1, 2. Мае возьмато Иисуслэн кылъёсыз, кудъёсыз гожтэмын Иоаннлэсь 4:35, 36?

 ИИСУС мынӥз вож-вож удам бусыос кузя. Отын йыды киземын вал, дыр (Иоанн 4:3—6). Аран вакытозь ог ньыль толэзь кылемын на вал. Соин ик дышетскисьёс туж паймизы, вылды, куке кылӥзы Иисуслэсь кылъёссэ: «Асьтэлэсь синъёстэс ӝутэ но ю бусы шоры учке: кыӵе со тӧдьы луэм, араны вуэм ини». (Лыдӟе Иоаннлэсь 4:35, 36.) Мар сярысь со вераз?

² Аран вакытэн ӵошатыса, Иисус адямиосты люкан сярысь вераз, луоз. Тодамы ваёмы, мар луиз кӧня ке азьвылгес. Ӵем дыръя иудей калык палэнске вал самария калыклэсь, нош Иисус самария кышномуртлы тодытӥз. Со кышномурт солэсь иворзэ кылзӥз. Ӵапак соку, куке Иисус вераз, бусы «тӧдьы луэм, араны вуэм ини» шуыса, Самарияысь куд-ог адямиос со доры дыртыса мынӥзы. Соос та кышномуртлэсь Иисус сярысь кылӥзы но со сярысь тросгес тодэмзы потӥз (Иоанн 4:9, 39—42). Библиез эскерись одӥг тодосчи со учыр сярысь тазьы вера: «Адямиослэн мылкыдзы Иисусэн пумиськыны но сое кылзыны... возьматэ, соос араны вуэм шепъёс кадесь вал шуыса».

3. Тӥ адямиос шоры Иисус кадь учкиды ке, кызьы со ужан-тыршонды вылын шӧдӥськоз?

³ Нош кызьы тӥ учкиськоды адямиос шоры, кудъёсызлы ӟеч иворез вераськоды? Учкиськоды-а тӥ соос шоры араны вуэм шепъёс шоры кадь? Озьы ке, кызьы со ужан-тыршонды вылын шӧдӥськыны кулэ? Нырысетӥез, тӥ эшшо но мылысь-кыдысь тодытоды. Аран вакыт туж вакчи — дырез юнме быдтоно ӧвӧл! Кыкетӥез, аран уже вань сюлмысьтыды пыриськыса, тӥ туж шумпотоды. Библиын гожтэмын, адямиос «аран дыръя  шулдыръясько» шуыса (Ис. 9:3). Но куинетӥез, котькуд адями шоры тӥ учкоды вуоно вын-агай яке сузэр-апай шоры кадь, соин ик тӥ тыршоды котькудӥзлэсь кулэяськонъёссэ лыдэ басьтыны.

4. Малы ми дышетскыны быгатӥськомы апостол Павеллэсь?

⁴ Иисуслэн куд-ог дышетскисьёсыз малпазы, вылды, Самарияысь адямиос солэн дышетскисьёсыз ноку уз луэ шуыса. Нош Иисус озьы ӧз малпа. Самария калык шоры со учкиз вуоно дышетскисьёсыз шоры кадь. Милемлы но адямиос шоры учконо вуоно христианъёс шоры кадь. Та пумысен туж умой адӟем карон возьматӥз милемлы апостол Павел. Малы ми солэсь дышетскыны быгатӥськомы? Та статьяын ми эскеромы, кызьы со: 1) лыдэ басьтӥз сое, малы оско сое кылзӥсьёс, 2) валаны тыршиз, мар соослы тунсыко потэ, но 3) учкиз соос шоры Иисуслэн вуоно дышетскисьёсыз шоры кадь.

5. Малы Павел валаз соосты, кинъёслы сӥнагогаын тодытӥз?

⁵ Павел иудейёслэн сӥнагогаосазы ӵем тодытӥз. Кылсярысь, Фессалоникаысь сӥнагогаын со «куинь суббота ӵоже Священной Гожтэмъёсъя соосын [иудейёсын] вераськиз» (Ап. уж. 17:1, 2). Павел сӥнагогаын вераськыны ӧз кышка, луоз. Со иудей вал (Ап. уж. 26:4, 5). Павел вала вал, кызьы иудейёс малпасько, соин солы секыт ӧй вал соосын огкыл шедьтыны (Флп. 3:4, 5).

6. Афины карын вузкарон интыысь адямиос маин пӧртэм вал соослэсь, кинъёслы Павел сӥнагогаын тодытӥз?

⁶ Куке Павел тушмонъёсыз сэрен Фессалоникаысь, нош собере Верияысь но, бызьыса кошконо луиз, со Афины каре вуиз. Со нош ик вераськыны кутскиз «сӥнагогаын иудейёсын, нош озьы ик Инмарез сӥлы карись мукет калыкъёсын» (Ап. уж. 17:17). Нош куке Павел вузкарон интыосын тодытӥз, сое чылкак мукет адямиос кылзӥзы. Куд-огъёсыз соос пӧлысь философия удысысь тодосчиос вал. Соос понна но мукет калыкысь адямиос понна Павеллэн иворез «выль дышетон» вал. Соос солы веразы: «Уго кыӵе ке но паймоно кадь тынад верам кылъёсыд ми доры вуо» (Ап. уж. 17:18—20).

7. Апостолъёслэсь ужъёссэс 17:22, 23 лыдэ басьтыса, кызьы Павел тодытӥз Афиныын улӥсьёслы?

⁷ Лыдӟе Апостолъёслэсь ужъёссэс 17:22, 23. Сӥнагогаын иудейёсын ӵошатыса, Афиныын мукет калыкысь адямиосын Павел чылкак мукет сямен вераськиз. Со малпаськиз, дыр, малы оско та карын улӥсьёс. Павел котыр учкиз но чаклаз, религиен герӟаськем кыӵе сям-йылолъёсъя соос уло. Собере  со соослэн осконэнызы но Гожтэмъёсысь зэмлыкен мае ке огкадьзэ шедьтыны тыршиз. Тани мар со пумысен вераз Библиез эскерись одӥг тодосчи: «Еврей калыкысь потэм христиан мурт луыса Павел вала вал: трос инмаръёслы йыбыртъясь грекъёс ӧз йыбыртъялэ иудейёслэн но христианъёслэн зэмос Инмарзылы, нош со дыре ик солэн возьматэмез потэ вал: Инмар, кудӥз сярысь со тодытӥз, зэмзэ вераса, Афины карын улӥсьёс понна сокем тодмотэм ӧй вал». Соин ик, соосын вераськон понна, Павел дась вал мукет амал шедьтыны. Афиныын улӥсьёслы со вераз, солэн иворез «тодмотэм Инмар» дорысь потэ шуыса, кудӥзлы соос йыбыртъяло. Мукет калыкысь адямиос Священной Гожтэмен тодмо ӧй вал ке но, Павел ӧз малпа, соос Христослэн дышетскисьёсыз ноку уз луэ шуыса. Соос шоры со учкиз араны вуэм шепъёс шоры кадь. Павел тупатӥз вераськон амалзэ но тыршиз ӟеч иворез вераны соослы валамон кылъёсын.

8. а) Кызьы валано, малы оско тӥ палан улӥсь адямиос? б) Мар вераны луоз, адями вера ке, солэн аслаз осконэз шуыса?

⁸ Павел сямен, чакласькисесь луэ. Валаны тырше, малы оско адямиос, кудъёсыз тодытонлы висъям интыяды уло. Мае тодыны луэ адями сярысь, солэн коркаез шоры учкыса? Мар сярысь верало солэн нимыз, дӥськутэз, вылтусыз яке вераськемез? Луэ-а соя валаны, малы со оске? Оло со пырак вера, кыӵе солэн осконэз. Сыӵе учыръёсы одӥг сузэр, кудӥз нимысьтыз пионер луыса ужа-тырше, вера: «Мон уг косӥськы тӥледыз оскыны солы, малы мон оскисько. Мынам вераськеме гинэ потэ вал со сярысь...»

9. Мар огкадьзэ шедьтыны луэ оскись адямиен?

⁹ Мар сярысь вераськыны луоз оскись адямиен? Тырше огкадьзэ шедьтыны. Оло нош со одӥг гинэ Инмарлы оске; яке малпа, Иисус — адямиосты утись шуыса; яке оске, ӝоген вань урод ужъёс быдтэмын луозы шуыса. Огъя инъет шедьтыса, солы Библиысь ивор вералэ. Соку адямилы тӥледыз кылзыны тунсыкогес потоз, дыр.

10. Мар карыны тыршоно но малы?

¹⁰ Лыдэ басьтэ: оло нош адямиос уг но оско ваньмызлы, малы дышетэ соослэн религизы. Соин ик, тӥ валады ке но, кыӵе осконэз адямилэн, тырше валаны, малы со ачиз оске. «Туннэ тросэз философиез религиен сурало»,— вера Дэвид, кудӥз Австралиын нимысьтыз пионер луыса ужа-тырше. Албаниысь Дональта сузэр вера: «Ӵемысь ми пумитаськомы адямиосты, кудъёсыз верало, соослэн асьсэлэн осконзы шуыса, нош берлогес валамон луэ, соос Инмарлы чик но уг оско шуыса». Нош Аргентинаысь миссионер чаклаз: куд-ог адямиос Троицалы оско, нош со дыре ик соос уг оско, Атай, Пи но святой дух одӥг Инмар  луо шуыса. «Тае тодыса, трослы капчигес адямиен мае ке огкадьзэ шедьтыны»,— вера со агай. Соин тырше валаны, малы адями зэмзэ но оске. Соку тӥ, апостол Павел сямен, «ваньмыз азьын ваньмыз кадь ик» кариськыны быгатоды (1 Кор. 9:19—23).

11. Апостолъёслэсь ужъёссэс 14:14—17 лыдэ басьтыса, мар кариз Павел, Листраын улӥсьёслы ӟеч ивор тунсыко мед потоз шуыса?

¹¹ Лыдӟе Апостолъёслэсь ужъёссэс 14:14—17. Павел тодыны тыршиз мар тунсыко потэ сое кылзӥсьёслы но, соосын вераськыкуз, сое лыдэ басьтӥз. Кылсярысь, Листраын улӥсьёс Священной Гожтэм сярысь туж ӧжыт тодӥзы. Соин ик Павел вераськиз со сярысь, мар соослы валамон вал: удалтэм емышъёс но улонысь шумпотонъёс сярысь. Солэсь кылъёссэ но примеръёссэ со интыын улӥсьёслы валаны капчи вал.

12. Кызьы валано, мар тунсыко потэ адямилы, но кызьы вераськон амалэз соя тупатоно?

¹² Тырше валаны, мар тунсыко потэ тӥ палан улӥсь адямиослы, но вераськон амалдэс соя тупатэ. Нош кызьы валано, мар адямилы тунсыко потэ? Валэктон сыӵе ик — чакласькись луоно. Оло нош, со бакчаяз ужа, книга лыдӟе, машиназэ тупатэ яке мае ке мукетсэ лэсьтэ. Луэ ке, вераське адямиен со сярысь, мар со каре (Иоанн 4:7). Адямилэн дӥськутэз но со сярысь мае ке вераны быгатэ, кылсярысь, кыӵе со калыкысь, кыӵе удысын ужа яке кыӵе спортивной команда солы кельше. Густаво нимо агай вера: «Мон 19 аресъем егит пиен вераськыны кутски, кудӥзлэн футболкаяз нимо-дано кырӟась суредамын вал. Мон та сярысь юай, но со валэктӥз мыным, малы солы та кырӟась кельше. Со вераськон юрттӥз Библиез дышетон кутскыны, но табере со пи — милям вын-агаймы».

13. Мар кароно, адямилэн Библиез дышетэмез мед потоз шуыса?

¹³ Куке тӥ адямилы Библиез дышетыны ӵектӥськоды, возьматэ, кыӵе со солы пайда ваёз (Иоанн 4:13—15). Одӥг пол сузэрмы кышномуртлы тодытӥз. Со кышномуртлы тунсыко потӥз но сузэрмес пырыны ӧтиз. Корка пырыса, сузэрмы борддор вылэ ошем аттестатэз  адӟиз. Соя со валаз, кышномурт педагогика удысысь профессор луэ шуыса. Соку сузэрмы кышномуртлэсь саклыксэ висъяз, ми но адямиосты дышетӥськомы шуыса, кылсярысь, Библиез дышетонъя курсъёсын но христиан пумиськонъёсын. Кышномурт Библиез дышетыны соглаш кариськиз но мукет нуналаз ик кенешлэн пумиськоназ лыктӥз, нош, кӧня ке дыр ортчыса, со ёросысь конгрессын но вал. Ар ортчыса, со пылатӥськиз. Юалэ асьтэлэсь: «Мар тунсыко потэ адямиослы, кудъёсыз доры мон выльысь лыктӥсько? Кызьы мон сое лыдэ басьтыны быгатӥсько, Библиез дышетонъя программамы сярысь веракум?»

14. Кызьы тӥ Библиез дышетонэз ортчытоды, котькуд адями сярысь нимысьтыз малпаськиды ке?

¹⁴ Адямиен Библиез дышетыны кутскыса, котькуд дышетонлы дасяське. Малпаське адямилэн улонэз сярысь но со сярысь, мар солы тунсыко потэ. Библиысь зэмлыкъёсты валэктон понна, дасяськыкуды быръе, кыӵе кылбуръёсты тӥ лыдӟоды, кыӵе видеороликъёсты возьматоды но кыӵе примеръёсты тӥ вералоды. Юалэ асьтэлэсь: «Мар тужгес но вырӟытыны быгатэ адямилэсь сюлэмзэ, кудӥныз мон Библиез дышетӥсько?» (Мад. 16:23). Албаниысь одӥг кышномурт, кудӥныз Флора нимо сузэр Библиез дышетӥз, кулэмысь улӟыса султон сярысь дышетонэн соглаш ӧй вал. Флора та кышномуртэз кужмысь оскытыны ӧз тыршы. Со тодаз вае: «Мон малпай, нырысь солы умойгес тодыны кулэ Инмарез, кудӥз кулэмъёсты улӟытыны кылзэ сётэ». Со дырысен Флора котькуд дышетоназы кышномуртлэсь саклыксэ висъяз, кызьы Иегова яратонзэ, визьлыксэ но кужымзэ возьматэ. Берлогес та кышномурт оскыны кутскиз, Иегова кулэмъёсты улӟытоз шуыса. Али со вань сюлмысьтыз Иеговалы ужа-тырше.

15. Апостолъёслэсь ужъёссэс 17:16—18 лыдэ басьтыса, маин пумиськиз Павел Афиныын? Малы со ӧз малпа, отын улӥсьёслы тодытон — со юнме гинэ дырез быдтон шуыса?

¹⁵ Лыдӟе Апостолъёслэсь ужъёссэс 17:16—18. Афины карын улӥсьёс сульдэръёслы-идолъёслы йыбыртъян, азон-калгон но философия пӧлы выемын вал ке но, Павел ӧз малпа, соослы тодытон — со юнме гинэ дырез быдтон шуыса. Соослэн ултӥямзы Павелэз ӧз дугдыты. Ачиз Павел но, христиан мурт луытозяз, Инмарлы «пумитъяськись, вӧсяськисьёсты улляса-ёртыса, ӝоже уськытъяса возись» вал (1 Тим. 1:13). Иисус учкиз Павел шоры вуоно дышетскисез шоры кадь. Озьы ик Павел но учкиз Афиныын улӥсьёс шоры вуоно вын-агайёс но сузэр-апайёс шоры кадь. Но со зэм ик озьы луиз (Ап. уж. 9:13—15; 17:34).

16, 17. Малы вераны луоз, пӧртэм адямиос Иисуслэн дышетскисьёсыз луыны быгато шуыса? Вералэ учыр.

¹⁶ Нырысетӥ даурын пӧртэм адямиос Иисуслэн дышетскисьёсыз луизы. Павел Коринфын улӥсь христианъёслы гожтэт гожтӥз. Та грек карын улӥсьёслы со вераз, соос пӧлысь куд-огъёсыз азьвыл йыружъёс яке пӧртэм туж урод ужъёсты лэсьтӥсьёс вал шуыса. Но со ватсаз на: «Тӥ... гылтӥськиды» (1 Кор. 6:9—11). Нош оскысалды-а тӥ, сыӵе адямиос воштӥськыны но Христослэн дышетскисьёсыз луыны быгато шуыса?

¹⁷ Туннэ тросэзлэн улонзэс воштэмзы потэ, Иисус сьӧры мынон понна. Юкина сузэр, кудӥз Австралиын нимысьтыз пионер луыса ужа-тырше, валаз, Библиысь зэмлыкен соглаш кариськыны но соя улыны пӧртэм адямиос быгато шуыса. Одӥг пол офисын со пумитаз нылмуртэз, кудӥз туж ик ӝикыт дӥсяськемын ӧй вал но кудӥзлэн татуировкаосыз вал. Юкина вера: «Нырысь мон соин вераськыны ӧй дӥсьты, нош собере малпай,  вераськоно ик шуыса. Мон тодӥ: солы Библия сокем тунсыко, со Псаломъёсысь кылъёсын татуировкаос но лэсьтӥз!» Нылмурт кутскиз Библиез дышетыны но пумиськонъёсы ветлыны b.

18. Малы тыршоно адямиос сярысь азьло ик урод малпаськытэк улыны?

¹⁸ Куке Иисус вераз, бусыос тӧдьы луиллям, араны вуиллям шуыса, малпаз-а со, тросэз адямиос ӟеч иворез кылзозы шуыса? Ӧз, ӧз малпа, малы ке шуоно Священной Гожтэмын азьло ик вераськиз, солы тросэз уз оске шуыса (Иоанн 12:37, 38). Со сяна, Иисус быгатӥз адямилэсь сюлэмзэ адӟыны (Матф. 9:4). Иисус нырысь ик саклыксэ висъя вал ке но соослы, кинъёс солы оскысалзы, со, кужымзэ жалятэк, вань адямиослы тодытӥз. Иисусэн ӵошатыса, ми адямилэсь сюлэмзэ адӟыны ум быгатӥське. Соин ик милемлы туж тыршоно тодытон понна участокмы сярысь яке адями сярысь азьло ик урод малпаськытэк улыны! Вань адямиос шоры учке вуоно вын-агайёс но сузэр-апайёс шоры кадь. Тани кызьы со сярысь вераз Марк, кудӥз Буркина-Фасо шаерын миссионер луыса ужа-тырше: «Ӵем тазьы луылэ вал: соос, кинъёс мон малпамъя, вамышъёс лэсьтыны кулэ вал, дышетэмысь дугдылӥзы. Нош, кудъёсыз сярысь мон малпай, соослэн номыр уз пӧрмы шуыса, басьтэм тодон-валанъёссэс улоназы пыртылӥзы. Соин ик мон валай: умойгес луоз Иеговалэн духезлы оскиськыны».

19. Кызьы учконо адямиос шоры, кудъёсызлы ми тодытӥськомы?

¹⁹ Нырысь ми малпаны быгатомы, тодытон понна участокамы араны вуэм шепъёс кадесь адямиос трос ик ӧвӧл шуыса. Но тодады вае, мар Иисус аслаз дышетскисьёсызлы шуиз. Бусыос тӧдьы луиллям, соос араны вуиллям. Адямиос, кудъёсызлы ми тодытӥськомы, быгато воштӥськыны но Христослэн дышетскисез луыны. Иегова та вуоно дышетскисьёс шоры марӟанъёс шоры кадь учке (Агг. 2:7). Адямиос шоры ми Иегова но Иисус сямен учкимы ке, ми тыршомы умойгес тодыны соос сярысь но со сярысь, мар соослы тунсыко потэ. Ми ум учке соос шоры тодмотэм адямиос шоры кадь, нош учкомы вуоно вын-агайёс но сузэр-апайёс шоры кадь.