1, 2. а) Малы Армагеддон — со умой ивор? б) Кыӵе юанъёсты ми эскеромы та статьяын?

 ТӤ КЫЛӤДЫ, дыр, кызьы «Армагеддон» кылын ядерной ожез яке экологической шимучырез нимало. Нош Библиын верамын, Армагеддон — со шумпотон понна муг шуыса (Усьт. 1:3). Армагеддон ож адямиосты уз быдты, со соосты быронлэсь утёз!

² Библия верамъя, Армагеддон ож утиськон луоз, малы ке шуоно со адямиослэн кивалтэмзылы пум поноз. Со музъем вылысь лек, сьӧлыклэсь кышкасьтэм адямиосты быдтоз но, музъем вылэ шонерлыко адямиос гинэ кылёзы. Со сяна, Армагеддон быдтоз соосты, кинъёс музъемез саптало. Озьы со Музъемез быронлэсь утёз (Усьт. 11:18). Сое умойгес валан понна, ойдолэ эскеромы ньыль юанъёсты: мар со сыӵе Армагеддон? Мар луоз Армагеддон азьын? Кызьы утиськоно Армагеддон ож дыръя? Кызьы та дуннелы пум вуон азьын Инмарлы оскымон кылёно?

3. а) Мае возьматэ «Армагеддон» кыл? б) Кызьы Усьтӥськонысь 16:14, 16 адӟиське, Армагеддон — со музъем вылын кыӵе ке инты ӧвӧл шуыса?

³ Лыдӟе Усьтӥськонэз 16:14, 16. «Армагеддон» кыл Библиын одӥг пол гинэ пумиське. Со еврей кылысь потэ но «Мегиддон гурезь» шуэм луэ. Мегиддон вашкала Израильын одӥгез кар вал (Иис. Н. 17:11). Но Армагеддон — со музъем вылын кыӵе ке инты ӧвӧл. Со дыр, куке «быдэс дунне вылысь музъем выл эксэйёс» люкаськозы, Иеговалы пумит ожмаськыны потон понна (Усьт. 16:14). Та статьяын «Армагеддон» кыл озьы ик возьматэ на ожез, кудӥз кутскоз музъем выл эксэйёс Иеговалы пумит ожмаськыны потэм бере ик. Кытысь ми тодӥськомы, Армагеддон — со музъем вылын кыӵе ке инты ӧвӧл  шуыса? Нырысетӥез, Мегиддон гурезь нокытын но ӧвӧл. Кыкетӥез, Мегиддон котырын инты туж пичи, отчы «быдэс дунне вылысь музъем выл эксэйёс» асьсэлэн ожгарчиосынызы но ожмаськон техникаенызы мед тэрозы шуыса. Куинетӥез, кызьы ми тодомы та статьяысь, Армагеддон ож кутскоз, куке музъем выл эксэйёс Инмарлэн калыкез вылэ урдскозы, нош Инмарлэн калыкез дуннелэн пӧртэм сэрегъёсаз улэ.

4. Малы Иегова берпуметӥ быдӟым ожезлы Мегиддонэн герӟаськем ним понӥз?

⁴ Малы Иегова берпуметӥ быдӟым ожезлы Мегиддонэн герӟаськем ним понӥз? Вашкала дыръёсы Изреель нёжал вӧзысь Мегиддонын трос ожмаськонъёс ортчылӥзы. Куддыръя Иегова ачиз пыриськылӥз со ожмаськонъёсы но аслаз калыкезлы юрттылӥз. Кылсярысь, «Мегиддонысь ву дурын» Инмар Израиль калыклэн Варак судьяезлы ханаан ожгарчиосты вормыны юрттӥз, кудъёсыныз кивалтӥз Сӥсара. Варак но азьпалзэ ивортыса верась Девора Иеговалы тау каризы, паймымон амалэн вормыны юрттэмез понна. Соос кырӟазы: «Инмысьёс ожмаськизы, инмысь кизилиос сюрес вылысенызы Сӥсараен ожмаськизы. Киссон ӧрысь бадӟым ву... соосты [тушмонъёсты] нуиз» (Суд. 5:19—21).

5. Маин Армагеддон ож тужгес но пӧртэм луоз ожмаськонлэсь, кудаз пыриськиз Варак?

⁵ Варак но Девора кырӟанзэс таӵе кылъёсын йылпумъязы: «Кузё-Инмаре, тазьы мед бырозы Тынад тушмонъёсыд! Нош Тонэ яратӥсьёс ӝужась шунды кадь кужмоесь мед луозы!» (Суд. 5:31). Армагеддонын но Иеговалэн тушмонъёсыз бырозы, нош Инмарез яратӥсьёс утиськозы. Но та кык ожмаськонъёслэн бадӟым пӧртэмлыксы вань. Армагеддон ожын Инмарлэн ужась-тыршисьёсыз уз ожмаське. Соослэн ожтӥрлыксы гинэ но уз луы! Соослэн кужымзы чус улон, Иеговалы но солэн инмысь ожгарчиосызлы оскиськон бордын луоз (Ис. 30:15; Усьт. 19:11—15).

6. Кызьы Иегова аслэсьтыз тушмонъёссэ Армагеддонын быдтоз?

⁶ Кызьы Инмар аслэсьтыз тушмонъёссэ Армагеддонын быдтоз? Со понна солэн трос пӧртэм амалъёсыз вань. Кылсярысь, тушмонъёссэ со быдтыны быгатэ музъем зуркан, йӧзор но гудыри лэзьыса (Иов 38:22, 23; Иез. 38:19—22). Со сяна, со аслэсьтыз тушмонъёссэ ог-огзылы пумит ӝутыны быгатэ на (2 Пар. 20:17, 22, 23). Лек адямиосты быдтыны со кылчинъёс пыр но быгатэ (Ис. 37:36). Кыӵе гинэ ожмаськон амалэз Инмар медаз бырйы, со одно ик вормоз. Солэн вань тушмонъёсыз быдтэмын луозы. Нош ваньмыз шонер улӥсь адямиос утиськозы (Мад. 3:25, 26).

7, 8. а) 1 Фессалоникаослы 5:1—6 верамъя, мае ялозы дуннеысь кивалтӥсьёс? б) Малы та пӧяськон адямиос понна тужгес но кышкыт луоз?

⁷ «Кузё-Инмарлэн нуналыз» кутскон азьын «тупаса улон, кышкатэк улон» ялэмын луоз. (Лыдӟе 1 Фессалоникаослы 5:1—6.) «Кузё-Инмарлэн нуналыз», кудӥз сярысь верамын 1 Фессалоникаослы 5:2,— со «туж бадӟым курадӟон-куректон» (Усьт. 7:14). Кытысь ми тодыны быгатомы, бадӟым куректон азьын улӥськомы шуыса? Библиын верамын, бадӟым куректон азьын ик туж паймымон ялон луоз шуыса. Со возьматоз бадӟым куректонлэсь кутсконзэ.

⁸ Соку ялэмын луоз «тупаса улон, кышкатэк улон», кудӥз сярысь Библиын азьло ик верамын вал ини. Малы дуннеысь кивалтӥсьёс сыӵе ялон лэсьтозы? Малызэ ми вераны ум тодӥське. Луозы-а соос палан религиозной кивалтӥсьёс но? Оло нош, луозы но. Кызьы гинэ медаз луы, «тупаса улон, кышкатэк улон» сярысь ялон эшшо одӥг пӧяськон луоз на, кудӥз периос бордысь потоз. Таиз пӧяськон адямиос понна тужгес но кышкыт луоз, малы ке шуоно адямиос малпалозы, зэмзэ ик тупаса улон вуиз но соослы номырлэсь  кышканы шуыса, со дыре, куке кутске бадӟым куректон, кыӵеез ноку но ӧй вал на. Кызьы верамын Библиын, «шӧдтэк шорысь, кызьы нуны вайись кышномурт доры ӝог вуэ курадӟон, озьы ик соос доры бырон вуоз». Нош мар луоз Инмарлэн оскымон ужась-тыршисьёсыныз? Оло нош, соос паймозы, Инмарлэн нуналыз шӧдтэк шорысь кутскиз шуыса, но соос солы дась луозы.

9. Кызьы Шайтанлэн дуннеез быдтэмын луоз?

⁹ Иегова Шайтанлэсь дуннезэ одӥг кутскемен гинэ уз быдты, кызьы со быдтӥз сое Ной улон нуналъёсы. Таяз учыре Иегова нырысь быдтоз Быдӟым Вавилонэз, зэмос луисьтэм религилэсь дунневыл империзэ. Нош собере, Армагеддон ожын, со быдтоз Шайтанлэн дуннеезлэсь мукет люкетъёссэ, кудъёсыз герӟаськемын политикаен, ожмаськонэн но вуз каронэн.

10. Усьтӥськон 17:1, 6 но 18:24 верамъя, малы Иегова Быдӟым Вавилонэз быдтоз?

¹⁰ «Туж азыса-калгыса улэм кышномуртлы суд лэсьтон». (Лыдӟе Усьтӥськонэз 17:1, 6; 18:24.) Быдӟым Вавилон Инмарлэсь нимзэ сапта. Та азыса-калгыса улӥсь кышномурт Инмар сярысь пӧяса дышетэ. Азыса-калгыса улӥсь кышномурт сямен, зэмос луисьтэм религия Иеговалы оскымон уг луы, малы ке шуоно дуннеысь кивалтӥсьёслы юрттӥське. Зэмос луисьтэм религия аслэсьтыз адямиоссэ зӥбыса возе но соослэсь коньдонзэс тала. Нош кӧня вир кисьтэ со, озьы ик Инмарлэн ужась-тыршисьёсызлэсь но! (Усьт. 19:2). Кызьы Иегова Быдӟым Вавилонэз быдтоз?

11. Кин со «нап-горд пӧйшур» но кызьы Иегова сое уже кутоз Быдӟым Вавилонэз быдтонын?

¹¹ «Туж азыса-калгыса улэм кышномуртэз» Иегова «нап-горд пӧйшурен» но «дас сюръёсын» быдтоз. Пӧйшур — со Огазеяськем Нациослэн Организацизы. Нош дас сюръёс — со дуннеысь кивалтӥсьёс, кудъёсыз Огазеяськем Нациослэн Организацизылы дурбасьто. Инмарен пуктэм дыре дуннеысь та кивалтӥсьёс Вавилонлы, «туж азыса-калгыса улэм кышномуртлы», пумит ӝутскозы. Соос «таркалозы сое, гольык карозы», узырлыксэ талалозы но  солэсь лек луэмзэ кыре поттозы (Усьт. 17:3, 16). Ваньмыз со туж ӝог, одӥг нунал куспын кадь, ортчоз но туж паймытоз соосты, кинъёс Быдӟым Вавилон палан вал, малы ке шуоно со кема ушъяськыса улӥз: «Эксэй кадь пукисько, мон палкышно ӧвӧл, куректон-кайгуэз уг адӟы!» (Усьт. 18:7, 8).

12. Мае Иегова уз лэзьы но малы?

¹² Инмар та дуннеысь адямиослы аслэсьтыз калыксэ быдтыны уз лэзьы. Иеговалэн ужась-тыршисьёсыз данъясько, солэсь нимзэ нулло шуыса, но кылзӥсько Быдӟым Вавилонысь потыны косонэзлэсь (Ап. уж. 15:16, 17; Усьт. 18:4). Озьы ик Инмарлэн ужась-тыршисьёсыз, кужымзэс жалятэк, мукет адямиослы но зэмос луисьтэм религиысь потыны юртто. Соин ик соос вылэ зэмос луисьтэм религия вылэ лэзем вӧсь каронъёс уз вуэ. Озьы ке но соослэн осконзы эскеремын луоз.

13. а) Кин со сыӵе Гог? б) Иезекииль 38:2, 8, 9 верамъя, ку кутскоз Армагеддон ож?

¹³ Гоглэн урдскемез. (Лыдӟе Иезекиильлэсь 38:2, 8, 9.) Инмар вань зэмос луисьтэм религиосты быдтэм бере солэн калыкез сильтӧл пыр потэм огназ кылем писпу кадь луоз. Соин Шайтан вожомоз. Аслэсьтыз вожпотэмзэ со кисьтоз «сьӧд духъёс» пыр (со периос бордысь потӥсь пӧяськон), дуннеысь кивалтӥсьёслэн огазеяськонзы Иеговалэн ужась-тыршисьёсызлы пумит мед ӝутскоз шуыса (Усьт. 16:13, 14). Дуннеысь кивалтӥсьёслэн та огазеяськонзы Библиын «Магог музъемысь Гог» шуыса нимамын. Куке дуннеысь калыкъёс Инмарлэн калыкез вылэ урдскозы, соку кутскоз Армагеддон ож (Усьт. 16:16).

14. Мае валалоз Гог?

¹⁴ Гог «мугорлэн суйбыгытэз» вылэ оскиськыса улоз — аслаз армиосыз вылэ (2 Пар. 32:8). Нош ми Иегова Инмармылы оскиськыса уломы. Со калыкъёслы серем кадь потоз, малы ке шуоно соос ас синмынызы адӟозы, кызьы куке но кужмо Быдӟым Вавилонлэн инмаръёсыз сое «пӧйшурлэсь» но «дас сюръёслэсь» утьыны ӧз быгатэ (Усьт. 17:16). Соин ик Гог малпалоз, капчиен вормоз шуыса. Иеговалэн калыкез вылэ со «пилем кадь, музъемез  шобыртон вылысь» ӝутскоз (Иез. 38:16). Но ӝоген Гог валалоз, ассэ сьӧлтэтэ пыртӥз шуыса. Соку со валалоз, кызьы куке но Горд Кам зарезь дорын фараон валаз вал, со Иеговаен асэныз нюръяське шуыса (Пот. 14:1—4; Иез. 38:3, 4, 18, 21—23).

15. Мар кароз Иисус Армагеддон дыръя?

¹⁵ Христос но солэн инмысь ожгарчиосыз Иеговалэсь калыксэ утёзы но Гоглэсь армиоссэ таркалозы (Усьт. 19:11, 14, 15). Нош мар луоз Инмарлэн валтӥсь тушмонэныз, Шайтанэн, кудӥз пӧя калыкъёсты но Армагеддон ожын Инмарлэн калыкезлы пумит ожмаськыны косэ? Иисус Шайтанэз но периосты пыдэстэм дуннее сэрпалтоз, кытын соос сюрс ар пытсэтын луозы (Усьт. 20:1—3).

16. а) Кызьы возьматоно, ми Инмарез тодӥськомы шуыса? б) Мар луоз Армагеддон дыръя соосын, кинъёс Инмарез тодо?

¹⁶ Кемалась-а ини ми зэмлыкын, ӧвӧл-а, Армагеддон ожын утиськон понна милемлы ужъёсынымы возьматоно, ми Инмарез тодӥськомы но «Иисус Христослэсь Ӟеч Иворзэ» кабыл басьтӥськомы шуыса (2 Фес. 1:7—9). Инмарез тодӥськомы ке, ми валаськомы, мае со яратэ, мае адӟемпотостэм каре но мае милесьтым возьма. Озьы ик ми сое тодӥськомы ке, сое яратӥськомы, солэсь кылзӥськиськомы но солы гинэ йыбыртъяськомы (1 Иоанн 2:3—5; 5:3). Ми Инмарез зэмзэ ик тодӥськомы ке, оскыны быгатомы, со но милемыз тодэ но яратэ шуыса (1 Кор. 8:3). Нош со бадӟым дан но, Армагеддонын утиськомы шуыса, оскытон луэ.

17. Кызьы ми возьматомы, Иисус Христослэсь ӟеч иворзэ кабыл басьтӥськомы шуыса?

¹⁷ Иисус Христослэн ӟеч иворез пӧлы пыро вань зэмлыкъёс, кудъёсызлы дышетӥз Иисус. Соос Инмарлэн Кылаз гожтэмын. Ми ӟеч иворез кабыл басьтӥськомы, куке со зэмлыкъёсъя улӥськомы. Ми возьматӥськомы, кылзӥськиськомы шуыса, куке Иеговалы ужан-тыршонэз нырысетӥ интые пуктӥськомы, солэн шонерлыко эсэпъёсызъя улӥськомы но солэн Эксэйлыкез сярысь тодытӥськомы (Матф. 6:33; 24:14). Со сяна, туж кулэ  юрттӥськыны Христослэн зырӟем вын-агайёсызлы туж кулэ ужын, кудӥз соослы оскемын (Матф. 25:31—40).

18. Кызьы Христослэн зырӟем вын-агайёсыз «мукет ыжъёслы» мед-кузьым сётозы, соослэн юрттӥськемзы понна?

¹⁸ Ӝоген Инмарлэн зырӟем ужась-тыршисьёсызлэн луонлыксы кылдоз юрттӥськемзы понна «мукет ыжъёслы» мед-кузьым сётыны (Иоанн 10:16). Кызьы? Армагеддон ож кутскон азьын 144 000 пӧлысь кылемъёсыз ноку бырисьтэм духъёс кадь инме басьтэмын луозы. Ваньмыз зырӟемъёс инмысь ожгарчиос пӧлы пырозы, кудъёсыз Гогез вормозы но Инмарлэсь «туж-туж трос калыксэ» утёзы (Усьт. 2:26, 27; 7:9, 10). Макем шумпотозы та оскымон вын-агайёс но сузэр-апайёс, Иеговалэн зырӟем ужась-тыршисьёсыз музъем вылын улыку, соослы юрттӥськизы шуыса!

19, 20. Кызьы, шуг-секытъёс шоры учкытэк, Армагеддон азьын Инмарлы оскымон кылёно?

¹⁹ Та секыт берпум нуналъёсы тросэз Иеговалэн ужась-тыршисьёсыз шуг-секытъёсын пумисько. Но ми ваньмы чиданы но шумпотонмес утьыны быгатӥськомы (Иак. 1:2—4). Мар милемлы юрттоз? Сюлмысь вӧсяськон (Лука 21:36). Нуналысь нуналэ Библиез эскерон но со вылын малпаськон, озьы ик малпаськон азьпалзэ ивортонъёс вылын, кудъёсыз ӝоген быдэсмозы (Пс. 76:13). Ваньмыз со, озьы ик ужан-тыршонэ мылысь-кыдысь пыриськон но, юрттоз милемлы осконмес утьыны.

²⁰ Малпалэ гинэ, макем тӥ шумпотоды, куке Быдӟым Вавилон быдтэмын луоз но Армагеддон ортчоз! Нош макем тӥ шумпотоды, куке Инмарлэн нимыз но кивалтыны правоез шонере поттэмын луозы! (Иез. 38:23). Кызьы ми адӟимы, Армагеддон — со умой ивор соос понна, кинъёс Инмарез тодо, Пиезлэсь кылзӥсько но пумозяз чиданы быгатозы (Матф. 24:13).