1. Кыӵе дыре Иеговалы ужаны-тыршыны секытгес?

 КЫЗЬЫ тӥ малпаськоды, кыӵе дыре Иеговалы ужаны-тыршыны секытгес: куке тӥ трос шуг-секытъёсын пумиськиськоды яке куке тӥляд ваньмыз умой? Шуг-секытъёсын пумиськыса, ми соку ик Иеговалэсь юрттэт утчаськомы. Нош куддыръя, куке милям улонамы ваньмыз умой, ми вунэтӥськомы, Иеговалы ужан-тыршон улонамы тужгес но валтӥсез луэ шуыса. Вашкала дыръёсы Иегова аслэсьтыз калыксэ таӵе кышкытлык сярысь алӥз вал (К. Зак. 6:10—12).

2. Кыӵе адӟем карон возьматӥз милемлы Аса эксэй?

² Эскеромы Аса эксэйлэсь учырзэ. Со котьку Иеговалы оскиськиз, соин ик ассэ визьлыко возиз. Аса Иеговалы ужаз-тыршиз тупась дыре но, тупасьтэм дыре но. Библиын гожтэмын: «Асалэн сюлмыз вань улон нуналъёсыз ӵоже Кузё-Инмар палан улӥз» (3 Экс. 15:14). Кылсярысь, Аса Иудаын зэмос луисьтэм инмаръёслы йыбырттонэз быдтӥз: «мурт инмаръёслэсь курбон сётон интыоссэс, гурезь йылъёсын вӧсяськонъёсты кулэтэм кариз, сульдэръёсты-статуяосты сузмытъяз, вӧсяськон сурдъёссэс кораз» (2 Пар. 14:3, 5). Со сяна, Аса люкиз Мааха песянайзэ «эксэй кышномурт нимез нуллонлэсь». Малы? Малы ке шуоно песянаез калыклэсь мылкыдзэ ӝутӥз сульдэрлы йыбыртъяны (3 Экс. 15:11—13) b.

3. Мае ми эскеромы та статьяын?

³ Нош Аса сульдэръёсты-идолъёсты гинэ ӧз быдты. Иудаын улӥсьёслэсь со мылкыдзэс ӝутӥз Иегова доры берытскыны.  Иегова Асаез но калыкез бакель кариз, озьы ик соослы каньыллык c сётӥз. Асалэн кивалтон нуналъёсаз дас ар ӵоже «музъем каньыллыко улӥз» (2 Пар. 14:1, 4, 6). Та статьяын ми эскеромы, кызьы Аса та тупась дырез кутӥз. Собере ми эскеромы нырысетӥ христианъёслэсь учырзэс, кудъёсыз кышкыттэм дырез визьмо кутӥзы. Озьы ик ми малпаськомы таӵе юан вылын: ми улӥськомы ке шаерын, кудаз кивалтӥсьёс Иеговалэн Адӟись-Ивортӥсьёсызлы ужзэс нуыны уг люкето, кызьы ми быгатӥськомы та дырез визьмо кутыны?

4. Кызьы Аса тупась дырез кутӥз, 2 Паралипоменонэз 14:2, 6, 7 лыдэ басьтоно ке?

⁴ Лыдӟе 2 Паралипоменонэз 14:2, 6, 7. Аса калыклы таӵе кылъёсын вазиськиз: «[Иегова] асьмелы котыр ласянь каньыллык сётӥз». Нош эксэй ӧз малпа, табере шутэтскыса улыны луоз шуыса. Со интые, Аса каръёсты, борддоръёсты, башняосты но капкаосты пуктыны кутскиз. Иудаын улӥсьёслы со вераз: «Музъем асьмелэн на». Мар сярысь Асалэн верамез потэ вал? Солэн кылъёсыз возьматӥзы, иудей калыклэн тушмонъёсыз Инмарен сётэм музъемтӥ ветлыны но пуктӥськон ужъёсты нуыны уз люкетэ шуыса. Аса калыклэсь мылкыдзэ ӝутӥз та тупась дырез шонер кутыны.

5. Малы Аса ожмаськон кужымзэ юнматӥз?

⁵ Озьы ик та аръёс куспын Аса ожмаськон кужымзэ юнматӥз (2 Пар. 14:8). Возьматэ-а со, Аса Иеговалы ӧз оскиськы шуыса? Уг, уг возьматы. Аса тодӥз: эксэйлы калыкез дасяны кулэ шуг-секытъёслы, кудъёсыныз калык вуонояз пумиськыны быгатэ. Эксэй вала вал: Иудаын тупаса улон котьку ик уз луы, дыр. Зэмзэ вераса, озьы ик луиз.

6. Кызьы нырысетӥ даурын христианъёс тупась дыре кылдэм луонлыкъёссэс кутӥзы?

⁶ Нырысетӥ даурын христианъёс уйылон-уллянъёсын ӵемысь пумиськылӥзы ке но, улоназы вал сыӵе но вакытъёс, куке соос тупаса улонлы шумпотыса улӥзы. Кызьы соос кылдэм луонлыкъёссэс кутӥзы? Та оскымон вын-агайёс но сузэр-апайёс ӟырдыт мылкыдын ӟеч иворез тодытӥзы но Иеговалы ужан-тыршонэз валтӥсь ужен лыдъязы. Соин ик «оскисьёслэн лыдзы тросгес но тросгес луиз». Ваньмыз та возьматэ: Иегова бакель кариз христианъёсты, кудъёсыз тупась дыре вань сюлмысьтызы солы ужазы-тыршизы (Ап. уж. 9:26—31).

7, 8. Вералэ, кызьы Павел но мукет христианъёс ӟеч иворез веразы котьку, ку быгатӥзы.

⁷ Христианъёс, кудъёсыз нырысетӥ даурын улӥзы, ӟеч иворез веразы котьку, ку быгатӥзы. Кылсярысь, куке апостол Павел валаз, Ефес карын со азьын «бадӟым уж нуыны... паськыт ӧс усьтэмын» шуыса, со та каре кылиз, тодытон но дышетскисьёсты дасян понна (1 Кор. 16:8, 9).

⁸ Павеллэн но мукет христианъёслэн луонлыксы кылдӥз трос адямиослы тодытыны асьме вакытысь 49-тӥ арын. Соку Иерусалимын апостолъёс но тӧроос вандӥськон сям пумысен ужпум кутӥзы (Ап. уж. 15:23—29). Куке кенешъёсын та кутэм ужпум сярысь тодӥзы, христианъёс вань кужымзэс понӥзы но «Кузё-Инмарлэсь кылзэ дышетыса, Ӟеч Ивор тодытыса улӥзы» (Ап. уж. 15:30—35). Кыӵе пайда со вайиз? Библиын гожтэмын, кенешъёс «оскон пыр юнмазы, нуналлы быдэ соослэн лыдзы тросгес но тросгес луиз» шуыса (Ап. уж. 16:4, 5).

9. Мар карыны быгато Иеговалэн Адӟись-Ивортӥсьёсыз трос шаеръёсын? Мар сярысь аслэсьтыд юано?

⁹ Туннэ трос шаеръёсын кивалтӥсьёс Иеговалэн Адӟись-Ивортӥсьёсызлы ужзэс нуыны уг люкето. Тӥ сыӵе шаерын улӥськоды ке, асьтэлэсь юалэ: «Кызьы мон та умой дырез кутӥсько?» Ми улӥськомы туж паймымон берпуметӥ нуналъёсы, малы ке шуоно Иеговалэн калыкез пыриське тодытон но дышетскисьёсты дасян уже, кудӥз туннэ кадь паськыт вӧлмемын ноку ӧй вал на (Марк 13:10). Та ужын туж трос лэсьтыны луэ.

10. Мар карыны мылкыдмес ӝуто кылъёс, кудъёсыз гожтэмын 2 Тимофейлы 4:2?

¹⁰ Кызьы тупась дырез визьмо кутоно? (Лыдӟе 2 Тимофейлы 4:2.) Малпаське: быгатӥськоды-а улонады мае ке воштыны, тӥ яке семьяды пӧлысь кин ке но тросгес тодытыны (оло нош, пионер луыса ужаны-тыршыны но) мед быгатоз шуыса? Али тыршоно ӧвӧл коньдон яке ваньбур люканы, малы ке шуоно бадӟым куректон дыръя соос утиськыны уз юрттэ (Мад. 11:4; Матф. 6:31—33; 1 Иоанн 2:15—17).

11. Мар каро куд-ог вын-агайёс но сузэр-апайёс, мукетъёсызлы Иегова сярысь тодыны юрттон понна?

¹¹ Трос вын-агайёс но сузэр-апайёс выль кылэз дышетӥзы, мукетъёсызлы Иегова сярысь тодыны юрттон понна. Инмарлэн организациез сыӵе ивортӥсьёслы юрттэ, Библия вылэ пыкиськыса гожтэм публикациосты тросгес но тросгес кылъёсын поттыса. Кылсярысь, 2010-тӥ арын публикациосмы ог 500 кылъёсы берыктӥськизы, нош туннэ 1 000-лэсь но тросгес кылъёсы берыктӥсько!

12. Кыӵе шӧдонъёссы кылдо адямиослэн, куке соос Библиысь зэмлыкез вордскем кылынызы кыло? Вералэ учырез.

¹² Кыӵе шӧдонъёссы кылдо адямиослэн,  куке соос Библиысь зэмлыкез вордскем кылынызы кыло? Эскеромы одӥг сузэрлэсь учырзэ. Со ветлӥз улосысь конгрессэ, кудӥз ортчытӥськиз США-ын киньяруанда кылын. Та кылын верасько Африкаысь куд-ог шаеръёсын. Конгресс ортчем бере сузэр вераз: «Мон Америкае улыны кошки 17 ар талэсь азьло но та дыр куспын нырысьсэ валай ваньзэ, мар сярысь вераськиз конгрессын». Со, мае та сузэр конгрессын вордскем кылыныз кылӥз, солэсь сюлэмзэ вырӟытӥз. Быгатӥськоды-а тӥ мукет кылэз дышетыны, тӥ палан улӥсь адямиослы тодытон понна? Кин ке но тӥледыз шумпотысагес кылзоз, вылды, тӥ солы ӟеч иворез анай кылыныз верады ке. Тыршемды тӥледлы трос шумпотон ваёз!

13. Кызьы Россиысь вын-агайёс тупась дырез кутӥзы?

¹³ Куд-ог шаеръёсын христианъёслы люкето Иеговалы йыбыртъяны, кылсярысь, Россиын ужмес нуыны уг лэзё. Трос дасо аръёс ӵоже кивалтӥсьёс Иеговалэсь Адӟись-Ивортӥсьёссэ уйылыса-улляса возизы, нош 1991-тӥ арын южтолэзе ужмес нуыны лэзизы. Со аръёсы ог 16 000 ивортӥсьёс тодытон уже пыриськизы. Нош 20 ар ортчыса, соослэн лыдзы 160 000-лэсь тросгес луиз! Ваньмыз та возьматэ: вын-агайёс визьмо кутӥзы ӟеч иворез вераны тупась дырез. Кышкыттэм дыр йылпумъяськиз ке но, вын-агайёслэн но сузэр-апайёслэн ӟырдыт мылкыдзы ӧз сӥя. Соос Иеговалы ужамысь-тыршемысь уг дугдо но ас югдуразы лэсьто ваньзэ, мае быгато.

14, 15. Кызьы Иегова кужымзэ возьматӥз, куке Асалы юрттӥз?

¹⁴ Аса улон нуналъёсы тупаса улон быриз, куке иудей калык вылэ эфиоп пи Зарай ожен лыктӥз. Со одӥг миллион  ожгарчиосын кивалтӥз. Соос быдэсак оскизы, Иудаез вормозы шуыса. Нош Аса сокем трос ожгарчиослэсь ӧз кышка — со Иегова Инмарезлы оскиськиз. Аса вӧсяськиз: «Инмармы Кузё-Инмар, юртты ук милемлы: уго ми Тыныд оскиськиськомы но Тынад нимыдлы оскиськыса та туж трослэн пумитаз потӥмы» (2 Пар. 14:11).

¹⁵ Асалэн ожгарчиосыныз ӵошатыса, эфиоп ожгарчиос кык поллы тросгес вал. Озьы ке но эксэй тодӥз, Иегова кужмо но ас калыкезлы юрттыны быгатэ шуыса. Зэм но, Иегова калыкезлы юрттӥз: эфиоп ожгарчиос погыртэмын вал (2 Пар. 14:8—13).

16. Кытысь ми тодӥськомы, умой дыр ӝоген йылпумъяськоз шуыса?

¹⁶ Ми пыр-поч ум тодӥське, мар милемын азьланяз луоз. Но ми тодӥськомы, умой дыр, кудӥзлы Иеговалэн ужась-тыршисьёсыз шумпото, куке но йылпумъяськоз шуыса. Иисус азьло ик вераз, солэсь дышетскисьёссэ «вань калыкъёс адӟемпотостэм карозы» шуыса (Матф. 24:9). Апостол Павел но вераз, «ваньзэс Иисус Христос бордын шонерлыко улыны кутскисьёсты улляса-ӝикатыса» возёзы шуыса (2 Тим. 3:12). Али Шайтан «туж бадӟым йыркурен» улэ (Усьт. 12:12). Ми малпаськомы ке, со милемлы вожзэ уз потты шуыса, соку асьмеды асьмеос пӧяськомы.

17. Кызьы милям осконмы эскериськыны быгатэ?

¹⁷ Ӝоген котькудмылэн осконэз эскериськоз. Дунне вылэ бадӟым куректон вуоз, «кыӵеез дуннелэн кутсконысеныз туннэ нуналозь ӧй на вал» (Матф. 24:21). Оло нош, со дыре матысь адямиосмы милемлы пумит султозы яке кивалтӥсьёс ужмес нуыны уз лэзе (Матф. 10:35, 36). Аса сямен, оскоды-а тӥ, Иегова тӥледлы юрттоз но тӥледыз утёз шуыса?

18. Мар юрттоз милемлы вуоно югдуръёслы дась луыны, Еврейёслы 10:38, 39 лыдэ басьтыса?

¹⁸ Иегова осконмес юнматэ, милемыз вуоно югдуръёслы дасян понна. Инмар «оскиськымон, визьмо ляльчиез» пуктӥз «ас дыраз сиён сётъяны», милям осконмы юн мед луоз шуыса (Матф. 24:45). Нош милемлы асьмелы но Иеговалы осконмес юнматыны тыршоно. (Лыдӟе Еврейёслы 10:38, 39.)

19, 20. Кыӵе юанъёс аслыд сётоно, 1 Паралипоменонэз 28:9 лыдэ басьтыса, но малы та юанъёс вылын малпаськыны кулэ?

 ¹⁹ Аса сямен, милемлы но Иеговаез «утчано» (2 Пар. 14:4; 15:1, 2). Ми Иеговаез утчаны кутскиськомы, куке со сярысь тодон-валан басьтӥськомы но пылатӥськиськомы. Собере ми лэсьтӥськомы ваньзэ, мае быгатӥськомы, Иеговаез яратонмы мед юнмалоз шуыса. Аслэсьтыд юаны луоз: «Уг кельтылӥськы-а мон кенешлэсь пумиськонъёссэ?» Пумиськонъёс кужым сёто азьланяз но Иеговалы ужаны-тыршыны, озьы ик вын-агайёсын но сузэр-апайёсын вераськон милесьтым мылкыдмес ӝутэ (Матф. 11:28). Со сяна, малпаське таӵе юанъёс вылын: тӥ Библиез ялан эскериськоды-а? Семьяды вань ке, котькуд арняе семьяен йыбырттондэс ортчытъяськоды-а? Нош тӥ огнады улӥськоды ке, Библиез мур эскерон понна, дырдэс висъяськоды-а, озьы ик, кызьы сое семьяосын каро? Ас югдурады лэсьтӥськоды-а ваньзэ, мае быгатӥськоды, тодытон но дышетскисьёсты дасян понна?

²⁰ Малы та юанъёс вылын малпаськыны кулэ? Библиын вераське, Иегова милесьтым «сюлэмъёсмес эскере, вань малпанъёсмылэсь бергамзэс тодэ» шуыса. (Лыдӟе 1 Паралипоменонэз 28:9.) Милемлы но сое ик кароно. Тӥ валаськоды ке, пуктэм ужпумъёстэс яке малпаськон амалдэс тупатоно шуыса, вӧсяське Иеговалы, юрттэт курыса. Али тужгес но тупась дыр вуоно шуг-секытъёслы дасяськыны. Номыр но медаз люкеты тупась дырез визьмо кутыны!