1. Мар карыны кулэ ми пӧлысь котькудӥзлы?

 СОГЛАШ кариськоды-а тӥ пыриськыны бызьылонъя секыт вожвылъяськонэ, тужгес но тӥ висиськоды ке яке жадемын ке? Уд, дыр. Нош апостол Павеллэн верамезъя, вань христианъёс соослы ортчоно сюрестӥ бызё (Евр. 12:1). Но ваньмы ми, егитэсь-а ми яке ӧвӧл-а, трос-а милям кужыммы яке ӧжыт-а, Иеговалэсь бакель каронъёссэ басьтэммы потэ ке, пумозяз бызьыны кулэ (Матф. 24:13).

2. Малы Павел кышкатэк вераны быгатэ вал улон понна бызёнэ пыриськон сярысь, 2 Тимофейлы 4:7, 8 лыдэ басьтоно ке?

² Павел христианъёслы кышкатэк вераны быгатэ вал улон понна бызёнэ пыриськон сярысь, малы ке шуоно со ачиз ортчоно сюрессэ ортчиз ни. (Лыдӟе 2 Тимофейлы 4:7, 8.) Мар сярысь со вераз?

3. Кыӵе бызён сярысь вераз Павел?

³ Павел вераз Вашкала Грециысь ӵошатсконъёслэн аспӧртэмлыкъёссы сярысь, кулэ луисезлы дышетон понна (1 Кор. 9:25—27; 2 Тим. 2:5). Христиан муртлэсь улонзэ со кӧня ке пол ӵошатӥз бызьылонъя вожвылъяськонэн (1 Кор. 9:24; 2 Тим. 4:7). Адями та «бызёнэ» пыриськыны кутске, куке улонзэ Иеговалы сӥзе но пылатӥське (1 Пётр 3:21). Но христиан мурт бызёнлэн пумаз вуэ, куке Иегова солы пырак улон кузьма (Матф. 25:31—34, 46; 2 Тим. 4:8).

4. Мае ми эскеромы та статьяын?

⁴ Мар огкадез вань кузь сюрестӥ бызёнлэн но христиан улонлэн? Трос огкадьзэ шедьтыны луэ, но ми эскеромы куиньзэ: нырысетӥез, милемлы шонер сюрестӥ бызёно; кыкетӥез, милемлы вуоно бакель карон сярысь вунэтоно  ӧвӧл; куинетӥез, шуг-секытъёс вань ке но, быземысь дугдоно ӧвӧл.

5. Кыӵе сюрестӥ милемлы мыноно но малы?

⁵ Огшоры бызёнын кузьым басьтон понна, пыриськисьёс бызьыны кулэ со сюрестӥ, кудзэ малпазы вожвылъяськонэз радъясьёс. Озьы ик милям но пырак улон басьтэммы потэ ке, христиан сюрес вылтӥ мыноно (Ап. уж. 20:24; 1 Пётр 2:21). Нош Шайтанлэн но солэсь адӟем карисьёслэн потэ, ми мукет быръён мед лэсьтомы шуыса. Соослэн потэ, ми соосын ӵош мед бызёмы шуыса (1 Пётр 4:4). Соос милесьтым улонмес мыскыл каро но верало, соослэн сюрессы умойгес шуыса, со эрико улонэ вуттэ шуыса. Макем шонертэм соос малпало! (2 Пётр 2:19).

6. Малы дышетэ тӥледыз Брайанлэн учырез?

⁶ Котькин, кин бызе Шайтанлэсь адӟем карисьёсын, ӝоген вала, быръем сюресэз эрико улонэ уг, нош ляльчи луонэ вуттэ шуыса (Рим. 6:16). Тани Брайан нимо агайлэн учырез. Анай-атаез солэсь мылкыдзэ ӝуто вал христиан сюрес вылтӥ мыныны. Нош егит дыръяз со туж ик ӧз оскы, та сюрес вылын со шудо луоз шуыса. Со ужпум кутӥз бызьыны соосын, кинъёс Шайтан дуннелэн эсэпъёсызъя уло. Брайан вера: «Соку мон ӧй вала, мукетъёсыз кадь эрико луыны тыршеменым, мон урод ужъёслэн ляльчизы луо шуыса. Мон наркотикъёсын выри, трос вина юи но азыса-калгыса улӥ. Собере мон кышкытгес но кышкытгес наркотикъёсын вырыны кутски но соос пӧлысь тросэзлы дыши. Озьы улон понна, трос коньдон кулэ вал, соин ик мон кутски наркотикъёсын вузкарыны». Озьы ке но Брайан ужпум кутӥз Иеговалы оскиськыны но солэн эсэпъёсызъя улыны. Со Инмарлы ужаны-тыршыны кутскиз но 2001-тӥ арын пылатӥськиз. Али со туж шумпотэ, та сюресэз бырйиз шуыса b.

7. Матфейлэсь 7:13, 14 лыдэ басьтыса, кыӵе кык сюресъёс ми азьын вань?

⁷ Макем кулэ шонер сюрес бырйыны! Шайтанлэн потэ, ми сюбег но улонэ нуись сюрестӥ быземысь мед дугдомы шуыса но мед мыномы эркын сюрес вылтӥ, кудзэ быръё та дуннеысь тросэз адямиос. (Лыдӟе Матфейлэсь 7:13, 14.) Шонер сюрес вылысь медам коже шуыса, милемлы Иеговалы оскиськоно но солэсь кылзӥськоно.

8. Мар каре бызёнэ пыриськись адями, канжаське ке?

⁸ Кузь сюрестӥ бызисьёс пыд улазы учко, медаз канжаське шуыса. Озьы ке но соос быгато мукет бызисьёсын малпамтэ шорысь  донгиськыны яке сюрес вылысь гопъёс но лёгъёс сэрен канжаськыны. Усьыса но, соос ӝутско но бызёнзэс азьланьто. Соос уг малпасько со сярысь, маин сэрен канжаськизы, нош нырысь ик соос малпало, кызьы пумозяз вуыны но кузьым басьтыны.

9. Мар милемлы кароно, ми канжаськимы ке?

⁹ Милям сюрес выламы ми быгатӥськомы трос пол канжаськыны, кылъёсын но ужъёсын янгышаса. Яке милемын ӵош бызисьёс быгато янгышаны но милемыз вӧсь карыны. Та милемыз паймытыны кулэ ӧвӧл. Ми ваньмы тырбыдэстэмесь но ваньмы сюбег но улонэ нуись сюрестӥ бызиськомы. Соин ик куддыръя ми ог-огмес вӧсь карыны быгатомы. Павел вала вал, дырын-дырын милям ог-огмылы йыркуръяськыны мугъёсмы кылдылозы шуыса (Кол. 3:13). Нош милемыз вӧсь каронлы саклыкмес висъям интые, ойдолэ тодамы возёмы вуоно бакель карон сярысь. Кин ке но сэрен ми канжаськимы ке, ойдолэ султомы но бызёнмес азьланьтомы. Йыркуръяськыса но Иеговалы ужамысь-тыршемысь дугдыса, ми пумозяз ум вуэ но бакель каремын ум луэ. Со сяна, ми люкетомы, вылды, мукет вын-агайёслы но сузэр-апайёслы, кудъёсыз сюбег но улонэ нуись сюрестӥ бызьыны тыршо.

10. Мар кароно, мукетъёсызлы ми канжаськыны муг медам луэ шуыса?

¹⁰ Мар кароно, милемын ӵош бызисьёслы ми канжаськыны муг медам луэ шуыса? Ас малпамедъя гинэ лэсьтэм интые, луэ ке, умойгес луоз лэзьыны мукетъёсызлы лэсьтыны озьы, кызьы соос малпало (Рим. 14:13, 19—21; 1 Кор. 8:9, 13). Таин ми туж пӧртэм луиськомы огшоры бызёнэ пыриськисьёслэсь. Соос ог-огенызы ӵошатско, но, номыр шоры учкытэк, кузьым басьтыны тыршо. Соос нырысь ик асьсэос сярысь малпасько. Соин ик соос мукет бызисьёсты донганы но быгато, азязгес потон понна. Соосын ӵошатыса, ми ог-огенымы ум ӵошатскиське (Гал. 5:26; 6:4). Милям ужпуммы — юрттыны тросгес адямиослы милемын ӵош пумозяз вуыны но пырак улон басьтыны. Соин ик ми тыршиськомы уже кутыны апостол Павеллэсь визь-кенешсэ, кудӥз Инмарлэн духезлэн валтэмез улсын гожтэмын вал. Со вераз: «Нокин но ас сярысьтыз гинэ медаз сюлмаськы, мукетъёс сярысь но мед сюлмаськоз» (Флп. 2:4).

11. Мар сярысь малпаны тырше бызись адями но малы?

 ¹¹ Бызисьёс пыд улазы гинэ уг учко, нош ортчоно сюрессылэсь пумзэ адӟыны тыршо. Сое адӟытэк но, соос быгато син азязы пуктыны, кызьы пумаз вуо но кема возьмам кузьымез басьто. Та малпан соослэсь мылкыдзэс ӝутэ бызёнзэс азьланьтыны.

12. Мае кузьманы милемлы Иегова кылзэ сётэ?

¹² Иегова ужась-тыршисьёссэ оскытэ: соос, бызёно сюрессылэн пумозяз вуизы ке, одно ик басьтозы кузьымзэс — инмын яке рай музъем вылын пырак улонэз. Та кузьым сярысь Библиын вераське, но солы луыса ми син азямы пуктыны быгатӥськомы, макем умой улон соку луоз. Ми малпаськиськомы ке вуоно улон сярысь, кудзэ кузьманы Иегова кылзэ сётэ, соку номыр уз быгаты люкетыны милемлы пумозяз вуыны.

13. Огшоры бызисьёсын ӵошатыса, кыӵе юрттэтмы милям вань?

¹³ Вашкала Грециын ортчись ӵошатсконъёс дыръя бызисьёс пумиськылӥзы пӧртэм шуг-секытъёсын, кылсярысь, соос жадё но вӧсь луо вал. Со пыр потыны соослы юрттыны быгатэ вал ӵошатсконъёслы дасяськон но ас кужымзы гинэ. Со бызисьёс кадь ик, милемыз но дышето, ми асьмелэсь сюресмес пумозяз мед ортчомы шуыса. Нош соосын ӵошатыса, милям юрттэтмы вань. Ми Иеговалэсь кужым басьтыны быгатӥськомы, нош солэн кужымез мертантэм трос. Иегова кылзэ сётэ: ми со вылэ оскиськыса улӥмы ке, со милемыз дышетоз но юнматоз! (1 Пётр 5:10).

14. Кызьы шуг-секытъёс дыръя милемлы юрттыны быгато кылъёс, кудъёсыз гожтэмын 2 Коринфъёслы 12:9, 10?

¹⁴ Павел туж трос шуг-секытъёсын пумиськылӥз. Сое ултӥяса но уйылыса-улляса возизы. Со сяна, со ассэ ляб шуыса шӧдӥз, озьы ик чидано луиз сое, мае со нимаз ас мугораз бышкалскем шиен (2 Кор. 12:7). Та шуг-секыт сэрен Павел Иеговалы ужамысь-тыршемысь ӧз дугды. Со интые, кылдэм югдурез шоры со учкиз Иегова вылэ оскиськыны луонлык шоры кадь. (Лыдӟе 2 Коринфъёслы 12:9, 10.) Павеллэн сыӵе мылкыдыз вал бере, Иегова солы вань визь сынаськонъёсыз дыръя юрттылӥз.

15. Мае ми шӧдомы, Павеллэсь адӟем каримы ке?

¹⁵ Милемыз но осконмы понна ултӥяны но уйылыны-улляны быгато. Со сяна, милемлы секыт луыны быгатэ урод тазалыкмы яке лябӟеммы сэрен. Нош ми Павеллэсь адӟем кариськомы ке, соку котькуд шуг-секыт дыръя быгатомы Иеговалэсь яратэмзэ но сюлмаськемзэ шӧдыны.

16. Мар тӥ карыны быгатӥськоды, тӥляд тазалыкты урод ке но?

¹⁶ Нош тӥ валес вылысь яке сӧсыръёслы тупатэм креслоысь султылыны уд ке быгатӥське? Оло, тӥледлы ветлыны секыт яке тӥ урод адӟиськоды? Быгатӥськоды-а тӥ бызьыны егитэсь но тазалыкоесь вын-агайёсын но сузэр-апайёсын ӵош? Быгатӥськоды! Улонэ нуись сюрестӥ трос арлыдо но висись христианъёс бызё. Соос ас кужымзы вылэ уг, нош Иеговалэн кужымез вылэ оскисько, христиан пумиськонъёсты телефон пыр кылзыса яке видео пыр учкыса. Озьы ик соос дышетскисьёсты дасян уже пырисько, эмъясьёслы, эмъюртын мукет ужасьёслы но ӵыжы-выжыоссылы тодытыса.

17. Кызьы Иегова учке соос шоры, кинъёслэн тазалыксы урод?

¹⁷ Тӥ уд ке быгатӥське лэсьтыны ваньзэ, мае Иегова понна лэсьтэмды потэ, мылкыдды медаз куашка, но эн малпалэ, пумозяз бызьыны кужымды уз тырмы шуыса. Иегова яратэ тӥледыз, малы ке шуоно тӥ солы оскиськоды но трос аръёс ӵоже оскымон  ужаськоды-тыршиськоды. Азьвыл сярысь, али тӥледлы тужгес но кулэ солэн юрттэтэз, но со тӥледыз ноку уз кельты (Пс. 9:11). Инмар котьку дась луоз тӥледлы юрттыны. Тани мар вераз одӥг сузэр, кудӥзлэн тазалыкеныз герӟаськем шуг-секытъёсыз кылдӥзы: «Мынам тазалыке уродгес но уродгес луэ, соин ик мукетъёсыныз зэмлык сярысь вераськыны мон ӧжытгес быгатӥсько. Но мон тодӥсько: Иеговалэн сюлмыз шумпотэ солы, мае мон лэсьтӥсько, нош со монэ но шумпотонэн тырмытэ». Куке тӥляд мылкыдды куашка, эн вунэтэ: тӥ огнады ӧвӧл — тӥледын Иегова. Малпаське Павеллэн примерез сярысь но тодады вае мылкыдэз ӝутӥсь кылъёссэ: «Шумпотыса улӥсько: уго, куке мон лябӟемын, соку мон кужмо» (2 Кор. 12:10).

18. Кыӵе тужгес но секыт югдуре сюремын куд-ог христианъёс?

¹⁸ Куд-ог христианъёс, кудъёсыз улонэ нуись сюрестӥ бызё, эшшо одӥг шуг-секытэн пумисько на. Соос нюръясько сыӵе шуг-секытъёсын, кудъёсыз сярысь мукет адямиос уг но тодо, дыр. Кылсярысь, соосты курадӟытэ депрессия яке ялан сюлмаськытӥсь шӧдонъёссы. Малы та дуно вын-агайёсмылэн но сузэр-апайёсмылэн югдурзы тужгес но секыт? Малы ке шуоно, куке кин ке но кизэ тӥя яке сӧсыръёслы тупатэм креслоын пуке, ваньзы сое адӟо но юрттыны тыршо. Нош эмоциональной яке психической висёнъёсын курадӟисьёслэн вылтуссыя куддыръя уд но вала, соос зэм но висё шуыса. Соослы, кизэс яке пыдзэс тӥясь адямиослы кадь ик, вӧсь луэ. Нош адямиос соослэсь курадӟемзэс уг адӟо бере, соослы сокем юрттыны уг тыршо.

19. Малы дышетэ милемыз Мемфивосфейлэн учырез?

¹⁹ Тӥ уд ке быгатӥське Иеговалы ужан-тыршонын лэсьтыны сомында, кӧня лэсьтэмды потэ, но малпаськоды ке, мукетъёсыз тӥледыз уг валало шуыса, соку тӥледыз Мемфивосфейлэн учырез юнматыны быгатоз (2 Экс. 4:4). Со тазалыкеныз сэрен туж курадӟиз. Со сяна, Давид эксэй Мемфивосфей сярысь шонертэм малпаз но ассэ соин шонерлыктэм возиз. Вань луэм учыръёс понна Мемфивосфей янгыш ӧй вал. Нош со куашкам мылкыдызлы ӧз сётскы но улонысьтыз ваньзэ умойзэ дунъяз. Со тау кариз ӟеч уж понна, кудзэ Давид солы азьвыл лэсьтӥз (2 Экс. 9:6—10). Соин ик, куке Давид ассэ шонерлыктэм возиз, Мемфивосфей солы саклыксэ ӧз висъя, нош тыршиз лыдэ басьтыны ваньзэ, мар кылдэм югдурен герӟаськемын вал. Давидлэн янгышез сэрен со вожзэ ӧз потты. Озьы ик со Иеговаез но янгыше ӧз уськыты Давидлэн шонертэм ужез понна. Мемфивосфей малпаз со сярысь гинэ,  кызьы Иеговаен пуктэм эксэйлы юрттыны (2 Экс. 16:1—4; 19:24—30). Иегова Мемфивосфейлэсь учырзэ аслаз Кылаз пыртӥз, ми та оскымон ужась-тыршисезлэсь дышетскыны мед быгатомы шуыса (Рим. 15:4).

20. Кызьы куд-огъёсыз вылын шӧдӥсько ялан сюлмаськытӥсь малпанъёс но малы соос оскыны быгато?

²⁰ Ялан сюлмаськытӥсь малпанъёс сэрен куд-ог вын-агайёс но сузэр-апайёс огшоры дыръя но, тодмотэм адямиос пӧлын, туж сюлэмшугъясько но возьдасько. Трос адямиос пӧлын соос асьсэды умойтэм шӧдо, озьы ке но кенешлэн пумиськонъёсаз но конгрессъёсы ветло. Тодмотэм адямиосын вераськон та вын-агайёслы но сузэр-апайёслы туж секыт йӧтэ, нош со шоры учкытэк, соос тодытон уже пырисько. Тӥледлы таӵе шӧдонъёс тодмо ке, тодады возе: тӥ огнады ӧвӧл. Сыӵе шуг-секытъёсын тросэз пумисько. Оске: Иеговалы сюлмысь тыршемды туж дуно потэ. Тӥляд юн сылэмды возьматэ, Инмар тӥледыз бакель каре но кулэ луись кужым сётэ шуыса (1 Пётр 5:7; Флп. 4:6, 7) c. Тазалыкен но мылкыдын герӟаськем шуг-секытъёс шоры учкытэк, тӥ ужан-тыршондэс азьланьтӥськоды ке, оске, тӥ Иеговаез шумпоттӥськоды шуыса.

21. Мар карыны ми быгатомы, Иеговалэн юрттэменыз?

²¹ Шумпотыса вераны луэ, огшоры бызён но бызён, кудӥз сярысь Павел вераз, туж пӧртэм луо. Вашкала дыръёсы огшоры бызёнын кузьым одӥг гинэ адями басьтэ вал. Нош христиан сюрес вылын пырак улон сётэмын луоз котькудӥзлы, кин пумозяз вуоз (Иоанн 3:16). Огшоры бызёнэ пыриськисьёслэн вормон понна умой тазалыксы луыны кулэ вал. Нош ми пӧлысь тросэзлэн тазалыксы туж ик умой ӧвӧл, но, со шоры учкытэк, ми быгатӥськомы бызёнмес азьланьтыны (2 Кор. 4:16). Нош Иеговалэн юрттэменыз, ми быгатомы пумозяз бызьыны!