1, 2. а) Кызьы Шайтан адямиосты пӧя? б) Мае ми эскеромы та статьяын?

 ШАЙТАН — «ӧрекчаськонлэн атаез», со адямиосты пӧя Адам но Ева улон дырысен (Иоанн 8:44). Солэн пӧяськонъёсыз пӧлы пыро кулон но сопал дунне сярысь зэмос луисьтэм дышетонъёс. Та дышетонъёс вылэ пыкиськыса, трос сям-йылолъёс но тодметъёсты чакланъёс кылдэмын. Соин сэрен трос вын-агайёсмылы но сузэр-апайёсмылы осконзэс утьыны тыршыса улоно луэ, куке кин ке но ӵыжы-выжыоссы яке бускельёссы пӧлысь кулэ (Иуда 3).

² Тӥ сыӵе шуг-секытэн пумиськиды ке, мар юрттоз тӥледлы, Библиысь кулэмъёс сярысь дышетонэз лыдэ басьтыса, улыны? (Еф. 6:11). Кызьы буйгатоно но юнматоно вын-агаез яке сузэр-апаез, кудзэ Инмарлы ярасьтэм сям-йылолэз быдэстыны косо? Та статьяын ми эскеромы Библиысь куд-ог визь-кенешъёсты. Но нырысь тодомы, мар Библиын вераське кулон сярысь.

3. Кытчы вуттӥз нырысетӥ пӧяськон?

³ Инмар адямиосты пырак улон понна кылдытӥз. Солэн малпамезъя, адямиослы кулоно ӧй вал. Но пырак улон понна, Адамлы но Евалы быдэсъяно вал Иеговалэсь огшоры курон-косонзэ: «Ӟечез но уродэз тодон писпулэсь емышсэ эн сиы, уго со писпулэсь емышсэ сиён нуналад кулонэн кулод» (Ул.-выл. 2:16, 17). Нош Шайтан кый пыр Евалы шуиз: «Уд, уд кулэ». Жаляса верано луэ, Ева та пӧяськонлы оскиз но емышез сииз. Берлогес Адам но со емышез сииз (Ул.-выл. 3:4, 6). Озьы сьӧлык но кулон улонамы пыризы (Рим. 5:12).

4, 5. Кытысь адӟиське, Шайтан адямиосты пӧямысь ӧз дугды шуыса?

 ⁴ Кызьы Инмар вераз вал, Адам но Ева кулӥзы. Нош Шайтан адямиосты пӧямысь ӧз дугды. Дыр ортчыса, кылдӥз пӧяськон: кулэм бераз адямилэн лулыз уг кулы, нош сопал дуннеын улэ, вылды. Та пӧяськонэн герӟаськем пӧртэм дышетонъёслы туж трос адямиос оско (1 Тим. 4:1).

⁵ Малы сокем трос адямиос та пӧяськонлы оско? Шайтан тодэ, мае шӧдо адямиос, кин ке кулыку, но со сое уже кутэ, адямиосты пӧян понна. Ми пырак улыны кылдытэмын вал, но милям кулэммы уг поты (Екк. 3:11, ВД). Кулон — милям тушмонмы (1 Кор. 15:26).

6, 7. а) Быгатӥз-а Шайтан ватыны зэмлыкез со сярысь, мар луэ кулэм адямиосын? Валэктэ. б) Кызьы Библиысь зэмлык юрттэ милемлы кулэмъёслэсь кышкатэк улыны?

⁶ Шайтан кулон сярысь зэмлыкез ватыны ӧз быгаты. Нош туннэ, азьло дыръёсын ӵошатыса, туж трос адямиос тодо но мукетъёсызлы верало Библиысь зэмлыкез со сярысь, мар луэ кулэм адямиосын, но со сярысь, кыӵе соослэн осконзы вань (Екк. 9:5, 10; Ап. уж. 24:15). Та зэмлык буйгатэ милемыз, озьы ик юрттэ милемлы кышкатэк улыны но валаны, мар луэ адямиен кулэм бераз. Ми кулэмъёслэсь ум кышкаське но ум сюлмаськиське, соосын мар ке но уродэз луоз шуыса. Ми тодӥськомы, кулэм бераз адями сопал дуннеын уг улы но нокинлы уродзэ лэсьтыны уг быгаты шуыса. Сое изись муртэн ӵошатыны луэ (Иоанн 11:11—14). Озьы ик ми тодӥськомы, кулэмъёс понна дыр дугдэ шуыса. Соин ик, куке улӟытон кутскоз, соослы, кинъёс кемалась кулэмын вал ини, вань со аръёс туж ӝог ортчизы кадь потоз.

⁷ Тӥ соглаш луоды, дыр, зэмлык со сярысь, мар луэ кулэм адямиен, огшоры, валамон но визьмо луэ шуыса. Макем со пӧртэм луэ Шайтанлэн адямиосты сурась пӧяськонэзлэсь! Шайтан пӧяськонэныз адямиослэсь визьзэс тугам сяна, Кылдытӥсьмес сантэма на. Быдэсак валан понна, кыӵе изъян вайиз Шайтан, ойдолэ эскеромы та юанъёсты: кызьы Шайтан пӧяськонэныз Иеговаез сантэма? Кызьы солэн пӧяськонэз Христослэн мозмытӥсь курбонэзлы осконэз лябӟытэ? Кызьы соин сэрен адямиос эшшо но золгес кайгырыса но курадӟыса уло?

8. Малы Шайтанлэн кулэмъёс сярысь пӧяськонэз Иеговаез сантэма, кызьы со адӟиське Иеремиялэн 19:5?

⁸ Шайтанлэн пӧяськонэз со сярысь, мар луэ кулэм адямиосын, Иеговаез сантэма.  Кылсярысь, вань таӵе зэмос луисьтэм дышетон: кулэмъёс ӝуась тыл пушкын курадӟо. Та дышетон Инмарез сантэма. Малы? Со адямиосты оскытэ, яратӥсь Инмар Шайтан кадь ик лек шуыса (1 Иоанн 4:8). Кыӵе шӧдонъёсты луо тӥляд, тае кылыса? Нош тужгес но, кыӵе шӧдонъёсыз луо Иеговалэн? Зэмзэ вераса, со вань лек ужъёсты адӟемпотостэм каре. (Лыдӟе Иеремиялэсь 19:5.)

9. Малы Шайтанлэн пӧяськонэз осконэз лябӟытэ Христослэн мозмытӥсь курбонэзлы, кудӥз сярысь вераське Иоаннлэн 3:16 но 15:13?

⁹ Шайтанлэн пӧяськонэз Христослэн мозмытӥсь курбонэзлы осконэз лябӟытэ (Матф. 20:28). Шайтанлэн эшшо одӥг пӧяськонэз вань: адямилэн лулыз ноку но уг кулы. Со озьы луысал ке, адямиос пырак улысалзы. Христослы но ми понна кулоно ӧй луысал, ми пырак улон басьтыны мед быгатомы шуыса. Эн вунэтэ: Христослэн курбонэз — адямиослы яратонэз тужгес но зол возьматон. (Лыдӟе Иоаннлэсь 3:16; 15:13.) Малпалэ гинэ, мае шӧдо Иегова но Иисус, куке та дышетонъёс дуно кузьымез кулэтэм каро.

10. Кызьы Шайтанлэн пӧяськонэз сэрен адямиос эшшо но золгес кайгырыса но курадӟыса уло?

¹⁰ Шайтанлэн пӧяськонэз сэрен адямиос эшшо но золгес кайгырыса но курадӟыса уло. Куддыръя, анай-атайёслы, кудъёсызлэн нылпизы кулӥз, верало: сое Инмар ас дораз басьтӥз, инмын эшшо одӥг кылчин мед луоз шуыса. Та пӧяськон адямиосты буйгатэ-а яке эшшо но соослы вӧсьгес каре-а? Ӝуась тыл сярысь пӧяськонлы луыса, курадӟытонъёсты шонере поттыны тыршо вал, озьы ик черклэн дышетонъёсызлы пумит мынӥсьёсты тылын сутонэз но. Кызьы гожтэмын «Испанская инквизиция» книгаын, соос, кинъёс та лек ужъёсты лэсьто вал, оскизы, дыр, «черклэн дышетонъёсызлы пумит мынӥсьёс, кудъёсыз ӧз ӧпкеле, музъем вылын улонзылэн берпум дыраз, тыл пыр потыса, асьсэлэсь лулзэс Инмар азьын утьыны быгато вал шуыса». Куд-ог шаеръёсын адямиос кулэм ӵыжы-выжыоссылы йыбыртъяло, соосты сӥлы каро но соослэсь юрттэт басьтыны тыршо. Мукет шаеръёсын кулэмъёслы сиён дасяло яке кыӵе ке курбон ваё, соослэн вожзы медаз поты шуыса. Дышетонъёс, кудъёсыз Шайтанлэн пӧяськонэз вылэ пыкиськемын, зэмос буйгатон уг ваё. Соосын сэрен кышканъёс гинэ кылдо.

11. Кызьы ӵыжы-выжыосмы яке тодмоосмы, милемлы умой карыны малпаса, кужмысь косыны быгато Инмарлэн Кылызлы пумит лэсьтыны?

¹¹ Инмарез но солэсь Кылзэ яратон милемлы кужым сётэ Иеговалэсь кылзӥськыны, куке ӵыжы-выжыосмы яке тодмоосмы милемыз кужмысь косо Библилы пумит луись сям-йылолъёсты быдэсъяны. Соос милемыз возьытэ уськытыны быгато. Кылсярысь, соос янгыше уськыто, ми кулэм адямиез ум яратӥське но ум гажаське шуыса яке милемын сэрен со улэпъёслы изъян ваёз шуыса. Кызьы ми Библиысь зэмлыкез утьыны быгатомы? Ойдолэ эскеромы Инмарлэн Кылысьтыз куд-ог возетъёсты.

12. Кыӵе осконъёс но сям-йылолъёс Библилы пумит луо?

¹² Библилы пумит луись сям-йылолъёслэсь но осконъёслэсь палэнске (2 Кор. 6:17). Куд-огъёсыз оско: кулэм бераз адямилэн лулыз кытын ке матын улэ, но со уродзэ лэсьтыны быгатэ соослы, кинъёс улэп дыръяз соин асьсэды умойтэм возизы. Кызьы гожтэмын одӥг книгаын, соослэн малпамзыя, кулэм адямилэн лулыз «быдэс калыкез карганы» но быгатэ шуыса. Африкаысь куд-ог шаеръёсын адямиос кулэм муртлэн коркаысьтыз синучконъёсты маин ке но ворсало но туспуктэмъёсты ымнырынызы борддор пала берыкто. Соос оско, кулэм мурт ассэ адӟыны  кулэ ӧвӧл шуыса. Иеговалэн Адӟись-Ивортӥсьёсыз луыса, ми солы ум оскиське но ум пыриськиське сям-йылолъёсы, кудъёсыз Шайтанлэн пӧяськонэз вылэ пыкиськемын (1 Кор. 10:21, 22).

13. Иаковлэсь 1:5 лыдэ басьтыса, мар кароно, куке тӥ уд валаське, кыӵе ке сям-йылол Библилы пумит луэ-а, уг-а шуыса?

¹³ Куке тӥ уд валаське, кыӵе ке сям-йылол Библилы пумит луэ-а, уг-а шуыса, соку Иеговалы вӧсяське но солэсь визьлык куре. (Лыдӟе Иаковлэсь 1:5.) Собере учке, мар со сярысь публикациосамы вераське. Кулэ луиз ке, эскере та юанэз кенешысьтыды тӧроосын. Соос уз вералэ тӥледлы, мар кароно, но юрттозы тӥледлы та юанъя Библиысь возетъёс шедьтыны, кылсярысь, та статьяын эскериськись возетъёсты. Озьы тӥ визьдэс-шӧдондэс «ӟечез но, уродэз но висъяны» дышетоды (Евр. 5:14).

14. Кызьы ми быгатомы мукетъёсты сьӧлыке пыртытэк улыны?

¹⁴ «Ваньзэ Инмарез вылӥ-дано карон понна лэсьтэ» но мукетъёсты «визь сынаськонэ пыртыса эн улэ» (1 Кор. 10:31, 32). Куке ми ужпум кутӥськомы, кыӵе ке сям-йылолэ пыриськоно-а, ӧвӧл-а шуыса, малпаськоно со сярысь, кызьы кутэм ужпуммы мукет адямиослэн возьытлыксы вылын шӧдӥськоз, тужгес но вын-агайёсмылэн но сузэр-апайёсмылэн возьытлыксы вылын. Милям соосты сьӧлыке пыртэммы уг поты (Марк 9:42). Со сяна, милям уг поты валатэк вӧсь кареммы соосты, кинъёс Адӟись-Ивортӥсьёс уг луо. Кулэ ӧвӧл соосын споръяськыны но соослэсь сям-йылолъёссэс серем карыны. Тодады возе: яратонлэн туж бадӟым кужымез вань. Со мылкыдмес ӝутоз адямиосын гажаса вераськыны но озьы Иеговаез данъяны. Милемлы пумит мынӥсьёслы яратонмес возьматыса, ми соослэсь сюлэмзэс но небӟытыны быгатӥськомы.

15, 16. а) Малы умой луысал мукетъёсызлы осконмы сярысь валэктыны? Вералэ пример. б) Кызьы ми Павеллэсь кылъёссэ улонамы пыртыны быгатӥськомы, кудъёсыз гожтэмын Римъёслы 1:16?

¹⁵ Мукетъёсызлы валэктэ, тӥ Иеговалэн Адӟись-Ивортӥсез луиськоды шуыса (Ис. 43:10). Тӥледлы секыт учырысь потыны капчигес луоз, дыр, тӥ ӵыжы-выжыостылы но бускельёстылы осконды сярысь азьло ик верады ке. Тани мар гожтӥз Франсишку нимо агай, кудӥз Мозамбик шаерын улэ: «Зэмлыкез тодыса, ми Каролина кышноеным  ӵыжы-выжыосмылы верамы, кулэмъёсты сӥлы ум каре ини шуыса. Куке Каролиналэн апаез кулӥз, ми шуг-секытъёсын пумиськимы. Милям улосамы религиен герӟаськем одӥг сям-йылол вань: кулэм муртлэсь мугорзэ мисько, нош вузэ кисьто, собере кулэм муртлэн тужгес матысь ӵыжы-выжыезлы куинь уй ӵоже изёно со интыын, кытчы со вуэз кисьтӥзы. Соос малпало, солы луыса кулэм адямилэн лулыз уродзэ уз лэсьты шуыса. Ӵыжы-выжыосмылэн потэ вал, сое Каролина мед лэсьтоз шуыса».

¹⁶ Мар каризы та кузпалъёс? Франсишку валэктэ: «Ми Иеговаез яратӥськомы, но милям сое шумпоттэммы потэ, соин ик ми со сям-йылолэ пыриськыны пумит луимы. Каролиналэн ӵыжы-выжыосыз йырзы курен лекомизы. Соос милемыз янгыше уськытӥзы, ми кулэм муртэ ум гажаське шуыса, но веразы, соос ми доры ноку но уз ветлэ но милемлы уз юрттӥське шуыса. Ми соослы верамы вал ини осконмы сярысь, соин ик ми соосын та сярысь лекъяськыкузы ӧм вераське. Семьяысьтымы куд-огъёсыз ми пала дур басьтӥзы но веразы, ми осконмы сярысь верамы вал ини шуыса. Дыр ортчыса, ӵыжы-выжыосмы буйгатскизы, но милям кусыпъёсмы тупазы. Куд-огъёсыз ми доры куное лыктӥзы но милесьтым Библия вылэ пыкиськыса гожтэм публикациосмес куризы». Ойдолэ ноку ум возьдаське кулэмъёс сярысь зэмлыкез утьыны! (Лыдӟе Римъёслы 1:16.)

17. Мар милемлы кароно, куке кенешысь вын-агайлэн яке сузэр-апайлэн матысь адямиез кулӥз?

¹⁷ Вын-агайёсмы яке сузэр-апайёсмы пӧлысь кинлэн ке но матысь адямиез кулэ ке, милемлы тыршоно соос понна зэмос эш луыны, дась луыны «шуге-леке сюрыку, агай-вын кадь... юрттыны» (Мад. 17:17). Кызьы вын-агайлы яке сузэр-апайлы юрттыны луэ, тужгес но соку, куке соосты кужмысь косо Инмарлы ярасьтэм сям-йылолэ пыриськыны? Эскеромы Библиысь кык возетъёсты, кудъёсыз юрттозы милемлы соосты буйгатыны.

18. Малы Иисуслэн синкылиосыз потӥзы но малы дышетэ милемыз солэн примерез?

¹⁸ «Бӧрдӥсьёсын ӵош бӧрдэ» (Рим. 12:15). Куддыръя секыт луэ кылъёс бырйыны, куректӥсь  адямиез буйгатон понна. Нош синкылиосмы, кылъёс сярысь, тросгес вераны быгато. Куке Лазарь, Иисуслэн эшез, кулӥз, Мария, Марфа но солэн эшъёсыз туж зол кайгыризы. Ньыль нунал ортчыса, Иисус лыктӥз, но куке со бӧрдӥсь адямиосты адӟиз, солэн но «синкылиосыз потӥзы», Лазарез улӟытоз шуыса тодӥз ке но (Иоанн 11:17, 33—35). Иисуслэн синкылиосыз возьматӥзы, мае шӧдӥз солэн Атаез. Со сяна, солэн синкылиосыз возьматӥзы, макем зол со та семьяез яратӥз, но та туж буйгатӥз, дыр, Марияез но Марфаез. Озьы ик, куке вын-агайёсмы но сузэр-апайёсмы яратэммес но сюлмаськеммес шӧдо, соос валало, огназы ӧвӧл, нош соослэн яратӥсь эшъёссы вань шуыса.

19. Кызьы ми куректӥсь адямиез буйгатыны быгатӥськомы, Екклесиастысь 3:7 кылъёсты лыдэ басьтыса?

¹⁹ «Шып улонлэн аслаз дырыз, вераськонлэн аслаз дырыз» (Екк. 3:7). Кызьы эшшо буйгатыны луэ на сое, кин матысь адямизэ ыштӥз? Сое сак кылзыны луоз. Сюлэмзэ усьтыны солы дыр сётэ но йырдэс кур эн каре, сюлэмез вӧсь карись кылъёсты со вера ке (Иов 6:2, 3). Солы эшшо но секытгес луэ, дыр, малы ке шуоно со вылэ Адӟись-Ивортӥсь луисьтэм ӵыжы-выжыосыз зӥбо. Куректӥсь адямиен ӵош вӧсяське. Куре Инмарлэсь, кудӥз вӧсяськонъёсты кылзэ, солы кужым но валан сётыны (Пс. 64:3). Луэ ке, соин ӵош лыдӟе Библиез яке публикациосысьтымы тупась статьяез, кылсярысь, агайлэн яке сузэрлэн улонэз сярысь, кудӥз солэсь мылкыдзэ ӝутоз.

20. Мар сярысь ми вераськомы вуонояз статьяын?

²⁰ Макем ми тау кариськомы, тодӥськомы шуыса зэмлыкез кулэмъёс сярысь но вуоно паймымон улон сярысь, кудзэ адӟозы «шайгуосын кыллисьёс»! (Иоанн 5:28, 29). Ойдолэ кылъёсын но ужъёсын Библиысь зэмлыкез утёмы но котькуд тупась учыре мукетъёсызлы со сярысь вераломы. Вуонояз статьяын ми вераськомы Шайтанлэн эшшо одӥг сьӧлтэтэз сярысь, кудзэ со уже кутэ, адямиослэсь зэмлыкез ватон понна. Со тунаськон-пелляськон. Ми тодомы, малы туж кулэ палэнтӥськыны соин герӟаськем ужъёслэсь но шутэтскон амалъёслэсь.