ЭСКЕРОН ПОННА СТАТЬЯ 37
Шумпотыса Иеговалэсь кылзӥське
«Соку асьмеос эшшо но юнгес тэрытскыны кулэ ӧвӧл-а духъёслэн Атайзылы?» (ЕВР. 12:9).
9-ТӤ КЫРӞАН Иегова — наш Царь!
ТА СТАТЬЯЫН a
1. Малы Иеговалэсь кылзӥськоно?
МИЛЕМЛЫ Иеговалэсь кылзӥськоно b, малы ке шуоно со милям Кылдытӥсьмы. Со Кылдытӥсь бере, солэн правоез вань аслаз кылдытэмъёсызлы куронъёс пуктыны (Усьт. 4:11). Нош милям вань на мукетыз муг солэсь кылзӥськыны — Иегова самой умой кивалтӥсь луэ. Адямиослэн улоназы трос пӧртэм кивалтӥсьёс вал. Но одӥгез но соос пӧлысь уз быгаты ӵошатскыны Иеговаен визьлыкеныз, яратонэныз, валась но гажась-жалясь луэменыз (Пот. 34:6; Рим. 14:26; 1 Иоанн 4:8).
2. Еврейёслы 12:9—11 верамъя, малы милемлы Иеговалэсь кылзӥськоно?
2 Иеговалэн уг поты, ми кышкаменымы солэсь мед кылзӥськомы шуыса. Солэн потэ, ми солэсь мед кылзӥськомы, малы ке шуоно со милям яратӥсь Атаймы. Еврейёслы гожтэтаз апостол Павел валэктэ, асьмеос эшшо но юнгес тэрытскыны кулэ шуыса Атайлы, малы ке шуоно солэн потэ, ми пайда мед басьтомы шуыса, соин ик со дышетэ милемыз. (Лыдӟе Еврейёслы 12:9—11.)
3. а) Кызьы возьматоно, ми Иеговалэсь кылзӥськиськомы шуыса? б) Кыӵе юанъёсты ми эскеромы?
3 Кызьы возьматоно, ми Иеговалэсь кылзӥськиськомы шуыса? Милемлы вань кужмысьтымы котьма ласянь Иеговалэсь кылзӥськыны тыршоно но ваньзэ ас мылпотэмъя гинэ лэсьтыны мылкыдын нюръяськоно (Мад. 3:5). Милемлы капчигес луоз Иеговалэсь кылзӥськыны, куке тросгес тодомы солэн ужъёсыз сярысь. Малы? Малы ке шуоно, солэн ужъёсыз сярысь тодыса, ми тодомы, кыӵе солэн сямъёсыз (Пс. 144:9). Иеговаен матэгес тодматскыса, ми сое юнгес яратыны кутскиськомы. Нош куке яратӥськод, кулэ ӧвӧл трос гожъям правилоос но куронъёс, мае лэсьтыны яра, нош мае уг яра. Ми дышетскиськомы яратыны сое, мае яратэ Иегова, но адӟемпотостэм карыны сое, мае со адӟемпотостэм каре (Пс. 96:10). Но Иеговалэсь кылзӥськыны котьку ик капчи ӧвӧл. Малы? Малы дышетскыны быгато тӧроос, атайёс но анайёс Неемия кивалтӥсьлэсь, Давид эксэйлэсь но Мариялэсь, Иисуслэн анаезлэсь? Ойдолэ эскеромы та юанъёсты.
МАЛЫ ИЕГОВАЛЭСЬ КЫЛЗӤСЬКЫНЫ КОТЬКУ ИК КАПЧИ ӦВӦЛ
4, 5. Римъёслы 7:21—23 верамъя, малы Иеговалэсь кылзӥськыны котьку ик капчи ӧвӧл?
4 Малы Иеговалэсь кылзӥськыны котьку ик капчи ӧвӧл? Одӥгез муг — милемлы палам сьӧлык но тырбыдэстэм луон, кудъёсыз Инмарлэсь кылзӥськытэк улон пала кыско. Инмарлы пумит мыныса но лэзьымтэ емышез сиыса, Адамлэн но Евалэн асьсэлэн ужпум кутэмзы потӥз, мар уродэз, нош мар ӟечез луэ (Ул.-выл. 3:22). Али ке но тросэз адямиос Иеговалэсь малпанзэ лыдэ уг басьто но асьсэос ужпум куто, мар шонер, нош мар шонертэм луэ.
5 Котьку Иеговалэсь кылзӥськыса улыны секыт соослы но, кинъёс Иеговаез тодо но ярато. Сое адӟыны луэ апостол Павеллэн примерысьтыз. (Лыдӟе Римъёслы 7:21—23.) Милям, Павеллэн сямен, Иеговаез шумпоттэмы потэ. Но милемлы ялан нюръяськоно луэ шонертэм лэсьтыны мылкыдын.
6, 7. Кыӵе кыкетӥез муг, малы Иеговалэсь кылзӥськыны секыт луэ? Вералэ пример.
6 Мукетыз муг — адямиослэн сямъёссы но малпанъёссы, кудъёсыз пӧлын ми будӥмы. Тросэзлэн та дуннеысь адямиослэн улон шоры учконъёссы Иеговалэн эрикезлы пумит луо. Соин ик милемлы туж тыршоно луэ, вылды, соослэн малпанъёссы но учконъёссы милемлы медаз палалэ шуыса. Тани одӥг пример.
7 Куд-ог шаеръёсын егитъёслы верало: «Валтӥсез улонын — трос коньдон поттыса ужан». Сыӵе югдуре шедиз Мэри c нимо сузэр. Зэмлыкен тодматскемезлэсь азьло со шаерысьтызы одӥгаз самой умой университетын дышетскиз. Солэн семьяез косэ вал сое умой уже интыяськыны, кытын трос коньдон тыро. Солэн аслаз но потэ вал. Нош Иеговаез тодыса но сое яратыса, солэн учконъёсыз воштӥськизы. Озьы ке но Мэри вера: «Куддыръя мыным тунсыко уж ӵекто, кудӥз трос коньдон поттыны юрттысал, но кудӥз люкетысал мыным Иеговалы ужаны-тыршыны озьы, кызьы мынам потэ. Мыным секыт «уг» шуыны, малы ке шуоно мон озьы будэтэмын. Мыным котьку Иеговалэсь юрттэтсэ сюлворыса куроно луэ, со мыным визь сынаськонэз вормыны мед юрттоз но мон соглаш медам луы шуыса пырыны уже, кудӥз мыным ужаны-тыршыны люкетысал» (Матф. 6:24).
8. Мае ми али эскеромы?
8 Иеговалэсь кылзӥськиськомы ке, со милемлы пайда вае. Нош соослэн, кинъёслы кивалтыны право сётэмын, кылсярысь, тӧроослэн, атайёслэн но анайёслэн, эшшо одӥг мугзы вань на Иеговалэсь кылзӥськыны — соосын герӟаськемын мукет адямиослэн шудзы. Ойдолэ эскеромы Библиысь куд-ог примеръёсты, кудъёсыз дышето милемыз кивалтыны правоез шонер кутыны.
МАЛЫ ТӦРООС НЕЕМИЯЛЭСЬ ДЫШЕТСКЫНЫ БЫГАТО
Тӧроос Эксэйлык юртэз эскерон-тупатъян но утялтон уже пырисько, озьы ик, кызьы куке но Неемия Иерусалимлэсь борддоръёссэ выльысь ӝутонэ пыриськиз (Учке 9—11-тӥ абзацъёсты.) d
9. Кыӵе шуг-секытъёсын пумиськиз Неемия?
9 Иегова аслаз калыкез сярысь сюлмаськыны тӧроослы оскиз (1 Пётр 5:2). Неемия тӧроослы туж умой пример возьматӥз, кызьы астэ Иеговалэн калыкеныз возёно. Со Иудей музъемын кивалтӥсь вал. Солэн киулаз тросэз оскемын вал (Неем. 1:11; 2:7, 8; 5:14). Тани куд-огез гинэ шуг-секытъёс, кудъёсыныз со пумиськиз. Неемия тодӥз, храмын Иеговалы ярасьтэм ужъёс лэсьтыса, иудейёс храмез саптазы шуыса; левитъёслы ӧз юрттэ, кызьы сое Закон куре вал; суббота нуналэз ӧз уте; нош куд-огъёсыз мурт музъемысь кышно басьтылӥзы шуыса. Неемиялы та кылдэм секыт югдурез тупатоно вал (Неем. 13:4—30).
10. Кызьы Неемия ассэ возиз Иеговалэн калыкеныз?
10 Неемия Инмарлэн калыкез пӧлын аслэсьтыз курон-косонъёссэ ӧз пукты но соослэсь кужмысь кылзӥськыны ӧз косы. Со интые, со вань сюлмысьтыз Иеговалы вӧсяськиз но солэсь юрттэтсэ куриз, нош озьы ик Инмарлэн Законэзлы дышетӥз (Неем. 1:4—10; 13:1—3). Со сяна, Неемия зӥбытэн мукет иудейёсын валче ужаз но соослы Иерусалимлэсь борддоръёссэ выльысь ӝутыны юрттӥз (Неем. 4:15).
11. 1 Фессалоникаослы 2:7, 8 верамъя, кызьы тӧроос асьсэды вын-агайёсын но сузэр-апайёсын возьыны кулэ?
11 Тӧроос Неемиялэн выллем шуг-секытъёсын уг пумисько, вылды, но соос трос удысъёсын солэсь адӟем карыны быгато. Кылсярысь, кужымзэс жалятэк, соос вын-агайёслы но сузэр-апайёслы юртто. Соос валало, оскем уж соослы вылтӥяськыны право уг сёты шуыса. Кенешын тӧроос ваньмыныз асьсэды лякытэн возё. (Лыдӟе 1 Фессалоникаослы 2:7, 8.) Соослэн кылъёсысьтызы шӧдӥське зэмос яратон но зӥбыт-востэм сям. Тани мар вера Эндрю, кудӥз кема дыр ӵоже тӧро луыса ужа-тырше ини: «Мон шӧдӥ, тӧро ӟеч сямо но лякыт ке, со вын-агайёслэсь но сузэр-апайёслэсь сюлэмзэс вырӟытэ. Соку соос шумпотыса тӧроослэсь кылзӥсько». Мукетыз кема дыр ӵоже ужам-тыршем тӧро вера: «Мон тыршисько кылзӥськыны визь-кенешлэсь, кудӥз гожтэмын Филиппыослы 2:3. Мон ялан аслым тодам вайытӥсько, мыным мукетъёссэ аслэсьтым умоесьгес шуыса лыдъяно. Со юрттэ мыным, мон мукетъёссэ кужмысь кылзӥськыны медам косы шуыса».
12. Малы тӧроослы туж кулэ зӥбыт-востэм луыны?
12 Тӧроос Иегова сямен зӥбыт-востэм луыны кулэ. Иегова — Вылӥ Кивалтӥсь ке но, со «мыкырске» но «тузон пушкысь куанерез султытэ» (Пс. 112:6, 7; 17:36). Вылтӥяськись адямиос Иеговалы юрӟым пото (Мад. 16:5).
13. Малы тӧроослы кылзэс кортнаны быгатыны кулэ?
13 Иеговалэсь кылзӥськон понна тӧроослы кылзэс кортнаны быгатыны кулэ. Ӧз ке, соос быгатозы вераны мае ке уродзэ, кыӵе ке вын-агай яке сузэр-апай соослы гажамтэзэ возьматӥз ке (Иак. 1:26; Гал. 5:14, 15). Эндрю, кудӥзлэн кылъёсыз вылӥынгес гожтэмын вал ини, вера: «Луылэ сыӵе дыр, куке мыным потэ, вын-агай яке сузэр-апай возьматӥзы, соос монэ, тӧроез кадь, уг гажало шуыса. Сыӵе дыре мынам соосты интыязы пуктэм потэ. Но мон малпаськисько Библиысь оскымон ужась-тыршисьёслэн примеръёссы вылын. Со юрттэ мыным тодам вайыны, макем кулэ котькыӵе учыре зӥбыт-востэм луыны». Тӧроос Иеговалэсь кылзӥськемзэс возьматозы, куке кенешысь вын-агайёсын но сузэр-апайёсын, озьы ик мукет тӧроосын но, лякытэн но яратыса вераськозы (Кол. 4:6).
МАЛЫ АТАЙЁС ДАВИД ЭКСЭЙЛЭСЬ ДЫШЕТСКЫНЫ БЫГАТО
14. Кыӵе уж оскиз Иегова атайёслы но мае со соослэсь возьма?
14 Иегова атайёслы семьялэн йырыз луыны уж оскиз. Со возьма, соос нылпиоссэс будэтозы но дышетозы шуыса (1 Кор. 11:3; Еф. 6:4). Но атайёс кивалтыны правозэс кутыны уг быгато озьы, кызьы асьсэлэн потэ. Иегова — семьялэн кылдытӥсез, соин ик атайёс со азьын кыл куто (Еф. 3:14, 15). Атайёс кивалтыны правозэс Иеговалы ярамон амалэн куто ке, соку соос возьмато, Иеговалэсь кылзӥсько шуыса. Давид эксэйлэн примерез вылын малпаськыса, соос тросэзлы дышетскыны быгато.
Атайлэн вӧсяськонъёсысьтыз зӥбыт-востэм луэмез адӟиськыны кулэ (Учке 15-тӥ но 16-тӥ абзацъёсты.) e
15. Маин Давид эксэй атайёслы умой пример возьматӥз?
15 Иегова Давидлы аслаз семьяезлэн гинэ йырыз луыны ӧз оскы, со солы быдэс Израиль калыклэн йырыз луыны оскиз. Давид эксэйлэн киулаз тросэз оскемын вал. Куддыръя со аслэсьтыз кивалтыны правозэ шонертэм кутылӥз но озьы бадӟым янгышъёс лэсьтылӥз (2 Экс. 11:14, 15). Нош Иеговалэсь тупатэмзэ кабыл басьтыса, со возьматӥз, Иеговалэсь кылзӥське шуыса. Давид вӧсяськыса Иеговалы сюлэмзэ кисьтэ вал но вань кужмысьтыз лэсьтыны тырше вал озьы, кызьы Иегова возьма (Пс. 50:3—6). Со сяна, со пиосмуртъёсын гинэ сётэм визь-кенешъёслэсь ӧз кылзӥськы, озьы ик зӥбытэн кылзӥськиз кышномуртъёсын сётэм визь-кенешъёслэсь но (1 Экс. 19:11, 12; 25:32, 33). Давид аслаз янгышъёсыз вылын дышетскиз. Солэн улоназ Иеговалы ужан-тыршон нырысетӥ интыын вал.
16. Малы атайёс Давид эксэйлэсь дышетскыны быгато?
16 Эскеромы, малы дышетскыны быгато атайёс Давид эксэйлэсь. Эн каре сое, мар карыны право тӥледлы Иегова ӧз сёты. Асьтэлэсь янгышъёстэс валалэ но кылзӥське соослэсь, кинъёс тӥледыз тупато, Библия вылэ пыкиськыса. Тӥлесьтыд зӥбыт-востэм луэмдэс адӟыса, семьяды тӥледыз гажалоз. Семьяеныды вӧсяськыкуды, сюлэмдэс Иеговалы кисьтэ — семьяды мед адӟоз, тӥледлы Иеговалэн юрттэтэз туж кулэ шуыса. Нош валтӥсез — семьяды адӟыны кулэ, Иеговалы ужан-тыршон улонады нырысетӥ интыын шуыса (К. Зак. 6:6—9). Тӥляд умой примерды — со одӥгез тужгес но дуно кузьым, кудзэ тӥ семьядылы кузьманы быгатӥськоды.
МАЛЫ АНАЙЁС МАРИЯЛЭСЬ ДЫШЕТСКЫНЫ БЫГАТО
17. Кыӵе уж оскиз Иегова анайёслы?
17 Иегова анайлы дано уж оскиз но нылпиосыныз кивалтыны право сётӥз (Мад. 6:20). Со, мар каре но вера анай, нылпиезлэн азьпал улоназ шӧдӥськыны быгатэ (Мад. 22:6). Малы сузэръёс дышетскыны быгато Мариялэсь, Иисуслэн анаезлэсь?
18, 19. Малы анайёс Мариялэсь дышетскыны быгато?
18 Мария Священной Гожтэмез туж умой тодэ вал. Со Иеговаез мур гажа но соин матысь кусыпъёссэ юнматэ вал. Мария дась вал Иеговалэсь кылзӥськыны соку но, куке Иеговалэсь кылзӥськыса, солэн улонэз быдэсак воштӥськысал (Лука 1:35—38, 46—55).
Анай жадемын ке яке солэн тани-тани чиданэз быроз, солы туж тыршоно луоз, вылды, семьяезлы яратонзэ возьматон понна (Учке 19-тӥ абзацез.) f
19 Сузэръёс, кызьы тӥ Мариялэсь адӟем карыны быгатӥськоды? Нырысетӥез, Иеговаен кусыпъёстэс юнматыса. Та удысын тӥледлы юрттоз Библиез эскерон но вӧсяськыны дышем сям. Кыкетӥез, Иеговаез шумпоттон понна, дась луэ улонады воштӥськонъёс лэсьтыны. Оло нош, тӥ будӥды семьяын, кудаз анай но атай нылпиосынызы лекен верасько но ӝог вожзэс потто вал. Соин ик тӥ малпаны дышемын, дыр, нылпиосын лекен вераськиды ке, отын номыр уродэз ӧвӧл шуыса. Иеговалэсь нылпи будэтон шоры учкемзэ тодыса но, тӥ шӧдӥськоды, оло, тӥледлы чидась луыны секыт шуыса, тужгес но соку, куке тӥ жадемын, нош нылпиосты уг кылзӥсько (Еф. 4:31). Сыӵе вакытэ тӥледлы тужгес но кулэ Иеговалэсь юрттэтсэ курыны. Лидия нимо сузэр вера: «Куддыръя мыным Иеговаез сюлворыса куроно луэ, со мыным асме киям возьыны мед юрттоз шуыса, куке пие мынэсьтым уг кылзӥськы. Соку мон, веранме но куспетӥ карыса, ас поннам Иеговалы вӧсяськисько. Вӧсяськон мыным буйгатскыны юрттэ» (Пс. 36:5).
20. Кыӵе шуг-секытэн пумисько куд-ог анайёс но кызьы со шуг-секытэз вормыны луэ?
20 Нош куд-ог анайёслы секыт, вылды, нылпиоссылы яратонзэс возьматыны (Тит. 2:3, 4). Оло нош, соос будӥзы семьяосын, кудъёсаз анай-атайёссы но нылпиоссы вискын кусыпъёссы матын ӧй вал. Тӥляд но сыӵе учырды ке, анай-атайды выллем янгыш эн лэсьтэ. Иеговалэсь кылзӥськись кышномурт дышетскыны кулэ аслаз нылпиосызлы яратонзэ возьматыны. Солы секыт, вылды, воштӥськыны: воштыны аслэсьтыз малпанъёссэ, шӧдонъёссэ но ужъёссэ. Но со луонтэм ӧвӧл! Со сяна, со воштӥськиз ке, ачиз гинэ шум уз поты, озьы ик семьяез но шумпотоз.
АЗЬЛАНЯЗ НО КЫЛЗӤСЬКЕ ИЕГОВАЛЭСЬ
21, 22. Исаия 65:13, 14 верамъя, кыӵе милемлы пайда вае Иеговалэсь кылзӥськон?
21 Давид эксэй вала вал, мар быдӟа шумпотон вае Иеговалэсь кылзӥськон. Со гожтӥз: «Кузё-Инмарлэн косонъёсыз шонересь, сюлэмез шулдырто, Кузё-Инмарлэн курон-косонэз дун-чылкыт, синъёсты югдытэ. Тынад ляльчиед соос бордын утиськыса улэ; соосты быдэсъям понна быдӟым луоз медэз-кузьымез» (Пс. 18:9, 12). Туннэ ми туж умой адӟиськомы, Иеговалэсь кылзӥськись адямиос туж пӧртэм луо шуыса соослэсь, кинъёс Иеговалэсь уг кылзӥсько. Соос, кинъёс Иеговалэсь кылзӥсько, «сюлэмзы шумпотыса кырӟалозы». (Лыдӟе Исаиялэсь 65:13, 14.)
22 Тӧроос, атайёс но анайёс Иеговалэсь шумпотыса кылзӥсько ке, со улонзэс шудо каре, яратон но шумпотон вае но кенешысь вын-агайёслэсь но сузэр-апайёслэсь кусыпъёссэс юнматэ. Нош солэсь но кулэезгес — со Иеговаез шумпоттэ (Мад. 27:11). Солэсь но бадӟым шумпотон луыны быгатоз на шат?
123-ТӤ КЫРӞАН Верно следуем теократическому порядку
a Та статьяын ми вераськомы со сярысь, малы кулэ Иеговалэсь кылзӥськыны. Озьы ик ми тодомы, малы дышетскыны быгато тӧроос, атайёс но анайёс — ваньзы, кинъёслы кивалтыны право сётэмын,— Неемия кивалтӥсьлэсь, Давид эксэйлэсь но Мариялэсь, Иисуслэн анаезлэсь.
b ВАЛЭКТОН. «Кылзӥськыны» но «тэрытскыны» кылъёс умойтэм пуштросэн кылъёс кадь пото соослы, кинъёсты кужмысь кылзӥськыны косо. Нош Инмарлэн ужась-тыршисьёсыз асьсэос ужпум кутӥзы солэсь кылзӥськыны, соин ик со кылъёс соослы умойтэм кадь уг пото.
c Куд-ог нимъёс та статьяын воштэмын.
d СУРЕДЪЁСЫН: Тӧро пиеныз ӵош Эксэйлык юртын ужа. Со адӟем каре Неемиялэсь, кудӥз Иерусалимлэсь борддоръёссэ выльысь ӝутонэ пыриськиз.
e СУРЕДЫН: Атай семьяеныз ӵош Иеговалы сюлмысь вӧсяське.
f СУРЕДЫН: Пияш туж кема видео шудонъёсын шудӥз но дораз номыр ӧз ужа но урокъёссэ ӧз лэсьты. Солэн анаез уж дорысьтыз жадьыса ке но бертӥз, пиезлы лякытэн валэктэ, озьы ассэ возьыны уг яра шуыса.