ЭСКЕРОН ПОННА СТАТЬЯ 22
«Дун-шектэм сюрес» вылысь эн коже
«Отын бадӟым сюрес луоз, отӥ мынӥсь сюрес дун-шектэм шуыса лыдъяськоз» (ИС. 35:8).
31-ТӤ КЫРӞАН Инмар азьтӥ ветлы!
ТА СТАТЬЯЫН a
1, 2. Кыӵе кулэ луись ужпум кутоно вал еврей калыклы, кудӥз Вавилонын улӥз? (Ездра 1:2—4).
ЭКСЭЙЛЭН косонэз ялэмын! Еврей калык, кудӥз ог 70 ар ӵоже вавилон пленын вал, табере Израиле берытскыны быгатӥз. (Лыдӟе Ездралэсь 1:2—4.) Тае Иегова гинэ лэсьтыны быгатэ вал. Малы? Малы ке шуоно пленэ басьтэм адямиоссэ Вавилон уг лэзьы вал (Ис. 14:4, 17). Но Вавилон куашкатэмын. Нош выль кивалтӥсь ялӥз, еврей калык вордскем музъемаз берытскыны быгатэ шуыса. Соин ик еврей калык пӧлысь котькудӥзлы, тужгес но семьяослэн йыръёссылы, ужпум кутоно вал: Вавилонысь кошконо яке кылёно. Ужпум кутыны секыт вал. Малы?
2 Тросэзлы Вавилонысь кошкыны секыт вал бадӟым арлыдзы сэрен. Озьы ик еврей калык пӧлысь тросэз Вавилонын вордӥськизы. Соослэн мукет интыын улэмзы ӧй вал. Израиль шоры соос учкизы музъем шоры кадь, кудаз куке но ӵыжы-выжыоссы улӥзы. Со сяна, куд-ог еврейёс Вавилонын туж узырмизы, вылды. Соин ик соослы секыт вал, дыр, умой коркаоссэс яке ужзэс кельтыны но тодмотэм музъеме кошкыны.
3. Кыӵе бакель карон возьмаз Инмарлы оскымон еврей калыкез Израиле берытскемез бере?
3 Инмарлы оскымон еврейёс тодӥзы: ӵошатоно ке соин, мае соос Вавилонын кельтозы, Израильын соос тросгес бакель каронъёс басьтозы. Самой бадӟымез бакель карон герӟаськемын вал Иеговалы йыбыртъянэн. Вавилонын 50-лэсь но тросгес храмъёс вал ке но, Иеговалэн храмез отын ӧй вал. Еврейёслэн ӧй вал курбон ваён интызы но пуктэм священникъёссы, кудъёсыз Моисейлэн законэзъя отын курбонъёс вайысалзы. Со сяна, Иеговалэн калыкез улӥз мукет инмаръёслы йыбыртъясь адямиос пӧлын. Соос улӥзы пиосмуртъёс но кышномуртъёс пӧлын, кудъёсыз Иеговалэсь нокӧня но ӧз кылзӥське. Соин ик Инмарлы оскымон трос сюрс еврейёс туж возьмазы, ку быгатозы вордскем музъемазы берытскыны но чылкыт йыбырттонэз тупатыны.
4. Кызьы юрттыны Иегова кылзэ сётӥз Израиле берытскись еврей калыклы?
4 Вавилонысь Израиле нуись сюрес капчи ӧй вал. Отчы ог ньыль толэзь ӵоже мыноно вал. Но Иегова кылзэ сётӥз сюрессэс ӵошкытатыны. Исаия пророк гожтӥз: «Кузё-Инмарлы сюрес дасялэ, асьмелэн Инмармылы кыр интыын шонертэлэ сюресэз. ...Кырыж интыос мед шонералозы, выро-гопо сюресъёс мед ӵошкыталозы» (Ис. 40:3, 4). Пуктэ син азяды: кыр интыын, гурезьёс вискын, паськыт, ӵошкыт сюрес понэмын. Сыӵе сюреслы котькин шумпотысал! Гурезьёстӥ ветлонэн ӵошатоно ке, сыӵе сюрес вылтӥ мыныны капчигес но ӝоггес.
5. Кызьы нимаськиз Вавилон но Израиль куспысь сюрес, кудӥз сярысь Исаия гожъяз?
5 Асьме нуналъёсы трос сюресъёслэн нимъёссы яке номеръёссы вань. Сюреслэн но, кудӥз сярысь Исаия гожъяз, нимыз вань. Со сярысь ми лыдӟиськомы: «Отын бадӟым сюрес луоз, отӥ мынӥсь сюрес дун-шектэм шуыса лыдъяськоз: сьӧлыко-кырсь мурт со вылтӥ уз ветлы» (Ис. 35:8). Кызьы герӟаськемын вал та кылсётон израиль калыкен? Кызьы со герӟаськемын милемын туннэ?
«ДУН-ШЕКТЭМ СЮРЕС»: АЗЬВЫЛ НО АЛИ
6. Малы сюрес дун-шектэм шуыса нимаськиз?
6 «Дун-шектэм сюрес». Кыӵе чебер ним! Нош малы со дун-шектэм шуыса нимаськиз? Малы ке шуоно азьпалзэ ивортонын вераськиз, берытскем израиль калык пӧлын «сьӧлыко-кырсь мурт» уз луы шуыса. Яке соос пӧлын уз луы адями, кудӥз азыса-калгыса, сульдэръёслы-идолъёслы йыбыртъяса яке мукет секыт сьӧлыкъёс лэсьтыса улӥз. Аслаз Инмарез понна израиль калыклы «святой калык» луоно вал (К. Зак. 7:6). Но та уг возьматы, Вавилонысь потэмъёслы номыре тупатоно ӧй вал шуыса.
7. Кыӵе воштӥськонъёс лэсьтоно вал куд-ог еврейёслы? Вералэ примеръёсты.
7 Кызьы гожтэмын вал ини, еврей калык пӧлысь тросэз Вавилонын вордӥськизы. Тросэз вавилон калыклэн сям-йылолъёсызъя улӥзы, вылды. Израиле берытскемзы бере кӧня ке дасо аръёс ортчыса, Ездра тодӥз: куд-ог еврей пиосмуртъёс кышнояськизы мукет инмаръёслы йыбыртъясь кышномуртъёсын (Пот. 34:15, 16; Езд. 9:1, 2). Эшшо берлогес Неемия кивалтӥсь туж паймиз, Израильын вордӥськем куд-ог нылпиос еврей кылын уг верасько шуыса (К. Зак. 6:6, 7; Неем. 13:23, 24). Быгато вал-а та нылпиос Иеговаез яратыны но солы йыбыртъяны, соос еврей кылын гожтэм Инмарлэсь Кылзэ ӧз валалэ ке? (Езд. 10:3, 44). Соин ик еврей калыклы бадӟым воштӥськонъёс лэсьтоно вал. Израильын чылкыт йыбырттон пичиен-пичиен тупатскиз бере, отын сое лэсьтыны капчигес вал (Неем. 8:8, 9).
1919-тӥ арысен кӧня ке миллион пиосмуртъёс, кышномуртъёс но нылпиос Быдӟым Вавилонысь потӥзы но «дун-шектэм сюрес» вылэ султӥзы. (Учке 8-тӥ абзацез.)
8. Малы милемын герӟаськемын учыр, кудӥз сю аръёс талэсь азьло луиз? (Учке вылбамысь суредэз.)
8 Кин ке но малпалоз, дыр: «Та туж тунсыко. Но герӟаськемын-а еврейёсын луэм учыр монэным?» Герӟаськемын. Вераны луоз, ми но «дун-шектэм сюрес» вылтӥ мынӥськомы. Кинъёс пӧлы гинэ ми медам пыре — зырӟем христианъёс яке «мукет ыжъёс» пӧлы, милемлы «дун-шектэм сюрес» вылысь кожоно ӧвӧл (Иоанн 10:16). Малы ке шуоно со духовной райтӥ ортче но Эксэйлыклэн вуоно бакель каронъёсыз доры вуттэ b. 1919-тӥ арысен кӧня ке миллион пиосмуртъёс, кышномуртъёс но нылпиос потӥзы ини Быдӟым Вавилонысь, зэмос луисьтэм религилэн дунневыл империысьтыз, но та сюрес вылэ султӥзы. Тӥ но соос пӧлын, вылды. «Дун-шектэм сюрес» ог 100 ар талэсь азьло усьтӥськиз. Но дасяськон ужъёс сю аръёслы азьлогес кутскизы.
ДАСЯСЬКОН УЖЪЁС
9. Мае тодыны луэ «дун-шектэм сюресэз» дасян сярысь, Исаиялэсь 57:14 лыдӟыса?
9 Иегова сюлмаськиз, Вавилонысь потэм еврей калыклэн сюресэз ӵошкытатэмын мед луоз шуыса. (Лыдӟе Исаиялэсь 57:14.) Нош мар вераны луоз асьме нуналъёсысь «дун-шектэм сюрес» сярысь? 1919-тӥ арлэсь азьло кӧня ке дауръёс ӵоже Иегова сое гажась пиосмуртъёс пыр Быдӟым Вавилонысь потӥсь сюресэз сузяз. (Ӵошатэ Исаиялэсь 40:3.) Соос дасяськон ужъёсты быдэсъязы, берлогес Быдӟым Вавилонысь потэм адямиос духовной рае пырыны мед быгатозы шуыса, кытын чылкыт йыбырттон тупатэмын вал. Мар соос каризы, та сюресэз дасян понна? Ойдолэ тодомы.
1919-тӥ ар азьын кӧня ке дауръёс ӵоже Инмарез гажась куд-ог пиосмуртъёс Быдӟым Вавилонысь потӥсь сюресэз сузязы (Учке 10-тӥ но 11-тӥ абзацъёсты.)
10, 11. Кызьы книгаосты печатлан но Библиез берыктон ужъёс Библиысь тодон-валанъёсты вӧлмытыны юрттӥзы? (Озьы ик учке суредэз.)
10 Книгаосты печатлан уж. XV даурлэн шорозяз Библиосты киын лэсьтылӥзы. Соосты лэсьтон понна, трос дыр кошкылӥз. Соин ик Библиос ӧжыт но туж дуноесь вал. Нош куке печатлан станокез кылдытӥзы, Библиосты печатланы но вӧлмытыны капчигес луиз.
11 Берыктон уж. Трос дауръёс ӵоже Библиез лыдӟыны луэ вал ӵем дыръя латин кылын гинэ, кудзэ дышетскем адямиос гинэ валазы. Книгаосты печатлан уж вӧлмемъя, Инмарез гажась адямиос Библиез берыктыны кутскизы огшоры адямиослэн кылъёссылы. Табере лыдӟисьёс ӵошатыны быгатӥзы священникъёслэсь верамъёссэс соин, мар гожтэмын Библиын.
1919-тӥ ар азьын кӧня ке дауръёс ӵоже Инмарез гажась куд-ог пиосмуртъёс Быдӟым Вавилонысь потӥсь сюресэз сузязы (Учке 12—14-тӥ абзацъёсты.) c
12, 13. Вералэ, кызьы XIX даурын Библиез эскерисьёс черкъёслэсь шонертэм дышетонъёссэс шараязы.
12 Библиез эскерон понна пособиос. Библиез сак эскерисьёс Инмарлэн Кылысьтыз трос тодон-валанъёс басьтӥзы. Тодэмзэс соос ватыса ӧз возе. Соин ик священникъёслэн йырзы кур луэ вал. Кылсярысь, XIX даурын Инмарез гажась куд-ог пиосмуртъёс поттыны кутскизы брошюраосты, кудъёсаз черкъёслэсь шонертэм дышетонъёссэс шараязы.
13 Генри Гру нимо Инмарез яратӥсь пиосмурт 1835-тӥ ар котырын брошюра поттӥз. Отын эскериськиз, мар луэ кулэм адямиосын. Тросэз черкъёс дышетӥзы, адямиос ноку кулӥсьтэм лулын вордӥсько шуыса. Нош Генри Гру аслаз брошюраяз, Библия вылэ пыкиськыса, возьматӥз, со озьы ӧвӧл но пырак улон Инмар кузьма шуыса. 1837-тӥ арын Джордж Сторрз нимо пастор та брошюраез поездысь шедьтӥз. Сое лыдӟыса, со кулэ луись зэмлыкез валаз но та сярысь мукетъёсызлы верамез потӥз. 1842-тӥ арын со вераз лекциосты, кудъёсыз нимаськизы «Юан: лек адямиос пырак улозы-а?». Та пасторлэн дышетэмез бадӟым пайда вайиз Чарлз Расселл нимо егит пиосмуртлы.
14. Кызьы Расселл агай но солэн эшъёсыз уже кутӥзы сое, мар лэсьтэмын вал ини азьвыл, «дун-шектэм сюресэз» дасян понна? (Озьы ик учке суредэз.)
14 Кызьы Расселл агай но мукет пиосмуртъёс, кудъёсыныз ӵош со Библиез эскериз, уже кутӥзы сое, мар лэсьтэмын вал ини азьвыл, «дун-шектэм сюресэз» дасян понна? Священной Гожтэмез эскерыкузы, соос уже кутӥзы словарьёсты, симфонияосты но Библилэсь пӧртэм берыктэмъёссэ, кудъёсыз азьвыл дасямын вал ини. Озьы ик соослы туж юрттӥзы эскеронъёс, кудъёссэ ортчытӥзы Генри Гру, Джордж Сторрз но мукетъёсыз. Библиысь темаосъя трос книгаосты но брошюраосты печатласа, Расселл агай но солэн эшъёсыз туж трос лэсьтӥзы, «дун-шектэм сюресэз» дасян понна.
15. Мар луиз 1919-тӥ арын?
15 Инмарлэн калыкез 1919-тӥ арын Быдӟым Вавилонлэсь мозмытскиз. Со арын «оскиськымон, визьмо ляльчи» кылдӥз. Со туж дырыз дыръя вал, малы ке шуоно «дун-шектэм сюрес» вылын чылкыт сюлэмо адямиосты пумитано вал (Матф. 24:45—47). Та ляльчилы но дасяськон ужъёслы луыса та сюрес вылэ султӥсьёс Инмарлэн эрикез сярысь тросгес тодыны быгатӥзы (Мад. 4:18). Озьы ик соос быгатӥзы асьсэлэсь улонзэс Иеговалэн куронъёсызъя тупатыны. Малпаз-а Иегова, ужась-тыршисьёсыз син куспын воштӥськозы шуыса? Ӧз, аслэсьтыз калыксэ со пичиен-пичиен сузяз. (Учке « Иегова аслэсьтыз калыксэ пичиен-пичиен сузя» рамкаез.) Ми туж шумпотомы, куке котьмар ласянь Инмарлы ярамон луомы! (Кол. 1:10).
«ДУН-ШЕКТЭМ СЮРЕС» УСЬТЭМЫН НА
16. Кыӵе ужъёс нуисько «дун-шектэм сюрес» вылын 1919-тӥ арысен? (Исаия 48:17; 60:17).
16 Котькуд сюресэз ялан тупатъяны кулэ. Ӵапак озьы ик ужъёс, кудъёсыз «дун-шектэм сюрес» вылын 1919-тӥ арын кутскизы, али но нуисько на. Малы? Тросгес адямиос Быдӟым Вавилонысь потыны мед быгатозы шуыса. 1921-тӥ арын, ужзэ быдэсъяны кутскемез бере ӝоген, «оскиськымон, визьмо ляльчи» печатлаз «Инмарлэн арфаез» книгаез. Со поттэмын вал, адямиосты Библиысь зэмлыкен тодматон понна. Печатламын вал 36 кылъёсын ог 6 миллион книгаос. Та книга тросэзлы юрттӥз зэмлыкен тодматскыны. Нош алигес, адямиосын Библиез дышетон понна, милям потӥз выль тӥрлыкмы, кудӥз нимаське «Пумтэм вапумъёс ӵоже шумпотыса улэ!». Берпум нуналъёс ӵоже Иегова аслаз организациез пыр милемлы ялан духовной сиён сётэ, ми «дун-шектэм сюрес» вылысь медам коже шуыса. (Лыдӟе Исаиялэсь 48:17; 60:17.)
17, 18. Кытчы нуэ «дун-шектэм сюрес»?
17 Куке адями Библиез дышетыны соглаш кариське, вераны луоз, солэн луонлыкез кылдэ «дун-шектэм сюрес» вылэ султыны. Куд-огъёсыз та сюрес вылтӥ кӧня ке мыно, нош собере со вылысь кожо. Мукетъёсызлэн та сюрес вылтӥ мыныны юн мылкыдзы вань, кулэ интые вуытозязы. Кыӵе инты сярысь татын вераське?
18 Соосты, кинъёс инмын улыны оско, «дун-шектэм сюрес» нуэ инмысь «Инмар рае» (Усьт. 2:7). Соосты, кинъёс музъем вылын улыны оско, Христослэн сюрс ар ӵоже кивалтонэзлэн пумаз та сюрес вуттоз тырбыдэстэм улонэ. Тӥ али та сюрес вылтӥ мынӥськоды ке, берлань эн учке. Со вылысь эн коже, кулэ интые вуытозяды — выль дуннее вуытозяды. Ми тӥледлы вань сюлмысьтымы шудо сюрес сӥзиськомы!
24-ТӤ КЫРӞАН Тубе Иеговалэн гурезяз
a Вавилонысь Израиле нуись сюресэз Иегова «дун-шектэм сюресэн» нимаз. Луэ-а вераны, асьме нуналъёсы но Иегова аслаз ужась-тыршисьёсызлы сюрес понӥз шуыса? Луэ! 1919-тӥ арысен кӧня ке миллион адямиос Быдӟым Вавилонысь потӥзы но «дун-шектэм сюрес» вылэ султӥзы. Кулэ интые вуытозямы, котькудмылы та сюрес вылтӥ мыноно.
c СУРЕДЫН: Расселл агай но мукет пиосмуртъёс, кудъёсыныз ӵош со Библиез эскериз, уже кутӥзы Библиез эскерон понна пособиосты, кудъёсыз соослэсь азьвыл дасямын вал.