1. Малы ми оскыны быгатӥськомы?

 ИЕГОВА аслэсьтыз ужась-тыршисьёссэ яратэ. Озьы котьку луоз. Со сяна, со шонерлыкез яратэ (Пс. 32:5). Соин ик оскыны луэ: 1) Иеговалы вӧсь адӟыны, куке солэн ужась-тыршисьёсыз шонерлыктэм ужъёсын пумисько, но 2) со кыл кутытоз соосты, кинъёс сыӵе ужъёсты лэсьто. Та статьяос пӧлысь нырысетӥяз гожтэмын вал, Моисейлэн законэз, кудзэ Инмар израиль калыклы сётӥз, яратон вылэ пыкиськиз шуыса b. Закон соослэсь мылкыдзэс ӝутӥз асьсэды шонерлыко возьыны котькинэн, тужгес но соосын, кинъёслэн утисьсы ӧй вал (К. Зак. 10:18). Та Закон возьматэ, Иегова ужась-тыршисьёссэ туж яратэ шуыса.

2. Мае ми эскеромы та статьяын?

² Моисейлэн законэз, кудӥз яратон вылэ пыкиськиз но шонерлыко ужъёс лэсьтыны мылкыдэз ӝутӥз, ужамысь дугдӥз асьме вакытысь 33-тӥ арын, куке христиан кенеш кылдӥз. Возьматӥз-а со, христиан калык утемын уз луы ни шуыса озьы ик, кызьы азьвыл соосты та закон утиз? Ӧз возьматы! Соослы выль закон сётэмын вал — Христослэн законэз. Та статьяын ми эскеромы, мае со возьматэ. Со сяна, ми эскеромы таӵе юанъёсты: малы вераны луоз, та закон яратон вылэ пыкиськемын шуыса но христианъёслэсь мукетъёсыныз асьсэды шонерлыко возьыны мылкыдзэс ӝутэ шуыса? Кызьы со шӧдӥське соос вылын, кинъёслы кивалтон уж сётэмын?

3. Мае возьматэ Христослэн законэз, кудӥз сярысь вераське Галатъёслы 6:2?

³ Лыдӟе Галатъёслы 6:2. Христианъёс быдэсъяны кулэ Христослэсь законзэ. Иисус дышетскисьёсызлы законъёсты гожъяса ӧз кельты ке но, ужан-тыршон дыръяз со сётӥз соослы пӧртэм курон-косонъёс но возетъёс. Христослэн законэз пӧлы пыре ваньмыз, малы дышетӥз Иисус. Вераськомы со сярысь пыр-почгес.

4, 5. Кызьы но ку Иисус адямиосты дышетӥз?

⁴ Кызьы Иисус адямиосты дышетӥз? Нырысетӥез, со соослы валэктылӥз зэмлыкъёсты, кудъёсыз соослэн сюлмазы мур пыӵазы. Иисус соослы вералляз Инмар сярысь, валэктылӥз, малы ми улӥськомы, но дышетылӥз, Инмарлэн Эксэйлыкез гинэ соосты шуг-секытъёслэсь мозмытоз шуыса (Лука 24:19). Кыкетӥез, Иисус соосты аслаз примереныз дышетӥз. Со ас улонэныз дышетскисьёсызлы возьматӥз, кызьы соослы улоно (Иоанн 13:15).

⁵ Иисус адямиосты дышетӥз, куке музъем вылын ужаз-тыршиз (Матф. 4:23). Со сяна, со дышетӥз соосты кулэмысь улӟем бераз. Кылсярысь, со аслаз пытьы кузяз мынӥсьёслы возьматскиз (соос 500-лэсь тросгес вал, дыр) но дышетскисьёсты дасяны косӥз (Матф. 28:19, 20; 1 Кор. 15:6). Инме берытскем бераз Иисус, кенешлэн йырыз луыса, дышетскисьёссэ дышетыны азьланьтӥз. Кылсярысь, асьме вакытысь 96-тӥ ар котырын апостол Иоанн пыр со зырӟем христианъёслэсь мылкыдзэс ӝутӥз но соослы визь-кенешъёс сётӥз (Кол. 1:18; Усьт. 1:1).

6, 7. а) Кытысь лыдӟыны луэ Иисуслэн дышетэмъёсыз сярысь? б) Кызьы ми Христослэсь законзэ быдэсъяны быгатӥськомы?

⁶ Тросэз со пӧлысь, мае вералляз но лэсьтылӥз Иисус музъем вылын улон дыръяз, гожтэмын ньыль Евангелиосын. Иисуслэсь пӧртэм юанъёс шоры учкемзэ валаны юртто Христиан Грек Гожтэмъёсысь мукет книгаос но, малы ке шуоно соос гожтэмын вал адямиосын, кудъёсыз святой духлэн кивалтэмез улсын гожъязы но кудъёсызлэн «Христослэн визьмыз» вал (1 Кор. 2:16).

⁷ Йылпумъянъёс. Иисуслэсь дышетэмзэ улонлэн котькуд удысъёсаз уже кутыны луэ. Соин ик Христослэн законэз шӧдӥське  со вылын, кызьы ми асьмеды возиськомы дорамы, ужан интыямы, школаын но кенешын. Ми та законэз валаны быгатӥськомы, Христиан Грек Гожтэмъёсты лыдӟыса но соос вылын малпаськыса. Ми быдэсъяськомы сое, куке улӥськомы курон-косонъёсъя но возетъёсъя, кудъёсыз Библилэн та люкетаз гожтэмын. Христослэн законэзлэсь кылзӥськыса, ми яратӥсь Инмармылэсь, Иеговалэсь, кылзӥськиськомы, малы ке шуоно Иисус дышетӥз солы, мае ачиз тодӥз Атаезлэсь (Иоанн 8:28).

8. Ма вылэ пыкиське Христослэн законэз?

⁸ Адями, кудӥз улэ юн инъетэн йыг-йыг коркан, кышкатэк улэ. Озьы ик адями но, кыӵе ке юн инъет вылэ пыкиськем законэз быдэсъя ке, кышкатэк улэ. Христослэн законэз пыкиське яратон вылэ — тужгес но умой «инъет» вылэ. Малы озьы вераны луоз?

9, 10. Кытысь адӟиське, Иисус адямиосты яратӥз шуыса? Кызьы ми солэсь адӟем карыны быгатӥськомы?

⁹ Нырысетӥез, Иисус яратэменыз ваньзэ лэсьтӥз. Одӥгез амал, кызьы яратонэз возьматыны луэ,— со гажан-жалян. Иисуслы адямиос жаль пото вал, соин ик со калыкез дышетылӥз, висисьёсты бурмытъяз, сютэмъёсты сюдылӥз но кулэмъёсты улӟытъяз (Матф. 14:14; 15:32—38; Марк 6:34; Лука 7:11—15). Зэм но, та ужъёсты лэсьтон понна, Иисуслы трос дыр но кужым кулэ вал, озьы ке но, ачиз интые, со мукетъёс сярысь дась луыса сюлмаськиз. Со сяна, адямиос понна со улонзэ но сётӥз. Озьы Иисус возьматӥз, макем зол со соосты яратэ (Иоанн 15:13).

¹⁰ Йылпумъянъёс. Ми Иисуслэсь адӟем кариськомы, асьмеос интые, мукетъёсыз сярысь тросгес малпаськиськомы ке но соосты эшшо но золгес гажаны-жаляны тыршиськомы ке. Ми Христослэсь законзэ быдэсъяськомы, куке, адямиосты гажам-жаляменымы, соослы ӟеч иворез вераськомы но соосты Библиысь зэмлыклы дышетӥськомы.

11, 12. а) Кытысь ми тодӥськомы, Иегова милемыз туж яратэ шуыса? б) Кызьы ми Иеговалэсь адӟем карыны быгатӥськомы?

¹¹ Кыкетӥез, Иисус возьматӥз Атаезлэсь юн яратонзэ. Солэн потэ вал, адямиос мед валалозы шуыса, макем дуно пото Иеговалы ужась-тыршисьёсыз. Кылсярысь, Иисус дышетӥз, инмысь Атаймылы ми пӧлысь котькудӥз дуно потэ шуыса (Матф. 10:31). Иегова туж шумпотэ, куке адями ӧпкеле но кенеше берытске (Лука 15:7, 10). Иегова милемыз яратэмзэ возьматӥз, ми понна Пизэ сётыса (Иоанн 3:16).

¹² Йылпумъянъёс. Кызьы ми Иеговалэсь адӟем кариськомы? (Еф. 5:1, 2). Милемлы котькуд вын-агаймы но сузэр-апаймы дуно потэ, но ми шумпотӥськомы, куке соос, кинъёс Иеговаез кельтӥзы, со доры выльысь берытско (Пс. 118:176). Ми возьматӥськомы, вын-агайёсмес но сузэр-апайёсмес яратӥськомы шуыса, куке соослы юрттӥськомы, дырмес но кужыммес сётыса (1 Иоанн 3:17). Мукетъёслы яратонмес возьматыса, ми Христослэсь законзэ быдэсъяськомы.

13, 14. а) Кыӵе курон-косон Иисус дышетскисьёсызлы кельтӥз, Иоаннлэсь 13:34, 35 лыдэ басьтыса, но малы вераны луоз, та курон-косон выль шуыса? б) Кызьы ми выль курон-косонэз быдэсъяськомы?

¹³ Куинетӥез, Иисус дышетскисьёссэ ог-огзэс яратыны косӥз озьы ик, кызьы со соосты яратӥз. (Лыдӟе Иоаннлэсь 13:34, 35.) Малы вераны луоз, та курон-косон выль шуыса? Иисус дышетскисьёссэ косӥз ог-огзэс яратыны озьы ик, кызьы со соосты яратӥз c, нош Моисейлэн законаз сыӵе курон-косон ӧй вал. Милемлы вын-агайёсмес но сузэр-апайёсмес, асьмеос сярысь, золгес  яратоно но соос понна улонмес но сётыны дась луоно, малы ке шуоно ӵапак озьы лэсьтӥз Иисус.

¹⁴ Йылпумъянъёс. Ми выль курон-косонэз быдэсъяськомы, вын-агайёсмылы но сузэр-апайёсмылы дырмес, кужыммес но ваньбурмес сётыны дась луыса. Соос понна ми улонмес гинэ сётыны дась ӧвӧл, озьы ик ми мае ке пичизэ но лэсьтыны дась. Кылсярысь, ми котькуд арняе мӧйы вын-агайёслы но сузэр-апайёслы Эксэйлык юртэ лыктыны юрттӥськомы, куддыръя милемлы сое лэсьтыны капчи ӧвӧл ке но; мукетъёслэсь кулэяськонъёссэс вылӥегес пуктӥськомы, соосты шумпоттон понна; уж дорысьтымы огдырлы куриськиськомы, инкуазь шимучыре сюремъёслы юрттон понна. Озьы ми Христослэсь законзэ быдэсъяськомы. Сыӵе ужъёсмылы луыса, кенешын котькудӥз шӧдоз, со сярысь сюлмасько шуыса.

15—17. а) Кытысь адӟиськиз Иисуслэн шонерлыко луэмез? б) Кызьы ми Иисуслэсь адӟем карыны быгатӥськомы?

¹⁵ Библия валэктэмъя, шонерлыко ужъёс возьмато Инмарлэн син азяз шонер луись ужъёсты но со ужъёсты адямиослэн вылтуссы шоры учкытэк лэсьтэмез. Малы вераны луоз, Христослэн законэз шонерлыко ужъёс лэсьтыны мылкыдэз ӝутэ шуыса?

¹⁶ Нырысь ик, малпаськомы, кызьы Иисуслэн шонерлыко луэмез ужъёсысьтыз адӟиськиз. Со улон нуналъёсы иудейёслэн религиозной кивалтӥсьёссы еврей луисьтэм калыкез но огшоры адямиосты адӟемпотостэм каризы, озьы ик кышномуртъёсты ӧз гажалэ. Нош Иисус адямиослэн вылтуссы шоры ӧз учкы. Кылсярысь, со шумпотӥз, куке еврей луисьтэм адямиос солы оскизы (Матф. 8:5—10, 13). Иисус ӟеч иворез вераз котькинлы — узыръёслы но, куанеръёслы но (Матф. 11:5; Лука 19:2, 9). Кышномуртъёсын со ноку но ӧз вераськы чурыт кылъёсын. Со ассэ лякытэн возиз сыӵе кышномуртъёсын но, кудъёссэ мукетъёсыз адӟемпотостэм каро вал (Лука 7:37—39, 44—50).

¹⁷ Йылпумъянъёс. Иисус сямен, ми адямиослэн вылтуссы шоры ум учкиське но тодытӥськомы котькинлы, кин милемыз кылзыны дась, соослэн осконзы, узыр яке куанер луэмзы шоры учкытэк. Христослэсь адӟем карыса, вын-агайёс гажаса учко кышномуртъёс шоры. Озьы ми возьматӥськомы, Христослэсь законзэ быдэсъяськомы шуыса.

18, 19. Мар сярысь дышетӥз Иисус шонерлык пумысен? Кыӵе йылпумъянъёс лэсьтыны луэ та ласянь?

¹⁸ Кыкетӥез, тодамы ваёмы, мар сярысь дышетӥз Иисус шонерлык пумысен. Со дышетӥз уже кутыны возетъёсты, кудъёсыз юрттысалзы дышетскисьёсызлы мукетъёсыныз асьсэды шонерлыко возьыны. Кылсярысь, Иисус дышетӥз: милям потэ ке, мукетъёс асьсэды милемын шонерлыко мед возёзы шуыса, милемлы но соосын асьмеды шонерлыко возёно. Ми озьы лэсьтӥськомы ке, соослэн мылкыдзы ӝутскоз, вылды, асьсэды милемын шонерлыко возьыны (Матф. 7:12). Нош мар кароно, ми шонерлыктэм ужен пумиськимы ке? Иисус дышетскисьёссэ Иеговалы оскиськыны дышетӥз. Со вераз: «Инмар-а уз утьы Аслэсьтыз быръемъёссэ, уй но нунал Солы тэльмырисьёсты?» (Лука 18:6, 7). Та кылъёс оскыто милемыз: шонерлыко Инмармы тодэ, маин милемлы пумиськоно луэ та берпуметӥ нуналъёсы, но со ас дыраз шонерлыкез тупатоз (2 Фес. 1:6).

¹⁹ Йылпумъянъёс. Куке ми улӥськомы возетъёсъя, кудъёссэ Иисус уже кутыны дышетӥз, соку ми мукетъёсыныз асьмеды шонерлыко возёмы. Но ми Шайтанлэн дуннеяз шонерлыктэм ужъёсын пумиськимы ке, милемыз буйгатыны быгатэ малпан, Иегова шонерлыкез одно ик тупатоз шуыса.

20, 21. а) Кызьы асьсэды мукетъёсыныз возёно соослы, кинъёслы кивалтон уж сётэмын? б) Кызьы картъёс Христос сямен яратыны быгато но кызьы атайёслы асьсэды нылпиосынызы возёно?

²⁰ Кызьы Христослэн законэзъя асьсэды возёно соослы, кинъёслы кивалтон уж сётэмын? Та закон яратон вылэ пыкиське бере, соос гажаны кулэ соосты, кинъёс сярысь соос сюлмасько, но соосын асьсэды лякытэн возьыны кулэ. Вунэтоно ӧвӧл: Христослэн дышетскисез луон понна, котьку яратонэз возьматоно.

²¹ Семьяын. Картлы кышнозэ яратоно озьы ик, кызьы Христос кенешез яратӥз (Еф. 5:25, 28, 29). Карт, кудӥз кышнозэ Иисус сямен яратэ, кышноезлэн кулэяськонъёсыз но мылпотонъёсыз сярысь тросгес сюлмаське. Куд-ог пиосмуртъёслы сыӵе яратонэз возьматыны секыт. Малы? Соос будӥзы, дыр, семьяын, кудаз асьсэды ог-огенызы шонерлыко но яратыса ӧз возе. Нош соослэн Христослэсь законзэ быдэсъямзы потэ ке, соослы воштӥськыны кулэ. Карт кышнозэ Христос сямен яратэ ке, кышноез сое гажалоз. Атай, кудӥз нылпиоссэ зэмзэ ик яратэ, ассэ соосын ноку но лек уз возьы но соосты уз ултӥя (Еф. 4:31). Со нылпиосызлы яратэмзэ возьматэ но соосты ушъя, нылпиос мед шӧдозы, соос сярысь сюлмасько шуыса. Соку нылпиос атайзэс яратозы но гажалозы.

22. Кинлэн луо кенешысь «ыжъёс», 1 Пётрлэсь 5:1—3 лыдэ басьтыса? Кызьы тӧроос соосын асьсэды возьыны кулэ?

²² Кенешын. Тӧроослы тодазы возёно, «ыжъёс» соослэн уг луо шуыса (Иоанн 10:16; лыдӟе 1 Пётрлэсь 5:1—3). «Инмарлэн уллёез» но «Инмарлэн тӥ киулэ сётэм муртъёсыз» кылъёс тӧроослы тодазы вайыто, «ыжъёс» Иеговалэн луо шуыса. Солэн потэ, ыжъёсты мед яратозы но соос сярысь мед сюлмаськозы шуыса (1 Фес. 2:7, 8). Иегова ушъя тӧроосты,  кудъёсыз солэн ыжъёсыз сярысь яратыса сюлмасько. Со сяна, сыӵе тӧроосты ярато но гажало вын-агайёс но сузэр-апайёс.

23, 24. а) Мар пыре тӧроослэн ужъёссы пӧлы, кудъёсыз эскеро вын-агайлэсь яке сузэр-апайлэсь секыт сьӧлыкамзэ? б) Мар сярысь малпаськыны кулэ тӧрослы, сыӵе учыр кылдыку?

²³ Кенешысь вын-агай яке сузэр-апай секыт сьӧлыка ке, та учырез тӧроос эскеро. Мар пыре соослэн ужъёссы пӧлы? Соос пӧртэм луо Израильысь судьяослэн но тӧроослэн ужъёссылэсь. Моисейлэн законэзъя кивалтыны пуктэм пиосмуртъёс эскеризы Инмарлы йыбырттонэн герӟаськем юанъёсты, озьы ик адямиослэн улонэнызы но катъёсты тӥянэн герӟаськем ужъёсты. Нош туннэ тӧроос, кудъёсыз Христослэсь законзэ быдэсъяло, эскеро со сьӧлыкъёсты гинэ, кудъёсыз Инмарлы йыбырттонэн герӟаськемын. Соос валало, адямиослэн улонэнызы но катъёсты тӥянэн герӟаськем ужъёсты Инмар эскерыны лэзиз та дуннеысь кивалтӥсьёслы, кудъёсыз катэз тӥясьёсты коньдон тырытыны яке пытсэтэ пуктыны быгато (Рим. 13:1—4).

²⁴ Кызьы тӧроос секыт сьӧлыкъёсты эскеро? Библия вылэ пыкиськыса, соос луэм учырез пыр-поч эскеро но кулэ луись ужпум куто. Соос тодазы возё, Христослэн законэз яратон вылэ пыкиське шуыса. Яратон тӧроослэсь мылкыдзэс ӝутэ юрттыны соослы, кинъёслы пумит сьӧлык лэсьтэмын вал. Со сяна, яратӥсь тӧроос эскеро таӵе юанъёсты: ӧпкеле-а сьӧлыкам мурт но луэ-а юрттыны солы Иеговаен кусыпъёссэ тупатыны?

25. Мае ми эскеромы вуоно статьяын?

²⁵ Ми туж тау кариськомы, милемлы Христослэн законэз сётэмын шуыса! Котькудӥз сое быдэсъяны тырше ке, кенешын ваньзы шӧдозы, соосты ярато но дунъяло шуыса но соослы нокин уродзэ уз лэсьты шуыса. Озьы ке но ми улӥськомы дуннеын, кытын «кескич адямиос... эшшо но тросгес урод ужъёс» лэсьто (2 Тим. 3:13). Соин ик милемлы сак луоно. Кызьы христиан кенеш Инмарлэсь шонерлыко эсэпъёссэ лыдэ басьтыны быгатэ, куке эскере нылпиосты эриктэманэн герӟаськем ужъёсты? Та юан вуоно статьяын эскериськоз.