1. Кыӵе суд ӝоген луоз?

 МИ УЛӤСЬКОМЫ туж паймымон дыре! Ӝоген Иисус музъем вылысь вань адямиосты судъялоз. Со дышетскисьёсызлы вераз, мар луоз солэн судэз азьын но дунне бырон азьын (Матф. 24:3). Иисуслэн азьпалзэ ивортонэз гожтэмын Матфейлэсь 24-тӥ но 25-тӥ люкетъёсын, Марклэсь 13-тӥ люкетын но Лукалэсь 21-тӥ люкетын.

2. Мае ми эскеромы та статьяын но малы?

² Милемыз алон понна, Иисус куинь учыръёсты вераз. Со ыжъёс но кечъёс сярысь, визьмо но нодтэм нылъёс сярысь, озьы ик талантъёс сярысь мадёнъёс. Соосты эскерыса, ми тодомы, мар милемын луоз, ми со алонъёслэсь кылзӥськимы ке, озьы ик мар милемын луоз, ми соослэсь ӧм ке кылзӥське. Ойдолэ эскеромы со мадёнъёсты но тодомы, малы соос милемыз дышето. Нырысь вераськомы ыжъёс но кечъёс сярысь.

ЫЖЪЁС НО КЕЧЪЁС

3. Ку Иисус адямиосты судъялоз?

³ Ыжъёс но кечъёс сярысь мадёназ Иисус вераз, мае со лыдэ басьтоз, адямиосты судъякуз. Со учкоз, адямиос ӟеч иворез кылзӥзы-а, ӧз-а, озьы ик соос зырӟем вынъёсызлы юрттӥськизы-а, ӧз-а (Матф. 25:31—46).  Со суд луоз «бадӟым куректон» дыръя, Армагеддон азьын (Матф. 24:21). Кызьы пудо возьмась ыжъёсты кечъёслэсь висъя, ӵапак озьы ик Иисус висъялоз соосты, кинъёс зырӟем дышетскисьёсызлы юрттӥськизы, соослэсь, кинъёс соослы ӧз юрттӥське.

4. Малы ми оскиськомы, Иисус адямиосты шонерлыко судить кароз шуыса? (Исаия 11:3, 4). (Озьы ик учке суредэз.)

⁴ Библия возьматэ, адямиосты судъяны Иисусэз ачиз Иегова пуктӥз шуыса. Соин ик Иисус «шонерлыко судить кароз». (Лыдӟе Исаиялэсь 11:3, 4.) Иисус али ик ини учке, мае адямиос верало но лэсьто, мар сярысь соос малпасько но кызьы асьсэды зырӟем вын-агайёсын возё (Матф. 12:36, 37; 25:40). Суд дыръя Иисус умой тодоз, кин зырӟем вынъёсызлы юрттӥськиз a. Кызьы соослы юрттӥськыны луэ? Кылсярысь, соосын ӵош тодытон уже пыриськыса. Соку соос шонерлыко адямиосын ялэмын луозы но музъем вылын пырак улыны быгатозы (Матф. 25:46; Усьт. 7:16, 17). Со туж умой бакель карон! Адямиос бадӟым куректон дыръя но, собере но Инмарлы оскымонэсь луизы ке, соослэн нимъёссы «улон книгаысь» ӵушемын уз луэ (Усьт. 20:15).

5. Кыӵе алонъёс гожтэмын ыжъёс но кечъёс сярысь мадёнын но кинъёслы соос пайда вайыны быгато?

⁵ Оскымонэсь луэ. Ыжъёс но кечъёс сярысь Иисуслэн мадёнэз нырысь ик пайда вайыны быгатэ адямиослы, кудъёсыз музъем вылын улыны оско. Кызьы соос осконзэс возьматыны быгато? Христослэн зырӟем вынъёсызлы тодытыны юрттыса но «оскиськымон, визьмо ляльчилэсь» кылзӥськыса (Матф. 24:45). Инмын улыны оскись христианъёс но та мадёнысь алонлэсь кылзӥськыны кулэ. Малы? Малы ке шуоно Иисус сак учке, мае соос верало но лэсьто, озьы ик мар сярысь малпасько. Соослы но оскымонэсь луыны кулэ. Юри соос понна Иисус эшшо кык мадёнэз вераз. Соос гожтэмын Матфейлэсь 25-тӥ люкетын. Ойдолэ нырысь эскеромы визьмо но нодтэм нылъёс сярысь мадёнэз.

ВИЗЬМОЕСЬ НО НОДТЭМЕСЬ НЫЛЪЁС

6. Малы вить нылъёс визьмоесь шуыса нимамын вал? (Матфей 25:6—10).

⁶ Иисус вераз эмеспиез пумитаны потэм дас нылъёс сярысь мадёнэз (Матф. 25:1—4). Ваньзылэн эмеспиен ӵош сюанэ пыремзы потэ вал. Витьсэ Иисус нимаз визьмоез шуыса, нош витьсэ — нодтэмесь шуыса. Визьмоесь нылъёс умой дасяськизы но сак улӥзы. Соос дась вал эмеспиез возьманы сомында, кӧня кулэ луоз. Со бер уйин лыктӥз ке, соос сьӧразы тыл ӝуатонъёсты но вӧй басьтӥзы. (Лыдӟе Матфейлэсь 25:6—10.) Эмеспи вуыку, визьмоесь нылъёс соин ӵош сюанэ пыризы. Ӵапак озьы ик зырӟем христианъёслы но сак улоно но, Христослэн лыктытозяз, оскымонэсь луоно. Соку соос бакель каремын луозы но Иисусэн, Эмеспиен, ӵош инмысь Эксэйлыкын луозы (Усьт. 7:1—3) b. Нош мар луиз вить нодтэмесь нылъёсын?

7. Мар луиз вить нодтэмесь нылъёсын но малы?

 ⁷ Нодтэмесь нылъёс эмеспилэн лыктонэзлы дась ӧй вал. Соослэн тыл ӝуатонъёссы кысо вал ини, нош вӧйзы ӧй вал. Куке соос кылӥзы, эмеспи лыктэ шуыса, соос вӧй басьтыны кошкизы, нош эмеспи лыктон дырлы берытскыны ӧз вуэ. «Дасьёсыз соин ӵош сюан юонэ пыриллям, ӧсъёс ворсаськиллям» (Матф. 25:10). Берлогес отчы нодтэмесь нылъёслэн но пыремзы потэ вал, но эмеспи соослы шуиз: «Уг тодӥськы тӥледыз» (Матф. 25:11, 12). Та нылъёс умой дасяськиллямтэ. Соин ик соос дась ӧй вал эмеспиез возьманы сомында, кӧня кулэ. Малы та дышетэ зырӟем христианъёсты?

8, 9. Малы дышетэ зырӟем христианъёсты нылъёс сярысь мадён? (Озьы ик учке суредэз.)

⁸ Дась луэ но сак улэ. Иисус ӧз вера, кык пумо зырӟем христианъёс луозы шуыса: соосыз, кудъёсыз бадӟым куректон дыръя лыктонэзлы дась луозы, но соосыз, кудъёсыз дась уз луэ. Та мадёнэз вераса, Иисус валэктӥз, мар луоз зырӟем христианъёсын, соос пумозяз оскымонэсь ӧз луэ ке. Соос бакель каремын уз луэ (Иоанн 14:3, 4). Та малпан юрттэ сак улыны. Ваньмылы — зырӟем христианъёслы но, музъем вылын улыны оскись адямиослы но — нылъёс сярысь мадёнысь алонлэсь кылзӥськыны кулэ. Котькудмылы сак улоно но пумозяз чиданы дась луоно (Матф. 24:13).

⁹ Нылъёс сярысь мадёнэз вераса, Иисус пусйиз, макем кулэ дась луыны но сак улыны. Мукетаз, талантъёс сярысь мадёнын, Иисус вераз тыршон сярысь.

ТАЛАНТЪЁС

10. Малы кык ляльчиос оскиськымонэсь шуыса нимамын? (Матфей 25:19—23).

¹⁰ Таланъёс сярысь мадёнын Иисус вераз куинь ляльчиос сярысь. Кыкез кузёзылы оскымонэсь вал, нош одӥгез ӧй  вал (Матф. 25:14—18). Кык ляльчиос туж тыршыса, рос-прос ужаллям но соослы сётэм коньдонэз визьмо кутӥллям. Берытскемез бере кузёзы адӟем, соос соослы сётэм коньдонлэсь кык поллы тросгес поттӥллям шуыса. Со соосты ушъяз но котькудӥзлы шуиз: «Кузёеныд валче шумпот». (Лыдӟе Матфейлэсь 25:19—23.) Нош мар карем куинетӥез ляльчи солы сётэм коньдонэн?

11. Мар луиз азьтэм ляльчиен но малы?

¹¹ Ляльчи, кудӥзлы одӥг талант сётэмын вал, азьтэм вал. Кузёезлэсь коньдонзэ визьмо кутэм интые, со сое сюе ватэм. Кузёез берытскем бере ляльчи солы сётэм талантэз берен берыктэм. Со ляльчилэн урод мылкыдыз вал. Со ӧз но малпа кузёзэ курыны сое простить карыны но сое «лек адямиен» нимаз. Валамон, кузёезлэн солы вожез потӥз. Со косӥз солэсь талантсэ басьтыны, нош ассэ улляны (Матф. 25:24, 26—30).

12. Кинэ возьмато кык тыршись ляльчиос?

¹² Кык тыршись ляльчиос возьмато оскымон зырӟем христианъёсты. Кузё, Иисус, ӧте соосты соин валче шумпотыны: нырысетӥзэ улӟытон дыръя соос инме ӝутэмын луозы (Матф. 25:21, 23; Усьт. 20:5б). Нош азьтэм ляльчи сярысь верамын, зырӟем христианъёсты алон понна.

13, 14. Малы дышетэ зырӟем христианъёсты талантъёс сярысь мадён? (Озьы ик учке суредэз.)

¹³ Тыршисесь луэ. Нылъёс сярысь мадёнын но, талантъёс сярысь мадёнын но Иисус ӧз вера, зырӟем христианъёс азьтэмесь луозы шуыса. Та мадёнъёсты вераса, Иисус валэктӥз, мар луоз, соос тыршемысь дугдӥзы ке. Соос бакель каремын уз луэ ни но инмысь Эксэйлыке уз пыре (2 Пётр 1:10).

¹⁴ Нылъёс но талантъёс сярысь Иисуслэн мадёнъёсыз возьмато, вань зырӟем христианъёслы солэн лыктонэзлы дась  луоно, сак улоно но тыршисесь луоно шуыса. Со сяна, Иисус зырӟем христианъёсты эшшо малэсь ке алэ на. Со сярысь вераське Матфейлэсь 24:40, 41.

КИН «БАСЬТЭМЫН» ЛУОЗ?

15, 16. Кызьы кылъёс, кудъёсыз гожтэмын Матфейлэсь 24:40, 41, возьмато, зырӟем христианъёслы сак улоно шуыса?

¹⁵ Та куинь мадёнъёссэ верамезлэсь азьло Иисус валэктӥз, кызьы валаны луоз, зырӟем христиан мурт Инмарлы ярамон шуыса. Иисус вераз кык пиосмуртъёс сярысь, кудъёсыз бусыын ужало, но кык кышномуртъёс сярысь, кудъёсыз пызь изо. Кыказ ик учыръёсын адямиос одӥг кадь ужез быдэсто ке но, Иисус вераз, «одӥгез басьтэмын луоз, нош мукетыз кельтэмын луоз» шуыса. (Лыдӟе Матфейлэсь 24:40, 41.) Собере со дышетскисьёсызлы шуиз: «Сак улэ, уд тодӥське уго, кӧняетӥ часын Кузё-Инмарды лыктоз» (Матф. 24:42). Та кылъёсты Иисус зырӟем христианъёслы вераз, луоз, малы ке шуоно нылъёс сярысь мадёнзэ но Иисус та выллем кылъёсын йылпумъяз (Матф. 25:13). Соос гинэ, кин зэмзэ ик святой духен зырӟемын но кинъёс пумозяз оскымонэсь луозы, Иисусэн ӵош инмысь Эксэйлыкын луозы (Иоанн 14:3).

¹⁶ Сак улэ. Зырӟем христиан мурт сак улэмысь дугдӥз ке, со кылчинъёсын люкам быръем адямиос пӧлын уз луы (Матф. 24:31). Но Иисуслэн алонэзлэсь кылзӥськоно соослы но, кинъёс музъем вылын пырак улыны оско. Соослы но сак улоно но оскымонэсь луоно.

17. Малы сюлмаськоно ӧвӧл со пумысен, ку но кинэ Иегова святой духеныз зырӟе?

¹⁷ Ми умой тодӥськомы Иеговаез но оскиськомы кутэм ужпумъёсызлы. Со асьме нуналъёсы оскымон христианъёс пӧлысь кинэ ке святой духеныз зырӟе ке, милемлы со пумысен сюлмаськоно ӧвӧл c. Тодамы ваёмы, мар Иисус вераз соос сярысь, кинъёс виноград бакчаын одӥг час гинэ ужазы (Матф. 20:1—16). Соос но, быдэс нунал ужасьёс но одӥг кадь уждун басьтӥзы. Ӵапак озьы ик зырӟем христианъёсын но: ку гинэ соос быръемын медам луэ, соос Иисусэн ӵош инмысь Эксэйлыкын луозы.

АЛОНЪЁСЛЭСЬ КЫЛӞИСЬКЕ

18, 19. Малы милемыз дышетэ но малэсь алэ та статья?

¹⁸ Мае ми тодӥмы? Нырысь ми эскеримы ыжъёс но кечъёс сярысь мадёнэз. Со возьматэ, музъем вылын пырак улыны оскисьёс али но, бадӟым куректон дыръя но Иеговалы оскымонэсь луыны кулэ шуыса. Куке Иисус музъем вылысь вань адямиосты судъялоз, Инмарлы оскымон адямиосты со лыдъялоз шонерлыко, быронтэм улонэз басьтыны ярамон адямиосын (Матф. 25:46).

¹⁹ Озьы ик ми эскеримы Иисуслэсь кык мадёнъёссэ, кудъёсаз зырӟем христианъёслы алонъёс гожтэмын. Дас нылъёс сярысь мадёнын витез асьсэды визьмо возизы. Соос дасяськизы но сак улӥзы. Соос дась вал эмеспиез возьманы сомында, кӧня кулэ. Нош нодтэмесь нылъёс, кудъёссэ эмеспи сюанэ пырыны  ӧз лэзьы, асьсэды озьы ӧз возе. Милемлы но дась луоно возьманы сомында, кӧня кулэ, малы ке шуоно ми ум тодӥське, ку Иисус та дуннелы пум поноз. Со сяна, ми талантъёс сярысь мадёнэз тодамы вайимы но кык тыршись ляльчиос сярысь вераськимы. Соос соослы сётэм ужез тыршыса быдэстӥзы, соин ик кузёзы соосты ушъяз. Нош азьтэм ляльчиез кузё кескич шуыса нимаз но солэсь ваньзэ басьтыны косӥз. Малы та милемыз дышетэ? Милемлы но самой пумозяз Иеговалэсь ужзэ тыршыса быдэсъяно. Пумаз ми вераськимы, зырӟем христианъёслы сак улоно шуыса. Соку гинэ соос Иисусэн ӵош инмысь Эксэйлыкын луозы. Соос туж возьмало со дырез. Армагеддон бере Ыжпилэн сюанэз луоз. Отын Иисус Эмеспи луоз, нош зырӟем христианъёс солэн кышноез луозы (2 Фес. 2:1; Усьт. 19:7, 9).

20. Кызьы Иегова бакель кароз соосты, кинъёс солэн алонъёсызлэсь кылӟисько?

²⁰ Ӝоген Иисус адямиосты судъялоз. Но милемлы кышкано ӧвӧл. Ми оскымонэсь луимы ке, яратӥсь инмысь Атаймы милемлы «мертантэм бадӟым кужым» сётоз но ми «Адями Пи азе султыны» быгатомы (2 Кор. 4:7; Лука 21:36). Кытын гинэ улыны ми медам оске, инмын яке музъем вылын, милемлы Иисуслэн мадёнъёсысьтыз алонъёслэсь кылзӥськоно. Соку ми Инмысь Атаймес шумпоттомы. Иегова туж ӟеч. Солэн потэ, ми пӧлысь котькудӥз «улон книгае» гожтэмын мед луоз шуыса (Усьт. 3:5; Дан. 12:1).