1. Кыӵе буйгатӥсь кылъёс вераз Иегова Едемын бугыръяськон ӝутскем бере?

 АДЯМИОС сьӧлыко но тырбыдэстэм луэм дырысен ини Иегова соосты юнматъя. Кылсярысь, куке Едемын бугыръяськон ӝутскиз, Иегова соку ик возьматӥз, Адамлэн нылпиосызлэн вуоноезлы осконзы вань шуыса. Улон-вылонын 3:15 солэн кыл сётонэз гожтэмын, кытын со вера, «вашкала кый», Шайтан Дьявол, но солэн лек ужъёсыз быдтэмын луозы шуыса. Та азьпалзэ ивортонлэн пуштросэз валамон луэм бере адямиослэн вуоноезлы осконзы кылдӥз (Усьт. 12:9; 1 Иоанн 3:8).

2. Кызьы Иегова Ноез юнматӥз?

² Иеговалэн Ной нимо ужась-тыршисез Инмарлэсь кылзӥськисьтэм адямиос пӧлын улӥз. Ной но солэн семьяез гинэ Иеговалы йыбыртъязы. Котыр лек ужъёс но  азон-калгон вӧлмемын вал. Со понна Ной мур кайгыронэ усьыны быгатысал (Ул.-выл. 6:4, 5, 11; Иуда 6). Но Иегова вераз сое, мар Нойлэсь мылкыдзэ юнматӥз азьланяз но «Инмар азьтӥ» ветлыны (Ул.-выл. 6:9). Инмар вераз, лек дуннеез быдтыны малпа шуыса, но вераз, мар кароно Нойлы, аслэсьтыз семьязэ утён понна (Ул.-выл. 6:13—18). Иегова Нойлы юрттӥсь но буйгатӥсь луиз.

3. Кызьы Иегова Иисус Навинэз юнматӥз? (Учке статья кутсконысь суредэз.)

³ Берлогес Инмар Иисус Навинлы уж сётӥз — Инмар калыкез Сӥзем музъеме пыртыны. Со уж капчи ик ӧй вал. Со понна Иисуслы отын улӥсь кужмо калыкъёсын ожмаськоно вал. Иисус Навин туж сюлмаськиз. Иегова солэсь сюлмаськемзэ валаз, соин ик со куриз Моисеез Иисус Навинэз юнматыны. Со вераз: «Иисусэз визьма, нодъя, юнматы сое, уго со та калыклэн азьпалаз мыноз но тынэсьтыд адӟоно музъемдэ соослы люкылоз» (К. Зак. 3:28). Иисус Навин солы сётэм ужез быдэстыны кутскемлэсь азьло Иегова тазьы вераса сое юнматӥз: «Тани Мон тыныд косон сётӥсько: юн сыл, кышкасьтэм лу, эн курда, эн куалекъя; уго кытчы гинэ тон уд мыны, котьку но тонэн огазьын луоз Инмаред Кузё-Инмар» (Иис. Н. 1:1, 9). Веранэз ӧвӧл, таӵе кылъёсты кылыса, Иисус Навинлэн мылкыдыз ӝутскиз.

4, 5. а) Кызьы Иегова вашкала дыръёсы калыксэ юнматӥз? б) Кызьы Иегова аслэсьтыз пизэ юнматӥз?

⁴ Иегова нимысьтыз адямиосты гинэ ӧз юнматъя. Со быдэс калыксэ но юнматъяз. Кылсярысь, Вавилонэ пленэ нуэм еврейёсты туж буйгатӥз Инмарлэн азьпалзэ ивортонэз. Иегова вераз: «Эн кышка, Мон — тонэн огазьын, эн кепыра, Мон — тынад Инмаред; Мон тонэ юнмато, юртто тыныд, Ас шонерлыкелэн бур киыныз тонэ кутыса возё» (Ис. 41:10). Со выллем ик юнматэмын вал нырысетӥ даурысь христианъёс. Туннэ но Иегова христианъёсты озьы ик юнматэ. (Лыдӟе 2 Коринфъёслы 1:3, 4.)

⁵ Инмар аслэсьтыз Пизэ но юнматӥз. Пылатӥськыкуз Иисус инмысь куара кылӥз: «Та Мынам Яратоно Пие, Со бордын Мынам ӟеч эрике» (Матф. 3:17). Иеговалэн кылъёсыз Иисуслы музъем вылын ужакуз-тыршыкуз кужым сётӥзы.

6. Кызьы милемыз юнматыны быгатэ Иисуслэн талантъёс сярысь мадёнэз?

⁶ Иисус Атаезлэсь адӟем каре вал. Та дуннелэн быронэз сярысь веракуз, со вераз талантъёс сярысь мадён, кудӥз ӧте христианъёсты Инмарлы оскымон луыны. Со мадёнын кузё котькуд ляльчизэ ушъя: «Ярам, лякыт, оскиськымон ляльчи! Ӧжытын тон оскымон вал, табере тонэ тросэзлы вылӥ карыса пукто; кузёеныд валче шумпот» (Матф. 25:21, 23). Макем юнматӥзы та кылъёс Иисуслэсь дышетскисьёссэ но мылкыдзэс ӝутӥзы азьланяз но Иеговалы оскымон ужаны-тыршыны!

7. Кызьы Иисус апостолъёсты юнматъяз, уката ик Пётрез?

⁷ Иисус котьку тыршиз апостолъёссэ юнматъяны, куддыръя соос сое ӝоже уськыто вал ке но. Апостолъёс ӵем куспазы ченгешон поттылӥзы, кин соос пӧлысь бадӟымез луэ шуыса.  Озьы ке но Иисус чидаса курылӥз соосты зӥбыт-востэм луыны но асьсэды кузёос кадь ӧвӧл, нош ляльчиос кадь возьыны (Лука 22:24—26). Пётр Иисусэз одӥг пол гинэ ӝоже ӧз уськытъя (Матф. 16:21—23; 26:31—35, 75). Но Иисус Пётр палась ӧз берытскы. Со юнматӥз сое но вын-агайёсты юнматыны уж сётӥз (Иоанн 21:16).

8. Кызьы Езекия ожен кивалтӥсьёсты но иудей калыкез юнматӥз?

⁸ Инмарлэн Пиез музъем вылэ лыктэмлэсь азьло но кызьы мукетъёссэ юнматоно шуыса адӟем карон возьматэмлэсь азьло ик ини Иеговалэн ужась-тыршисьёсыз валало вал, макем кулэ буйгатон. Куке Ассир ожгарчиос Иерусалимлы пумит ожмаськыны дасяськизы, Езекия эксэй ожен кивалтӥсьёсты но иудей калыкез огазе люказ но юнматӥз соосты. Солэсь кылъёссэ кылыса, «калык юнматскиз» (Лыдӟе 2 Паралипоменонэз 32:6—8.)

9. Мае ми тодӥськомы юнматон сярысь Иов книгаысь?

⁹ Иовез ассэ буйгатоно вал ке но, со куинь «куанер-мискинь буйгатӥсьёсызлы» адӟем карон возьматӥз, кызьы мукетъёссэ буйгатоно. Иов вераз, мар карысал со соос интыын. Со шуиз: «Кылыным тӥледыз юнматысал, ымдурме выртыса буйгатысал» (Иов 16:1—5). Берлогес Иовлы юнматӥсь кылъёс веразы Елиуй но ачиз Иегова (Иов 33:24, 25; 36:1, 11; 42:7, 10).

10, 11. а) Малы Иеффайлэсь нылзэ юнматоно вал? б) Кинэ туннэ юнматоно?

¹⁰ Иеффайлэсь нылзэ но юнматоно вал. Аммон калыкен ожмаськыны мынэмезлэсь азьло Иеффай судья кылзэ сётӥз, Иегова солы вормыны юрттӥз ке, вормонэн берытскыкуз, солэн пумитаз кин нырысь потоз, со Иеговалы скиния бордын ужаны-тыршыны сётэмын луоз шуыса. Нырысетӥез, кин Иеффаез вормонэн ӟечкыланы потӥз, со вал солэн нылыз, одӥг гинэ вордэм пиналыз. Атай сюлэм чигиськиз. Озьы ке но Иеффай сётэм кылзэ быдэстӥз — нылзэ Сӥломе ыстӥз. Отын нылыз быдэс улонзэ скиния бордын Иеговалы ужаны-тыршыны кулэ вал (Суд. 11:30—35).

¹¹ Малпалэ, макем секыт вал Иеффайлы. Нош эшшо но секытгес вал, вылды, солэн нылызлы, кудӥз дась луиз атаезлэсь сётэм кылзэ быдэстыны (Суд. 11:36, 37). Со куштӥськиз луонлыклэсь бызьыны, пинал вайыны, нош озьы ик, атай выжызэ азьланьтыны но люкетлы сётэм музъемзэ утьыны. Веранэз ӧвӧл, сое одно ик буйгатоно но юнматоно вал. Библиын верамын: «Израильлы таӵе сям кылдӥз: Израиль нылъёс арлы быдэ ньыль нунал ӵоже Галаадысь Иеффайлэсь нылзэ бӧрдыса буре вайыны ветло вал» (Суд. 11:39, 40). Соку ушъяно но юнматоно ӧвӧл-а христианъёсты, кудъёсыз Инмарлы тросгес ужан-тыршон понна, кузпалъяськытэк уло? (1 Кор. 7:32—35).

12, 13. Кызьы Пётр аслэсьтыз вын-агайёссэ юнматъяз?

¹² Кулон азяз уе Иисус апостол Пётрлы вераз: «Симон! Симон! Тани, шайтан куриз вал тӥледыз чабеез кадь  пужныны. Но Мон тон понна вӧсяськи, тынад осконэд медаз начармы вал шуыса. Тон нош ик берыктӥськид ке, агай-вынъёстэ юнматы» (Лука 22:31, 32).

¹³ Пётр нырысетӥ даурысь христиан кенешлэн одӥгез «осконлэн пыкъетэз» луиз (Гал. 2:9). Пётрлэн асьме эраысь 33-тӥ арын Витьтонэтӥ Нуналэ дӥсьтыса верам кылъёсыз но кышкасьтэм луэмез вын-агайёсты но сузэр-апайёсты юнматӥзы. Трос аръёс ӵоже Инмарлы ужамез-тыршемез бере со гожтэт гожтӥз. Малы гожтэмзэ со тазьы валэктӥз: «Тае мон тӥледлы... гожтӥ... Инмарлэн та зэмос ӟечлыкез-дэлетэз луэ шуыса, тӥлесьтыд мылкыддэс лӧпкытыны но со сярысь тӥледлы ивортыны мылкыд кари. Та бордын тӥ юн сылэ, юн возиське» (1 Пётр 5:12). Пётрлэн гожтэтъёсыз, кудъёссэ со Инмарлэн духезлэн кивалтэмез улсын гожтӥз, трос дауръёс ӵоже христианъёсты юнмато но буйгато, асьме вакытэ но. Али, куке ми Иеговалэсь сётэм кылъёсызлэсь быдэсмемзэс возьмаськомы, милемлы тужгес но юнматон кулэ (2 Пётр 3:13).

14, 15. Кызьы Иоаннлэн книгаосыз, кудъёссэ со Инмарлэн духезлэн кивалтэмез улсын гожтӥз, трос дауръёс ӵоже христианъёсты юнматъязы?

¹⁴ Апостол Иоанн но нырысетӥ даурысь христиан кенешлэн «осконлэн пыкъетэз» вал. Солэсь Евангелизэ лыдӟыса, кудаз яркыт верамын Иисуслэн ужамез-тыршемез сярысь, христианъёс  юнматскон шедьто. Туннэ но Инмарлэн ужась-тыршисьёсызлы со кужым сётэ. Кылсярысь, Иоаннлэн Евангелияз гинэ Иисуслэн кылъёсыз гожтэмын, зэмос христианъёсты яратэмзыя тодмалозы шуыса. (Лыдӟе Иоаннлэсь 13:34, 35.)

¹⁵ Иоаннлэн куинь гожтэтъёсаз мукет но кулэ луись малпанъёс гожтэмын. Куке ми сьӧлыко луэммы сэрен курадӟиськомы, милемыз буйгато таӵе кылъёс: «Иисус Христослэн Вирыз котькыӵе но сьӧлыклэсь асьмеды сузя» (1 Иоанн 1:7). Нош сюлэммы милемыз ялан янгыше уськытэ ке, синъёсамы тау карон синвуос быгыльско, куке ми лыдӟиськомы «Инмар асьмелэн сюлэммылэсь бадӟымгес» шуыса (1 Иоанн 3:20). Иоанн гинэ гожтӥз: «Инмар — со яратон» (1 Иоанн 4:8, 16). Кыкетӥяз но куинетӥяз гожтэтаз со ушъя христианъёсты, кудъёсыз «зэмлык бордын уло» (3 Иоанн 3, 4; 2 Иоанн 4).

16, 17. Кызьы апостол Павел христианъёсты юнматъяз?

¹⁶ Нырысетӥ даурын кин апостолъёс пӧлысь тужгес но умой пример возьматӥз, кызьы вын-агайёсты но сузэр-апайёсты юнматоно? Апостол Павел, луоз. Христиан кенеш кылдэм бере тросэз апостолъёс улӥзы Иерусалимын, кытын кивалтӥсь кенеш вал (Ап. уж. 8:14; 15:2). Иудеяын христианъёс Иисус Христос сярысь ӟеч иворез веразы соослы, кинъёс иудаизм  осконын вал но одӥг Инмарлы оскизы. Нош Павелэз святой дух ыстӥз ӟеч иворез вераны грек, рим но мукет калыкысь адямиос доры, кудъёсыз трос инмаръёслы йыбыртъязы (Гал. 2:7—9; 1 Тим. 2:7).

¹⁷ Павел туала Турцилэсь, Грецилэсь но Италилэсь музъемзэ быдэсак ортчиз, кытын со еврей луисьтэм адямиослы ӟеч иворез вераз но христиан кенешъёсты кылдытъяз. Сокугес христиан луэм муртъёс ас калык выжыоссылэсь курадӟытонъёссэс чидано луизы, соин ик соосты юнматоно вал (1 Фес. 2:14). Асьме эраысь 50-тӥ ар котырын Павел Фессалоникаысь выль кенешлы гожтӥз: «Ваньды понна ялан Инмарлы тау кариськомы, вӧсяськыкумы тӥледыз тодамы вайиськомы. Тӥлесьтыд осконэн ужамдэс, яратыса тыршемдэс... чидаса улэмдэс... ялан тодамы вайиськомы» (1 Фес. 1:2, 3). Озьы ик, со ӧтиз соосты: «Азьланяз но ог-огдылэсь мылкыддэс ӝутэ, ог-огдэс юнматэ» (1 Фес. 5:11).

18. Кызьы кивалтӥсь кенеш Филиппез юнматӥз?

¹⁸ Нырысетӥ даурын кивалтӥсь кенеш юнматъяз кызьы кенешын кивалтыны пуктэм вын-агайёсты, озьы ик мукет христианъёсты но. Кылсярысь, кивалтӥсь кенешлэсь юнматэмзэ ас вылаз шӧдӥз Филипп, кудӥз Самарияысь адямиослы Христос сярысь ивортӥз. Кивалтӥсь кенеш Самарияе аслэсьтыз кык адямиоссэ ыстӥз — Пётр но Иоанн апостолъёсты — выль дышетскисьёс святой дух мед басьтозы шуыса вӧсяськон вылысь (Ап. уж. 8:5, 14—17). Малпалэ ай, макем шумпотэмын вал Филипп но соос, кинъёс солы луыса христианъёс луизы!

19. Кызьы нырысетӥ даурын христианъёс кивалтӥсь кенешлэн гожтэтэз шоры учкизы?

¹⁹ Берлогес кивалтӥсь кенеш азьын юан кылдӥз: кулэ-а еврейёс луисьтэм калык пӧлысь христианъёслы вандӥськон сямез ортчытыны, кызьы кароно вал еврейёслы Моисей Законъя (Ап. уж. 15:1, 2). Святой дух курыса вӧсяськемзы но Гожтэмъёсты эскеремзы бере вын-агайёс ужпум кутӥзы, вандӥськон сямез ортчытыны кулэ ӧвӧл ни шуыса, но со сярысь кенешъёслы гожтэт гожтӥзы. Кивалтӥсь кенеш аслаз адямиосызлы уж сётӥз кенешъёслы гожтэт сётыны, кудаз кутэм ужпум сярысь верамын вал. Кызьы христианъёс учкизы со гожтэт шоры? Библиын верамын: «Соос лыдӟизы но таӵе иворлы шумпотӥзы» (Ап. уж. 15:27—32).

20. а) Кызьы Кивалтӥсь кенеш быдэс калыккуспо вынлыкез буйгатэ но юнматэ? б) Кыӵе юанэз ми мукетаз статьяын эскеромы?

²⁰ Туннэ Иеговалэн Адӟись-Ивортӥсьёсызлэн Кивалтӥсь кенешсы юнматэ Вефильын тыршисьёсты, нимысьтыз ужась-тыршисьёсты, кудъёсыз вань дырзэс Иеговалы ужан-тыршонлы сӥзё, озьы ик, быдэс калыккуспо вынлыкмес. Нырысетӥ даурын сямен ик, со ваньмылы асьмелы шумпотон вае! Со сяна, Кивалтӥсь кенешлэн ужпум кутэмезъя, 2015-тӥ арын поттэмын вал «Берытскы Иегова доры» брошюра. Сое поттӥзы кенешез кельтэмъёсты юнматон вылысь. Нош кин эшшо, кенешын кивалтыны пуктэм вын-агайёс сяна, Иеговалэсь адӟем карыны но мукетъёссэ юнматыны кулэ? Та юанэз ми мукетаз статьяын эскеромы.