1, 2. Вералэ, мар луиз со нуналэ, куке Иисусэз юбо борды кортӵогазы?

 ГОЛГОФА. Асьме вакытысь 33-тӥ ар, 14-тӥ нисан. Иисусэз сантэмазы но янгыше уськытӥзы йыруж понна, кудзэ со ӧз лэсьты. Сое серем каризы, курадӟытӥзы но юбо борды кортӵогазы, кудӥз вылын солы кулоно вал. Со китӥз но пыдтӥз кортӵогамын вал бере, котькуд шокчемез, котькуд верам кылыз сое туж вӧсь кариз. Но солы мае ке кулэзэ верано вал.

² Кызьы гожтэмын Матфейлэсь 17:5, Иеговалэн потэ, ми солэн Пиезлэсь мед кылзӥськомы шуыса. Ойдолэ «кылзомы», мар вераз Иисус, куке со юбо борды кортӵогамын вал, но малпаськомы со сярысь, малы милемыз дышетыны быгато солэн кылъёсыз.

3. Кин сярысь вераз, вылды, Иисус, куке Иеговалэсь куриз: «Атае! Соосты простить кар»?

³ Мар вераз Иисус? Юбо вылын Иисус вӧсяськиз: «Атае! Соосты простить кар». Кин сярысь со вераз? Тае валаны юртто кылъёс, кудъёссэ Иисус собере вераз: «Мар лэсьтэмзэс соос уг тодо уго» (Лука 23:33, 34). Иисус вераз, вылды, рим ожгарчиос сярысь, кудъёсыз сое юбо борды кортӵогазы. Соос ӧз тодэ, кин Иисус зэмзэ ик вал. Озьы ик Иисус вераз, вылды, адямиос сярысь, кудъёсыз куризы сое казнить карыны но кудъёсыз берлогес солы оскизы (Ап. уж. 2:36—38). Шонертэм ужъёсын пумиськыса но, Иисус сое вӧсь карись адямиослы урод кылъёс ӧз вера но соослы пунэмзэ берыктыны ӧз туртты (1 Пётр 2:23). Со интые, со Иеговаез куриз, соосты простить карыны.

4. Малы милемыз дышетэ Иисуслэн тушмонъёссэ простить карыны дась луэмез?

 ⁴ Малы дышето милемыз Иисуслэн кылъёсыз? Милемлы адӟем кароно Иисуслэсь, кудӥз дась луыса мукетъёссэ простить кариз (Кол. 3:13). Куд-ог адямиос, озьы ик ӵыжы-выжыосмы но, милемлы люкетыны быгато Иеговалы ужаны-тыршыны, малы ке шуоно соос уг валало, малы ми та улон сюресэз бырйимы. Соос быгато ми сярысь пӧяса вераны, мукетъёсыз азьын милемыз ултӥяны, публикациосмес быдтыны, озьы ик милемыз кышкатыны но. Соос вылэ йыркуръяськыса улэм интые, милемлы Иеговаез куроно соослэсь сюлэмъёссэс усьтыны, соослэн но зэмлыкъя улэмзы мед потоз шуыса (Матф. 5:44, 45). Простить карыны секыт луэ, тужгес но ми пумиськимы ке туж шонерлыктэм ужен. Но вожпотон но йыркуръяськон сюлмамы каръяськизы ке, ми асьмелы ик урод каромы. Одӥг сузэр вера: «Адямиез простить кареме уг возьматы, мон солэсь шонертэм ужзэ умоен лыдъясько но ассэ монэн умойтэм возьыны лэзисько шуыса. Со возьматэ, мон йыркуръяськыса уг улӥськы шуыса» (Пс. 36:8). Адямиез простить карыса, ми ум лэзиське урод учыръёслы милемыз шумпотонтэк кельтыны (Еф. 4:31, 32).

5. Мар карыны Иисус кылзэ сётӥз йыруж лэсьтӥсьлы, кудзэ соин ӵош кортӵогазы, но малы?

⁵ Мар вераз Иисус? Иисусэн ӵош кортӵогазы йыруж лэсьтэм кык пиосмуртъёсты. Нырысь соос но Иисусэз урод кылъёсын куаретӥзы (Матф. 27:44). Но берлогес соос пӧлысь одӥгез ассэ мукет сямен возьыны кутскиз. Со валаз, Иисус «номыр но уродзэ ӧз лэсьты» шуыса (Лука 23:40, 41). Со сяна, со Иисуслы вераз: «Аслад Эксэйлыкад вуид ке, монэ буре вай» (Лука 23:42). Та кылъёсын со осконзэ возьматӥз, Иисус улӟоз но Эксэй луоз шуыса. Макем бадӟым оскон! Иисус солы вераз: «Зэм ик тыныд верасько туннэ: Монэн огазьын [эксэйлыкын ӧвӧл, нош] райын тон луод» (Лука 23:43, ВД). Висъялэ саклыктэс, Иисус вераз «тыныд верасько», «Монэн огазьын... тон луод». Озьыен, та кылсётон со адямилы гинэ верамын вал. Иисус тодӥз, макем гажась-жалясь солэн Атаез. Соин ик со вераз кылъёсты, кудъёсыз йыруж лэсьтӥсьлы вуоноезлы оскон сётӥзы (Пс. 102:8).

6. Малы дышето милемыз Иисуслэн кылъёсыз, кудъёссэ со вераз йыруж лэсьтӥсьлы?

⁶ Малы дышето милемыз Иисуслэн кылъёсыз? Иисуслэн Атаезлэн кадь сямъёсыз (Евр. 1:3). Иегова шумпотыса милемыз простить каре но милемлы гажан-жалянзэ возьматэ. Нош милемлы азьвыл лэсьтэм янгышъёсмы понна сюлмысь ӧпкелёно но осконо, Иисус Христослэн мозмытӥсь курбонэзлы луыса Инмар сьӧлыкъёсмес простить каре шуыса (1 Иоанн 1:7). Куд-огъёсызлы секыт оскыны, Иегова азьвыл лэсьтэм янгышъёссэс куке но простить кароз шуыса. Тӥляд но сыӵе ик шӧдонъёсты кылдыло ке, малпаське: самой кулон азяз ик Иисус гажан-жалянзэ возьматӥз йыруж лэсьтӥсьлы, кудӥз соку гинэ солы оскыны кутскиз. Нош табере малпаське, кызьы Иегова учке ужась-тыршисьёсыз шоры, кудъёсыз вань сюлмысьтызы тыршо солэн курон-косонъёсызъя улыны. Валамон, Иегова соосты эшшо но золгес гажа-жаля! (Пс. 50:3; 1 Иоанн 2:1, 2).

7. Иоаннлэсь 19:26, 27 лыдэ басьтыса, мар вераз Иисус Мариялы но Иоаннлы но малы?

⁷ Мар вераз Иисус? (Лыдӟе Иоаннлэсь 19:26, 27.) Иисус сюлмаськиз анаез сярысь, кудӥзлэн соку картэз кулэмын вал, дыр, ини. Иисуслэн вынъёсыз но сузэръёсыз быгатысалзы анайзылы улон понна ваньзэ  кулэзэ сётыны. Нош кин юрттысал Мариялы Инмарен умой кусыпъёс возьыны? Номыр уг возьматы, со дырлы Иисуслэн вынъёсыз солэн дышетскисьёсыз луизы ини шуыса. Нош Иоанн Иисуслэн оскымон апостолэз но одӥгез самой матысь эшез вал. Иисус понна ваньзы, кинъёс со сямен Иеговалы йыбыртъязы, солы духовной семья вал (Матф. 12:46—50). Соин ик Иисус Иоаннэз куриз анаез сярысь сюлмаськыны. Иисус яратӥз Марияез но сюлмаськиз со сярысь. Со тодӥз: Иоанн юрттоз Мариялы Инмарен умой кусыпъёс возьыны. Иисус анаезлы шуиз: «Тани Тынад пиед», нош Иоаннлы вераз: «Тани тынад Анаед!» Со дырысен Мария понна Иоанн аслаз вордэм пиез кадь  луиз, нош Иоанн Мария сярысь аслаз анаез сярысь кадь сюлмаськиз. Макем бадӟым яратонзэ Иисус возьматӥз та дуно кышномуртлы, кудӥз вордӥськем дырысеныз ик со сярысь яратыса сюлмаськиз, нош табере кулон дыръяз но соин ӵош вал!

8. Малы дышето тӥледыз Иисуслэн кылъёсыз, кудъёссэ со вераз Мариялы но Иоаннлы?

⁸ Малы дышето милемыз Иисуслэн кылъёсыз? Семьяенымы ӵошатыса, кенешысь вын-агайёсынымы но сузэр-апайёсынымы кусыпъёсмы юнгес луыны быгато. Ӵыжы-выжыосмы милемлы люкетыны быгато Иеговалы ужаны-тыршыны, озьы ик соос милемын вераськемысь но дугдыны быгато. Но кызьы вераз Иисус, милям Иеговаен но солэн организациеныз кусыпъёсмы юнэсь ке, кельтэммылэсь ми «сю пол тросгес» басьтомы. Тросэз милемлы луозы яратӥсь пиос, нылъёс, анайёс но атайёс (Марк 10:29, 30). Ваньмы ми пыриськомы духовной семья пӧлы, кудзэ огазея оскон но яратон — Иеговаез но ог-огмес яратон. Тае тодыса, кыӵе шӧдонъёсты тӥляд кылдо? (1 Пётр 2:17; Кол. 3:14).

9. Мае ми тодыны быгатӥськомы Иисуслэн кылъёсысьтыз, кудъёсыз гожтэмын Матфейлэсь 27:46?

⁹ Мар вераз Иисус? Самой кулон азяз ик Иисус кеськиз: «Инмаре! Инмаре! Малы Тон Монэ кельтӥд?» (Матф. 27:46). Библия уг валэкты, малы Иисус та кылъёсты вераз, но ойдолэ малпаськомы куд-ог мугъёс сярысь. Нырысетӥез, та кылъёсты вераса, Иисус быдэстӥз азьпалзэ ивортонэз, кудӥз гожтэмын Псалтирьын 21:2 b. Кыкетӥез, та кылъёс возьматӥзы, Иегова аслэсьтыз Пизэ кышкытлыклэсь ӧз утьы шуыса (Иов 1:10). Иисус валаз, малы Иегова сое тушмонъёсыз кие сётӥз: Иисус Инмарлы оскымон кыльыны кулэ вал туж бадӟым шуг-секытъёсын но, сыӵе шуг-секытъёсын, кудъёсыныз одӥг адями но ӧз пумиськылы. Куинетӥез, та кылъёс возьматӥзы, Иисус ӧз лэсьты нокыӵе ужез, кудӥз понна солы кулоно вал.

10. Малы дышето милемыз Иисуслэн кылъёсыз, кудъёссэ со Иеговалы вераз?

¹⁰ Малы дышето милемыз Иисуслэн кылъёсыз? Нырысетӥез, возьмано ӧвӧл, Иегова милемыз осконмес эскерись котькыӵе шуг-секытъёслэсь утёз шуыса. Иисус вань шуг-секытъёсты чидаз. Милемлы но дась луоно, Иеговалы оскымон кылён понна, улонмес ыштоно луиз ке (Матф. 16:24, 25). Но ми оскыны быгатӥськомы, Иегова уз лэзьы, ми чиданы луонтэм курадӟонъёсын мед пумиськомы шуыса (1 Кор. 10:13). Кыкетӥез, Иисус кадь ик, ми но шонерлыктэм ужъёсын пумиськыны быгатӥськомы (1 Пётр 2:19, 20). Урод ужъёс лэсьтэммы сэрен, тушмонъёсмы милемлы уг пумитъясько. Соос асьсэды озьы возё, малы ке шуоно ми та дуннелэн адямиосыз ум луиське но зэмлык сярысь вераськомы (Иоанн 17:14; 1 Пётр 4:15, 16). Иисус валаз, малы Иегова солэсь шуг-секытъёссэ ӧз быдты. Но Инмарлэн мукет ужась-тыршисьёсыз паймыны быгато, малы Иегова соослэн улонысьтызы шуг-секытъёссэс уг быдты (Авв. 1:3). Гажась-жалясь но чидась Инмармы уг малпа, та христианъёслэн осконзы ӧвӧл шуыса. Со вала, соослы буйгатон кулэ шуыса, кудзэ со гинэ сётыны быгатэ (2 Кор. 1:3, 4).

11. Малы Иисус вераз кылъёсты, кудъёсыз гожтэмын Иоаннлэсь 19:28?

¹¹ Мар вераз Иисус? (Лыдӟе Иоаннлэсь 19:28.) Малы Иисус шуиз: «Сюэ куасьме»?  Озьы со быдэстӥз азьпалзэ ивортонэз, кудӥз гожтэмын Псалтирьын 21:16: «Горшок чалеп кадь кужыме куасьмиз, кылы ньылон бордам лякиськиз». Со сяна, юбо борды кортӵогамзы бере туж зол курадӟыса, Иисуслэн юэмез потӥз, дыр. Сюзэ юзматон понна, солы юрттэт кулэ вал.

12. Малы дышетэ милемыз Иисуслэн куронэз: «Сюэ куасьме»?

¹² Малы дышето милемыз Иисуслэн кылъёсыз? Иисус ӧз возьдаськы юрттэт курыны, милемлы но возьдаськоно ӧвӧл. Ӵем дыръя милемлы мар ке но кулэ ке, ми сое асьмеос ик лэсьтӥськомы, мукетъёсызлэсь юрттэт курытэк. Но ми сое асьмеос лэсьтыны ум ке быгатӥське, милемлы юрттэт курыны возьдаськоно ӧвӧл. Кылсярысь, ми егитэсь ӧвӧл ни ке яке тазалыкмы ляб ке, кенешысь кыӵе ке вын-агаез яке сузэр-апаез курыны луоз, милемыз вузкаронние яке эмъясь доры нуыны. Нош ми маин ке сэрен ӝожомыса улӥськомы ке, тӧроез яке юн осконэн христиан муртэз курыны луоз, милемыз кылзыны яке юнматыны (Мад. 12:25). Ойдолэ ум вунэтэ: вын-агайёс но сузэр-апайёс милемыз ярато но, шуге-леке сюрыкумы, соослэн милемлы юрттэмзы потэ (Мад. 17:17). Соос уг быгато малпанъёсмес тодыны. Соос уг но тодо, дыр, милемлы юрттэт кулэ шуыса, ми со сярысь соосты ӧм куре ке.

13. Кыӵе пайда вайиз Иисуслэн кулытозяз ик оскымон кылемез?

¹³ Мар вераз Иисус? 14-тӥ нисанэ, куинь часын нуназе бере, Иисус кеськиз: «Быдэсмиз!» (Иоанн 19:30). Кулон азяз со тодӥз, быдэстӥз шуыса ваньзэ, мар сярысь сое Атаез куриз. Мае со быдэстӥз? Нырысетӥез, Иисус возьматӥз: Шайтан пӧяське, но, кызьы гинэ со медам тыршы, адями быгатэ Инмарлы оскымон кыльыны. Кыкетӥез, Иисус аслэсьтыз улонзэ курбонлы сётӥз. Солы луыса тырбыдэстэм адямиослэн луонлыксы кылдӥз, Инмарлэн син азяз шонерлыкоесь луыны но пырак улонлы оскон басьтыны. Куинетӥез, Иисус возьматӥз, Инмарлэн кивалтэтэз шонерлыко шуыса. Озьы ик со Атаезлэсь нимзэ данъяз.

14. Кыӵе мылкыдын котькуд нунал улоно? Валэктэ.

¹⁴ Малы дышето милемыз Иисуслэн кылъёсыз? Милемлы вань кужмысьтымы тыршоно котькуд нунал Инмарлы оскымон луыны. Малпаське, мар вераз Максвелл Френд агай, кудӥз Галаад школаын дышетӥсь вал. Тани мар со вераз оскымон луон сярысь, калыккуспо конгрессын речь веракуз: «Эн кельтэ ӵуказелы сое, мае лэсьтыны яке вераны тӥ быгатӥськоды туннэ. Тодӥськоды-а тӥ, ӵуказе луоз шуыса? Котькуд нунал шоры учке берпуметӥ луонлык шоры кадь Иеговалы возьматыны, тӥ пырак улыны ярамонэсь луиськоды шуыса». Зэм но, котькуд нунал шоры учке берпуметӥ луонлык шоры кадь Иеговалы оскымон луондэс возьматыны. Соку кулоно ке но луиз, ми быгатомы вераны: «Иегова, мон лэсьтӥ ваньзэ, тыныд оскымон кылён понна, Шайтан пӧяське шуыса возьматон понна, тынэсьтыд ӟеч нимдэ утён понна но кивалтэтэд шонерлыко луэ шуыса возьматон понна».

15. Малы быдэсак оскиз Иисус, Лукалэсь 23:46 лыдэ басьтыса?

¹⁵ Мар вераз Иисус? (Лыдӟе Лукалэсь 23:46.) Иисус тодӥз, азьпал улонэз Иегова киын шуыса. Со быдэсак оскиз: Атаез сое уз вунэты. Соин ик со юн осконэн вераз: «Атай! Тынад кияд Аслэсьтым лулме сётӥсько».

16. Малы тӥледыз дышетэ 15 аресъем Джошуа агайлэн учырез?

 ¹⁶ Малы дышето милемыз Иисуслэн кылъёсыз? Асьтэлэсь улондэс дась луыса Иегова кие сётэ. Со понна тӥледлы вань сюлмысьтыды Иегова вылэ оскиськоно (Мад. 3:5). Эскеромы Джошуа нимо Иеговалэн Адӟись-Ивортӥсезлэсь учырзэ. 15 арес дыръяз со эмъяны луонтэм висёнэзлэсь кулӥз. Со соглаш ӧз кариськы эмъяськыны сыӵе амалъёсын, кудъёсыз Инмарлэн катэзлы пумит мынӥзы. Кулон азяз со анаезлы вераз: «Мон Иегова киын. [...] ...Анае, мон оскисько, Иегова монэ одно ик улӟытоз. Со тодэ ваньзэ, мар мынам сюлмам, тодэ, мон сое туж юн яратӥсько шуыса» c. Ми пӧлысь котькудӥзлы аслэсьтыз юано: «Мар мон каро, мыным быръёно луиз ке: улонме утьыны яке Иеговалы оскымон кыльыны? Сёто-а мон аслэсьтым улонме Инмар кие но оско-а, со монэ уз вунэты шуыса?»

17, 18. Малы дышето милемыз Иисуслэн берпуметӥ кылъёсыз? (Учке « Малы дышето милемыз Иисуслэн берпуметӥ кылъёсыз?» рамкаез.)

¹⁷ Макем трос малпанъёсты шедьтыны луэ, Иисуслэн берпуметӥ кылъёсыз вылын малпаськыса! Та кылъёс возьмато, макем кулэ милемлы мукетъёсты простить карыны но оскыны, Иегова милемыз простить каре шуыса. Соос тодамы вайыто: милям вань туж умой духовной семьямы, кудаз вын-агайёсмы но сузэр-апайёсмы милемлы юрттыны дась. Та кылъёс оскыто милемыз: Иегова юрттоз милемлы котькыӵе шуг-секыт пыр потыны. Со сяна, соос мылкыдмес ӝуто котькуд нунал шоры учкыны берпуметӥ луонлык шоры кадь Иеговалы оскымон луонмес возьматыны. Озьы ик соос юртто тодамы возьыны, милям улонмы Иеговалэн оскымон киосаз шуыса.

¹⁸ Зэм, кылъёс, кудъёссэ Иисус вераз юбо вылын курадӟыса кулон азяз, ми понна туж кулэ луо! Ойдолэ соосты тодамы возёмы но тодэммес улонамы пыртомы. Озьы ми Иеговалы возьматомы, солэн Пиезлэсь кылзӥськиськомы шуыса (Матф. 17:5).