1, 2. Кызьы Екклесиастын 11:6 гожтэм кылъёс герӟаськемын Эксэйлык сярысь ӟеч иворез тодытонэн?

 КУД-ОГ шаеръёсын адямиос шумпотыса ӟеч иворез кылзо. Мукетъёсаз — туж ик тодэмзы уг поты со сярысь, кин со Инмар но мар Библиын гожтэмын. Нош кызьы ӟеч иворез кылзо тӥ палан улӥсь адямиос? Кызьы гинэ медам кылзэ, Иеговалэн потэ: ми мед тодытомы со дырозь, куке со вералоз, та уж йылпумъяськиз шуыса.

² Иеговаен пуктэм дыре тодытон уж йылпумъяськоз, «собере пум вуоз» (Матф. 24:14, 36). Со дыр вуытозь, кызьы милемлы уже кутоно та визь-кенешез: «Киыдлы тэк улыны маза эн сёты» b? (Лыдӟе Екклесиастэз 11:6.)

3. Мае ми эскеромы та статьяын?

³ Кылем статьяын ми эскеримы, мар юрттоз милемлы «адями кутылӥсь» луыны, яке ӟеч иворез быгатыса тодытыны (Матф. 4:19). Нош та статьяын вераськоз со сярысь, мар юрттоз милемлы юн мылкыдын тодытыны, нокыӵе шуг-секытъёс шоры учкытэк. Ми тодомы, малы кулэ: 1) тодамы возьыны, мар улонын тужгес но валтӥсез луэ, 2) чидась луыны но 3) юн осконэн улыны.

4. Малы милемлы тодамы возёно, Иеговаен сётэм ужез быдэсъян ми понна тужгес но валтӥсез луэ шуыса?

⁴ Иисус азьло ик вераз, кыӵе югдуръёс возьматозы, ми берпуметӥ нуналъёсы улӥськомы шуыса. Со тодӥз, та югдуръёс солэн дышетскисьёсызлы люкетыны быгатозы тодытон уже пыриськыны. Соин ик со вераз: «Сак улэ» (Матф.  24:42). Милемлы люкетыны быгатэ со ик, мар люкетӥз Ной дыръя улӥсь адямиослы солэн алонэзлы вазиськыны (Матф. 24:37—39; 2 Пётр 2:5). Соин ик милемлы тодамы возёно: ми понна тужгес но валтӥсез — Иеговаен сётэм ужез быдэсъян.

5. Макем паськыт вӧлмоз Эксэйлык сярысь ӟеч ивор, Апостолъёслэсь ужъёссэс 1:6—8 лыдэ басьтыса?

⁵ Туннэ милемлы тужгес но кулэ Эксэйлык сярысь ӟеч иворез тодытыны. Иисус азьло ик вераз, солэн кулэмез бере христианъёс тодытон ужез азьланьтозы но та уж паськыт вӧлмоз шуыса (Иоанн 14:12). Озьы ке но Иисуслэн кулэмез бере куд-ог дышетскисьёсыз нош ик чорыганы кутскизы. Улӟемез бере Иисус паймымон уж лэсьтӥз — дышетскисьёсызлы трос чорыг кутыны юрттӥз. Та паймымон ужез лэсьтыса, Иисус дышетскисьёсызлы валаны юрттӥз, «адями кутылӥсь» луон ужлэсь номыр кулэезгес ӧвӧл шуыса (Иоанн 21:15—17). Инме ӝутскемез азьын Иисус дышетскисьёсызлы вераз, тодытыны кутскем ужез Израильлэсь трослы кыдёкегес вӧлмоз шуыса. (Лыдӟе Апостолъёслэсь ужъёссэс 1:6—8.) Аръёс ортчыса, Иисус адӟытӥз апостол Иоаннлы, мар луоз «Господьлэн нуналаз» c. Одӥгез, мар туж паймытӥз апостол Иоаннэз: кылчин «вань дауръёс ӵоже улӥсь Евангелиез» тодытӥз «музъем вылын улӥсьёслы, вань выжыослы, пӧртэм кылын вераськисьёслы, калыкъёслы, улыослы-бечеослы» (Усьт. 1:10, ВД; 14:6). Валамон луэ: туннэ Иеговалэн потэ, тодытон уж йылпумъяськытозь, ми ӟеч иворез быдэс дунне вылын мед вӧлмытомы шуыса.

6. Мар юрттоз милемлы тодамы возьыны, тодытон уж туж кулэ луэ шуыса?

⁶ Мар юрттоз милемлы тодамы возьыны, тодытон уж туж кулэ луэ шуыса? Малпаськон со сярысь, макем трос Иегова лэсьтэ, милемлы юрттон понна. Кылсярысь, Инмар  сётэ милемлы трос духовной сиён: печатлам но электрон публикациос, аудио- но видеогожтэмъёс, озьы ик интернет-телевидение. Малпалэ гинэ: сайтысьтымы шедьтыны луэ 1 000-лэсь но тросгес кылъёсы берыктэм информациез! (Матф. 24:45—47). Та дуннеысь адямиос политикаен, религиен но коньдонэн герӟаськем мугъёсын сэрен тупаса уг уло. Нош Инмарлэн тямыс миллионлэсь но тросгес ужась-тыршисьёсыз, кытын гинэ соос медам улэ, ог-огзэс вын-агайёс но сузэр-апайёс кадь ярато. Кылсярысь, 2019-тӥ арын 19-тӥ оштолэзе, удмуртарняе, быдэс дунне вылын Иеговалэн Адӟись-Ивортӥсьёсыз учкизы видеороликез, кудаз со нуналлы Библиысь кылбур эскериськиз. Та нуналэ ик ӝыт 20 919 041 адями Иисус Христослэсь кулонзэ Тодэ ваён ӝытанэ лыктӥз. Макем бадӟым дан та паймымон ужез нуыны но солэн оглюкетэз луыны! Ми та сярысь малпаськимы ке, соку ум вунэтэ, Эксэйлык сярысь тодытон уж туж кулэ луэ шуыса.

7. Кызьы Иисуслэн примерез юрттэ милемлы тодамы возьыны, тодытон уж туж кулэ луэ шуыса?

⁷ Иисус Христослэн примерез но юрттэ милемлы тодамы возьыны, тодытон уж туж кулэ луэ шуыса. Со палэнтӥз ваньзэ, мар люкетӥз солы «зэмлык сярысь шара ивортыны» (Иоанн 18:37). Иисус ӧз сётскы визь сынаськонлы, куке Шайтан ӵектӥз солы «дунне вылысь вань эксэйлыкъёсты но соослэсь данзэс». Озьы ик со ӧз сётскы, куке адямиос сое эксэй карыны тыршизы (Матф. 4:8, 9; Иоанн 6:15). Иисус узырмыны ӧз тыршы но лек уйылон-уллянъёслэсь ӧз кышка (Лука 9:58; Иоанн 8:59). Апостол Павел христианъёслэсь мылкыдзэс ӝутӥз Христослэсь адӟем карыны, соос медаз лябӟе шуыса (Евр. 12:3). Милемлы та кылъёсты тодамы возёно, куке осконмы эскериське. Соку ми тужгес но валтӥсез сярысь ум вунэтэ.

8. Мае возьматэ чидась луон но малы со туннэ тужгес но кулэ луэ?

⁸ Чидась адями возьманы быгатэ, ку югдур воштӥськоз. Та сям кулэ туж пӧртэм учыръёсын, кылсярысь, куке возьмаськомы шуг-секытлэсь быремзэ яке кема возьмам малпанмылэсь быдэсмемзэ. Аввакум пророк туж возьмаз со дырез, куке Иудаын урод-лек ужъёс быдтэмын луозы (Авв. 1:2). Иисуслэн дышетскисьёсыз возьмазы, ӝоген Эксэйлык вуоз шуыса, кудӥз соосты Римлэн ки улысьтыз мозмытоз (Лука 19:11). Ми возьмаськомы со нуналэз, куке Инмарлэн Эксэйлыкез вань уродэз быдтоз но шонерлыко выль дуннеез кылдытоз (2 Пётр 3:13). Нош Иеговаен пуктэм дыр вуытозь, милемлы чидаса возьманы кулэ. Малпаськомы, кызьы Иегова дышетэ милемыз чидась луыны.

9. Кыӵе учыръёс возьмато, Иегова чидась шуыса?

⁹ Иегова котькинлэсь умой адӟем карон возьматэ, кызьы чидась луоно. Инмар Нойлы тырмыт дыр сётӥз, со ковчегез пуктыны но лек дуннелэн матэктӥсь пумыз сярысь адямиосты алыны мед быгатоз шуыса (1 Пётр 3:20; 2 Пётр 2:5). Иегова чидаса кылзӥз Авраамез, кудӥз выльысь но выльысь солы юанъёс сётъяз Содомын но Гоморраын улӥсь адямиосты быдтыны кутэм ужпумез сярысь (Ул.-выл. 18:20—33). Туж кема дыр ӵоже Иегова бадӟым чиданзэ возьматӥз Израиль калыклы, кудӥз солы оскымон ӧй вал (Неем. 9:30, 31). Туннэ но ми адӟиськомы, кызьы Иегова чиданзэ возьматэ: соослы, кинъёсты со ас дораз вае, Инмар тырмыт дыр сётэ ӧпкельыса сьӧлыкъёссылэсь куштӥськыны (Иоанн 6:44; 2 Пётр 3:9; 1 Тим. 2:3, 4). Иеговалэн чиданэз милесьтым но мылкыдмес ӝутэ та сямез возьматыны, куке адямиослы тодытӥськомы но соосты дышетӥськомы. Озьы ик Иегова дышетэ  милемыз чидась луыны одӥг пример вылын, кудӥз солэн Кылаз гожтэмын.

10. Малы дышетэ милемыз музъемен ужасьлэн учырез, кудӥз сярысь гожтэмын Иаковлэн 5:7, 8?

¹⁰ Лыдӟе Иаковлэсь 5:7, 8. Музъемен ужась умой адӟем карон возьматэ, кызьы чидась луоно. Куд-ог будосъёс ӝог будо ке но, соос пӧлысь тросэзлы, емышъёсты ваён понна, трос дыр кулэ. Израильын мерттӥськон дырысен емышъёсты октон-калтон дырозь ог куать толэзь ортче. Сӥзьыл, вазез зор бере, музъемен ужась бусызэ кизе вал, нош тулыс, берез зор ортчем бере, бусызэ ара вал (Марк 4:28). Визьмо луоз, ми музъемен ужасьлэсь чиданзэ адӟем каримы ке. Нош куддыръя со капчи ӧвӧл.

11. Кызьы чидан юрттэ милемлы ужан-тыршонын?

¹¹ Ӵем дыръя тырбыдэстэм адямиослэн соку ик адӟемзы потэ ужзылэсь емышсэ. Нош будосъёс емыш мед ваёзы шуыса, соос сярысь ялан сюлмаськоно. Соосты мерттон понна, нырысь музъемзэ гудӟоно, собере соосты мерттоно, ялан ву киськано но жагзэ уроно. Дышетскисьёсты дасян ужын но ялан тыршоно луэ. Милемлы трос дыр кулэ, соосты, кинъёсын ми Библиез дышетӥськомы, вань адямиосты яратыны дышетон понна. Чидан юрттэ милемлы шонер мылкыдын улыны, куке адямиос милемыз уг кылзо. Соку но, ку милемыз кылзо, милемлы чидан кулэ. Соосты, кинъёсын Библиез дышетӥськомы, ми ум быгатӥське кужмысь косыны Иеговаен кусыпъёссэс юнматыны. Куддыръя Иисуслэн дышетскисьёсыз но соку ик ӧз валалэ, мае возьматӥзы солэн дышетонъёсыз (Иоанн 14:9). Ойдолэ тодамы возёмы, ми мерттӥськомы но ву киськаськомы гинэ шуыса, нош будэтэ Инмар (1 Кор. 3:6).

12. Кызьы милемлы чидасесь луоно, куке тодытӥськомы ӵыжы-выжыосмылы, кудъёсыз Адӟись-Ивортӥсьёс уг луо?

¹² Чиданэз возьматыны секыт луэ, куке ми тодытӥськомы ӵыжы-выжыосмылы, кудъёсыз Адӟись-Ивортӥсьёс уг луо. Сыӵе учырын  милемлы юрттоз возет, кудӥз гожтэмын Екклесиастын 3:7: «Шып улонлэн аслаз дырыз, вераськонлэн аслаз дырыз». Ми быгатӥськомы ӵыжы-выжыосмылы тодытыны асьмеды умой воземенымы, нош со дыре ик милемлы котьку дась луоно соослы зэмлык сярысь вераны (1 Пётр 3:1, 2). Тодытон но дышетскисьёсты дасян уже милемлы ӟырдыт мылкыдын пыриськоно но тодамы возёно, ваньмыныз, озьы ик ӵыжы-выжыосынымы но, чидась луоно шуыса.

13, 14. Вералэ Иеговалэн ужась-тыршисьёсыз сярысь, кудъёсыз дышето милемыз чидась луыны.

¹³ Озьы ик дышетскыны луэ чидась луыны Иеговалэн ужась-тыршисьёсызлэсь, кудъёсыз улӥзы вашкала дыръя но кудъёсыз туннэ уло. Кылсярысь, Аввакум пророклэн туж потэ вал ке но, вань уродэз быдтэмын мед луоз шуыса, со чидаса возьмаз. Со вераз: «Возьмаськон интыям султӥ мон... сылыса чаклай мон» (Авв. 2:1). Апостол Павеллэн туж потэ вал ужан-тыршонзэ пумозяз вуттэмез но мед-кузьымзэ басьтэмез. Озьы ке но ӟеч иворез со чидаса тодытӥз, сое «калык доры вуттыны» тыршиз (Ап. уж. 20:24).

¹⁴ Эскеромы одӥг кузпалъёслэсь учырзэс, кудъёсыз Галаад школаын дышетскизы. Соосты ыстӥзы шаере, кудаз Адӟись-Ивортӥсьёс ӧжыт, нош тросэз улӥсьёс христианъёс уг луо. Со шаерын туж ӧжыт адямиос Библиез дышетыны соглаш луизы, нош Галаад школаын ӵош дышетскисьёссы соослы вераллязы, тросэз, кинъёсын соос Библиез дышето, пылатӥсько шуыса. Нош та кузпалъёс азьланяз но чидаса тодытӥзы, тросэз соосты ӧз кылзэ ке но. Нырысь соос малпазы, ужам-тыршемзы нокыӵе пайда уг вайы шуыса, нош тямыс ар ортчыса, соос адӟизы емышсэ: пылатӥськиз кышномурт, кудӥныз соос Библиез дышетӥзы. Мар огкадез вань Аввакум пророклэн, Апостол Павеллэн но та кузпалъёслэн? Номыр шоры учкытэк, Иеговалэн та оскымон ужась-тыршисьёсыз соослы сётэм ужзэс быдэсъямысь ӧз дугдэ но кизылы тэк улыны маза ӧз сётэ. Чидамзы понна Иегова соосты бакель кариз. Ойдолэ «осконэн улӥсьёслэсь, ваньзэ чидаса, Инмарлэсь сӥзиськонъёссэ басьтӥсьёслэсь» адӟем каромы (Евр. 6:10—12).

15. Кызьы оскон тодытыны мылкыдмес ӝутэ?

¹⁵ Ми оскиськомы солы, мае тодытӥськомы, соин ик ӟеч иворез тросгес адямиослы вераммы потэ. Ми оскиськомы кылсётонъёслы, кудъёсыз Инмарлэн Кылаз гожтэмын (Пс. 118:42; Ис. 40:8). Ми ас синмынымы адӟиськомы, кызьы Библиысь азьпалзэ ивортонъёс быдэсмо но кызьы Библилы луыса адямиос умой пала воштӥсько. Ваньмыз та возьматэ, Эксэйлык сярысь ӟеч иворез котькинлы кылыны кулэ шуыса.

16. Кызьы Иеговалы но Иисуслы оскон тодытыны мылкыдмес ӝутэ, Псалтирез 45:2—4 лыдэ басьтоно ке?

¹⁶ Со сяна, ми оскиськомы Иеговалы, кудӥз ӟеч иворез вераз, озьы ик Иисуслы но, кудзэ Инмар ин Эксэйлыказ Эксэе пуктӥз (Иоанн 14:1). Мар гинэ медам луы, Иегова котьку милям «утиськон интымы, кужыммы» луоз. (Лыдӟе Псалтирез 45:2—4.) Со сяна, ми оскиськомы: Иисус инмысен тодытон ужен кивалтэ, кудӥзлы кивалтыны право но кужым сётӥз Иегова (Матф. 28:18—20).

17. Вералэ учырез, кудӥз возьматэ, малы милемлы азьланяз но тодытоно.

¹⁷ Осконмы вань ке, ми тодӥськомы, Иегова тыршеммес одно ик бакель кароз шуыса. Куддыръя со бакель каре озьы, кызьы ми ӧм но возьмалэ (Екк. 11:6). Кылсярысь, котькуд нунал публикациосынымы стендъёс но тележкаос вӧзтӥ трос сюрс адямиос ортчыло. Таӵе тодытон амал емышъёс вае-а? Одно ик вае! 2014-тӥ арын шуркынмон понна  поттэм «Эксэйлыклы ужан-тыршонамы» вераськиз университетын дышетскись нылмурт сярысь, кудӥзлэн Иеговалэн Адӟись-Ивортӥсьёсыз сярысь реферат гожтэмез потэ вал. Со ӧз быгаты шедьтыны Эксэйлык юртэз, но университет палан адӟиз публикациосынымы ӝӧкез, кытысь рефератэзлы информация шедьтӥз. Кӧня ке дыр ортчыса, со пылатӥськиз но али пионер луыса ужа-тырше. Таӵе учыръёс милесьтым мылкыдмес ӝуто азьланяз но тодытыны, малы ке шуоно соос возьмато, вань на адямиос, кудъёсызлы Эксэйлык сярысь иворез кылыны кулэ.

18. Малы ми оскиськомы, Эксэйлык сярысь тодытон уж Иеговаен пуктэм дыре йылпумъяськоз шуыса?

¹⁸ Быдэсак оскыны луэ, Эксэйлык сярысь тодытон уж пуктэм дыре йылпумъяськоз шуыса. Тодамы ваёмы, мар луиз Ной улон нуналъёсы. Иегова возьматӥз, ваньзэ ас дыраз лэсьтэ шуыса. Ву тудӟонлэсь ог 120 арлы азьлогес Инмар ужпум кутӥз, ку Ву тудӟон кутскоз. Трос аръёс ортчыса, Инмар Ноез ковчег пуктыны косӥз. 40—50 аръёс ӵоже, вылды, Ной жадёнэз валатэк ужаз. Адямиос сое ӧз кылзэ ке но, со соосты алэмысь ӧз дугды. Матэктӥсь курадӟон сярысь Ной алӥз со дырозь, куке Иегова вераз, пудо-животъёсты ковчеге пыртыны дыр вуиз шуыса. Собере ӵапак пуктэм дыре Иегова ковчеглэсь ӧссэ ворсаз (Ул.-выл. 6:3; 7:1, 2, 16).

19. Малы ми оскыны быгатӥськомы, кимылы тэк улыны маза ум ке сётӥське?

¹⁹ Ӝоген Иегова ялоз, Эксэйлык сярысь тодытон уж йылпумъяськиз шуыса. Собере Инмар Шайтанлэсь дуннезэ быдтоз но шонерлыко выль дунеез кылдытоз. Нош со дырозь ми адӟем каромы Нойлэсь, Аввакумлэсь но Инмарлэн мукет ужась-тыршисьёсызлэсь, кудъёсыз кизылы тэк улыны маза ӧз сётэ. Ойдолэ тужгес но валтӥсез сярысь тодамы возёмы, чидасесь луомы, озьы ик Иеговалы но солэн кылсётонъёсызлы юн оскомы.