1, 2. а) Малы Павел улон вакытэ адямиосты мур сюлмаськытӥз эрик но ляльчи луон? б) Павеллэн верамезъя, кин адямиослы зэмос эрик сётыны быгатэ вал?

 РИМ кунысь адямиос, кудъёсыз пӧлын улӥзы нырысетӥ христианъёс, туж данъяськизы катъёсынызы, судъян системаенызы но эрико луэменызы. Нош Рим кун кужмо но бадӟым луиз, ляльчиосызлэн секыт но трос ужаменызы сэрен. Вал дыр, куке со кунын вань улӥсьёс пӧлысь куиньмос люкетэз ляльчиос вал. Веранэз ӧвӧл, эрик но ляльчи луон мур сюлмаськытӥзы огшоры адямиосты, озьы ик, христианъёсты но.

² Аслаз гожтэтъёсаз апостол Павел трос вера эрик сярысь. Со дыръя тросэз адямиос калык пӧлын но политика удысын воштӥськонъёс ортчытыны тыршизы. Нош Павеллэн сыӵе мылкыдыз ӧй вал. Со интые, Павел но мукет христианъёс, вань кужымзэс поныса, тыршизы адямиослы Инмарлэн Эксэйлыкез  но Иисус Христослэн дуно курбонэз сярысь ӟеч иворез вераны. Павел христианъёслэсь саклыксэс висъяз солы, кин адямиослы зэмос эрик сётыны быгатэ вал. Кылсярысь, Коринфъёслы кыкетӥ гожтэтаз со гожтӥз: «Кузё-Инмар — со Дух, нош кытын ке Кузё-Инмарлэн Духез вань, отын эрик» (2 Кор. 3:17).

3, 4. а) Мар сярысь гожтӥз Павел 2 Коринфъёслы 3:17 кылъёсты гожтэмезлэсь азьло? б) Мар милемлы кароно, милям сыӵе эрикмы мед луоз шуыса, кудзэ сётэ Иегова?

³ Азьлогес со гожтэтаз ик Павел гожтӥз вал со сярысь, мар луиз Моисеен Сӥнай гурезьысь васькемез бере. Отын Иегова соин аслаз кылчинэз пыр вераськиз. Собере Моисейлэн ымныр бордысьтыз тылсиос пиштыны кутскизы. Израиль калык сое адӟиз но туж кышказ, соин ик Моисей ымнырзэ шобыртӥз (Пот. 34:29, 30, 33; 2 Кор. 3:7, 13). Собере Павел валэктӥз: «Нош адямиослэн сюлэмъёссы Кузё-Инмар пала берытске ке, соку со шобретэз басьто» (2 Кор. 3:16). Мае возьмато та кылъёс?

⁴ Талэсь азьвыл статьяысь ми тодӥмы, Иегова гинэ, кудӥз ваньзэ кылдытӥз, быдэсак эрико шуыса. Соин ик вераны луоз: «кытын ке Кузё-Инмарлэн Духез вань», отын эрик но вань. Нош милям сыӵе эрикмы мед луоз шуыса, милемлы, Павеллэн кылъёсызъя, Иегова пала берытсконо, яке солы матысь эшъёс луоно. Луоё кыр дуннеын израиль калык ваньмыз шоры адямиос сямен учкиз, Инмар сямен ӧз. Израиль пиослэн визьёссы но сюлэмъёссы шобретэн шобыртэм кадь вал. Соослы сётэм эрикез соослэн асьсэлэсь мыл потонъёссэс быдэсъян понна гинэ кутэмзы потӥз (Евр. 3:8—10).

5. а) Кыӵе эрик сётэ милемлы Иеговалэн духез? б) Кытысь ми тодӥськомы, тюрьмаын пукыса но, ляльчи луыса но Иеговаен сётэм эриклы шумпотыны луэ шуыса? в) Кыӵе юанъёсты милемлы эскероно?

⁵ Нош эрик, кудзэ сётэ Иегова,— со ляльчи луонлэсь мозмытскон гинэ ӧвӧл. Иеговалэн духез сыӵе эрик сётэ, кудзэ адямиос сётыны уг быгато. Со мозмытэ сьӧлыклэн но кулонлэн, озьы ик, зэмос луисьтэм религилэн но солэн сям-йылолъёсызлэн ляльчизы луонлэсь (Рим. 6:23; 8:2). Макем умой со эрик! Адями, кудӥзлэн сыӵе эрикез вань, тюрьмаын пукыса но, ляльчи луыса но эрико кыле (Ул.-выл. 39:20—23). Со адӟиське Нанси Юэн сузэрлэн но Харольд Кинг вын-агайлэн улонысьтызы, кудъёсыз осконзы понна трос аръёс тюрьмаын пукизы. Соослэсь асьсэ сярысь верамзэс тӥ учкыны но кылзыны быгатоды интернет-телевидениысьтымы. Кызьы ми возьматыны быгатӥськомы, эрикмес дунъяськомы шуыса? Но мар юрттоз милемлы эрикмес визьмо уже кутыны?

6. Кызьы израиль пиос тау карымтэзэс возьматӥзы?

⁶ Куке милемлы дуно кузьым кузьмало, ми туж тау кариськомы адямилы,  кудӥз сое кузьмаз. Израиль калык ӧз дунъя эрикез, кудзэ солы сётӥз Иегова, Египетысь ляльчи луонлэсь мозмытыса. Египетысь потэмзы бере, кӧня ке толэзьёс ортчыса, израиль пиослэн Египетысь сиёнзэс сиемзы потӥз, но соос ӟургетыны кутскизы солы, мар сётэ вал Иегова. Соослэн берен берытскемзы потӥз. Малпалэ гинэ: чорыг, кияр, дыня, порей сугон, сугон но чеснок израиль пиослы дуногес вал зэмос Инмарлы, Иеговалы, йыбыртъяны эриклэсь! Соин ик паймымон ӧвӧл, Иеговалэн соослы туж вожез потӥз шуыса (Лыд. 11:5, 6, 10; 14:3, 4). Со милемыз тросэзлы дышетэ.

7. Кызьы улӥз Павел, аслэсьтыз 2 Коринфъёслы 6:1 гожтэм визь-кенешсэ лыдэ басьтыса, но кызьы ми солэсь адӟем карыны быгатӥськомы?

⁷ Апостол Павел христианъёслэсь мылкыдзэс ӝутӥз тау карыны эрик понна, кудзэ Иегова яратыса сётӥз соослы аслаз Пиез, Иисус Христос, пыр. (Лыдӟе 2 Коринфъёслы 6:1.) Тодады вае, макем куректэ вал Павел, ассэ сьӧлыклэн но кулонлэн ляльчиеныз шӧдыса. Озьы ке но со вераз: «Инмарелы тау карисько — сое Со Кузё-Инмармы Иисус Христос пыр лэсьтӥз». Нош малы? Азьланьтыса со гожтӥз христианъёслы, соос «улон вайись Духлэн законэз Иисус Христос пыр сьӧлыклэн законэзлэсь но кулонлэсь» мозмытэмын шуыса (Рим. 7:24, 25; 8:2). Павел сямен ик, милемлы но тау кароно эрик понна, кудзэ сётӥз Иегова, милемыз сьӧлыклэсь но кулонлэсь мозмытыса. Дун сётонлы луыса, ми быгатӥськомы Инмармылы чылкыт возьытлыкен ужаны-тыршыны но бадӟым шумпотон басьтыны (Пс. 111:1).

8, 9. а) Мар вераз Пётр со сярысь, кызьы милемлы эрикмес уже кутоно? б) Кыӵе кышкытлыкъёсын ми туннэ пумиськиськомы?

 ⁸ Инмарлы дуно эрик сётэмез понна тау карем сяна, милемлы со эрикез шонер амалэн уже кутоно на. Апостол Пётр вераз христианъёслы, соос асьсэлэсь эриксэс сьӧлыко мыл потонъёссыя улон понна медаз кутэ шуыса. (Лыдӟе 1 Пётрлэсь 2:16.) Та кылъёс тодамы вайыто сое, мар луиз израиль калыкен луоё кыр дуннеын. Нош туннэ Пётрлэн та кылъёсыз тужгес но кулэ луо, кадь. Шайтан но солэн киулаз возиськись дунне туж трос синмаськымон ӵектонъёс сёто: мар дӥсяны, мар сиыны-юыны, кызьы шутэтскыны. Реклама удысын ужасьёс кескич амалэз уже куто: экранысь чебер адямиос оскыто милемыз, милемлы одно ик басьтоно шуыса со арбериез, кудӥз милемлы чик но кулэ ӧвӧл. Туж капчи со сьӧлтэтэ сюрыны но эрикмес шонертэм амалэн уже кутыны.

⁹ Пётрлэн кылъёсыз улонлэн мукет удысъёсаз но пайда ваё, кылсярысь, куке бырйиськомы, кытчы дышетскыны мыноно но кыӵе уже интыяськоно. Школаын дышетскисьёслэсь мылкыдзэс ӝуто вань кужымзэс дышетсконлы сётыны, школаез йылпумъямзы бере соос вылӥ образование басьтыны мед быгатозы шуыса. Соослы верало, вылӥ образованитэк бадӟым уждунэн умой уж шедьтыны уг луы шуыса. Верам кылъёссылэсь зэм луэмзэс возьматон понна, соос лыдпусъёсты уже куто, кудъёсыз возьмато, вылӥ образованиен адямиослэн уждунзы бадӟымгес шуыса. Со егитъёслэн азьпал улонэнызы герӟаськемын бере, соослы со веранъёс оскымонэсь кадь потыны быгато. Мае тодазы возёно соослы но соослэн анай-атайёссылы?

10. Мае тодамы возёно ужпум кутыкумы?

¹⁰ Кин ке но малпаны быгатоз: та юанын котькудӥз ачиз быръён лэсьтэ бере, мон котькыӵе ужпум кутыны быгато, возьытлыке гинэ монэ медаз йырйы. Сыӵе адями Павеллэн сиён сярысь кылъёсыз вылэ чӧлскыны быгатэ, кудъёссэ со вераз Коринфын улӥсь христианъёслы: «Мынам мылкыд каронэ мукет муртэ малы сюлэмшугъяськытыны кулэ?» (1 Кор. 10:29). Зэм, котькудӥз ачиз быръе, кытын дышетсконо но кытын ужано. Озьы ке но тодамы возёно, ми быдэсак эрикоесь ӧвӧл шуыса, но котькуд кутэм ужпуммылэн урод яке умой бервылъёсыз вань шуыса. Тӥни малы Павел нырысь гожтӥз: «Котьмар карыны мыным лэземын, но ваньмыз пайда уг вайы; котьмар карыны мыным лэземын, но ваньмыз асьмемыз уг визьма-нодъя» (1 Кор. 10:23). Озьыен, улонмылэн кыӵе гинэ удысаз ми ужпум медам кутэ, асьмелэсь мыл потонъёсмес гинэ лыдэ басьтоно ӧвӧл.

11. Малы Инмар милемыз мозмытӥз?

¹¹ Пётр христианъёсты алӥз, соос эриксэс шонертэм медаз кутэ шуыса.  Озьы ик, со соослы валэктӥз, кызьы сое уже кутоно. Со ӧтиз христианъёсты эриксэс «Инмарлэн ляльчиосыз кадь» уже кутыны. Озьыен, Иегова милемыз Иисус пыр сьӧлыклэсь но кулонлэсь мозмытӥз, ми солэн ляльчиосыз мед луомы но улонмес солы мед сӥзёмы шуыса.

12. Кыӵе пример возьматӥзы милемлы Ной но солэн семьяез?

¹² Самой умой амал, кызьы ми эрикмес уже кутыны быгатомы, со дырмес но кужыммес Иеговалы ужан-тыршонлы сётыны. Озьы улӥмы ке, со юрттоз ас мыл потонъёсмы но ужпумъёс, кудъёссэ пуктыны мылкыдэз ӝутэ та дунне, улонамы нырысетӥ интыын медаз луэ шуыса (Гал. 5:16). Малпалэ, кылсярысь, Ной но солэн семьяез сярысь. Соос туж лек но азыса-калгыса улӥсь адямиос пӧлын улӥзы. Озьы ке но соос ӧз сётске котырысь адямиослэн мылкыдзылы. Мар юрттӥз соослы? Соос ужпум кутӥзы улонзэс сӥзьыны ужлы, кудзэ соослы Иегова сётӥз,— ковчег лэсьтыны, асьсэлы но пудо-животъёслы сиён-юон дасяны но адямиослы вераны со сярысь, мар луоз ӝоген. Библиын верамын: «Ной ваньзэ лэсьтӥз, кызьы Инмар сое косӥз, озьы ик со лэсьтӥз» (Ул.-выл. 6:22). Кыӵе емышъёс со вайиз? Ной но солэн семьяез лек дуннеез быдтон дыръя утиськизы (Евр. 11:7).

13. Кыӵе уж сётӥз милемлы Иегова?

¹³ Мар туннэ Иегова милемыз карыны косэ? Ми тодӥськомы, Иегова Иисусэз ӟеч иворез вераны косӥз шуыса. Иисус но аслаз дышетскисьёсызлы сыӵе ик уж сётӥз. (Лыдӟе Лукалэсь 4:18, 19.) Тросэзлэсь адямиослэсь «та даурлэн „инмарез“» визьзэс пеймытэн ӵоксаз. Соос уг валало, зэмос луисьтэм религилэн, арбериослэн но котырысьтызы адямиослэн ляльчиоссы луо шуыса (2 Кор. 4:4). Милемлы бадӟым дан сётэмын — Иисус Христослэсь адӟем карыса, юрттыны адямиослы тодыны Иегова сярысь, эрик сётӥсь Инмар сярысь, но солы йыбыртъяны кутскыны (Матф. 28:19, 20). Со уж капчи ӧвӧл. Кылсярысь, куд-ог шаеръёсын адямиос ӧжытгес но ӧжытгес тунсыкъясько иворен, кудзэ ми соослы вераськомы, нош кин ке уродъяське но. Котькудмылы юано асьмелэсь: «Кутӥсько-а мон аслэсьтым эрикме, Иеговалы тросгес ужан-тыршон понна?»

14, 15. Кыӵе ужпум кутӥзы тросэз Иеговалэн ужась-тыршисьёсыз? (Учке статья кутсконысь туспуктэмъёсты.)

¹⁴ Туж шумпотоно адӟыны, кызьы тросэз христианъёс валазы, та дуннелэн пумыз туж матын ини шуыса, но асьсэлэсь улонзэс огшоры каризы, Иеговалы вань дырзэс сётыса ужан-тыршон понна (1 Кор. 9:19, 23). Кин ке но аслаз кенешаз ужа-тырше, нош кин ке мынӥз отчы, кытын тросгес ивортӥсьёс кулэ. Отчётъёс возьматэмъя, берло вить аръёс ӵоже 250 000-лэсь тросгес адямиос вань дырзэс сётыса ужаны-тыршыны кутскизы. Али соослэн лыдзы —  1 100 000-лэсь тросгес. Макем умой пример соос возьмато, кызьы эрикез визьмо уже кутоно, Иеговалы ужан-тыршон вылысь! (Пс. 109:3).

¹⁵ Мар юрттӥз со вын-агайёслы но сузэр-апайёслы визьмо ужпум кутыны? Эскеромы Джонлэсь но Джудитлэсь примерзэс, кудъёсыз берло 30 ар куспын трос пӧртэм шаеръёсын ужаса-тыршыса вуизы. Соос тодазы ваё, 1977-тӥ арын, куке Пионеръёсты дышетӥсь школаез ортчытъяны кутскизы, дышетскисьёслэсь мылкыдзэс ӝуто вал шуыса мыныны отчы, кытын ивортӥсьёс уг тырмо. Кызьы вера Джон, со ужпумез быдэстон но огшоры улон понна, солы трос ужъёсты воштоно луиз. Нош куке соос мукет шаере мынӥзы, соос валазы, Иеговалы оскиськон сям но вӧсяськон пӧртэм шуг-секытъёсты вормыны туж юртто шуыса, кылсярысь, выль кыллы, выль калык сямъёслы но мукет куазьлы дышыны. Мар соос малпало ужан-тыршонын ортчытэм аръёссы сярысь? «Мон тодӥсько, вань дырме но кужымме дунне вылысь самой кулэ ужлы сётӥ шуыса,— вера Джон.— Иегова мыным, яратӥсь атай кадь, эшшо но матынгес луиз. Али мон умойгес валасько Иаковлэн 4:8 кылъёсты: „Инмарлы матэ кариське, Со но тӥляд матады лыктоз“. Мон шедьтӥ сое, мае утчай,— шумпотон вайись улонэз».

16. Кызьы трос сюрс вын-агайёс но сузэр-апайёс эриксэс визьмо уже куто?

¹⁶ Одӥгъёсыз, Джон но Джудит сямен, трос аръёс ӵоже пионер луыса ужаны-тыршыны быгато. Нош мукетъёсыз кӧня ке дыр ӵоже гинэ. Тросэз соос пӧлысь пырисько быдэс дунне вылын ортчытӥськись пуктӥськон-лэсьтӥськон ужъёсы. Кылсярысь, Уорвикын (США, Нью-Йорк штат) дунневыл валтӥсь кивалтонниез пуктыку, 27 000 пала вын-агайёс но сузэр-апайёс мылкыд каризы отын юрттӥськыны — кин ке но кык арня, нош кин ке быдэс ар яке солэсь но кемагес. Отын ужан понна, тросэз мукет ужъёссэс кельтӥзы. Со туж умой пример, кызьы эрикез уже кутоно Иеговаез данъян понна, милемлы эрик сётӥсь Инмарез!

17. Кыӵе азьпал улон возьма соосты, кинъёс Инмарен сётэм эрикез шонер амалэн уже куто?

¹⁷ Ми туж тау кариськомы Иеговалы, ми сое тодӥмы но эрик басьтыны быгатӥмы шуыса, кудзэ басьтыны быгатӥськомы солы йыбыртъяса гинэ! Ойдолэ сыӵе ужпумъёс кутомы, кудъёсыз возьматозы, ми со эрикез туж дунъяськомы шуыса. Эрикмес шонертэм амалэн уже кутэм интые, ойдолэ лэсьтомы ваньзэ, мае быгатӥськомы, Иеговалы эшшо но тросгес ужан-тыршон понна. Соку ми адӟомы, кызьы быдэсме Римъёслы 8:21 гожтэм азьпалзэ ивортон: «Инмар нылпиослэн кадь ик данлыко эрикез басьтон понна вань кылдытэм макеос сисьмонлэн зӥбет улысьтыз мозмытэмын луозы».