ЭСКЕРОН ПОННА 21-ТӤ СТАТЬЯ
107-ТӤ КЫРӞАН Яратыны дышетэ Инмармы
Кызьы тупась кузпал шедьтоно
«Кин меда ӟеч ужъёс лэсьтыса улӥсь кышно шедьтоз? Солэн дуныз марӟан изъёслэсь но вылын» (МАД. 31:10).
МИ ТОДОМЫ
Библиысь кыӵе возетъёс юрттозы тупась кузпал шедьтыны? Кызьы кенеш юрттыны быгатэ агайёслы но сузэръёслы, кудъёсызлэн кузпалъяськемзы потэ?
1, 2. а) Кызьы валаны луэ, мон пумиськылыны дась шуыса? б) Мае возьматэ «пумиськылыны» кыл? (Учке «Валэктонэз».)
ПОТЭ-А тынад семья кылдытэмед? Шудо луон понна, семья одно ик кулэ ӧвӧл. Озьы ке но тросэз христианъёс — егитъёсыз но, арлыдоосыз но — асьсэлы тупась кузпал утчало. Кинэн ке пумиськылыны кутскемлэсь азьло Иеговаен юн кусыпъёс будэтоно, астэ умой тодоно но дышетсконо улон понна тырмыт коньдон поттыны (1 Кор. 7:36) a. Соку тон быгатод, вылды, шудо семья кылдытыны.
2 Но тупась кузпал шедьтыны туж ик капчи ӧвӧл (Мад. 31:10). Милемлы кин ке но кельшиз ке, кызьы солы пумиськылыны ӵектоно? b Та статьяын ми эскеромы, мар юрттоз тупась адямиез шедьтыны но кутскыны пумиськылыны. Озьы ик ми тодомы, кызьы кенешысь вын-агайёс но сузэр-апайёс юрттыны быгато соослы, кинъёслэн кузпалъяськемзы потэ.
МАР ЮРТТОЗ ТУПАСЬ КУЗПАЛ ШЕДЬТЫНЫ?
3. Мар сярысь малпаськоно солы, кин кузпал утча?
3 Нырысь валаны тыршоно, кыӵе сямо кузпал тон утчаськод. Сотэк тон уд синйылты сое, кин тыныд умой кузпал луысал, яке пумиськылыны кутскод соин, кин тыныд уг тупа. Валамон, бырйыны кулэ пылатӥськем христианъёс пӧлысь (1 Кор. 7:39). Но котькудӥз пылатӥськем адями тыныд уз тупа. Соин ик юа аслэсьтыд: «Кыӵе ужпумъёс мон ас азям пуктӥсько? Кыӵе сямъёсты мынам адӟеме потэ картэлэсь (кышноелэсь)? Быдэстыны луымон-а мынам малпанъёсы?»
4. Мар сярысь вӧсясько куд-ог агайёс но сузэръёс?
4 Тынад кузпалъяськемед потэ ке, тон со сярысь вӧсяськиськод, луоз (Флп. 4:6). Иегова кылзэ ӧз сёты, тыныд карт яке кышно утчалоз шуыса. Но со тодэ, мар тыныд кулэ но мае тон шӧдӥськод, но тыныд юрттыны быгатэ тупась кузпал шедьтыны. Соин ик азьланяз но вера Инмарлы аслад сюлмаськонъёсыд но мылпотонъёсыд сярысь (Пс. 61:9). Вӧсяськы, чидан но визьлык курыса (Иак. 1:5). Джон c, Огазеяськем Штатъёсысь кышнояськымтэ агай, вера, мар сярысь со вӧсяське: «Мон Иеговалы верасько, кыӵе сямо кышно шедьтэме потэ. Озьы ик мон вӧсяськисько, кинэн ке тодматскыны мед быгатом шуыса. Со сяна, мон Иеговалэсь курисько, со мыным мед юрттоз шуыса умой сямо карт луыны». Нош Шри-Ланкаысь Таня сузэр вера: «Мон кузпал ӧй шедьты на ке но, кӧтме ӝож уг кариськы. Мон Иеговалэсь курисько, со мыным мед юрттоз шуыса солы оскымон луыны, умой мылкыдын но шумпотыса улыны». Тыныд малпамедлэсь кемагес возьмано луиз ке но, Иегова тонэ уз кельты, тон сярысь сюлмаськоз но тонэ яратоз (Пс. 54:23).
5. Мар юрттоз кузпалъяськымтэ христианъёслы кинэн ке тодматскыны? (Римъёслы 12:11). (Озьы ик учке суредъёсты.)
5 Библия милемыз ӧте: «Тыршыса, дугдылытэк, духеныды ӝуатскыса, Кузё-Инмарлы ужалэ». (Лыдӟе Римъёслы 12:11.) Мылысь-кыдысь Иеговалы ужа-тыршы но пӧртэм агайёсын но сузэръёсын эшъяськы. Соку тон дырдэ но умой ортчытод, озьы ик тодматскыны быгатод христианъёсын, кудъёсыз Иеговалы ужан-тыршонэз нырысетӥ интые пукто но кудъёсызлэн, тынад кадь ик, семья кылдытэмзы потэ. Иеговаез шумпоттыны тыршид ке, тон шудо луод.
Мылысь-кыдысь Иеговалы ужаса-тыршыса но пӧртэм христианъёсын дырдэ ортчытыса, тон быгатод пумитаны сое, кинлэн, тынад кадь ик, семья кылдытэмез потэ. (Учке 5-тӥ абзацез.)
6. Мар сярысь тодазы возёно христианъёслы, кудъёсызлэн кузпалъяськемзы потэ?
6 Но чакласькы, кузпалэз утчан улонад нырысетӥ интые медаз поты шуыса (Флп. 1:10). Кузпалъяськемын-а тон, ӧвӧл-а, тон зэмзэ ик шудо луод, Иеговаен юн кусыпъёсыд луизы ке (Матф. 5:3, ВД). Кузпалъяськымтэ христианъёс Иеговалы тросгес ужаны-тыршыны быгато (1 Кор. 7:32, 33). Соин ик дырдэ пайдаё уже кут но тыршы пӧртэм амалъёсын ужаны-тыршыны. Огазеяськем Штатъёсысь Дже́ссика сузэр, кудӥзлы бызьыкуз 40 арес котыр вал, вера: «Мынам быземе потэ вал ке но, мон солы гинэ саклыкме ӧй висъя. Мон мылысь-кыдысь ужан-тыршонэ пыриськи, соин ик быгатӥ шумпотыса улыны».
ЭН ДЫРТЫ — АДЯМИЕЗ УМОЙГЕС ТОДЫНЫ ТЫРШЫ
7. Малы адямилы шӧдонъёсыд сярысь верамлэсь азьло умой луысал нырысь сое умойгес тодыны? (Мадёнъёс 19:2).
7 Шуом, тыныд кин ке но кельшиз. Мар табере кароно? Библиын вераське, тодон-валан басьтоно шуыса. (Лыдӟе Мадёнъёсты 19:2.) Соин ик эн дырты адямилы вераны, со тыныд кельше шуыса. Визьмо луысал нырысь сое умойгес тодыны. Нидерландыысь А́свин агай вера: «Куддыръя шӧдонъёс ӝог кылдо но, озьы ик ӝог быро но. Ӧд дырты ке, тон шонер ужпум кутод но тыныд тупасьтэм адямиен пумиськылыны уд кутскы». Адямиез умойгес тодыса, оло нош, тон валалод, тӥ ог-огдылы чик но уд тупаське шуыса.
8. Мар юрттоз адямиез умойгес тодыны? (Озьы ик учке суредъёсты.)
8 Адямиез умойгес тодон понна, чакла, кызьы со ассэ возе кенешлэн пумиськонъёсаз но эшъёсыз пӧлын. Озьы тон тросгес тодод Иеговаен кусыпъёсыз сярысь но солэн сямъёсыз сярысь. Юа аслэсьтыд: «Кинэн со эшъяське? Мар сярысь со вераське? (Лука 6:45). Тупало-а милям ас азямы пуктэм ужпумъёсмы?» Озьы ик вераськыны луэ солэн кенешысьтыз тӧроосын яке мукет христианъёсын, кудъёсыз сое умой тодо но кудъёсызлэн Иеговаен юн кусыпъёссы (Мад. 20:18). Кылсярысь, юа, кыӵе солэн сямъёсыз но мар соос со сярысь малпало (Руфь 2:11). Но адями ассэ умойтэм медаз шӧды шуыса, ялан со сьӧры эн ветлы но ваньзэ пыр-поч тодыны эн тыршы.
Адямилы шӧдонъёсыд сярысь верамлэсь азьло сое умойгес тодыны тыршы. (Учке 7-тӥ но 8-тӥ абзацъёсты.)
9. Мае валаны кулэ шӧдонъёсыд сярысь верамедлэсь азьло?
9 Кӧня дыр ортчыны кулэ шӧдонъёсыд сярысь верамедлэсь азьло? Дыртӥд ке, малпан кылдоз, тыныд чидан уг тырмы шуыса (Мад. 29:20). Туж кема возьмад ке, малпан кылдоз, тон дӥсьтӥсьтэм адями шуыса — уката но со адями шӧдонъёсыд сярысь сактӥськиз ке ини (Екк. 11:4). Адямиен вераськемедлэсь азьло тыныд ужпум кутоно ӧвӧл, кузпалъяськоно-а, ӧвӧл-а. Но тыныд валаны кулэ, тон кузпалъяськыны дась шуыса но та адями тыныд умой карт яке кышно луыны быгатэ шуыса.
10. Мар кароно, тон кинлы ке кельшиськод ке, нош со тыныд — уг?
10 Нош мар кароно, тон шӧдӥд ке, кинлы ке кельшиськод шуыса? Со адями тыныд уг кельшы ке, валамон со сярысь вера. Озьы ӧд лэсьты ке, адями малпалоз, тон соин пумиськылыны пумит ӧвӧл шуыса, нош берло солы туж вӧсь луоз (1 Кор. 10:24; Еф. 4:25).
11. Мар сярысь тодамы возёно, милемыз куризы ке эшмылы яке ӵыжы-выжымылы кузпал шедьтыны?
11 Куд-ог шаеръёсын анай-атайёс нылпиоссылы асьсэос карт яке кышно утчало. Нош куд-ог интыосын ӵыжы-выжыос яке эшъёс пиосмуртэз но кышномуртэз тодмато, нош пумиськылоно-а, ӧвӧл-а, соос асьсэос ужпум куто ини. Милемыз куризы ке эшмылы яке ӵыжы-выжымылы тупась кузпал шедьтыны, лыдэ басьтоно, мар соослы кельше но мар соослы кулэ. Тупась кузпал утчакумы, учконо ӧвӧл, кӧня адямилэн коньдонэз, кытын со дышетскиз яке кыӵе семьяысь потӥз. Тросгес тодыны тыршоно солэн сямъёсыз сярысь, нош самой валтӥсез — Иеговаен кусыпъёсыз сярысь. Озьы ке но ойдолэ тодамы возёмы: кузпалъяськоно-а, ӧвӧл-а, агай но сузэр асьсэос ужпум куто (Гал. 6:5).
КЫЗЬЫ КУТСКОНО ПУМИСЬКЫЛЫНЫ?
12. Кызьы кинлы ке ӵектыны луэ пумиськылыны?
12 Озьыен, тынад кинлы ке но ӵектэмед потэ пумиськылыны. Кызьы сое лэсьтоно? d Кылсярысь, тон быгатӥськод соин вераськыны, калык пӧлын пумиськыса яке солы жингыртыса. Валамон вера аслад шӧдонъёсыд сярысь (1 Кор. 14:9). Адями тыныд ответ сётыны соку ик дась ӧвӧл ке, сёт дыр малпаськыны (Мад. 15:28). Нош солэн тонэн пумиськылэмез уг поты ке, солэсь быръёнзэ гажа.
13. Мар кароно, кин ке но тыныд аслаз шӧдонъёсыз сярысь вера ке? (Колоссыослы 4:6).
13 Мар кароно, кин ке но тыныд аслаз шӧдонъёсыз сярысь вера ке? Тонэн вераськыны адямилы туж ик капчи ӧй вал, дыр. Соин ик лякытэн но гажаса вераськы. (Лыдӟе Колоссыослы 4:6.) Тыныд малпаськыны дыр кулэ ке, озьы ик вера. Но туж кема эн малпаськы (Мад. 13:12). Тынад со адямиен пумиськылэмед уг поты ке, со сярысь валамон но лякытэн вера. Ӵапак озьы лэсьтӥз Австриысь Ханс агай, куке сузэр солы пумиськылыны ӵектӥз: «Мон соку ик солы шонерак но лякытэн верай, соин пумиськылыны дась ӧвӧл шуыса. Мон азьланяз но асме соин чакласькыса возьыны тырши, со медаз малпа, мон малпанме воштӥ шуыса». Нош тон пумиськылыны соглаш кариськид ке, вераське, мар тӥ кыкнады но та вакытлэсь возьмаськоды. Адямиос туж пӧртэмесь, соин ик пумиськылон вакыт шоры пӧртэм сямен учкыны быгато.
КЫЗЬЫ ВАНЬМЫ МИ ЮРТТЫНЫ БЫГАТӤСЬКОМЫ?
14. Мар верано ӧвӧл кузпалъяськымтэ христианъёслы, ми соосты ӝоже медам уськытэ шуыса?
14 Кызьы котькудӥз юрттыны быгатэ агайёслы но сузэръёслы, кудъёсызлэн семья кылдытэмзы потэ? Нырысетӥез, чаклано, мар ми вераськомы (Еф. 4:29). Кылсярысь, юалэ асьтэлэсь: «Серем карисько-а мон соосты, кинъёс кузпалъяськыны малпало? Мон адӟисько ке, кышнояськымтэ агай бызьымтэ сузэрен вераське шуыса, кызьы мон асме возисько? Уг кутскиськы-а мон малпаны, соос ог-огзылы кельшо шуыса?» (1 Тим. 5:13). Кыкетӥез, чаклано, кылъёсмы яке ужъёсмы сэрен кузпалъяськымтэ агайёс но сузэръёс асьсэды умойтэм медаз шӧдэ шуыса. Ханс агай, кудӥз сярысь гожтэмын вал ини, вера: «Куд-огъёсыз шуо: „Ку тон кышнояськод ини? Аръёсыд ортчо ук“. Сыӵе кылъёс туж вӧсь каро, озьы ик малпан кылдэ, тон кышнояськемын ӧвӧл ке, тон пӧрмостэм адями но тыныд ӝегатскытэк кышно утчано шуыса». Со интые, умой луысал котькуд тупась учыре сыӵе агайёсты но сузэръёсты ушъяны! (1 Фес. 5:11).
15. а) Мае лыдэ басьтоно, кинлы ке тупась кузпал утчамлэсь азьло? (Римъёслы 15:2). (Озьы ик учке суредэз.) б) Малы тӥ дышетскиды, видеороликез учкыса? (Учке сноскаез.)
15 Мар кароно, тӥ малпаськоды ке, кыӵе ке агай но сузэр ог-огзылы туж умой тупало шуыса? Библия вера, милемлы мукетъёсызлэсь шӧдонъёссэс лыдэ басьтоно шуыса. (Лыдӟе Римъёслы 15:2.) Кузпалъяськымтэ христианъёс пӧлысь тросэзлэн уг поты, соосты кинэн ке мед тодматозы шуыса. Милемлы соослэсь быръёнзэс гажано (2 Фес. 3:11). Нош мукетъёсыз пумит ӧй луысалзы, соослы юрттысалзы ке. Но милемыз ӧз куре ке, юрттыны тыршоно ӧвӧл (Мад. 3:27) e. Куд-ог христианъёс малпало, дырыз вуиз ке, кузпал шедёз шуыса. Германиысь бызьымтэ Лидия сузэр вера: «Тӥ быгатӥськоды куноосты ӧтьыны, озьы ик агаез но сузэрез, кудъёсыз, тӥ малпамъя, ог-огзылы тупало. Отын соос тодматскыны быгатозы, нош мар берло карозы, соос асьсэос ужпум кутозы ини».
Трос адямиос пӧлын кузпалъяськымтэ агайёс но сузэръёс быгато вераськыны но умойгес тодматскыны. (Учке 15-тӥ абзацез.)
16. Мае тодазы возёно кузпалъяськымтэ христианъёслы?
16 Кузпалъяськемын-а ми, ӧвӧл-а, ваньмы ми шудо луыны быгатӥськомы (Пс. 127:1). Соин ик, тынад семья кылдытэмед потэ ке, нош тупась адями ӧз шедьы на ке, азьланяз но Иеговалы ужа-тыршы. Синь И нимо сузэр вера: «Ӵошатоно ке соин, кӧня дыр ӵоже тон кузпалэныд райын улод, кузпалъяськымтэ улон вакытэд туж вакчи потоз. Соин ик дырдэ дунъя но визьмо кут». Но шуом, тупась адями сюриз но тӥ пумиськылыны кутскиды. Вуоно статьяысь ми тодомы, кызьы пумиськылыку валано, со адями тыныд умой кузпал луоз шуыса.
137-ТӤ КЫРӞАН Оскымон нылкышноос азьло но туннэ
a Валан понна, дась-а тон семья кылдытыны, учкы jw.org сайтысь «Вопросы молодёжи» разделысь «Свидания. Часть 1. Готов ли я с кем-то встречаться?» статьяез.
b ВАЛЭКТОН. Пумиськылыны кыл та но вуоно статьяосын возьматэ, пиосмурт но кышномурт умойгес тодматскыны тыршо, валан понна, соос ог-огзылы умой карт но кышно луозы-а, уз-а шуыса. Та вакыт кутске, куке пиосмурт но кышномурт ог-огзылы шӧдонъёссы сярысь верало, но йылпумъяське, куке соос ужпум куто, кузпалъяськозы-а, уз-а шуыса.
c Куд-ог нимъёс воштэмын.
d Куд-ог калыкъёсын ӵем дыръя пумиськылыны ӵекто пиосмуртъёс. Озьы ке но номыр уродэз уз луы, кышномурт пумиськылыны ӵектӥз ке (Руфь 3:1—13). Со сярысь тросгес тодыны луоз, 2004-тӥ арын 22-тӥ коньывуон понна поттэм «Сайкалэ!» журналысь «Вопросы молодёжи: Как мне рассказать ему о своих чувствах?» статьяез лыдӟыса.
e Учке jw.org сайтысь «Они успешно борются за веру. Те, кто не состоит в браке» видеороликез.
