Малы Иисус кулон азяз вераз Давидлэсь кылъёссэ, кудъёсыз гожтэмын Псалтирьын 21:2?

Матфейлэсь 27:46 но Марклэсь 15:34 гожтэмъя, самой кулон азяз ик Иисус кеськиз: «Инмаре! Инмаре! Малы Тон Монэ кельтӥд?» Озьы быдэсмизы Давидлэн кылъёсыз, кудъёсыз гожтэмын Псалтирьын 21:2. Шонертэм луысал малпаны: Иисус та кылъёсты вераз, малы ке шуоно малпаз, Инмар солы уз юртты шуыса. Озьы ик шонертэм луысал малпаны, Иисуслэн осконэз лябӟиз шуыса. Иисус валаз, малы солы кулыны кулэ, но Иисус солы дась вал (Матф. 16:21; 20:28). Озьы ик Иисус тодӥз, самой кулон азяз ик Иеговалы сое юрттэттэк кельтоно луоз шуыса (Иов 1:10). Озьы Иегова Иисуслы луонлык сётӥз возьматыны, кыӵе гинэ секыт солэн кулонэз медаз луы, со Атаезлы оскымон кылёз шуыса (Марк 14:35, 36).

Соку малы Иисус та псаломысь кылъёсты вераз? Ми пыр-поч ум тодӥське ке но, ойдолэ эскеромы куд-ог мугъёсты a.

Та кылъёсын Иисус пусйиз, дыр, Иегова солы кулыны лэзёз шуыса. Мозмытӥсь курбонэз Иисуслы Иеговалэн юрттэмезтэк ваёно вал. Солы кулыны кулэ вал вань адямиос понна (Евр. 2:9).

Та псаломысь куд-ог кылъёсты вераса, Иисус быдэс псаломлы саклык висъяз, дыр. Со нуналъёсы иудейёс ӵем дыръя быдэс псаломъёсты йыразы возизы. Одӥг кылбурез кылыса, соос быдэс псаломез тодазы вайыны быгато  вал. Оло нош, Иисус ӵапак сое карыны малпаз. Озьы ке, Иисус юрттӥз дышетскисьёсызлы, кудъёсыз иудей калыкысь вал, тодазы вайыны та псаломысь мукет азьпалзэ ивортонъёсты но, кудъёсыз солэн кулонэныз герӟаськемын вал (Пс. 21:8, 9, 16, 17, 19, 25). Озьы ик соос тодазы вайыны быгатӥзы та псаломысь берпуметӥ кылбуръёсты, кудъёсыз Иеговаез данъяло но верало, Иисус, Эксэй кадь, быдэс музъемен кивалтэ шуыса (Пс. 21:28—32).

Озьы Иисус возьматӥз, дыр, со янгыш ӧвӧл шуыса. Кортӵогамзы азьын Иисус султоно луиз суд азе, кудӥз катэз лыдэ басьтытэк люкамын вал но кудӥз сое янгыше уськытӥз, со Инмарез сантэма шуыса (Матф. 26:65, 66). Та суд люкаськиз ӝог, бер уйин но, шонерлыко курон-косонъёсты тӥяса (Матф. 26:59; Марк 14:56—59). «Инмаре! Инмаре! Малы Тон Монэ кельтӥд?» юан сётыса, Иисус адямиослэсь саклыксэс висъяз, дыр, сое кортӵоган понна, со номыр умойтэмзэ ӧз лэсьты шуыса.

Иисуслэн тодаз вайытэмез потӥз, дыр, Давид сярысь, кудӥз та псаломез гожтӥз. Иегова лэзиз, Давид мед курадӟоз шуыса. Но со ӧз возьматы, та ужась-тыршисез солы ярамон ӧй вал ини шуыса. Давидлэн юанэз, кудӥз та псаломлэн кутсконаз гожтэмын, солэн ляб осконэз сярысь уг вера, малы ке шуоно Давид юн оскемзэ возьматӥз, Иегова аслэсьтыз калыксэ утьыны быгатэ шуыса. Со сяна, Иегова азьланяз но Давидэз бакель карылӥз (Пс. 21:24, 25, 28). Озьы ик Иисус но, «Давидлэн Пиез», юбо борды кортӵогамзы бере курадӟиз ке но, та ӧз возьматы, со Иеговалы ярамон ӧй вал ини шуыса (Матф. 21:9).

Та кылъёсын Иисус возьматӥз, дыр, макем вӧсь луиз солэн сюлмыз, Атаез сое утемысь дугдӥз шуыса. Иеговалы озьы лэсьтоно луиз, Иисус солы оскымон луэмзэ мед возьматоз шуыса. Иеговалэн уг поты вал, солэн Пиез мед курадӟоз но мед кулоз шуыса. Озьы лэсьтоно луиз, Адамлэн но Евалэн Инмарлы пумит ӝутскемзы бере гинэ. Иисус номыр уродзэ ӧз лэсьты ке но, солы курадӟоно но кулоно луиз. Озьы со Шайтанлэн юанъёсызлы валэктонъёс сётысалыз но Иеговалы курбонэз вайысалыз, кудзэ кулэ вал сётыны берен басьтон понна сое, мае адями ыштӥз (Марк 8:31; 1 Пётр 2:21—24). Но со луыны быгатэ вал, Иегова вакчи дырлы аслэсьтыз Пизэ утемысь дугдысалыз ке. Нош солэсь азьвыл со котьку но Иисусэз утьылӥз.

Иисус дышетскисьёсызлы валаны юрттӥз, дыр, малы Иегова лэзиз солы озьы кулыны b. Иисус тодӥз: сое юбо вылэ кортӵогалозы, йыруж лэсьтӥсез кадь, но со тросэзлы «канжаськон из» луоз (1 Кор. 1:23). Нош солэн дышетскисьёсыз саклыксэс висъясалзы ке, малы со зэмзэ ик кулӥз, соос валасалзы, мае возьматэ солэн кулонэз (Гал. 3:13, 14). Соос валасалзы, со соослэн Утисьсы шуыса, нош йыруж лэсьтӥсь ӧвӧл.

Ми пыр-поч ум тодӥське, малы Иисус вераз Давидлэсь кылъёссэ, кудъёсыз гожтэмын Псалтирьын 21:2. Но ми умой тодӥськомы: Иисус валаз, ваньмыз, мар соин луиз, Иеговалэн эрикезъя вал шуыса. Та кылъёсты верамез бере ӝоген Иисус шуиз: «Быдэсмиз!» (Иоанн 19:30; Лука 22:37). Зэм, Иегова вакчи дырлы аслэсьтыз Пизэ утемысь дугдӥз, Иисус мед быдэстоз шуыса ваньзэ, мар понна со музъем вылэ лыктӥз. Озьы ик солы луыса Иисус быдэстӥз ваньзэ, мар со сярысь гожтэмын «Моисейлэн законаз, пророкъёслэн книгаосазы но, псаломъёсын но» (Лука 24:44).