1. Малы дышетэ милемыз Инмарлэн Кылыз?

 МИ БЫГАТӤСЬКОМЫ котькыӵе шуг-секытэз сэрттыны-пертчыны, малы ке шуоно Иегова кадь умой визьнодъясь ӧвӧл ни (Иов 36:22). Солэн Кылаз вань визьмо визь-кенешъёс, кудъёссэ уже кутыса, ми пӧлысь котькудӥз дун-шектэм луыны быгатоз но «ӟеч ужъёсты лэсьтыны дась» луоз (2 Тим. 3:17). Библиысь дышетонъёс юртто милемлы визьлыкогес луыны соослэсь, кинъёс верало сое, «мае адямиос визьмо шуыса лыдъяло» (1 Кор. 3:19; Пс. 118:97—100).

2. Мае ми эскеромы та статьяын?

² Кызьы ми адӟомы, та дуннелэн визьлыкез мылкыдэз ӝутэ сьӧлыко мугорлэн мылпотонъёсызъя улыны. Соин ик милемлы туж тыршоно луэ, та дуннеысь тросэз адямиос кадь медам малпаське но медам улэ шуыса. Со сярысь Библиын но гожтэмын: «Чаклаське, агай-вынъёс, нокин но тӥледыз Христос бордысь потымтэ ӧрекчи дышетонъёс пала медаз кыскы вал. Соос луо та дуннелэн, адямиослэн мадён-веранэнызы герӟаськем дышетонъёс» (Кол. 2:8). Та статьяысь ми тодомы, кызьы пумен-пумен улонэ пыӵазы кык шонертэм учконъёс, кудъёсызлы Шайтан дышетэ. Озьы ик ми адӟомы, кыказ ик учыръёсын дуннелэн визьлыкез визьмо ӧй вал шуыса но сое Инмарлэн визьлыкеныз нокызьы но ӵошатыны уг луы шуыса.

3, 4. Кызьы адямиос секс шоры учкыны кутскизы XX даурлэн кутсконаз?

³ Адямиос секс шоры чылкак мукет сямен учкыны кутскизы XX даурлэн кутсконаз. Азьло малпазы, кузпалъёс вискын гинэ сексуальной кусыпъёс луыны быгато шуыса, но со сярысь калык пӧлын туж ик ӧз вераськылэ. Нош  собере соослэн учконъёссы воштӥськизы, но адямиос ас мылпотэмзыя улыны кутскизы.

⁴ Адямиослэн секс шоры учконзы воштӥськиз 1920-тӥ аръёсы. Одӥг книгаын гожтэмын: «Фильмъёс, пьесаос, кырӟанъёс, книгаос, реклама — ваньмыз возьматэ, адямиос секс сярысь темаен тужгес но тунсыкъяськыны кутскизы шуыса». Со аръёсы эктонъёс мылкыдэз ӝуто вал секс сярысь тросгес малпаськыны, нош дӥськут мугорез умой ворсасьтэм луыны кутскиз. Кызьы Библиын азьло ик гожтэмын вал, берпум нуналъёсы адямиос «каньылэн, эзылыса улонэз яратозы» шуыса (2 Тим. 3:4).

5. Кызьы адямиослэн секс шоры учконзы воштӥськыны кутскиз, 1960-тӥ аръёсысен кутскыса?

⁵ Тросгес пиосмуртъёс но кышномуртъёс гожтӥськытэк улыны кутскизы 1960-тӥ аръёсы, озьы ик пиосмурт пиосмуртэн но кышномурт кышномуртэн кӧланъёс вӧлмизы. Шулдыръяськон амалъёсын секс сярысь тема тросгес шӧдӥськыны кутскиз. Кытчы вуттӥз сыӵе улӥ эсэпъёсъя улон? Кызьы гожтэмын одӥг книгаын, соин сэрен трос семьяос куашказы, тросэз сюлэм вӧсь луонэн пумиськизы, тросгес луизы пиналзэс огназы будэтӥсь анайёс яке атайёс но соос, кинъёс порнографиез учкыны дышизы. Со сяна, азыса-калгыса улэмен, вӧлмизы висёнъёс, кылсярысь, СПИД. Ваньмыз со возьматэ, та дуннелэн визьлыкез визьмо ӧвӧл шуыса (2 Пётр 2:19).

6. Малы вераны луоз, трос адямиослэн секс шоры учкемзы Шайтанлы яра шуыса?

⁶ Шайтанлы яра, куке адямиос секс шоры озьы учко. Со шумпотэ, куке адямиос шонертэм уже куто пиосмурт кышномуртэн кӧланы луонлыкез, кудзэ соослы Инмар сётӥз. Озьы адямиос возьмато, кузпалъяськонэз, Инмарлэсь кузьымзэ, нокӧня но уг гажало шуыса (Еф. 2:2). Азыса-калгыса улэменызы, адямиос возьмато, Иеговалэсь кузьымзэ — нылпи вордыны луонлыкез — уг дунъяло шуыса. Озьы ик сыӵе улэмзы люкетэ соослы пырак улон басьтыны (1 Кор. 6:9, 10).

7, 8. Кызьы Библия сексуальной кусыпъёс шоры учкыны дышетэ, та дуннеен ӵошатыса?

⁷ Адямиос, кудъёсыз та дуннелэн визьлыкезъя уло, Библиысь возетъёсты серем каро но верало, соос вужмизы ини шуыса. Куд-огъёсыз малпало тазьы: «Малы Инмар милемыз сексуальной мылпотонъёсын кылдытӥз, нош собере соосты быдэсъяны ӧз лэзьы?» Соос шонертэм малпало, адямилы  мылпотонъёссэ кутыса возёно ӧвӧл шуыса. Нош Библия чылкак мукетлы дышетэ: милемлы улоно ӧвӧл, мылпотонъёсмылы гинэ сётскыса, но ми шонертэм мылпотонъёсынымы нюръяськыны быгатӥськомы (Кол. 3:5). Со сяна, Иегова сюлмаськиз, адямиос сексуальной мылпотонъёссэс шонер амалэн быдэсъяны мед быгатозы шуыса — со понна Инмар кузпалъяськонэз кылдытӥз (1 Кор. 7:8, 9). Карт но кышно ӵош кӧланы быгато, но соослы со понна возьыт ӧвӧл, нош азон-калгон сэрен ӵем дыръя возьытлык йыръе.

⁸ Та дуннеен ӵошатыса, Библия сексуальной кусыпъёс шоры шонер учкыны дышетэ. Со вера, секс шумпотон вайыны быгатэ шуыса (Мад. 5:18, 19). Со дыре ик Библия христианъёслэсь мылкыдзэс ӝутэ: «Асьтэлэсь сосуддэс дун-чылкыт, дун-шектэм утьыны-возьыны мед быгатоды. Инмарез тодӥсьтэм язычникъёс кадь мугорлэн юрӟым куронъёсыныз ӝуатскыса эн улэ» (1 Фес. 4:4, 5).

9. а) Кызьы XX даурлэн кутсконаз Иеговалэн калыкезлы Инмарлэн Кылысьтыз визьлык юрттӥз? б) Кыӵе визьлыко кылъёс гожтэмын 1 Иоаннлэн 2:15, 16? в) Малэсь милемлы палэнсконо, Римъёслы 1:24—27 лыдэ басьтыса?

⁹ Иеговалэн калыкез XX даурлэн кутсконаз пӧямын ӧй вал соосын, кинъёс «визьзэс ыштон доры вуизы» (Еф. 4:19). Инмарлэн ужась-тыршисьёсыз солэн курон-косонъёсызъя улыны тыршизы. 1926-тӥ арын 15-тӥ куартолэзь понна поттэм «Возьмаськон башняын» (ӟуч) гожтэмын вал: «Пиосмуртъёслэн но кышномуртъёслэн чылкыт малпанъёссы луыны кулэ но соослы асьсэды визьмо возьыны кулэ, тужгес но пиосмуртъёслы кышномуртъёсын, нош кышномуртъёслы пиосмуртъёсын». Кыӵе гинэ югдур котыразы медаз луы, Иеговалэн калыкез оскиськиз Инмарлэн Кылысьтыз номырин ӵошатонтэм визьлыкезлы. (Лыдӟе 1 Иоаннлэсь 2:15, 16.) Ми туж тау кариськомы, милям Библиямы вань шуыса! Озьы ик ми тау кариськомы, Иегова милемлы дырыз дыръя духовной сиён сётэ шуыса, малы ке шуоно со юрттэ милемлы та дуннелэсь секс шоры шонертэм учконзэ палэнтыны b. (Лыдӟе Римъёслы 1:24—27.)

10, 11. Мар сярысь азьло ик вераз Библия та дуннелэн берпум аръёсыз пумысен?

¹⁰ Библия азьло ик вераз, та дуннелэн берпум аръёсаз «адямиос асьсэды асьсэос... гинэ яратӥсесь луозы» шуыса (2 Тим. 3:1, 2). Соин ик паймонэз ӧвӧл, та дунне адямиослэсь асьсэды яратон мылкыдзэс ӝутэ шуыса. Одӥг энциклопедиын верамъя, 1970-тӥ аръёсы «вӧлмизы книгаос, кудъёсыз визь-кенешъёс сёто, кызьы аслыд ачид юрттыны быгатӥськод шудо луыны». Та книгаос пӧлысь куд-огъёсаз верамын, астэ валано, аслад тырмымтэосыд шоры учконо ӧвӧл но асэныд данъяськоно шуыса. Эскеромы, мар гожтэмын одӥгаз сыӵе книгаын: «Астэ яраты, малы ке шуоно вань адямиос пӧлысь тон тужгес но чебер но паймымон адями». Та книгаын верамъя, адямилы ужпум кутоно, кызьы солы ассэ возьыны кулэ, но лэсьтоно сое гинэ, мае со умоен но шонерен лыдъя.

¹¹ Та тӥледлы номыр сярысь тодады уг вайыты-а? Шайтан Евалэсь озьы ик лэсьтыны мылкыдзэ ӝутӥз вал. Шайтан солы вераз, со «ӟечез но уродэз тодӥсь» Инмар кадь луоз шуыса (Ул.-выл. 3:5). Туннэ тросэз адямиос сокем умой асьсэос сярысь малпало, соос оско: нокин но — Инмар гинэ но — уг быгаты соослы вераны, мар шонер, нош мар шонертэм луэ. Со тужгес но адӟиське отысь, кызьы адямиос кузпалъяськон шоры учко.

12. Кызьы учко кузпалъяськон шоры та дуннеысь тросэз адямиос?

 ¹² Инмарлэн Кылыз дышетэ, карт но кышно ог-огзэс гажаны кулэ но кузпалъяськыкузы сётэм кылзэс быдэстыны кулэ шуыса. Библия кузпалъёслэсь мылкыдзэс ӝутэ ог-огзэс мур гажаны. Улон-вылонын 2:24 гожтэмын: «Адями аслэсьтыз атайзэ, аслэсьтыз анайзэ кельтоз но кышноез борды лякиськоз: кыкназы одӥг лулмугор луозы». Нош та дуннеын мукет сямен лыдъяло: нырысь ик ачид сярысь малпаськоно. Одӥг книгаын, кудаз люкиськон сярысь вераське, гожтэмын: «Куддыръя сюанын эмеспи но выль кен, кузпалъяськон дыръя кылзэс сётыкузы, „кулытозямы ӵош уломы“ дышем кылъёс интые, „яратонмы бырытозь“ шуыса верало». Кузпалъяськон шоры озьы учкемен, трос семьяос куашказы но тросэз сюлэм вӧсь луонэн пумиськизы. Та дуннелэсь кузпалъяськон шоры учкемзэ визьмо шуыны уг луы.

13. Малы вылтӥяськись адямиос Иеговалы юрӟым пото?

¹³ Библиын гожтэмын: «Котькудӥз но вылтӥяськись сюлэм Кузё-Инмарлы юрӟым потэ» (Мад. 16:5). Малы? Одӥгез муг — асьсэды яратӥсь адямиос Шайтан кадь вылтӥяськисесь луыны кутско. Малпалэ гинэ: Шайтан возьмаз, Иисус, кудӥз юрттӥз Инмарлы ваньзэ кылдытыны, солы йыбырттоз шуыса! (Матф. 4:8, 9; Кол. 1:15, 16). Вылтӥяськись адямиос асьсэды визьмоесь шуыса малпало ке но, Инмарлэн син азяз соос визьмоесь уг луо!

14. Кызьы Римъёслы 12:3 юрттэ милемлы ас шорамы шонер учкыны?

¹⁴ Библия юрттэ милемлы ас шорамы шонер учкыны. Со вера, астэ кӧня ке но яратыны кулэ шуыса. Иисус шуиз: «Матысьтэ астэ ачид кадь ик яраты» (Матф. 19:19). Со возьматэ, ачид сярысь кӧня ке малпаськыны но кулэ шуыса. Озьы ке но Библия дышетэ, астэ мукетъёсызлэсь вылӥе пуктоно ӧвӧл шуыса. Отын гожтэмын: «Номыре но эн лэсьтэ, асьтэлы гинэ пайда басьтыны турттыса, ушъян-данъянэз эн яратэ. Асьтэдыз  покчи каре, нош мукетъёссэ асьтэ сярысь умоесьгес шуыса лыдъялэ» (Флп. 2:3; лыдӟе Римъёслы 12:3).

15. Мар тӥледыз оскытэ, ачид шоры учкон пумысен Библиысь визь-кенешъёс пайда ваё шуыса?

¹⁵ Тросэз адямиос, кудъёссэ визьлыкоесь шуыса лыдъяло, серем каро Библиысь визь-кенешъёсты со сярысь, кызьы ачид шоры учконо. Соослэн малпамзыя, куке ми мукетъёссэ асьмелэсь вылӥе пуктӥськомы, ми лябесь луиськомы, но мукетъёсыз ми пыр асьсэлы пайда утчалозы. Но кытчы вуттӥз астэ вылӥе пуктон мылкыд, кудзэ вӧлмытэ Шайтанлэн дуннеез? Малпаське: шудоесь-а адямиос, кудъёсыз асьсэос сярысь гинэ сюлмасько? Шудо-а соослэн семьязы? Вань-а сыӵе адямиослэн зэмос эшъёссы? Матысь-а соослэн Инмарен кусыпъёссы? Та юанъёс вылын малпаськыса, кыӵе йылпумъян тӥ лэсьтыны быгатӥськоды? Мар умойгес луэ: та дуннелэн визьлыкезлы оскиськон яке Инмарлэн Кылысьтыз визьлыклы оскиськон?

16, 17. Мар понна ми Иеговалы тау кариськомы но малы?

¹⁶ Адямиос, кудъёсыз оско соослы, кинъёсты та дуннеын визьмо шуыса лыдъяло, кельшо йыромем адямилы, кудӥз сыӵе ик йыромем адямилэсь сюрес юа. Иисус вераз «визьмочиос» сярысь, кудъёсыз со дыръёсы улӥзы: «Соос синтэмъёслэн синтэм валтӥсьёссы; нош синтэм валтэ ке синтэмез, соос кыксы ик гуэ усёзы» (Матф. 15:14). Зэм но, со, мае та дуннеын визьмо шуыса лыдъяло, Инмарлэн син азяз визьмо уг луы.

¹⁷ Инмарлэн Кылысьтыз визьлык котькыӵе дыръёсы «дышетэ, сьӧлыкъёсты шарае поттэ, шонер сюрес вылэ султытэ, Инмарлы ярамон улыны дышетыса, со пайда вае» (2 Тим. 3:16). Ми туж тау кариськомы, Иегова милемыз ас организациез пыр та дуннелэн визьлыкезлы оскиськытэк улыны дышетэ шуыса! (Еф. 4:14). Со милемлы духовной сиён сётэ, кудӥзлы луыса ми Библиысь курон-косонъёсъя улыны быгатӥськомы. Инмарлэн Кылысьтыз зэмос визьлык милемыз азьланяз но улон сюрестӥ мед нуоз!