1. Малы тӥ паймиды, луоз, куке эшъёстылы но ӵыжы-выжыостылы нырысьсэ верады Библиысь иворез?

 ТОДӤСЬКОДЫ на-а тӥ со дырез, куке нырысьсэ валады, зэмлыкез шедьтӥды шуыса. Со, мае тӥ Библиысь тодӥды, тӥледлы туж валамон потӥз! Тӥ малпады, котькуд адями, тӥ кадь ик, Библиысь зэмлыкъёсты тодыны шумпотоз шуыса. Тӥ юн оскиды: ӟеч ивор юрттоз тӥледлы шудогес луыны но азьланезлы умой осконэн улыны (Пс. 118:105). Соин ик эшъёстылы но ӵыжы-выжыостылы тӥ вераны кутскиды со сярысь, мае тодӥды. Но тӥ туж паймиды, луоз, куке соослэн тӥледыз кылзэмзы ӧз поты.

2, 3. Кызьы учкизы Иисус шоры тросэз адямиос, кудъёсыз со дыре улӥзы?

² Милемлы паймоно ӧвӧл, Библиысь иворез веракумы, адямиос милемыз уг кылзо шуыса. Иисуслы но тросэз адямиос ӧз оске, со паймымон ужъёс лэсьтӥз ке но, кудъёсыз возьматӥзы, Инмар солы юрттэ шуыса. Кылсярысь, Иисус Лазарез улӟытӥз. Иисуслэн тушмонъёсыз но адӟизы, та паймымон уж вал шуыса. Озьы ке но иудейёслэн религиозной кивалтӥсьёссы ӧз оске, Иисус — со Мессия шуыса. Со сяна, соос Иисусэз но Лазарез виыны но малпазы! (Иоанн 11:47, 48, 53; 12:9—11).

³ Иисус тодӥз, тросэз адямиос уз оске, со Мессия шуыса (Иоанн 5:39—44). Иоанн Пылатӥсьлэн дышетскисьёсызлы со вераз: «Мон пумысен визь сынаськонлы сётскисьтэм мурт шудо» (Матф. 11:2, 3, 6). Соку малы сомында адямиос Иисуслы ӧз оске?

4. Мае ми эскеромы та статьяын?

⁴ Таяз но вуонояз статьяосын ми эскеромы, малы нырысетӥ даурын тросэз адямиос Иисуслы ӧз оске. Озьы ик ми  эскеромы, малы туннэ тросэзлэн милемыз кылзэмзы уг поты. Нош тужгес но кулэез, ми тодомы куд-ог мугъёсты, малы ми Иисуслы юн оскыны быгатӥськомы, со сьӧры мыныны милемлы номыр но медаз люкеты шуыса.

5. Малы куд-огъёсыз малпаны быгатӥзы, Иисус Мессия ӧй вал шуыса, кудӥз сярысь азьло ик верамын вал?

⁵ Тросэзлы канжаськон муг луиз Иисуслэн вордӥськемез но будэмез. Соос адӟизы, Иисус туж умой дышетӥсь вал но паймымон ужъёс лэсьтӥз шуыса. Но соослэн малпамзыя, со тӥрен ужась куанер муртлэн пиез гинэ вал. Со сяна, Иисус вал Назаретысь, кудӥз мукет каръёслэсь номырин ӧз висъяськы. Нафанаил но, кудӥз берлогес Иисуслэн дышетскисез луиз, нырысь вераз вал: «Назаретысь мар ке но ӟечез луыны быгатоз-а? (Иоанн 1:46). Со озьы вераз, малы ке шуоно солы ӧз кельшы, дыр, кар, кудаз Иисус улӥз. Яке со малпаз азьпалзэ ивортон сярысь, кудӥз гожтэмын Михейлэн 5:2. Отын гожтэмъя, Мессия Вифлеемын вордӥськыны кулэ вал, нош Назаретын кулэ ӧй вал.

6. Мар юрттыны быгатэ вал Иисус дыръя улӥсь адямиослы оскыны, со Мессия вал шуыса?

⁶ Мар вера Библия? Исаия пророк азьло ик вераз, Иисуслэн тушмонъёсыз «Солэн [Мессиялэн] выжыез сярысь» азьпалзэ ивортонъёсты уз эскере шуыса (Ис. 53:8). Со адямиос дыр висъясалзы ке, азьпалзэ ивортонъёсын тодматскон понна, соос валасалзы, Иисус Вифлеемын вордӥськиз шуыса, кызьы со сярысь азьло ик вераз Михей. Со сяна, соос валасалзы: Мессия потӥз Давид эксэйлэн выжыысьтыз (Лука 2:4—7). Но соос та азьпалзэ ивортонъёслы саклыксэс ӧз висъялэ, озьы ик малпаськытэк но дыртыса йылпумъянъёс лэсьтӥзы. Та люкетӥз соослы оскыны, Иисус Мессия вал шуыса.

7. Малы туннэ тросэзлэн Иеговалэсь калыксэ кылзэмзы уг поты?

⁷ Кылдэ-а таӵе шуг-секыт туннэ но? Кылдэ. Иеговалэн тросэз ужась-тыршисьёсыз дано но узыр адямиос ӧвӧл. Соин ик тросэз малпало, соос «дышетскымтэ, огшоры адямиос» шуыса (Ап. уж. 4:13). Куд-огъёсыз малпало: Иеговалэн Адӟись-Ивортӥсьёсыз Библиысь зэмлыкъёслы мукетъёссэ дышетыны уг быгато, малы ке шуоно соос талы нимысьтыз дышетскемын ӧвӧл. Мукетъёсыз лыдъяло, Иеговалэн Адӟись-Ивортӥсьёсыз Америкаысь религия шуыса. Нош зэмзэ вераса, Огазеяськем Штатъёсын вань Адӟись-Ивортӥсьёс пӧлысь 14 процентэз гинэ улэ. Нош кин ке но малпа, Иеговалэн Адӟись-Ивортӥсьёсыз Иисус Христослы уг оско шуыса. Трос аръёс ӵоже Адӟись-Ивортӥсьёсты нимало коммунистъёсын, Америкаысь шпионъёсын яке экстремистъёсын. Тросэз талы оско, нош шонер-а со, ӧвӧл-а, валаны уг тыршо. Соин ик соос Инмарлэн калыкезлы уг оско.

8. Апостолъёслэн ужъёсазы 17:11 верамъя, кызьы валано, кинъёс туннэ Инмарлэн зэмос ужась-тыршисьёсыз луо?

⁸ Мар юрттоз милемлы юн осконэн улыны? Валаны тыршоно, кытын зэмлык. Ӵапак озьы ик лэсьтӥз Лука но. Евангелизэ гожтыкуз, со «ваньзэ кутсконысеныз ик пыр-поч эскерыны» тыршиз. Солэн потэ вал, Евангелизэ лыдӟисьёс мед оскозы, со, мае соос кылӥзы Иисус сярысь, оскиськымон луэ шуыса (Лука 1:1—4). Верия карысь еврей калык но Лука сямен ик лэсьтӥз. Куке соос Иисус сярысь ӟеч иворез нырысетӥзэ кылӥзы, соос ӵошатӥзы сое Еврей Гожтэмъёсын, со зэм луэ-а, уг-а шуыса валан понна. (Лыдӟе Апостолъёслэсь ужъёссэс 17:11.) Озьы ик туннэ но ӵошатоно сое, малы дышето Иеговалэн Адӟись-Ивортӥсьёсыз, соин, мар вераське Библиын. Со сяна, тросгес  тодыны тыршоно Иеговалэн ужась-тыршисьёсызлэн асьме нуналъёсы нуиськись ужзы сярысь. Адями, кудӥз сыӵе пыр-поч эскерон ортчытэ, уз оскы Иеговалэн Адӟись-Ивортӥсьёсыз сярысь шонертэм верамъёслы. Озьы ик мукет адямиослэн асьсэды шонертэм воземзы сое уз канжаськыты.

9. Мар луиз, куке Иисус инмысь тодмет ӧз возьматы?

⁹ Иисус улон нуналъёсы куд-ог адямиослы Иисуслэсь дышетэмзэ кылыны гинэ тырмыт ӧй вал. Иисус Мессия луэ шуыса оскон понна, соос Иисусэз «куризы, инмысь соослы тодмет мед возьматоз шуыса» (Матф. 16:1). Соос шонертэм валазы, вылды, кылъёсты, кудъёсыз гожтэмын Данииллэн 7:13, 14. Нош Иеговалэн малпамезъя, та азьпалзэ ивортон берлогес быдэсмыны кулэ вал. Иисус Мессия луэ шуыса оскон понна, солэсь дышетэмзэ кылыны гинэ но тырмыт вал. Соин ик, куке соос Иисусэз куризы тодмет возьматыны, со сое ӧз лэсьты. Нош Иисус куронзэс ӧз быдэсты бере, та адямиос Иисуслы ӧз оске (Матф. 16:4).

10. Кызьы Иисус быдэстӥз Мессия сярысь кылъёсты, кудъёсыз гожтэмын Исаиялэн 42:1, 2?

¹⁰ Мар вера Библия? Исаия пророк Мессия сярысь вераз: «Уз кеськы, куаразэ уз будэты, ульчаысен Солэсь куаразэ уз кылэ» (Ис. 42:1, 2). Ужакуз-тыршыкуз Иисус аслыз саклык ӧз висъя. Со бадӟым храмъёсты ӧз пуктылы, нимысьтыз чебер дӥськут ӧз нуллы но адямиосты солы нимо-дано нимъёсын вазиськыны ӧз куры. Нош судын, кудӥныз солэн азьпал улонэз герӟаськемын вал, Ирод эксэйлы ярамон луон понна, Иисус паймымон уж ӧз лэсьты (Лука 23:8—11). Музъем вылын ужакуз-тыршыкуз, Иисус паймымон ужъёс лэсьтӥз ке но, солэн валтӥсь ужпумез вал Эксэйлык сярысь ӟеч иворез тодытыны. Иисус дышетскисьёсызлы вераз: «Со понна ик Мон лыктӥ уго» (Марк 1:38).

11. Религия сярысь кыӵе шонертэм малпанъёссы туннэ адямиослэн вань?

¹¹ Кылдэ-а таӵе шуг-секыт туннэ но? Кылдэ. Трос адямиосты паймыто чебер лэсьтэм  но узыр храмъёс, священникъёслэн дано нимъёссы но сям-йылолъёс, кудъёсызлэн кылдэмзы но мае возьматэмзы сярысь адямиос уг тодо ни. Но храме ветлыса, адямиос Инмар но солэн эрикез сярысь тодон-валан басьто-а? Нош соос, кинъёс христиан пумиськонъёсамы лыкто, тодо, мае возьма милесьтым Иегова. Эксэйлык юртъёсмы узыресь ӧвӧл ке но, соос чылкытэсь но котьма ласянь тупамонэсь. Соос, кинъёс кенешын кивалтон ужез нуо, нимысьтыз дӥськут яке нимъёс уг нулло. Милям осконмы но дышетонъёсмы Инмарлэн Кылыз вылэ пыкисько. Тросэзлы Инмарлы йыбыртъянмы туж огшоры потэ, нош дышетонъёсмы уг тупало солы, мае соос возьмало.

12. Мар вылэ пыкиське милям осконмы, Еврейёслы 11:1, 6 лыдэ басьтыса?

¹² Мар юрттоз милемлы юн осконэн улыны? Апостол Павел Римын улӥсь христианъёслы гожтӥз: «Оскон потэ тодытон бордысь, нош тодытон — Инмар кыл пыр» (Рим. 10:17). Озьыен, осконэз будэтон понна, Инмарлэсь Кылзэ эскероно но пыриськоно ӧвӧл Библия вылэ пыкиськымтэ сям-йылолъёсы, кыӵе гинэ паймымонэсь но кельшымонэсь соос медам потэ. Юн оскон пыкиське шонер тодон-валанъёс вылэ, малы ке шуоно «осконтэк Инмарлы ярамон луыны уг луы». (Лыдӟе Еврейёслы 11:1, 6.) Милемлы кулэ ӧвӧл инмысь тодметъёс, кудъёсыз возьматысалзы, ми зэмлыкез шедьтӥмы шуыса. Со интые, Библиысь дышетонъёсты пыр-поч эскероно. Соку милям осконмы юн луоз.

13. Малы тросэз адямиос ӧз оске, Иисус Мессия луэ шуыса?

¹³ Иисус музъем вылын улыку, Иоанн Пылатӥсьлэн дышетскисьёсыз ӧз валалэ, малы Иисуслэн дышетскисьёсыз уг визяло. Иисус валэктӥз, со соосын на бере, соос визяны кулэ ӧвӧл шуыса (Матф. 9:14—17). Озьы ке но фарисейёс но Иисуслэн мукет тушмонъёсыз Иисусэз янгыше уськытӥзы, со соослэн сям-йылолъёссыя уг улы шуыса. Соослэн вожзы потӥз, куке Иисус висисьёсты суббота нуналэ бурмытъяз (Марк 3:1—6; Иоанн 9:16).  Одӥг паласен, соос ушъяськыса веразы, субботаез чаклало шуыса, нош мукет паласен — соос уродэн ӧз лыдъялэ храмын вузкарыны. Нош куке Иисус соосты та понна судъяз, соос со вылэ йыркуръяськыны кутскизы (Матф. 21:12, 13, 15). Адямиослэн, кудъёсызлы Иисус Назаретысь синагогаын тодытӥз, вожзы потӥз, куке со соослы Израильын вашкала дыръя луэм учырез вераз. Та учыр Иисуслэн кылзӥсьёсызлы возьматӥз, соос асьсэды гинэ ярато но соослэн осконзы уг тырмы шуыса (Лука 4:16, 25—30). Тросэз адямиос Иисуслы ӧз оске, малы ке шуоно со ассэ ӧз возьы озьы, кызьы соослэн малпамзыя, со ассэ возьыны кулэ вал (Матф. 11:16—19).

14. Малы Иисус судъяз сям-йылолъёсты, кудъёсыз Священной Гожтэмлы пумит мыно вал?

¹⁴ Мар вера Библия? Иегова вераз Исаия пророкез пыр: «Та калык ымыныз Мынам матам лыктэ, кылыныз Монэ сӥлы каре, нош сюлмыныз Мынэсьтым кыдёкын улэ, соослэн Мон азьын йыбыртъянзы адямиослэсь курон-косонъёссэс эскерон-дышетон гинэ луэ» (Ис. 29:13). Иисус шонер лэсьтӥз, куке судъяз адямиослэсь сям-йылолъёссэс, кудъёсыз Священной Гожтэмлы пумит мыно вал. Соос, кинъёс адямиослэсь курон-косонъёссэс но сям-йылолъёссэс Инмарлэн Кылызлэсь вылӥегес пуктӥзы, Иеговаез но соин ыстэм Мессияез палэнтӥзы.

15. Малы тросэзлы Иеговалэн Адӟись-Ивортӥсьёсыз уг кельшо?

¹⁵ Кылдэ-а таӵе шуг-секыт туннэ но? Кылдэ. Тросэзлэн мылкыдзы куашка, куке Иеговалэн Адӟись-Ивортӥсьёсыз соосын ӵош уг пусъё Библия вылэ пыкиськымтэ праздникъёсты, кылсярысь, вордӥськон нуналъёсты но Выль арез. Мукетъёсызлэн вожзы потэ, куке Иеговалэн Адӟись-Ивортӥсьёсыз уг пырисько политикаен герӟаськем ужрадъёсы яке кулэмъёсты ватонэн герӟаськем сям-йылолъёсы, кудъёсыз Библилы пумит мыно. Соос, кинъёслы Иеговалэн Адӟись-Ивортӥсьёсызлэн асьсэды воземзы уг кельшы, оскыны быгато, соос асьсэос Инмарлы шонер йыбыртъяло шуыса. Но Библиысь дышетонъёсъя улэм интые, соос адямиослэн сям-йылолъёссыя уло ке, Инмарлы ярамон луыны соос уг быгато (Марк 7:7—9).

16. Мар милемлы кароно но малэсь палэнсконо?

¹⁶ Мар юрттоз милемлы юн осконэн улыны? Милемлы юн яратоно Иеговалэсь катъёссэ но возетъёссэ. (Лыдӟе Псалтирез 118:97, 113, 163—165.) Ми инмысь Атаймес яратӥськомы ке, соку солы ярасьтэм сям-йылолъёсъя ум улэ. Ми номырлы ум лэзе Иеговаез яратонмес лябӟытыны.

17. Мар люкетӥз тросэзлы Иисуслы оскыны?

¹⁷ Иисус музъем вылын улон дыръя куд-огъёсыз возьмазы политика удысысь воштӥськонъёсты. Соос малпазы, Мессия соосты Рим ки улысь мозмытоз шуыса. Но куке соос тыршизы Иисусэз эксэе пуктыны, со пумит луиз (Иоанн 6:14, 15). Нош мукетъёсыз, озьы ик священникъёс, кышказы, Иисус политика удысын воштӥськонъёс лэсьтоз шуыса. Та рим калыклэсь вожзэ поттысал но, соос священникъёсты кельтысалзы кивалтыны правотэк, кудзэ асьсэос ик соослы сётӥзы вал. Та сярысь сюлмаськеменызы, тросэз Иисуслы ӧз оске.

18. Мессия сярысь кыӵе азьпалзэ ивортонъёслы Иисус дыръя улӥсь тросэз адямиос саклыксэс ӧз висъялэ?

¹⁸ Мар вера Библия? Тросэз азьпалзэ ивортонъёс возьматӥзы: Мессия луоз ожгарчи, кудӥз вормон ваёз. Озьы ке но мукет азьпалзэ ивортонъёс возьматӥзы, нырысь со милям сьӧлыкъёсмы понна кулыны кулэ шуыса (Ис. 53:9, 12). Соку малы Иисус дыръя улӥсь  адямиос солэсь мукетсэ возьмазы? Соос пӧлысь тросэз саклыксэс ӧз висъялэ азьпалзэ ивортонъёслы, кудъёсыз возьматӥзы, соослэн шуг-секытъёссы соку ик сэрттэмын-пертчемын уз луэ шуыса (Иоанн 6:26, 27).

19. Малы туннэ тросэз милесьтым ивормес уг кылзо?

¹⁹ Кылдэ-а таӵе шуг-секыт туннэ но? Кылдэ. Тросэз милесьтым ивормес уг кылзо, малы ке шуоно ми политикае ум пыриськиське. Та адямиос малпало, милемлы быръёнъёсы пыриськоно шуыса. Озьы ке но ми валаськомы: адямиос пӧлысь милемын кивалтыны кыӵе ке адямиез бырйимы ке, Иеговалэн малпамезъя, ми сое палэнтомы (1 Экс. 8:4—7). Со сяна, адямиос малпаны быгато, милемлы ӟеч ужъёс лэсьтоно шуыса, кылсярысь, школаосты, эмъюртъёсты пуктоно. Соос милемыз уг кылзо, малы ке шуоно ми вань кужмысьтымы тыршиськомы тодытон уже пыриськыны, нош та дуннеысь шуг-секытъёсты сэрттыны-пертчыны ум тыршиське.

20. Мар ми понна валтӥсез луыны кулэ Иисуслэн кылъёсызъя, кудъёсыз гожтэмын Матфейлэсь 7:21—23?

²⁰ Мар юрттоз милемлы юн осконэн улыны? (Лыдӟе Матфейлэсь 7:21—23.) Нырысь ик, тыршоно быдэстыны ужез, кудзэ милемлы Иисус сётӥз (Матф. 28:19, 20). Та дуннеысь шуг-секытъёсты сэрттыны-пертчыны милемлы кулэ ӧвӧл. Ми адямиосты яратӥськомы ке но, озьы ик соос сярысь сюлмаськиськомы ке но, ми валаськомы: тужгес но умоез, мае ми карыны быгатӥськомы матысь адямиосмылы,— со дышетыны соосты Инмарлэн Эксэйлыкез сярысь зэмлыклы но юрттыны соослы Иеговаен эшъяськыны.

21. Мар карыны милям юн мылкыдмы вань?

²¹ Та статьяын ми эскеримы ньыль мугъёсты, кудъёсыз возьмато, малы нырысетӥ даурын тросэз Иисусэз палэнтӥзы, нош туннэ солэсь дышетскисьёссэ палэнто. Нош вань на-а мукет мугъёс? Вань. Вуонояз статьяын ми эскеромы на эшшо ньыльзэ. Ойдолэ номырлы ум лэзе осконмес лябӟытыны но юн оскомы, Иисусэз Инмар ыстӥз шуыса!