1, 2. а) Кыӵе пример вылын адӟиське, милемлы ваньмылы буйгатон кулэ но ми мукетъёссэ буйгатыны быгатӥськомы шуыса? б) Маин пумиськоно луиз куд-ог нылпиослы?

 МИЛЕМЛЫ ваньмылы буйгатон кулэ, но котькуд адями мукетъёссэ буйгатыны быгатэ. Куке нылпи шудыкуз усе но пыдзэ шукке, со анаез яке атаез доры бӧрдыса бызе. Анай но атай нылпилэсь яразэ соку ик бурмытыны уг быгато ке но, соос нылпизэс буйгатыны быгато. Соос юало солэсь, мар луиз шуыса, синкылиоссэ ӵушо, ӟыгырто сое, лякыт но ӟеч кылъёс верало, озьы ик яразэ эмъяло но бинё. Но тани нылпи уг бӧрды ни но нош ик шудыны бызе. Дыр ортчыса, яраез бурме.

² Нош куддыръя нылпиос золгес вӧсь луо. Куд-огъёсыз эриктэманэн пумисько. Соосты одӥг пол эриктэманы быгато, нош куддыръя трос аръёс ӵоже. Кызьы гинэ медам луы, нылпиослэсь сюлэмзэс со туж вӧсь каре. Одӥг учыръёсын эриктэман сярысь тодмо луэ но, эриктэмасез пытсэтэ пукто. Мукет учыръёсын со кыл кутытэк кыле. Эриктэмасез соку ик кыл кутыто ке но, нылпи будэм бераз но эриктэманлэн кышкыт бервылъёсыныз пумиськыны быгатэ.

3. Мар каремез потэ Иеговалэн, 2 Коринфъёслы 1:3, 4 лыдэ басьтыса? Кыӵе юанъёсты ми эскеромы?

³ Кызьы юрттыны луэ христианъёслы, кудъёсыз пичи дыръязы эриктэманэн пумиськизы но кудъёссэ будэм беразы вӧсь карись тодэ ваёнъёс курадӟыто на? (Лыдӟе 2 Коринфъёслы 1:3, 4.) Иегова котькуд ужась-тыршисьсэ  дунъя, но солэн потэ, соос ас вылазы яратэмез но сюлмаськемез мед шӧдозы шуыса, кудъёсыз соослы туж кулэ. Ойдолэ эскеромы куинь юанъёсты: 1) Малы соослы, кинъёс пичи дыръязы эриктэманэн пумиськизы, буйгатон кулэ? 2) Кин соослы юрттыны быгатэ? 3) Кызьы соосты буйгатоно?

4, 5. а) Малы тодамы возёно, нылпиос, бадӟым муртъёсын ӵошатыса, эриктэман шоры мукет сямен учко шуыса? б) Мар луыны быгатэ, нылпи эриктэманэн пумиськиз ке?

⁴ Куддыръя соослы, кинъёс пичи дыръязы эриктэманэн пумиськизы, трос аръёс ортчыса но, буйгатон кулэ луэ. Малы со озьы валан понна, тодамы возёно, бадӟым муртъёсын ӵошатыса, нылпиос эриктэман шоры ӵем дыръя мукет сямен учко шуыса. Тани куд-ог мугъёс.

⁵ Нылпиослэн кулэяськонзы вань матысь но оскымон кусыпъёс возьыны соосын, кинъёс соосты будэто. Озьы соос кышкатэк улыны быгато но дышетско оскыны адямиослы, кудъёсыз соосты ярато. Жаляса верано луэ, но ӵем дыръя нылпиос эриктэманэн пумисько доразы, но соосты эриктэмась луыны быгатэ матысь ӵыжы-выжызы яке семьязылэн матысь эшез. Соин сэрен, аръёс ортчыса но, нылпилы мукетъёсызлы оскыны секыт луэ.

6. Кыӵе изъян вае нылпиослы эриктэман?

⁶ Нылпиос асьсэды утьыны уг быгато. Эриктэман — со кышкыт йыруж, кудӥз соосты туж вӧсь каре. Соос, кинъёс нылпиосты быдэ вуэмзылэсь азьло эриктэмало, соослы туж бадӟым изъян ваё. Соин сэрен нылпиослэн кылдыны быгатэ секс сярысь шонертэм малпанзы, асьсэды номырлы ярасьтэмен шӧдонзы, озьы ик соин сэрен соослы секыт адямиослы оскыны.

7. а) Малы эриктэмасьлы нылпиез пӧяны ӵем дыръя туж капчи луэ но кызьы со сое лэсьтыны быгатэ? б) Кытчы вуттыны быгатэ солэн пӧямез?

⁷ Нылпиос уг быгато, бадӟым муртъёс сямен, ваньзэ валаны, малпаськыны но кышкытлыклэсь палэнскыны (1 Кор. 13:11). Соин эриктэмасьёслы нылпиосты пӧяны туж капчи. Соос нылпиосты оскыто, соос асьсэос янгыш луо, сое нокинлы вераны уг яра, соослы нокин но уз оскы но уз юртты шуыса яке нылпиос но бадӟым муртъёс озьы ог-огзылы яратонзэс возьмато шуыса. Эриктэмасьлэн кылъёсыз пӧяськон луэ шуыса валан понна, нылпилы трос аръёс кулэ луоз, вылды. Луэм учыр сэрен нылпи будоз малпанэн, со номырлы ярасьтэм но кырсь шуыса, сое нокин но уз яраты но уз буйгаты шуыса.

8. Малы ми оскиськомы, Иегова курадӟисьёсты буйгатыны быгатэ шуыса?

⁸ Паймонэз ӧвӧл, нылпи эриктэманлэсь бервылъёссэ трос аръёс ӵоже шӧдыны быгатэ шуыса. Быдэс дунне вылысь нылпиос эриктэмасьёслэн ки улазы шедьыны быгато, но со возьматэ: ми улӥськомы берпум нуналъёсы, куке тросэз асьсэлэсь ӵыжы-выжыоссэс гажаны-жаляны уг быгато, нош «кескич адямиос, пӧяськисьёс эшшо но тросгес урод ужъёс» лэсьто (2 Тим. 3:1—5, 13). Шайтанлэн малпанъёсыз туж лекесь, но туж жаль адӟыны, кызьы адямиос лэсьто сое, мар солы кельше. Нош Иегова трослы кужмогес Шайтанлэсь но соослэсь, кинъёс солэсь эриксэ быдэсъяло. Инмар адӟе ваньзэ, мае Шайтан лэсьтэ. Оскыны луэ: Иегова туж умой вала, кызьы ми курадӟиськомы, но со милемыз буйгатыны быгатэ. Ми туж шумпотӥськомы, ужаськомы-тыршиськомы шуыса «гажан-жалянлэн Атаезлы, котькыӵе буйгатсконлэн Инмарезлы», кудӥз «котькыӵе куректон-кайгуосмы дыръя... асьмеды  буйгатэ, асьмеос но котькыӵе куректон-кайгуэ сюремъёсты Инмарлэн асьмелы сётэм буйгатонэныз буйгатыны мед быгатомы шуыса» (2 Кор. 1:3, 4). Кин пыр Иегова юрттыны быгатэ соослы, кинъёслы буйгатон кулэ?

9. Псалтирьын 26:10 гожтэмъя, кызьы Иегова сюлмаське со сярысь, кинэ анай-атаез эриктэманлэсь ӧз утьы?

⁹ Буйгатыны кулэ тужгес но сое, кинэ анай-атаез эриктэманлэсь ӧз утьы яке кинэ матысь адямиез эриктэмаз. Псаломъёсты гожъясь Давид тодӥз, Иегова котькинлэсь умой буйгатыны быгатэ шуыса. (Лыдӟе Псалтирез 26:10.) Давид оскиз: Иегова атай луэ соослы, кинъёс семьяязы лек ужъёсын пумиськизы. Кызьы со соосты буйгатэ? Аслаз оскымон ужась-тыршисьёсыз пыр. Асьмелэн огъя оскисьёсмы — со духовной семьямы. Одӥг пол Иисус вераз: «Кин быдэсъя Инмысь Атаелэсь эриксэ, со луэ Мыным брат но, сузэр но, анай но» (Матф. 12:48—50).

10. Мар гожтӥз апостол Павел тӧро луыса ужам-тыршемез сярысь?

¹⁰ Малпаськомы, маин христиан кенеш семьялы укша. Апостол Павел Инмарлы оскымон но тыршись тӧро вал. Со мукетъёсызлы туж умой адӟем карон возьматӥз, Инмар солэсь мылкыдзэ но ӝутӥз христианъёслы таӵе кылъёс гожтыны: «Мынэсьтым адӟем каре, кызьы мон Христослэсь адӟем карисько» (1 Кор. 11:1). Висъялэ саклыктэс, мар гожтӥз Павел тӧро луыса ужам-тыршемез сярысь: «Ми тӥ пӧлын зӥбыт-востэм улӥмы,— нунызэ нонтӥсь анай кадь, кызьы со лякытэн утялтэ аслэсьтыз нылпиоссэ» (1 Фес. 2:7). Асьме нуналъёсы тӧроос, яратӥсь анай кадь, лякыт но небыт кылъёсын, Библиез уже кутыса, буйгато соосты, кинлы юрттэт кулэ.

11. Малы эриктэманэн пумиськемъёсты, тӧроос сяна, мукетъёсыз но буйгатыны быгато?

¹¹ Эриктэманэн пумиськемъёсты, тӧроос сяна, мукетъёсыз но буйгатыны быгато. Ми  ваньмы сое лэсьтыны кулэ (1 Фес. 4:18). Юн осконэн сузэр-апайёс бадӟым юрттэт сётыны быгато со сузэръёслы, кудъёсызлы буйгатон кулэ. Тунсыко: Иегова ассэ ӵошатӥз анаен, кудӥз пизэ буйгатэ (Ис. 66:13). Библиын вераське кышномуртъёс сярысь, кудъёсыз куректӥсьёсты буйгатӥзы (Иов 42:11). Макем шумпотэ Иегова, куке адӟе, кызьы христиан кышномуртъёс юнмато соосты, кинъёслэн сюлэмзы куректэ! Куд-ог учыръёсын тӧроос курыны быгато юн осконэн сузэрез юрттыны со сузэрлы, кудӥзлы сыӵе юрттэт кулэ b.

12. Мар сярысь милемлы юано ӧвӧл?

¹² Куке ми тыршиськомы юрттыны вын-агайлы яке сузэр-апайлы, милемлы юано ӧвӧл со сярысь, мае солэн верамез уг поты (1 Фес. 4:11). Озьы ке но ми быгатӥськомы юрттыны соослы, кинъёслы буйгатон кулэ. Кызьы? Эскеромы Библия вылэ пыкиськыса сётэм вить визь-кенешъёсты.

13. 3 Эксэйлыкъёслэн 19:5—8 гожтэмъя, мар лэсьтӥз Иеговалэн кылчинэз Илиялы но кызьы ми солэсь адӟем карыны быгатӥськомы?

¹³ Сюлмаськемдэс уж вылын возьматэ. Улонзэ утён понна бызьыса кошкыкуз, Илия пророклэн сокем мылкыдыз куашкамын вал, солэн кулэмез но потӥз. Иегова со доры кужмо кылчинэз ыстӥз, но со лэсьтӥз сое, мар кулэ вал пророклы со дыре. Кылчин солы пӧсь сиён дасяз но сиськыны ӵектӥз. (Лыдӟе 3 Эксэйлыкъёслэсь 19:5—8.) Та учыр дышетэ милемыз кулэ луись зэмлыклы: пичи ӟеч уж адямилы туж бадӟым юрттэт луыны быгатэ. Адямилы сиён пӧраны, пичи кузьым лэсьтыны яке открытка гожтыны луоз. Мылкыдыз куашкам вын-агаез яке сузэр-апаез та ужъёс оскытозы, ми сое яратӥськомы но со сярысь сюлмаськиськомы шуыса. Милемлы соослэн шӧдонъёссы сярысь вераськыны умой уг поты ке но, ми быгатӥськомы соос сярысь сюлмаськеммес уж вылын возьматыны.

14. Малы дышетэ милемыз Илияен луэм учыр?

¹⁴ Юрттэ соослы каньыл сюлмын улыны но шӧдыны, соослы номыр кышкытлык уг вайы шуыса. Илияен луэм учыр милемыз эшшо малы ке но дышетыны быгатэ на. Иегова паймымон амалэн юрттӥз солы Хорив гурезёзь кузь сюресэз ортчыны. Та кыдёкысь интыын, кытын Иегова ас калыкеныз азьвыл тупанкыл кутӥз вал, Илия шӧдӥз, вылды, солы номыр кышкытлык уг вайы шуыса. Малы со милемыз дышетэ? Милям эриктэманэн пумиськем адямиез буйгатэммы потэ ке, нырысь солы шӧдыны юрттоно, солы номыр кышкытлык уг вайы шуыса. Кылсярысь, тӧроослы тодазы возёно: кинлы ке вераськыны умойгес потэ дораз, чай юыса, нош мукетъёсызлы — Эксэйлык юртын.

15, 16. Кызьы адямилы возьматоно, ми сое сак кылзӥськомы шуыса?

¹⁵ Соосты сак кылзэ. Библиын гожтэмын: «Котькудӥз адями кылзӥськись мед луоз, кыл вераны дыртӥсьтэм» (Иак. 1:19). Быгатӥськомы-а ми кылзыны? Ми малпаськомы, дыр, со понна трос кулэ ӧвӧл шуыса: тырмыт адямиен ӵош пукыны, со шоры учкыны но, номыр вератэк, сое кылзыны. Нош зэмзэ вераса, тросгес лэсьтыны кулэ. Кылсярысь, Иегова сак кылзӥз Илияез, куке со аслаз сюлмаськонъёсыз сярысь вераз. Иегова валаз: Илиялы кышкыт, со ассэ огназ кылемын шуыса шӧдэ но аслэсьтыз ужам-тыршемзэ пайда вайисьтэмен лыдъя. Инмар яратыса юрттӥз солы та шӧдонъёссэ  вормыны. Иегова возьматӥз, Илияез зэмзэ ик кылзӥз шуыса (3 Экс. 19:9—11, 15—18).

¹⁶ Кызьы милемлы гажам-жаляммес возьматоно, куке кин ке но милемлы сюлмаськонъёсыз сярысь вера? Куддыръя со понна кӧня ке шуныт кылъёс тырмыт луозы. Вераны луоз: «Макем вӧсь тае кылыны! Туж кышкыт, куке нылпиос сыӵе учыръёсы шедё!» Куддыръя луоз кӧня ке юанъёс сётыны, тӥ верась адямиез шонер валаськоды шуыса валан понна. Кылсярысь, юаны луоз: «Секыт ӧвӧл ке, валэкты вал, мар сярысь тон вераськод» яке «Мон шонер-а валай..?» Сыӵе кылъёс возьматозы, ми сое сак кылзӥськомы но валаны тыршиськомы шуыса (1 Кор. 13:4, 7).

17. Малы эриктэманэн пумиськем адямиез, чидаса но кыл куспаз пырытэк, кылзыны кулэ?

¹⁷ Со дыре ик верась адямилэн кыл куспаз эн пыре, сое тупатон понна яке солы визь-кенеш сётон понна. Чидаса кылзэ! Иеговалы сюлэмзэ усьтыкуз, Илиялы туж секыт вал. Берлогес, куке Иегова Илиялэсь осконзэ юнматӥз, со нош ик Инмарлы аслаз шӧдонъёсыз сярысь вераз, ӵапак со кылъёсты ик вераса (3 Экс. 19:9, 10, 13, 14). Малы со милемыз дышетэ? Куддыръя адями выльысь но выльысь шӧдонъёсыз сярысь вераны быгатэ. Соку Иеговалэсь адӟем кароно но чидаса сое кылзоно. Кыӵе ужпум кутоно шуыса верам интые, умойгес луоз гажан-жалянэз возьматыны (1 Пётр 3:8).

18. Кызьы милям вӧсяськонъёсмы мылкыдыз усем адямиез буйгатыны быгато?

¹⁸ Соосын ӵош вӧсяське. Куке адямилэн мылкыдыз туж куашкамын, солы вӧсяськыны секыт луэ. Сыӵе адями шӧдыны быгатэ, со Иеговаен вераськыны ярамон ӧвӧл шуыса. Сое буйгатон понна, ӵектыны луоз соин ӵош вӧсяськыны. Умой луысал вӧсяськонын солэсь нимзэ вераны. Иеговалы вераны луоз, макем юн ми та адямиез яратӥськомы но макем юн сое быдэс кенеш яратэ. Озьы ик Иеговаез курыны луоз, дуно  ужась-тыршисьсэ со мед буйгатоз но солы каньыл сюлэм мед сётоз шуыса. Сыӵе вӧсяськонъёс адямилэсь вӧсь луэмзэ капчиятыны быгато (Иак. 5:16).

19. Кызьы адямиез буйгатӥсь кылъёс быръёно?

¹⁹ Быръе кылъёс, кудъёсыз соосты буйгатыны быгатозы. Мае ке верамдылэсь азьло малпаське. Малпатэк верам кылъёс вӧсь каро, нош ӟеч кылъёс — эмъяло (Мад. 12:18). Соин ик вӧсяське Иеговалы, со тӥледлы ӟеч но буйгатӥсь кылъёс шедьтыны мед юрттоз шуыса. Тодады возе: тужгес но пайдаё кылъёс — со Иеговалэн кылъёсыз, кудъёсыз гожтэмын Библиын (Евр. 4:12).

20. Кызьы асьсэос шоры учко эриктэманэн пумиськемъёс но кызьы соослы юрттыны луэ?

²⁰ Эриктэманэн пумиськемъёс малпаны быгато, соос номырлы ярасьтэмесь но кырсесь шуыса, но соосты нокин но уг яраты но уг буйгаты шуыса. Нош со озьы ӧвӧл! Библиез уже кутыса, соосты оскытэ, макем юн яратэ соосты Иегова. (Учке « Библиысь буйгатон» рамкаез.) Тодады вае, кызьы Инмарлэн кылчинэз Даниил пророкез юнматӥз, куке солэн кужымез лябӟемын вал но мылкыдыз куашкамын вал. Иеговалэн потэ вал, Даниил мед тодоз шуыса, макем со та пророкез дунъяз (Дан. 10:2, 11, 19). Вын-агайёс но сузэр-апайёс, кудъёсызлэн сюлэмзы куректыса улэ, Иегова понна озьы ик дуно пото!

21. Мар луоз соосын, кинъёс йыруж лэсьто но уг ӧпкелё, но мар милемлы кароно, со дыр вуытозь?

²¹ Вын-агайёсты но сузэр-апайёсты буйгатыса, ми юрттӥськомы соослы тодазы возьыны, Иегова соосты яратэ шуыса. Со сяна, милемлы вунэтоно ӧвӧл: Иегова — со Инмар, кудӥз шонер судить каре. Иегова котькуд эриктэман учырез адӟе. Со ваньзэ адӟе но милемыз оскытэ, ӧпкелисьтэм йыруж лэсьтӥсьёсты кыл кутытэк уз кельты шуыса (Лыд. 14:18). Нош али ойдолэ лэсьтомы ваньзэ, эриктэманэн пумиськемъёсты буйгатон но соослы юрттон понна. Макем буйгатэ милемыз тодон: Иегова пыраклы бурмытоз соосты, кинъёсты вӧсь кариз Шайтан но солэн дуннеез! Ӝоген секыт тодэ ваёнъёс милесьтым сюлэммес вӧсь уз каре но йырамы уз лыктэ ни (Ис. 65:17).