1, 2. Малы Иисуслэн музъем вылын улонэзлэн берпуметӥ нуналаз трос сюлмаськонъёсыз вал?

 ИИСУСЛЭН музъем вылын улонэзлэн берпуметӥ нуналыз трос сюлмаськонъёсын тырмемын вал. Ӝоген шонерлыктэм адямиос сое курадӟытыса виыны кулэ вал. Но Иисусэз мукетыз золгес сюлмаськытӥз. Со Атайзэ туж яратӥз но сое шумпоттэмез потӥз. Иисус тодӥз, та визь сынаськонын Инмарлы оскымон кыльыса, со Инмарлэсь нимзэ шонере поттыны юрттоз шуыса. Озьы ик Иисус адямиосты яратӥз но тодӥз, со Инмарлы оскымон кылиз ке, милям пырак улонлы осконмы луоз шуыса.

² Иисус туж сюлмаськиз ке но, со сюлмаз каньыллыксэ утьыны быгатӥз. «Тӥледлы каньыллык кельтӥсько»,— шуиз со апостолъёсызлы (Иоанн 14:27). Иисуслэн вал «Инмарлэн каньыллыкез» — сюлмаськытэк улон, буйгатскон, кудъёссэ адями Инмарен дуно кусыпъёсызлы луыса шӧдыны быгатэ. Та каньыллык юрттӥз солы сюлмаськытӥсь малпанъёсты палэнтыны (Флп. 4:6, 7).

3. Мае ми эскеромы та статьяын?

³ Нокин но ми пӧлысь уз пумиськы, дыр, сыӵе шуг-секытъёсын, кудъёсыныз пумиськиз Иисус, нош визь сынаськонъёс пыр потоно луоз Иисуслэн вань дышетскисьёсызлы (Иоанн 15:20; 2 Тим. 3:12). Куддыръя милемлы, Иисуслы сямен ик, сюлмаськытӥсь малпанъёс лыктыны быгатозы. Мар юрттоз милемлы соосты вормыны но каньыл сюлмын улыны? Ойдолэ эскеромы, мар юрттэ вал Иисуслы, музъем вылын ужакуз-тыршыкуз, но малпаськомы, кызьы ми солэсь  адӟем карыны быгатӥськомы, визь сынаськонъёсын пумиськыкумы.

4. Кытысь адӟиське, улонэзлэн берпуметӥ нуналаз Иисус трос вӧсяськиз шуыса? Кыӵе визь-кенеш сётӥське христианъёслы, кудӥз гожтэмын 1 Фессалоникаослы 5:17?

⁴ Лыдӟе 1 Фессалоникаослы 5:17. Музъем вылын улонэзлэсь быдэс берпум нуналзэ Иисус трос вӧсяськыса ортчытӥз. Куке со возьматӥз, кызьы Ӝытанэз пусъёно, апостолъёсызлы нянь, нош собере винаез сётон азяз со вӧсяськиз (1 Кор. 11:23—25). Озьы ик Иисус дышетскисьёсыныз вӧсяськиз Пасхаез пусъён интыысь кошкемзылэсь азьло (Иоанн 17:1—26). Куке соос Елеон гурезе вуизы, со нош ик кӧня ке пол вӧсяськиз (Матф. 26:36—39, 42, 44). Самой кулон азяз Иисус нош ик Атаезлы вазиськиз (Лука 23:46). Вӧсяськыкуз Иисус вералляз Иеговалы ваньзэ, мар соин луиз улонэзлэн берпуметӥ нуналаз.

5. Малы апостолъёс кышканлы сётскизы?

⁵ Иисус ӵем вӧсяськылӥз но Атаезлэсь юрттэт курылӥз — со одӥгез муг, малы со визь сынаськонъёсты чидаз. Нош апостолъёс сак улыны но уйбыт вӧсяськыны ӧз быгатэ. Соин ик визь сынаськон дыръя соос кышканлы сётскизы (Матф. 26:40, 41, 43, 45, 56). Улонмылэн секыт дыръёсаз Инмарлы оскымон кыльыны ми быгатомы соку гинэ, куке Иисуслэсь адӟем кариськомы но ялан вӧсяськиськомы. Нош мар сярысь ми вӧсяськыны быгатӥськомы?

6. Кызьы оскон юрттэ каньыл сюлмын улыны?

⁶ Вӧсяськыкумы ми Иеговалэсь курыны быгатӥськомы: «Милесьтым осконмес будэты» (Лука 17:5; Иоанн 14:1). Милемлы оскон  кулэ, малы ке шуоно Шайтан Иисуслэсь вань дышетскисьёссэ визь сынаськонъёсын эскере (Лука 22:31). Кызьы оскон юрттоз милемлы каньыл сюлмын улыны, шуг-секытъёслэн йылзы-пумзы уг адӟиськы ке но? Ми лэсьтӥмы ке ваньзэ, мае быгатӥськомы, оскон юрттоз милемлы Иеговалы оскиськыны. Ми оскиськомы: Инмар умойгес тодэ, мар кароно, но тае тодон юрттэ милемлы каньыл сюлмын улыны (1 Пётр 5:6, 7).

7. Малы милемыз дышетыны быгатэ Робертлэн примерез?

⁷ Вӧсяськонлы луыса ми каньыл сюлмын улыны быгатӥськомы, кыӵе гинэ визь сынаськонъёсын ми медам пумиське. Тани 80 аресъем Роберт нимо тӧролэн примерез, кудӥз Инмарлы оскымон луэ. Со вера: «Филиппыослы 4:6, 7 кылъёс юрттӥзы мыным улонысьтым трос шуг-секытъёсты чиданы. Мынам коньдонэн герӟаськем шуг-секытъёсы вал. Огдырлы мон тӧро луыса ужамысь-тыршемысь дугдӥ». Кызьы Роберт каньыл сюлмын улыны быгатэ? Со вера: «Сюлмаськыны кутскыкум, мон соку ик вӧсяськисько. Мон оскисько: ӵемгес но сюлмысь вӧсяськиськод ке, сюлэм каньыллыкен тырме».

8. Кызьы Иисус каньыл сюлмын улыны быгатӥз, кызьы адӟиське Иоаннлэн 8:29?

⁸ Лыдӟе Иоаннлэсь 8:29. Мар юрттӥз Иисуслы каньыл сюлмын улыны соку но, куке сое уйылӥзы-уллязы? Со тодӥз: Атаезлы оскымон кыльыса, со сое шумпоттэ. Иисус котьку но Инмарлэсь кылзӥськыса улӥз, со капчи ӧй вал ке но. Со сяна, со Иеговаез яратӥз но солы ужан-тыршонэз улоназ  ваньмызлэсь кулэен лыдъяз. Музъем вылэ лыктытозяз, Иисус «Со бордын... кибашлы пуктӥськись-лэсьтӥськись вал» (Мад. 8:30). Нош музъем вылын Иисус адямиосты инмысь Атаез сярысь зэмлыклы тыршыса дышетӥз (Матф. 6:9; Иоанн 5:17). Со Иисуслы бадӟым шумпотон вайылӥз (Иоанн 4:34—36).

9. Кызьы ӟырдыт мылкыдын тодытон милемлы каньыл сюлмын улыны юрттэ?

⁹ Кызьы ми Иисуслэсь адӟем карыны быгатӥськомы? Иеговалэсь кылзӥськоно но «Кузё-Инмарлы ужаны» туж тыршоно (1 Кор. 15:58). «Вань лулынымы-сюлмынымы» ужамы-тыршимы ке, ми асьмелэн шуг-секытъёсмылы трос саклык ум висъялэ (Ап. уж. 18:5). Ӵем дыръя адямиос, кудъёсызлы ми тодытӥськомы, милемын ӵошатыса, эшшо но тросгес шуг-секытъёсын пумисько. Нош куке соос Иеговаен тодматско, сое яратыны кутско но Библиын гожтэм визь-кенешъёсъя уло, соослэн улонзы умойгес луэ но соос шудогес луо. Котьку, куке ми тае адӟиськомы, милям осконмы юнма, Иегова ми сярысь сюлмаськоз шуыса. Нош со оскон каньыл сюлмын улыны юрттэ. Тани мар вера одӥг сузэр, кудӥз быдэс улонзэ депрессиен но ассэ номырлы ярасьтэмен шӧдонэн нюръяське: «Куке мон вань сюлмысьтым тодытӥсько, мыным капчигес шумпотыса но каньыл сюлмын улыны. Мон малпасько со озьы луэ, малы ке шуоно тодытыкум мынам Иеговаен кусыпъёсы юнмало».

10. Малы дышетэ тӥледыз Брендалэн учырез?

¹⁰ Нош тани Бренда нимо сузэрлэн примерез. Со но солэн нылыз рассеянной склерозэн висё. Бренда ветлыны уг быгаты, соин ик солы сӧсыръёслы тупатэм креслоен ветлоно луэ, но со троссэ лэсьтыны уг быгаты. Куддыръя со коркась корка ветлыса тодытэ, но ӵем дыръя со гожтэтъёс гожъя. Со вера: «Куке мон валай, та дуннеын мынам тазалыке умойгес уз луы ини шуыса, мон асме ужан-тыршонлы быдэсак сӥзьыны быгатӥ. Тодытыкум мон ас сюлмаськонъёсы сярысь вунэтӥсько но тросгес малпасько со сярысь, кызьы юрттыны адямиослы, кудъёсыз кенешмылы тодытон понна висъям интыын уло. Солы луыса мон ялан малпаськисько азьпал улонлы осконэ сярысь».

11—13. а) Кызьы апостолъёс но мукет адямиос Иисуслы оскымон эшъёс луизы? б) Кыӵе шӧдонъёсыз вал Иисуслэн, соосын эшъяськыса?

¹¹ Вань дыр ӵоже, куке Иисус тодытыса улӥз, апостолъёс солы зэмос эшъёс вал. Озьы соос возьматӥзы Библиысь веранлэсь зэм луэмзэ: «Зэмос эш агай-вынлэсь но матынгес луыны быгатэ» (Мад. 18:25). Иисус сыӵе эшъяськонэз дунъяз. Музъем вылын тодытыкуз, солэн вынъёсыз пӧлысь нокин но солы ӧз оскы (Иоанн 7:3—5). Одӥг пол соос малпазы, со визьзэ ыштэм шуыса (Марк 3:21). Нош оскымон апостолъёсыз сое юнматъязы, соин ик кулон азяз уе со соослы вераз: «Визь сынаськыса улон дыръёсы тӥ Монэн огазьын вал» (Лука 22:28).

¹² Куддыръя апостолъёс Иисуслэсь сюлэмзэ вӧсь карылӥзы, нош со янгышъёссы но тырмымтэоссы вылэ саклыксэ ӧз висъя но тодаз возиз, соос солы оскизы шуыса (Матф. 26:40; Марк 10:13, 14; Иоанн 6:66—69). Кулон азяз уе оскымон апостолъёсызлы со вераз: «Мон тӥледыз эшъёс шуыса нимай, малы ке шуоно тӥледлы ваньзэ верай, мае Аслам Атаелэсь кылӥ-тодӥ» (Иоанн 15:15). Оскыны луэ, Иисуслэн эшъёсыз солэсь мылкыдзэ туж ӝуто вал шуыса. Ужан-тыршонын апостолъёслэн юрттэмзы Иисуслэсь сюлэмзэ шумпотонэн тырмытэ вал (Лука 10:17, 21).

¹³ Апостолъёс сяна, Иисуслэн мукет но эшъёсыз вал — пиосмуртъёс но кышномуртъёс,  кудъёсыз солы ужан-тыршонын юрттылӥзы. Куд-огъёсыз сое ас доразы ӧтьылӥзы, со сиськыны мед быгатоз шуыса (Лука 10:38—42; Иоанн 12:1, 2). Мукетъёсыз соин ӵош ветлӥзы но сётъязы сое, марзы соослэн вал (Лука 8:3). Иисуслэн умой эшъёсыз вал, малы ке шуоно со ачиз но умой эш вал. Со соослы трос ӟеч ужъёс лэсьтылӥз но соослэсь троссэ ӧз возьма. Иисус тырбыдэс адями вал, нош эшъёсызлэсь юрттэмзэс дунъяз, соос огшорыесь но тырбыдэстэмесь вал ке но. Но ми оскыны быгатӥськомы, соос Иисуслы каньыл сюлмын улыны юрттӥзы шуыса.

14, 15. Кызьы умой эшъёс шедьтоно но кызьы соос милемлы юрттыны быгато?

¹⁴ Зэмос эшъёс милемлы юртто Иеговалы оскымон кыльыны. Сыӵе эшъёс шедьтон понна тужгес но умой амал — аслыд но умой эш луыны (Матф. 7:12). Библия мылкыдмес ӝутэ дырмес висъяны но кужыммес сётыны тужгес но соослы, кинъёслы со туж кулэ (Еф. 4:28). Малпаське: кенешын кинлы тӥ юрттыны быгатысалды. Кылсярысь, адями дорысьтыз уг пота ке, луоз магазинэ ветлыны но басьтыны сое, мар солы кулэ. Нош кинлы ке но коньдонзэ тырмытыны секыт ке, сое куное ӧтьыны но соин ӵош сиськыны луоз. Ивортӥсь jw.org^® сайтэз но JW Library^® приложениез уже кутыны уг быгаты ке, солы юрттыны луоз та тӥрлыкъёсты уже кутыны, со ачиз духовной марӟанъёсты утчаны мед быгатоз шуыса. Куке ми мукетъёслы юрттӥськомы, со милемлы шумпотон вае (Ап. уж. 20:35).

¹⁵ Эшъёсмы милемыз шуг-секытъёс дыръя юнмато но каньыл сюлмын улыны юртто. Кызьы Елиуй Иовлэсь шуг-адӟонъёсыз  сярысь верамзэ кылзӥз, озьы ик эшъёсмы но милемыз чидаса кылзо, куке ми соослы сюлмаськонъёсмы сярысь вераськомы (Иов 32:4). Малпано ӧвӧл, эшъёсмы вералозы шуыса, кыӵе ужпум милемлы кутоно. Но умой луысал соослэсь Библия вылэ пыкиськыса сётэм визь-кенешсэс кылзыны (Мад. 15:22). Тодады возе: Давид эксэй эшъёсызлэсь юрттэтсэс зӥбыт-востэмен басьтӥз (2 Экс. 17:27—29). Вылтӥяськон сям милемлы но медаз люкеты эшъёсмылэсь юрттэтсэс басьтыны, куке со милемлы кулэ луэ. Эшъёс — Иеговалэсь зэмос кузьым (Иак. 1:17).

16. Кызьы ми каньыл сюлмын улыны быгатӥськомы, кызьы адӟиське Филиппыослы 4:6, 7?

¹⁶ Лыдӟе Филиппыослы 4:6, 7. Малы Иегова вера, солэсь каньыллыксэ ми Христослы луыса басьтыны быгатӥськомы шуыса? Малы ке шуоно сюлмамы каньыллык луоз соку гинэ, куке ми валаськомы, кыӵе инты басьтэ Иисус Христос Инмарлэн малпаназ, но куке солы оскиськомы. Кылсярысь, Иисуслэн мозмытӥсь курбонэзлы луыса вань сьӧлыкъёсмы простить каремын луыны быгато (1 Иоанн 2:12). Макем со милемыз буйгатэ! Иисус, Инмар Эксэйлыклэн Эксэез, быдтоз вань уродзэ, кудзэ вае, вылды, Шайтан но солэн ки улаз возиськись дунне (Ис. 65:17; 1 Иоанн 3:8; Усьт. 21:3, 4). Макем паймымон азьпал улон милемыз возьма! Иисус милемлы уж сётӥз ке но, кудзэ быдэстыны туж ик капчи ӧвӧл, со азьло сямен ик милемын но та дуннелэн берпум нуналъёсаз милемлы юрттыны дась (Матф. 28:19, 20). Тае тодон милемлы кышкасьтэм луыны юрттэ. Буйгатон, оскон но кышкасьтэм сям туж юртто милемлы каньыл сюлмын улыны.

17. а) Мар юрттоз милемлы каньыл сюлмын улыны? б) Мар карыны ми быгатомы, кызьы адӟиське Иоаннлэн 16:33?

¹⁷ Озьыен, мар юрттоз тӥледлы каньыл сюлмын улыны секыт визь сынаськонъёс дыръя? Со ик, мар юрттӥз Иисус Христослы. Нырысетӥез, вӧсяськемысь эн дугдылэ. Кыкетӥез, Иеговалэсь кылзӥське но дась луыса тодытэ, со капчи ӧвӧл ке но. Куинетӥез, шуг-секытъёс дыръя эшъёстылэсь юрттэмзэс эн палэнтэ. Соку «Инмарлэн каньыллыкез» тӥлесьтыд визьдэс но сюлэмдэс утёз, но тӥ, Иисус сямен, котькыӵе визь сынаськонысь вормисен потоды. (Лыдӟе Иоаннлэсь 16:33.)