ЭСКЕРОН ПОННА СТАТЬЯ 38
«Лыктэлэ Мон доры, Мон тӥледыз буйгато»
«Ваньды курадӟыса, шугадӟыса улӥсьёс, лыктэлэ Мон доры, Мон тӥледыз буйгато» (МАТФ. 11:28).
17-ТӤ КЫРӞАН Мылкыд юрттыны вань
ТА СТАТЬЯЫН a
1. Матфейлэсь 11:28—30 верамъя, кыӵе оскытон сётӥз Иисус?
ТАНИ кыӵе умой оскытон сётӥз Иисус сое кылзыны люкаськем адямиослы: «Лыктэлэ Мон доры, Мон тӥледыз буйгато». (Лыдӟе Матфейлэсь 11:28—30.) Со кылъёс гинэ ӧй вал. Малпалэ, кылсярысь, мар со кариз кышномуртлы, кудӥз секыт висёнэн курадӟиз.
2. Мар кариз Иисус секыт висёнэн курадӟись кышномуртлы?
2 Со кышномуртлы туж юрттэт кулэ вал. Эмъяськыны турттыса, со трос эмъясьёс доры вуылӥз. Дас кык ар ортчиз, нош со озьы ик висе на. Законъя со кышномурт кырсь шуыса лыдъяськиз (Лев. 15:25). Тани со кылэ, Иисус висисьёсты бурмытъяны быгатэ шуыса, соин ик со доры мынэ. Куке кышномурт Иисусэз шедьтэ, со Иисуслэн дӥсянэзлэн сӧзы бордаз йӧтӥське но — соку ик бурме! Кышномуртэз эмъям сяна, Иисус солы тросгес лэсьтӥз. Со соин лякытэн вераськиз но гажаса сое «нылмурт» шуыса нимаз. Озьы со юрттӥз кышномуртлы выльысь шӧдыны, сое гажало но ярато шуыса. Веранэз ӧвӧл, ваньмыз со буйгатӥз кышномуртэз но азьланяз улыны кужым сётӥз (Лука 8:43—48).
3. Кыӵе юанъёслы валэктонъёсты ми та статьяысь шедьтомы?
3 Кышномурт ачиз Иисус доры лыктӥз. Со солы капчи ӧй вал. Озьы ик туннэ но: Иисус доры лыктон понна кужым пононо луэ. Асьме дыре Иисус уг эмъя паймымон амалэн со доры лыктӥсь адямиослэсь висёнъёссэс. Озьы ке но, туннэ но со ӧте: «Лыктэлэ Мон доры, Мон тӥледыз буйгато». Та статьяысь ми шедьтомы вить юанъёслы валэктонъёсты: кызьы Иисус доры лыктоно? Мае верамез потэ вал Иисуслэн «Мынэсьтым зӥбетме вылады басьтэлэ» кылъёсын? Малы ми солэсь дышетскыны быгатӥськомы? Малы Иисусэн сётэм уж милемлы буйгатскон вае? Мар юрттоз милемлы азьланяз но буйгатскон шедьтыны, Христослэн зӥбетэз улын тыршыса?
«ЛЫКТЭЛЭ МОН ДОРЫ»
4, 5. Кызьы ми Иисус доры лыктыны быгатӥськомы?
4 Кызьы Иисус доры лыктоно? Одӥгез луонлык — пыр-поч эскероно сое, малы со дышетӥз но кызьы ассэ возиз (Лука 1:1—4). Ми интые сое нокин но уз кары, сое милемлы асьмелы эскероно. Озьы ик ми Иисус доры лыктӥськомы, куке пылатӥськыны но солэн дышетскисьёсыз луыны ужпум кутӥськомы.
5 Мукетыз луонлык Иисус доры лыктыны — кенешысь тӧроослы, юрттэт курыса, вазиськыны. Та «саламъёсты-кузьымъёсты», яке тӧроосты, Иисус аслаз ыжъёсыз понна сюлмаськыны уже кутэ (Еф. 4:7, 8, 11; Иоанн 21:16; 1 Пётр 5:1—3). Ми асьмеос тӧроослэсь юрттэт курыны кулэ, малы ке шуоно тӧроос уг тодо, мар ми малпаськомы но мар милемлы кулэ. Тани мар вераз Джулиан нимо агай: «Висеменым сэрен мыным Вефильын ужан-тыршонме кельтоно луиз. Одӥг эше визь-кенеш сётӥз тӧроослы вазиськыны но курыны, соос мон доры мед лыктозы но монэ мед буйгатозы шуыса. Нырысь мон малпай, со мыным кулэ ӧвӧл шуыса. Нош берлогес мон тӧроослэсь юрттэтсэс кури. Мон малпасько, дуно кузьымъёс пӧлысь со одӥгез тужгес но умой кузьым вал шуыса». Инмарлы оскымон тӧроос, соосыз кадь, кудъёсыз Джулианэз юнматӥзы, юртто милемлы валаны-тодыны Христослэсь визьзэ, яке валаны, кызьы Христос малпаське (1 Пётр 2:21; 1 Кор. 2:16). Со зэмзэ но одӥгез дуно кузьым, кудзэ соос милемлы кузьманы быгато.
«МЫНЭСЬТЫМ ЗӤБЕТМЕ ВЫЛАДЫ БАСЬТЭЛЭ»
6. Мае верамез потэ вал Иисуслэн «Мынэсьтым зӥбетме вылады басьтэлэ» кылъёсын?
6 «Мынэсьтым зӥбетме вылады басьтэлэ» кылъёсын Иисуслэн верамез потэ вал, вылды: «Мынэсьтым кылзӥське». Озьы ик со кылъёсын Иисус, оло, малпа вал вераны: «Монэн ӵош мынам зӥбет улам султэ но ми ӵош Иеговалэсь ужзэ быдэстомы». Кызьы гинэ медаз луы, зӥбет кыл татын возьматэ, Иеговалы ужан-тыршон понна милемлы кужым поныны кулэ шуыса.
7. Матфейлэсь 28:18—20 верамъя, кыӵе уж милемлы оскемын но малы ми оскыны быгатӥськомы?
7 Ми Иисуслэн ӧтёнэзлы вазиськиськомы, куке улонмес Иеговалы сӥзиськомы но пылатӥськиськомы. Иисус котькинэ ӧте — со ноку но кулэтэм уз кары сое, кинлэн вань сюлмысьтыз Инмарлы ужамез-тыршемез потэ (Иоанн 6:37, 38). Котькуд христиан муртлы дан сётэмын — солэн луонлыкез вань пыриськыны уже, кудзэ Иегова Иисуслы сётӥз. Ми оскыны быгатӥськомы, Христос котьку милемын луоз шуыса, та ужез быдэстыны юрттон понна. (Лыдӟе Матфейлэсь 28:18—20.)
«МЫНЭСЬТЫМ ДЫШЕТСКЕ»
Иисуслэсь адӟем карыса, мукетъёсызлы буйгатскон вае (Учке 8—11-тӥ абзацъёсты.) b
8, 9. Малы зӥбыт-востэм адямиос Иисус доры кыстӥськизы? Кыӵе юанъёсты умой луоз аслыд сётыны?
8 Зӥбыт-востэм адямиос Иисус доры кыстӥськизы (Матф. 19:13, 14; Лука 7:37, 38). Малы? Малы ке шуоно Иисус туж пӧртэм вал фарисейёслэсь. Религиозной кивалтӥсьёс мукет адямиосты уг ярато но вылтӥясько вал (Матф. 12:9—14). Нош Иисус лякыт но зӥбыт-востэм вал. Фарисейёс данъямез яратӥзы но, вылӥ инты басьто шуыса, вылтӥяськизы. Иисус вераз, сыӵе луыны умой ӧвӧл шуыса. Со дышетӥз аслэсьтыз дышетскисьёссэ зӥбыт-востэмесь луыны но дась луыны мукетъёсызлы юрттӥськыны (Матф. 23:2, 6—11). Фарисейёс адямиосты кышкатыса но кужмысь кылзӥськыны косыса возизы (Иоанн 9:13, 22). Иисус ӟеч кылъёсын но ужъёсын мукет адямиосты буйгатылӥз.
9 Адӟем кариськоды-а тӥ Иисуслэсь? Юалэ асьтэлэсь: «Лыдъяло-а монэ зӥбыт-востэм адямиен? Дась-а мон мукетъёсызлы юрттӥськыны но адскисьтэм, дано луисьтэм ужез быдэстыны? Мукетъёсыныз асме лякытэн-а возисько?»
10. Кызьы адямиос асьсэды Иисус вӧзын шӧдо вал?
10 Иисус быгатэ вал карыны озьы, солэн дышетскисьёсыз асьсэды капчиен мед шӧдозы но номырлэсь медаз кышкалэ шуыса. Со шумпотыса соосты дышетэ вал (Лука 10:1, 19—21). Иисус дышетскисьёсызлэсь мылкыдзэс ӝутэ вал юанъёс сётъяны. Солэн тодэмез потэ вал, мар соос малпало (Матф. 16:13—16). Иисуслэн дышетскисьёсыз, теплицаысь будосъёс сямен, сяськаськизы. Соос пыӵато вал ваньзэ, малы соосты Иисус дышетӥз но емышъёс ваё вал — ӟеч ужъёс.
Небытэсь но лякытэсь луэ
Ужан-тыршонэ мылысь-кыдысь пыриське
Зӥбыт-востэмесь луэ но ужез яратэ c
11. Мае аслэсьтыд юано?
11 Оскемын-а тӥледлы кивалтон уж? Оскемын ке, юалэ асьтэлэсь: «Кызьы мон асме мукетъёсыныз возисько уж дорын яке дорам? Тыршисько-а мон мукетъёсыныз тупаса улыны? Капчи-а мон доры юанэн вазиськыны? Кылзӥсько-а мон мукетъёссэ, куке соос асьсэлэсь малпанзэс верало?» Ойдолэ ум луэ фарисейёс кадь, кудъёсыз вожзэс поттылӥзы, куке соослы юанъёс сётъязы, но кудъёсыз ултӥязы соослэсь пӧртэм учконъёсын адямиосты (Марк 3:1—6; Иоанн 9:29—34).
«КАНЬЫЛАН ШЕДЬТОДЫ»
12—14. Малы уж, кудзэ милемлы Иисус сётӥз, буйгатскон вае?
12 Малы уж, кудзэ милемлы Иисус сётӥз, буйгатскон вае? Мугъёс трос. Тани куд-огъёсыз гинэ.
13 Милям самой умой кивалтӥсьёсмы. Иегова самой Вылӥ Кивалтӥсь ке но, со ассэ ноку но лек кивалтӥсь кадь уг возьы, кудӥз аслаз ужасьёсызлы тау уг кары. Со милесьтым ужмес туж дунъя (Евр. 6:10). Иегова кужым сётэ, ми солэсь оскем ужзэ быдэстыны мед быгатомы шуыса (2 Кор. 4:7; Гал. 6:5). Милям Иисус эксэймы умой пример возьматӥз, кызьы асьмеды мукетъёсыныз возёно (Иоанн 13:15). Нош тӧроос адӟем каро Иисуслэсь, «быдӟым Возьмасьлэсь» (Евр. 13:20; 1 Пётр 5:2). Милемыз утьыкузы но дышетыкузы, соос тыршо лякытэсь, кышкасьтэмесь луыны но милемыз юнматыны.
14 Милям самой умой эшъёсмы. Нокинлэн но, милям сяна, ӧвӧл ни сокем яратӥсь эшъёссы но сокем кулэ луись ужзы. Малпалэ ай: милемлы шуд усиз валче пельпум ужаны адямиосын, кудъёсыз Инмарлэн вылӥ эсэпъёсызъя уло, но соос уг вылтӥясько. Соос туж быгатӥсесь, но со дыре ик зӥбыт-востэмесь но асьсэды мукетъёсызлэсь вылӥе уг пукто. Соос ми шоры ӵош ужасьёссы шоры кадь гинэ уг учко, нош асьсэлэн эшъёсынызы лыдъяло. Соос милемыз туж ярато но дась асьсэлэсь улонзэс но ми понна сётыны!
15. Кыӵе милям шӧдонъёсмы кылдо, куке милемлы сётэм ужез быдэстӥськомы?
15 Милям самой умой ужмы. Ми адямиосты Иегова сярысь зэмлыклы дышетӥськомы но Шайтанлэсь пӧяськемзэ шараяськомы (Иоанн 8:44). Шайтан адямиосты пӧя, соин сэрен адямиослэн азьланезлы осконзы быре. Кылсярысь, солэн потэ, ми мед оскомы, Иегова милемыз ноку но простить уз кары но уз яраты шуыса. Макем та пӧяськон адямиослэсь улонзэс секыт каре! Зэмзэ верано ке, куке ми Христос доры лыктӥськомы, милям сьӧлыкъёсмы куштӥсько. Нош Иегова котькудмес туж яратэ (Рим. 8:32, 38, 39). Ми туж бадӟым шумпотон басьтӥськомы, адямиосты Иеговалы оскиськыны дышетыса! Нош макем бадӟым шумпотон вае, куке адӟиськомы, кызьы адямиослэн улонзы умой пала воштӥське!
МАР ЮРТТОЗ МИЛЕМЛЫ АЗЬЛАНЯЗ НО БУЙГАТСКОН ШЕДЬТЫНЫ
16. Маин ныпъет, кудзэ Христос милемлы нуыны ӵектэ, пӧртэм луэ мукет ныпъетъёслэсь?
16 Ныпъет, кудзэ Христос милемлы нуыны ӵектэ, пӧртэм луэ мукет ныпъетъёслэсь. Кылсярысь, быдэс нунал уж дорын ужамзы бере тросэз адямиос асьсэды жадемен гинэ уг шӧдо, нош озьы ик туж шудтэмен шӧдо. Нош Иеговалы но Иисуслы ужаса, ми бадӟым шумпотон басьтӥськомы. Куддыръя ми уж дорын туж жадиськомы но асьмеды кужмысь косӥськомы кенешлэн пумиськоназ мыныны. Нош пумиськон бере дорамы бертыса, ми шӧдӥськомы, милям выльысь кужыммы потӥз шуыса. Сое ик вераны луоз тодытон уж но ас поннад Библиез дышетон сярысь. Куке ми кужыммес понӥськомы ужаны-тыршыны мынон понна яке ас поннад Библиез дышетон ортчытон понна, милям мылкыдмы ӝутске но выль кужыммы потэ.
17. Мае милемлы кулэ валаны но мае бырйыны?
17 Милемлы валаны кулэ, милям кужыммы быре шуыса. Соин ик быръёно, кытчы ми кужыммес быдтомы. Кылсярысь, ваньбур люкамы ке, кужыммес юнме быдтомы. Тодады вае Иисуслэсь узыр егит адямиен вераськемзэ, кудӥз юаз Иисуслэсь: «Быронтэм улонэз басьтон понна мон мар карыны кулэ?» Та пиосмурт Законэз быдэсъя вал ини. Со умой адями вал, шӧдске, малы ке шуоно Марклэсь ӟеч иворын верамын, со Иисуслэн сюлмаз кельшиз шуыса. Иисус ӵектӥз солы: «Мын, маид вань, ваньзэ вуза... лыкты но... Мон сьӧры мын». Егит адямилэн Христослэн дышетскисез луэмез потэ вал, но «бадӟым юртъерзэ» кельтэмез ӧз поты (Марк 10:17—22). Озьы со пумит луиз ас вылаз басьтыны Иисуслэсь ӵектэм зӥбетсэ но узырлык-байлыклэн ляльчиез луыса ик кылиз (Матф. 6:24). Нош мае тӥ бырйысалды?
18. Мар милемлы дырын-дырын кароно но малы?
18 Умой луысал дырын-дырын эскерыны, мар улонамы валтӥсез луэ. Малы? Валан понна, ми кужыммес юнме ум быдтӥське шуыса. Тани мар вера Марк нимо егит вын-агай: «Трос аръёс ӵоже мон малпай, огшоры улӥсько шуыса. Мон пионер луыса ужасько-тыршисько вал, но ялан малпаськылӥ, кызьы умойгес улыны кутсконо. Мон уг валаськы вал, малы мон шумпотон уг басьтӥськы. Собере мон валай, вань кужымме аслым быдтӥсько шуыса, нош Иеговалы кылемез гинэ сюре». Марк мукет сямен малпаськыны кутскиз но аслэсьтыз улонзэ воштӥз, Иеговалы тросгес ужан-тыршон понна. «Куддыръя мон коньдон сярысь малпаськисько,— шуэ Марк,— но Иегова но Иисус юртто мыным вань саклыкме ужан-тыршонлы висъяны».
19. Малы туж кулэ ужан-тыршон шоры шонер учкыны?
19 Иисуслэн зӥбетэз улын улыса, азьланяз но буйгатскон шедьтон понна куинь визь-кенешъёслэсь кылзӥськоно. Нырысетӥез — ужан-тыршон шоры шонер учке. Ми Иеговалэсь ужзэ быдэстӥськомы, соин ик милемлы быдэстоно сое озьы, кызьы солэн потэ. Ми — ужасьёс, нош Иегова — милям Кузёмы (Лука 17:10). Солэсь ужзэ ас малпаммыя лэсьтыны тыршимы ке, улонмес гинэ секыт каромы. Ми зӥбет улысь ош выллем луомы, кудӥз ваменъяське но уг мыны отчы, кытчы кузёез нуэ. Сыӵе ош кужмо ке но, солэн кужмыз ӝог быроз но ассэ вӧсь кароз. Ми Иеговалэсь кылзӥськиськомы ке, луонтэмзэ но лэсьтыны быгатомы но котькыӵе шуг-секытъёсты вормомы. Тодады возе: нокин но уз быгаты люкетыны Иеговалы аслэсьтыз эриксэ быдэстыны! (1 Иоанн 4:4; Рим. 8:31).
20. Мар милесьтым мылкыдмес ӝутыны кулэ Христослэсь зӥбетсэ выламы басьтыны?
20 Кыкетӥез — шонер мылкыдын лэсьтэ. Милям ужпуммы — яратӥсь Атаймес, Иеговаез, данъяны. Нырысетӥ даурын вал кӧттырмостэм адямиос, кудъёсыз Иисус доры, асьсэлы пайда утчаса, лыкто вал. Но ӝоген соослэн мылкыдзы куашказ но, соос пумит луизы Христослэсь зӥбетсэ вылазы басьтыны (Иоанн 6:25—27, 51, 60, 66; Флп. 3:18, 19). Нош соос, кинъёс Инмарез но матысьёссэс зэмзэ ик ярато вал, музъем вылын вань улытозязы Христослэн зӥбетэз улын шумпотыса тыршизы но оскизы, асьсэлэсь ужзэс инмын азьланьтозы шуыса. Милям но мылкыдмы шонер ке, ми но Христослэн зӥбетэз улын шумпотыса ужаломы-тыршомы.
21. Матфейлэсь 6:31—33 верамъя, малы ми оскыны быгатӥськомы?
21 Куинетӥез — осконэн улэ. Ми ужпум кутӥмы тросэзлэсь куштӥськыны но вань кужмысьтымы Инмарлы ужаны-тыршыны. Иисус азьло ик вераз вал, милемыз уйылозы-уллялозы шуыса. Но ми оскыны быгатӥськомы, Иегова милемлы кужым сётоз, ми котькыӵе шуг-секытъёсты вормыны мед быгатомы шуыса. Макем тросгес ми чидаськомы, сокем юнгес ми луиськомы (Иак. 1:2—4). Озьы ик ми оскыны быгатӥськомы, Иегова милемлы ваньзэ кулэзэ сётоз шуыса, Иисус милям возьмасьмы луоз шуыса но вын-агайёсмы но сузэр-апайёсмы шуг-секытъёс дыръя милемыз уз куштэ шуыса. (Лыдӟе Матфейлэсь 6:31—33; Иоанн 10:14; 1 Фес. 5:11.) Милям зэмзэ ик ваньмыз вань, ми пумозяз чиданы мед быгатомы шуыса!
22. Мар понна ми шумпотӥськомы?
22 Кышномуртлы, кудзэ Иисус бурмытӥз, соку ик капчи луиз ке но, кема дыр ӵоже буйгатскон шедьтон понна, солы кулэ вал Христослэн дышетскисез луыны. Малпалэ: со кышномурт Христослэсь зӥбетсэ вылаз басьтыны соглаш луиз ке, али со инмын ужа-тырше ини! Со зэмзэ ик Христослэн оскымон дышетскисез луиз ке, кыӵе гинэ кужым солы пононо медаз луы, бакель каронъёс, кудзэ со басьтӥз, трослы бадӟымгес. Милям котькыӵе осконмы мед луоз — пырак дауръёс ӵоже улыны инмын-а, музъем вылын-а, ми туж шумпотӥськомы, Иисуслэн «Лыктэлэ Мон доры» ӧтёнэзлы вазиськимы шуыса.
13-ТӤ КЫРӞАН Христослэсь адӟем кариськомы
a Иисус ӧте асьмеды ас дораз лыктыны. Мар кароно, солэн ӧтёнэзлы вазиськон понна? Та статья юрттоз милемлы та юанлы валэктон шедьтыны. Озьы ик со тодамы вайытоз, кызьы ми буйгатскон шедьтыны быгатомы, Христосэн ӵош ужаса.
