1. Кыӵе шуг-секытъёсын пумиськыло ми пӧлысь тросэз?

 ПУКТӤДЫ-А тӥ куке но ас азяды духовной ужпум b, но сое быдэстыны нокызьы ӧд быгатэ? Таӵе шуг-секытэн тросэз пумиськыло. Кылсярысь, Фи́лип ас азяз ужпум пуктӥз ӵемгес вӧсяськыны. Озьы ик солэн потэ вал вӧсяськонъёсаз тросгес аслаз шӧдонъёсыз сярысь верамез. Но солы котьку ик капчи ӧй вал вӧсяськон понна дыр шедьтыны. Э́рика ас азяз ужпум пуктӥз тодытонлы сӥзем пумиськонъёсы дырыз дыръя вуылыны. Озьы ке но со котькуд пумиськонэ кадь бере кыле вал. То́маш кӧня ке пол тыршиз быдэс Библиез лыдӟыны. Со вера: «Мыным сое лыдӟыны уг кельшы вал. Мон куинь пол сое лыдӟыны кутскылӥ, но Левит книгаозь гинэ вуисько вал».

2. Малы ӝоже усёно ӧвӧл, духовной ужпуммес быдэстыны ӧм быгатэ на ке?

² Тӥляд вань ке ужпумды, кудзэ тӥ нокызьы но быдэстыны уд быгатӥське, со уг возьматы, тӥ пӧрмостэм адями шуыса. Огшоры ужпумъёсты быдэстон понна гинэ но, дыр но кужым кулэ. Ужпумъёстэс быдэстыны мылкыдды возьматэ: тӥ Иеговаен эшъяськондэс дунъяськоды но тӥляд сётэмды потэ солы ваньзэ умойзэ, марды тӥляд вань. Иегова тыршемдэс дунъя. Со уг возьма тӥлесьтыд сое, мае тӥ лэсьтыны уд быгатӥське (Пс. 102:14; Мих. 6:8). Соин ик ас азяды пуктоно сыӵе ужпум, кудзэ тӥ быдэстыны быгатоды. Тӥляд сыӵе ужпумды вань ке, мар юрттоз тӥледлы сое быдэстыны? Ойдолэ эскеромы куд-ог визь-кенешъёсты.

3. Малы туж кулэ, ужпуммес быдэстыны мылкыдмы мед луоз шуыса?

³ Духовной ужпумез быдэстон понна, туж кулэ юн мылкыд.  Адямилэн мылкыдыз вань ке, со вань кужмысьтыз тыршоз ужпумзэ быдэстыны. Сыӵе мылкыдэз ӵошатыны луэ тӧлэн, кудӥз юрттэ парусэн пыжлы азьлань мыныны. Тӧл ялан пельтэ ке, пыжен уясь кулэ интые вуыны быгатоз, дыр. Нош тӧл кужмо пельтэ ке, соку со отчы ӝоггес вуоз. Тае ик вераны луоз мылкыд сярысь но. Пуктэм ужпуммес быдэстыны капчигес луоз, со понна юн мылкыдмы луиз ке. Сальвадорысь Давид агай вера: «Мылкыд вань ке, соку эшшо но золгес тыршиськод. Номыр но тыныд уз люкеты». Мар карыны луэ, ужпумез быдэстыны мылкыд мед луоз шуыса?

4. Мар сярысь ми вӧсяськыны быгатӥськомы? (Филиппыослы 2:13). (Озьы ик учке суредэз.)

⁴ Вӧсяське, ужпумдэс быдэстыны мылкыдды юнгес мед луоз шуыса. Иегова святой духеныз ужпумдэс быдэстыны мылкыд сётыны быгатэ. (Лыдӟе Филиппыослы 2:13.) Куддыръя ми ас азямы ужпум пуктӥськомы, малы ке шуоно тодӥськомы, озьы кулэ шуыса. Та шонер. Нош мар кароно, ужпуммес быдэстыны мылкыдмы туж ик юн ӧвӧл ке? Та выллем югдурен пумиськиз Угандаысь Нори́на сузэр. Солэн ужпумез вал кинэн ке Библиез дышетыны, но со понна юн мылкыдыз ӧй вал. Солэн малпамезъя, со туж ик умой дышетӥсь ӧй вал. Мар солы юрттӥз? Норина вера: «Мон котькуд нунал Иеговалы вӧсяськи, со мыным юн мылкыд мед сётоз шуыса. Вӧсяськем сяна, мон тырши эшшо но умой дышетӥсь луыны. Кӧня ке толэзь ортчыса, мынам зэмзэ ик мылкыды кылдӥз кинэн ке Библиез дышетыны. Ар но ӧз ортчы, мон кык адямиен Библиез дышетӥ ини».

5. Мар сярысь ми малпаськыны быгатӥськомы, духовной ужпуммес быдэстыны мылкыдмы юнгес мед луоз шуыса?

⁵ Малпаське со сярысь, мар Иегова тӥ понна лэсьтэ (Пс. 142:5). Апостол Павел малпаськиз Иеговалэн ӟечлыкез сярысь (1 Кор. 15:9, 10; 1 Тим. 1:12—14). Та солэсь мылкыдзэ ӝутӥз Иеговалы вань сюлмысьтыз ужаны. Макем тросгес тӥ малпаськоды, мае Иегова тӥ понна лэсьтэ, сокем золгес мылкыдды луоз ужпумдэс быдэстыны (Пс. 115:3). Гондурас шаерысь одӥг сузэрлэн пионер луыса ужамез-тыршемез потэ вал. Тани мае со вера: «Мон трос малпаськи, макем зол яратэ монэ Иегова. Со монэ аслаз семьяяз ӧтиз. Со мон сярысь сюлмаське но монэ уте. Мон Иеговаез эшшо но золгес яратӥ, озьы ик эшшо но юнгес мылкыды луиз пионер луыны».

6. Мар эшшо карыны луэ на, ужпуммес быдэстыны мылкыдмы мед луоз шуыса?

⁶ Саклыктэс висъялэ солы, кыӵе пайда ваёз тӥледлы ужпумдэс быдэстон. Учке, мар юрттӥз Эрикалы, кудӥз сярысь вераськиз ини. Со вера: «Мон валай, макем троссэ мон ыштӥсько, тодытонлы сӥзем пумиськонъёсы бергес лыктыса. Вазьгес лыктысал ке, мон быгатысал агайёсын но сузэръёсын вераськыны. Со сяна, мон кылысал пайдаё визь-кенешъёсты, кудъёсыз юрттысалзы мыным умойгес тодытыны но ужан-тыршонлэсь тросгес  шумпотон басьтыны». Эрика саклыксэ висъяз, кыӵе пайда вае ужпумзэ быдэстон. Соин ик со быгатӥз ужпумзэ быдэстыны. Нош тӥледлы кыӵе пайда вайыны быгатоз ужпумдэс быдэстон? Тӥляд ужпумды герӟаськемын ке Библиез лыдӟонэн яке вӧсяськонэн, малпаське, макем юнмалозы Иеговаен кусыпъёсты (Пс. 144:18, 19). Тӥляд потэ ке кыӵе ке христиан сямдэс будэтэмды, малпаське, макем умойгес луозы мукетъёсыныз кусыпъёсты (Кол. 3:14). Умой луысал пыр-поч гожтыны, кыӵе пайда ваёз тӥледлы ужпумдэс быдэстон. Гожтэмдэс ялан учкылэ. Томаш, кудӥз сярысь гожтэмын вал ини, вера: «Куке мон адӟисько, макем бадӟым пайда вае ужпумме быдэстон, мон эшшо но золгес тыршисько сое быдэстыны».

7. Мар юрттӥз Хулио агайлы но солэн кышноезлы ужпумзэс быдэстыны?

⁷ Дырдэс ортчытъялэ соосын, кинъёс тӥледлы ужпумдэс быдэстыны юрттозы (Мад. 13:21). Тани мар юрттӥз Ху́лио агайлы но солэн кышноезлы ужпумзэс быдэстыны ужан-тыршонын тросгес лэсьтыны. Со тодаз вае: «Ми эшъяськимы соосын, кинъёс милесьтым мылкыдмес ӝутӥзы ужпуммес быдэстыны но кинъёсын ми та сярысь вараськыны быгатӥмы. Соос пӧлысь тросэз та выллем ужпумъёссэс быдэстӥзы ини. Соин ик соос милемлы пайдаё визь-кенешъёс сётыны быгатӥзы. Соос милесьтым юалляськизы, мар милям пӧрме ини но мылкыдмес ӝутӥзы азьланяз но тыршыны».

8. Мар луыны быгатэ, ми ужпуммес быдэстыны тыршимы ке соку гинэ, куке юн мылкыдмы вань? (Озьы ик учке суредэз.)

⁸ Зэмзэ вераса, котькудмылэн луо сыӵе нуналъёсыз, куке ужпуммес быдэстыны мылкыдмы ӧвӧл. Возьматэ-а та, ми сое быдэстыны ум быгатэ шуыса? Уг. Учкомы примермес. Тӧл кужмо пельтэ ке, парусэн пыж туж ӝог азьлань мынэ. Но куддыръя тӧл ляб пельтэ, нош кыӵе ке но нуналъёсы зарезь вылын тӧл воксё ӧвӧл. Возьматэ-а со, пыжен уясь кулэ луись интые вуыны уз быгаты шуыса? Котьку ик озьы вераны уг луы. Кылсярысь, куд-ог пыжъёсын моторез но полысъёсыз вань. Соослы луыса пыжен уясь азьлань мыныны быгатэ. Милесьтым мылкыдмес ӵошатыны луэ тӧлэн. Куддыръя милям юн мылкыдмы вань, куддыръя — лябгес, нош кыӵе ке но нуналъёсы ужпуммы сярысь малпаммы но уг поты. Мылкыдмы вань дыръя гинэ ужпуммес быдэстыны тыршимы ке, ми ноку но сое быдэстыны ум быгатэ. Пыжен уясь, азьлань мынон понна, пӧртэм амалъёсты кутэ. Солэсь адӟем карыса, мылкыдмы ӧвӧл ке, ми но быгатӥськомы мукет амалъёсты уже кутыны. Со понна асьмеды киямы кутыны кулэ. Ойдолэ вераськомы, мар ми карыны быгатӥськомы. Но нырысь одӥг юанлы валэктон сётомы.

9. Кулэ-а астэ кужмысь косыны духовной ужпумъёстэ быдэстыны? Валэктэ.

⁹ Иеговалэн потэ, ми солы шумпотыса но вань сюлмысьтымы мед ужаломы-тыршомы  шуыса (Пс. 99:2; 2 Кор. 9:7). Возьматэ-а со, милям духовной ужпумъёсмес быдэстыны мылкыдмы ӧвӧл ке, тыршоно ӧвӧл шуыса? Эскеромы апостол Павеллэсь учырзэ. Со вераз: «Ас мугорме курадӟытыса зӥбломытӥсько, тэрытскись-кылзӥськись карисько» (1 Кор. 9:25—27). Павел ассэ кужмысь косӥз лэсьтыны сое, мар шонер луэ, озьы ик соку но, куке солэн мукет сямен лэсьтэмез потэ вал. Кельшиз-а Иеговалы Павеллэн ужан-тыршонэз? Туж кельшиз! Тыршемез понна Инмар сое бакель кариз (2 Тим. 4:7, 8).

10. Малы тыршоно ужпуммес быдэстыны, мылкыдмы ӧвӧл ке но?

¹⁰ Кызьы возьматэ Павеллэн учырез, Иегова шумпотэ, куке ми, мылкыдмы шоры учкытэк, азьланяз но тыршиськомы ужпуммес быдэстыны. Со шумпотэ, малы ке шуоно тодэ: мае ке лэсьтыны милемлы котьку ик уг кельшы ке но, ми сое Инмарез яратэменымы лэсьтӥськомы. Апостол Павелэз сямен ик, Иегова милесьтым но тыршеммес бакель кароз (Пс. 125:5). Куке ми солэсь бакель каронъёссэ ас выламы шӧдомы, милям мылкыдмы ӝутскоз азьланяз но тыршыны. Польшаысь Люци́на сузэр вера: «Куддыръя мынам тодытыны мынэме уг поты, тужгес но соку, куке мон жадемын. Нош куке мон мынӥсько, мон сомында шумпотон басьтӥсько!» Нош табере ойдолэ эскеромы, мар ми карыны быгатӥськомы, куке милям мылкыдмы ӧвӧл.

11. Кызьы Иегова милемлы юрттыны быгатэ асьмеды киямы кутыны?

¹¹ Вӧсяське, асьтэды кияды кутыны мед быгатоды шуыса. Астэ кияд кутон — со аслэсьтыд малпанъёстэ но ужъёстэ чакланы быгатон. Та кыл ӵем дыръя возьматэ, адями лек ужъёсты лэсьтыны уг тыршы шуыса. Озьы ик астэ кияд кутыны быгатоно, куке ӟеч ужъёсты лэсьтыны кулэ, тужгес но соку, куке со капчи ӧвӧл яке сое лэсьтыны мылкыд ӧвӧл. Тодады возе: астэ кияд кутыны быгатон, яке возиськыны быгатон, духлэн емышез пӧлы пыре. Соин ик куре Иеговалэсь святой духсэ, кудӥз юрттоз тӥледлы та кулэ луись сямез будэтыны (Лука 11:13; Гал. 5:22, 23). Давид агай, кудӥз сярысь вераськиз ини, валэктӥз, кызьы солы вӧсяськон юрттӥз. Солэн потэ вал ялан ас понназ Библиез эскеремез. Мар со кариз? Со вера: «Мон кури Иеговаез, со мыным асме киям кутыны мед юрттоз шуыса. Со мыным юрттӥз. Табере мон туж умой эскеронъёс ортчытъяны быгатӥсько. Таӵе эскеронъёсты мон ялан ортчытъясько».

12. Кызьы возет, кудӥз гожтэмын Екклесиастын 11:4, духовной ужпумъёсмес быдэстыны юрттэ?

¹² Эн возьмалэ, куке ваньмыз туж умой луоз. Та дуннеын шуг-секытъёстэк уг луы. Ми возьмамы ке, куке милям ваньмыз умой луоз, ужпуммес быдэстыны ноку ум быгатэ. (Лыдӟе Екклесиастэз 11:4.) Дэ́ниел вера: «Шуг-секытъёс котьку но луо. Но ми, номыр шоры учкытэк, тыршимы ке, ужпуммес быдэстон понна тупась югдур кылдытомы». Угандаысь Пол агай эшшо одӥг мугез пусъе, малы ужъёсмес берлолы кельтоно ӧвӧл: «Шуг-секытъёс шоры учкытэк, уж борды басьтӥськыса, ми Иеговалы сётӥськомы сое, мае со бакель карыны быгатоз» (Мал. 3:10).

13. Малы умой луоз пичи ужпумъёсысен кутскыны?

¹³ Пичи ужпумъёсысен кутске. Куддыръя милям мылкыдмы уг луы, малы ке шуоно ужпуммы быдэстонтэм кадь потэ. Тӥляд учырады но озьы ке, быгатысалды-а тӥ ужпумдэс кӧня ке пичи ужпумъёслы люкыны? Тӥляд потэ ке кыӵе ке сямдэс будэтэмды, умой луысал нырысь кыӵе ке пичи ужын та сямез возьматыны. Тӥ ужпум пуктӥды ке быдэс Библиез лыдӟыны, быгатысалды-а тӥ сое пичиен-пичиен лыдӟыны? Томаш, кудӥз сярысь статьялэн кутсконаз вераськиз ини, нокызьы но ӧз быгаты Библиез ар куспын лыдӟыны. Со вера: «Мон валай, Библиез укыр ӝог лыдӟыны малпай шуыса. Соин ик мон  сое выльысь лыдӟыны кутски, но таяз учыре мон котькуд нунал кӧня ке абзацъёсын лыдӟи но лыдӟеме вылын малпаськи. Собере лыдӟиськон мыным шумпотон вайыны кутскиз». Пумен-пумен Томаш лыдӟиськонлы тросгес но тросгес дырзэ висъяны кутскиз. Собере со Библиез кутсконысеныз пумозяз лыдӟыны быгатӥз c.

14. Мар люкетыны быгатэ ужпуммес быдэстыны?

¹⁴ Жаляса верано луэ, кыӵе гинэ мылкыдмы медам луы яке кӧня гинэ медам тырше, куддыръя милемлы мар ке но люкетыны быгатэ. Кылсярысь, малпамтэ шорысь кылдэм югдуръёсын сэрен ужпуммес быдэстыны милям дырмы уз кыльы ни, вылды (Екк. 9:11). Ми быгатомы пумиськыны шуг-секытэн, кудӥныз сэрен мылкыдмы куашкалоз яке кужыммы ӧжыт луоз (Мад. 24:10). Озьы ик, ми тырбыдэстэмесь бере, ми быгатомы лэсьтыны янгышъёсты, кудъёсыз люкетозы милемлы ужпуммес быдэстыны (Рим. 7:23). Оло нош, ми жадёмы но (Матф. 26:43). Мар юрттоз милемлы азьлань мыныны?

15. Малы киосмес лэзёно ӧвӧл, куке ужпумъёсмес быдэстыны мар ке но люкетэ? Валэктэ (Псалтирь 144:14).

¹⁵ Тодады возе, тӥляд мае ке лэсьтэмды уг пӧрмы ке, со уг возьматы, ужпумдэс быдэстыны уд быгатэ шуыса. Библиын верамын, ужпумъёсмес быдэстыкумы, ми шуг-секытъёсын пумиськомы шуыса. Озьы ик отын верамын, милям соосты вормеммы луоз шуыса, тужгес но Иеговалэн юрттэменыз. (Лыдӟе Псалтирез 144:14.) Фи́лип, кудӥз сярысь вераськиз ини, аслаз азинсконъёсыз сярысь тазьы вера: «Кӧня пол гинэ мон медам усьы, мон тыршисько султыны но азьлань мыныны». Давид агай, кудӥзлэн кылъёсыз та статьяын гожтэмын вал ини, вера: «Янгышъёсы шоры мон тыршисько учкыны Иеговалы юн яратонме возьматыны луонлык шоры кадь». Шуг-секытъёсты шоры учкытэк, азьлань мынӥськоды  ке, тӥ Иеговалы возьматӥськоды, сое шумпоттэмды потэ шуыса. Макем Иегова шумпотэ, луоз, куке, номыр шоры учкытэк, тӥ азьланяз но тыршиськоды ужпумъёстэс быдэстыны!

16. Малы дышетскеммы луэ соку, куке ужпуммес быдэстыны ӧм быгатэ?

¹⁶ Куке ужпумдэс быдэстыны уг пӧрмы, та учырысь малы ке дышетскыны тырше. Малпаське, малы тӥляд ужпумдэс быдэстыны уг пӧрмы, но юалэ асьтэлэсь: «Быгато-а мон мае ке воштыны, азьланяз таӵе шуг-секытлэсь палэнскон понна?» (Мад. 27:12). Но куддыръя, ужпуммес быдэстыны секыт ке, та возьматэ, ми ас азямы быдэстыны луонтэм ужпум пуктӥмы шуыса. Асьтэлэн ужпумды сярысь тӥ тазьы ик малпаськоды ке, со вылын эшшо одӥг пол малпаське. Та юрттоз тӥледлы валаны, быгатоды-а тӥ та ужпумез быдэстыны d. Иегова тӥледыз яратэмысь уз дугды, тӥ ас азяды пуктэм ужпумдэс быдэстыны ӧд быгатэ ке (2 Кор. 8:12).

17. Малы милемлы тодамы возёно, кыӵе ужпумъёсмес быдэстыны быгатӥмы ини?

¹⁷ Тодады возе, кыӵе ужпумъёстэс тӥ быдэстыны быгатӥды ини. Библиын верамын: «Инмар шонер лэсьтӥсьтэм ӧвӧл уго, Со уг вунэты тӥлесьтыд уждэс» (Евр. 6:10). Озьыен, тӥледлы вунэтоно ӧвӧл, кыӵе ужпумъёстэс христиан сюрес вылын тӥ быдэстӥды ини. Кылсярысь, тӥ Иеговаен кусыпъёстэс юнматӥды, со сярысь мукетъёсызлы вераны кутскиды яке пылатӥськиды. Кызьы тӥ азьло ужпумъёстэс быдэстыны тыршиды, али но озьы ик лэсьтэ (Флп. 3:16).

18. Мар сярысь тодамы возёно, ужпумъёсмес быдэстыкумы? (Озьы ик учке суредэз.)

¹⁸ Иеговалэн юрттэменыз тӥ быгатоды духовной ужпумъёстэс быдэстыны озьы ик, кызьы пыжен уясь кулэ интые вуыны быгатэ. Но эн вунэтэ, макем тунсыко мынон сюрес. Соин ик, духовной ужпумъёстэс быдэстыкуды, тырше адӟыны, кызьы Иегова тӥледлы юрттэ но тӥледыз бакель каре. Та одно ик тӥледлы шумпотон ваёз (2 Кор. 4:7). Киостэс ӧд лэзе ке, Иегова тӥледыз эшшо но тросгес бакель кароз (Гал. 6:9).