1. Кыӵе оскытон сётӥз Иегова Авраамлы?

 ТРОС аръёс талэсь азьло Инмар кылчин пыр вераз Авраамлы, Содом но Гоморра каръёсты быдтоз шуыса. Авраам Инмарлы юн оске вал ке но, солы секыт вал та иворез пумозяз валаны. Авраам юаз: «Оло нош Тон шонер улӥсез сьӧлыклэсь кышкасьтэмен ӵош огазе быдтод-а? [...] Быдэс музъемлэн Судьяез шонертэм судить кароз шат?» Иегова сак кылзӥз аслэсьтыз эшсэ но оскытӥз сое, шонер улӥсьёсты ноку но уз быдты шуыса (Ул.-выл. 18:23—33). Та малпан милемыз но буйгатэ.

2. Малы ми оскыны быгатӥськомы, кинэ ке судъякуз, Иегова котьку гажась-жалясь но шонерлыко луэмзэ возьматэ шуыса?

² Ми но куддыръя ум валаське, малы Инмар сыӵе яке таӵе приговор ялэ. Апостол Павел Иегова сярысь гожтӥз: «Валаны луонтэмесь Солэн судъёсыз!» (Рим. 11:33). Но ми оскыны быгатӥськомы, кинэ ке судъякуз, Иегова котьку гажась-жалясь но шонерлыко луэмзэ возьматэ шуыса. Малы? Малы ке шуоно со «вань адями пиослэсь сюлэмзэс» тодэ (3 Экс. 8:39; 1 Экс. 16:7; 1 Пар. 28:9). Соин ик ми быгатӥськомы солы оскыны.

3, 4. Кыӵе юанъёсмы милям кылдыны быгато но мае ми эскеромы та статьяын? (Иоанн 5:28, 29).

³ Озьы ке но куддыръя милям Авраамлэн кадь ик юанъёсмы кылдыны быгато. Оло нош, ми малпаськомы: «Вань-а улӟытонлы осконзы соослэн, кинъёсты быдтӥз Иегова? Кылсярысь, Содомын но Гоморраын улӥсьёс пӧлысь кин ке улӟытэмын луоз-а, куке „шонер улымтэосты“ улӟытозы?» (Ап. уж. 24:15).

 ⁴ Ойдолэ тодамы ваёмы, мае ми тодӥськомы ини улӟытон сярысь. Алигес ми умойгес валаны кутскимы, мае возьматэ улӟытон, кудӥз сярысь вераське Иоаннлэсь ӟеч иворын. Отын верамын, одӥгъёсыз «быронтэм улонэ пырыны» улӟытэмын луозы шуыса, нош мукетъёсыз — «янгыше сюронлы» a. (Лыдӟе Иоаннлэсь 5:28, 29.) Тае валаса, ми умойгес валаны кутскимы Иеговалэсь шонерлыко судъёссэ. Та воштӥськонъёс сярысь ми пыр-почгес вераськомы та но вуоно статьяосын. Нырысь ми вераськомы со сярысь, мае ми ум тодӥське, нош собере со сярысь, мае ми тодӥськомы ини.

МАЕ МИ УМ ТОДӤСЬКЕ

5. Мар азьвыл вераське вал асьме публикациосын соос сярысь, кинъёсты Иегова Содомын но Гоморраын быдтӥз?

⁵ Азьвыл асьме публикациосын верамын вал, шонер улымтэос, кудъёссэ быдтӥз Иегова,— кылсярысь, Содомын но Гоморраын улӥсьёс,— улӟытэмын уз луэ шуыса. Но пыр-поч эскеронъёс ортчытыса но вӧсяськыса, ми валамы, озьы вераны ум быгатӥське шуыса. Малы?

6. а) Вералэ примеръёсты, куке Иегова шонер улымтэосты быдтӥз. б) Луоз-а вераны, Иегова соосты пыраклы быдтӥз шуыса?

⁶ Библиын верамын мукет учыръёс но, куке Иегова шонер улымтэосты быдтӥз. Кылсярысь, ву тудӟонын со вань адямиосты быдтӥз, Ноез но солэсь семьязэ гинэ улэп кельтӥз. Озьы ик Иегова израиль калыкез быдтыны косӥз сизьым калыкъёсты, кудъёсыз Сӥзем музъемын улӥзы. Нош берлогес Инмар ыстӥз кылчинэз, кудӥз одӥг уй куспын 185 000 ассир ожгарчиосты быдтӥз (Ул.-выл. 7:23; К. Зак. 7:1—3; Ис. 37:36, 37). Та учыръёс возьмато-а, ваньмыз со адямиос пыраклы быдтэмын вал но ноку улӟытэмын уз луэ шуыса? Уг. Малы ми озьы вераны быгатӥськомы?

7. Мае ми ум тодӥське адямиос сярысь, кудъёсыз быдтэмын вал ву тудӟон дыръя но Ханаанэз киултон дыръя? (Учке суредэз.)

⁷ Со адямиос быдтэмын вал ке но, ми ум тодӥське, кыӵе приговор ялӥз Инмар котькудӥзлы соос пӧлысь. Озьы ик ми ум тодӥське, вал-а соослэн луонлыксы Иегова сярысь тодыны но ӧпкельыны. Библиын верамын, Ной «шонерлыкез тодытӥсь» вал шуыса (2 Пётр 2:5). Но отын верамын ӧвӧл, ковчегез пуктыкуз, со котькуд адямилы ву тудӟон сярысь вераны тыршиз шуыса. Озьы ик ми ум тодӥське, ваньмызлэн-а Ханаанын улӥсьёслэн луонлыксы вал Иегова сярысь тодыны но воштӥськыны.

8. Мае ми ум тодӥське Содомын но Гоморраын улӥсьёс сярысь?

⁸ Нош мар вераны луоз Содомын но Гоморраын улӥсьёс сярысь? Соос пӧлын Лот нимо шонер улӥсь вал. Тодӥськомы-а ми, Лот ваньзылы соослы ӟеч иворез вераз шуыса? Ум. Зэмзэ вераса, со каръёсын улӥсьёс асьсэды туж урод возизы. Лыдэ басьтоно ке, кыӵе адямиос соослэн котыразы вал, луоз вераны, соос уг тодо вал шуыса, мар зэмзэ ик ӟечез, нош мар уродэз луэ. Тодамы ваёмы учырез, куке Содомысь пиосмуртъёс Лотлэсь кунооссэ эриктэманы туртто вал. Библиын верамын: «Содомын улӥсьёс, егитъёс но, пересьёс но... Лотлэсь корказэ котыртӥзы» (Ул.-выл. 19:4; 2 Пётр 2:7). Иеговалэн Авраамен вераськемысьтыз адӟиське, тросэз со карын улӥсьёс шонер улымтэос вал шуыса (Ул.-выл. 18:32). Озьыен, соос асьсэ сьӧлыкъёссы понна кыл кутӥзы. Но возьматэ-а со, «шонер улымтэосты» улӟытыку, одӥгез но соос пӧлысь улӟытэмын уз луы шуыса? Ми тодӥськомы, Иегова гажась-жалясь  шуыса. Соин ик ми ум быгатӥське вераны, соос улӟытэмын уз луэ шуыса.

9. Мае ми ум тодӥське Соломон сярысь?

⁹ Библиын озьы ик вераське адямиос сярысь, кудъёсыз нырысь шонер улӥзы, нош собере шонер улэмысь дугдӥзы. Кылсярысь, Соломон эксэй. Со умой тодэ вал, кин со Иегова но кызьы солы ужано-тыршоно. Инмар сое бакель каре вал. Но берлогес Соломон зэмос луисьтэм инмаръёслы йыбыртъяны кутскиз, соин ик Иеговалэн туж вожез потӥз. Соломонлэн сьӧлыкъёсызлэн бервылъёсыз трос дауръёс ӵоже шӧдӥськизы на израиль калык вылын (3 Экс. 11:5—9; 4 Экс. 23:13). Инмарлэн Кылаз верамын: «Соломон кулӥз но, сое атайёсыныз огазе Давидлэн, атаезлэн, городаз ватӥзы» (3 Экс. 11:43). Со, кызьы Соломон ватэмын вал, возьматэ-а, Соломон одно ик улӟытэмын луоз шуыса? Библия со сярысь уг вера. Оло нош, кин ке но малпаны быгатоз: «Кулэм мурт сьӧлыкезлэсь мозмытэмын» (Рим. 6:7, ВД). Со озьы. Но со уг возьматы, вань кулэмъёс улӟытэмын луозы шуыса. Кулон адямилы право уг сёты выльысь улыны. Улӟытон — со яратӥсь Инмарлэн кузьымез. Иегова кузьма сое соослы, кинъёслы луонлык сётэмез потэ пырак дауръёс ӵоже солы ужаны-тыршыны (Иов 14:13, 14; Иоанн 6:44). Соломон сыӵе кузьым басьтоз-а? Иегова тодэ, нош ми — ум. Но ми тодӥськомы, Инмар одно ик шонер лэсьтоз шуыса.

МАЕ МИ ТОДӤСЬКОМЫ

10. Кыӵе шӧдонъёсыз кылдо Иеговалэн, приговоръёсты ялыкуз? (Иезекииль 33:11). (Озьы ик учке суредэз.)

¹⁰ Лыдӟе Иезекиильлэсь 33:11. Та кылбурын Иегова вера милемлы, кыӵе солэн шӧдонъёсыз кылдо, куке со приговоръёсты ялэ. Апостол Пётр но Иегова сярысь вераз: «Нокин но медаз быры, ваньмыз ӧпкельыса сьӧлыкъёсызлэсь мед куштӥськоз шуыса, Со... возьма» (2 Пётр 3:9). Та кылъёс милемыз туж буйгато. Ми тодӥськомы, Иегова нокинэ но пыраклы быдтыны уг дырты шуыса. Со гажась-жалясь Инмар. Луэмезъя со котьку тырше со сямзэ возьматыны.

11. Кин улӟытэмын уз луы но кытысь ми сое тодӥськомы?

¹¹ Тодӥськомы-а ми, кин улӟытэмын уз луы? Библиын верамын куд-ог сыӵе адямиос сярысь b. Иисус валамон возьматӥз, Иуда Искариот улӟытэмын уз луы шуыса (Марк 14:21; озьы ик учке Иоаннлэсь 17:12 c). Со озьы, малы ке шуоно Иуда валаса вылысь Иеговалы но солэн Пиезлы пумит ӝутскиз. (Учке Марклэсь 3:29; озьы ик учке та кылбурлы валэктонэз «Эскерон понна поттэм Библиысь» (ӟуч)). Со сяна, Иисус вераз, куд-ог религиозной кивалтӥсьёс, кудъёсыз солы пумит мынӥзы, улӟытэмын уз луэ шуыса (Матф. 23:33). Нош апостол Павел гожтӥз, зэмос йыбырттонлэсь палэнскемъёс, кудъёсыз ӧз ӧпкеле, улӟытэмын уз луэ шуыса (Евр. 6:4—8; 10:29).

12. Мае ми тодӥськомы Иеговалэн гажан-жалянэз сярысь? Вералэ примеръёсты.

¹² Кызьы верамын вал ини, Иегова — гажась-жалясь Инмар но солэн уг поты, кин ке мед быроз шуыса. Кызьы со гажан-жалянзэ возьматэ соослы, кинъёс секыт сьӧлыкъёс лэсьтӥзы? Учкомы куд-ог примеръёсты. Одӥгез соос пӧлысь — Давид эксэй. Со секыт сьӧлыкъёс лэсьтӥз, кылсярысь, азон-калгон сьӧлыке пыриз но адямиез вииз. Но Давид ӧпкелиз, соин ик Иегова сое простить кариз (2 Экс. 12:1—13). Манассия  эксэй трос кышкыт, урод ужъёс лэсьтыса улӥз. Но Иегова адӟиз солэсь ӧпкелемзэ но сыӵе адямиез но простить кариз (2 Пар. 33:9—16). Та примеръёс милемлы тодамы вайыто, Иегова луэмезъя котьку гажан-жалянзэ возьматыны тырше шуыса. Со улӟытоз сыӵе адямиосты, кудъёсыз валазы, макем секыт сьӧлыкъёс соос лэсьтӥзы, но ӧпкелизы.

13. а) Малы Иегова Ниневияын улӥсьёсты гажаз-жаляз? б) Мар берлогес вераз Иисус Ниневияын улӥсьёс сярысь?

¹³ Озьы ик Иегова гажан-жалянзэ возьматӥз Ниневияын улӥсьёслы но. Инмар Ионалы Ниневия сярысь тазьы вераз: «Солэн лек ужъёсыз Мон доры вуизы ни». Нош куке отын улӥсьёс ӧпкелизы, Иегова соосты простить кариз. Инмар, Иона сярысь, гажась-жалясьгес. Куке Ионалэн вожез потӥз, Инмар солы тодаз вайытӥз, Ниневияын улӥсьёс «бурпалзэс паллян палзылэсь висъяны» уг быгато, яке ӟечсэ уродэзлэсь висъяны уг быгато, шуыса (Иона 1:1, 2; 3:10; 4:9—11). Берлогес Иисус та учыр сярысь вераз, возьматон понна, макем Иегова шонерлыко но гажась-жалясь. Иисус вераз, Ниневияын улӥсьёс, кудъёсыз ӧпкелизы, суд дыръя улӟытэмын луозы шуыса (Матф. 12:41).

14. Мар возьма Ниневияын улӥсьёсты улӟемзы бере, куке соос суд азе султозы?

¹⁴ Кыӵе суд дыръя Ниневияын улӥсьёс улӟытэмын луозы? Иисус вераз, «ӟеч уж лэсьтӥсьёс быронтэм улонэ пырыны улӟозы, нош урод уж лэсьтӥсьёс янгыше сюронлы улӟозы» шуыса (Иоанн 5:29). Со луоз, Христос сюрс ар ӵоже кивалтыку, куке «шонер улэмъёс но, шонер улымтэос но кулэмысь улӟытыса» султытэмын луозы (Ап. уж. 24:15). Шонер улымтэос суд азе султозы. Со возьматэ, Иегова но Иисус чаклалозы шуыса, уже куто-а соос сое, малы дышетскизы. Ниневияын улӥсь мурт улӟемез бере Иеговалы йыбыртъяны пумит луиз ке, со кулыны судъямын луоз (Ис. 65:20). Нош ваньмыз, кинъёс Иеговалы йыбыртъялозы, пырак дауръёс ӵоже улыны быгатозы! (Дан. 12:2).

15. а) Малы уг луы вераны, Содомын но Гоморраын улӥсьёс пӧлысь нокин но улӟытэмын уз луы шуыса? б) Кызьы валано кылъёсты, кудъёсыз гожтэмын Иудалэн 7? (Озьы ик учке  «Мар сярысь вераз Иуда?» рамкаез.)

¹⁵ Иисус вераз, «суд нуналэ» Содомын но  Гоморраын улӥсьёслы капчигес луоз шуыса, адямиослы сярысь, кудъёсыз сое но солэсь дышетонъёссэ палэнтӥзы (Матф. 10:14, 15; 11:23, 24; Лука 10:12). Малы Иисус озьы вераз? Оло нош, та кылъёсын со ӵошатӥз, макем урод асьсэды возизы со дыре улӥсь адямиос, Содомын но Гоморраын улӥсьёс сярысь? Ӧз. Малы ке шуоно, куке Иисус вераз, Ниневияын улӥсьёс суд дыръя улӟытэмын луозы шуыса, со ӵошатон ӧй вал. Соин ик вераны луоз, Содомын но Гоморраын улӥсьёс сярысь веракуз но, со зэмзэ вераз шуыса. Тодамы ваёмы, мар шуиз вал Иисус улӟытон сярысь. Со вераз, «урод уж лэсьтӥсьёс янгыше сюронлы улӟозы» шуыса (Иоанн 5:29). Ниневияын улӥсьёс сямен ик, Содомын но Гоморраын улӥсьёс урод ужъёс лэсьтылӥзы. Но Ниневияын улӥсьёслы луонлык сётэмын вал ӧпкельыны, нош Содомын но Гоморраын улӥсьёслэн сыӵе луонлыксы ӧй вал. Соин ик оскыны луэ, Содомын но Гоморраын улӥсьёс пӧлысь куд-огез ке но улӟытэмын луоз шуыса. Ми соослы Иегова но Иисус Христос сярысь зэмлыкез вераны быгатомы.

16. Мае ми тодӥськомы со сярысь, кызьы Иегова ужпум кутэ, кинэ ке улӟытоно-а, ӧвӧл-а шуыса? (Иеремия 17:10).

¹⁶ Лыдӟе Иеремиялэсь 17:10. Та кылбурын гожтэмын, мае ми тодӥськомы со сярысь, кызьы Иегова судъя: со котьку чакла-эскере сюлэмъёсты но малпанъёсты. Куке Инмар ужпум кутоз, кинэ улӟытоно, со «котькудӥзлы лёгем сюресэзъя... пунэмзэ» тыроз. Иегова котьку лыдэ басьтоз аслэсьтыз шонерлыко эсэпъёссэ но луэмезъя котьку тыршоз гажась-жалясь луыны. Соин ик кулэ ӧвӧл вераны, кыӵе ке адями улӟытэмын уз луы шуыса, Библиын со сярысь шонерак гожтэмын ӧвӧл ке.

«БЫДЭС МУЗЪЕМЛЭН СУДЬЯЕЗ» КОТЬКУ ШОНЕРЛЫКО ЛЭСЬТЭ

17. Мар луоз кулэмъёсын азьланяз?

¹⁷ Кулон — со кышкыт тушмон. Шайтан, Адам но Ева Иеговалы пумит ӝутскем дырысен трос миллиард адямиос кулӥзы ини (1 Кор. 15:26). Нош мар луоз соосын азьланяз? Христослэн дышетскисьёсыз  пӧлысь 144 000 гинэ улӟытэмын луозы инмын кулытэк улон понна (Усьт. 14:1). Нош тросэз Иеговалы оскымон пиосмуртъёс но кышномуртъёс улӟытэмын луозы музъем вылын улон понна. Соос улӟытэмын луозы Христос сюрс ар ӵоже кивалтыку, куке «шонер улымтэосты» улӟытозы. Берпум эскерон дыръя соос Иеговалы оскымон луизы ке, соос пырак дауръёс ӵоже музъем вылын улозы (Дан. 12:13; Евр. 12:1). Озьы ик, Христос сюрс ар ӵоже кивалтыку, улӟытэмын луозы «шонер улымтэос» но. Соос пӧлы пыро адямиос, кудъёсыз Иеговалы ужатэк-тыршытэк улӥзы, озьы ик лек ужъёс лэсьтыса улэмъёс но. Соослы луонлык сётэмын луоз воштӥськыны но Иеговалэн ужась-тыршисьёсыз луыны (Лука 23:42, 43, ВД). Нош со адямиос, кудъёсыз валаса вылысь, юри Иеговалы пумит мынӥзы, ноку но улӟытэмын уз луэ (Лука 12:4, 5).

18, 19. а) Малы ми оскыны быгатӥськомы, Иегова кулэмъёсты шонер судить кароз шуыса? (Исаия 55:8, 9). б) Мае ми тодомы вуоно статьяысь?

¹⁸ Быгатӥськомы-а ми оскыны, Иегова котьку шонерлыко судъя шуыса? Быгатӥськомы! Авраам ачиз адӟиз, Иегова, «быдэс музъемлэн Судьяез», дун-шектэм, туж визьлыко но гажась-жалясь шуыса. Иегова аслэсьтыз Пизэ но та сямъёслы дышетӥз но судъяны право сётӥз (Иоанн 5:22). Атай но, Пи но адямиослэсь сюлэмъёссэс адӟо (Матф. 9:4). Соин ик судъякузы Иегова но Иисус котькуд адямилэсь учырзэ нимаз эскерозы но шонерлыко ужпум кутозы.

¹⁹ Ойдолэ котьку оскомы, Иегова шонерлыко судить каре шуыса! Ми валаськомы, ми судъяны ум быгатӥське шуыса. (Лыдӟе Исаиялэсь 55:8, 9.) Соин ик вань судэз ми оскиськомы Иеговалы но солэн Пиезлы. Иисус, милям Эксэймы, Атаез кадь ик шонерлыко но гажась-жалясь (Ис. 11:3, 4). Нош кызьы Иегова но Иисус бадӟым куректон дыръя адямиосты судить карозы? Мае ми тодӥськомы ини, нош мае ум тодӥське на? Та юанъёслы валэктонъёс ми шедьтомы вуоно статьяысь.