1. Кызьы Иегова зӥбыт-востэм адямиос шоры учке? Валэктэ.

 ИЕГОВА зӥбыт-востэм адямиосты яратэ. Зэмзэ ик зӥбыт-востэм адямиослэн гинэ соин матысь кусыпъёссы луыны быгато. Нош «вылӥ мылкыдоослы Инмар пумит кариське» (1 Пётр 5:5). Милям ваньмылэн потэ, Иегова шум мед потоз но милемыз мед яратоз шуыса, соин ик туж кулэ дышетскыны зӥбыт-востэм луыны.

2. Мае ми эскеромы та статьяын?

² Та статьяын ми эскеромы куинь юанъёсты: 1) Кыӵе со зӥбыт-востэм адями? 2) Малы милемлы дышетсконо зӥбыт-востэм луыны? 3) Кыӵе югдуръёсы милемлы секыт зӥбыт-востэм луыны? Ми тодомы, зӥбыт-востэм луыны дышетскимы ке, ми Иеговалэсь сюлэмзэ шумпоттомы но асьмелы пайда басьтомы шуыса (Мад. 27:11; Ис. 48:17).

3. Кыӵе со зӥбыт-востэм адями?

³ Зӥбыт-востэм адями — со сыӵе адями, кудӥзлэн вылтӥяськон но бадӟымъяськон сямыз ӧвӧл. Кызьы адӟиське Библиысь, зӥбыт-востэм адями умой вала, со Иеговалэсь трослы улӥынгес шуыса. Со тодэ, котькудӥз адями маин ке но солэсь умойгес луэ шуыса (Флп. 2:3, 4).

4, 5. Малы, адями шоры учкыса, уг луы вераны, зӥбыт-востэм адями-а со, ӧвӧл-а?

⁴ Куд-ог адямиос зӥбыт-востэмесь кадь адӟисько, малы ке шуоно соос вордӥськем дырысенызы ик лякытэсь яке пичи дырысенызы ик дышетэмын мукетъёссэ гажаны. Нош сюлэмзы  соослэн туж вылтӥяськись луыны быгатэ. Со, мар соослэн сюлмазы, куке но одно ик кыре потоз (Лука 6:45).

⁵ Озьы ик вань на сыӵе адямиос но, кудъёсыз дӥсьтӥсь кадь адӟисько но верало сое, мар малпало. Но ваньзы соос пӧлысь вылтӥяськисесь ӧвӧл (Иоанн 1:46, 47). Дӥсьтӥсь адямиослы чакласьконо, соос асьсэлэн быгатонлыкъёссылы медаз оскиське но вылтӥяськисесь медаз луэ шуыса. Милям котькыӵе сяммы мед луоз, но ваньмылы асьмелы туж тыршоно зэмзэ ик зӥбыт-востэм адями луыны.

6. 1 Коринфъёслы 15:10 лыдэ басьтыса, малы дышетэ милемыз апостол Павеллэн примерез?

⁶ Учкомы апостол Павеллэсь примерзэ. Иеговалэн кивалтэмез улсын Павел трос каръёсын кенешъёс кылдытӥз. Христослэн апостолъёсыз пӧлысь со ваньмызлэсь трос лэсьтӥз, вылды, ужан-тыршонын. Озьы ке но Павел ассэ мукет вын-агайёслэсь вылӥегес ӧз пукты. Со зӥбытэн вераз: «Мон уго апостолъёс пӧлысь ваньмызлэсь пичиез, апостол шуыса лыдъяны но сылӥсьтэм, малы ке шуоно Инмарлэсь Черксэ улляса ветлӥ» (1 Кор. 15:9). Собере Павел гожтӥз, солэн Иеговаен матысь кусыпъёсыз вал шуыса, малы ке шуоно Иегова солы дэлетсэ-ӟечлыксэ сётӥз, нош аслаз умой сямъёсызлы яке тыршемезлы луыса ӧвӧл. (Лыдӟе 1 Коринфъёслы 15:10.) Кенешысь куд-огъёсыз Павелэз курлазы ке но, Коринфъёслы гожтэтысь адӟиське, со туж умой пример возьматӥз шуыса, кызьы зӥбыт-востэм адями луоно (2 Кор. 10:10).

7. Кызьы асьме вакытысь вын-агай, кудзэ тросэз тодо вал, аслэсьтыз зӥбыт-востэм луэмзэ возьматӥз?

⁷ Карл Клейн нимо агай, кудӥз Кивалтӥсь кенешын ужаз-тыршиз, озьы ик туж умой пример возьматӥз, кызьы зӥбыт-востэм луоно. Аслаз улон сюресэз сярысь гожтыкуз, со зӥбытэн вераз шуг-секытъёс сярысь, кудъёсыныз солы пумиськоно луиз. Кылсярысь,  1922-тӥ арын со нырысетӥзэ коркась корка тодытыны мынӥз. Со солы туж секыт кадь потӥз, соин ик со мукет кык аръёс ӵоже одӥг пол но тодытыны ӧз ветлы ни. Берлогес, куке со Вефильын ужаз-тыршиз ини, со туж вожзэ поттӥз одӥг вын-агайлы, кудӥз солы визь-кенеш сётӥз. Одӥг вакытэ сюлмаськонъёсын сэрен со нервной висёнэн но курадӟиз, но берлогес висёнзэ вормиз. Клейн агайлэн улоназ шуг-секытъёс вал ке но, со трос тунсыко но кулэ луись ужъёсты быдэсъяз. Малпалэ ай, аслаз ляб палъёсыз сярысь ватытэк веран понна макем зӥбыт-востэм адями луоно вал со вын-агайлы, кудзэ тросэз тодо вал! Тросэз шунытэн тодазы ваё Клейн агаез но солэсь сюлэмез вырӟытӥсь улон сюрессэ b.

8. Кызьы 1 Пётрлэн 5:6 кылъёс юртто валаны, ми зӥбыт-востэмесь ке, Иегова солы шумпотэ шуыса?

⁸ Валтӥсез муг, малы милемлы дышетсконо зӥбыт-востэм луыны — озьы ми Иеговаез шумпоттомы. Сое валэктӥз апостол Пётр. (Лыдӟе 1 Пётрлэсь 5:6.) Тани мар верамын Пётрлэн кылъёсыз пумысен «Лыкты но мон сьӧры мын» книгаын (ӟуч): «Вылтӥяськон сям ядлы укша. Со туж кышкыт. Со сям туж быгатӥсь адямиез но Инмарлы пайдатэм каре. Нош зӥбыт-востэм сям адямиез вылӥе ӝутэ. Соку быгатӥсьтэм адями но Иеговалы туж дуно луэ. [...] Иегова Иисусэз зӥбыт-востэм луэмез понна вылӥе ӝутӥз. Тон зӥбыт-востэм луид ке, Иегова тонэ шумпотыса бакель кароз» c. Инмысь Иегова Атаймылэсь сюлэмзэ шумпоттонлэсь номыр умоез ӧвӧл ни! (Мад. 23:15).

9. Малы адямиос кыстӥсько соос доры, кинъёс зӥбыт-востэмесь?

⁹ Ми зӥбыт-востэм луыны тыршиськомы ке, Иегова сяна, асьмеос но шумпотӥськомы, малы ке шуоно адямиос кыстӥсько соос доры, кинъёс зӥбыт-востэмесь. Малы озьы луэ шуыса валан понна, пуктэ асьтэдыз со адямиос интые (Матф. 7:12). Туж ӧжытэзлы кельше, куке кин ке но ас малпамезъя гинэ лэсьтыны тырше, нош мукетъёссэ уг кылзы. Нош милемлы туж кельше, куке вын-агайёс но сузэр-апайёс Библиысь таӵе визь-кенешлэсь кылзӥсько: «Ваньды тӥ... гажаса-жаляса, ог-огдэс яратыса, лякыт сямо луыса, зӥбыт-востэм визьмын улэлэ» (1 Пётр 3:8). Милемлы зӥбыт-востэм адямиос кельшо бере, мукетъёсызлы но кельше, луоз, куке ми асьмеды зӥбыт-востэм возиськомы.

10. Малы зӥбыт-востэм адямиослы шуг-секытъёсысь потыны капчигес?

¹⁰ Зӥбыт-востэм адямиослы шуг-секытъёсысь  потыны капчигес. Куддыръя ми адӟиськомы, улонын шонерлыктэм ужъёс лэсьтӥсько шуыса. Визьмо мурт, Соломон эксэй, вераз: «Адӟи мон вал вылын мынӥсь ляльчиосты, нош кивалтӥсьёс ляльчиос музэн пыдын мыно» (Екк. 10:7). Зэм но, куддыръя быгатӥсь адямиосты уг дунъяло, нош быгатӥсьтэм адямиосты данъяло. Озьы ке но Соломон вала вал, уродэзлы трос саклык висъяно ӧвӧл шуыса, нош шумпотоно со улонлы, кудӥз милям вань (Екк. 6:9). Та удысын ӵапак зӥбыт-востэм сям юрттэ.

11. Кызьы учконо со шоры, куке милемлы визь-кенеш сёто?

¹¹ Котькуд нунал ми пӧртэм сямен зӥбыт-востэм луэммес возьматыны быгатӥськомы. Эскеромы куд-ог луонлыкъёсты. Куке милемлы визь-кенеш сёто. Милемлы тодамы возёно: кин ке но юри дырзэ висъяз но, ми доры лыктыса, визь-кенеш сётӥз ке, соку милям янгышмы малпаммылэсь бадӟымгес, дыр. Нырысь, визь-кенеш сётыкузы, кылзэм ик уг поты но визь-кенеш сётӥсь адямиез курламмы потэ, вылды. Яке милемлы уг кельшы, кызьы со визь-кенеш сётӥз. Нош ми зӥбыт-востэмесь ке, тыршомы со шоры шонер учкыны.

12. Мадёнъёс 27:5, 6 верамъя, малы милемлы тау кароно сётэм визь-кенеш понна? Вералэ пример.

¹² Зӥбыт-востэм адями тау каре, куке солы визь-кенеш сёто. Пуктомы син азямы таӵе югдурез: кенешлэн пумиськонэз кутскон азьын тӥ вераськыса сылӥськоды вын-агайёсын но сузэр-апайёсын. Но тани, кин ке но тӥледыз палэнэ нуэ но вера, тӥляд пинь вискады сиён кылем шуыса. Сое кылыса тӥледлы умойтэм кадь потоз. Но тӥ тау кароды со адямилы, со тӥледлы вераз шуыса. Со сяна, тӥляд потысал, дыр, тӥледлы сое вазьгес мед верасалзы шуыса. Со учырын выллем ик, милемлы зӥбыт-востэм сяммес возьматоно но тау кароно вын-агайёслы но сузэр-апайёслы, кудъёсыз милемлы янгышмес вераны дӥсьтӥзы. Соос милемлы эшъёс, тушмонъёс ӧвӧл. (Лыдӟе Мадёнъёсты 27:5, 6; Гал. 4:16.)

13. Кызьы ми зӥбыт-востэм сяммес возьматыны быгатомы, куке мукетъёсызлы ужан-тыршонын кулэ луись ужез оско?

¹³ Куке мукетъёсызлы ужан-тыршонын туж кулэ ужез оско. «Куддыръя мон тодӥсько ке, мукет вын-агайёслы со яке та ужез оскизы шуыса, мон малпасько: „Нош мон маин уродгес?“»,— вера Джейсон нимо тӧро. Тӥляд но сыӵе шӧдонъёсты кылдылӥзы-а? Номыр уродэз ӧвӧл, тӥ тыршиськоды ке, ужан-тыршонын тӥледлы кулэ луись ужез мед оскозы шуыса (1 Тим. 3:1). Милемлы туж чаклано асьмелэсь малпанъёсмес. Ӧм ке чаклаське, сюлмамы вылтӥяськон сям каръяськыны  быгатоз. Кылсярысь, христиан муртлэн малпанэз кылдыны быгатоз, со сяна, та ужез нокин но быдэстыны уз быгаты ни шуыса. Нош кыӵе ке вын-агайлэн кышноез малпаны быгатоз: «Мынам картэ та ужез умойгес быдэстыны быгатоз, мукет вын-агай сярысь». Ми зэмзэ ик зӥбыт-востэм адямиос ке, ми озьы ноку но ум малпалэ.

14. Кызьы учкиз Моисей со шоры, куке мукетъёсызлы ужан-тыршонын кулэ луись ужъёсты оскылӥзы? Малы со милемыз дышетэ?

¹⁴ Тодамы ваёмы, кызьы учкиз Моисей со шоры, куке мукетъёсызлы ужан-тыршонын кулэ луись ужъёсты оскылӥзы. Иегова солы нимысьтыз уж оскиз — израиль калыклэн азьветлӥсез луыны. Моисей сое туж дунъяз. Нош кызьы Моисей учкиз со шоры, куке Иегова мукет пиосмуртъёсты солы юрттӥсьёс кариз? Со ӧз вожа (Лыд. 11:24—29). Со зӥбыт-востэм луэмзэ возьматӥз, куке лэзиз, мукетъёсыз солы суд ужъёсты сэрттыны-пертчыны мед юрттозы шуыса (Пот. 18:13—24). Солы луыса Израильын тросгес пиосмуртъёс суд ужъёсты сэрттыны-пертчыны быгатӥзы, соин ик адямиослы ужпум кутэмзэс кема возьмано ӧй вал ни. Кызьы адӟиське, Моисей аслаз интыез сярысь ӧз, нош мукет адямиос сярысь сюлмаськиз. Макем умой пример! Иеговалэн ужаз пайдаё луэммы потэ ке, ойдолэ тодамы возёмы: быгатонлык сярысь, тужгес но кулэ зӥбыт-востэм сям. Библиын верамын, «Кузё-Инмар вылӥын» шуыса, озьы ке но со «зӥбыт-востэм улӥсьёслы дэлет сётэ» (Пс. 137:6; 1 Пётр 5:5).

15. Кыӵе воштӥськонъёсын пумиськизы тросэз вын-агайёс но сузэр-апайёс?

¹⁵ Куке улонын воштӥськонъёс луо. Берпум аръёсы вын-агайёслы но сузэр-апайёслы, кудъёсыз Иеговалы трос аръёс ӵоже ужазы-тыршизы ини, выль уж оскизы. Кылсярысь, 2014-тӥ арын улосэз чакласьёслы но соослэн кышнооссылы вань дырез сётыса ужан-тыршонлэн мукет удысаз тыршыны ӵектӥзы. Со арын ик ужпум кутэмын вал, ёросэз чакласьёслы 70 арес тырмиз ке, соос ёросэз чаклась луэмысь дугдозы шуыса. Нош тӧроослэн кенешсылэсь  ужзэ радъясь аслэсьтыз ужзэ нуэмысь дугдоз, куке солы 80 арес тырмоз. Со сяна, берпум дыре троссэ Вефильын ужась-тыршисьёсты пионерен ужаны-тыршыны ыстӥзы. Нош кинлы ке но вань дырзэ сётыса ужамысь-тыршемысь дугдоно луиз, малы ке шуоно тазалыкез уродмиз, семьяезлы юрттэт кулэ луиз яке мукет мугъёсын сэрен.

16. Кызьы вын-агайёс но сузэр-апайёс зӥбыт-востэм луэмзэс возьматӥзы, куке улоназы воштӥськонъёс луизы?

¹⁶ Со вын-агайёслы но сузэр-апайёслы сыӵе воштӥськонъёс капчиен ӧз сётӥське, малы ке шуоно соос асьсэлэсь ужан-тыршонзэс туж ярато вал, нош куд-огез соос пӧлысь ужан-тыршонзылы трос аръёс сӥзизы. Куд-огъёсыз туж куректӥзы, куке соослы яратоно ужан-тыршонзэс кельтоно луиз. Нош дыр ортчыса, соос дышизы выль югдуръёссылы. Мар соослы юрттӥз? Нырысь ик, Инмарез яратон. Соос улонзэс сӥзизы Иеговалы, кыӵе ке ужлы ӧз. Со христианъёс ӧз вералэ, Инмарлы ужалозы-тыршозы шуыса соку гинэ, куке Инмар соослы кыӵе ке нимысьтыз уж оскоз (Кол. 3:23). Соос зӥбытэн но шумпотыса быдэсто со ужез, кудзэ Иегова соослы оске. Соос сюлмаськонъёссэс Инмар кие сётӥзы, малы ке шуоно соос тодо, Иегова соос сярысь сюлмаське шуыса (1 Пётр 5:6, 7).

17. Малы ми Инмарлы тау кариськомы, солэн Кылыз зӥбыт-востэм луыны мылкыдмес ӝутэ шуыса?

¹⁷ Ми Иеговалы туж тау кариськомы, малы ке шуоно солэн Кылыз милесьтым мылкыдмес ӝутэ зӥбыт-востэмесь луыны. Ми зӥбыт-востэмесь ке, со мукетъёсызлы но, милемлы но пайда вае. Со сяна, милемлы капчигес шуг-секытъёсысь потыны. Нош тужгес но кулэез — зӥбыт-востэм сямлы луыса милям инмысь Атаенымы кусыпъёсмы юнмало. Макем ми шумпотӥськомы, «Ӝужыт, Вылӥе Ӝутэм» Иегова Инмар аслэсьтыз зӥбыт-востэм ужась-тыршисьёссэ дунъя шуыса! (Ис. 57:15).