1—3. а) Кыӵе шуг-секытэн пумисько вань егитъёс? Вералэ пример. (Учке статья кутсконысь туспуктэмез.) б) Мар юрттоз егит христианъёслы сыӵе югдурын?

 ПУКТЫ син азяд, тыныд мукет городэ нимысьтыз пумиськонэ мыноно шуыса. Отчы тыныд кема мыноно автобусэн. Тон лыктӥськод автостанцие, нош отын туж трос адямиос но туж трос автобусъёс. Соин сэрен йырыд ик берганы кутске. Но тон тодӥськод, мар тыныд кулэ — тыныд шедьтоно автобусэз, кудӥз мынэ отчы, кытчы тыныд кулэ. Нош тон нырысь шедем автобусэ пуксид ке, мукет интые кошкод.

² Егит пиосты но нылъёсты ӵошатыны луоз автостанциысь адямиосын. Соос азьын кузь сюрес — быдэс улон. Куддыръя соос мар карыны ик уг тодо, малы ке шуоно котыразы туж трос луонлыкъёс но быръён лэсьтыны туж секыт. Но соослы капчигес луоз, соос умой тодӥзы ке, мар соослы кулэ. Озьыен, кыӵе сюрес быръёно?

³ Та юанлы валэктон тон шедьтод та статьяысь. Со егитъёсты ӧте сыӵе улон сюрес бырйыны, кудӥз Иеговаез  шумпоттысал. Со сыӵе улон сюрес, куке адями, пӧртэм ужпумъёс кутыкуз, Иеговалэсь малпанзэ лыдэ басьтэ. Кылсярысь, куке малпа, кытчы дышетскыны пыроно, кытчы ужаны мыноно, кузпалъяськоно-а яке ӧвӧл-а, пинал вордоно-а яке ӧвӧл-а. Озьы ик, со сыӵе улон сюрес, куке адями духовной ужпумъёс пуктэ. Егит пиос но нылъёс, кудъёсызлэн улоназы Иеговалы ужан-тыршон нырысетӥ интыын луэ, оскыны быгато, Иегова соосты бакель кароз но пуктэм ужпумъёссэс быдэстыны юрттоз шуыса. (Лыдӟе Мадёнъёсты 16:3.)

4. Мае ми эскеромы та статьяын?

⁴ Малы егитъёслы духовной ужпумъёс пуктоно? Со понна куинь мугъёс вань, кудъёссэ ми та статьяын эскеромы. Нырысетӥ кык мугъёс возьмато, духовной ужпумъёс Иеговалы матэгес кариськыны юртто шуыса. Нош куинетӥез муг возьматэ, кыӵе пайда вайыны быгатэ адямилэн духовной ужпумъёссэ быдэстыны тыршемез.

5. Вералэ валтӥсь мугез, малы милемлы духовной ужпумъёс пуктоно.

⁵ Валтӥсь муг, малы милемлы духовной ужпумъёс пуктоно,— со Иеговалы тау кареммес возьматон, малы ке шуоно со милемыз яратэ но туж сюлмаське асьме сярысь. Псаломъёсты гожъясь гожтӥз: «Макем ӟеч, Кузё-Инмаре, Тонэ данъяса улыны... Тон, Кузё-Инмаре, Ас ужъёсыныд мылкыдме ӝутӥд, киыныд лэсьтэм ужъёслы шумпотыса кырӟасько» (Пс. 91:2, 5). Малпа, маид тынад вань Иеговалы луыса: улон, зэмлыкез тодон, Библия, кенеш но вуоно умой улонлы оскиськон! Кызьы Иеговалы кузьымъёсыз понна тау кареммес возьматоно? Кылсярысь, духовной ужпумъёс пуктоно. Со юрттоз тыныд Иеговалы эшшо но матэгес кариськыны.

6. а) Кызьы духовной ужпумъёс Иеговаен кусыпъёсмы вылын шӧдӥсько? б) Кыӵе ужпумъёс пуктыны луэ пичи дыръя?

⁶ Кыкетӥез муг — духовной ужпумъёстэ быдэстыкуд, тон ӟеч ужъёс лэсьтӥськод, нош со Иеговаез шумпоттэ но кусыпъёстэс эшшо но юнматэ. Апостол Павел гожтӥз: «Инмар шонер лэсьтӥсьтэм ӧвӧл уго, Со уг вунэты тӥлесьтыд уждэс, яратондэс, кудзэ тӥ Солэн нимыз понна ужаса-тыршыса возьматӥды» (Евр. 6:10). Пичи нылпиос но духовной ужпумъёс пуктыны быгато. Кылсярысь, Кристиналы 10 арес вал, куке со ужпум кутӥз оскымон вын-агайёслэн но сузэр-апайёслэн улон сюресъёссы сярысь статьяосты, одӥгзэ но кельтытэк, лыдӟыны. Нош Тоби, куке солы 12 арес вал, ужпум кутӥз пылатӥськемезлэсь азьло быдэс Библиез лыдӟыны. Максим пылатӥськиз, куке солы 11 арес вал, нош Ноеми сузэрез — 10 арес дыръяз. Пылатӥськемзы бере соос кыкназы ик Вефильын ужаны-тыршыны ужпум пуктӥзы. Пуктэм ужпумзэс котьку тодазы возён понна, соос борддоразы Вефильын ужан-тыршон сярысь заявление ошизы. Нош мар вераны луоз тон сярысь? Малпа, кыӵе тон ужпум пуктыны быгатысалыд но мар кароно тыныд, сое быдэстон вылысь. (Лыдӟе Филиппыослы 1:10, 11.)

7, 8. а) Малы быръён лэсьтыны капчигес, куке пуктэм ужпуммы вань? б) Малы одӥг егит ныл университетэ дышетскыны ӧз мыны?

 ⁷ Кыӵе куинетӥез муг, малы егит дыръя ужпумъёс пуктоно? Егитъёслы трос ужпумъёс кутоно луэ, кылсярысь, кытчы дышетскыны пыроно, кытчы ужаны интыяськоно но мукет. Ужпум кутон — со сюрес вожын сылыса кулэ сюресэз быръем кадь луэ. Тодӥськод ке, кытчы мыноно, со шуг ӧвӧл. Озьы ик пуктэм ужпумъёсын но: тодӥськод ке, мар тыныд кулэ, бырйыны капчигес. Мадёнъёсын 21:5 верамын: «Тыршись муртлэн малпанъёсыз ваньлык пала кыстӥсько». Макем вазьгес тон ужпум пуктод, сокем ӝоггес тон сое быдэстод. Сое Дамарислэн учырысьтыз адӟыны луэ, кудӥзлы егит дыръяз туж кулэ луись ужпум кутоно луиз.

⁸ Дамарис школазэ умой оценкаосын йылпумъяз. Со быгатэ вал пырыны университетэ право дышетыны но отын дун тырытэк дышетскыны. Но со бырйиз сыӵе ужез, кытын быдэс нунал ужано ӧй вал. Малы? «Пичи дыръям ик мон ужпум кутӥ пионер луыны. Со понна мыным кулэ вал уж, кудаз быдэс нунал ужано ӧй луысал,— валэктэ со.— Мон юристлы дышетскысал ке, соку мон трос коньдон басьтыса ужасал, но таӵе уж шедьтыны ӧй быгатысал». Дамарис 20 ар пионер луыса ужа-тырше ини. Мар малпа со али пичи дыръяз пуктэм ужпумез сярысь? Но мар малпа егит дыръяз лэсьтэм быръёнэз пумысен? Со вера: «Уж дорам мон ӵем дыръя юристъёсын пумиськисько. Соос ужало сыӵе ужын, кудаз мон ужасал, университетэ дышетскыны пырысал ке. Тросэзлы ужзы уг кельшы. Пионер луыса ужаны-тыршыны кутэм ужпуме трос шумпотон вайиз но сюлмам кельшисьтэм ужын ужанлэсь утиз».

9. Малы егит христианъёс сюлмысь ушъямон луо?

⁹ Быдэс дунне вылысь трос сюрс егит пиос но нылъёс Иеговалы оскисько но духовной ужпумъёссэс быдэстыны тыршо. Соосты сюлмысь ушъям потэ! Соос дышетско Инмарлэн Кылысьтыз визь-кенешъёсты уже кутыны, кылсярысь, дышетсконазы, ужан интыосазы но семьяосазы, но со уг люкеты соослы шумпотыса улыны. «Вань сюлмыныд Кузё-Инмарлы оскиськы,— гожъяз Соломон.— Быдэс улон-вылонэд ӵоже Кузё-Инмарез тодыны тыршы, Со тынэсьтыд сюресъёстэ шонертоз» (Мад. 3:5, 6). Иегова туж яратэ егит христианъёсты. Со соосты уте, визь-кенешъёс сётэ но бакель каре.

10. а) Малы сокем кулэ ӟеч иворез вераны? б) Мар юрттоз милемлы умойгес ӟеч иворез вераны?

¹⁰ Егит христиан мурт, кудӥз Иеговаез шумпоттыса улыны тырше, нимысьтыз саклык висъя ужан-тыршонлы. Иисус Христос вералляз, пум вуэмлэсь азьло «Евангелие тодытэмын луыны кулэ» шуыса (Марк 13:10). Тодытон ужез берлолы кельтыны уг яра бере, со милям улонамы нырысетӥ интыын луыны кулэ. Быгатысалыд-а тон ужпум пуктыны тросгес тодытон уже пыриськыны яке пионер луыны? Нош тыныд ӟеч иворез вераны туж ик уг кельшы ке? Кызьы дышетсконо умойгес ӟеч иворез вераны? Тыныд юрттозы кык визь-кенешъёс: умой дасяськы но,  мукетъёсызлы ӟеч иворез веракуд, киостэ эн лэзьы. Тон паймод, дыр, кӧня шумпотон вае ӟеч иворез веран.

11, 12. а) Кызьы егит пиос но нылъёс дасяськыны быгато мукетъёсызлы Иегова сярысь вераны? б) Кызьы одӥг егит вын-агай ӵош дышетскисьёсызлы ӟеч ивор вераны быгатӥз?

¹¹ Тыршы нырысь валэктон шедьтыны юанлы, кудзэ ӵем сётъяло ӵош дышетскисьёсыд. Тыныд юрттозы публикациосысьтымы статьяос, кудъёсыз юри дасямын егитъёслы сыӵе юанъёслы валэктонъёс сётыны дышетскон понна. Кылсярысь, «Малы тон Инмарлы оскиськод?» юанлы валэктон тон дасяны быгатод, «Егитъёслэн 10 юанъёссылы валэктонъёс» брошюраысь «Кулэ-а мыным эволюцилы оскыны?» статьяез лыдӟыса. (Лыдӟе 1 Пётрлэсь 3:15.)

¹² Куд-ог егит христианъёс луэмезъя ӵош дышетскисьёссылы возьмато, кызьы соос асьсэос публикациосысьтымы юанъёссылы валэктонъёс шедьтыны быгатозы. Ӵапак озьы лэсьтӥз Лука. Одӥг пол уроказы дышетӥсьсы пӧртэм религиос сярысь вера вал. Лука адӟиз, учебникын Иеговалэн Адӟись-Ивортӥсьёсыз сярысь шонертэм верамын шуыса. Кышканзэ вормыса, со юаз, яра-а классы азьын вераны, учебникын шонертэм гожтэмын шуыса. Дышетӥсьсы пумит ӧз луы. Лука аслаз осконэз сярысь верам сяна, тодматӥз на куд-ог материалъёсын, кудъёссэ потто Иеговалэн Адӟись-Ивортӥсьёсыз. Дышетӥсьсы быдэс классылы дорысь уж сётӥз учкыны «Дай отпор хулиганам, не пуская в ход кулаки» фломастерен суредам видеороликез. Лука туж шумпотӥз, ӟеч иворез вераны быгатӥз шуыса.

13. Малы шуг-секытъёсын пумиськыса, киосмес лэзёно ӧвӧл?

 ¹³ Шуг-секытъёсын пумиськыса, киосыд медаз лэзиське (2 Тим. 4:2). Котьку тодад возь пуктэм ужпумъёстэ. Катариналы 17 арес вал, куке со ужпум пуктӥз котькуд ӵош ужасезлы Иегова сярысь вераны. Одӥгез соос пӧлысь сое трос пол ултӥяз, но со сое ӧз дугдыты. Со, кызьы Катарина ассэ возиз та учырын, туж кельшиз Ханс нимо ӵош ужасезлы. Со кутскиз публикациосмес лыдӟыны, Библиез дышетыны но пылатӥськиз. Катарина со сярысь ӧз тоды, малы ке шуоно мукет интые улыны кошкиз. 13 ар ортчыса, куке Катарина быдэс семьяеныз христиан пумиськонын вал, вын-агай сцена вылэ речь вераны мукет кенешысь вын-агаез ӧтиз. Пуктэ син азяды, макем шумпотӥз Катарина, сцена вылысь Хансэз адӟыса! Кыӵе умой, Катарина ӵош ужасьёсызлы Инмар сярысь вераны пуктэм ужпумзэ быдэстӥз шуыса.

14, 15. а) Мае тодазы возёно егит христианъёслы? б) Мар юрттоз огъёзъёслэн зӥбемзылы пумит сылыны?

¹⁴ Та статьяын трос пол пусъемын вал, туж кулэ шуыса ужпум кутыны Иеговаез шумпоттыны но духовной ужпумъёс пуктыны. Тросэзлэн огъёзъёсыдлэн улоназы валтӥсез шутэтскон но шулдыръяськыса улон, вылды. Соос тонэ но асьсэос кадь улыны ӧтьыны быгатозы. Али-а, берлогес-а, тыныд верано луоз, тон улонад мукет ужпумъёс пуктӥд шуыса, кудъёсызлэсь уд куштӥськы. Автобус сярысь пример доры ке берытсконо, тон уд пуксьы, дыр, нырысь шедем автобусэ, отчы умой адямиос люкаськизы шуыса гинэ, кудъёсыз дырзэс туж шулдыр ортчыто.

¹⁵ Мар юрттоз тыныд огъёзъёсыдлэн зӥбемзылы пумит сылыны? Тыршы палэнскыны сыӵе югдуръёслэсь, кудъёсаз тон сьӧлыклы сётскыны быгатысалыд (Мад. 22:3). Малпаськы со вылын, кытчы вуттыны быгатоз урод адямиосын эшъяськон (Гал. 6:7). Зӥбыт-востэм лу но соглаш кариськы, тыныд умой визь-кенеш кулэ шуыса. Санэ пон сое, мае верало анай-атаед но кенешысь тодӥсь-валась вын-агайёс но сузэр-апайёс. (Лыдӟе 1 Пётрлэсь 5:5, 6.)

16. Вералэ учырез, кудӥз возьматэ, макем кулэ луэ зӥбыт-востэм сям.

¹⁶ Зӥбыт-востэм сямыз юрттӥз Кристоф вын-агайлы тодӥсь-валась вын-агайёслэсь визь-кенешсэс санэ басьтыны. Пылатӥськемез берегес ик со фитнес-центре ветлыны кутскиз. Отчы ветлӥсь егит пиос туж куризы сое соослэн спортивной клубазы пыриськыны. Кристоф со сярысь тӧроен вераськиз. Тӧро куриз сое малпаськыны, кыӵе кышкытлыкъёс кылдыны быгатозы, кылсярысь, солэн вожвылъяськон мылкыдыз будыны быгатоз. Озьы ке но Кристоф пыриськиз со клубе. Дыр ортчыса, со валаз, спорт, кудаз со пыриськыны ужпум кутӥз, туж лек но кышкыт шуыса. Со выльысь тӧроосын вераськиз но, соос солы Библия вылэ пыкиськем визь-кенешъёс сётӥзы. Кристоф вера: «Вын-агайёс пыр Иегова мыным пайдаё визь-кенешъёс сётӥз, но берлогес ке но, мон солэсь кылзӥськи». Тырме-а тыныд зӥбыт-востэм  сям, визьмо визь-кенешлэсь кылзӥськон понна?

17, 18. а) Мае сӥзе Иегова егит пиослы но нылъёслы? б) Мар сярысь жаляны быгато егит пиос но нылъёс бадӟым будэм беразы? Кызьы солэсь палэнсконо? Вералэ пример.

¹⁷ Библиын верамын: «Пинал пи, пинал дыръяд шулдыръяськы, пинал дырысьтыд улон нуналъёсыд сюлэмдэ мед шумпоттозы» (Екк. 11:9). Иеговалэн потэ, тон шумпотыса мед улод шуыса. Та статьяысь ми тодӥмы одӥг амал сярысь, кудӥз юрттэ шумпотыса улыны. Духовной ужпумъёс сярысь вунэтоно ӧвӧл но, ужпум кутыкумы, Иеговалэсь малпанзэ лыдэ басьтоно. Макем вазьгес тон кутскод со визь-кенешъёсты улонад кутыны, сокем ӝоггес адӟод, кызьы Иегова кулэ луись сюрес возьматэ тыныд, уте тонэ но бакель каре. Библиысь пайдаё визь-кенешъёс вылын малпаськы но Екклесиастын 12:1 верамъя ул: «Пинал дыръяд тодад вай аслэсьтыд Кылдытӥсьтэ».

¹⁸ Егит дыр туж ӝог ортче, сое шӧдыны ик уг луы. Егит пиос но нылъёс туж ӝог будо. Жаляса верано луэ, тросэз егитъёс бадӟым будэмзы бере туж жаляло, егит дыръязы шонертэм ужпумъёс пуктӥзы яке нокыӵе но ужпумъёс ӧз пуктэ шуыса. Нош духовной ужпумъёссэс быдэстыны тыршись егитъёс шумпотон басьто. Сое вераны быгатоз Мирьяна но, кудӥз быдэ вуымтэ дыръяз туж азинлыко вал спорт удысын. Солы ӵектӥзы толалтэ Олимпийской шудонъёсы пыриськыны, нош со ужпум кутӥз Иеговалы вань дырзэ сётыса ужаны-тыршыны. Со дырысен 30 арлэсь тросгес ортчиз ини. Мирьяна али ке но картэныз ӵош вань дырзэ сётыса ужа-тырше. Со вера: «Тодмо но дано луон, кивалтэт но ваньбур ортчо-кошко. Со юнме пуктэм ужпумъёс. Улонын самой умой ужпум — Инмарлы ужаны-тыршыны но карыны ваньзэ, мае быгатӥськод, адямиослы Инмар доры матэгес кариськыны юрттон понна».

19. Кыӵе пайда вае егитъёслы егит дырысенызы ик духовной ужпумъёс пуктэмзы?

¹⁹ Егит вын-агайёс но сузэр-апайёс сюлмысь ушъямон луо, малы ке шуоно соос шуг-секытъёссэс вормо но Иеговалы ужан-тыршонэз улоназы нырысетӥ интые пукто. Соос духовной ужпумъёс пукто но тодытон ужез туж кулэен лыдъяло. Со сяна, соос саклыксэс уг висъяло солы, мае ӵектэ та дунне. Оскы: тон юнме уд тыршиськы. Тон оскыны быгатӥськод, вын-агайёс но сузэр-апайёс тыныд юрттозы шуыса. Иегова но тыныд одно ик юрттоз. Оскиськы солы, но со тынэсьтыд вань мытэм ужъёстэ бакель кароз!