1. Кызьы Иегова ми сярысь сюлмаське, Ефесъёслы 6:10—13 лыдэ басьтыса?

 ИЕГОВА ми сярысь пӧртэм амалъёсын сюлмаське. Кылсярысь, со юрттэ милемлы тушмонъёсмылы пумит сылыны. Валтӥсь тушмонъёсмы — Шайтан но периос. Иегова азьло ик вера милемлы, макем бадӟым кышкытлык соос вайыны быгато, но сётэ милемлы ваньзэ, мар кулэ соосын нюръяськон понна. (Лыдӟе Ефесъёслы 6:10—13.) Ми Иеговалэсь юрттэтсэ ӧм палэнтэ ке но котьку со вылэ оскиськимы ке, ми Шайтанлы пумит сылыны быгатомы. Милям но, апостол Павеллэн кадь ик, осконмы луоз, кудӥз вераз: «Инмар асьме палан ке, кин асьмелы пумит луыны быгатоз?» (Рим. 8:31).

2. Мае ми эскеромы та статьяын?

² Шайтан но периос сярысь малпаськонлы ми трос саклык ум висъяське. Зэмос христианъёс луыса, милям тросгес потэ Иегова сярысь тодэммы но солы ужаммы-тыршеммы (Пс. 24:5). Озьы ке но милемлы тодыны кулэ, кызьы Шайтан адямиослэсь визьзэс туга, со милемыз медаз пӧя шуыса (2 Кор. 2:11). Та статьяын ми эскеромы, кыӵе сьӧлтэтэз Шайтан но периос ӵемгес уже куто. Со сяна, ми вераськомы, кызьы соослы пумит сылоно.

3, 4. а) Мар со сыӵе тунаськон-пелляськон? б) Макем вӧлмемын тунаськон-пелляськонлы оскон?

³ Шайтанлэн но периослэн яратоно сьӧлтэтсы — со тунаськон-пелляськон. Соин вырисьёс верало, тодо шуыса  сое, мае мукетъёсыз уг тодо, яке лэсьтыны быгато шуыса сое, мае мукет адямиос лэсьтыны уг быгато. Одӥгъёсыз верало, тунаськон яке астрология пыр азьпалзэ тодыны быгато шуыса. Мукетъёсыз верало, кулэмъёсын верасько шуыса. Вань сыӵеосыз но, кинъёс веднасько яке тунасько но адямилы уродзэ лэсьтыны тыршо b.

⁴ Трос-а адямиос тунаськон-пелляськонлы оско? Адямиослы юан сётъязы 18 шаеръёсын, кудъёсыз быръемын вал Латин Америкаысь, озьы ик Кариб зарезьысь но со котырысь шаеръёсысь. Со возьматӥз, юам адямиос пӧлысь куинетӥ люкетэз тунаськонлы но веднаськонлы оске шуыса, но сомындагес ик адямиос малпало, кулэм адямиосын вераськыны луэ шуыса. Озьы ик юан сётъямын вал Африкаысь 18 шаеръёсын, но тодмо луиз, юам адямиос пӧлысь ӝыныезлэсь тросэз оско, веднаськыса умойзэ яке уродзэ лэсьтыны луэ шуыса. Кытын гинэ ми медам улэ, тунаськон-пелляськонлэсь палэнсконо, малы ке шуоно Шайтан «быдэс дуннелэсь визьзэ» туганы тырше (Усьт. 12:9).

5. Кызьы Иегова тунаськон-пелляськон шоры учке?

⁵ Иегова — «зэмлыклэн Инмарез» (Пс. 30:6). Кызьы со тунаськон-пелляськон шоры учке? Со сое адӟемпотостэм каре. Тани мар со вераз израиль калыклы: «Тон дорын луыны кулэ ӧвӧл пизэ я нылзэ тыл вамен поттась, азьпалзэ тунаса верась, туно, пелляськись, ведӥн мурт, пелляськон кылъёс верась, урод духъёсын кусып возись, син пӧртмась, кулэмлэсь духсэ ӧтьылӥсь; уго таӵе ужъёсын вырись котькудӥз адями Кузё-Инмарлы юрӟым потэ» (К. Зак. 18:10—12). Христианъёслы Израиль калыклы сётэм Законъя улыны кулэ ӧвӧл. Озьы ке но ми тодӥськомы, Инмар тунаськон-пелляськон шоры азьло сямен ик учке шуыса (Мал. 3:6).

6. а) Кыӵе кышкытлык вае тунаськон-пелляськон? б) Мар луэ кулэм адямиосын, кызьы адӟиське Екклесиастысь 9:5?

⁶ Иегова милемыз тунаськон-пелляськонэн выронлэсь алэ, малы ке шуоно со тодэ, макем бадӟым кышкытлык со вайыны быгатэ. Тунаськон-пелляськон пыр Шайтан адямиосты пӧя, кылсярысь, кулэмъёс сопал дуннеын уло шуыса. (Лыдӟе Екклесиастэз 9:5.) Со сяна, солы луыса со адямиосты кышкатыса возе но соосты Иеговалэсь палэнтыны тырше. Солэн потэ, тунаськон-пелляськонэн вырисьёс, Иегова интые, урод духъёслы мед оскиськозы шуыса.

7. Кызьы Иегова юрттэ милемлы Шайтанлы но периослы пумит сылыны?

⁷ Кызьы верамын вал ини, Иегова валэктэ, мар кароно, Шайтан но периос милемыз медаз пӧялэ шуыса. Эскеромы куд-ог пайдаё визь-кенешъёсты, кудъёсыз юрттозы милемлы соосын нюръяськыны.

8. а) Мар милемлы нырысь ик юрттоз урод духъёслы пумит сылыны? б) Кызьы Псалтирь 145:4 шарае поттэ Шайтанлэсь кулэмъёс сярысь пӧяськонзэ?

⁸ Библиез лыдӟе но со вылын малпаське. Со тужгес но умой амал, кудӥз юрттэ милемлы урод духъёслэсь пӧяськемзэс палэнтыны. Библия, лэчыт меч кадь, Инмарлэсь зэмлыксэ Шайтанлэн пӧяськонэзлэсь  люке (Еф. 6:17). Кылсярысь, Инмарлэн Кылыз шарае поттэ пӧяськонэз, кулэмъёс улэп адямиосын вераськыны быгато шуыса. (Лыдӟе Псалтирез 145:4.) Озьы ик отын вераське, Иегова гинэ азьпалзэ пыр-поч вераны быгатэ шуыса (Ис. 45:21; 46:10). Ми Библиез ялан лыдӟиськомы ке но со вылын малпаськиськомы ке, со юрттоз милемлы палэнтыны но адӟемпотостэм карыны пӧяськонэз, кудӥзлы урод духъёс адямиосты оскытыны тыршо.

9. Малэсь милемлы палэнсконо?

⁹ Палэнтэ ваньзэ, мар тунаськон-пелляськонэн герӟаськемын. Зэмос христианъёс луыса, ми палэнскиськомы ваньмызлэсь, мар тунаськон-пелляськонэн герӟаськемын. Кылсярысь, ми ум ветлӥське туно-пеллёос доры но кызьы ке но мукет сямен кулэмъёсын вераськыны ум тыршиське. Кызьы азьвыл статьяын гожтэмын вал, ми ум пыриськиське кулэм адямиез ватонэн герӟаськем сям-йылолъёсы, кудъёсыз сопал дуннеын улонлы оскон вылэ пыкиськемын. Озьы ик ми ум тыршиське азьпал улонэз тодыны астрологъёс яке азьпалзэ тунаса верасьёс пыр (Ис. 8:19). Ми валаськомы, со туж бадӟым кышкытлык вайыны быгатэ шуыса, малы ке шуоно озьы ми Шайтанэн но периосын кусып возьыны кутскомы.

10, 11. а) Мар каризы Ефес карысь куд-огъёсыз, куке зэмлыкез тодӥзы? б) 1 Коринфъёслы 10:21 гожтэмъя, малы милемлы соослэсь адӟем кароно но кызьы сое лэсьтоно?

¹⁰ Тунаськон-пелляськонэн герӟаськем арбериосты медаз луэ. Нырысетӥ даурын Ефес карысь куд-огъёсыз тунаськонэн выризы. Зэмлыкез тодыса, соос юн мылкыдын воштӥськонъёс лэсьтӥзы. Апостолъёслэн ужъёсазы 19:19 гожтэмын: «Нош тунаськонэн вырисьёс пӧлысь тросэз книгаоссэс люкаса, вань калык азьын сутӥзы». Соос валазы, макем кулэ урод духъёслы  пумит сылыны. Тунаськонэн герӟаськем книгаоссы туж дуноесь вал, нош Ефесысь христианъёс соосты кинлы ке ӧз сётэ но ӧз вузалэ — соос книгаоссэс сутӥзы. Соос малпазы, кызьы Иеговаез шумпоттыны, нош ӧз малпаське, кызьы, соосты вузаса, тросгес коньдон поттыны.

¹¹ Кызьы ми та христианъёслэсь адӟем карыны быгатӥськомы? Визьмо луысал, куштыны тунаськон-пелляськонэн герӟаськем арбериосты, кудъёссэ уродэзлэсь но син усемлэсь утён понна уже куто. (Лыдӟе 1 Коринфъёслы 10:21.)

12. Кыӵе юанъёс юрттозы милемлы шутэтскон амалъёсмес эскерыны?

¹² Эскере, кыӵе шутэтскон амалъёс бырйиськоды. Юалэ асьтэлэсь: «Лыдӟисько-а мон тунаськон-пелляськон сярысь книгаосты, журналъёсты но интернетысь статьяосты? Нош мар вераны луоз кырӟанъёс, фильмъёс, передачаос, видеошудонъёс сярысь? Уг вераськы-а отын пӧртмаськон сярысь яке кулэмъёс сярысь, кудъёсыз улӟо но урод духъёслэн кужыменызы мар ке но лэсьтыны быгато? Тунсыкоен уг возьмато-а отын пелляськон кылъёсты, тунаськонэз но карганэз?» Котькуд шутэтскон амал, кудаз малпаса верам учыръёс яке выжыкылъёс пыро, одно ик тунаськон-пелляськонэн герӟаськемын ӧвӧл. Куке тӥ шутэтскон амалъёстэс эскериськоды, сыӵе ужпум кутэ, кудӥз юрттоз тӥледлы палэнскыны солэсь, мае адӟемпотостэм каре Иегова. Милемлы тыршоно Инмар азьын «чылкыт сюлмын» улыны (Ап. уж. 24:16) c.

13. Мар сярысь милям вераськеммы уг поты?

 ¹³ Периос сярысь учыръёсты эн вераллялэ. Ми Иисус Христослэсь адӟем карыны быгатӥськомы (1 Пётр 2:21). Музъем вылэ лыктытозяз, со инмын улӥз, соин ик Шайтан сярысь троссэ тодӥз. Но Иисус ӧз вералля урод духъёслэн ужъёссы сярысь. Солэн Иегова сярысь тодытэмез потэ вал, нош Шайтанлы трос саклык висъямез ӧз поты. Ми Иисуслэсь адӟем кариськомы ке, мукетъёслы периос сярысь учыръёсты ум вераллялэ. Со интые, ми «визьмо кылъёс», яке зэмлыкез, вераломы (Пс. 48:4).

14, 15. а) Малы милемлы лек духъёслэсь кышкано ӧвӧл? б) Кытысь адӟиське, Иегова ас калыксэ уте шуыса?

¹⁴ Урод духъёслэсь эн кышкалэ. Котькин пумиськыны быгатэ шуг-секытъёсын: шӧдтэк шорысь луэм учырен, висёнэн яке кулонэн но. Нош малпано ӧвӧл, ваньмыз понна адскисьтэм урод духъёс янгыш луо шуыса. Библия верамъя, «котьмарлэн аслаз дырыз-вакытэз», соин ик котькудӥз умойтэм учыре шедьыны быгатэ (Екк. 9:11). Кызьы гинэ медам луы, Иегова периослэсь трослы кужмогес. Кылсярысь, со ӧз лэзьы Шайтанлы Иовез виыны (Иов 2:6). Моисей улон нуналъёсы Иегова возьматӥз, Египетысь туноослэсь со кужмогес луэ шуыса (Пот. 8:18; 9:11). Со сяна, Иегова Иисуслы право сётӥз Шатанэн но периосын кивалтыны, но Иисус соосты инмысь музъем вылэ куштӥз. Нош ӝоген Иисус Шайтанэз но периосты пыдэстэм дуннее сэрпалтоз, кытын соос нокинлы но изъян вайыны уз быгатэ ини (Усьт. 12:9; 20:2, 3).

¹⁵ Трос учыръёс возьмато, Иегова ас калыксэ асьме нуналъёсы уте шуыса. Малпаське: ми быдэс дунне вылын тодытӥськомы но адямиосты зэмлыклы дышетӥськомы (Матф. 28:19, 20). Озьы ми Шайтанлэсь лек ужъёссэ шараяськомы. Зэм но, Шайтан ужмес дугдытысал, но со сое лэсьтыны уг быгаты. Соин ик милемлы лек духъёслэсь кышкано ӧвӧл. Ми тодӥськомы, Иеговалэн «синъёсыз быдэс дуннеез адӟо Солы сюлмынызы оскиськымонэсь луисьёсты ӟечкын возён понна» (2 Пар. 16:9). Ми Иеговалы оскымон кылиськомы ке, периос  милемлы тупатыны луонтэм изъян вайыны уз быгатэ.

16, 17. Вералэ учырез, кудӥз возьматэ, кызьы урод духъёслы кышкатэк пумит сылыны луэ.

¹⁶ Урод духъёслы пумит сылон понна, кышкасьтэм сям кулэ, тужгес но соку, куке тодмоосмы но ӵыжы-выжыосмы милемыз кужмысь мар ке но карыны косо. Но Иегова бакель каре соосты, кинъёс уг кышкало. Тани мар луиз Гана шаерысь Эрика нимо сузэрен. Куке солы 21 арес вал, со Библиез дышетыны кутскиз. Туно-пеллёлэн нылыз луыса, солы тунаськонэн герӟаськем сям-йылолэ пыриськоно вал, кудӥз дыръя курбонлы ваем сӥлез сиё, кулэмъёс уродзэ медаз лэсьтэ шуыса. Эрика отчы пыриськыны пумит луиз, но солэн ӵыжы-выжыосыз малпазы, озьы со кулэмъёсты сантэмаз шуыса. Соос кышказы, кулэмъёс соос вылэ пӧртэм висёнъёс лэзёзы шуыса.

¹⁷ Ӵыжы-выжыосыз сое кужмысь косыны тыршизы со сям-йылолэ пыриськыны, но со соослэн зӥбемзылы ӧз сётскы, соин ик солы дорысьтыз кошконо луиз. Нош со ураме улыны ӧз кыльы — сое Адӟись-Ивортӥсьёс ас доразы пыртӥзы. Озьы Иегова солы выль семья кузьмаз — вын-агайёсты но сузэр-апайёсты, кудъёсыз солы ӵыжы-выжыос кадь луизы (Марк 10:29, 30). Эрикалэн ӵыжы-выжыосыз солэсь куштӥськизы но солэсь дӥськутсэ сутӥзы ке но, со Иеговалы оскымон кылиз, пылатӥськиз но али пионер луыса ужа-тырше. Эрика периослэсь уг кышка. Ӵыжы-выжыосыз сярысь со вера: «Мон котькуд нунал вӧсяськисько, семьяе Иеговаез мед тодоз но, яратӥсь Атаймылы ужаса-тыршыса, урод духъёслэсь мед мозмытскоз шуыса».

18. Кыӵе бакель каронъёс ми басьтомы, Иегова вылэ оскиськимы ке?

¹⁸ Ми пӧлысь котькудмылы со выллем шуг-секытъёс пыр потоно уз луы. Но котькудмылы урод духъёслы пумит сылоно но Иегова вылэ оскиськоно. Озьы ми трос бакель каронъёс басьтомы но Шайтанлы милемыз пӧяны ум лэзе. Со сяна, периослэсь кышкаменымы, ми Иеговалэсь ум палэнске. Но солэсь но кулэезгес, Иеговаен кусыпъёсмы юнмалозы. Иаковлэн 4:7, 8 гожтэмын: «Инмарлы тэрытске, нош диаволлы пумит султэ — соку со тӥ дорысь бызьыса кошкоз. Инмарлы матэ кариське, Со но тӥляд матады лыктоз».