1, 2. Кыӵе шуг-секытъёсын пумиськыло Иеговалэн тросэз ужась-тыршисьёсыз?

 АПОСТОЛ Павел Тимофейлэсь, озьы ик вань христианъёслэсь но, мылкыдзэс ӝутӥз, оскем ужез тыршыса быдэсъяны (2 Тим. 4:5). Ваньмы ми тыршиськомы Павеллэсь визь-кенешсэ уже кутыны. Озьы ке но куддыръя со капчи ик ӧвӧл. Вын-агайёс но сузэр-апайёс пӧлысь тросэзлы тодытон понна кышкасьтэм луыны кулэ (2 Тим. 4:2). Кылсярысь, малпаське соос сярысь, кинъёс уло шаеръёсын, кудъёсаз кивалтӥсьёс ужмес нуыны люкето яке нуыны уг лэзё. Тодытон уже пыриськемзы понна соосты пытсэтэ пуктыны но быгато.

² Иеговалэн ужась-тыршисьёсыз пумиськыло пӧртэм шуг-секытъёсын, кудъёсыз сэрен соослэн мылкыдзы куашканы быгатэ. Кылсярысь, ми пӧлысь тросэзлы трос ужано луэ, семьяезлэн самой кулэез мед луоз шуыса. Соослэн тросгес ужамзы-тыршемзы потэ ке но, арня пумын соослэн кужымзы трос ӧвӧл ини. Мукетъёсыз ӧжыт тодыто ялан кыстӥськись висёнзы яке бадӟым арлыдзы сэрен. Нош куд-огъёсызлэн дорысьтызы но потамзы уг луы. Вань соос но, кинъёс асьсэды номырлы ярасьтэмен шӧдо. Мария b, кудӥз Ближний Востокын улэ, вера: «Урод малпанъёсын нюръяськыса, мон туж жадисько. Мынам номырлы но кужыме уг тырмы ни. Со понна мон асме пыкылыны кутскисько, малы ке шуоно ужан-тыршонлы дыры но, кужыме но уг кыльы ни».

3. Мае ми эскеромы та статьяын?

³ Кыӵе гинэ шуг-секытъёсын ми медам пумиське, Иегова милемлы юрттыны быгатэ соосты чиданы но ужан-тыршонын лэсьтыны ваньзэ, мае быгатӥськомы. Нырысь ойдолэ тодамы ваёмы, кызьы со Павелэз но Тимофеез юнматӥз, шуг-секытъёссы шоры учкытэк, соос ужаны-тыршыны мед  быгатозы шуыса. Собере ми эскеромы, кызьы Иегова туннэ милемлы юрттэ.

4. Кыӵе шуг-секытъёсын пумиськылӥз Павел?

⁴ Павел трос шуг-секытъёсын пумиськылӥз. Солы туж кулэ вал Иеговалэн юрттэтэз, куке солэн тушмонъёсыз сое жугылӥзы, пытсэтэ пуктылӥзы, озьы ик виыны но тыршизы (2 Кор. 11:23—25). Озьы ик Павел возьдаськытэк вераз, куддыръя урод шӧдонъёсыныз нюръяськиз шуыса (Рим. 7:18, 19, 24). Со сяна, солэн тазалыкеныз герӟаськем шуг-секытъёсыз вал, дыр, кудъёсыз ши кадь сое курадӟытӥзы. Павел кӧня ке пол Инмарез туж куриз сое та шуг-секытэзлэсь мозмытыны (2 Кор. 12:7, 8).

5. Мар лэсьтыны быгатӥз Павел, шуг-секытъёсыз шоры учкытэк?

⁵ Иегова Павеллы кужым сётӥз, шуг-секытъёсыз шоры учкытэк, азьланяз но ужаны-тыршыны. Кылсярысь, куке Павел Римын одӥг коркан жильыетын пукиз, со ӟырдыт мылкыдын тодытӥз иудейёс пӧлысь нимо-дано адямиослы, озьы ик вылӥ кивалтӥсьёслы но, дыр (Ап. уж. 28:17; Флп. 4:21, 22). Со сяна, со зэмлык сярысь вераз Рим эксэйлэн юртысьтыз возьмаськисьёслы но ваньмызлы, кинъёс со доры ветлӥзы (Ап. уж. 28:30, 31; Флп. 1:13). Озьы ик святой духлэн кивалтэмез улсын со гожъяз гожтэтъёсты, кудъёсыз асьме дырозь зэмос христианъёслы юртто. Озьы ик Павел Римысь вын-агайёслы но сузэр-апайёслы умой адӟем карон возьматӥз. Солэсь адӟем карыса, соос «чик кышкатэк, эшшо но золгес Инмар кылэз тодытыны кутскизы» (Флп. 1:14). Куддыръя Павел ӧз быгаты лэсьтыны сомында, кӧня солэн лэсьтэмез потэ вал. Озьы ке но со лэсьтӥз ваньзэ, мае быгатӥз. Солэн югдурезлы луыса, ӟеч ивор эшшо но паськытгес вӧлмиз (Флп. 1:12).

6. Мар юрттӥз Павеллы Инмарлы ужаны-тыршыны, 2 Коринфъёслы 12:9, 10 лыдэ басьтыса?

⁶ Павел валаз: ваньзэ, мае со лэсьтӥз Иеговалы ужан-тыршонын, со аслаз кужыменыз ӧз лэсьты, нош Инмарлэн кужыменыз лэсьтӥз. Павел вераз, лябӟыса улон дыръяз Инмарлэн кужымез «юнгес шарае потэ» шуыса. (Лыдӟе 2 Коринфъёслы 12:9, 10.) Святой духез пыр Иегова Павеллы кужым сётӥз, уйылон-уллянъёс, пытсэтын пукемез но мукет шуг-секытъёс шоры учкытэк, со солы сётэм ужъёсты быдэстыны мед быгатоз шуыса.

7. Кыӵе шуг-секытъёсты Тимофейлы чидано вал ужан-тыршон дыръяз?

 ⁷ Тимофейлы но, Павеллэн оскымон эшезлы, ужакуз-тыршыкуз Инмарлэн кужымезлы оскиськоно вал. Тимофей Павелэн ӵош вал Павеллэн миссионер луыса кема дыр ӵоже мынон-ветлон дыръяз. Со сяна, Павел Тимофеез куриз кенешъёстӥ ветлыны, озьы ик вын-агайёсты но сузэр-апайёсты юнматыны (1 Кор. 4:17). Тимофей малпаз, вылды, та ужез быдэстыны уз быгаты шуыса. Соин ик Павел солы гожтӥз: «Нокин но тонэ, пинал-еж шуыса, санэ понытэк медаз улы» (1 Тим. 4:12). Со сяна, соку Тимофейлэн тазалыкеныз герӟаськем шуг-секытъёсыз вал (1 Тим. 5:23). Но со тодӥз: Иеговалэн туж кужмо святой духез солы кужым сётоз ӟеч иворез тодытыны но вын-агайёслы юрттыны (2 Тим. 1:7).

8. Кызьы Иегова туннэ калыксэ юнматэ?

⁸ Туннэ Иегова аслаз калыкезлы мертантэм бадӟым кужым сётэ, со солы азьланяз но оскымон ужаны-тыршыны мед быгатоз шуыса (2 Кор. 4:7). Ойдолэ эскеромы, кызьы Иегова юнматэ милемыз но юрттэ милемлы солы оскымон кыльыны вӧсяськон, Библия, вын-агайёсмы но сузэр-апайёсмы пыр, озьы ик ужан-тыршон пыр.

9. Кызьы милемлы юрттэ вӧсяськон?

⁹ Вӧсяськон. Павел милесьтым мылкыдмес ӝутэ ялан вӧсяськыны (Еф. 6:18). Вӧсяськеммы бере Иегова милемлы кужым сётыны быгатэ. Джонни агай, кудӥз Боливиын улэ, тае ас вылаз шӧдӥз, куке солы шуг-секытъёс пыр потоно луиз. Солэн кышноез, анаез но атаез одӥг дыре секыт висьыны кутскизы. Соос сярысь сюлмаськыны Джоннилы туж секыт вал. Жаляса верано луэ, солэн анаез кулӥз. Нош кышноезлы но атаезлы бурмон понна трос дыр кулэ луиз. Со сярысь тодаз вайыса, Джонни вера: «Куке мыным тужгес но секыт вал, мон Иеговалы вӧсяськи, куронъёсы сярысь пыр-поч вераса. Вӧсяськон мыным котьку но юрттылӥз». Ваньзэ чидан понна, Иегова Джоннилы кулэ луись кужым сётӥз. Роналд, Боливиысь тӧро, тодӥз, анаезлэн рак шуыса. Толэзь ортчыса, анаез кулӥз. Мар юрттӥз Джоннилы та куректонэз чиданы? Со вера: «Мон Иеговалы вӧсяськи но солы сюлэмме усьтӥ. Мон тодӥсько, Иеговалэсь умойгес монэ нокин уг вала шуыса, мон ачим но». Дырын-дырын ми малпаськомы, вылды, шуг-секытъёсмес чиданы ум быгатэ шуыса. Куддыръя ми мар сярысь вӧсяськыны но ум тодӥське. Но Иегова милесьтым мылкыдмес ӝутэ солы вӧсяськыны, милемлы шӧдонъёсмы сярысь вераны секыт ке но (Рим. 8:26, 27).

10. Еврейёслы 4:12 гожтэмъя, малы туж кулэ Библиез лыдӟыны но со вылын малпаськыны?

¹⁰ Библия. Павелэз сямен ик, милемыз но Священной Гожтэм юнматыны но буйгатыны быгатэ (Рим. 15:4). Куке ми Инмарлэсь Кылзэ лыдӟиськомы но со вылын малпаськиськомы, Иегова святой духез пыр милемлы умойгес валаны юрттэ, кызьы лыдӟем кылбуръёсты асьмелэн югдурамы уже кутоно. (Лыдӟе Еврейёслы 4:12.) Роналд вера: «Мон туж шумпотӥсько, ӝытлы быдэ Библиез лыдӟыны дыши шуыса. Мон трос малпаськисько Иеговалэн сямъёсыз сярысь, озьы ик со сярысь, макем яратыса со аслаз калыкез сярысь сюлмаське. Та мыным кужым сётэ».

11. Кызьы Библия юрттӥз одӥг сузэрмылы, кудӥзлэн картэз кулӥз?

¹¹ Инмарлэн Кылыз вылын малпаськон юрттэ милемлы шуг-секытъёсмы шоры шонер учкыны. Тани кызьы Библия юрттӥз одӥг сузэрмылы, кудӥзлэн кемалась ӧвӧл картэз кулӥз. Та сузэрлэсь сюлэмзэ буйгатон  понна, одӥг тӧро ӵектӥз солы выльысь лыдӟыны Иов книгаез. Сузэр та визь-кенешез уже кутӥз. Но нырысь со Иовез судъяз но малпаз: «Иов уг яра улонысь уродзэ гинэ адӟыны!» Нош берлогес со валаз, Иовлэн мылкыдыз солэн мылкыдызлы туж кельше шуыса. Сузэрлы та тодаз вайытӥз, улонын трос умоез но вань шуыса. Со тросгес малпаськыны кутскиз Иегова сярысь но вуоноезлы осконмы сярысь. Та сое юнматӥз но куректонэз пыр потыны юрттӥз.

12. Кызьы Иегова юнматэ милемыз вын-агайёс но сузэр-апайёс пыр?

¹² Вын-агайёс но сузэр-апайёс. Озьы ик Иегова юнматэ милемыз мукет христианъёс пыр. Апостол Павел кенешысь вын-агайёслы но сузэр-апайёслы гожтӥз: «Мынам тӥледыз туж адӟеме потэ... огмес огмы юнматыны мед быгатомы шуыса» (Рим. 1:11, 12). Мария, кудӥз сярысь та статьяын вераськиз ини, туж дунъя мукет христианъёсын кусып возьыны луонлыкез. Со вера: «Иегова юрттылэ мыным вын-агайёс но сузэр-апайёс пыр, нош соос куддыръя мынам шуг-секытъёсы сярысь уг но тодо. Кӧня пол ини самой кулэ луись дыре соос мыным ӟеч кылъёс вераллязы яке открытка ыстылӥзы. Со сяна, мон вераськисько мукет сузэр-апайёсын, кудъёсызлэн мынам выллем шуг-секытъёссы вал. Мон дышетскисько соослэсь та шуг-секытъёсты сэрттыны-пертчыны. Тӧроос но оскыто монэ, кенешын монэ дунъяло шуыса».

13. Кызьы ми ог-огмес юнматыны быгатӥськомы кенешлэн пумиськонъёсаз?

¹³ Кенешлэн пумиськонъёсыз милемлы туж умой луонлык сёто ог-огмес юнматыны. Умой луысал, пумиськонлэн кутскемезлэсь азьло яке собере, куд-ог вын-агайёсмылы но сузэр-апайёсмылы вераны, тӥ соосты яратӥськоды но тыршемзэс дунъяськоды шуыса. Кылсярысь, тани мар вераз Питер нимо тӧро одӥг сузэрлы, кудӥзлэн картэз Адӟись-Ивортӥсь ӧвӧл: «Ми туж шумпотӥськомы тонэ татын адӟыны! Тынад куать нылпиосыд котьку но ӝикыт дӥсяськемын. Пумиськонъёсын соос валэктонъёс сётыны котьку дась». Сузэрмылэн синвуосыз ик потӥзы. Тау карыса, со шуиз: «Тон туж дырыз-дыръя тае верад!»

14. Кызьы милемлы юрттэ ужан-тыршон?

¹⁴ Ужан-тыршон. Адямиос милемыз кылзо-а, уг-а, милемыз юнматыны быгатэ ужан-тыршон (Мад. 11:25). Тае ас вылаз шӧдӥз Стейси нимо сузэр. Куке солэсь ӵыжы-выжызэ кенешысь поттӥзы, куректэменыз сэрен со кытчы пырон инты ик ӧз шедьты. Со ялан аслэсьтыз юаз: «Лэсьтӥ-а мон ваньзэ, мае быгатӥ, солы юрттон понна?» Стейси ялан та сярысь малпаськыса улӥз. Мар солы юрттӥз? Ужан-тыршон. Тодытыкуз со ӧз малпаськы аслаз шӧдонъёсыз сярысь, нош малпаськиз со сярысь, кызьы адямиослы юрттоно. Стейси вера: «Ӵапак со вакытэ мон Библиез дышетыны кутски одӥг кышномуртэн, кудӥз туж ӝог вамышъёс лэсьтӥз. Та Иеговалэсь зэмос кузьым вал. Мар мон карысал ужан-тыршонтэк!»

15. Малы дышето тӥледыз Мариялэн кылъёсыз?

¹⁵ Куд-ог вын-агайёс но сузэр-апайёс малпало, ас югдуразы трос ужаны-тыршыны уг быгато шуыса. Тӥ но озьы ик малпаськоды ке, эн вунэтэ, Иегова шумпотэ, куке тӥ лэсьтӥськоды ваньзэ, мае быгатӥськоды. Нош ик малпаськомы Мариялэн учырез сярысь. Куке со кошкиз отчы, кытын адямиос мукет кылын верасько, со малпаз ужан-тыршонэз трос пайда уг вайы шуыса. Мария вера: «Кӧня ке дыр ӵоже мон быгатӥ вакчи гинэ валэктон сётыны, Библиысь кылбур лыдӟыны яке ужан-тыршонын буклет сётыны. Та сяна мон номыр карыны уг быгатӥськы вал». Та кылын умой вераськись ивортӥсьёсын ӵошатыса,  Мария ассэ умойтэм шӧдӥз. Но дыр ортчыса, со мукет сямен малпаськыны кутскиз. Со валаз, Иегова сое уже кутыны быгатэ, со та кылэз умой уг тоды ке но. Мария азьланьтэ: «Библиысь зэмлыкъёс туж валамонэсь. Ӵапак соос адямиослэсь улонзэс воштыны быгато».

16. Мар юнматыны быгатэ соосты, кинъёс дорысьтызы уг потало?

¹⁶ Ляб тазалыкенымы сэрен ми дорысьтымы потаны ум быгатӥське ке но, Иегова ужаны-тыршыны мылкыдмес адӟе но сое дунъя. Со сётоз милемлы луонлык ӟеч иворез вераны эмъясьёслы яке мукет ужасьёслы, кудъёсыз милемлы юртто. Ми ӵошатӥмы ке сое, кызьы али ужаськомы-тыршиськомы, соин, кызьы азьвыл ужамы-тыршимы, милям мылкыдмы куашканы быгатэ. Но ми адӟиськомы ке, кызьы Иегова милемлы туннэ юрттэ, милям кужыммы луоз, шумпотонмес ыштытэк, котькыӵе шуг-секытъёс пыр потыны.

17. Екклесиастын 11:6 верамъя, малы милемлы азьланяз но ужано-тыршоно, ми малпаськомы ке но, со пайда уг вайы шуыса?

¹⁷ Ми ум тодӥське, кизем зэмлык кидысъёс пӧлысь кудӥз выжы лэзёз но будыны кутскоз. (Лыдӟе Екклесиастэз 11:6.) Та умой адӟиське Барбара нимо сузэрлэн учырысьтыз, кудӥзлы 80 ареслэсь тросгес ини. Со телефон пыр но гожтэтъёс гожъяса ялан тодытэ. Одӥг пол со гожтӥз гожтэт. Ачиз но тодытэк, со ыстӥз сое кузпалъёслы, кудъёсыз кенешысь поттэмын вал. Конвертэ со понӥз 2014-тӥ арын 1-тӥ южтолэзь понна поттэм «Возьмаськон башняез», кудаз печатламын вал «Мар тӥ понна лэсьтӥз Инмар» статья (ӟуч). Кузпалъёс выльысь но выльысь та журналэз лыдӟизы. Картэз шӧдӥз, Иегова соин вераське шуыса. Соос кенешлэн пумиськонъёсаз ӵош ветлыны кутскизы но, 27 арлэсь но тросгес ортчыса, нош ик Иеговалэн ужась-тыршисьёсыз луизы. Малпалэ гинэ, кыӵе шумпотӥз Барбара, куке адӟиз, кыӵе емышъёс ваиз одӥг гинэ гожтэтэз! Та сое туж юнматӥз.

18. Мар кароно, Иегова милемыз мед юнматоз шуыса?

¹⁸ Та статьяысь ми тодӥмы, Иегова милемыз пӧртэм амалъёсын юнматыны быгатэ шуыса. Кылсярысь, милемыз юнматэ вӧсяськон, Библия, вын-агайёс но сузэр-апайёс, озьы ик ужан-тыршон. Ми Иеговалэсь юрттэтсэ ӧм ке палэнтэ, соку возьматомы осконмес, Инмар милемлы юрттыны быгатэ, озьы ик солэн юрттыны мылкыдыз но вань шуыса. Ойдолэ котьку оскиськомы Инмысь Атаймылы, кудӥз шумпотыса кужым сётэ, «Солы сюлмынызы оскиськымонэсь луисьёсты ӟечкын возён понна» (2 Пар. 16:9).