ЭСКЕРОН ПОННА 19-ТӤ СТАТЬЯ
22-ТӤ КЫРӞАН Мед лыктоз Эксэйлыкед!
Кызьы Иегова адямиосты судъялоз бадӟым куректон дыръя?
«Нокин но медаз быры... шуыса, Со асьмеды кема чидаса возьма» (2 ПЁТР 3:9).
МИ ТОДОМЫ
Малы оскыны луэ, ужпумъёс, кудъёссэ кутоз Иегова бадӟым куректон дыръя, шонерлыкоесь луозы шуыса.
1. Малы вераны луоз, ми паймымон дыре улӥськомы шуыса?
МИ ТУЖ паймымон дыре улӥськомы! Котькуд нунал син азямы Библиысь азьпалзэ ивортонъёс быдэсмо. Кылсярысь, ми адӟиськомы, кызьы уйпал но лымшор эксэйёс ожмасько, дуннеын валтӥсь инты басьтон понна (Дан. 11:40). Озьы ик ми адӟиськомы, Инмарлэн Эксэйлыкез сярысь ӟеч ивор быдэс дунне вылын тодытӥське но туж трос адямиос Иеговалы ужаны-тыршыны кутско шуыса (Ис. 60:22; Матф. 24:14). Со сяна, ми дырыз дыръя трос духовной сиён басьтӥськомы (Матф. 24:45—47).
2. Малы ми оскыны быгатӥськомы, вуоноез сярысь ваньзэ ум тодӥське ке но?
2 Пумен-пумен Иегова валэктэ, мар милемыз азьпалан возьма (Мад. 4:18; Дан. 2:28). Ми валаськомы, ваньзэ ум тодӥське на шуыса. Озьы ке но милям оскеммы луэ, бадӟым куректонлэн кутскемезлэсь азьло ми ваньзэ кулэзэ тодомы шуыса. Со милемлы юрттоз Инмарлы оскымон кыльыны но огкылысь улыны. Та статьяысь нырысь ми тодомы, малы ми выльысь эскеримы сое, мар вераськомы вал бадӟым куректон сярысь. Озьы ик ми вераськомы со сярысь, мае ми тодӥськомы ини вуоноез сярысь. Со сяна, ми тодомы со сярысь, мар кароз инмысь Атаймы.
МАЕ МИ УМ ТОДӤСЬКЕ
3. Мар, ми малпамъя, луыны кулэ вал Адӟись-Ивортӥсь луисьтэм адямиосын, бадӟым куректон кутскыку, но малы ми озьы малпаськомы вал?
3 Азьло ми вераськомы вал, бадӟым куректон кутскыку, Адӟись-Ивортӥсь луисьтэм адямиос пӧлысь нокин но Иеговалэн калыкез пӧлы пырыны но Армагеддон пыр потыны уз быгаты шуыса. Малы? Малы ке шуоно, Ной улон дыръя луэм ву тудӟонэз ми ӵошатӥськомы вал асьме нуналъёсын. Ми малпаськомы вал тазьы: ву тудӟон азьын Иегова ӧсэз ворсаз бере, бадӟым куректон кутскыку но, ӧс ворсаськоз но нокин утиськыны уз быгаты ни (Матф. 24:37—39).
4. Учкиськомы-а ми али ву тудӟон шоры азьпалзэ ивортон шоры кадь? Валэктэ.
4 Учкиськомы-а ми ву тудӟон сярысь веран шоры азьпалзэ ивортон шоры кадь? Ум. Малы? Малы ке шуоно Библия со сярысь уг вера a. Зэм но, Иисус ӵошатӥз «Ной улон нуналъёсты» Эксэй луыса кивалтон нуналъёсыныз. Но Иисус ӧз вера, ву тудӟон азьын луэм учыръёс но Иеговалэн ковчег ӧсэз ворсамез азьпалзэ ивортонъёс вал шуыса. Озьы ке но Ной сярысь но ву тудӟон сярысь веран милемыз тросэзлы дышетыны быгатэ.
5. а) Кызьы Ной ву тудӟон азьын осконзэ возьматӥз? (1 Пётр 3:20; Еврейёслы 11:7). б) Маин милям тодытон ужмы кельше Нойлэн тодытэмезлы?
5 Куке Ной кылӥз Иеговалэсь ву тудӟон сярысь алэмзэ, со Иеговалы оскиз но ковчег пуктӥз. (Лыдӟе 1 Пётрлэсь 3:20; Еврейёслы 11:7.) Ӵапак озьы ик туннэ но, адямиос, кудъёсыз Инмарлэн Эксэйлыкез сярысь ӟеч иворез кыло, осконзэс уж вылын возьматыны кулэ (Ап. уж. 3:17—20). Пётр Ноез нимаз «шонерлыкез тодытӥсь» шуыса (2 Пётр 2:5). Но кызьы вераськиз ини кылем статьяын, ми ум тодӥське, тыршиз-а Ной котькуд адямилы матэктӥсь ву тудӟон сярысь вераны. Туннэ Эксэйлык сярысь ивор быдэс дунне вылын тодытӥське. Озьы ке но, кӧня гинэ ми медам тырше, та дуннелы пум вуэмлэсь азьло котькуд адямилы ӟеч иворез вераны ми ум быгатэ. Малы?
6, 7. Малы вераны луэ, та дуннелы пум вуэмлэсь азьло ми котькуд адямилы ӟеч иворез вераны ум быгатэ шуыса?
6 Малпаськомы, мар вераз Иисус тодытон ужмы сярысь. Со шуиз: «Вань калыкъёс мед тодозы шуыса, Эксэйлыклэн та Евангелиез быдэс дунне вылын тодытэмын луоз» (Матф. 24:14). Азьвыл дырен ӵошатыса, туннэ Инмарлэн Эксэйлыкез сярысь ӟеч ивор туж паськыт вӧлме. Сое 1000-лэсь но тросгес кылъёсын вӧлмыто, нош jw.org сайт пыр дунне вылысь тросэз адямиос соин тодматскыны быгато.
7 Со дыре ик Иисус аслаз дышетскисьёсызлы шуиз: «Израиль музъемлэсь городъёссэ ортчыса уд вуэ». Мукет сямен вераса, солэн лыктэмезлэсь азьло соос котькуд адямиен вераськыны уз вуэ (Матф. 10:23; 25:31—33). Иисуслэн кылъёсыз асьме нуналъёсы но быдэсмо. Трос миллион адямиос уло отын, кытын тодытон ужмес нуыны люкето. Со сяна, котькуд минутэ трос сю нылпиос вордӥсько. Ми туж тыршиськомы «вань выжыослы, пӧртэм кылын вераськисьёслы, калыкъёслы, улыослы-бечеослы» ӟеч иворез вераны (Усьт. 14:6). Но ми валаськомы, та дуннелы пум вуэмлэсь азьло котькуд адямилы ӟеч иворез вераны ум быгатэ шуыса.
8. Кыӵе юанъёс кылдыны быгато со пумысен, кызьы Инмар адямиосты судъялоз? (Озьы ик учке суредъёсты.)
8 Соин ик кылдо таӵе юанъёс: «Мар луоз соосын, кинъёс бадӟым куректон кутскемлэсь азьло ӟеч иворез ӧз кылэ? Мар соосын карозы Иегова но солэн Пиез, кудӥзлы со судъяны право сётӥз?» (Иоанн 5:19, 22, 27; Ап. уж. 17:31). Та статьялы валтӥсь кылбурын вераське, Иеговалэн потэ, «нокин но медаз быры, ваньмыз ӧпкельыса сьӧлыкъёсызлэсь мед куштӥськоз шуыса» (2 Пётр 3:9; 1 Тим. 2:4). Но али ми ум тодӥське, кызьы Инмар судъялоз соосты, кинъёслэн ӟеч иворез кылыны луонлыксы ӧй вал. Тае Иегова милемлы ӧз усьты на. Зэмзэ вераса, со милемлы ваньзэ валэктыны кулэ ӧвӧл.
Мар кароз Иегова соосын, кинъёс бадӟым куректон кутскемлэсь азьло ӟеч иворез ӧз кылэ? (Учке 8-тӥ абзацез.) c
9. Мае валэктӥз милемлы Иегова Библия пыр?
9 Озьы ке но со сярысь, мае Иегова азьланяз лэсьтоз, ми кӧня ке тодӥськомы. Кылсярысь, Библия пыр Инмар валэктӥз, со улӟытоз шуыса «шонер улымтэосты», кудъёсызлэн ӟеч иворез кылыны но воштӥськыны луонлыксы ӧй вал (Ап. уж 24:15; Лука 23:42, 43, ВД). Таин сэрен мукет юанъёс кылдо.
10. Кыӵе эшшо юанъёс кылдыны быгато?
10 Улӟытоз-а Иегова соосты, кинъёс бадӟым куректон дыръя кулозы? Яке соос пыраклы кулозы но ноку улӟытэмын уз луэ? Библиын вераське, Иеговалэн лек тушмонъёсыз, кудъёссэ со но солэн кылчинъёсыз Армагеддонын быдтозы, улӟытэмын уз луэ шуыса (2 Фес. 1:6—10). Нош улӟозы-а соос, кинъёс бадӟым куректон дыръя висьыса, пересьмыса, шудтэм учыре сюрыса яке кинэн ке сэрен кулозы? (Екк. 9:11; Зах. 14:13). Соос пӧлысь кин ке но луоз-а «шонер улымтэос» пӧлын, кудъёсыз выль дуннеын улӟозы? Ми сое ум тодӥське.
МАЕ МИ ТОДӤСЬКОМЫ
11. Мае Иисус лыдэ басьтоз, куке адямиосты судъялоз но ыжъёсты кечъёслэсь висъялоз?
11 Но мае ке но ми тодӥськомы. Кылсярысь, ми тодӥськомы, куке Иисус адямиосты судъялоз но ыжъёсты кечъёслэсь висъялоз, со лыдэ басьтоз, кызьы со адямиос асьсэды возизы солэн вынъёсыныз, яке зырӟем христианъёсын (Матф. 25:40). Соос, кинъёс Иисуслы но солэн вынъёсызлы юрттӥськизы, ыжъёс пӧлы пыртэмын луозы. Со сяна, ми тодӥськомы, бадӟым куректон кутскем бере Христослэн куд-ог вынъёсыз кӧня ке дыр ӵоже музъем вылын улозы на но Армагеддон кутскон азьын гинэ инме ӝутскозы шуыса. Куке Христослэн вынъёсыз музъем вылын луозы на, кылзӥськись сюлэмо адямиослэн луонлыксы луоз, вылды, соослы юрттыны ужзэс быдэстыны (Матф. 25:31, 32; Усьт. 12:17).
12, 13. Кызьы асьсэды возёзы, вылды, куд-ог адямиос, куке адӟозы, кызьы «Быдӟым Вавилон» быдтэмын луоз? (Озьы ик учке суредъёсты.)
12 Ми тодӥськомы, бадӟым куректон «Быдӟым Вавилонэз» быдтонысен кутскоз шуыса. Соку куд-ог адямиос тодазы ваёзы, вылды, Иеговалэн Адӟись-Ивортӥсьёсыз кемалась верало вал ини, со озьы луоз шуыса. Со дыре куд-огъёсызлэн мылкыдзы ӝутскоз-а Иегова пала султыны? (Усьт. 17:5; Иез. 33:33).
13 Тодамы ваёмы, мар луиз Моисей улон нуналъёсы. Израиль калык Египетысь потыку, «пӧртэм выжыосысь адямиос но трос кузя соосын ӵош потӥзы» (Пот. 12:38). Соос пӧлысь кин ке но Иеговалы оскиз, вылды, куке адӟиз, кызьы быдэсмо Египет вылэ ыстэм дас шугадӟонъёс сярысь Моисейлэн кылъёсыз. «Быдӟым Вавилонэз» быдтэм бере но со выллем учыр кылдӥз ке но Армагеддон кутскон азьын адямиос ми пала султӥзы ке, ми шумпотомы-а? Туж шумпотомы! Милям адӟем кареммы потэ инмысь Атаймылэсь, кудӥз «адямиез яратӥсь, гажась-жалясь, кема чидась, туж гажась-жалясь, зэмлыко Инмар» луэ (Пот. 34:6) b.
«Быдӟым Вавилонлэсь» быремзэ адӟыса, куд-огъёсыз тодазы ваёзы, вылды, Иеговалэн Адӟись-Ивортӥсьёсыз со сярысь кемалась веразы вал ини шуыса. (Учке 12-тӥ но 13-тӥ абзацъёсты.) d
14, 15. Учкоз-а Иегова, ку адями кулӥз яке кытын со улӥз, куке быръёз, адямиез улӟытоно-а, ӧвӧл-а? Валэктэ. (Псалтирь 32:4, 5).
14 Куддыръя куд-огъёсыз верало: «Умойгес луысал, ӵыжы-выжые бадӟым куректонлэн кутскемезлэсь азьло кулысал ке. Соку Инмар сое одно ик улӟытысал». Валамон, адямиос озьы верало, малы ке шуоно ӵыжы-выжыоссы сярысь сюлмасько. Но куке Иегова быръёз, адямиез улӟытоно-а, ӧвӧл-а, со уз учкы, ку со кулӥз. Иегова — дун-шектэм Судья, со котьку но шонерлыко ужпум кутэ. (Лыдӟе Псалтирез 32:4, 5.) Милям оскеммы луэ, «быдэс музъемлэн Судьяез» шонер лэсьтоз шуыса (Ул.-выл. 18:25).
15 Со сяна, куке Инмар быръёз, адямиез улӟытоно-а, ӧвӧл-а, со уз учкы, кытын со улӥз. Туннэ трос миллион адямиос уло сыӵе шаеръёсын, кытын Эксэйлык сярысь ивор уг вӧлмытӥськы. Валамон, адямилэсь кытын улэмзэ лыдэ басьтыса гинэ, Иегова сое «кечъёс» пӧлы уз пырты! (Матф. 25:46). Быдэс музъемлэн шонерлыко Судьяез адямиос понна милесьтым золгес сюлмаське. Ми пыр-поч ум тодӥське, мар кароз Иегова бадӟым куректон дыръя. Но куке Инмар вань калыкъёслы дун-шектэм луонзэ возьматоз, соос пӧлысь куд-огъёсыз солы оскозы но со пала султозы, вылды (Иез. 38:16).
Бадӟым куректон кутскоз «Быдӟым Вавилонэз» быдтонысен. Соку кинлэн ке но Иегова пала султыны мылкыдыз ӝутскоз-а?
16. Мае ми тодӥськомы Иегова сярысь? (Озьы ик учке суредэз.)
16 Библиез эскерыса, ми тодӥмы, Иеговалы адямилэн улонэз туж дуно потэ шуыса. Со ми понна аслэсьтыз Пизэ сётӥз, ми пырак улыны мед быгатомы шуыса (Иоанн 3:16). Ми ваньмы ас выламы Инмарлэсь яратонзэ шӧдӥськомы (Ис. 49:15). Инмар котькудмес ниммыя тодэ. Со милемыз туж умой тодэ. Ми кулӥмы ке но, со милемыз улӟытыны быгатоз сыӵе ик сямъёсынымы но тодэ ваёнъёсынымы (Матф. 10:29—31). Ми юн оскыны быгатӥськомы, Иегова котькуд адями пумысен шонер ужпум кутоз шуыса, малы ке шуоно инмысь Атаймы визьлыко, шонерлыко но гажась-жалясь (Иак. 2:13).
Ми юн оскыны быгатӥськомы, Иегова котькуд адями пумысен шонер ужпум кутоз шуыса, малы ке шуоно инмысь Атаймы визьлыко, шонерлыко но гажась-жалясь. (Учке 16-тӥ абзацез.)
17. Мае ми эскеромы вуоно статьяын?
17 Кызьы та юанъёсты выль валан тодытон уженымы герӟаськемын? Ми эшшо но умой валаськомы, та уж туж кулэ шуыса. Малы озьы вераны луоз? Мар милесьтым мылкыдмес ӝутэ вань сюлмысьтымы тодытыны? Та юанъёсты ми вуоно статьяын эскеромы.
76-ТӤ КЫРӞАН Мае тон шӧдӥськод?
a Тросгес тодон понна, учке 2015-тӥ арын 15-тӥ южтолэзь понна поттэм «Возьмаськон башняысь» «Так было угодно тебе» статьяез, 7—11-тӥ бамъёс.
b «Быдӟым Вавилонэз» быдтэм бере кӧня ке дыр ортчыса, Магог музъемысь Гог Инмарлэн калыкез вылэ урдскоз. Соку шуг-секытъёсын пумиськозы Иеговалэн ужась-тыршисьёсыз но, озьы ик соос но, кинъёс Инмарлэн калыкез пала султӥзы бадӟым куректон кутскем бере.
c СУРЕДЪЁСЫН. Ӟеч ивор быдэс дунне вылын вӧлмытӥське ке но, котькуд адями сое кылыны уг быгаты. Тани куинь мугъёс гинэ: 1) кышномурт улэ отын, кытын соос палан вӧлмем религиен сэрен тодытыны кышкыт; 2) семья улэ сыӵе шаерын, кытын кивалтӥсьёс тодытыны уг лэзё; 3) пиосмурт улэ сыӵе интыын, кытчы мукет адямиослэн сюремзы уг луы.
d СУРЕДЪЁСЫН. Нылмурт, кудӥз кенеше ветлэмысь дугдӥз, тодаз вае «Быдӟым Вавилонэз» быдтон сярысь Библиысь азьпалзэ ивортонэз. Солэн мылкыдыз ӝутске Иегова дорысь утиськон утчаны. Соин ик со Адӟись-Ивортӥсь луись анай-атаез доры лыктэ. Куке ми адӟиськомы, кызьы сьӧлыкасьёс Иегова доры берытско, милям потэ соос понна шумпотэммы но, инмысь Атаймы кадь, гажан-жалянмес возьматэммы.
