1. Мае возьма милесьтым Иегова?

 АНАЙ но атай туж шумпото, куке соослэн пиналзы вордӥське. Нунызы соослы туж мусо потэ ке но, соослэн уг поты, со котьку но пичи мед луоз шуыса. Нылпизы ӧз буды ке, соос сюлмаськыны кутскозы. Ӵапак озьы ик Иегова но туж шумпотэ, куке ми христиан сюрес вылэ султӥськомы. Но солэн уг поты, ми котьку но вож нуныос кадесь мед луомы шуыса. Со возьма, ми быдэ вуэмъёс кадесь луомы шуыса (1 Кор. 3:1; 14:20).

2. Мае ми эскеромы та статьяын?

² Кызьы тодманы луэ быдэ вуэм христианъёсты? Мар кароно, быдэ вуэм христианъёс луон понна? Кызьы чурыт сиён юрттэ быдэ вуыны? Но малы уг яра ас выламы оскиськыны? Ойдолэ эскеромы та юанъёсты.

КЫЗЬЫ ТОДМАНО БЫДЭ ВУЭМ ХРИСТИАНЪЁСТЫ?

3. Мар кароно, быдэ вуэм христианъёс луон понна?

³ Грек кыл, кудӥз Библиын берыктӥське «быдэ вуэмъёс» шуыса, вера мае ке пумозяз вуттон сярысь (1 Кор. 2:6). Быдэ вуэм христианъёс луон понна, милемлы Иеговаен кусыпъёсмес юнматоно. Быдэ вуэммы бере но милемлы одӥг интыямы сылоно ӧвӧл, азьланяз но тыршоно Иеговаен кусыпъёсмес юнматыны (1 Тим. 4:15). Быдэ вуэм христианъёс луыны егитъёс но быгато. Кызьы тодмано сыӵе адямиосты?

4. Кызьы тодманы луэ быдэ вуэм христианъёсты?

⁴ Быдэ вуэм христианъёс Инмарлэсь вань законъёссэ ярато. Соос уг быръё, кудъёсызлэсь соос кылзӥськозы, нош кудъёсызлэсь — уз. Со дыре ик соос азьло сямен ик сьӧлыко адямиос луо но янгышъёс лэсьтыло. Озьы ке но  соос котькуд нунал тыршо малпанъёсынызы но ужъёсынызы Инмарез шумпоттыны. Соос выль адями луизы но Инмар сямен малпаськыны тыршо (Еф. 4:22—24). Ужпумъёс кутыкуз, сыӵе адями Иеговалэсь законъёссэ но возетъёссэ лыдэ басьтэ, соин ик солы трос курон-косонъёс кулэ ӧвӧл. Куддыръя капчи ӧвӧл ке но, со кутскем ужзэ пумозяз вуттэ (1 Кор. 9:26, 27).

5.Кызьы тодманы луэ быдэ вуымтэ христианъёсты? (Ефесъёслы 4:14, 15).

⁵ Быдэ вуымтэ христианъёсты туж капчи пӧяны. Соос оско зэмос луисьтэм иворъёслы, кыл вӧлдонъёслы но зэмос йыбырттонлэсь палэнскемъёслэн верамъёссылы a. (Лыдӟе Ефесъёслы 4:14, 15.) Соос вожъясько, споръясько, кӧтсэс ӝож каро, соослы визь сынаськонъёс дыръя оскымон кыльыны секыт (1 Кор. 3:3).

6. Маин кельше христианъёслэн быдэ вуэмзы но нылпиослэн будэмзы? (Озьы ик учке суредэз.)

⁶ Кызьы вераськиз ини, Библия христианъёслэсь быдэ вуэмзэс ӵошатэ нылпилэн будэменыз. Нылпи троссэ уг вала на, соин ик анай-атаез сое утё но верало, мар солы карыны кулэ. Кылсярысь, сюрес вамен потыкузы, анай пичи нылзэ китӥз кутэ. Бадӟымгес будэмез бере анаез сое огназ лэзе но тодаз вайытэ, сюрес вылын сак луоно шуыса. Быдэ вуэмез бере нылыз ачиз вала ини, сюрес вамен потакуз, чакласькыны кулэ шуыса. Быдэ вуымтэ христианъёс нылпиослы кельшо. Кышкытлыкъёслэсь палэнскон понна но шонер ужпумъёс кутон понна, ӵем дыръя соослы быдэ вуэм христианъёслэн юрттэтсы кулэ. Нош быдэ вуэм христианъёс асьсэос шонер ужпумъёс кутыны быгато, малы ке шуоно нырысь ик соос Библиысь возетъёс вылын малпасько но валаны тыршо, мар Иегова малпа со пумысен.

7. Кулэ-а быдэ вуэм христианъёслы мукетъёсызлэн юрттэтсы?

⁷ Возьматэ-а та, быдэ вуэм христианъёслы юрттэт воксё кулэ ӧвӧл шуыса? Уг, уг возьматы. Соос но визь-кенеш курыны быгато. Но сыӵе адями уг возьма,  мукетъёсыз солы вералозы, мар карыны кулэ, яке со интые ужпум кутозы шуыса. Со вала, солы аслыз ужпум кутоно но со «аслаз улонысьтыз секытлыкъёсты ачиз нуыны кулэ» шуыса (Гал. 6:5).

8. Кулэ-а быдэ вуэм христианъёс одӥг кадесь луыны? Валэктэ.

⁸ Быдэ вуэм муртъёс одӥг тусъем уг луо. Ӵапак озьы ик быдэ вуэм христианъёс пӧртэм сямоесь луо. Кин ке но визьлыко, кин ке но кышкасьтэм. Кин ке но шырыт сямо, нош кин ке но гажась-жалясь. Со сяна, одӥг выллем учырын кык быдэ вуэм христианъёс пӧртэм ужпумъёс кутыны быгато, но кыкез ик ужпумъёс Библияя шонер луыны быгато. Ӵем дыръя таӵе югдур кылдэ, куке ужпум кутоно сыӵе юанъёсын, кудъёсыз возьытлыкен герӟаськемын. Тае валамы ке, ми ум судъялэ соосты, кинъёс милесьтым пӧртэм ужпум кутӥзы. Со интые ми саклыкмес висъяломы солы, мар милемыз огазея (Рим. 14:10; 1 Кор. 1:10).

МАР КАРОНО, БЫДЭ ВУЭМ ХРИСТИАНЪЁС ЛУОН ПОННА?

9. Быгатӥськомы-а ми, номыр карытэк, быдэ вуэм христианъёс луыны? Валэктэ.

⁹ Нылпи ас понназ будэ. Нош быдэ вуэм христианъёс луон понна, тыршыны кулэ. Кылсярысь, Коринфын улӥсьёс ӟеч иворез кылзӥзы, пылатӥськизы но святой духез басьтӥзы. Со сяна, соосты ачиз апостол Павел дышетӥз (Ап. уж. 18:8—11). Озьы ке но, пылатӥськемзы бере кӧня ке ар ортчыса но, соос пӧлысь тросэз быдэ вуэм христианъёс ӧй вал на (1 Кор. 3:2). Соос асьсэос асьсэлы люкетӥзы. Мар кароно, ми но соос кадь медам янгышалэ шуыса?

10. Мар нырысь ик кулэ, быдэ вуэм христианъёс луон понна? (Иуда 20).

¹⁰ Быдэ вуэм христианъёс луон понна, нырысь ик мылкыд луыны кулэ. Нош соос, кинъёслэн тодон-валан басьтэмзы но воштӥськемзы уг поты, быдэ вуэм христианъёс ноку уз луэ (Мад. 1:22). Милям уг поты луэммы адями кадь, кудӥз быдэ вуэм бераз но возьма, анай-атаез со интые ужпумъёс кутылозы шуыса. Милям асьмелэн тыршеммы потэ Иеговаен кусыпъёсмес юнматыны. (Лыдӟе Иудалэсь 20.) Ми валамы ке, мае ке умоятыны кулэ на шуыса, ойдолэ вӧсяськомы, кулэ луись воштӥськонъёс лэсьтыны Иегова милемлы мылкыд но, кужым но мед сётоз шуыса (Флп. 2:13).

11. Кызьы Иегова милемлы юрттэ быдэ вуэм христианъёс луыны? (Ефесъёслы 4:11—13).

¹¹ Иегова уг возьма, ми ас поннамы быдэ вуэм христианъёс луомы шуыса. Со сюлмаськиз, христиан кенешын возьмасьёс но дышетӥсьёс мед луозы шуыса. Та агайёс милемлы юртто Христос кадь быдэ вуыны. (Лыдӟе Ефесъёслы 4:11—13.) Озьы ик Иегова сётӥз милемлы святой духсэ, милям «Христослэн визьмыз» мед луоз шуыса (1 Кор. 2:14—16). Со сяна, милям вань ньыль Евангелиосмы, кудъёсыз возьмато, кызьы малпаськиз, мар вераз но кызьы ассэ возиз Иисус, музъем вылын улыкуз. Солэсь адӟем карыса, ми быгатомы быдэ вуэм христианъёс луыны.

КЫЗЬЫ ЧУРЫТ СИЁН БЫДЭ ВУЭМ ХРИСТИАНЪЁС ЛУЫНЫ ЮРТТЭ?

12. Мар со сыӵе «Христослэн дышетонэзлэн кутсконэз»?

¹² Быдэ вуэм христианъёс луон понна, «Христослэн дышетонэзлэн кутсконэз» сярысь, яке Библиысь валтӥсь дышетонъёс  сярысь, гинэ тодыны тырмыт ӧвӧл. Кылсярысь, соос пӧлы пыро ӧпкелён, оскон, пылатӥськон но улӟытон сярысь дышетонъёс (Евр. 6:1, 2). Та валтӥсь дышетонъёслы вань христианъёс оско. Тӥни малы апостол Павел соос сярысь вераз, Витьтонэтӥ нуналэ тодытыкуз (Ап. уж. 2:32—35, 38). Христослэн дышетскисез луон понна, та валтӥсь дышетонъёслы оскыны кулэ. Кылсярысь, Павел валэктӥз, улӟытонлы оскытэк, ми зэмос христианъёс луыны ум быгатэ шуыса (1 Кор. 15:12—14). Но валтӥсь дышетонъёсты гинэ тодыны тырмыт ӧвӧл.

13. Мар кароно, чурыт сиён, кудӥз сярысь вераське Еврейёслы 5:14, милемлы пайда мед ваёз шуыса? (Озьы ик учке суредэз.)

¹³ Валтӥсь дышетонъёсын ӵошатоно ке, чурыт сиён пӧлы Иеговалэн законъёсыз гинэ уг пыро. Со пӧлы пыро возетъёс но, кудъёсыз юртто милемлы умойгес валаны, кызьы малпаське Иегова. Сыӵе сиён милемлы пайда мед ваёз шуыса, Библиез эскероно, со вылын малпаськоно но тодэммес улонамы пыртоно. Соку ми быгатомы кутыны сыӵе ужпумъёс, кудъёсыз Иеговаез шумпоттозы b. (Лыдӟе Еврейёслы 5:14.)

14. Кызьы Павел Коринфын улӥсьёслы юрттӥз быдэ вуэм христианъёс луыны?

¹⁴ Быдэ вуымтэ христианъёслы секыт луэ ужпум кутыны, куке соослэн учырзылы нокыӵе закон уг тупа но соослы возетъёсты лыдэ басьтыны кулэ. Куд-огъёсыз малпало, соку мар каремед потэ, карыны луэ шуыса. Нош мукетъёсызлэн потэ, курон-косон мед луоз шуыса, со кулэ ӧвӧл ке но. Огпол Коринфысь христианъёс Павеллэсь юазы, яра-а сульдэръёслы-идолъёслы сётэм сиёнэз сиыны. Соослэн потэ вал, дыр, Павел соослы кыӵе ке курон-косон мед сётоз шуыса. Со интые Павел тодазы вайытӥз возьытлык сярысь но бырйыны луонлык сярысь. Озьы ик со тодазы вайытӥз Библиысь куд-ог возетъёсты. Та возетъёс соослы юрттысалзы кутыны сыӵе ужпумъёс, кудъёсызлы луыса асьсэлэн но, мукетъёсызлэн  но возьытлыксы чылкыт луысал (1 Кор. 8:4, 7—9). Павеллэн уг поты вал, соос, адямиослэсь яке курон-косонъёслэсь кылзӥськыса, ужпум мед кутозы шуыса. Солэн потэ вал, соос, Инмарлэн Кылыз вылэ пыкиськыса, ужпум мед кутозы шуыса. Озьы соос быдэ вуэм христианъёс луысалзы.

15. Кызьы Павел еврейёс пӧлысь христианъёслы юрттӥз Иеговаен кусыпъёссэс юнматыны?

¹⁵ Павеллэн еврейёс пӧлысь христианъёслы гожтэтэз но милемыз малы ке дышетыны быгатэ. Куд-огъёсыз Иеговаен кусыпъёссэс юнматэмысь дугдӥзы, соин ик соослы, чурыт сиён интые, нош ик йӧл кулэ луиз (Евр. 5:12). Иегова кенеш пыр выль зэмлыкъёсты усьтылӥз, нош соос та зэмлыкъёс сярысь тодыны но соосъя улыны ӧз тырше (Мад. 4:18). Кылсярысь, тросэз еврейёс азьвыл сямен ик Моисейлэн законэзъя уло вал, нош Иисус Христос кулэм бере но Моисейлэсь законзэ воштэм бере 30 ар ортчемын вал ини (Рим. 10:4; Тит. 1:10). Соглаш луоды, дыр, 30 ар куспын вылезлы дышыны луэ вал! Соин ик Павеллэн агайёсызлы но сузэръёсызлы юрттэмез потэ вал мур зэмлыкъёсты валаны. Озьы соос осконзэс юнматысалзы, азьвыл йыбыртъян амалзы сярысь, али йыбыртъян амалзы умойгес шуыса. Та юрттысал соослы кышкатэк тодытыны, иудейёслэн пумитъяськемзы шоры учкытэк (Евр. 10:19—23).

АСЬТЭОС ВЫЛЭ ЭН ОСКИСЬКЕ

16. Мар кароно быдэ вуэм христианъёслы азьланяз но?

¹⁶ Быдэ вуэм христианъёс луэм сяна, милемлы азьланяз но сыӵеесь ик луоно. Со понна ас выламы оскиськоно ӧвӧл (1 Кор. 10:12). Милемлы ялан асьмеды эскероно, одӥг интыямы ум сылӥське-а шуыса (2 Кор. 13:5).

17. Кызьы Колоссыослы гожтэт возьматэ, макем кулэ азьланяз но быдэ вуэм христианъёс луыны?

¹⁷ Колоссыослы гожтэтаз Павел нош ик вера, макем кулэ азьланяз но быдэ вуэм христианъёс луыны. Колоссы карысь агайёс но сузэръёс быдэ вуэм христианъёс вал ке но ини, Павел соосты алӥз, соос та дуннелэн ӧрекчи дышетонъёсызлы медаз  оске шуыса (Кол. 2:6—10). Епафрас, кудӥз со кенешысь агайёсты но сузэръёсты умой тодӥз, вылды, ялан вӧсяськиз, соос азьланяз но быдэ вуэм христианъёс мед луозы шуыса (Кол. 4:12). Адӟиське, Павел но, Епафрас но валало вал, со понна тыршыны кулэ но Инмарлэн юрттэтэз кулэ шуыса. Соослэн потэ вал, Колоссы карысь христианъёс, номыр шоры учкытэк, азьланяз но быдэ вуэм христианъёс мед луозы шуыса.

18. Мар луыны быгатэ быдэ вуэм христианъёсын? (Озьы ик учке суредэз.)

¹⁸ Павел еврейёс пӧлысь агайёслы но сузэръёслы вераз, быдэ вуэм христианъёслэн но Иеговаен кусыпъёссы сӧриськыны быгато шуыса. Адямилэн сюлмыз сокем чурытомыны быгатэ, со ӧпкельыны но уг быгаты ни. Соин ик Иегова сое простить уз кары ини. Но шумпотыса вераны луэ, еврейёслэн сюлэмзы сокем ӧз чурытомы (Евр. 6:4—9). Нош мар вераны луоз асьме нуналъёс сярысь? Мар Иегова малпа тодытон уже пыриськемысь дугдэм агайёс но сузэръёс сярысь но кенешысь поттэмъёс сярысь, кудъёсыз берлогес ӧпкелизы? Сюлмысь ӧпкелемзы возьматэ, соос уг кельшо шуыса адямиослы, кудъёсыз сярысь гожъяз Павел. Но Иегова доры берытскыкузы, соослы солэн юрттэтэз кулэ (Иез. 34:15, 16). Соин ик тӧроос курозы быдэ вуэм христианъёс пӧлысь агаез яке сузэрез соослы юрттыны Иеговаен кусыпъёссэс юнматыны.

19. Кыӵе ужпумъёс ас азямы пуктыны кулэ?

¹⁹ Тырше быдэ вуэм христианъёс луыны. Чурыт сиён сие но Инмар сямен малпаськыны тырше. Нош тӥ быдэ вуэм христианъёс луиды ке ини, азьланяз но сыӵеесь ик луыны тырше.