1, 2. Кыӵе пример валаны юрттэ сое, мар гожтэмын 1 Пётрлэн 2:21?

 ПУКТЭ син азяды: тӥ эшъёсыныды походэ мынӥды. Тӥ мынӥськоды сьӧд тэль пыр. Отын трос лымы. Азяды мынэ адями, кудӥз сюресэз умой тодэ. Со тӥ азьын мынэ но ас бӧрсяз лымы вылын пытьы кельтэ. Кыӵе ке дыре тӥ валаськоды, со адямиез уд адӟиське ини шуыса. Но тӥ эшъёсыныды уд сюлмаськиське, малы ке шуоно лымы вылысь солэсь пытьызэ адӟиськоды но со кузя мыныны тыршиськоды.

² Зэмос христианъёс луыса, вераны луоз: ми но мынӥськомы шимес, кышкыт тэль пыр, та лек дунне пыр. Шумпотыса вераны луэ, Иеговалы луыса милям вань тужгес но умой сюрес возьматӥсьмы — солэн Пиез, Иисус Христос. 1 Пётрлэн 2:21 гожтэмын, милемлы солэн пытьы кузяз мыноно шуыса. Библиез эскеронъя одӥг справочникын валэктӥське, та кылбурын Пётр Иисусэз сюрес возьматӥсен ӵошатэ шуыса. Сюрес возьматӥсь сямен ик, Иисус ас бӧрсяз пытьы кельтӥз, кудӥз кузя милемлы мыныны кулэ. Соин ик ойдолэ эскеромы куинь юанъёсты: мае возьматэ Иисуслэн пытьы кузяз мынон, малы милемлы со кузя мыноно но кызьы сое лэсьтоно?

3. Мае возьматэ «кинлэн ке пытьы кузяз мыныны» шуыса верам?

³ Мае возьматэ «кинлэн ке пытьы кузяз мыныны» шуыса верам? Библиын «ветлыны» но «вамышъяны» кылъёс верало адямилэн улон сюресэз сярысь (Ул.-выл. 6:9; Пс. 118:59). Адямилэсь ужъёссэ ӵошатыны луэ пытьыосын, кудъёссэ со  ас бӧрсяз кельтэ. Кинлэн ке пытьы кузяз мынон возьматэ кинлэсь ке адӟем каремез.

4. Мае возьматэ Иисуслэн пытьы кузяз мынон?

⁴ Соку мае возьматэ Иисуслэн пытьы кузяз мынон? Шонерак вераса, со возьматэ Иисуслэсь адӟем каремез. Та статьялы валтӥсь кылбурын апостол Пётр пусъе: ми быгатӥськомы адӟем карыны Иисуслэсь, кудӥз шуг-секытъёс дыръя но юн кылиз. Но ми быгатӥськомы Иисуслэсь адӟем карыны мукет удысъёсын но (1 Пётр 2:18—25). Зэмзэ вераса, Иисуслэн быдэс улонэз, кылъёсыз но ужъёсыз адӟем карымон луо.

5. Быгато-а тырбыдэстэм адямиос быдэсак Иисус кадь луыны? Валэктэ.

⁵ Быгатӥськомы-а ми, тырбыдэстэм адямиос, Иисуслэсь адӟем карыны? Быгатӥськомы. Зэм но, быдэсак Иисус кадь луыны ми ум быгатӥське. Но ми тыршиськомы ке лэсьтыны ваньзэ, мае быгатӥськомы, Иисуслэн пытьы кузяз мынон понна, ми уломы озьы, «кызьы Иисус Христос улӥз» (1 Иоанн 2:6).

6, 7. Малы вераны луоз, Иисуслэн пытьы кузяз мыныса, ми Иеговалы матэгес луиськомы шуыса?

⁶ Иисуслэн пытьы кузяз мыныса, ми Иеговалы матэгес луиськомы. Малы озьы вераны луоз? Нырысетӥез, Иисус возьматӥз, кызьы улоно, Инмарез шумпоттон понна (Иоанн 8:29). Соин ик, Иисуслэн пытьы кузяз мыныса, ми Иеговалэсь сюлэмзэ шумпоттӥськомы. Озьы ик ми оскыны быгатӥськомы, инмысь Атаенымы вань сюлмысьтымы эшъяськыны тыршимы ке, со милемлы эшшо но матынгес луоз шуыса (Иак. 4:8).

⁷ Кыкетӥез, Иисус быдэсак адӟем кариз Атаезлэсь. Тӥни малы со вераз: «Монэ адӟись мурт Атаез адӟиз» (Иоанн 14:9). Ми быгатӥськомы адӟем карыны Иисуслэсь сямъёссэ но сое, кызьы со ассэ адямиосын возиз. Кылсярысь, со жаляз гижлочерен висись адямиез, секыт висёнэн курадӟись кышномуртэз но соосты, кинъёс матысь  адямиоссэс ыштӥзы. Иисуслэсь адӟем карыса, ми Иеговалэсь адӟем кариськомы (Марк 1:40, 41; 5:25—34; Иоанн 11:33—35). Нош макем золгес ми тыршомы Иеговалэсь сямъёссэ адӟем карыны, сокем юнгес милям соин кусыпъёсмы луозы.

8. Малы, Иисуслэн пытьы кузяз мыныса, ми дуннеез вормыны быгатомы?

⁸ Иисуслэн пытьы кузяз мыныса, ми саклыкмес ум висъялэ солы, мае ӵектэ та дунне. Музъем вылын улонэзлэн берпуметӥ ӝытаз Иисус вераз: «Мон дуннеез ворми» (Иоанн 16:33). Мар сярысь со вераз? Иисус ӧз лэзьы, та дуннеысь адямиослэн ужпумъёссы, малпаськон амалзы но ужъёссы со вылын мед шӧдӥськозы шуыса. Иисус ноку ӧз вунэты, малы со музъем вылэ лыктӥз. Солы Инмарлэсь нимзэ чылкытатыны кулэ вал. Нош мар вераны луоз ми сярысь? Та дунне ӵектэ трос мае ке, мар милемлы люкетыны быгатэ Инмарлы ужаны-тыршыны. Но ми, Иисус кадь ик, нырысь ик Иеговалэсь эриксэ быдэсъяны тыршиськомы ке, ми но быгатомы дуннеез вормыны (1 Иоанн 5:5).

9. Мар милемлы кароно, азьланяз но пырак улонэ нуись сюрес вылтӥ мынон понна?

⁹ Иисуслэн пытьы кузяз мыныса, ми пырак уломы. Куке одӥг егит узыр пиосмурт Иисуслэсь юаз, мар кароно, пырак улон понна, Иисус шуиз: «Лыкты но Мон сьӧры мын» (Матф. 19:16—21). Куд-ог иудейёслы, кудъёсыз ӧз оске, Иисус — со Христос шуыса, со вераз: «[Мынам ыжъёсы] Мон сьӧры мыно. Мон соослы быронтэм улон сётӥсько» (Иоанн 10:24—29). Нош Никодимлы, кудӥз Сӥнедрионэ пыре вал но кудӥзлы Иисуслэн дышетонъёсыз тунсыко потӥзы, Иисус вераз, котькудӥз но, кин Инмарлэн Пиезлы оске, пырак улоз шуыса (Иоанн 3:16). Ми Иисуслы осконмес возьматӥськомы, солэн дышетонъёсызъя улӥськомы ке но солэсь адӟем кариськомы ке. Соку ми азьланяз но мыномы сюрес вылтӥ, кудӥз пырак улонэ нуэ (Матф. 7:14).

10. Мар кароно, Иисус сярысь тодон-валан басьтон понна, Иоаннлэсь 17:3 лыдэ басьтыса?

¹⁰ Иисуслэн пытьы кузяз мынон понна, милемлы нырысь ик со сярысь тодон-валан басьтоно. (Лыдӟе Иоаннлэсь 17:3.) Иисус сярысь тодон-валан басьтыны ялан кулэ. Со понна милемлы соин умойгес но умойгес тодматсконо, тодоно солэн сямъёсыз, малпаськон амалэз но курон-косонъёсыз сярысь. Ми зэмлыкын кӧня дыр ӵоже гинэ медам луэ, милемлы азьланяз но Иегова сярысь но солэн Пиез сярысь тодон-валан басьтоно.

11. Мар сярысь вераське ньыль Евангелиосын?

¹¹ Иеговалэн потэ, ми солэсь Пизэ умой мед тодомы шуыса. Соин ик Библиын гожтэмын  ньыль Евангелиос. Отын вераське Иисуслэн улонэз но ужан-тыршонэз сярысь. Отысь тодыны луэ Иисуслэн дышетонъёсыз, ужъёсыз но шӧдонъёсыз сярысь. Та ньыль книгаос юртто милемлы мур малпаськыны со сярысь, кыӵе адӟем карон кельтӥз милемлы Иисус Христос (Евр. 12:3). Солы луыса вераны луоз: ми адӟиськомы Иисуслэсь пытьызэ, кудзэ со ас бӧрсяз кельтӥз. Евангелиосты эскерыса, ми быгатӥськомы Иисусэз умойгес тодыны. Нош со юрттоз милемлы солэн пытьы кузяз мыныны.

12. Мар кароно, Евангелиос милемлы эшшо но тросгес пайда мед ваёзы шуыса?

¹² Евангелиос милемлы тросгес пайда мед ваёзы шуыса, соосты лыдӟыны гинэ тырмыт ӧвӧл. Дыр висъяно, соосты сак эскерон понна но соос вылын мур малпаськон понна. (Ӵошатэ Иисус Навинлэсь 1:8.) Ойдолэ эскеромы кык визь-кенешъёсты, кудъёсыз юрттозы милемлы Евангелиос вылын малпаськыны но басьтэм тодон-валанмес улонамы пыртыны.

13. Мар юрттоз син азямы яркыт пуктыны сое, мар сярысь вераське Евангелиосын?

¹³ Нырысетӥез, син азяды яркыт пуктэ сое, мар сярысь вераське Евангелиосын. Тырше адӟыны, кылыны но шӧдыны, мар сярысь вераське кыӵе ке учырын. Тӥледлы юрттоз публикациосты эскерон, кудъёссэ поттэ Иеговалэн организациез. Саклыктэс висъялэ солы, кыӵе югдур вал со учырлэсь азьло, нош мар вал со бере. Тырше тросгес тодыны адямиос яке инты сярысь, кудъёсыз сярысь вераське та учырын. Учке, мар вераське та учыр сярысь мукет Евангелиосын. Куддыръя одӥг Евангелиын гожтэмын тунсыко малпанъёс, кудъёсыз мукет Евангелиын гожтэмын ӧвӧл.

14, 15. Мар юрттоз милемлы улонамы пыртыны сое, мае тодӥмы Евангелиосысь?

¹⁴ Кыкетӥез, улонады пыртэ сое, мае тӥ тодӥды Евангелиосысь Иисус сярысь (Иоанн 13:17). Евангелиосысь кыӵе ке люкетэз сак эскеремды бере юалэ асьтэлэсь: «Малы дышето монэ лыдӟем кылбуръёс? Быгатӥсько-а  мон сое ас улонам пыртыны? Быгатӥсько-а мон кинлы ке юрттыны, та кылбуръёсысь малпанъёсты уже кутыса?» Тырше малпаськыны кыӵе ке адями сярысь. Собере тупась дыре но лякытэн вералэ та адямилы сое, мае тӥ тодӥды.

¹⁵ Нош табере малпаськомы куанер палкышнолэн учырез сярысь, кудзэ Иисус храмын адӟиз. Та пример вылын ойдолэ эскеромы, кызьы та кык визь-кенешъёсты улонамы пыртоно.

16. Кыӵе учыр сярысь вераське Марклэсь 12:41?

¹⁶ Евангелиысь учырез син азяды яркыт пуктэ. (Лыдӟе Марклэсь 12:41.) Пуктэ син азяды, мар луиз асьме вакытысь 33-тӥ арын 11-тӥ нисанэ. Иисус кулытозь арнялэсь но ӧжытгес кылемын. Иисус лумбыт адямиосты храмын дышетэ. Религиозной кивалтӥсьёслы со туж уг кельшы. Солэсь азьлогес куд-огъёсыз, Иисуслэн ужан-тыршонэз сярысь вераса, солэсь юазы: «Кыӵе кужымен Тон тае лэсьтӥськод?» (Марк 11:27—33; 12:13—34). Мукетъёсыз, солэсь визьзэ сынаны турттыса, солы секыт юанъёс сётъязы. Собере Иисус мынэ храмлэн мукет люкетаз, нылкышноослэн азбаразы, вылды. Со пуксе но учке, кызьы адямиос ваньбур тырон шыкысъёсы коньдон тыро. Иисус адӟе, кызьы узыр адямиос трос коньдонзэс ваё. Озьы ик со кылэ, дыр, кызьы коньдон жингыртыса ик шыкыслэн пыдэсаз усе.

17. Мар лэсьтӥз куанер палкышно, кудӥз сярысь вераське Марклэсь 12:42?

¹⁷ Лыдӟе Марклэсь 12:42. Кӧня ке дыр ортчыса, Иисус адӟе «куанер улӥсь палкышноез» (Лука 21:2). Та кышномуртлэн улонэз капчи ӧвӧл, дыр. Улыны коньдонзэ со мырдэм тырмытэ ке но, со мынэ одӥгез шыкыс доры но отчы кык векчи коньдон понэ. Нокин уг кылы, дыр, кызьы солэн коньдонэз шыкысэ усе. Иисус тодэ, со кык лепта понӥз шуыса. Со вал тужгес но векчи коньдон. Та коньдон ӧй тырмысал одӥг ӟольгыриез гинэ но басьтыны, нош со вал тужгес но дунтэм тылобурдо, кудзэ сиыны басьтылӥзы.

18. Мар вераз Иисус палкышнолэн сётэм коньдонэз сярысь, Марклэсь 12:43, 44 лыдэ басьтыса?

¹⁸ Лыдӟе Марклэсь 12:43, 44. Та учыр Иисуслэн сюлмаз ик пыриз. Со дышетскисьёссэ ӧте но, палкышно шоры возьматыса, соослы вера: «Та куанер палкышно ваньбур тырон шыкысэ тырисьёс пӧлысь ваньмызлэсь уно понӥз». Собере Иисус валэктэ: «Уго ваньмыз [тужгес но узыръёс] мултэсэз ваньысь тыризы, нош со куанер улыса но, кӧтсэ тырон понна маиз вань — ваньзэ понӥз». Куке та оскымон кышномурт кылем коньдонзэ ваньбур тырон шыкысэ понӥз, со быдэсак оскиськиз гажась-жалясь Иегова вылэ (Пс. 25:3).

19. Кыӵе кулэ луись зэмлыклы дышетэ милемыз со, мар Иисус вераз куанер палкышно сярысь?

¹⁹ Улонэ пыртэ сое, мае тодӥды. Юалэ асьтэлэсь: «Малы дышетэ монэ со, мар Иисус вераз куанер палкышно сярысь?» Малпаське та кышномурт сярысь. Зэм но, со шумпотысал Иеговалы тросгес сётыны, но со лэсьтӥз ваньзэ, мае быгатӥз,— сётӥз самой умойзэ, маиз солэн вал. Иисус тодӥз, палкышнолэн сётэм коньдонэз Иеговалы туж дуно вал шуыса. Та дышетэ милемыз одӥг кулэ луись зэмлыклы: Иегова шумпотэ, куке ми самой умойзэ сётӥськомы, яке солы лулысь-сюлмысь ужаськомы-тыршиськомы (Матф. 22:37; Кол. 3:23). Со герӟаськемын соин, кӧня дыр но кужым ми висъяськомы Иеговалы йыбыртъян понна, кытчы озьы ик пыре тодытон ужмы но кенешлэн пумиськонъёсаз ветлэммы.

20. Кызьы улонэ пыртоно сое, мае тӥ тодӥды куанер палкышнолэн учырысьтыз? Вералэ пример.

 ²⁰ Кызьы улонэ пыртоно сое, мае тӥ тодӥды куанер палкышнолэн учырысьтыз? Малпаське кыӵе ке адями сярысь, кудзэ оскытыны кулэ, Иегова оскымон луыны тыршемзэ дунъя шуыса. Оло нош, тӥ тодӥськоды арлыдо сузэрез, кудӥз аслаз урод тазалыкеныз сэрен ужан-тыршонын азьвыл мында лэсьтыны уг быгаты ини. Со ассэ янгышен но кулэтэмен шӧдэ, вылды. Оло нош, тӥ тодӥськоды агаез, кудӥз ялан кыстӥськись висёнэзлэсь курадӟе. Солэн мылкыдыз куашкамын, дыр, малы ке шуоно Эксэйлык юртын ортчись котькуд пумиськонэ со лыктыны уг быгаты. Юнматэ сыӵе агаез яке сузэрез. Вералэ соослы мае ке ӟечсэ, «юнматӥсь-дышетӥсь кылъёс» (Еф. 4:29). Вералэ соослы сое, мае тӥ тодӥды куанер палкышнолэн учырысьтыз. Тӥляд юнматӥсь кылъёсты оскытозы соосты, Иегова шумпотэ шуыса, куке ми солы сётӥськомы самой умойзэ, мармы милям вань (Мад. 15:23; 1 Фес. 5:11). Куке тӥ мукетъёссэ ушъяськоды, соос Иеговалы самой умойзэ сёто шуыса, со туж ӧжыт потыны быгатэ ке но, тӥ Иисуслэн пытьы кузяз мынӥськоды.

21. Мар карыны мылкыддэс ӝутӥз та статья?

²¹ Ми туж тау кариськомы, Евангелиосысь Иисус Христослэн улонэз сярысь пыр-почгес тодыны луэ шуыса. Та тодон-валанъёс юртто милемлы солэсь адӟем карыны, солэн пытьы кузяз мыныны. Умой луысал ас поннамы эскерон дыръя яке семьяенымы йыбырттон дыръя Библиысь та книгаосты эскерыны. Ойдолэ тодамы возёмы: сыӵе эскерон тросгес пайда мед ваёз шуыса, Евангелиосысь учыръёсты син азямы яркыт пуктоно но улонэ пыртоно сое, мае тодӥмы. Но Иисуслэсь ужъёссэ адӟем карем сяна, солэн кылъёсызлы но сак луоно. Вуонояз статьяын ми эскеромы, мар вераз Иисус кулон азяз но малы милемыз дышетыны быгато солэн кылъёсыз.