«Мон туж возьдаськись но дӥсьтӥсьтэм адями,— вера Сара a.— Соин ик ас малпамзыя гинэ лэсьтӥсь адямиос пӧлын мон асме умойтэм шӧдӥсько. Нош зӥбыт-востэм адямиосын мыным умой. Сыӵе адямиослы мон быгатӥсько сюлэмме усьтыны, шӧдонъёсы сярысь вераны но соосын шуг-секытъёсы сярысь вераськыны. Мынам матысь эшъёсы лякытэсь но зӥбыт-востэмесь».

Саралэн кылъёсыз возьмато, адямиос зӥбыт-востэмъёсын эшъяськыны тыршо шуыса. Иегова но зӥбыт-востэм адямиосты яратэ. Со Аслаз Кылыз пыр ӧте милемыз зӥбыт-востэм луонлэн дӥськутэныз дӥсяськыны-шобырскыны (Кол. 3:12). Нош мар со сыӵе зӥбыт-востэм луон? Кызьы та сямез Иисус возьматӥз? Но кызьы зӥбыт-востэм сям милемыз шудогес каре?

Зӥбыт-востэм луон — со сыӵе сям, кудӥзлы луыса адями каньыл сюлмын улэ. Зӥбыт-востэм адями мукетъёсыныз ассэ небытэн но лякытэн возе, но мар гинэ солэн улоназ медаз луы, со ассэ кияз кутэ.

Куд-огъёсыз малпало, зӥбыт-востэм адями — со ляб адями шуыса, нош со озьы ӧвӧл. Грек кыл, кудзэ «зӥбыт-востэм» шуыса берыкто, кутӥськиз кырвал сярысь веран понна, кудзэ кортнаны быгатӥзы. Кортнам валлэн сомында ик кужымез, кӧня кырваллэн, нош сое дышетыса, солэсь урмем сямзэ буйгатыны быгато вал. Озьы ик зӥбыт-востэм сям но юрттэ милемлы асьмемыз киямы кутыны но мукетъёсыныз тупаса улыны.

Ми малпаны быгатомы: «Мон зӥбыт-востэм адями ӧвӧл». Ми улӥськомы ас малпамзыя улӥсь но чидасьтэм адямиос пӧлын, соин ик паймонэз ӧвӧл, милемлы зӥбыт-востэм луыны секыт шуыса (Рим. 7:19). Зэм но, зӥбыт-востэм луон понна, милемлы туж тыршоно, нош, Иеговалэн святой духезлэн юрттэменыз, милям ваньмыз пӧрмоз (Гал. 5:22, 23). Малы та сямез будэтыны кулэ?

Зӥбыт-востэм сям адямиослы кельше. Саралы кадь ик, кудӥз сярысь статьялэн кутсконаз вераськиз, милемлы кельше зӥбыт-востэм адямиосын эшъяськыны. Иисус ваньмызлэсь зӥбыт-востэм но лякыт сямо адями вал (2 Кор. 10:1). Нылпиос но Иисус доры кыстӥськизы, соос соин тодмо ӧй вал ке но (Марк 10:13—16).

 Зӥбыт-востэм сям милемлы но, мукетъёсызлы но пайда вае. Та сям юрттэ милемлы йыркуръяськытэк но вожмес поттытэк улыны (Мад. 16:32). Ми мукетъёсты вӧсь ӧм каре ке, тужгес но яратоно адямиосмес, милемыз возьытлыкмы уз йырйы. Озьы ик котырысьтымы адямиослы но кельшо соос, кинъёс асьсэды киязы кутыны быгато.

Иисуслэн трос кулэ луись ужъёсыз вал ке но, со котькинэн ассэ зӥбыт-востэм возиз. Со дыръёсы тросэзлы капчи ӧй вал, но соосты буйгатоно вал. Иисуслэн кылъёсыз адямиосты юнматӥзы, луоз. Со вераз: «Лыктэлэ Мон доры... Мон уго востэм, зӥбыт сюлэмо» (Матф. 11:28, 29).

Кызьы Иисуслэсь адӟем карон юрттэ милемлы зӥбыт-востэм луыны? Библиез эскерыкумы, ми тодӥськомы, кызьы Иисус ассэ возиз мукет адямиосын но секыт учыръёсын. Собере, куке ми пумиськиськомы учырен, кудаз зӥбыт-востэм сяммы эскериське, ми тыршиськомы асьмеды Иисус сямен возьыны (1 Пётр 2:21). Ойдолэ тодомы, малы луыса Иисус зӥбыт-востэм вал.

Иисус «востэм, зӥбыт сюлэмо» вал. Со вераз: «Мон уго востэм, зӥбыт сюлэмо» (Матф. 11:29). Библиын востэм но зӥбыт сям ӵош кутӥсько, малы ке шуоно соос ог-огенызы туж герӟаськемын (Еф. 4:1—3).

Зӥбыт-востэм сям юрттэ милемлы асьме сярысь трос малпаськытэк но мукетъёсызлэн верам кылъёссылы йыркуръяськытэк улыны. Кызьы ассэ возиз Иисус, куке веразы, со сиськыны но вина юыны яратэ шуыса? Аслаз улонэныз со возьматӥз, та кылъёс зэм ӧй вал шуыса. Иисус зӥбыт-востэмен вераз: «Визьлыклэн нылпиосыз визьлыклэсь шонер луонзэ возьмато» (Матф. 11:19).

Зӥбыт-востэм сям кулэ соку но, куке кин ке малпаськытэк уродзэ вера пиосмурт яке кышномурт луэммы сярысь, семьямы сярысь яке калыкмы сярысь. Тани мар вераз Питер, Лымшор Африкаысь тӧро: «Куке кинлэн ке кылъёсыз мынэсьтым йырме кур каро, мон аслэсьтым юасько: „Кызьы та учырын Иисус ассэ возьысал?“» Со ватса: «Мон дышетски ачим сярысь трос малпаськытэк улыны».

Иисус тодаз возиз, адямиос тырбыдэстэмесь шуыса. Иисуслэн дышетскисьёсыз шонер ужъёс лэсьтыны тыршизы, нош тырбыдэстэм луэмзы сэрен соослэн котьку ик озьы ӧз пӧрмы. Кылсярысь, кулон азяз Иисус куриз Пётрез, Иаковез но Иоаннэз ассэ юнматыны, нош соос ӧз быгатэ солы юрттыны. Иисус валаз, малы соос умме усизы. Со вераз: «Дух сэзь, нош лулмугор кужымтэм» (Матф. 26:40, 41). Иисус тодаз возиз, солэн апостолъёсыз тырбыдэстэмесь вал шуыса, но та юрттӥз солы соос вылэ йыркуръяськытэк улыны.

Мэнди мукетъёсызлэсь троссэ возьма вал, нош али со туж тырше Иисуслэсь адӟем карыны но зӥбыт-востэм луыны. Со вера: «Мон тодам возисько, ваньмы ми тырбыдэстэмесь шуыса, но, Иегова сямен, адямиослэн умой сямъёссылы саклыкме висъяны тыршисько». Со, кызьы Иисус тырбыдэстэм адямиослы гажан-жалянзэ возьматӥз, милемлы но юрттоз зӥбыт-востэмесь луыны.

Иисус Инмарлы оскиськиз. Музъем вылын улыкуз, Иисус шонерлыктэм ужъёсын пумиськылӥз. Солэсь кылъёссэ шонертэм валазы, сое адӟемпотостэм каризы но собере виизы. Озьы ке но со ассэ зӥбыт-востэм возиз, малы ке шуоно «ваньзэ шонер Судить Карисьлэн кияз сётӥз» (1 Пётр 2:23). Иисус тодӥз: солэн инмысь Атаез со сярысь сюлмаськоз но ас дыраз шонерлыктэм ужъёсты быдтоз.

Куке ми шонерлыктэм ужъёсын пумиськиськомы, ми быгатӥськомы вожмес поттыны но югдурез эшшо но уродгес карыны. Соин ик Библия тодамы вайытэ: «Уго адямилэн вожпотонэз Инмарлэн шонерлыкезъя улыны люкетэ» (Иак. 1:20). Милям вожмес поттыны мугъёсмы вань ке но, тырбыдэстэм луэммы сэрен ми быгатомы лэсьтыны сое, мар сярысь собере жаляломы.

Кэти, Германиысь сузэр, азьло тазьы малпа вал: «Ачид сярысь ӧд сюлмаськы ке, тон сярысь нокин но уз сюлмаськы». Нош куке со Иеговалы оскиськыны дышиз, солэн мылкыдыз воштӥськиз. Со вера: «Табере мон уг малпаськы, асме утьыны мыным котьку дась луоно шуыса. Мон тодӥсько: Иегова ваньзэ адӟе, но та юрттэ мыным асме зӥбыт-востэм возьыны». Шонерлыктэм ужъёсын пумиськыкуды, Иисуслэсь  адӟем каре но Инмарлы оскиське. Соку тӥ быгатоды зӥбыт-востэмесь луыны.

Иисус валэктӥз: зэмзэ ик шудо луыны быгато зӥбыт-востэм адямиос гинэ. Со шуиз: «Востэмъёс шудоесь» (Матф. 5:5). Ойдолэ эскеромы, кызьы милемлы зӥбыт-востэм сям юрттэ.

Зӥбыт-востэм сям кузпалъёс вискысь валамтэосты тупатыны юрттэ. «Тодӥсько на, мон кышноелы трос вӧсь карись кылъёс верай, солэсь кӧтсэ ӝож кареме уг поты вал ке но,— вера Австралиысь Роберт агай.— Нош верам кылъёсты уд берыкты ни. Куке мон валай, макем вӧсь мон сое кари, мыным туж урод луиз».

Библиын верамын: «Уго ваньмы асьмеос трос сьӧлыкаськомы» (Иак. 3:2). Соин ик паймонэз ӧвӧл, малпаськытэк верам кылъёсын кузпалъёс ог-огзэс вӧсь карыны быгато шуыса. Сыӵе учыръёсын зӥбыт-востэм сям юрттоз милемлы каньыл сюлмын улыны но кылмес пинь сьӧрамы возьыны (Мад. 17:27).

Робертлы туж тыршоно луиз, каньыл сюлмын улон понна но ассэ кияз кутыны дышетскон понна. Кытчы со вуттӥз? Тани мар со вера: «Табере, куке милям кышноеным кылмы уг тупа, мон тыршисько сое сак кылзыны, соин лякытэн вераськыны но йыркуръяськытэк улыны. Милям кусыпъёсмы эшшо но умойгес луизы».

Зӥбыт-востэм сям мукетъёсыныз тупаса улыны юрттэ. Соослэн, кинъёс ӝог вожзэс потто, эшъёссы трос ӧвӧл. Нош зӥбыт-востэм сям юрттэ милемлы мукетъёсыныз «тупаса, огмылкыдын улыны» (Еф. 4:2, 3). Кэти, кудӥз сярысь вераськиз вал ини, шуэ: «Куке мон асме зӥбыт-востэм возисько, мон мукетъёсыныз шумпотыса вераськыны быгатӥсько, озьы ик соосын но, кинъёсын огкыл шедьтыны капчи ӧвӧл».

Зӥбыт-востэм сям сюлмын каньыллык возьыны юрттэ. Библия верамъя, «вылӥысь васькись визьлык» герӟаськемын зӥбыт-востэм луонэн но тупаса улонэн (Иак. 3:13, 17). Зӥбыт-востэм адямилэн «бугыръяськисьтэм сюлмыз» (Мад. 14:30). Мартин, кудӥз та сямез будэтыны дышетске, вера: «Табере мон уг куриськы, монъя гинэ мед луоз шуыса. Мон каньыл сюлмын но шумпотыса улӥсько».

Милемлы туж тыршоно луоз, дыр, зӥбыт-востэм сямез будэтыны. Одӥг агай вера: «Зэмзэ вераса, али но луыло сыӵе учыръёс, куке йыры курен пушкам ваньмыз бугыръяське». Нош Иегова, кудӥз мылкыдмес ӝутэ зӥбыт-востэмесь луыны, одно ик юрттоз милемлы та шӧдонъёсмес вормыны (Ис. 41:10; 1 Тим. 6:11). Со милемыз зӥбыт-востэмесь луыны дышетоз но юнматоз (1 Пётр 5:10). Собере, апостол Павеллэсь адӟем карыса, ми быгатомы асьмеды зӥбыт-востэм но лякыт возьыны, кызьы Христос ассэ возиз (2 Кор. 10:1).