1. Мар каремзы потэ Инмарлэн вань ужась-тыршисьёсызлэн? Малы? (Учке вылбамысь суредэз.)

 ИИСУС ХРИСТОС дышетскисьёсызлы курон-косон сётӥз: «Мынэлэ, вань калыкъёсты дышетэлэ» (Матф. 28:19). Инмарлэн вань оскымон ужась-тыршисьёсызлэн дышетскемзы потэ та ужез тыршыса быдэсъяны (2 Тим. 4:5). Ми понна со тужгес но кулэ луись уж, кудзэ ӝегатскытэк лэсьтоно. Но милемлы секыт луыны быгатэ солы дыр висъяны сомында, кӧня милям потэ.

2. Кыӵе шуг-секытъёсын милемлы пумиськоно луэ?

² Асьмелэн дырмы но кужыммы мукет ужъёслы но кошке. Кин ке но трос ужа, аслаз но семьяезлэн самой кулэез мед луоз шуыса. Нош кин ке но семья ужъёсты быдэсъяны тырше, висёнэн, депрессиен яке бадӟым арлыдэн герӟаськем шуг-секытъёсын нюръяське. Мар юрттоз милемлы, номыр шоры учкытэк, Инмарлэсь ужзэ тыршыса быдэсъяны?

3. Кыӵе йылпумъян лэсьтыны луэ Иисуслэн кылъёсысьтыз, кудъёсыз гожтэмын Матфейлэн 13:23?

³ Югдуръёсмы сэрен ми ум ке быгатӥське ужаны-тыршыны сомында, кӧня милям потэ, киосмес лэзёно ӧвӧл. Иисус тодӥз, Эксэйлыклэсь емышсэ ваньмыз огмында вайыны уз быгатэ шуыса. (Лыдӟе Матфейлэсь 13:23.) Иегова туж дунъя солы ужам-тыршеммес, куке ми лэсьтӥськомы ваньзэ, мае быгатӥськомы (Евр. 6:10—12). Нош со дыре ик, ми малпаны быгатӥськомы, ужан-тыршонэ тросгес пыриськыны быгатысалмы шуыса. Та статьяын ми эскеромы, кызьы ужан-тыршонэз нырысетӥ интые пуктоно, огшоры улоно, эшшо но быгатыса тодытоно но адямиосты зэмлыклы дышетоно. Нош нырысь малпаськомы,  кызьы Инмарлэсь ужзэ тыршыса быдэсъяно.

4. Мае возьматэ Инмарлэсь ужзэ тыршыса быдэсъян?

⁴ Инмарлэсь ужзэ тыршыса быдэсъяммы потэ ке, лэсьтоно ваньзэ, мае быгатӥськомы, тодытон понна но адямиосты Библиысь зэмлыклы дышетон понна. Но Иегова ужан-тыршонлы висъям дырмес гинэ уг дунъя, озьы ик со дунъя сое, малы ми сое лэсьтӥськомы. Ми вань сюлмысьтымы Инмарлы ужаськомы-тыршиськомы b, малы ке шуоно Иеговаез но матысьёсмес яратӥськомы (Марк 12:30, 31; Кол. 3:23). Нош мае возьматэ Иеговалы вань сюлмысь ужан-тыршон? Со возьматэ вань кужымез поныса тыршемез, милемлы сётэм ужез тужгес но умой быдэстон понна. Ми ужаны-тыршыны луонлыкез дунъяськомы ке, соку тыршомы ӟеч иворез котькуд тупась учыре вераны.

5, 6. Вералэ пример, кудӥз возьматэ, адямилэн дырыз ӧжыт ке но, ужан-тыршон улоназ нырысетӥ интыын луыны быгатэ шуыса?

⁵ Пуктэ син азяды егит пиез, кудӥз туж яратэ гитараен шудыны, со уй но нунал соин шудыны дась. Со одӥг кафеын гитараен шудыса ужаны кутске но отын шутэтскон нуналъёсы ужа. Но кафеын уждунэз туж ичи, соин ик со вордӥськон нуналысен удмурт арня нуналозь магазинын вузкарись луыса ужа. Та пияш туж трос дырзэ магазинын ортчытэ ке но, со музыка сярысь гинэ малпаське но гитараен шудыны быгатонлыксэ умоятыны тырше, усто музыкант луон понна. Соин ик котькуд тупась учыре со гитаразэ кутэ, кӧня ке минутлы ке но.

⁶ Озьы ик тӥ но югдуръёсты сэрен тодытонлы трос дыр висъяны уд быгатӥське, вылды. Но со тӥляд яратоно ужды. Тӥ быгатонлыкъёстэс умоятыны тыршиськоды, адямиослэсь сюлэмъёссэс ӟеч иворен вырӟытон понна. Озьы ке но тӥляд трос ужъёсты, дыр, но тӥляд юанды кылдэ: кызьы ужан-тыршонэз нырысетӥ интые пуктоно?

7, 8. Кызьы Иисус ужан-тыршон шоры учкиз но кызьы ми солэсь адӟем карыны быгатӥськомы?

⁷ Иисус Христос тужгес но умой пример возьматӥз, кызьы ужан-тыршон шоры учконо. Инмарлэн Эксэйлыкез сярысь тодытон солэн улоназ валтӥсь уж вал (Иоанн 4:34, 35). Иисус трос сю иськемъёс пыдын ортчиз, тросгес адямиос ӟеч иворез кылыны мед быгатозы шуыса. Адямиосын со котькуд тупась учыре вераськиз. Иисус ужан-тыршонэз ваньмызлэсь кулэ ужен лыдъяз.

⁸ Котькуд тупась учыре адямиослы ӟеч иворез вераськомы ке, озьы ми Христослэсь адӟем кариськомы. Тодытон уж понна ми малэсь ке но куштӥськыны но дась (Марк 6:31—34; 1 Пётр 2:21). Куд-ог вын-агайёс но сузэр-апайёс юрттӥсь пионеръёс, пионеръёс но нимысьтыз пионеръёс луыса ужало-тыршо. Нош кин ке но мукет кылэз дышетӥз но кошкиз отчы, кытын тросгес тодытӥсьёс кулэ. Озьы ик трос ужез быдэсто Эксэйлыклэн ивортӥсьёсыз, кудъёсыз Инмарлы ужан-тыршонын лэсьто ваньзэ, мае быгато. Кин луыса гинэ ми медам ужалэ-тырше, Иегова уг возьма милесьтым сое, мае ми лэсьтыны ум быгатӥське. Солэн потэ, «бакельлыко Инмарлэсь» «данлыко Ӟеч Иворзэ» нуыса, ми шумпотон мед басьтомы шуыса (1 Тим. 1:11; К. Зак. 30:11).

9. а) Малы вераны луоз, ужан-тыршон Павел понна ужлэсь но кулэгес вал шуыса? б) Кызьы Павел ужан-тыршон шоры учкиз, Апостолъёслэн ужъёсазы 28:16, 30, 31 гожтэмъя?

⁹ Апостол Павел умой адӟем карон возьматӥз, кызьы ужан-тыршонэз нырысетӥ интые пуктоно. Куке Павел миссионер луыса кыкетӥзэ ветлон дыръяз Коринфын улӥз, солэн коньдонэз туж ӧжыт вал, но солы палаткаосты лэсьтоно луиз. Нош Павеллэн улоназ уж валтӥсь инты ӧз басьты. Со аслыз коньдон поттӥз, Коринфын улӥсьёслы ӟеч иворез веран понна но соослы акыльтытэк улон понна (2 Кор. 11:7). Азьло кадь ик ужан-тыршон солы ваньмызлэсь кулэез вал, но со котькуд суббота нуналэ тодытыса улӥз. Нош куке югдурез воштӥськиз, Павел ужан-тыршонлы тросгес дыр висъяны кутскиз. Со «вань лулыныз-сюлмыныз Иисуслэсь Христос луэмзэ иудейёслы тодытонлы ӝутӥськиз» (Ап. уж. 18:3—5; 2 Кор. 11:9). Кӧня ке дыр ортчыса, куке Павел кык ар ӵоже Римын одӥг коркан жильыетын пукиз, со ас дораз лыктӥсьёслы тодытӥз но гожтэтъёс гожъяз. (Лыдӟе Апостолъёслэсь ужъёссэс 28:16, 30, 31.) Павел номырлы ӧз лэзьы ассэ ужан-тыршонлэсь палэнтыны. Со гожтӥз: «Инмар... милемлы таӵе ужан-тыршон сётэм бере, куректыса ми ум ни улӥське» (2 Кор. 4:1). Милемлы но, Павеллы сямен, трос ужано луэ ке, ми быгатӥськомы Эксэйлыклэсь ужзэ улонамы нырысетӥ интые пуктыны.

10, 11. Кызьы ми Инмарлы вань сюлмысьтымы ужаны-тыршыны быгатӥськомы, милям тазалыкмы ляб ке но?

¹⁰ Бадӟым арлыдды яке тазалыкты сэрен тӥледлы коркась корка тодытыны секыт ке, тӥ кызьы ке но мукет сямен тодытыны быгатӥськоды. Нырысетӥ даурын христианъёс тодытӥзы котькытын, кытын адямиос вал. Соос «вань калык азьын, коркась корка ветлыса» дышетӥзы но котькуд тупась учыре адямиосын вераськизы (Ап. уж. 17:17; 20:20). Тӥледлы кема дыр ӵоже ветлыны секыт ке, соку, трос калыко интыын кытчы ке пуксьыса, мынӥсь-ветлӥсьёслы тодытыны луэ. Озьы ик луэ  мар ке карыку тодытыны, гожтэтъёс гожъяны яке телефон пыр ӟеч иворез вераны. Тросэз вын-агайёс но сузэр-апайёс, кудъёсыз коркась корка ветлыса трос тодытыны уг быгато, туж шумпото, соослэн ужаны-тыршыны пӧртэм амалъёссы вань шуыса.

¹¹ Тазалыкен герӟаськем шуг-секытъёс шоры учкытэк, тӥ Инмарлы вань сюлмысьтыды ужаны-тыршыны быгатӥськоды. Нош ик Павеллэн примерез доры берытскомы. Со вераз: «Мертантэм бадӟым кужым асьме бордысь уг, Инмар бордысь потэ» (2 Кор. 4:7). Та кужым солы кулэ луиз, куке миссионер луыса кыкетӥзэ ветлон дыръяз со висьыны усиз. Галатъёслы со гожтӥз: «Нырысьсэ тӥ дорын Ӟеч Ивор тодытыкум, висисько вал» (Гал. 4:13). Кызьы тӥ Павеллэсь адӟем карыны быгатӥськоды? Тодытэ эмъясьёслы но эмъюртын мукет ужасьёслы, малы ке шуоно соосты дорысьтызы шедьтыны секыт.

12. Мае возьматэ синмы чылкыт луыны кулэ шуыса верам?

¹² Иисус вераз: «Мугорлэн югдытӥсез син луэ. Озьыен, синмыд чылкыт ке луиз, быдэс мугорыд югыт луоз» (Матф. 6:22). Солэн верамез потэ вал, милемлы одӥг ужпумлы саклыкмес висъяно но солэсь палэнсконо ӧвӧл шуыса. Иисус милемлы та пумысен туж умой адӟем карон возьматӥз: солэн улонэз ужан-тыршон котыртӥ бергаз. Дышетскисьёссэ со дышетӥз: соослэн улоназы валтӥсь инты басьтыны кулэ Иеговалы ужан-тыршон но солэн Эксэйлыкез. Христослэсь адӟем карон понна,  нырысь ик ӟеч иворез тодытонлы саклыкмес висъяно, «Инмарлэсь Эксэйлыксэ но Солэсь шонерлыксэ» утчаса (Матф. 6:33).

13. Мар юрттоз милемлы ужан-тыршонлы тросгес дыр висъяны?

¹³ Кытысь тросгес дыр шедьтоно, мукетъёслы Иеговаез тодыны но сое яратыны юрттон понна? Улонэз огшорыгес карыны луэ c. Кылсярысь, быгатӥськоды-а тӥ ужан дырдэс тупатыны озьы, арня вискын тросгес тодытыны мед быгатоды шуыса? Нош тӥляд трос дырды шутэтсконлы кошке ке, быгатӥськоды-а тӥ мае ке но воштыны?

14. Мар каризы одӥг кузпалъёс, тодытон ужлы тросгес дыр висъян понна?

¹⁴ Тани Элайас нимо тӧролэн но солэн кышноезлэн учырзы. Со вера: «Ми пионеръёс луыса ужаны-тыршыны ӧм быгатэ, но валаськомы вал, мае ке но воштоно шуыса. Соин ик ми ужпум пуктӥмы тросгес тодытыны но сое каллен быдэстыны кутскимы. Ми тыршимы ӧжытгес быдтыны коньдонмес но дырмес, кудӥз шутэтсконлы но шулдыръяськонлы кошке вал (нош солы трос дыр висъямы). Со сяна, ми куримы ужан интыосысьтымы кузёосмес ужан дырмес воштыны. Озьыен, ми быгатӥмы ӝытъёсы тодытыны но тросгес Библиез дышетонъёсты ортчытъяны. Озьы ик толэзяз кык пол ми быгатӥмы арня вискын нуназе тодытыны. Ми солы туж шумпотӥмы!»

15, 16. Кызьы эшшо но умойгес тодытоно, 1 Тимофейлы 4:13, 15 гожтэм визь-кенешез лыдэ басьтыса? (Озьы ик учке « Ужпумъёс, кудъёсыз юрттозы мыным Инмарлэсь ужзэ тыршыса быдэсъяны» рамкаез.)

¹⁵ Мар милемлы эшшо юрттоз на Инмарлэсь ужзэ тыршыса быдэсъяны? Куд-ог  удысъёсын ужан понна, ялан дышетсконо но быгатонлыкъёсты умоятоно. Озьы ик луэ Эксэйлык сярысь тодытонын но. Милемлы тодытон уже тросгес пыриськоно но быгатонлыкъёсмес умоятоно (Мад. 1:5; лыдӟе 1 Тимофейлы 4:13, 15).

¹⁶ Мар милемлы юрттоз? Уже кутоно визь-кенешъёсты, кудъёссэ кылыны луэ котькуд арняе ортчись «Улон но ужан-тыршон» пумиськонын. Отын милемыз дышето, кызьы эшшо но умойгес тодытоно. Кылсярысь, куке пумиськонэз радъясь агай дышетскисьёслэн возьматэм ужзы сярысь вера, солэсь визь-кенешъёссэ лыдэ басьтыны луоз, мукет дыръя тодытыкумы сое уже кутон понна. Озьы ик юрттэт курыны луоз тодытон ужез нуись группаед понна кыл кутӥсь тӧролэсь, тодытыны луоз соин яке мукет быгатӥсь ивортӥсен, пионерен, ёросэз чакласен. Макем умойгес ми дышетскомы дышетон тӥрлыкъёсты уже кутыны, сокем тросгес шумпотон милемлы ваёз тодытон но адямиосты зэмлыклы дышетон.

17. Кыӵе бакель каронъёс милемыз возьмало, ми Инмарлы вань сюлмысьтымы ужаськомы-тыршиськомы ке?

¹⁷ «Ми — Инмарлэн ужасьёсыз», но со туж бадӟым дан! (1 Кор. 3:9). Ми «ӟечсэ бырйыны» тыршиськомы ке но саклыкмес нырысь ик ужан-тыршонлы висъяськомы ке, ми трос шумпотон басьтомы (Флп. 1:10; Пс. 99:2). Инмарлэн ужась-тыршисьёсыз луыса, ми оскиськомы: Иегова милемыз юнматоз, ми тодытыны мед быгатомы шуыса, шуг-секытъёс шоры учкытэк (2 Кор. 4:1, 7; 6:4). Тодытон ужын кӧня гинэ медам лэсьтэ, ми шумпотыны быгатомы, вань сюлмысьтымы отчы пыриськиськомы ке (Гал. 6:4). Иеговалы вань сюлмысьтымы ужамы-тыршимы ке, ми возьматомы, сое но матысьёсмес яратӥськомы шуыса. Озьы лэсьтыса, ми асьмемыз но милемыз кылзӥсьёсты утёмы (1 Тим. 4:16).