1, 2. Мар со сыӵе дун тырон но малы со милемлы кулэ?

 АДАМ, тырбыдэс адями, сьӧлыказ бере, со ачиз но, солэн вордӥськоно нылпиосыз но пырак улыны луонлыкез ыштӥзы. Адам простить каремын уз луы, малы ке шуоно со валаса вылысь сьӧлыказ. Сьӧлыкамез понна солы кулыны кулэ вал. Нош солэн нылпиосыз номыр уродзэ ӧз лэсьтэ (Рим. 5:12, 14). Быгатэ вал-а Иегова мар ке но карыны, Адамлэн нылпиосыз кулытэк пырак улыны мед быгатозы шуыса? Зэм, быгатэ вал! Адамлэн сьӧлыкамез бере ӝоген Иегова пичиен-пичиен валэктылӥз, кызьы со Адамлэсь трос миллион нылпиоссэ сьӧлыклэсь но кулонлэсь мозмытоз (Ул.-выл. 3:15). Пуктэм дыре Иегова аслэсьтыз Пизэ музъем вылэ ыстӥз. Иисус, «Аслэсьтыз лулзэ сётыса, троссэ сьӧлыкъёслэсь мозмытыны лыктӥз» (Марк 10:45; Иоанн 6:51).

² Мар со сыӵе дун тырон? Христиан Грек Гожтэмъёсын со возьматэ дунэз, кудзэ Иисус тыриз, берен басьтон понна сое, мае ыштӥз Адам (1 Кор. 15:22). Малы милемлы сыӵе дун тырон кулэ? Малы ке шуоно Иеговалэн шонерлыко куронъёсызъя, кудъёсыз Законын гожтэмын, улон понна улонэз сётыны кулэ вал (Пот. 21:23, 24). Адам ыштӥз тырбыдэс адями улонзэ. Инмарлэн шонерлыко куронъёсызъя, Иисус сыӵе ик тырбыдэс адями улонзэ сётӥз (Рим. 5:17). Озьы со ваньмыз понна, кинъёс дун тыронлы оско, «Пумтэм вапумъёслэн Атайзы» луиз (Ис. 9:6; Рим. 3:23, 24).

3. Малы Иисус аслэсьтыз тырбыдэс адями улонзэ сётыны дась вал, Иоаннлэсь 14:31 но 15:13 лыдэ басьтыса?

³ Иисус дась луыса аслэсьтыз улонзэ сётӥз, малы ке шуоно туж яратӥз Иеговаез но адямиосты. (Лыдӟе Иоаннлэсь 14:31; 15:13.) Та яратон юрттӥз солы кулытозяз ик Атаезлы оскымон кыльыны но солэсь эриксэ быдэстыны. Иисуслэн  курбонэзлы луыса адямиос музъем вылын улозы ӵапак озьы ик, кызьы Иегова сое кутсконаз ик малпаз. Та статьяын ми эскеромы, малы Иегова лэзиз, Иисус кулон азяз туж зол мед курадӟоз шуыса. Озьы ик ми вакчияк эскеромы Библиез гожъясь одӥг адямилэсь учырзэ, кудӥз туж дунъяз дун тыронэз. Собере ми малпаськомы, кызьы Иеговалы но Иисуслы дун тырон понна тау каронмес возьматоно но кызьы тау карон мылкыдмес юнматоно.

4. Вералэ, кызьы Иисусэз казнить каризы.

⁴ Пуктэ син азяды Иисуслэсь музъем вылын берпуметӥ улон нуналзэ. Со быгатысал туж трос кылчинъёслэсь юрттэт курыны, соос сое мед утёзы шуыса. Озьы ке но со лэзе, рим ожгарчиос сое мед кутозы шуыса. Берлогес соос Иисусэз сюлоен лек жуго. Со понна Иисуслэн мугор вылаз мур, вир потӥсь яраос кылё (Матф. 26:52—54; Иоанн 18:3; 19:1). Собере ожгарчиос Иисусэз косо яраё тыбыр вылаз секыт юбоез нуыны. Иисус каллен мынэ казнить карон интые. Ӝоген солэн кужымез воксё быре. Соку ожгарчиос косо Иисуслэсь юбозэ нуыны одӥг пиосмуртэз, кудӥз ӵапак соку со интытӥ ортче вал (Матф. 27:32). Куке Иисус вуэ интые, кытын кулыны кулэ вал, ожгарчиос китӥз но пыдтӥз сое юбо борды кортӵогало. Юбоез ӝуто но, мугорызлэн секталаеныз кортӵогъёслэсь яраос эшшо но бадӟымгес луо. Солэн анаез бӧрдэ, эшъёсыз куректэменызы кытчы пырон инты уг шедьто, нош иудейёслэн кузёйыръёссы сое мыскылляло (Лука 23:32—38; Иоанн 19:25). Иисус кӧня ке часъёс ӵоже курадӟе. Солэн сюлмыз но тыосыз секытгес но секытгес ужало. Котькуд шокчеменыз Иисуслы вӧсьгес но вӧсьгес луэ. Иисус тодӥз, Атаезлы оскымон кылиз шуыса. Самой кулон азяз ик со берпуметӥзэ солы вӧсяське. Собере со йырзэ мыкыртэ но кулэ (Марк 15:37; Лука 23:46; Иоанн 10:17, 18; 19:30). Макем каллен, курадӟытыса но мыскылляса виизы Иисусэз!

5. Казнить каронэн ӵошатыса, Иисус понна мар эшшо но уродгес вал?

⁵ Казнить каронэн ӵошатыса, Иисус понна эшшо но уродгес вал янгыше уськытон, кудӥз понна сое кортӵогазы. Иисус вань сюлмысьтыз яратӥз аслэсьтыз Атайзэ, нош сое шонертэм янгыше уськытӥзы, со Инмарез сантэма шуыса, яке Инмарез но солэсь нимзэ уг гажа шуыса (Матф. 26:64—66). Сыӵе янгыше уськытон сярысь малпаса гинэ но, Иисуслы туж вӧсь вал ини. Озьы ик со оскиз, Атаез сое сыӵе ултӥянлэсь мозмытоз шуыса (Матф. 26:38, 39, 42). Соку малы Иегова лэзиз, солэн яратоно Пиез сокем зол мед курадӟоз но мед кулоз шуыса? Ойдолэ эскеромы куинь мугъёсты.

6. Малы Иисуслы юбо вылын кулоно вал?

⁶ Нырысетӥез муг, малы Иисусэз юбо борды кортӵоганы кулэ вал, еврейёсты карган улысь мозмытон понна (Гал. 3:10, 13). Соос каргамын вал, яке соослы кулыны кулэ вал, малы ке шуоно соос сьӧлыко Адамлэн нылпиосыз луо вал, озьы ик соос ӧз быдэстэ Инмарлэн Законэзъя улыны кылсётонзэс (Рим. 5:12). Законъя куд-ог сьӧлыкъёс понна адямиез виыны кулэ вал. Нош казнить карем бере йыруж лэсьтӥсь адямилэсь мугорзэ юбо борды кортӵоганы быгато вал (К. Зак. 21:22, 23; 27:26) b. Иисус Законлэсь вань курон-косонъёссэ быдэстӥз. Соин ик, юбо вылын кулыса, со ас вылаз басьтӥз карганэз, кудӥз улэ сюремын вал ваньзы, кинъёс Законъя улыны кулэ вал. Озьыен, еврей калык Иисусэз палэнтӥз ке но, солэн курбонэз соослы юрттыны быгатэ вал.

7. Вералэ кыкетӥ мугез, малы Инмар лэзиз, Пиез мед курадӟоз шуыса.

 ⁷ Табере эскеромы кыкетӥ мугез, малы Инмар лэзиз, Пиез мед курадӟоз шуыса. Со дасяз Иисусэз, милемлы Быдӟым священник луон понна. Иисус ас вылаз шӧдӥз, макем секыт Инмарлэсь кылзӥськыны туж бадӟым шуг-секытъёс дыръя. Иисуслы сокем секыт вал, со «викышъяса, синкылиен куриськиз», Иеговалэсь юрттэт куриз. Зэм, Иисус тодэ, макем вӧсь луыны быгатэ сюлэм. Соин ик со вала милесьтым кулэяськонъёсмес но милемлы юрттыны быгатэ, куке ми шуг-секытъёсын пумиськиськомы. Ми туж шумпотӥськомы, Иегова милемлы сыӵе гажась-жалясь Быдӟым священникез сётӥз шуыса, кудӥз «лябӟыса улон дыръямы асьмеды жалясь луэ»! (Евр. 2:17, 18; 4:14—16; 5:7—10).

8. Вералэ куинетӥ мугез, малы Инмар лэзиз, Иисус туж бадӟым шуг-секытъёсын мед пумиськоз шуыса.

⁸ Ойдолэ тодомы куинетӥ муг сярысь, малы Инмар лэзиз, Иисус бадӟым шуг-секытъёс пыр мед потоз шуыса. Кулэ вал валэктон сётыны кулэ луись юанлы: быгато-а адямиос Инмарлы оскымон кыльыны туж бадӟым шуг-секытъёс дыръя но? Шайтан вера: «Уг быгато!» Солэн верамезъя, адямиос Инмарлы ужало-тыршо, асьсэлы пайда басьтон понна гинэ. Со малпа, адямиос, Адам кадь ик, Иеговаез уг ярато шуыса (Иов 1:9—11; 2:4, 5). Инмар быдэсак оскиз, Пиез солы оскымон кылёз шуыса. Соин ик со лэзиз, Иисус мед пумиськоз шуыса самой бадӟым шуг-секытъёсын, кудъёссэ адями чиданы быгатэ. Иисус Иеговалы оскымон кылиз но возьматӥз, Шайтан пӧяськись шуыса.

9. Кыӵе адӟем карон возьматӥз милемлы апостол Иоанн?

⁹ Тросэз христианъёс пумитъяськонъёсын но пӧртэм шуг-секытъёсын пумиськыло. Озьы ке но соос азьланяз но тодыто но вань улонзы ӵоже Инмарлы оскымон кылё, малы ке шуоно соослэсь осконзэс юнматэ дун тырон сярысь дышетон. Малпаськомы апостол Иоанн сярысь. Со 60 арлэсь кемагес Христос но дун тырон сярысь зэмлыкез дугдылытэк тодытӥз, вылды. Куке Иоаннлы 90 ареслэсь тросгес вал ини, адямиос малпазы, Рим кунлы со туж бадӟым кышкытлык вайыны быгатэ шуыса. Соин ик сое Патмос шормуӵе ыстӥзы. Кыӵе йыруж понна? Со валэктэ: «Инмар кыл понна, Иисус Христосэз тодытэме понна» (Усьт. 1:9). Макем адӟем карымон осконзэ но юн луэмзэ со возьматӥз!

10. Кызьы Библиысь книгаос, кудъёссэ Иоанн гожтӥз, возьмато, со дун тыронэз дунъяз шуыса?

¹⁰ Библиысь книгаосысь, кудъёссэ Иоанн гожтӥз, адӟиське, со Иисусэз туж яратӥз но дун тырон понна тау кариз шуыса. Со книгаосын 100 поллэсь но тросгес вераське дун тырон сярысь но со сярысь, кыӵе пайда со вайыны быгатэ. Кылсярысь, Иоанн гожтӥз: «Кин ке сьӧлыказ ке но, соку асьмелэн Атай азьын Дурбасьтӥсьмы, Шонер Улӥсь Иисус Христосмы, вань» (1 Иоанн 2:1, 2). Иоаннлэн книгаосаз пусйиське, макем кулэ «Иисус сярысь шара ивортон» ужез быдэсъяны (Усьт. 19:10). Зэм но, Иоанн дун тыронэз туж дунъяз. Нош кызьы возьматоно, ми но дун тыронэз дунъяськомы шуыса?

11. Мар юрттоз милемлы сьӧлык лэсьтон мылкыдын нюръяськыны?

¹¹ Нюръяське сьӧлык лэсьтон мылкыдын. Ми дун тыронэз зэмзэ ик дунъяськомы ке, соку тазьы ум малпалэ: «Малы сыӵе мылкыдын нюръяськоно? Сьӧлыкам бере Инмарлэсь курыны луэ ук, со простить мед кароз шуыса». Со интые, куке милям мылкыдмы луоз мае ке уродзэ лэсьтыны, ми вераломы:  «Уг, мон уг быгатӥськы асме озьы возьыны, малы ке шуоно Иегова но Иисус мон понна сомында умойзэ лэсьтӥзы!» Соин ик ми быгатӥськомы Иеговаез сюлворыса ик курыны кужым сярысь, сьӧлык лэсьтон мылкыдлы медам сётске шуыса (Матф. 6:13).

12. Кызьы уже кутыны луэ кылъёсты, кудъёсыз гожтэмын 1 Иоаннлэн 3:16—18?

¹² Яратэ вын-агайёсты но сузэр-апайёсты. Огъя оскисьёсмес яратыса, ми возьматӥськомы, дун тырон понна тау кариськомы шуыса. Малы озьы вераны луоз? Малы ке шуоно Иисус аслэсьтыз улонзэ ми понна гинэ ӧз сёты, озьы ик вын-агайёсмы но сузэр-апайёсмы понна сётӥз. Иисус соос понна кулыны дась вал бере, со соосты туж дунъя. (Лыдӟе 1 Иоаннлэсь 3:16—18.) Ми вын-агайёсмес но сузэр-апайёсмес яратӥськомы шуыса адӟиськоз отысь, кызьы ми соосын асьмеды возиськомы (Еф. 4:29, 31—5:2). Кылсярысь, ми соослы юрттӥськомы, куке соос висё яке бадӟым шуг-секытъёсын пумиськыло, озьы ик инкуазь шимучыръёс дыръя но. Нош мар кароно, куке кенешын кин ке но милемыз вӧсь кариз?

13. Малы милемлы мукетъёссэ простить кароно?

¹³ Мар кароно, куддыръя тӥледлы секыт ке вын-агаез яке сузэр-апаез простить карыны? (Лев. 19:18). Соку тӥледлы юрттоз таӵе визь-кенеш: «Ог-огеныды лякытэсь, гажась-жалясесь луэ, огдылэсь огды сьӧлыкъёстэс куштэ, кызьы Инмар Христос пыр тӥлесьтыд сьӧлыкъёстэс куштӥз» (Еф. 4:32). Котьку но, куке ми вын-агаймес яке сузэр-апаймес простить кариськомы, инмысь Атаймы адӟе, дун тыронэз ми зэмзэ ик дунъяськомы шуыса. Но кызьы тау карон мылкыдмес юнматоно Инмарлэн та кузьымез понна?

14. Вералэ одӥгез луонлык сярысь, кызьы дун тырон понна тау карон мылкыдэз юнматыны луэ.

¹⁴ Тау каре Иеговаез дун тырон понна. «Мон малпасько, котькуд нунал вӧсяськыкумы дун тырон сярысь верано но со понна Иеговаез тау кароно шуыса»,— вера Индиысь 83 аресъем Джоанна сузэр. Вӧсяськыкуды вералэ Иеговалы янгышъёсты сярысь, кудъёссэ тӥ нунал куспын лэсьтӥды, но куре Иеговаез соос понна тӥледыз простить карыны. Тӥ секыт сьӧлык лэсьтӥды ке, тӥледлы тӧроослэн но юрттэтсы кулэ луоз. Та вын-агайёс кылзозы тӥледыз но Инмарлэн Кылысьтыз визь-кенеш сётозы. Соос тӥледын ӵош вӧсяськозы но Иеговаез курозы тӥледыз простить карыны, тӥляд соин нош ик умой кусыпъёсты мед луозы шуыса (Иак. 5:14—16).

15. Малы лыдӟиськоно но малпаськоно дун тырон сярысь?

 ¹⁵ Малпаське дун тырон сярысь. «Куке мон лыдӟисько курадӟонъёс сярысь, кудъёсыз пыр потоно луиз Иисус, мон бӧрдытэк уг чидаськы»,— вера 73 аресъем Раджамани нимо сузэр. Тӥляд но сюлэмды туж вӧсь луэ, дыр, куке тӥ малпаськоды со сярысь, кыӵе зол курадӟиз Инмарлэн Пиез. Но макем трос тӥ малпаськоды Иисуслэн курбонэз сярысь, сокем юнгес яратоды сое но солэсь Атайзэ. Умой луысал ас поннады эскерон дыръя яке семьяеныды йыбырттон дыръя дун тырон сярысь тросгес тодыны.

16. Кыӵе пайда ми басьтӥськомы, куке мукетъёссэ дун тырон сярысь дышетонэн тодматӥськомы? (Учке вылбамысь суредэз.)

¹⁶ Тодматэ мукетъёссэ дун тырон сярысь дышетонэн. Куке ми мукетъёсызлы вераськомы дун тырон сярысь, милям со понна тау карон мылкыдмы юнма. Милям вань туж умой тӥрлыкъёсмы, кудъёсыз юртто милемлы мукетъёсызлы валэктыны, малы Иисуслы ми понна кулоно вал. Кылсярысь, «Ӟеч ивор» брошюраысь ми быгатӥськомы уже кутыны 4-тӥ урокез, кудӥз нимаське «Кин со Иисус Христос?». Нош «Малы дышетэ милемыз Библия» книгаысь ми уже кутыны быгатӥськомы 5-тӥ люкетэз, кудӥз нимаське «Дун тырон — Инмарлэсь дуно кузьым». Со сяна, арлы быдэ ми ветлӥськомы Иисус Христослэсь кулон нуналзэ Тодэ ваён ӝытанэ но ӟырдыт мылкыдын ӧтиськомы ваньзэс та пумиськонэ лыктыны. Тазьы но ми дун тырон понна тау карон мылкыдмес юнматӥськомы. Зэм но, Иегова милемлы туж дано уж сётӥз — мукетъёсызлы солэн Пиез сярысь вераны!

17. Малы дун тырон Инмарлэн адямиослы тужгес но дуно кузьымез?

¹⁷ Милям вань трос мугъёсмы дун тырон понна тау карыны, озьы ик тау карон мылкыдмес юнматыны но. Дун тыронлы луыса, тырбыдэстэм луэммы шоры учкытэк, ми быгатӥськомы Иеговалэн матысь эшъёсыз луыны. Дун тыронлы луыса Шайтанлэн ужъёсыз куашкатэмын луозы (1 Иоанн 3:8). Дун тыронлы луыса адямиос музъем вылын улозы ӵапак озьы ик, кызьы Иегова кутсконысеныз ик малпаз вал. Быдэс музъем райлы пӧрмоз, котькуд адями Иеговаез яратоз но солы ужалоз-тыршоз. Ойдолэ котькуд нунал тыршомы Иеговаез тау карыны дун тырон понна — адямиослы тужгес но дуно кузьымез понна!