэн валтӥсь малпанэныз герӟаськемын. Гожтэ кылъёсты но малпанъёсты, кудъёсыз тӥледлы тодмо ӧвӧл но кудъёсыз сярысь тӥляд тросгес тодэмды потэ.

9. а) Малы Библиысь кылбуръёслы нимысьтыз саклык висъяны кулэ, «Возьмаськон башняез» эскеронлы дасяськыку, но кызьы сое лэсьтоно? б) Библиысь кылбуръёсты лыдӟем сяна, мар эшшо кароно на, Псалтирез 118:27 лыдэ басьтыса?

⁹ «Возьмаськон башняез» эскерон — со Библиез эскерон. Соин ик саклыктэс висъялэ Библиысь кылбуръёслы, тужгес но соосызлы, кудъёссэ лыдӟозы пумиськонын. Малпаське, кызьы со кылбуръёсысь валтӥсь кылъёс  валэкто абзацысь малпанэз. Со сяна, дыр висъялэ лыдӟем кылбуръёс вылын малпаськонлы но солы, кызьы тӥ сое улонады кутыны быгатӥськоды. (Лыдӟе Псалтирез 118:27.)

10. Малы семьяен йыбырттонзы дыръя анай-атайёслы нылпиоссэс дышетыны кулэ Библиез эскерыны, кенешлэн пумиськонъёсызлы дасяськыны но эскеронэз ортчытъяны, Еврейёслы 5:14 лыдэ басьтыса?

¹⁰ Валамон: анай-атайёслэн потэ, семьяен йыбырттонзы нылпиоссылы шумпотон мед ваёз шуыса. Анай-атайёслы котьку малпаськоно, мае соос нылпиосынызы семьяен йыбырттонзы дыръя эскерозы, нош котькуд арняе маке но аспӧртэмлыкозэ малпаны одно ик кулэ ӧвӧл. Семьяен йыбырттон дыръя луонлык вань интернет-телевидениысьтымы котькуд толэзе потӥсь программаез учкыны но куддыръя тунсыко ужъёсты быдэсъяны, кылсярысь, Нойлэсь ковчегзэ лэсьтыны. Со сяна, туж кулэ нылпиосты дышетыны Библиез эскерыны. Кылсярысь, соослы возьматыны кулэ, кызьы кенешлэн пумиськонъёсызлы дасяськоно но кызьы эскерыны луэ со юанъёсты, кудъёсыз школаын кылдыны быгато. (Лыдӟе Еврейёслы 5:14.) Библиысь кыӵе ке юанъёсты эскерон понна нылпиос дыр висъяло ке, соослы капчигес луоз валаны сое, мае соос кыло кенешлэн пумиськонъёсаз но конгрессъёсын, малы ке шуоно отын видеороликъёсты котьку ик уг возьмато. Нош кӧня дыр висъяны кулэ семьяен йыбырттонлы? Со герӟаськемын соин, кӧня арес нылпиослы но кыӵе соослэн быгатонлыкъёссы.

11. Малы дышетыны кулэ Библиез мур эскерыны соосты, кинъёсын Библиез дышетӥськомы?

¹¹ Кинэ эшшо дышетоно на Библиез эскерыны? Соосты, кинъёсын ми Библиез дышетӥськомы. Ми шумпотӥськомы, Библиез дышетыны кутскемзы бере, дышетонлы яке кенешлэн пумиськонъёсызлы дасяськыкузы, соос валэктонъёсты пусъё ке. Озьы ке но милемлы кутсконысеныз ик дышетоно соосты ас понназы эскерон ортчытъяны но Библиез мур эскерыны. Соку, шуг-секытэн пумиськыкузы, соос кенешын мукетъёсызлэсь уз юалэ, кыӵе ужпум кутоно, нош соос асьсэос тодозы, кызьы пайдаё визь-кенеш шедьтоно, публикациосмес эскерыса.

12. Кыӵе ужпумъёсмы милям луыны быгато, Библиез эскерыкумы?

¹² Нош мар, эскерон ортчытъяны тӥледлы туж ик уг кельшы ке? Луэ-а мае ке воштыны? Луэ. Нырысь тӥ эскеронлы кӧня ке дыр висъяны быгатӥськоды, нош собере висъям дырез пичиен будэтыны луэ. Тодады возе, кыӵе ужпумен тӥ Библиез эскериськоды. Валтӥсь ужпуммы — Иеговаен эшъяськонмес юнматон,  нош вань на мукет ужпумъёс но. Куддыръя милемлы сётэм юанлы валэктон шедьтоно, нош куддыръя — эскерон ортчытоно, кылдэм шуг-секытэз сэрттон-пертчон понна.

13. а) Кызьы школаын дышетскись дасяськыны быгатэ оскемез сярысь вераны ӵош дышетскисьёсызлы? б) Кызьы тӥ улонады кутыны быгатӥськоды Колоссыослы 4:6?

¹³ Кылсярысь, тӥ школаын дышетскиськоды но классады ваньмыз эволюцилы оско. Тӥ валэктысалды, малы та пумысен дышетэ Библия, но тӥ малпаськоды, дыр, тодон-валанды тырмыт ӧвӧл шуыса. Со умой муг луэ эскерон ортчытыны. Со понна тӥляд кык ужпумды вань: нырысетӥез, оскондэс юнматыны, ваньзэ Инмар кылдытӥз шуыса, но кыкетӥез, дышетскыны умойгес валэктыны сое, малы дышетэ Библия (1 Пётр 3:15; Рим. 1:20). Нырысь малпаське, малы ӵош дышетскисьёсты верало, соос эволюцилы оско шуыса. Собере эскере, мар гожтэмын та юан пумысен публикациосамы. Тӥ малпаны быгатоды, оскемды сярысь валэктыны секыт шуыса. Нош, зэмзэ вераса, со сокем секыт ӧвӧл. Тросэз эволюцилы оско, малы ке шуоно кыӵе ке адями, кудзэ соос гажало, вераз, со зэм луэ шуыса. Библиысь зэмлыкез валэктӥсь одӥг-кык малпанэз шедьтӥды ке, тӥ сое вераны быгатоды солы, кинлэн зэмлыкез тодэмез потэ. (Лыдӟе Колоссыослы 4:6.)

14—16. а) Мар юрттоз милемлы тросгес тодыны Библиысь книгаос сярысь, кудъёсыныз ми туж ик умой тодмо ӧвӧл? б) Кызьы 16-тӥ абзацлэн пумаз гожтэм кылбуръёс Амослэн книгаез сярысь тросгес тодыны юртто? (Озьы ик учке « Пуктэ син азяды адямиосты, кудъёсыз сярысь Библиын гожтэмын!» рамкаез.)

¹⁴ Шуом, кенешлэн вуоно пумиськоназ ми лыдӟомы но эскеромы Библиысь книгаез, кудзэ гожтӥз «пичи пророкъёс» b пӧлысь одӥгез, но тӥледлы со книга туж ик тодмо ӧвӧл. Тырше тросгес тунсыкъяськыны со сярысь, мае гожъяз та пророк. Кызьы сое лэсьтоно?

¹⁵ Нырысь асьтэлэсь юалэ: «Мае мон тодӥсько со адями сярысь, кудӥз та книгаез гожтӥз? Кин со вал, кытын улӥз но мар кариз?» Та пророк сярысь тросгес тодыса, тӥ валалоды, малы со кыӵе ке кылъёсты яке примеръёсты уже кутылӥз? Солэсь книгазэ лыдӟыкуды, саклыктэс висъялэ кылъёслы, кудъёсыз возьмато, кыӵе сямо адями со вал.

¹⁶ Со сяна, пайдаё луоз тодыны, ку та книга гожтэмын вал. Со секыт ӧвӧл. Со сярысь тодыны луоз «Священной Гожтэмысь — Выль дуннелэн берыктэмысьтыз» (ӟуч), кудӥзлэн пумаз вань «Библиысь книгаосын таблица». Озьы ик учкыны луоз «Инмарлэн Кылыз мутусъёсын но схемаосын» брошюраысь (ӟуч) «Иудалэн но Израильлэн пророкъёсыз но эксэйёсыз» схемаез. Та книгаын азьпалзэ ивортонъёс гожтэмын бере, умой луысал тодыны, кыӵе югдур вал со дыръёсы. Кыӵе урод мылпотонъёслэсь но ужъёслэсь пророк куштӥськыны куриз? Кин улӥз та пророк улон нуналъёсы? Быдэс югдурез умойгес валан понна, Библиысь мукет книгаослы но саклыкез висъяны луоз, вылды. Кылсярысь, умойгес валан понна, кыӵе югдур вал Амос пророк улон дыръёсы, умой луоз учкыны 4 Эксэйлыкъёслэн книгаысьтызы но 2 Паралипоменон книгаысь кылбуръёсты, кудъёссэ шедьтыны луэ Амослэн книгаысьтыз 1-тӥ люкетысь 1-тӥ кылбурлы ватсам кылбуръёс c пӧлысь. Озьы ик тодэ вайыны луоз Осиялэсь гожтэмзэ, кудӥз Амосэн одӥг дыре улӥз, вылды. Со тӥледлы умойгес валаны юрттоз, кыӵе югдур вал Амос улон дыръёсы (4 Экс. 14:25—28; 2 Пар. 26:1—15; Ос. 1:1—11; Ам. 1:1).

17, 18. Кызьы эскеронэз тунсыкогес карыны луэ, син азе йӧтӥсьтэм малпанъёслы саклыкез висъяса? Уже кутэ абзацын гожтэм яке асьтэлэн улонысьтыды примеръёсты.

¹⁷ Умой луоз, Библиез лыдӟыкумы, тросгес тодыны мылкыдмы луысал ке. Кылсярысь, ми лыдӟиськомы Захариялэн книгаысьтыз 12-тӥ люкетэз, кудаз Мессиялэн кулонэз сярысь азьпалзэ ивортон гожтэмын (Зах. 12:10). 12-тӥ кылбурын вераське, Мессиялэн кулонэз пумысен «Нафан юртлэн выжыез» викышъяса бӧрдоз шуыса. Та кылъёслы, кудъёсыз соку ик син азе уг йӧто, ӧжыт саклык висъям интые, умой луысал дугдыны но малпаськыны: «Кызьы герӟаськемын Нафанлэн но Мессиялэн юртъёссы? Кытысь со сярысь тросгес тодыны луоз?» Пичияк эскерон ортчытомы. Кылсярысь, тӥ быгатӥськоды учкыны «Священной Гожтэмысь — Выль дуннелэн берыктэмысьтыз» (ӟуч) ватсам кылбуръёсты. Захариялэн книгаяз 12:12 Нафан кыллы вань кык ватсам кылбуръёс. Нырысетӥез соос пӧлысь — 2 Эксэйлыкъёслэн 5:14, кудӥз валаны юрттэ, Нафан — со Давид эксэйлэн пиез шуыса. Кыкетӥез — Лука 3:31, кытысь тодыны луэ: Иисус вордӥськиз Мариялэсь, кудӥз Нафанлэн выжыысьтыз потӥз d. Со туж тунсыко! Азьпалзэ ивортонысь ми тодӥськомы, Мессия Давидлэн выжыысьтыз потыны кулэ вал шуыса (Матф. 22:42). Нош Давидлэн 20-лэсь тросгес пиосыз вал. Паймымон ӧвӧл-а, Захария Нафанлэсь юртсэ пыртӥз шуыса соос пӧлы, кинъёс Иисуслэн кулонэз пумысен бӧрдозы?

¹⁸ Нош тани эшшо одӥг пример. Лукалэн ӟеч иворысьтыз 1-тӥ люкетысь ми лыдӟиськомы со сярысь, мае Гавриил кылчин вераз Мариялы солэн вордӥськоно пиез сярысь: «Со луоз быдӟым, Вылысь Инмарлэн Пиез шуыса нимаськоз.  Солы Инмар Кузё-Инмар Давидлэсь, Солэн атаезлэсь, эксэй пуконзэ сётоз. Пумтэм дауръёс ӵоже Иаковлэн юртэзлы Со эксэй луыса пукоз» (Лука 1:32, 33). Ӵем дыръя ми саклыкмес висъяськомы Гаврииллэн верамысьтыз нырысетӥ люкетэзлы, Иисус «Вылысь Инмарлэн Пиез» нимаськоз шуыса. Нош Гавриил озьы ик вераз на, Иисус эксэй луоз шуыса. Малпаськыны луоз, кыӵе малпанъёсыз кылдыны быгатӥзы Мариялэн та кылъёсты кылэмез бере. Малпаз-а со, Иисус Иродэз яке со интые пуксем эксэйёсты воштоз шуыса? Мария малпаны быгатысал: «Иисус зэмзэ ик эксэй луиз ке, мон эксэйлэн анаез луо но быдэс семьяе эксэй юртын улоз». Но Библиын нокытын но гожтэмын ӧвӧл, Мария со выллем кылъёсты Гаврииллы вераз шуыса. Со сяна, Иаковен но Иоаннэн ӵошатыса, Инмарлэн Эксэйлыказ Мария аслыз бадӟым инты ноку но ӧз куры (Матф. 20:20—23). Та малпан, кудӥз син азе соку ик уг йӧты, эшшо одӥг пол возьматэ на, Мария туж востэм адями вал шуыса.

19, 20. Кыӵе милям ужпумъёсмы луыны кулэ, Библиез эскерыкумы, Иаковлэсь 1:22—25 но 4:8 лыдэ басьтыса?

¹⁹ Тодады возе: Инмарлэсь Кылзэ но со вылэ пыкиськыса гожтэм публикациосты эскеронлэн валтӥсь ужпумез — Иеговаен эшъяськонмес юнматон. Озьы ик милям умойгес валаммы потэ, кыӵеесь ми зэмзэ ик луиськомы но мае милемлы воштоно, Инмарез шумпоттон понна. (Лыдӟе Иаковлэсь 1:22—25; 4:8.) Котькуд эскеронэз ортчытон азьын милемлы Иеговалы вӧсяськоно, солэсь святой духсэ курыса. Милемлы Инмарлэсь юрттэтсэ куроно, лыдӟемысьтымы тросгес пайда мед басьтомы но ас шорамы солэн синъёсыныз мед учкомы шуыса.

²⁰ Милям адӟем кареммы потэ Инмарлэн ужась-тыршисезлэсь, кудӥз сярысь псаломъёсты гожъясь вераз: «Кузё-Инмарлэн законэз бордын солэн вань мылкыдыз, Солэсь законзэ со уй но, нунал но дышетэ! ...Котькыӵе ужын, мар гинэ со уг лэсьты, азинлыкез вань» (Пс. 1:2, 3).