1, 2. а) Кытысь адӟиське, адямиос эрик понна нюръясько шуыса? б) Кытчы вуттэ сыӵе нюръяськон?

 ТУННЭ ӵем верало эрик но огкадь луон сярысь. Одӥгъёсаз шаеръёсын адямиос зӥбемлэсь, ултӥямлэсь но ёрмыса улонлэсь мозмытскыны тыршо. Мукетъёсаз шаеръёсын адямиос куро, соослы эрик мед сётозы шуыса вераны сое, мае верамзы потэ, бырйыны сое, мае быръемзы потэ но улыны озьы, кызьы улэмзы потэ. Шӧдске, ваньмызлэн улэмзы потэ озьы, кызьы соос мылкыд каро.

² Мукет юан — кызьы вань со мыл потонъёсты быдэстоно? Эрико луон понна тросэз адямиос кивалтӥсьёслы пумит султо, демонстрациосы, забастовкаосы но куддыръя революциосы но пырисько. Нош малпамзы быдэсме-а? Ӵем дыръя со шугадӟонэ но адями быронэ вуттэ. Со возьматэ Соломонлэн кылъёсызлэсь зэм луэмзэс, кудъёссэ со Инмарлэн духезлэн кивалтэмез улсын гожтӥз: «Адями адямиен кузёяське но солы изъян вайыса кельтэ» (Екк. 8:9).

3. Мар кароно, зэмзэ ик шудо луон понна?

 ³ Христослэн дышетскисез Иаков гожтӥз, маин зэмос шуд герӟаськемын: «Кин чик шектэм, эрик сётӥсь Инмар закон шоры учкоз но со бордын сюлмыныз улӥз ке... шудо луоз ужрадъянъёссэ быдэсъякуз» (Иак. 1:25). Со «чик шектэм... законэз» милемлы сётӥз Иегова, но со ваньмызлэсь умой тодэ, мар кулэ адямилы зэмзэ ик шудо луон понна. Со Адамлы но Евалы сётӥз ваньзэ, мар соослы кулэ вал шудо луон понна, озьы ик, зэмос эрикез но.

4. Кыӵе эриксы вал Адамлэн но Евалэн? (Учке статья кутсконысь суредэз.)

⁴ Улон-вылон книгаысь нырысетӥ кык люкетъёссэ лыдӟыса, адӟиське, Адамлэн но Евалэн сыӵе эриксы вал шуыса, кудзэ адямиос туннэ уйвӧтазы гинэ адӟыны быгато. Соослэн вал ваньмыз, мар соослы кулэ. Соос номырлэсь кышкатэк улӥзы, но нокин соосты ӧз ултӥя. Соослы сюлмаськоно ӧй вал сиён-юон, уж, тазалык сярысь, но куректоно ӧй вал, куке но кулозы шуыса (Ул.-выл. 1:27—29; 2:8, 9, 15). Но возьматэ-а со, соос быдэсак эрикоесь вал шуыса? Ойдолэ эскеромы.

5. Мар адямиез зэмзэ ик эрико каре, тросэз адямиос мукет сямен малпало ке но?

⁵ Туннэ тросэз тазьы малпасько: зэмзэ ик эрико луон понна, адямилэн эрикез луыны кулэ карыны ваньзэ, мае карыны солэн мылыз потэ, учкытэк со шоры, кыӵе бервылъёсы со вуттоз. «Уорлд бук» энциклопедиын верамын, эрик со «ужпумъёс кутыны но соосъя улыны луонлык» шуыса. Со дыре ик отын верамын: «Юристъёслэн синмынызы учкыса, адямиос эрикоесь, куке калык уг пукты шонерлыктэм, мултэс но кулэтэм куронъёс». Озьыен, кыӵе ке куронъёс луыны кулэ ик, вань адямиос соослы сётэм эриклэсь пайда басьтыны мед быгатозы шуыса. Соку юан кылдэ: кинлэн правоез вань ужпум кутыны, кыӵе куронъёс шонерлыко, кулэлыко но визьмо луо?

6. а) Малы Иегова гинэ быдэсак эрико? б) Кыӵе эриксы адямиослэн но малы?

⁶ Куке эрик сярысь вераськон потэ, тодамы возьыны кулэ, Иегова Инмар гинэ быдэсак эрико шуыса. Малы? Со — Кылдытӥсь но Дунне Кутӥсь (1 Тим. 1:17; Усьт. 4:11). Кызьы адӟиське Давид эксэйлэн чебер кылъёсысьтыз, Иегова ваньмызлэсь пӧртэм но вылӥ инты басьтэ. (Лыдӟе 1 Паралипоменонэз 29:11, 12.) Озьыен, инмысь но музъем вылысь вань кылдытэмъёс быдэсак эрикоесь ӧвӧл. Милемлы валано, Иеговалэн гинэ правоез вань шуыса куронъёс пуктыны, кудъёссэ со шонерлыкоен, кулэлыкоен но визьмоен лыдъя. Ӵапак сыӵе куронъёс пуктӥз Иегова, адямиосты кылдытыкуз.

7. Мар милемлы шумпотон вае?

⁷ Адамлэн но Евалэн троссэ бырйыны эриксы вал. Озьы ик, вал со но, мае соос бырйыны уг быгато вал. Кылсярысь, улон понна соослы одно ик шокано, сиськоно, изёно но  мукетсэ кароно вал. Нош со соосты эриктэм каре вал-а? Уг, малы ке шуоно Иегова озьы кылдытӥз, мугорлэсь сыӵе огшоры куронъёссэ быдэсъян но адямиослы шумпотон мед ваёз шуыса (Пс. 103:14, 15; Екк. 3:12, 13). Ваньмылы асьмелы кельше чылкыт омырен шоканы, ческыт сиён сиыны но ӵукна шутэтскыса султыны. Нокинлэн йыраз но уз лыкты, со милемыз эриктэм каре шуыса. Веранэз ӧвӧл, Адамен Ева но озьы ик малпазы.

8. Кыӵе уж сётӥз Инмар Адамлы но Евалы но малы?

⁸ Иегова Адамлы но Евалы уж сётӥз музъем сярысь сюлмаськыны но сое тырмытыны (Ул.-выл. 1:28). Со соосты эриктэм каре вал-а? Уг! Со уж адямиослы луонлык сётэ вал юрттыны Кылдытӥсьлы аслэсьтыз малпанзэ быдэстыны — быдэс музъемез паймымон райлы пӧрмытыны, кытын пырак дауръёс ӵоже тырбыдэс адямиос улысалзы (Ис. 45:18). Туннэ котькуд адямилэн правоез вань кузпалъяськытэк улыны, яке кузпалъяськыса, но пинал вайытэк улыны. Кыӵе гинэ ужпум медаз куты адями та пумысен, со Иеговалэн эрикезлы пумит уз луы. Озьы ке но, тросэз адямиос ужпум куто кузпалъяськыны но нылпи вордыны, со шуг-секытъёс вае ке но (1 Кор. 7:36—38). Малы? Малы ке шуоно котькудӥз оске, кузпалъяськыса со шудо луоз шуыса (Пс. 126:3). Адамлы но Евалы семья улон пырак дауръёс ӵоже шумпотон вайыны быгатэ вал.

9. Малы Улон-вылонын 2:16, 17 гожтэм куронэз шонерлыктэм, кулэтэм яке пайдатэм шуыны уз луы?

⁹ Иегова Адамлы но Евалы эшшо одӥг курон сётӥз на, соин ӵош со валэктӥз, кызьы соос кыл кутытэмын луозы, солэсь ӧз ке кылзӥське. Со вераз: «Ӟечез но уродэз тодон писпулэсь емышсэ эн сиы, уго со писпулэсь емышсэ сиён нуналад кулонэн кулод» (Ул.-выл. 2:17). Луоз-а вераны, та курон ӧжыт ке но шонерлыктэм, кулэтэм яке пайдатэм вал шуыса? Адамез но Еваез со эриктэм кариз-а? Ӧз. Библиез эскерись тросэз тодосчиос верало, Инмарлэн со куронэз визьмо но шонер вал шуыса. Тани мар гожтэ одӥгез соос пӧлысь: «Инмарлэсь косонзэ [кудӥз гожтэмын Улон-вылонын 2:16, 17] тазьы валано: Инмар гинэ тодэ, мар адямиослы „ӟеч“... нош мар ӧвӧл. „Ӟечсэ“ лэсьтыса, адямиос пайдазэ мед шӧдозы шуыса, соослы Инмарлы осконо но солэсь кылзӥськоно. Соос солэсь уг кылзӥсько ке, соослы асьсэлы ужпум кутоно луоз, мар „ӟеч“... нош мар ӧвӧл». Адямиос сыӵе ужпум кутыны уг быгато.

10. Малы сурано ӧвӧл эрико бырйыны луонлыкез но правоез ужпум кутыны, мар ӟечез, нош мар уродэз?

¹⁰ Но кин ке но вераны быгатоз: «Инмарлэн сётэм куронэз люкетэ вал Адамлы лэсьтыны сое, мае солэн потэ вал». Сыӵе адямиос кык пӧртэм валатонъёсты сурало — эрико бырйыны луонлыкез но правоез ужпум кутыны, мар ӟечез, нош мар уродэз. Адам но Ева бырйыны быгато вал:  кылзӥськоно-а Инмарлэсь, ӧвӧл-а. Нош ужпум кутыны, мар ӟечез, нош мар уродэз, Иеговалэн гинэ правоез вань. Сое возьматэ вал Едем садын будӥсь «ӟечез но уродэз тодон писпу» (Ул.-выл. 2:9). Вераны кулэ, ми котьку ум тодӥське, кыӵе емышъёс ваёзы милям кутэм ужпумъёсмы, но ум быгатӥське вераны, котькуд кутэм ужпуммы пайда ваёз шуыса. Тӥни малы адямиослэн кутэм ужпумъёссы, умой карыны малпаса ке но соос кутэмын, ӵем дыръя курадӟонъёс, шугадӟонъёс но кайгырон ваё (Мад. 14:12). Озьы луэ, малы ке шуоно адямиос котьма карыны уг быгато. Со куронэз сётэменыз, Иеговалэн, яратӥсь Атай луыса, Адамез но Еваез дышетэмез потэ вал кузьмам эрикез шонер уже кутыны. Малы озьы вераны луоз но кызьы соос со шоры учкизы?

11, 12. Малы быръён, кудзэ лэсьтӥзы Адам но Ева, шугадӟонэ вуттӥз? Вералэ пример.

¹¹ Адам но Ева Инмарлэсь кылзӥськытэк улонэз бырйизы. Ева оскиз Шайтанлэн кескич кылъёсызлы: «Тӥляд синъёсты усьтӥськозы, соку тӥ ӟечез но уродэз тодӥсь инмаръёс кадесь луоды» (Ул.-выл. 3:5). Луоз-а вераны, озьы Адам но Ева эрикогес луизы шуыса? Уз. Асьсэлэсь быръёнзэс лэсьтыса, соос ӧз басьтэ сое, мар сярысь вераз Шайтан. Нош ӝоген соос адӟизы, макем кышкыт бервылъёсы вуттӥз соослэн Иеговалэсь кылзӥськымтэзы но ас мыл потонзыя каремзы (Ул.-выл. 3:16—19). Озьы луиз, малы ке шуоно Иегова  адямиослы право ӧз сёты асьсэлы ужпум кутыны, мар ӟечез, нош мар уродэз. (Лыдӟе Мадёнъёсты 20:24; Иеремиялэсь 10:23.)

¹² Эскеромы таӵе примерез. Самолёт кулэ интые мед вуоз шуыса, пилотлы азьло ик чаклам маршрутъя лобоно. Туннэ пилотъёс самолётын навигационной приборъёсты уже куто но, кулэ интые вуытозь, авиадиспетчеръёсын герӟасько. Нош пилот приборъёслэсь возьматэмзэс лыдэ ӧз басьты, диспетчерлэсь верамзэ пеляз ӧз поны но лобиз ке отчы, кытчы мылыз потэ, самолёт пазьгиськыны быгатоз. Адамез но Еваез сыӵе пилотэн ӵошатыны луоз. Соос Инмарлэн куронэзлэсь ӧз кылзӥське но ас мыл потонзыя каризы. Кытчы со вуттӥз? Адам но Ева «пазьгиськизы» шуыны луоз: соос но соослэн нылпиоссы сьӧлыклэн но кулонлэн ляльчиоссы луизы (Рим. 5:12). Инмарлэн киулысьтыз мозмыны тыршыса, соос зэмос эриксэс ыштӥзы.

13, 14. Мар кароно, зэмзэ ик эрико луон понна?

¹³ Куд-огъёсыз малпало, адямилэн эрикез трос ке, со умойгес улэ шуыса. Но зэмзэ-а со озьы? Зэм, эрико луон адямилы трос пайда вае. Нош малпалэ ай, мар луысал дунне вылын, котькудӥз карысал ке сое, мар солэн потэ. «Уорлд бук» энциклопедиын верамын, котькуд радъям обществоын кутэм катъёсты валаны  капчи ӧвӧл шуыса, малы ке шуоно соос малпамын адямиосты утён но со дыре ик соослэсь эриксэс радъян вылысь. Зэм верамын, «капчи ӧвӧл» шуыса. Малпалэ гинэ пумтэм-йылтэм катъёс сярысь, кудъёсыз туж трос томъёсы гожтэмын, озьы ик, малпалэ туж трос юристъёс но судьяос сярысь, кудъёсызтэк со катъёсты валаны но, валэктыны но, кутыны но уг луы.

¹⁴ Нош Иисус Христос возьматӥз, кызьы ми зэмзэ ик эрико луыны быгатӥськомы. Со вераз: «Мынам кылыя улӥды ке, тӥ зэмзэ но Мынам дышетскисьёсы луоды, зэмлыкез тододы, нош зэмлык тӥледыз эрико кароз» (Иоанн 8:31, 32). Кызьы адӟиське солэн кылъёсысьтыз, зэмзэ ик эрико луон понна, кык куронъёслэсь кылзӥськоно. Нырысетӥез — осконо зэмлыклы, кудзэ со вераз. Кыкетӥез — солэн дышетскисез луоно. Озьы ми зэмзэ ик эрико луомы. Нош малэсь эрико? Иисус ватсаз: «Котькудӥз сьӧлык лэсьтӥсь сьӧлыклэн ляльчиез луэ. ...Пи тӥледыз мозмытӥз ке, соку зэм ик эрико луоды» (Иоанн 8:34, 36).

15. Малы «зэм ик эрико» луыны ми быгатӥськомы Иисуслы луыса гинэ?

¹⁵ Эрик, кудзэ сётыны Иисус кылзэ сётӥз аслаз дышетскисьёсызлы, трослы умойгес луэ эриклэсь, кудзэ басьтыны тыршо адямиос туннэ. «Пи тӥледыз мозмытӥз ке, соку зэм ик эрико луоды» кылъёсын Иисус вераз эрико луон сярысь тужгес но кышкыт зӥбетлэсь, кудӥз киултыса возе адямиосты,— сьӧлыклэн ляльчиосыз луонлэсь. Сьӧлык милемыз урод ужъёс лэсьтыны косэ, нош со сяна, со люкетэ милемлы ӟеч ужъёс лэсьтыны но карыны сое, мае быгатӥськомы. Тӥни кызьы валано, ми сьӧлыклэн ляльчиосыз шуыса. Сьӧлыклэн киулаз улон милемлы сюлмаськонъёс, вӧсь луон, курадӟонъёс но кулон вае (Рим. 6:23). Ваньмыз со тодмо вал апостол Павеллы. (Лыдӟе Римъёслы 7:21—25.) Сьӧлыклэсь мозмытскем бере гинэ ми зэмзэ ик эрико луыны быгатомы, озьы ик, кызьы эрико вал Адам но Ева.

16. Кызьы ми «зэм ик эрико» луыны быгатӥськомы?

¹⁶ «Мынам кылыя улӥды ке» кылъёсын Иисус пусйиз, адямиослы, кудъёсызлэн потэ, Иисус соосты эрико мед кароз шуыса, сётэм куронъёсъя улоно шуыса. Христианъёс луыса, ми асьмелэсь куштӥськимы но Христослэн дышетонъёсызъя улыны ужпум кутӥмы (Матф. 16:24). Кызьы Иисус кылзэ сётӥз вал, ми зэмзэ ик эрико луомы соку гинэ, куке быдэсак ас выламы шӧдомы дун сётонлэсь пайдазэ.

17. а) Мар юрттоз милемлы шудо но шумпотыса улыны? б) Мае ми эскеромы вуонояз статьяын?

¹⁷ Христослэн дышетскисьёсыз луыса, ми солэн дышетонъёсызъя улӥськомы ке, соку ми шудо но шумпотыса улӥськомы. Нош со милемлы луонлык сётэ сьӧлыклэсь но кулонлэсь мозмытскыны. (Лыдӟе Римъёслы 8:1, 2, 20, 21.) Вуонояз статьяын ми эскеромы, кызьы эрикмес визьмо уже кутоно, пырак дауръёс ӵоже Иеговаез, зэмос эриклэсь Инмарзэ, данъян понна.