1. Мае шӧдыны быгатэ христиан мурт, кудӥзлэсь ӵыжы-выжызэ кенешысь потто?

 КЫӴЕ вӧсь луэ, куке матысь адямиез кенешысь потто! Оло нош, тӥледлы но таӵе шӧдонъёс тодмо. Тани мар вера Хильда b сузэр: «Куке мынам картэ кулӥз, кудӥныз ми 41 ар ӵош улӥмы, мон малпай, талэсь но кышкытгес номыр но луыны уг быгаты ни шуыса. Нош куке мынам пие кельтӥз кенешез, кышнозэ но нылпиоссэ, та эшшо но, эшшо но секытгес вал».

2, 3. Мае шӧдэ Иегова, куке куд-ог ужась-тыршисьёсыз солэсь палэнско? (Псалтирь 77:40, 41).

² Пуктэ син азяды, макем секыт вал Иеговалы, куке солэсь палэнскизы куд-ог кылчинъёс, солэн пиосыз! (Иуда 6). Нош кыӵе вӧсь кариз сое израиль калык! Иегова соосты яратӥз, нош соос выльысь но выльысь солы пумит ӝутскылӥзы. (Лыдӟе Псалтирез 77:40, 41.) Юн оске, инмысь Атаймылы ӵапак озьы ик вӧсь луэ, куке матысь ӵыжы-выжыосмы пӧлысь кин ке но сое кельтэ. Иегова котькинлэсь умой вала, мае тӥ шӧдӥськоды. Милям гажась-жалясь Инмармы одно ик тӥледлы юрттоз.

³ Та статьяын ми эскеромы, мар кароно, Иегова милемлы та куректонэз чиданы мед юрттоз шуыса. Озьы ик ми учкомы, кызьы ми асьмеос юрттыны быгатомы со вын-агайёслы но сузэр-апайёслы, кудъёсызлэсь ӵыжы-выжызэс кенешысь поттӥзы. Нош нырысь ойдолэ саклыкмес висъяломы солы, кыӵе малпанъёсты милемлы палэнтыны кулэ.

4. Мае шӧдо тросэз анай-атайёс, куке пиналзы Иеговаез кельтэ?

⁴ Ӵем дыръя анай-атайёс, кудъёсызлэн нылпизы Иеговаез кельтӥз, малпасько, малы таӵе югдур кылдӥз, но тыршо валаны, кыӵе янгыш соос лэсьтӥзы. Тани кызьы аслаз шӧдонъёсыз  сярысь вера Льюис нимо агай, кудӥзлэсь пизэ кенешысь поттӥзы: «Мон асме янгыше уськытӥ. Таин сэрен мон кышкыт уйвӧтъёс адӟылӥ. Куддыръя мон бӧрдӥ. Сюлмы пуртэн бышкалтэм кадь вӧсь луылӥз». Куке таӵе ик шуг-секытэн Элизабет сузэрлэн семьяез пумиськиз, со кытчы пырон инты ӧз шедьтылы но малпаз: «Мае мон шонертэм лэсьтӥ? Мон янгыш, пие Иеговаез ӧз яраты шуыса».

5. Кин кыл кутэ, куке адями Иеговаез кельтыны ужпум кутэ?

⁵ Тодамы возёно: Иегова котькудмылы бырйыны эрик сётӥз. Вераны луоз, ми асьмеос ужпум кутӥськомы, Инмарлэсь кылзӥськоно-а яке ӧвӧл-а шуыса. Куд-ог егитъёс, кудъёсызлэн анай-атайзы умой адӟем карон соослы ӧз возьматэ, ужпум кутӥзы Иеговалы ужаны-тыршыны. Соос азьланяз но солы оскымон кыльыны тыршо. Нош вань сыӵе семьяос, кудъёсаз анай-атайёссы вань сюлмысьтызы пиналъёссэс дышетӥзы Иеговаез яратыны. Но будэмзы бере пиналъёссы Иеговаез кельтӥзы. Кызьы гинэ медам луы, ми пӧлысь котькудӥз ачиз ужпум кутыны кулэ, Иеговалы ужано-тыршоно-а яке ӧвӧл-а шуыса (Иис. Н. 24:15). Соин ик, дуно анай-атайёс, тӥляд нылпиосты зэмлыкез кельтӥзы ке, куриськомы тӥледыз, асьтэды янгыше уськытон мылкыдын нюръяське!

6. Кызьы нылпиос вылын шӧдӥськыны быгатэ анай-атайзылэн кенешез кельтэмзы?

⁶ Нош куддыръя зэмлыкез анай яке атай кельтэ. Со семьяысьтыз но кошкыны быгатэ (Пс. 26:10). Озьы луэ ке, со туж уродэн шӧдӥськыны быгатэ пинал вылын, малы шуоно нылпиос ӵем дыръя анай-атайзылэсь адӟем каро. Эстер сузэр, кудӥзлэн атаез кенешысь поттэмын вал, вера: «Мон ӵем бӧрдӥ, малы ке шуоно адӟи: атае огшоры гинэ зэмлыкез ӧз палэнты — со юри Иеговаез кельтӥз. Мон яратӥсько атайме, соин ик сое кенешысь поттэмзы бере мон котьку но со понна сюлмаськыса улӥ. Озьы ик мынам кылдӥз висёнэ, кудӥз сэрен мон нокыӵе мугтэк но туж кышканы кутскылӥ».

7. Кызьы Иегова учке соос шоры, кинъёслэн анай-атайзы кенешысь поттэмын?

⁷ Дуно егит вын-агайёсмы но сузэр-апайёсмы, кудъёсызлэн анай-атайзы кенешысь поттэмын, тӥледлы сямен ик, милемлы но вӧсь. Куриськомы, юн оске: Иегова тодэ, макем тӥледлы секыт. Со яратэ но дунъя тӥледыз, малы ке шуоно тӥ солы оскымон кылиськоды. Ми но, тӥляд вын-агайёсты но сузэр-апайёсты, туж дунъяськомы тӥледыз. Тодады возе: тӥ кыл уд кутӥське анай-атайдылэн кутэм ужпумзы понна. Кызьы верамын вал ини, Иегова котькуд адямилы бырйыны эрик сётӥз. Котькуд адями, кудӥз аслэсьтыз улонзэ Иеговалы сӥзиз но пылатӥськиз, аслаз ужъёсыз понна ачиз кыл кутэ (Гал. 6:5).

8. Мар кароно, куке возьмаськомы матысь адямимылэсь кенеше берытскемзэ? (Озьы ик учке « Иегова доры берытскы» рамкаез.)

⁸ Куке матысь адямиосмы пӧлысь кин ке но Иеговаез кельтэ, валамон, ми оскиськомы, со куке но выльысь Иегова доры берытскоз шуыса. Нош мар карыны ми быгатомы, солэсь берытскемзэ возьмакумы? Вань кужмысьтымы Иеговаен кусыпъёсмес юнматоно. Соку ми умой адӟем карон возьматомы ӵыжы-выжыосмылы, озьы ик солы но, вылды, кин кенешысь поттэмын.  Нош эшшо милям кужыммы луоз куректонэз чиданы. Ойдолэ эскеромы, мар милемлы юрттыны быгатоз.

9. Мар кароно, Иегова милемыз юнматыны мед быгатоз шуыса? (Озьы ик учке « Библиысь кылбуръёс, кудъёсыз юнматозы кенешысь поттэм адямилэсь ӵыжы-выжыоссэ» рамкаез.)

⁹ Лэсьтэ ваньзэ, осконды медаз лябӟы шуыса. Таӵе учыре туж кулэ астэ но, семьядэ но юнматыны. Кызьы сое лэсьтоно? Инмарлэсь Кылзэ ялан лыдӟе, со вылын малпаське но кенешлэн пумиськонъёсаз ветлэ. Озьы тӥ Иеговалы луонлык сётоды тӥледыз юнматыны. Джоанна сузэр, кудӥзлэн атаез но апаез зэмлыкез кельтӥзы, вера: «Куке мон лыдӟисько Авигея, Есфирь, Иов, Иосиф но Иисус сярысь, мыным капчигес луэ. Соослэн учыръёссы юртто мыным урод малпанъёсме палэнтыны но буйгатскыны. Нош эшшо мыным туж юртто сайтысьтымы кырӟанъёс».

10. Кызьы Псалтирьысь 31:6—8 кылъёс юртто милемлы урод шӧдонъёсынымы нюръяськыны?

¹⁰ Вералэ Иеговалы асьтэлэн сюлмаськонъёсты сярысь. Куке урод шӧдонъёс зӥбо тӥледыз, вань сюлмысьтыды яратӥсь Инмармес куре юрттыны тӥледлы югдурды шоры солэн синъёсыныз учкыны. Соку Иегова тӥледлы визьлык сётоз но шонер сюрес возьматоз. (Лыдӟе Псалтирез 31:6—8.) Зэм но, куддыръя Иеговалы вераны капчи ӧвӧл, мае тӥ зэмзэ ик шӧдӥськоды. Но Иегова туж умой вала, макем тӥледлы вӧсь. Со туж яратэ тӥледыз но куре асьтэлэсь сюлэмдэс солы усьтыны (Пот. 34:6; Пс. 61:8, 9).

11. Еврейёслы 12:11 лыдэ басьтыса, малы милемлы Иеговалэн кутэм ужпуменыз соглаш луоно? (Озьы ик учке « Кенешысь поттон возьматэ, Иегова милемыз яратэ шуыса» рамкаез.)

¹¹ Тӧроослэн кутэм ужпуменызы соглаш луэ. Кенешысь поттон — со Иеговаен пуктэм радлык. Та тужгес но умой амал кенешысь поттэм адямилы юрттыны. Со сяна, со мукетъёсызлы  но пайда вае. (Лыдӟе Еврейёслы 12:11.) Нош куддыръя тӧроослэн кутэм ужпуменызы кин ке но соглаш уг луы. Тодамы возёно: та югдур сярысь ми ваньзэ ум тодӥське. Нош со, кин тӧроосын соглаш уг луы, ваньзэ лыдэ басьтытэк кельтыны быгатэ со сярысь, мае лэсьтӥз кенешысь поттэм адями. Соин ик визьмо луоз оскыны, тӧроос Библиысь возетъёсты пыр-поч эскеризы но «Кузё-Инмарлэсь судзэ лэсьтӥзы» шуыса (2 Пар. 19:6).

12. Малы соглаш луыны кулэ Иеговалэн тупатон амалъёсыныз? Вералэ пример.

¹² Тӥ соглаш луиськоды ке тӧроослэн кутэм ужпуменызы матысь адямидэс кенешысь поттыны, озьы тӥ юрттӥськоды солы выльысь Иегова доры берытскыны. Элизабет сузэр, кудӥзлэн кылъёсыз гожтэмын вал ини, вера: «Туж секыт вал бадӟым пиенымы вераськемысь дугдыны! Нош берытскемез бере со вераз, сое кенешысь поттыны кутэм ужпум шонер вал шуыса. Озьы ик со вераз на, со тросэзлы дышетскиз шуыса. Табере мон оскисько: Иегова ваньзэ шонер лэсьтэ». Нош тани мар вераз Марк, Элизабет сузэрлэн картэз: «Дыр ортчыса, пимы мыным вераз, солэн берытскемез потӥз, малы ке шуоно ми соин вераськемысь дугдӥмы. Мон туж шумпотӥсько, Иегова милемлы кышноеным кылзӥськись луыны юрттӥз шуыса!»

13. Мар юрттоз тӥледлы секыт мылкыдын нюръяськыны?

¹³ Асьтэлэн шӧдонъёсты сярысь вералэ эшъёстылы, кудъёсыз тӥледыз валалозы. Дырдэс ортчытъялэ юн осконэн вын-агайёсын но сузэр-апайёсын — соос юрттозы тӥледлы умой мылкыдын улыны (Мад. 12:25; 17:17). Джоанна сузэр, кудӥз сярысь верамын вал ини, тазьы шуэ: «Мыным туж мӧзмыт вал! Но оскымон эшъёсы юрттӥзы мыным та шуг-секыт пыр потыны». Нош мар кароно, кенешысь кинлэн ке кылъёсыз сэрен тӥледлы эшшо но секытгес луэ ке?

14. Малы милемлы вын-агайёс но сузэр-апайёс вылэ йыркуръяськоно ӧвӧл но соосты вань сюлмысьтымы простить кароно?

¹⁴ Вын-агайёс но сузэр-апайёс вылэ эн йыркуръяське. Ваньзы шонер кылъёс бырйыны уз быгатэ, дыр (Иак. 3:2). Ми тырбыдэстэмесь, соин ик паймонэз ӧвӧл, кин ке тупась кылъёс ӧз шедьты ке яке, ачиз но валатэк, милемыз вӧсь кариз ке. Тодады возе апостол Павеллэсь визь-кенешсэ: «Ог-огдэс чидаса улэ, кинлэн ке кин ке вылэ йыркурез вань ке, ог-огдылы простить каре» (Кол. 3:13). Одӥг сузэр, кудӥзлэн пиез кенешысь поттэмын вал, вера: «Иегова юрттӥз мыным вын-агайёсты простить карыны. Соос тыршизы лэсьтыны сое, мар шонер луэ, соослэн котьку ик уг пӧрмы вал ке но». Нош табере вераськомы, кызьы кенеш юрттыны быгатэ со христианъёслы, кудъёсызлэн ӵыжы-выжыоссы кенешысь поттэмын.

15. Кызьы ми юрттыны быгатӥськомы соослы, кинъёслэсь ӵыжы-выжызэс алигес кенешысь поттӥзы?

¹⁵ Кенешысь поттэм адямилэн семьяезлы саклыктэс висъялэ но яратэмдэс возьматэ. Куке Мириам сузэрлэн выныз Иеговалэн  Адӟись-Ивортӥсез луэмысь дугдӥз, сузэрмылы кенешлэн пумиськонъёсаз ветлыны туж секыт вал. Со валэктэ: «Мон кышкай пӧртэм вераськонъёслэсь. Но мынам вань туж умой эшъёсы, кудъёсыз юрттӥзы мыным та шуг-секытъёсы пыр потыны. Соос кенешысь поттэм выны сярысь номыр уродзэ ӧз вералэ. Соослы луыса куректонэ дыръя мон одӥгнам ӧй вал». Мукетыз сузэр тодаз вае: «Куке милесьтым пимес кенешысь поттӥзы, матысь эшъёсмы милемлы картэным юрттыны лыктӥзы. Куд-огъёсыз ӧз тодэ, мае вераны. Кин ке но монэн ӵош бӧрдӥз, нош кин ке но берлогес открытка лэзиз. Ваньмыз та мыным туж кулэ вал!»

16. Кызьы кенеш азьланяз но юрттыны быгатэ кенешысь поттэм адямилэн ӵыжы-выжыосызлы?

¹⁶ Азьланяз но юнматэ кенешысь поттэм адямилэсь семьязэ. Али соослы тужгес но кулэ возьматыны яратэмдэс но сюлмаськемдэс (Евр. 10:24, 25). Жаляса верано луэ, куддыръя кенешысь поттэм адямилэн ӵыжы-выжыосыз асьсэды шӧдо, соос но кенешысь поттэмын кадь шуыса. Лэсьтэ ваньзэ, соос асьсэды озьы медаз шӧдэ шуыса! Тужгес но кулэ ушъяны но мылкыдзэс ӝутыны егит вын-агайёслэсь но сузэр-апайёслэсь, кудъёсызлэн анай-атайёссы Иеговалы ужамысь-тыршемысь дугдӥзы. Мария сузэрлы, кудӥзлэн картэз зэмлыкез кельтӥз но семьяысьтыз кошкиз, туж юрттӥз кенешсы. Со вера: «Вын-агайёс но сузэр-апайёс мон доры ветлӥзы, сиён дасязы, озьы ик семьяен йыбырттонмес ортчытъяны юрттӥзы. Соос валазы, макем мыным секыт, но монэн ӵош бӧрдӥзы. Эшъёсы котьку дась вал монэ утьыны, куке мон сярысь умойтэм кылъёс вераллязы. Мар карысал мон соостэк!» (Рим. 12:13, 15).

17. Кызьы тӧроос буйгатыны быгато соосты, кинъёслэн мылкыдзы куашкамын?

¹⁷ Тӧроос, уже кутэ котькыӵе луонлыкез, кенешысь поттэм адямилэсь ӵыжы-выжыоссэ юнматон понна. Нырысь ик тӥ кыл кутӥськоды, сыӵе вын-агайёсты но сузэр-апайёсты буйгатон понна (1 Фес. 5:14). Вераське соосын кенеш азьын но кенеш бере. Ветлэ соос доры но соосын ӵош вӧсяське. Ӧтьылэ соосты ужан-тыршонэ, озьы ик дырын-дырын асьтэлэн семьяен йыбырттонады но. Тӧроослы сюлмаськыны кулэ соос сярысь, кинъёслэн  мылкыдзы куашкамын, но соослы гажам-жалямзэс но яратэмзэс возьматоно (1 Фес. 2:7, 8).

18. Мае возьма Иегова сьӧлыкам адямилэсь, 2 Пётрлэн 3:9 гожтэмъя?

¹⁸ Иеговалэн потэ, «нокин но медаз быры, ваньмыз ӧпкельыса сьӧлыкъёсызлэсь мед куштӥськоз шуыса». (Лыдӟе 2 Пётрлэсь 3:9.) Адями секыт сьӧлык лэсьтӥз ке но, Инмар азьло сямен ик солэсь улонзэ дунъя. Малпаське, кыӵе бадӟым дун тыриз Иегова, милемыз, сьӧлыкоосты, мозмытон понна: со аслэсьтыз яратоно Пизэ курбонлы сётӥз! Жаляменыз Инмар юрттыны тырше соослы, кинъёс сое кельтӥзы, но ӵектэ соослы выльысь берытскыны. Иегова оске, соос выльысь берытскозы шуыса. Тае возьматэ Иисуслэн йыромем пи сярысь мадёнэз (Лука 15:11—32). Тросэз соос пӧлысь, кинъёс зэмлыкез кельтӥзы, берлогес инмысь яратӥсь Атайзы доры берытскизы. Вын-агайёс но сузэр-апайёс соосты шумпотыса пумитазы. Сыӵе бадӟым шумпотон луиз Элизабет сузэрлэн улоназ но: солэсь пизэ выльысь кенеше пыртӥзы. Со вера: «Мон туж тау карисько соослы, кинъёс мыным юрттӥзы но мылкыдме ӝутӥзы юн осконэн улыны!»

19. Малы ми котьку но Иегова вылэ оскиськыны быгатӥськомы?

¹⁹ Ми котьку но оскиськыны быгатӥськомы Иегова вылэ. Со ноку но уз куры лэсьтыны сое, мар милемыз вӧсь карысал. Иегова шырыт сямо но жалясь Атай. Со яратэ ваньзэс, кинъёс сое ярато но солы йыбыртъяло. Иегова ноку но уз кельты милемыз, тужгес но соку, куке ми курадӟиськомы (Евр. 13:5, 6). Та кылъёслэсь шонер луэмзэс ас вылаз шӧдӥз Марк агай, кудӥз сярысь вераськиз ини. Со вера: «Куке милемлы секыт, Иегова котьку но милемын артэ». Иегова азьланяз но «мертантэм бадӟым кужым» сётоз (2 Кор. 4:7). Зэм, тӥляд матысь адямиды кенешез кельтӥз ке но, тӥ быгатӥськоды Иеговалы оскымон кыльыны но юн осконэн улыны!