1. Мар карыны мылкыдзэс ӝутэ Иегова аслаз ужась-тыршисьёсызлэсь? (Озьы ик учке суредэз.)

 КИН милемыз буйгатыны но милемлы визь-кенеш сётыны быгатэ? Та юанлы валэктонэз ми тодӥськомы — милям Иеговалы вӧсяськеммы луэ. Инмар ачиз милемыз ӧте солы вазиськыны. Инмарлэн потэ, ужась-тыршисьёсыз солы ӵем мед вӧсяськозы шуыса. Библиын гожтэмын: «Дугдылытэк вӧсяське» (1 Фес. 5:17). Ми быгатӥськомы солы вӧсяськыны но улонысьтымы котькуд учырлы кивалтэт курыны (Мад. 3:5, 6). Иегова — туж шырыт сямо Инмар. Соин ик милям луэ вӧсяськеммы сомында, кӧня потэ.

2. Мае ми эскеромы та статьяын?

² Ми туж тау кариськомы Иеговалы, солы вӧсяськеммы луэ шуыса. Озьы ке но трос ужъёсынымы сэрен куддыръя вӧсяськон понна дыр шедьтыны секыт луэ. Со сяна, ми валаськомы, вылды, вӧсяськонъёсмес умоятоно шуыса. Но ми шумпотӥськомы, та пумысен пайдаё визь-кенешъёсты Библиысь шедьтыны луэ шуыса. Та статьяысь ми тодомы, кызьы, Иисуслэсь адӟем карыса, вӧсяськон понна дыр шедьтыны луэ. Озьы ик ми тодомы, мар сярысь вӧсяськыны луэ, соосты умоятон понна. Ми вераськомы вӧсяськон понна вить темаос сярысь.

3. Мае тодӥз Иисус вӧсяськон сярысь?

³ Иисус тодӥз, Иеговалы ужась-тыршисьёсызлэн вӧсяськонъёссы  дуно пото шуыса. Музъем вылэ лыктытозяз, Иисус адӟиз, кызьы Атаез вӧсяськонъёслы ответ сётылӥз. Кылсярысь, Иисус вал Иегова вӧзын, куке со ответ сётылӥз Анналэн, Давидлэн, Илиялэн но мукет оскымон ужась-тыршисьёсызлэн сюлмысь вӧсяськонъёссылы (1 Экс. 1:10, 11, 20; 3 Экс. 19:4—6; Пс. 31:5). Соин ик Иисус дышетскисьёссэ дышетӥз ӵем вӧсяськыны но юн оскыны, Иегова соослы но ответ сётоз шуыса (Матф. 7:7—11).

4. Кыӵе адӟем карон кельтӥз Иисус вӧсяськон пумысен?

⁴ Ми быгатӥськомы Иисуслэсь адӟем карыны, кызьы вӧсяськыны кулэ. Музъем вылын ужакуз-тыршыкуз, Иисус ӵем Иеговалы вӧсяськиз. Со понна Иисуслы дыр висъяно вал, малы ке шуоно солэн котьку трос ужез вал но со котырын трос адямиос вал (Марк 6:31, 45, 46). Огназ вӧсяськон понна, Иисус вазь ӵукна султылӥз (Марк 1:35). Огпол Иисус кулэ луись ужпум кутон азяз уйбыт вӧсяськиз (Лука 6:12, 13). Нош кулон азяз ӝытэ, музъем вылын ужан-тыршонэзлэн самой секыт вакытэз азьын, со кӧня ке пол вӧсяськиз (Матф. 26:39, 42, 44).

5. Кызьы ми Иисуслэсь адӟем карыны быгатӥськомы?

⁵ Иисус возьматӥз, кӧня гинэ ужъёсмы милям медам луэ, вӧсяськонлы дыр висъяно шуыса. Со понна юри дыр висъяно луоз, вылды. Кылсярысь, ми быгатӥськомы ӵукна вазьгес султыны яке бергес изьыны выдыны. Озьы ми возьматомы, Иеговалэсь та кузьымзэ дунъяськомы шуыса. Линн сузэрлэн сюлмыз ик бугырскиз, куке со валаз, макем дуно луэ вӧсяськыны луонлык. Со тодаз вае: «Куке мон тодӥ, Инмарен котьку но вераськеме луэ шуыса, мон Инмарез матысь эшеным лыдъяны кутски. Мынам потӥз вӧсяськонъёсме эшшо но умойгес кареме». Ми пӧлысь тросэзлэн таӵе ик шӧдонъёссы вань. Соин ик ойдолэ эскеромы вӧсяськон понна вить темаосты.

6. Усьтӥськонын 4:10, 11 гожтэмъя, мае «басьтыны ярась» Иегова?

⁶ Иеговаез данъялэ. Апостол Иоаннлы возьматэмын вал, кызьы инмын 24 тӧроос Иеговаез данъяло. Соос веразы, Иегова «данлыкез, сӥ-данэз... басьтыны ярась» шуыса. (Лыдӟе Усьтӥськонэз 4:10, 11.)  Оскымон кылчинъёслэн но Иеговаез данъяны трос мугъёссы вань. Соос Инмарен ӵош инмын уло, соин ик сое туж умой тодо. Соос Иеговалэсь ужъёссэ адӟо. Ваньмыз та оскымон кылчинъёслэсь мылкыдзэс ӝутэ Иеговаез данъяны (Иов 38:4—7).

7. Мар понна милям Иеговаез данъяммы луэ?

⁷ Милемлы но вӧсяськыкумы Иеговаез данъяно. Кылсярысь, милям солы вераммы луэ, мар понна ми сое яратӥськомы но гажаськомы. Библиез лыдӟыкуды но эскерыкуды, пусъе Иеговалэсь сямъёссэ, кудъёсыз тӥледлы тужгес но кельшо (Иов 37:23; Рим. 11:33). Собере Иеговалы шӧдонъёсты сярысь вералэ. Озьы ик ми быгатӥськомы Иеговаез данъяны милемлы но огъя оскисьёсмылы юрттэмез понна. Со ялан ми сярысь сюлмаське но милемыз уте (1 Экс. 1:27; 2:1, 2).

8. Мар понна милям Иеговалы тау кареммы луэ? (1 Фессалоникаослы 5:18).

⁸ Иеговалы тау каре. Иеговалы тау карыны милям трос мугъёсмы вань. (Лыдӟе 1 Фессалоникаослы 5:18.) Ойдолэ солы тау шуомы ваньмыз умоез понна, мармы милям вань. Малы ке шуоно вань ӟеч кузьымъёсты со сётэ (Иак. 1:17). Кылсярысь, ми быгатӥськомы Иеговалы тау шуыны чебер музъеммы но мукет кылдытэмъёс понна. Озьы ик тау шуыны луэ улон, семья, эшъёс но вуоноезлы оскон понна. Со сяна, Иеговалы тау карыны кулэ, со милемлы матысь эшъёсыныз луыны лэзиз шуыса.

9. Малы, Иеговалы тау карон мылкыдмес будэтон понна, туж тыршоно луоз, вылды?

⁹ Малпаськыны кулэ, мар понна милям Иеговалы тау кареммы потэ. Со понна туж тыршоно луоз, дыр. Малы ке шуоно та дуннеысь адямиос ӵем дыръя малпасько со сярысь гинэ, мар соослы кулэ. Соослэн йыразы но уг лыкты тау карыны со понна, марзы соослэн вань ини. Ми но озьы ик малпаськимы ке, соку вӧсяськыкумы куронъёсмы сярысь гинэ вераны кутскомы. Озьы медам луы шуыса, Иеговалы тау карон мылкыдмес будэтоно но тау кароно ваньмыз понна, мае со милемлы лэсьтэ (Лука 6:45).

10. Кызьы тау карон юрттӥз одӥг сузэрмылы ваньзэ чиданы? (Озьы ик учке суредэз.)

¹⁰ Тау карись адямиослы шуг-секытъёсты чиданы капчигес. Тани Кюнг-Сук сузэрмылэн учырез b. Эмъясьёс веразы, солэн рак шуыса, кудзэ туж секыт эмъяны но кудӥз мугор пушкын туж ӝог вӧлме. Со вера: «Висёнэ сярысь тодэме бере мыным туж секыт вал. Мон малпай, ваньзэ ыштӥ шуыса. Мыным туж кышкыт луиз». Мар юрттӥз сузэрмылы ваньзэ чиданы? Котькуд ӝыт изьыны выдон азяз Кюнг-Сук, коркаезлэн липет вылаз тубыса, Иеговалы шара вӧсяськиз но тау кариз  вить бакель каронъёс понна, кудъёссэ ортчем нунал куспын адӟиз. Та солы юрттӥз ӧжытгес сюлмаськыны но мылкыдзэ ӝутӥз Иеговалы вераны, сое туж яратэ шуыса. Сузэрмы ас вылаз шӧдӥз, Иегова оскымон ужась-тыршисьёсызлы шуг-секытъёссэс чиданы юрттэ шуыса. Со валаз, шуг-секытъёс сярысь, бакель каронъёс улонамы тросгес шуыса. Кюнг-Сук сузэрмылэн кадь ик, милям но вань трос мугъёсмы Иеговалы тау карыны, шуг-секытъёсмы кема кыстӥськоно ке но. Вӧсяськыкумы Иеговалы тау каримы ке, милемлы капчигес луоз ваньзэ чиданы но каньыл сюлмын улыны.

11. Малы Иисуслэн инме ӝутскемез бере дышетскисьёсызлы кышкасьтэмесь луыны кулэ вал?

¹¹ Иеговалэсь юрттэт куре кышкатэк тодытыны. Инме ӝутскемез азьын Иисус дышетскисьёсызлы тодазы вайытӥз, соос «Иерусалимын но, быдэс Иудеяын но, Самарияын но, быдэс музъемлэн пумысеныз пумозяз ик» со сярысь тодытыны кулэ шуыса (Ап. уж. 1:8; Лука 24:46—48). Та бере ӝоген иудейёслэн религиозной кивалтӥсьёссы Пётрез но Иоаннэз кутӥзы но Сӥнедрионэ вайизы. Соос та оскымон ужась-тыршисьёсты косӥзы тодытэмысь дугдыны. Соосты кышкатӥзы но (Ап. уж. 4:18, 21). Кызьы асьсэды возизы Пётр но Иоанн?

12. Мар каризы дышетскисьёс, Апостолъёслэсь ужъёссэс 4:29, 31 лыдэ басьтоно ке?

¹² Кышкатэмзылы пумит Пётр но Иоанн шуизы: «Асьтэос судить каре: Инмар азьын шонер-а луоз, Инмарез сярысь, тӥледыз золгес кылзӥськыны? Ми ум быгатӥське адӟеммес но, кылэммес но вератэк улыны» (Ап. уж. 4:19, 20). Куке Пётрез но Иоаннэз лэзизы, дышетскисьёс Иеговалэсь юрттэтсэ курыны кутскизы солэсь эриксэ быдэсъяны. Соос вӧсяськизы: «Аслад ляльчиосыдлы чик кышкатэк Тынэсьтыд кылдэ вераны луонлык сёт». Иегова сюлмысь вӧсяськемзылы ответ сётӥз. (Лыдӟе Апостолъёслэсь ужъёссэс 4:29, 31.)

13. Малы дышетскыны луэ Джин Хёк агайлэсь?

¹³ Ми Иисуслэн дышетскисьёсызлэсь адӟем каромы, тодытӥмы ке соку но, куке кивалтӥсьёс ужмес нуыны уг лэзё. Тани Джин Хёк агаймылэн учырез. Нейтралитет воземез понна сое пытсэтэ пуктӥзы. Сое косӥзы сиён нуллыны пытсэтын пукисьёслы, кудъёсыз камераын огназы пукизы. Уженыз герӟаськымтэ вераськонъёсты кутскыны, озьы ик Библия сярысь вераськыны но, уг яра вал. Джин Хёк Иеговалэсь юрттэт куриз, котькуд тупась учыре зэмлык сярысь вераськыны медаз кышка шуыса (Ап. уж. 5:29). Со вера: «Иегова вӧсяськонъёсме кылӥз. Со мыным кышкасьтэм сям но визьлык сётӥз. Камераосы пырон дорын ик вить минут куспын мон трос адямиосын Библиез дышетӥ. Нош ӝытъёсы мон гожтэтъёс гожъяй, кудъёссэ вуоно нуналаз пытсэтын пукисьёслы сётъяй». Джин Хёк агаймылэсь адӟем карыса, ми но быгатӥськомы Иеговалэсь кышкасьтэм сям но визьлык курыны, озьы ик юн оскыны, Иегова милемлы тодытыны юрттоз шуыса.

14. Мар юрттоз милемлы шуг-секытъёс пыр потыны? (Псалтирь 36:3, 5).

¹⁴ Иеговалэсь юрттэт куре шуг-секытъёс пыр потыны. Ми пӧлысь тросэз курадӟо тазалыкенызы герӟаськем шуг-секытъёсынызы сэрен. Кин ке но куректэ матысь адямиез кулэмен сэрен. Кинлэн ке но семьяяз секыт югдур кылдэмын. Вань соос но, кинъёс уйылон-уллянъёсын но мукет шуг-секытъёсын пумиськыло. Нош инкуазь шимучыръёс, пандемияос  но ожмаськонъёс дыръя ваньзэ тае чиданы эшшо но секытгес. Сюлэмдэс Иеговалы усьтэ. Вералы солы, матысь эштылы кадь ик, асьтэлэн сюлмаськонъёсты сярысь. Юн оске: Иегова тӥледлы одно ик юрттоз! (Лыдӟе Псалтирез 36:3, 5.)

15. Кызьы вӧсяськон милемлы юрттэ шуг-секытъёсты чиданы? Вералэ пример.

¹⁵ Ми ялан вӧсяськимы ке, та юрттоз милемлы, «куректон-кайгу лыктыку, чидасесь» луыны (Рим. 12:12). Иегова тодэ, маин пумиськоно луо солэн ужась-тыршисьёсыз. Библиын гожтэмын, Инмар «викышъям-бӧрдэмзэс кылэ» шуыса (Пс. 144:18, 19). Тае ас вылаз шӧдӥз 29 аресъем Кристи сузэр, кудӥз пионер луыса ужа-тырше. Малпамтэ шорысь солэн тазалыкез уродмиз. Таин сэрен со депрессиен курадӟыны кутскиз. Берлогес анаезлэсь шедьтӥзы эмъяны луонтэм но кулонэ вуттӥсь висёнзэ. Кристи вера: «Котькуд ӵукна мон Иеговалы ӟырдыт вӧсяськи но вуоно нуналлы кужым кури. Мон тырши пумиськонъёсы ветлыны но ас поннам Библиез дышетыны». Со ватса: «Вӧсяськон юрттӥз мыным самой секыт вакытъёсты чиданы. Мон тодӥ, Иегова монэн ӵош шуыса. Та малпан монэ туж-туж буйгатӥз. Тазалыке соку ик умойгес ӧз луы ке но, Иегова вӧсяськонъёсылы ответ сётылӥз. Со юрттӥз мыным каньыл сюлмын улыны». Ойдолэ ум вунэтэ: Иегова «Ачиз тодэ, кызьы чылкыт сюлэмо, оскыса улӥсьёсты визь сынаськонлэсь мозмытыны» (2 Пётр 2:9).

16. Малы Иеговалэн юрттэмез кулэ, визь сынаськонъёсын нюръяськон понна?

¹⁶ Иеговалэсь юрттэт куре визь сынаськонъёслы сётскытэк улыны. Сьӧлыко луэменымы сэрен, ми ялан нюръяськиськомы шонертэм мылпотонъёсынымы. Шайтан лэсьтэ ваньзэ, мае быгатэ, ми та нюръяськонын медам ворме шуыса. Кылсярысь, малпаськон амалмес суран-пожан понна, со азон-калгонэн герӟаськем  шутэтскон амалъёсты кутэ. Сыӵе шутэтскон амалъёсын сэрен милям кырсь малпанъёсмы кылдо. Соос милемыз саптало но секыт сьӧлыке вуттыны быгато (Марк 7:21—23; Иак. 1:14, 15).

17. Кызьы асьмеды возёно, Иеговаез куримы ке асьмеды визь сынаськонлэсь утьыны? (Озьы ик учке суредэз.)

¹⁷ Визь сынаськонъёслы медам сётске шуыса, милемлы Иеговалэн юрттэмез кулэ. Вӧсяськыны дышетыкуз, Иисус таӵе курон сярысь вераз: «Милемыз визь сынаськонлэсь но утьы, уродлэсь но мозмыты милемыз» (Матф. 6:13). Иегова дась милемлы юрттыны. Но со понна сое та сярысь курыны кулэ. Озьы ик асьмеды вӧсяськеммыя возёно. Лэсьтоно ваньзэ, мае быгатӥськомы, та дуннеысь адямиос сямен, медам малпаське шуыса (Пс. 96:10). Мар со понна кароно? Библиез лыдӟыса но эскерыса, йырвизьмес юнматӥсь малпанъёсын тырмытоно. Со сяна, малпаськон амалмес утён понна, кенешлэн пумиськонъёсаз ветлоно но тодытоно. Нош Иегова кылзэ сётэ, ми чиданы луонтэм визь сынаськонъёсын ум пумиське шуыса (1 Кор. 10:12, 13).

18. Мае ваньмылы карыны кулэ?

¹⁸ Та секыт берпум нуналъёсы Иеговалы оскымон мед луомы шуыса, ваньмылы эшшо но тросгес вӧсяськыны кулэ. Вань сюлмысьтыды вӧяськон понна, котькуд нунал дыр висъялэ. Иеговалэн потэ, ми солы сюлэммес мед усьтомы шуыса (Пс. 61:9). Вань ужъёсыз понна Иеговаез данъялэ но солы тау каре. Солэсь юрттэтсэ куре кышкатэк тодытыны. Шуг-секытъёсын яке визь сынаськонъёсын пумиськыкуды, солы вазиське. Эн лэзе нокинлы но номырлы тӥледлы люкетыны ялан Иеговалы вӧсяськыны. Нош кызьы Иегова вӧсяськонъёсмылы ответ сётэ? Та кулэ луись юанэз ми вуоно статьяын эскеромы.