1, 2. Кыӵе музъемзуркан сярысь, кудӥз асьме дыре луэ, Аггей пророк азьпалзэ ивортыса вераз?

 «КӦНЯ КЕ минут куспын вузкаронниос но вуж коркаос куашказы», «Котькытын огыр-бугыр вал... Тросэз веразы, со ог кык минут кыстӥськиз шуыса, нош мыным туж кема кадь потӥз» — озьы верало соос, кинъёс 2005-тӥ арын Непал шаерын луэм музъемзурканэз адӟоно луизы. Тӥ но та выллем учыръёсын пумиськиды ке, кышкыт тодэ ваёнъёс ӝог гинэ йырысьтыды уз кошке, дыр.

² Нош туннэ ми мукет музъемзурканэз адӟиськомы. Со одӥг карын яке шаерын гинэ уг ортчы. Та музъемзурканэз вань адямиос шӧдо. Со трос дасо аръёс ӵоже кыстӥське ини. Тани кызьы со сярысь Аггей пророк азьпалзэ ивортыса вераз: «Уго тазьы шуэ Саваоф Кузё-Инмар: эшшо одӥг пол,— со ӝоген луоз, Мон сэзъяло инмез но музъемез, зарезез но кӧс интыез» (Агг. 2:6).

3. Маин пӧртэм луэ «зуркатон», кудӥз сярысь Аггей вераз, инкуазь шимучырлэсь?

³ «Зуркатон», кудӥз сярысь гожъяз Аггей, пӧртэм луэ инкуазь шимучырлэсь, кудӥз куашкатонъёс гинэ вае. Ачиз Иегова вераз, со умой бервылъёс ваёз шуыса: «Вань калыкъёсты зуркато, соку вань калыкъёс пӧлысь быръемъёс лыктозы, соку Мон та Коркаез данлыкен тырмыто,— шуэ Саваоф Кузё-Инмар» (Агг. 2:7). Мае возьматэ та азьпалзэ ивортон соослы, кинъёс Аггей дыръя улӥзы? Мае со возьматэ милемлы? Ойдолэ эскеромы та юанъёсты но тодомы, кызьы ми пыриськыны быгатомы адямиосты «зуркатонэ», кудӥз сярысь азьпалзэ ивортыса верамын вал.

4. Малы Иегова аслаз калыкез доры Аггей пророкез ыстӥз?

⁴ Иегова Аггей пророклы туж кулэ луись уж сётӥз. Тодамы ваёмы, мар луиз солэсь азьло. Аггей вал, дыр, соос пӧлын, кинъёс асьме вакытлэсь азьло 537-тӥ арын вавилон пленысь Иерусалиме берытскизы. Ӝоген та оскымон ужась-тыршисьёс выльысь пуктыны кутскизы Иеговалэсь корказэ, яке храмез, но солы инъет понӥзы (Езд. 3:8, 10). Нош кӧня ке дыр ортчыса, соослэн мылкыдзы куашказ. Бускель калыкъёс израиль калыклы пумитъяськыны кутскизы. Жаляса верано луэ, израиль калык пуктӥськон-тупатъян ужзэ кельтӥз (Езд. 4:4; Агг. 1:1, 2). Ӵапак соин асьме вакытлэсь азьло 520-тӥ арын Иегова косӥз Аггеез израиль калыклэсь мылкыдзэ ӝутыны кутскем ужзэс йылпумъяны (Езд. 6:14, 15) b.

5. Малы Аггейлэн иворез Инмарлэсь калыксэ юнматыны кулэ вал?

⁵ Ивор, кудзэ Аггей израиль калыклы вераз, Иеговалы осконзэс юнматыны кулэ вал. Пророк таӵе кылъёсын вазиськиз еврей калыклы, кудӥзлэн мылкыдыз куашкамын вал: «Сэзь-сэзь кариськы, музъем вылысь вань калык,— шуэ Кузё-Инмар. Ужалэ, Мон тӥледын,— шуэ Саваоф Кузё-Инмар» (Агг. 2:4). Висъялэ саклыктэс, Иегова ассэ Саваоф Кузё-Инмар, яке ожгарчиослэн Инмарзы, шуыса нима. Малы? Солэн израиль калыклы тодаз вайытэмез потэ вал, со туж трос кылчинъёсын кивалтэ шуыса. Озьыен, еврей калыклы быдэсак Инмарлы оскиськыны кулэ вал, соку соос солэсь эриксэ быдэстыны быгатысалзы.

6. Кытчы вуттыны кулэ вал Иеговалэн вань калыкъёсты «зуркатэмез»?

⁶ Аггей пыр Иегова вераз: «Вань калыкъёсты зуркато». Озьы Иегова кылзэ сётӥз израиль калыклы, кудӥзлэн мылкыдыз куашкамын вал, «зуркатыны» Персиез, кудӥз со дыре дунневыл держава вал. Соку солэн музъемаз трос пӧртэм калыкъёс улӥзы. Кытчы вуттоз та «зуркатон»? Нырысь Инмарлэн ужась-тыршисьёсыз храмез пуктонзэс йылпумъялозы, нош собере еврей луисьтэм калыкъёс тупатэм храмын Иеговалы израиль калыкен ӵош йыбыртъялозы. Аггейлэн иворез Инмарлэсь калыксэ юнматӥз, луоз! (Зах. 8:9).

7. Кыӵе уже, кудӥз вань калыкъёсты «зуркатэ», ми пыриськиськомы? Валэктэ.

⁷ Кызьы Аггейлэн азьпалзэ ивортыса верамез асьме нуналъёсы быдэсме? Иегова нош ик вань калыкъёсты «зуркатэ». Ми солы та ужын юрттӥськомы. Кызьы? Ойдолэ малпаськомы. 1914-тӥ арын Иегова Иисус Христосэз инмысь Эксэйлыказ эксэе пуктӥз (Пс. 2:6). Эксэйлыклэн кивалтыны кутскемез та дуннеысь кивалтӥсьёс понна урод ивор вал, малы ке шуоно со возьматӥз, язычникъёслэн дырзы йылпумъяськиз шуыса. Мукет кылъёсын вераса, вуиз дыр, куке музъем вылын Иеговаен пуктэм одӥг но кивалтӥсь ӧй вал ини (Лука 21:24). Инмарлэн ужась-тыршисьёсыз тае валазы но котькытын вераны кутскизы, Инмарлэн Эксэйлыкез гинэ вуоноезлы оскон сётэ шуыса. 1919-тӥ арысен соос тужгес но ӟырдыт мылкыдын тодыто Эксэйлык сярысь та ӟеч иворез. Со быдэс дуннеез «зуркатэ» (Матф. 24:14).

8. Псалтирьын 2:1—3 гожтэмъя, кызьы учко тросэз адямиос Эксэйлык сярысь ивор шоры?

⁸ Кызьы учко адямиос та ивор шоры?  Тросэз уродэн учко. (Лыдӟе Псалтирез 2:1—3.) Вераны луоз, калыкъёс бугыръясько но Иеговаен пуктэм эксэез кивалтӥсен уг лыдъяло. Эксэйлык сярысь ивор, кудзэ ми тодытӥськомы, соос понна шумпотон ивор уг луы. Со сяна, куд-ог кивалтӥсьёс тодытон ужмес нуыны но уг лэзё! Тросэз кивалтӥсьёс верало, соос Инмарлы ужало-тыршо шуыса, нош асьсэлэн кивалтон ужзэс кельтэмзы уг поты. Туннэ, нырысетӥ даурын сямен ик, кивалтӥсьёс Иисуслэсь дышетскисьёссэ уйыло-улляло. Озьы соос Иеговаен пуктэм эксэйлы пумит мыно (Ап. уж. 4:25—28).

9. Мар каре Иегова, куке адӟе, кызьы адямиос уродэн учко Эксэйлык сярысь ивор шоры?

⁹ Мар каре Иегова, куке адӟе, кызьы адямиос уродэн учко Эксэйлык сярысь ивор шоры? Валэктон шедьтыны быгатомы Псалтирьысь 2:10—12: «Визьмаське, эксэйёс, валатске, музъем выл судьяос! Кузё-Инмарлы кышканэн тыршыса ужалэ, сюлэмды куалекъяса шумпотэлэ. Со вожзэ медаз потты, сюрес вылады медад быре шуыса, Пиез сӥлы карелэ, уго солэн вожпотонэз ӝоген ӝуатскоз». Иегова туж чидась. Со тушмонъёсызлы дыр сётэ малпаськыны но солэн Эксэйлыкез пала кариськыны. Нош дыр туж ӧжыт кылиз ини. Ми улӥськомы та дуннелэн «берпум аръёсаз» (2 Тим. 3:1; Ис. 61:2). Ӵапак али адямиослы туж кулэ зэмлыкез тодыны но Иеговалэн ужась-тыршисьёсыз луыны. Ӝегатскыны дыр ӧвӧл!

10. Аггейлэн 2:7—9 гожтэмъя, кызьы учкозы адямиос ивор шоры, кудӥз калыкъёсты «зуркатэ»?

¹⁰ Озьы ке но луозы соос но, кинъёс та ивор шоры умоен учкозы. Кызьы азьпалзэ ивортыса вераз Аггей, Иегова музъемез «зуркатоз» но «вань калыкъёс пӧлысь быръемъёс лыктозы», яке зӥбыт-востэм адямиос ӵош люкаськозы, Иеговалы йыбыртъян понна c. (Лыдӟе Аггейлэсь 2:7—9.) Исаия но Михей пророкъёс озьы ик азьпалзэ ивортыса веразы, «берпуметӥ аръёсы» озьы луоз шуыса (Ис. 2:2—4; Мих. 4:1, 2).

11. Мар кариз Кен нимо агай, куке нырысьсэ кылӥз Эксэйлык сярысь иворез?

 ¹¹ Тодомы, кызьы калыкъёсты «зуркатӥсь» ивор шоры Кен нимо агай учкиз, кудӥз али валтӥсь кивалтонниын ужа-тырше. Со али но тодэ на со дырез, куке 40 ар талэсь азьло со нырысьсэ кылӥз Эксэйлык сярысь иворез. Кен вера: «Мон шумпотӥ, куке тодӥ, ми та дуннелэн берпум аръёсаз улӥськомы шуыса. Мон валай, Инмарлы ярамон луон но пырак улон понна, та дунне вылэ оскиськемысь дугдоно но юн мылкыдын Иегова пала кариськоно шуыса. Та сярысь мон Иеговалы вӧсяськи но ӝог гинэ ужпум кутӥ. Мон та дуннеез кельтӥ но утиськон шедьтӥ Инмарлэн Эксэйлыказ, кудзэ номыр но уз куашкаты».

12. Кызьы берло аръёсы Иеговалэн духовной храмаз солэсь нимзэ данъяло?

¹² Адӟиське, Иегова аслаз ужась-тыршисьёсызлы юрттэ шуыса. Берло аръёсы соослэн лыдзы трослы будӥз. 1914-тӥ арын Эксэйлыкез ивортӥсьёслэн лыдзы кӧня ке сюрс гинэ вал, нош али Иеговалы 8 миллионлэсь тросгес адямиос вань сюлмысьтызы ужало-тыршо! Со сяна, трос миллион мукет адямиос котькуд аре милемын ӵош Тодэ ваён ӝытанэз пусъё. Зэм, «вань калыкъёс пӧлысь быръемъёс» Иеговалэн духовной храмезлэсь музъем вылысь азбаръёссэ тырмыто, кудӥз возьматэ Иеговаен пуктэм чылкыт йыбырттонэз. Озьы ик Иеговалэсь нимзэ данъя со, кызьы адямиос, кудъёсыз солы йыбыртъяны кутско, асьсэлэсь улонзэс быдэсак вошто но, шуыны луоз, выль адями луо (Еф. 4:22—24).

13. Кыӵе азьпалзэ ивортонъёсын Иеговалэн калыкезлэн будэмез сярысь вераське на? (Учке вылбамысь суредэз.)

¹³ Иеговалэн калыкезлэн паймымон будэмез сярысь Аггей пророк гинэ ӧз вера. Та сярысь озьы ик азьпалзэ ивортыса гожтэмын Исаиялэн книгаяз 60-тӥ люкетын. Кылсярысь, 22-тӥ кылбурын верамын: «Пичи бордысь сюрсэз потоз, ваньмызлэсь лябезлэсь кужмо калык кылдоз. Мон, Кузё-Инмар, ӝогомыто тае ас дыраз быдэстыны». Тросгес но тросгес адямиос Инмарлэн калыкез пала карисько бере, ми бадӟымесь азинсконъёсты адӟиськомы. Эксэйлык сярысь шумпотон иворез тодытон понна, та адямиос  асьсэлэсь быгатонлыкъёссэс уже куто. Солы луыса Иеговалэн ужась-тыршисьёсыз, кызьы вераз Исаия, «калыкъёслэсь йӧлзэс» уже куто (Ис. 60:5, 16). Ми туж тау кариськомы та дуно вын-агайёслы но сузэр-апайёслы соослэн тыршемзы понна. Али ми 240 шаеръёсын но интыосын тодытӥськомы, нош милям публикациосмы 1000-лэсь но тросгес кылъёсы берыктӥсько.

14. Кыӵе быръён лэсьтыны кулэ котькудӥзлы?

¹⁴ Асьме нуналъёсы тодытон уж, кудӥз калыкъёсты «зуркатэ», адямиослы быръён сётэ: Инмарлэн Эксэйлыкез пала кариськыны яке та дуннеысь кивалтӥсьёс вылэ оскиськыны. Котькуд адями ачиз быръён лэсьтыны кулэ. Зэм но, Иеговалэн ужась-тыршисьёсыз шаерысьтызы катъёслэсь кылзӥсько, нош политика удысын соос нокин пала кариськытэк уло (Рим. 13:1—7). Соос тодо, Инмарлэн Эксэйлыкез гинэ вань шуг-секытъёсты сэрттоз-пертчоз шуыса. Нош со Эксэйлык та дуннеен нокызьы но герӟаськемын ӧвӧл (Иоанн 18:36, 37).

15. Кызьы Усьтӥськон книгаын возьматэмын, Инмарлы оскымон луэммы эскеремын луоз шуыса?

¹⁵ Кызьы гожтэмын Усьтӥськон книгаын, берпуметӥ аръёсы Инмарлы оскымон луэммы эскериськыны кулэ. Уйылон-уллянъёс эшшо но золгес луозы, та дуннеысь кивалтӥсьёс милемыз кужмысь косозы ас палазы кариськыны но уйылозы-уллялозы соосты, кинъёс соослэсь уз кылзӥське (Усьт. 13:12, 15). Соос косозы «покчиослы но, бадӟымъёслы но, узыръёслы но, кураськисьёслы но, эркын улӥсьёслы но, ляльчиослы но бур ки вылазы яке кымесазы пус» пуктыны (Усьт. 13:16). Вашкала дыръёсы ляльчиослы пус пуктылӥзы, кудӥз возьматэ вал, кин соослэн кузёзы луэ. Озьы ик асьме нуналъёсы но адямиос возьмало, ваньмызлэн кымесазы но бур ки вылазы пус пуктэмын луоз шуыса, яке адямиос малпанъёсынызы но ужъёсынызы возьматыны кулэ, соос та дуннелэн кивалтӥсьёсыз пала карисько шуыса.

16. Малы тужгес но али Иеговалы осконмес юнматоно?

¹⁶ Лэзёды-а тӥ ас вылады пус пуктыны, та дуннеысь кивалтӥсьёс пала кариськемдэс возьматон понна? Уд ке, соку дась луэ секыт но кышкыт учыръёсын пумиськыны. Библия верамъя, «нокин басьяськыны но, вузаны но уз ни быгаты,— соос сяна, кинъёслэн та пуссы... пуктэмын луоз» (Усьт. 13:17). Но Инмар приговор ялӥз ини со адямиослы, кинъёслэн та пуссы вань (Усьт. 14:9, 10). Соин ик ми, Иеговалэн ужась-тыршисьёсыз, бырйиськомы мукет пусэз. Вераны луоз, ми ки выламы гожтӥськомы: «Мон — Кузё-Инмарлэн» (Ис. 44:5). Али котькудмылы аслэсьтыз юаны кулэ: мон Инмарлы быдэсак оскымон луисько-а? Озьы ке, Иегова милемлы шумпотыса вералоз, ми солэн луиськомы шуыса.

17. Мае милемлы тодамы возёно Иеговалэн чиданэз пумысен?

¹⁷ Та лек дуннелэн берпум аръёсаз Иегова туж бадӟым чиданзэ возьматэ. Солэн потэ, «нокин но медаз быры» шуыса (2 Пётр 3:9). Инмар вань адямиослы луонлык сётэ ӧпкельыны но визьмо ужпумъёс кутыны. Нош солэн чиданэзлы пум вуоз. Соос, кинъёс пумит луозы Инмарлэн Эксэйлыкез пала кариськыны, пумиськозы сыӵе ик бервылъёсын, кудъёсыныз пумиськиз фараон. Иегова солы Моисей пыр вераз: «Аслэсьтым киме ӝутӥ бере, тонэ но, тынэсьтыд калыктэ но сьӧдчерен погыртыны быгатысал, соку музъем вылысь тон быдтэмын луысалыд: Аслэсьтым кужымме тон вылын возьматон понна, Мынэсьтым нимме быдэс дунне выл  мед тодоз шуыса, со понна Мон тонэ улэп кельтӥ» (Пот. 9:15, 16). Собере вань калыкъёс тодозы: Иегова — одӥг гинэ зэмос Инмар (Иез. 38:23). Ку со луоз?

18. а) Кыӵе «зуркатон» сярысь вераське Аггейлэн 2:6, 20—22? б) Кытысь ми тодӥськомы, Аггейлэн кылъёсызлы быдэсмыны кулэ на шуыса?

¹⁸ Лыдӟе Аггейлэсь 2:6, 20—22. Кӧня ке сю аръёс ортчыса, апостол Павел Инмарлэн духезлэн валтэмез улсын валэктӥз, Аггейлэн кылъёсызлы быдэсмыны кулэ на шуыса. Нырысь Павел Иеговалэсь кылсётонзэ вераз: «Эшшо огпол музъемез гинэ ӧвӧл, инмез но зуркато». Нош собере ватсаз: «„Эшшо огпол“ шуэм кылъёс тае возьмато: зуркатыны луонтэмез гинэ быдэс мед кылёз шуыса, ваньмыз, мар кылдытэмын-лэсьтэмын, ваньмыз зуркасез воштӥськоз» (Евр. 12:26, 27). Та «зуркатон» пӧртэм луэ солэсь, мар гожтэмын Аггейлэн 2:7. Куке таяз учыре Инмар инмез но музъемез «зуркатоз», ваньзы, кинъёс фараон сямен Иеговалэн кивалтэтэзлы пумит мыно, пыраклы быдтэмын луозы.

19. Мар куашкатэк кылёз, куке Иегова инмез но музъемез «зуркатоз», но кытысь ми сое тодӥськомы?

¹⁹ Мае Павел вераны тырше вал, куке гожтӥз: «Зуркатыны луонтэмез гинэ быдэс мед кылёз»? Со азьланьтэ: «Зуркасьтэм-вырӟылӥсьтэм эксэйлыкез асьмеос басьтомы но Инмарлы тау карыса уломе, зӥбыт кариськыса, кышканэн Инмарлы ярамон тыршоме» (Евр. 12:28). Иегова инмез но музъемез «зуркатэм» бере, та вуж дуннелэсь тузон гинэ кылёз. Нош Инмарлэн Эксэйлыкез «пумтэм вапумъёс ӵоже сылоз». Сое нокин но куашкатыны уз быгаты! (Дан. 2:44; Пс. 109:5, 6).

20. Кыӵе быръён лэсьтыны кулэ адямиослы но кызьы ми соослы юрттыны быгатомы?

²⁰ Дыр туж ӧжыт кылемын ини! Адямиослы быръён лэсьтоно. Соос ужпум кутӥзы ке, та дуннелэн куронъёсызъя улыны, быдтэмын луозы. Нош соос ужпум кутӥзы ке Иеговалы ужаны-тыршыны но улонзэс воштыны, солэсь эриксэ быдэсъян понна, соку пырак улозы (Евр. 12:25). Тодытон уже пыриськыса, ми адямиослы юрттыны быгатомы та кулэ луись юанын быръён лэсьтыны. Вань на трос адямиос, кудъёсыз Инмарлэн Эксэйлыкез пала кариськыны быгатозы. Ойдолэ соосты утчаломы но Иисус Христослэсь кылъёссэ тодамы возёмы: «Вань калыкъёс мед тодозы шуыса, Эксэйлыклэн та Евангелиез быдэс дунне вылын тодытэмын луоз; собере пум вуоз» (Матф. 24:14).