Анай-атае Швейцариысь Канадае улыны кошкизы но интыяськизы Ти́мминс каре (Онта́рио провинция), кудаз шахтеръёс дуно кортъёсты поттылӥзы. Мон вордӥськи 1934-тӥ арын. Нош 1939-тӥ ар котырын анае кутскиз «Возьмаськон башняез» лыдӟыны но кенешлэн пумиськонъёсаз ветлыны. Милемыз, аслэсьтыз нылпиоссэ, со котьку но сьӧраз басьтылӥз. Ӝоген со пылатӥськиз.

Анаймы Иеговалэн Адӟись-Ивортӥсез луиз шуыса, атаймы шумпотэмын ӧй вал. Но анаймы зэмлыкез яратэ вал но Инмарлы оскымон кыльыны юн мылкыдыз вал. 1940-тӥ аръёслэн кутсконаз но, куке Канадаын Иеговалэн Адӟись-Ивортӥсьёсызлы ужзэс нуыны ӧз лэзе ни, солэн мылкыдыз ӧз воштӥськы. Атаймы сое ӵем ултӥяз ке но, анаймы котьку но ассэ лякытэн возиз но сое гажаз. Анаймылэн ассэ умой воземез юрттӥз ваньмылы, вань сизьым нылпиосызлы, Иеговалэн сюрес вылаз султыны. Шумпотыса вераны луэ, дыр ортчыса, атаймы воштӥськиз но ассэ лякытгес возьыны кутскиз.

1950-тӥ арын гужем мон ветлӥ «Теократиялэн будэмез» конгрессэ, кудӥз Нью-Йоркын ортчытӥськиз. Отын мон быдэс дунне вылысь агайёсын но сузэръёсын вераськи но Галаад школаез йылпумъям агайёслэсь но сузэръёслэсь верамъёссэс кылӥ. Та мылкыдме ӝутӥз пионер луыны. Бертэме бере ик мон заявление гожтӥ. Канадаысь филиал мыным ӵектӥз нырысь пылатӥськыны. Соин ик 1950-тӥ арын 1-тӥ коньывуонэ  мон пылатӥськи. Толэзь ортчыса, мон пионер луи но, монэ ыстӥзы Капуске́йсинг пичи каре, кудӥз анай-атай юртэлэсь кӧня ке сю иськем кемын интыяськемын вал.

1951-тӥ арын тулыс филиал француз кылын вераськись Адӟись-Ивортӥсьёслы ӵектӥз Квебеке мыныны. Отын тросгес ивортӥсьёс туж кулэ вал. Мон пичи дырысеным ик француз но англи кылъёсын вераськи, соин ик соглаш кариськи. Монэ ыстӥзы Руэн каре, кудӥз сярысь мон верай вал ини. Отын мон нокинэ уг тодӥськы вал — мынам кытчы мыныны адресэ гинэ вал. Но ваньмыз умой пӧрмиз. Ми Марсель агаен туж умой эшъяськимы. Вуоно ньыль арзэ мон Квебекын ужай-тырши, нош ньылетӥ арлэн пумаз нимысьтыз пионер луи.

Квебекын ужакум-тыршыкум, монэ ӧтизы Галаад школалэн 26-тӥ классаз дышетскыны. Мон туж шумпотӥ. Дышетскон ортчиз Са́ут-Ла́нсингын (Нью-Йорк штат). Дышетсконмы йылпумъяськиз 1956-тӥ арын 12-тӥ тулыспалэ. Монэ ыстӥзы Шундыпуксёнпал Африкае, туала Га́нае b. Но отчы кошкемлэсь азьло мыным Канадае берытсконо вал но документъёсылэсь дась луэмзэс «кӧня ке арня» возьмано вал.

Кӧня ке арня интые, мон сизьым толэзь возьмай. Соку мон улӥ Торо́нтоын, Криппс семья дорын. Отын мон тодматски Ше́йла нылынызы. Ми ог-огмес яратӥмы но, мон малпай вал ини солы ӵектыны мыным бызьыны. Но ӵапак соку мынам визае вуиз. Ми Шейлаен вӧсяськимы но ужпум кутӥмы, мыным Африкае кошконо шуыса. Ми сюанмес берлолы кельтӥмы но вераськимы ог-огмылы гожтэтъёс гожъяны. Нимаз улон капчиен ӧз сётӥськы ке но, берлогес ми валамы, шонер ужпум кутӥмы шуыса.

Африкае мон быдэс толэзь мынӥ. Мон отчы мынӥ поездэн, грузъёсты нуллӥсь кораблен но самолётэн. Собере гинэ мон вуи А́ккрае (Гана). Монэ куризы улосэз чаклась луыса ужаны-тыршыны. Мыным ветлоно вал Гана шаертӥ, озьы ик туала Кот-д’Ивуа́р но То́го шаеръёстӥ. Ӵем  дыръя мон ветлӥсько вал огнам машинаен, кудзэ мыным филиал сётӥз. Мыным туж кельше вал агайёс но сузэръёс доры ветлыны!

Шутэтскон нуналъёсы мон ёросысь конгрессъёсы ветлӥсько вал. Конгрессъёсты ортчытон юртъёсмы милям ӧй вал. Соин ик агайёс бамбуклэсь но пальма вайёслэсь липет лэсьто вал, пӧсь шундылэсь ӧжыт ке но ватскон понна. Холодильникъёс ӧй вал бере, агайёс конгрессэз ортчытон интылэсь кыдёкын ӧвӧл пудо-животъёсты возизы, кудъёсызлэсь конгрессэ лыктэмъёслы сиён пӧразы.

Конгрессъёсын тумошо учыръёс но луо вал. Огпол Херб Дже́ннингс c агай, кудӥз миссионер луыса ужаз-тыршиз, речь вера вал. Малпамтэ шорысь сцена азе ошпи потӥз. Херб речьсэ верамысь дугдӥз, нош кышкам ош отчы-татчы бызьылыны кутскиз. Шумпотыса вераны луэ, ньыль юн агайёс ошез берен кухняе нуыны быгатӥзы, нош ваньзы соослы чабизы.

Конгрессъёс куспын мон артысь гуртъёсы ветлылӥ но «Выль дуннеын улӥсь адямиослэн ужам-тыршемзы» фильм возьматылӥ. Со понна кык писпуос вискы яке кык бодыос вискы мон тӧдьы басма ошисько вал, проекторез лэзисько вал но фильм возьматӥсько вал. Адямиос туж шумпото вал. Тросэз нырысетӥзэ кино адӟизы. Пылатӥськись адямиосты экранысь адӟыса, соос туж зол чабо вал. Та фильм тросэзлы валаны юрттӥз, Иеговалэн Адӟись-Ивортӥсьёсыз — со дунневыл организация шуыса, кудаз ваньзы огкылысь уло.

Озьы мон ог кык ар Африкаын ужай-тырши. 1958-тӥ арын мон ветлӥ калыккуспо конгрессэ, кудӥз ортчытӥськиз Нью-Йоркын. Отчы Шейла но лыктӥз, кудӥз со дыре Квебекын нимысьтыз пионер луыса ужаз-тыршиз. Ми туж шумпотӥмы нош ик адӟиськыны! Со дырозь ми ог-огмылы гожтэтъёс гожъямы. Нош пумиськеммы бере ик мон солы ӵектӥ мыным бызьыны. Со соглаш луиз. Мон Норр d агайлы гожтэт гожтӥ но юай, быгатэ-а Шейла Галаад школаын дышетскыны но монэн ӵош Африкаын ужаны-тыршыны. Со соглаш кариськиз. Куке Шейла мон доры Ганае вуиз, ми кузпалъяськимы. Сюанмы ортчиз Аккраын  1959-тӥ арын 3-тӥ коньывуонэ. Ми ас выламы шӧдӥмы, ужан-тыршонэз котьку но нырысетӥ интые пуктэммы понна Иегова милемыз бакель кариз шуыса.

1961-тӥ арын милемыз Камерунэ ыстӥзы. Отын монэ куризы выль филиал усьтыны. Уж туж трос вал. Азьвыл филиал понна мон ноку кыл ӧй куты, соин ик тросэзлы дышетскыны кулэ вал. 1965-тӥ арын ми тодӥмы, Шейла пияно шуыса. Милемлы секыт вал син азямы пуктыны, ми анай-атай луомы шуыса. Но куке ми кутскимы шумпотыны но дасяськыны Канадае берытскыны, милемыз кышкыт ивор возьма вал.

Шейлалэн нуныез усиз. Эмъясь вераз, милям пимы вордӥськыны кулэ вал шуыса. Та кышкыт учыр бере 50 арлэсь тросгес ортчиз ини. Но ми со сярысь ноку ӧм вунэтылэ. Ми туж куректыса улӥмы ке но, миссионеръёс луыса яратоно ужан-тыршонмес ми ӧм кельтэ.

Камерунысь агайёсты политикае пыриськымтэзы понна уйылыса-улляса возизы. Югдур тужгес но секыт луэ вал, президентэз бырйыку. 1970-тӥ арын 13-тӥ куартолэзе Иеговалэн Адӟись-Ивортӥсьёсызлы ужзэс нуыны ӧз лэзе ни. Выль чебер филиалмес, кудаз ми вить толэзь гинэ ужаса-тыршыса вуимы, конфисковать каризы. Вань миссионеръёслы, озьы ик милемлы но Шейлаен, шаерысь кошкон понна, одӥг арня сётӥзы. Агайёсты но сузэръёсты кельтыны туж секыт вал. Ми соосты туж яратӥмы но соос понна сюлмаськимы.

Вуоно ӝыны арзэ ми ужамы-тыршимы Франциысь филиалын. Мон туж тырши Камерунысь агайёслы юрттӥськыны. 1970-тӥ арын толсуре милемыз ыстӥзы Нигериысь филиалэ, кудӥз табере Камерун понна но сюлмаськиз. Нигериысь агайёс но сузэръёс милемыз туж умой пумитазы. Отын ми кӧня ке ар ужамы-тыршимы.

1973-тӥ арын милемлы секыт ужпум кутоно луиз. Шейлалэн кӧня ке дыр ӵоже ини тазалыкеныз герӟаськем шуг-секытъёсыз вал. Куке ми Нью-Йоркын конгрессын вал, со бӧрдыса ик шуиз: «Мон тазьы уг быгатӥськы ини! Мон ялан жадемын но асме урод шӧдӥсько». Со дырлы Шундыпуксёнпал Африкаын ми ог 14 ар ужамы-тыршимы ини. Мон туж данъяськисько вал кышноелэн оскымон ужан-тыршонэныз. Но дыр вуиз мае ке воштыны. Ми ваньзэ умой-умой малпамы, кема но вань сюлмысьтымы вӧсяськимы но ужпум кутӥмы Канадае берытскыны. Отын Шейла умойгес эмъяськыны быгатысал. Африкаысь кошкыны но вань дырмес сётыса ужан-тыршонмес кельтыны улонамы самой секыт ужпум вал.

Канадаын мон ужаны интыяськи эше доры, кудӥныз ми туж кемалась эшъяськиськомы вал ини. Со Торонто палан машинаосын вуз каре вал. Ми Шейлаен квартираез арендовать каримы но киысь мебель басьтӥмы. Озьы ми быгатӥмы пунэмаськытэк Канадае выжыны. Милям потэ вал огшоры улэммы, азьланяз пӧрмиз ке, нош ик вань дырмес сётыса ужан-тыршон  понна. Ми паймимы, но со малпанмы туж ӝог быдэсмиз.

Соку Но́рвал карын (Онтарио провинция) Конгрессъёсты ортчытон юрт пуктӥське вал. Мон малпай, кӧснуналъёсы отын юрттӥськыны быгато шуыса. Берлогес мыным ӵектӥзы та юрт понна кыл кутыны. Шейла ассэ умойгес шӧдэ вал ини, соин ик ми малпамы, та ужлы соглаш кариськеммы луэ шуыса. Озьыен, 1974-тӥ арын инвожое ми Конгрессъёсты ортчытон юртысь квартирае улыны потӥмы. Ми туж шумпотӥськомы вал, нош ик вань дырмес сётыса ужаны-тыршыны быгатӥськомы шуыса!

Шумпотыса вераны луэ, Шейлалы умойгес но умойгес луэ вал. Кык ар ортчыса, мон быгатӥ кутскыны ёросэз чаклась луыса ужаны-тыршыны. Милям ёросмы вал Канадаысь Манито́ба провинция. Отын кезьытэсь толъёс вал. Но со интыысь агайёс но сузэръёс милемыз котьку но туж шуныт пумитало вал. Ми валамы: кытын гинэ ми медам луэ, валтӥсез — Иеговалы ужаны-тыршыны.

Кӧня ке ар ӵоже мон ёросэз чаклась луыса ужай-тырши. Нош 1978-тӥ арын милемыз ӧтизы Канадаысь Вефиле. Собере ӝоген мон умойтэм учыре сюри, кудӥз монэ тросэзлы дышетӥз. Монэ куризы Монреа́льын ортчись нимысьтыз пумиськонын француз кылын час но ӝыны куспын речь вераны. Жаляса верано луэ, кылзӥсьёслы рече туж ик тунсыко ӧз поты. Речь вераме бере ужан-тыршонэз радъясь ёзэтысь одӥг агай мыным визь-кенеш сётӥз. Туннэ мон валасько, речьёсты вераны туж ик уг быгатӥськы шуыса. Но соку мон туж йыркуръяськи. Ми керетӥмы. Мон малпай, агай мултэс тэргаське шуыса. Со монэ нокӧня но ӧз ушъя. Мон солэн визь-кенешезлэсь ӧй кылзӥськы, малы ке шуоно мыным ӧз кельшы, кин но кызьы сое сётӥз. Соку мон туж янгышай.

Кӧня ке нунал ортчыса, монэн вераськиз филиаллэн комитетысьтыз агай. Мон валай, асме шонертэм вози шуыса, но кури монэ простить карыны. Собере мон пумиськи ужан-тыршонэз радъясь ёзэтысь со агаен. Со монэ лякытэн кылзӥз но простить кариз. Со учыр монэ тросэзлы дышетӥз. Мон валай, макем кулэ зӥбыт-востэм луыны (Мад. 16:18). Мон со сярысь Иеговалы трос вӧсяськи но ужпум кутӥ азьланяз котькуд сётэм визь-кенешез кылзыны.

Канадаысь Вефильын мон 45 арлэсь кемагес ужасько-тыршисько ни. Соос пӧлысь 40 арзэ, 1985-тӥ арысен, мон филиаллэн комитетаз ужасько-тыршисько. 2021-тӥ арын тулыспалэ дуно кузпалы кулӥз. Мон солэсь туж мӧзмисько. Тазалыке лябӟиз ке но ини, Иегова мыным трос ужъёс сётъя. Мон шӧдӥсько, пайда вайыны быгатӥсько на шуыса. Мон шумпотыса улӥсько. Мынам дыры ик ӧвӧл малпаны, улон туж ӝог ортче шуыса (Екк. 5:20, ВД [5:19, УБ]). Улонэ куспын оло кыӵе но учыръёс вал. Но шумпотон мугъёс тросгес вал. Мон нокӧня но уг жаляськы, Иеговаез нырысетӥ интые пуктӥ но солы 70 арлэсь тросгес ини вань дырме сётыса ужасько-тыршисько шуыса. Мон вӧсяськисько, егит агайёсмы но, сузэръёсмы но Иеговаез нырысетӥ интые мед пуктозы шуыса. Соку гинэ соослэн улонзы тунсыко луоз!