1. Кыӵе югдуре шедиз апостол Иоанн нырысетӥ даурлэн пумаз?

 АСЬМЕ вакытысь нырысетӥ даурлэн пумаз апостол Иоанн туж секыт югдуре шедиз. Со келямын вал Патмос шормуӵе. Со вакытэ Иоанн арлыдо адями вал но музъем вылын улӥсь апостолъёс пӧлысь берпуметӥез вал, вылды (Усьт. 1:9). Иоанн тодэ вал, зэмос йыбырттонлэсь палэнскемъёс, кенешъёслэсь визьзэс тугаса, люкиськонъёс ваё вал шуыса. Со дыре зэмос христианъёс тани-тани бырозы кадь потыны быгатэ вал (Иуда 4; Усьт. 2:15, 20; 3:1, 17).

2. Усьтӥськон 7:9—14 верамъя, кыӵе адӟон адӟе Иоанн? (Учке вылбамысь суредэз.)

² Сыӵе секыт югдурын Иоанн азьпалан луоноез сярысь паймымон адӟон адӟе. Со адӟе, кызьы кылчинъёслы косэмын вал бадӟым куректонлэсь куашкатӥсь тӧлъёссэ кутыса возьыны со дырозь, куке Инмарлэн ляльчиосыз печатен пусъемын уз луэ (Усьт. 7:1—3). Печатен пусъемъёс — со 144 000 адямиос, кудъёсыз Иисусэн ӵош инмын кивалтозы (Лука 12:32; Усьт. 7:4). Собере Иоанн вера мукет адямиос сярысь: «Туж-туж трос калык, соосты нокин но лыдъяны ӧз быгаты. Вань выжыос, калыкъёс, пӧртэм кылын вераськисьёс, улыос-бечеос пӧлысь вал соос; престол азьын, Ыжпи азьын сыло». (Лыдӟе Усьтӥськонэз 7:9—14.) Макем шумпотӥз, вылды, Иоанн, куке тодӥз, азьланяз туж трос адямиос Инмарлы шонер йыбыртъялозы шуыса!

3. а) Малы Иоаннлэн адӟонэз милесьтым осконмес юнматэ? б) Мае ми эскеромы та статьяын?

³ Веранэз ӧвӧл, та адӟон Иоаннлэсь осконзэ юнматӥз. Нош эшшо но золгес та адӟон милесьтым осконмес юнматоз, малы ке шуоно ми улӥськомы ӵапак та адӟон быдэсмон вакытэ!  Ми ас синмынымы адӟиськомы, кызьы люкасько трос миллион адямиос, кудъёсызлэн осконзы вань бадӟым куректон пыр потыны но музъем вылын пырак дауръёс ӵоже улыны. Та статьяысь ми тодомы, кызьы Иегова 80 ар талэсь азьло аслаз калыкезлы ивортӥз, кин луоз со туж-туж трос калык. Собере ми эскеромы со туж-туж трос калыклэсь кык аспӧртэмлыкъёссэ: 1) макем солэн лыдыз бадӟым но 2) макем пӧртэм калык отчы пыре. Таӵе эскерон юнматоз осконзэс ваньмызлэсь, кин пыроз со калык пӧлы.

4. Мае уг валало христиан черкъёс но маин соослэсь пӧртэм вал Библиез Эскерисьёс?

⁴ Библиын валамон верамын ке но, Инмарлэсь кылзӥськись адямиос музъем вылын пырак дауръёс ӵоже улозы шуыса, христиан черкъёс туннэ солы уг дышето (2 Кор. 4:3, 4). Тросэз христиан черкъёс дышето, вань умой адямиос кулэм беразы инме тубо шуыса. Нош Библиез Эскерисьёс b, кудъёсыз XIX даурлэн пумаз «Возьмаськон башня» журналэз поттыны кутскизы, солы ӧз дышетэ. Соос валазы, Инмар музъемез выльысь райлы пӧрмытоз но трос миллион солэсь кылзӥськись адямиос инмын уз, нош татын, музъем вылын, улозы шуыса. Нош валан понна, кинъёс со Инмарлы кылзӥськись адямиос луозы, дыр кулэ луиз (Матф. 6:10).

5. Мае валазы Библиез Эскерисьёс 144 000 адями сярысь?

⁵ Библиез Эскерисьёс озьы ик валазы, куд-ог адямиос музъем вылысь басьтэмын луозы шуыса Иисусэн ӵош инмын кивалтон понна (Усьт. 14:3). Соос пӧлы пырыны кулэ вал 144 000 сюлмысь тыршись христианъёс, кудъёсыз музъем вылын Инмарлы оскымон ужазы-тыршизы. Нош мар вераны луоз туж-туж трос калык сярысь?

6. Мар малпало вал Библиез Эскерисьёс туж-туж трос калык сярысь?

⁶ Аслаз адӟоназ Иоанн адӟиз, туж-туж трос калык «престол азьын, Ыжпи азьын» сылэ шуыса (Усьт. 7:9). Соин ик Библиез Эскерисьёс малпазы, туж-туж трос калык но, 144 000 кадь ик, инмын улоз шуыса. Нош маин соку, соос малпамъя, 144 000 пӧртэм вал туж-туж трос калыклэсь? Библиез Эскерисьёс малпало вал, туж-туж трос калык пӧлы пырозы шуыса со адямиос, кудъёсыз, музъем вылын улыкузы, Инмарлы быдэсак оскымон ӧй вал. Со адямиос Библиысь вылӥ эсэпъёсъя улӥзы ке но, соос пӧлысь куд-огъёсыз христиан черкъёсы пыро на вал, вылды. Библиез Эскерисьёслэн малпамзыя, туж-туж трос калык Инмарез яратэмзэ возьматыны тыршиз ке но, Иисусэн ӵош инмын кивалтон понна со тырмыт ӧй вал. Нош со адямиослэн Инмарез яратонзы ляб бере, соин ик соослы престол вылын пуконо ӧвӧл, нош престол азьын сылоно.

7. Библиез Эскерисьёс малпамъя, Христос сюрс ар ӵоже кивалтон дыръя кин музъем вылын улыны кулэ вал? Мар соос малпало вал оскымон пиосмуртъёс сярысь, кудъёсыз вашкала дыръя улӥзы?

⁷ Нош кин соку, Библиез Эскерисьёс малпамъя, музъем вылын улыны кулэ вал? Библиез Эскерисьёс малпало вал: куке 144 000 но туж-туж трос калык инме люкамын луозы, трос миллион адямиослы луонлык сётэмын луоз музъем вылын улыны но Христослэн сюрс ар ӵоже кивалтонэзлэсь бакель каронъёссэ адӟыны. Библиез Эскерисьёслэн малпамзыя, со адямиослы, Иисус кивалтыны кутскытозь, Иеговалы одно ик ужано-тыршоно ӧй вал шуыса. Соку малпало вал, со адямиос Христос сюрс ар ӵоже кивалтон дыръя Инмарлэн законъёсызлы дышетэмын луозы шуыса. Собере соос, кинъёс Иеговалэн эсэпъёсызъя улыны кутскизы, музъем вылын пырак дауръёс ӵоже улыны быгатозы, нош кинъёс ӧз,— бырозы. Со сяна, Библиез  Эскерисьёс малпало на вал, соослы, кинъёс со вакытэ «кивалтӥсь карыса... быдэс музъем вылэ» пуктэмын луозы, Христослэн сюрс ар ӵоже кивалтонэзлэн пумаз кыӵе ке амалэн инмын улыны луонлык сётэмын луоз шуыса (Пс. 44:17). Малпало вал, соос пӧлын луозы шуыса Инмарлы оскымон пиосмуртъёс, кудъёсыз Христослэн кулэмезлэсь азьвыл кулӥзы но кудъёсыз улӟытэмын луозы.

8. Кыӵе куинь группаосты висъяло вал Библиез Эскерисьёс?

⁸ Озьыен, Библиез Эскерисьёс малпало вал, куинь группа луоз шуыса: 1) 144 000, кудӥз Иисусэн инмын кивалтыны кулэ; 2) туж-туж трос калык, кудӥзлэн Иеговалы яратонэз лябгес вал но кудӥз инмын «престол азьын, Ыжпи азьын» сылыны кулэ; 3) трос миллион адямиос, кудъёсыз Христос сюрс ар ӵоже кивалтыку Иеговалэн законъёсызлы дышетэмын луозы c. Но берлогес Иегова юрттӥз Библиез Эскерисьёслы та юанэз умойгес валаны (Мад. 4:18).

9. а) Кызьы валано, туж-туж трос калык музъем вылын «престол азьын, Ыжпи азьын» сылэ шуыса? б) Малы со, кызьы валэктэмын Усьтӥськонысь 7:9 кылъёс, туж валамон луэ?

⁹ 1935-тӥ арын Иеговалэн Адӟись-Ивортӥсьёсыз умой валаны кутскизы, кинъёс со Иоаннлэн адӟонысьтыз туж-туж трос калык. Соос валазы, «престол азьын, Ыжпи азьын» сылон понна туж-туж трос калыклы инмын луоно ӧвӧл шуыса. Музъем вылын улыса но, туж-туж трос калык «престол азьын» сылыны быгатэ. Со понна соглаш луыны кулэ, Иегова — Быдэс Дуннелэн кивалтӥсез шуыса, но солэсь кылзӥськыны кулэ (Ис. 66:1). Туж-туж трос калык «Ыжпи азьын» сылэ, куке возьматэ, Иисуслэн мозмытӥсь курбонэзлы оске шуыса. Со сяна, Матфейлэсь 25:31, 32 но верамын, «вань калыкъёс», озьы ик сьӧлыклэсь кышкасьтэм адямиос но, пиштӥсь данлыкезлэн пукон вылаз пукись Иисус азе «люкаськозы» шуыса. Ваньмызлы валамон, вань калыкъёс инмын уг уло, нош музъем вылын уло шуыса. Со туж валамон валэктон. Со валэктэ, малы Библия уг дышеты, туж-туж трос калык инме басьтэмын луоз шуыса. Пырак дауръёс ӵоже инмын улоз 144 000 гинэ, кудӥз «Христосэн огазьын... эксэй радын» улоз (Усьт. 20:4).

10. Малы туж-туж трос калыклы Иегова сярысь тодон-валан басьтыны кулэ, Христос сюрс ар ӵоже кивалтыны кутскытозь?

¹⁰ Озьыен, 1935-тӥ арысен Иеговалэн Адӟись-Ивортӥсьёсыз валало, Иоаннлэн адӟонысьтыз туж-туж трос калык — со оскымон христианъёс, кудъёсыз оско, пырак дауръёс ӵоже музъем вылын улозы шуыса. Бадӟым куректон пыр потон понна соослы Иегова сярысь тодон-валан басьтыны кулэ, Христос сюрс ар ӵоже кивалтыны кутскытозь. Озьы ик соослы юн осконзэс возьматыны кулэ, Иисус сюрс ар ӵоже кивалтыны кутскон азьын соос «вань шугадӟонъёслэсь утиськыны» мед быгатозы шуыса (Лука 21:34—36).

11. Малы куд-ог Библиез Эскерисьёс малпало вал, Христослэн сюрс ар ӵоже кивалтонэзлэн пумаз Иеговалэн ужась-тыршисьёсыз пӧлысь кин ке но инме басьтэмын луоз шуыса?

¹¹ Нош мар вераны луоз со малпан сярысь, кудӥзъя Библиез Эскерисьёс оско вал, Инмарлы оскымон куд-ог ужась-тыршисьёс Христослэн сюрс ар ӵоже кивалтонэзлэн пумаз музъем вылысь инме басьтэмын луозы шуыса? Со сярысь верамын вал 1913-тӥ арын 15-тӥ тулыспал понна поттэм «Возьмаськон башняын». Кин ке но тазьы вераны быгатэ вал: «Малы Инмарлы оскымон вашкала ужась-тыршисьёс музъем вылын улозы, нош со христианъёс, кудъёсызлэн осконзы лябгес вал, инме мынозы?» Соос озьы верало вал, малы ке шуоно со дыре кык шонертэм малпанъёс вал: 1) туж-туж трос калык инмын  улоз но 2) туж-туж трос калык пӧлы пырозы лябгес осконэн христианъёс.

12, 13. Мае тодо асьсэлэн медзы-кузьымзы сярысь зырӟемъёс но туж-туж трос калык?

¹² Но, кызьы ми адӟимы, 1935-тӥ арын Иеговалэн Адӟись-Ивортӥсьёсыз валазы, соос, кинъёс Армагеддонын улэп кылёзы,— со ик вань Иоаннлэн адӟонысьтыз туж-туж трос калык шуыса. Соос бадӟым куректон пыр потозы но бадӟым куараен вералозы: «Престол вылын пукись Инмармылэн но Ыжпилэн кияз утиськон!» (Усьт. 7:10, 14). Ваньмыз со музъем вылын луоз. Со сяна, кызьы вера Библия, инмын улон понна улӟытэмъёс вашкала дыръёсысь оскымон ужась-тыршисьёс сярысь, «маке но ӟечсэгес» басьтозы (Евр. 11:40). Куке вын-агайёс сое валазы, соос мылысь-кыдысь кутскизы ӧтьыны адямиосты Иеговалы ужаны-тыршыны но вераны музъем вылын пырак улыны оскиськон сярысь.

¹³ Христианъёс, кудъёсыз туж-туж трос калык пӧлы пыро, шумпото, соослэн сыӵе оскиськонзы вань шуыса. Соос валало, Иегова ачиз ужпум кутэ шуыса, кин оскымон ужась-тыршисьёсыз пӧлысь инмын улоз, нош кин — музъем вылын. Зырӟемъёс но, туж-туж трос калык но тодо, соос асьсэлэсь медзэс-кузьымзэс басьтозы Иегова гажась-жалясь луэмен гинэ, кудӥз Иисус Христосэз ыстӥз, со аслэсьтыз улонзэ дун мед тыроз шуыса (Рим. 3:24).

14. Малы 1935-тӥ арысен тросэзлэн тодэмзы потӥз, кызьы быдэсмоз туж-туж трос калык сярысь азьпалзэ ивортон?

¹⁴ Куке 1935-тӥ арын Иеговалэн Адӟись-Ивортӥсьёсыз умойгес валаны кутскизы Иоаннлэсь адӟонзэ, тросэзлэн тодэмзы потӥз, кызьы йылоз лыдзы соослэн, кинъёс музъем вылын улыны оско, малы ке шуоно соос туж-туж трос луыны кулэ вал. Тани мае тодаз вае Рональд Паркин, кудӥзлы со дыре 12 арес вал: «Соку быдэс дунне вылын 56 000 пала ивортӥсьёс вал, но соос пӧлысь тросэз, вылды,— зырӟемъёс. Соин ик туж-туж трос калык сокем трос но уг поты вал».

15. Кызьы люкаське туж-туж трос калык?

¹⁵ Нош вуоно аръёсы миссионеръёслэн ужам-тыршемзылы луыса, кудъёссэ пӧртэм шаеръёсы ыстӥзы, Иеговалэн Адӟись-Ивортӥсьёсызлэн лыдзы йылӥз. Собере, 1968-тӥ арысен, адямиосын Библиез дышетон понна уже кутыны кутскизы «Зэмлык, кудӥз пырак улонэ нуэ» книгаез. Та книгаын Библиысь зэмлык туж капчи но валамон валэктэмын вал. Солы луыса Иегова сярысь туж трос калык тодӥз. Ньыль ар куспын ӝыны миллионлэсь тросгес выль дышетскисьёс пылатӥськизы. Со дыре, куке Латин Америкаын но мукет шаеръёсын католик черк аслэсьтыз кужымзэ ыштыны кутскиз, нош Шундыӝужанпал  Европаын но Африкаын милесьтым ужмес нуыны лэзизы, эшшо трос миллион адямиос пылатӥськизы на (Ис. 60:22). Берпум аръёсы Иеговалэн организацияз мукет пайдаё тӥрлыкъёс потӥзы на, кудъёсыз юртто адямиослы тодыны, малы дышетэ Библия. Али умой адӟиське, Иегова туж-туж трос калыкез люка шуыса,— солэн лыдыз 8 миллионлэсь тросгес ини.

16. Кинъёс пӧлысь луоз туж-туж трос калык?

¹⁶ Аслэсьтыз адӟонзэ гожтыкуз, Иоанн вераз, туж-туж трос калык «вань выжыос, калыкъёс, пӧртэм кылын вераськисьёс, улыос-бечеос пӧлысь» луоз шуыса. Солэсь азьвылгес Иоаннлэн выллем малпан гожтӥз Захария пророк: «Со нуналъёсы тазьы луоз: вань кылъёсын вераськись калыкъёс пӧлысь дас мурт басьтӥськоз, иудей пилэн дӥсянэзлэн сӧзы бордаз кутӥськозы но шуозы: „Ми тон сьӧры мыномы, уго кылӥмы, Инмар тӥ пӧлын улэ шуыса“» (Зах. 8:23).

17. Кызьы Иеговалэн организациез вань выжыос, калыкъёс пӧлысь адямиослы юрттэ?

¹⁷ Иеговалэн Адӟись-Ивортӥсьёсыз валало, пӧртэм кылын вераськисьёс пӧлысь адямиосты люкан понна, со кылъёсын ӟеч иворез вераны кулэ шуыса. Библиез дышетон понна публикациосты ми 130 арлэсь кемагес берыктӥськомы ини. Ноку но азьвыл таӵе берыктон  уж нуэмын ӧй вал на, кудӥз али ортчытӥське. Али публикациосты берыкто 900-лэсь тросгес кылъёсы. Ми ас синмынымы адӟиськомы, кызьы Иегова паймымон амалэн вань выжыос, калыкъёс пӧлысь туж-туж трос калыкез люка. Со выжыос, калыкъёс пӧлысь адямиос туж пӧртэмесь ке но, соос огкылысь Иеговалы йыбыртъяло, малы ке шуоно духовной сиён тросгес но тросгес кылъёсы берыктӥське. Иеговалэн калыкез тодмо луэ аслаз тодытон уженыз но ог-огзэс яратэменыз. Ваньмыз со осконэз туж юнматэ! (Матф. 24:14; Иоанн 13:35).

18. а) Малы, Исаиялэсь 46:10, 11 лыдэ басьтыса, ми ум паймиське, туж-туж трос калык сярысь азьпалзэ ивортонэз Иегова паймымон амалэн быдэстэ шуыса? б) Малы соос, кинъёс музъем вылын улыны оско, уг ӝожтӥсько?

¹⁸ Туж-туж трос калык сярысь азьпалзэ ивортонлэсь быдэсмемзэ адӟыса, ми туж шумпотӥськомы! Асьмемыз уг паймыты, макем паймымон амалэн Иегова сое быдэстэ. (Лыдӟе Исаиялэсь 46:10, 11.) Туж-туж трос калык тау каре Иеговалы оскиськон понна, кудзэ со кузьмаз. Со адямиос уг ӝожтӥсько, Иисусэн ӵош инмын ужан-тыршон понна соос Инмарлэн духеныз зырӟемын ӧвӧл шуыса. Библиын трос Инмарлы оскымон пиосмуртъёслэн но кышномуртъёслэн примеръёссы гожтэмын, кудъёсыныз святой дух кивалтӥз, но кудъёсыз 144 000 пӧлы уг пыро. Одӥгез сыӵе пример — Иоанн Пылатӥсь (Матф. 11:11). Нош мукетыз — Давид эксэй (Ап. уж. 2:34). Соос, озьы ик тросэз мукет адямиос но, музъем вылын райын улон понна улӟозы. Со ужась-тыршисьёслэн, туж-туж трос калыклэн кадь ик, луонлыксы луоз возьматыны, соос Иеговалы но солэн кивалтэтэзлы оскымонэсь шуыса.

19. Мар карыны милям мылкыдмы ӝутске, куке ми валаськомы, кызьы Иоаннлэн адӟонэз быдэсме?

¹⁹ Ноку но азьвыл Инмар вань выжыос, калыкъёс пӧлысь трос миллион адямиосты ӧз огазея на вал. Кыӵе гинэ оскиськонмы милям медаз луы,— инмын улыны яке музъем вылын, милемлы юрттыны кулэ тросгес адямиослы «мукет ыжъёс» пӧлы пырыны но туж-туж трос калыклэн люкетэз луыны (Иоанн 10:16). Ӝоген, кызьы азьпалзэ ивортыса верамын вал, Иегова музъем вылэ бадӟым куректон лэзёз но кивалтэтъёсты но религиосты быдтоз, кудъёсыз адямиосты зӥбыса возё. Макем бадӟым дан сётэмын туж-туж трос калыклы — пырак дауръёс ӵоже музъем вылын улыны но Иеговалы ужаны-тыршыны! (Усьт. 7:14).