1, 2. Мар милемлы кароно, шудо луон понна, Иеговалэн малпамезъя?

 МУКЕТЪЁСЫЗЛЫ юрттӥськыса, ми шумпотӥськомы (Ап. уж. 20:35). Озьы милемыз Иегова кылдытӥз. Возьматэ-а та, куке милемлы мукетъёсыз юртто, милемлы уг кельшы шуыса? Уг, со озьы ӧвӧл. Озьы ке но, куке ми асьмеос мукетъёсызлы мар ке но лэсьтӥськомы, со милемлы бадӟымгес шумпотон вае. Макем умой, ми озьы кылдытэмын шуыса! Малы?

² Иеговалэн малпамезъя, ми асьмеос асьмеды шудо карыны быгатӥськомы. Тросгес шумпотон басьтон понна, мукетъёсызлы юрттӥськыны кулэ. Ми туж паймымон кылдытэмын! (Пс. 138:14).

3. Малы Иегова шудо Инмар шуыса нимаське?

³ Библиын вераське, мукетъёсыз сярысь сюлмаськон шумпотон вае шуыса. Соин ик паймонэз ӧвӧл, Иегова — шудо Инмар шуыса (1 Тим. 1:11, ВД). Со нырысетӥез но самой шырыт сямоез, кин мукетъёсызлы кузьым лэсьтӥз. Апостол Павеллэн верамезъя, «ваньмы асьмеос Со бордын улӥськомы, азьлань мынӥськомы, улӥськомы-вылӥськомы» (Ап. уж. 17:28). Зэм, «котькудӥз ик ӟеч, дун-шектэм кузьым вылӥысь» — Иеговалэсь (Иак. 1:17).

4. Мар кароно, тросгес шумпотон басьтон понна?

⁴ Потэ-а тӥляд, мукетъёсыз сярысь сюлмаськон эшшо но трос шумпотон мед ваёз шуыса? Потэ ке, соку адӟем каре Иеговалэсь, шырыт сямо Инмармылэсь (Еф. 5:1). Та статьяын ми эскеромы, кызьы Иегова мукетъёсыз сярысь  сюлмаське. Озьы ик ми тодомы, мар кароно, ми малпамъя, ӟеч ужъёсмес уг дунъяло ке. Та статья милемыз юнматоз но азьланяз но ӟеч ужъёс лэсьтыны юрттоз. Озьы ми эшшо но шудо луомы.

ИЕГОВА КАДЬ, ШЫРЫТ СЯМОЕСЬ ЛУЭ

5. Мае сётэ милемлы Иегова?

⁵ Кытысь адӟиське Иеговалэн шырыт сямо луэмез? Тани куд-ог примеръёс. Иегова милемлы улон понна ваньзэ кулэзэ сётэ. Со уг возьматы, ми майбыр улӥськомы шуыса. Но Иеговалэн юрттэменыз милям ваньмыз кулэез вань. Кылсярысь, Инмар сюлмаське, милям сиёнмы, дӥськутмы но улон интымы мед луоз шуыса (Пс. 4:9; Матф. 6:31—33; 1 Тим. 6:6—8). Малы Иегова ваньзэ кулэзэ сётэ? Сётыны кулэ шуыса гинэ? Уг. Соку малы?

6. Мар сярысь верало кылъёс, кудъёсыз гожтэмын Матфейлэсь 6:25, 26?

⁶ Иегова ми сярысь сюлмаське, малы ке шуоно со милемыз туж яратэ. Тодамы ваёмы Иисуслэсь кылъёссэ, кудъёсыз гожтэмын Матфейлэсь 6:25, 26 (лыдӟе). Тылобурдоос сярысь Иисус шуиз: «Соос уг кизё, уг арало, кеносазы но уг люкало; но Инмысь Атайды сюдэ соосты». Собере со юаз: «Тӥ соослэсь трослы умоесь ӧвӧл-а?» Мар сярысь верало та кылъёс? Тылобурдоос но пудо-животъёс сярысь, Иеговалы аслаз ужась-тыршисьёсыз трослы дуногес пото. Инмар тылобурдоос сярысь сюлмаське бере, уката но со ми сярысь сюлмаськоз. Иегова — яратӥсь Атай. Соин ик со аслаз нылпиосызлы сиён-юон но дӥськут сётэ (Пс. 144:16; Матф. 6:32).

7. Кызьы ми быгатӥськомы Иеговалэсь адӟем карыны, агайёслы но сузэръёслы юрттӥськыкумы? (Озьы ик учке суредъёсты.)

⁷ Иегова сямен, ми но быгатӥськомы яратонмес уж вылын возьматыны. Вань-а тынад кенешад агайёс яке сузэръёс, кудъёсызлы сиён-юон яке дӥськут кулэ? Иегова соослы тон пыр юрттыны быгатэ. Шимучыръёс дыръя Иеговалэн калыкез ӝегатскытэк юрттӥськыны тырше. Кылсярысь, COVID-19 пандемия дыръя агайёс но сузэръёс сиён но дӥськут сётъязы соослы, кинъёслы со кулэ вал. Со сяна, тросэз дунневыл ужлы коньдонэн юрттӥськизы. Озьы агайёс но сузэръёс уже кутӥзы визь-кенешез, кудӥз гожтэмын Еврейёслы 13:16: «Эн вунэтэ ӟеч уж лэсьтылыны,  ог-огды сярысь сюлмаськыны, уго сыӵе курбонъёс Инмарлы ярамонэсь луо».

8. Малы тӥ Иеговаез тау кариськоды, тӥледлы кужым сётэмез понна? (Псалтирь 137:3).

⁸ Иегова кужым сётэ. Иеговалэн мертантэм бадӟым кужымез вань. Со шумпотыса сое сётэ аслаз оскымон ужась-тыршисьёсызлы. (Лыдӟе Псалтирез 137:3.) Тӥ куке но Иеговалэсь кужым куриды-а, визь сынаськонлэсь палэнскон понна яке бадӟым шуг-секыт пыр потон понна? Оло нош, секыт дыръя тӥ вӧсяськыса Иеговалэсь кужым куриды эшшо одӥг нунал чиданы. Иеговалэсь юрттэмзэ шӧдыса, тӥ тодады вайиды, вылды, таӵе кылъёсты: «Жадем муртлы Со кужым сётэ, катьтэммемлы юнлык кузьма» (Ис. 40:29).

9. Кызьы ми быгатӥськомы Иеговалэсь адӟем карыны, солэн мында кужыммы ӧвӧл ке но? (Озьы ик учке суредэз.)

⁹ Милям Иеговалэн мында кужыммы ӧвӧл. Ми ум быгатӥське асьмелэсь кужыммес мукетъёсызлы сётыны. Но милям луэ соослы юрттэммы. Кылсярысь, быгатӥськоды-а тӥ юрттыны арлыдо яке висись вын-агайёслы но сузэр-апайёслы? Тӥ быгатӥськоды, вылды, магазинэ ветлыны, корка котырысь ужъёсты быдэстыны яке кызьы ке эшшо юрттыны. Оло нош, тӥ быгатӥськоды Эксэйлык юртын утялскыны но эскерон-тупатъян ужъёсы пыриськыны. Озьы ми трос ӟеч ужъёс лэсьтомы соос понна, кинъёс Иеговаез ярато.

10. Кызьы ми верам кылъёсынымы мукетъёсты юнматыны быгатӥськомы?

¹⁰ Озьы ик эн вунэтэ, кылъёслэн кужымзы вань шуыса. Тӥляд соку ик тодады лыктӥз, вылды, адями, кудзэ ушъяны яке буйгатыны кулэ. Соку солы ӟеч кылъёс вералэ. Тӥ быгатӥськоды со доры пырыны, солы жингыртыны, открытка яке сообщение гожтыны. Эн сюлмаське, мар вераны ик уд тодӥське шуыса. Кинлэсь ке мылкыдзэ ӝутон понна, ӵем дыръя сюлмысь верам кӧня ке огшоры кылъёс тырмыт. Оло нош, ӵапак тӥляд кылъёсты адямиез шулдыртозы но юрттозы эшшо одӥг нунал Иеговалы оскымон ужаны-тыршыны (Мад. 12:25; Еф. 4:29).

11. Сётэ-а Иегова аслэсьтыз визьлыксэ мукетъёсызлы? Валэктэ.

¹¹ Иегова визьлык сётэ. Иаков гожтӥз: «Тӥ пӧлысь кинлэн ке визьлыкез уг ке тырмы, Инмарлэсь мед куроз. Инмар жалятэк, пыкылытэк ваньмызлы сётэ» (Иак. 1:5). Та кылъёсысь адӟиське, Иегова визьлыксэ ватыса уг возьы шуыса. Со сое  жалятэк, пыкылытэк мукетъёсызлы сётэ. Куке ми Иеговалэсь юрттэт куриськомы, со милемыз со понна ноку но возьытэ уг уськыты. Со ачиз ӧте солэсь визьлыксэ курыны (Мад. 2:1—6).

12. Кызьы ми быгатӥськомы мукетъёсызлы визьлыкмес сётыны?

¹² Кызьы ми, Иегова сямен, мукетъёсызлы визьлыкмес сётыны быгатӥськомы? (Пс. 31:8). Соослы тодон-валанъёсмес вераса. Кылсярысь, ми выль ивортӥсьёсты тодытыны дышетӥськомы. Тӧроос чидаса дышето кенешлы юрттӥсьёсты но мукет пылатӥськем вын-агайёсты кенешын пӧртэм ужъёсты быдэсъяны. Нош соос, кинъёс организациямы пуктӥськон но эскерон-тупатъян ужъёсы пыриськизы ини, мукетъёсты дышето со ужъёсты быдэсъяны.

13. Кызьы, мукетъёсты дышетыкумы, милям Иеговалэсь адӟем кареммы луэ?

¹³ Мукетъёсты дышетыкумы, милям Иеговалэсь адӟем кареммы потэ. Иегова визьлыксэ ватыса уг возьы. Соин ик милям но тодон-валанъёсмес но быгатонлыкъёсмес ватэммы уг поты. Ми ум сюлмаськиське, соос, кинъёсты ми дышетӥськомы, милесьтым интымес басьтозы шуыса. Ми ум малпаське: «Монэ нокин ӧз дышеты. Соос но асьсэос мед дышетскозы». Озьы малпаськыны шонер ӧвӧл. Ми, Иеговалэн ужась-тыршисьёсыз, тодон-валанъёсмес шумпотыса мукетъёсызлы вераськомы. Со сяна, ми «асьмелэсь лулмес но... сётыны дасесь» (1 Фес. 2:8). Милям туж потэ, соос, кинъёсты ми дышетӥськомы, асьсэос но «мукетъёссэ дышетыны мед быгатозы» шуыса (2 Тим. 2:1, 2). Ми визьлыкмес ӧм ватэ ке, соку милям но, мукетъёсызлэн но эшшо но трос визьлыксы но шумпотонзы луоз.

КУКЕ, МИ МАЛПАМЪЯ, ӞЕЧ УЖЪЁСМЕС УГ ДУНЪЯЛО

14. Мар каро тросэз адямиос, куке соослы ӟеч ужъёс лэсьто?

¹⁴ Ӵем дыръя, куке ми мукетъёсызлы, тужгес но агайёсмылы но сузэръёсмылы, ӟеч ужъёс лэсьтӥськомы, соос милемыз тау каро. Куддыръя соос милемлы открытка кузьмало яке кызьы ке мукет сямен тау каремзэс возьмато (Кол. 3:15). Тау карон кылъёс котьку но шумпотто.

15. Мар сярысь тодамы возёно, милемыз тау ӧз каре ке?

¹⁵ Но куддыръя адямиос тау уг каро. Шуом, тӥ дырдэс, кужымдэс но коньдондэс быдтӥды, нош адями тау ӧз кары. Соку мар кароно, шумпотонмес медам ыштэ но со понна куректыса медам улэ шуыса? Тодады вае та статьялы валтӥсь кылбурез — Апостолъёслэн ужъёссы 20:35. Адямилэн шудэз — аслаз кияз. Кызьы гинэ адямиос асьсэды медам возе, ми азьланяз но тыршомы шырыт сямоесь луыны но солэсь шумпотон басьтыны. Ойдолэ эскеромы, мар со понна кароно.

16. Малы, мукетъёсызлы ӟеч ужъёс лэсьтыку, Иеговалэсь адӟем кароно?

¹⁶ Иеговалэсь адӟем каре. Адямиос Иеговалэсь ӟеч ужъёссэ дунъяло-а, уг-а, со ваньмыз сярысь сюлмаське (Матф. 5:43—48). Иегова кылзэ сётэ, ми ӟеч ужъёс лэсьтӥмы ке, «берен номыр но басьтыны малпатэк», милям туж бадӟым медмы-кузьыммы луоз шуыса (Лука 6:35). «Номыр но» возьматэ, тау карон кылъёсты но возьмано ӧвӧл шуыса. Адямиос милемыз тау карозы-а, уз-а, Иегова ӟеч ужъёсмы понна милемыз одно ик бакель кароз (Мад. 19:17). Малы ке шуоно «ӟеч мылкыдын сётӥсез Инмар яратэ» (2 Кор. 9:7).

17. Кыӵе возет милемлы юрттоз мукетъёсызлы ӟеч ужъёс лэсьтыны? (Лука 14:12—14).

 ¹⁷ Озьы ик тодамы возёно возетэз, кудӥз гожтэмын Лукалэсь 14:12—14 (лыдӟе). Номыр умойтэмез ӧвӧл, ми куно каримы ке но ӟеч ужъёс лэсьтӥмы ке соослы, кинъёс милемлы умоен берыктыны быгато. Нош мар кароно, ми соослы гинэ ӟеч ужъёс лэсьтӥськомы ке? Соку умой луоз уже кутыны Иисуслэсь визь-кенешсэ. Луоз куное ӧтьыны сое, кин милемлы ӟечен берыктыны уз быгаты. Со милемлы шумпотон ваёз, малы ке шуоно озьы ми Иеговалэсь адӟем каромы. Озьы ик та возет милемлы юрттоз шумпотыса улыны соку но, куке милемлы тау карон кылъёс уз вералэ.

18. Мар юрттоз мукетъёсыз сярысь умоен малпаны?

¹⁸ Мукетъёсыз сярысь уродэн эн малпалэ (1 Кор. 13:7). Тӥледыз тау ӧз каре ке, юалэ асьтэлэсь: «Зэм ик-а та адями тау карисьтэм яке со вунэтӥз тау шуыны?» Оло нош, вань мукет но мугъёс, малы со тӥледыз тау ӧз кары. Куд-огъёсызлэн туж потэ тау каремзы, но соос уг тодо, кызьы сое возьматоно. Нош куд-огъёсызлы умой ӧвӧл, куке соослы юртто, тужгес но соос дышемын ке асьсэос кинлы ке юрттыны. Кызьы гинэ медам луы, христиан яратон милемлы юрттоз мукетъёсыз сярысь умоен малпаны. Номыр шоры учкытэк, мукетъёсызлы юрттӥськимы ке, ми шумпотонмес ум ыштэ (Еф. 4:2).

19, 20. Мар эшшо милемлы юрттоз мукетъёсызлы ӟеч ужъёс лэсьтыны? (Озьы ик учке суредъёсты.)

¹⁹ Эн возьмалэ, тӥледыз соку ик тау карозы шуыса. Соломон эксэй гожтӥз: «Няньдэ ву кузя лэзь,— трос нуналъёс ортчем бере сое нош ик шедьтод» (Екк. 11:1). Та кылбур валаны юрттэ: куддыръя тау карон кылъёсты трос дыр ортчем бере гинэ верало. Тани кызьы со адӟиське одӥг сузэрмылэн учырысьтыз.

²⁰ Трос аръёс талэсь азьвыл ёросэз чакласьлэн  кышноез али гинэ пылатӥськем сузэрлы открытка гожтӥз но мылкыдзэ ӝутӥз Иеговалы оскымон кыльыны. Ог тямыс ар ортчыса, со сузэр ёросэз чакласьлэн кышноезлы гожтэт гожтӥз. Кутсконаз таӵе кылъёс вал: «Тон уд но тодӥськы, дыр, макем тон мыным юрттӥд та аръёс ӵоже». Собере гожтэмын вал: «Тынад кылъёсыд сюлэмме туж шунтӥзы. Нош тужгес но монэ юнматӥз кылбур a. Мон котьку сое тодам вози». Куд-ог шуг-секытъёссэ верамез бере сузэр гожтӥз: «Куддыръя мынам номыр кареме уг поты вал, Иеговалы ужаме-тыршеме но. Котькуд учыре, куке кужыме воксё быре вал ини, мынам тодам со кылбур лыктылӥз но монэ юнматылӥз». Пумаз со гожтӥз: «Вань та аръёс ӵоже тынад открыткаед но со кылбур — мон понна самой бадӟым юрттэт вал». Малпалэ гинэ, макем шумпотӥз ёросэз чакласьлэн кышноез «трос нуналъёс ортчем бере» сыӵе гожтэт басьтыны! Милемыз но ӟеч ужъёсмы понна, кӧня ке дыр ортчыса гинэ, тау карыны быгато.

21. Малы тӥляд потэ, Иегова кадь, шырыт сямоесь луэмды?

²¹ Кызьы вераськиз ини статьялэн кутсконаз, мукетъёсызлы юрттӥськыса, ми шудогес луиськомы. Озьы милемыз Иегова кылдытӥз. Милемлы кельше вын-агайёсмылы но сузэр-апайёсмылы ӟеч ужъёс лэсьтыны. Ми шумпотӥськомы, куке милемлы тау карон кылъёс верало. Озьы ке но, милемыз тау каро-а, уг-а, ми шумпотӥськомы, малы ке шуоно асьмеды шонер возиськомы. Ноку эн вунэтэ: мае гинэ тӥ мукетъёсызлы медад сётэ, «Кузё-Инмар... [тӥледлы] талэсь но троссэгес сётыны быгатоз» (2 Пар. 25:9). Иегова котькинлэсь шырыт сямо. Соин ик со котькинлэсь умой тау карыны быгатэ. Ойдолэ азьланяз но, инмысь Атаймы кадь, шырыт сямоесь луыны тыршомы!