ДАВИДЛЭН ожгарчиосыз пӧлын еврейёс гинэ ӧй вал. Кылсярысь, солэн ожгарчиосыз пӧлын вал аммон карысь Целек, хеттей пи Урия но Моавысь Ифма (1 Пар. 11:39, 41, 46) a. Со сяна, Давид палан ожмаськизы хелефейёс, фелефейёс но Геф карысь адямиос (2 Экс. 15:18). Геф карын улӥзы филистимъёс, нош хелефейёс но фелефейёс филистим калыклэн матысь ӵыжы-выжыоссы вал (Иис. Н. 13:2, 3; 1 Экс. 6:17, 18; Иез. 25:16).

Малы Давид аслаз ожгарчиосыз пӧлы мукет калыкъёсысь адямиосты басьтылӥз? Со тодэ вал, соос солы оскымонэсь луозы, нош валтӥсез — соос Иеговалы оскымонэсь луозы шуыса. Кылсярысь, тани мар вераське одӥг библейской справочникын хелефейёс но фелефейёс сярысь: «Давидлэн кивалтонэзлэн самой секыт вакытъёсаз но соос солы оскымонэсь вал» (The New Interpreter’s Dictionary of the Bible). Мар сярысь татын вераське? Огпол «Савей нимо... йӧнтэм адями» Давид эксэй интые ачиз эксэй луыны турттӥз. Куке «вань израиль калык Давид бордысь люкиськиз» но Савей сьӧры мынӥз, хелефейёс но фелефейёс Давидлы оскымон кылизы но бугыръяськонэз дугдытыны юрттӥзы (2 Экс. 20:1, 2, 7). Берлогес Давидлэн Адония пиез эксэй луыны турттӥз. Нош хелефейёс но фелефейёс Давидлы оскымон кылизы но Соломонэз эксэе пуктыны юрттӥзы, кудзэ Давид интые ачиз Иегова бырйиз (3 Экс. 1:24—27, 38, 39).

Геф карысь Еффей но Давидлы оскымон вал. Со но 600 ожгарчиосыз Давид эксэйлы юрттӥзы, куке Авессалом пумит ӝутскиз эксэйлы но израиль калык пӧлысь троссэ ас палаз берыктӥз. Еффей мукет калыкысь вал бере, эксэй понна ожмаськыны солы одно ик кулэ ӧй вал. Давид солы та сярысь ик вераз. Но Еффей шуиз: «Улэп Кузё-Инмар, эксэй но, мынам кузёе, кема мед улоз; эксэй, мынам кузёе, котькытын со мед луоз — отын ик луоз тынад ляльчиед — кулоно ке но луиз» (2 Экс. 15:6, 18—21).

Хелефейёс, фелефейёс но Геф карысь адямиос израиль калыкысь ӧй вал ке но, соос оско вал, Иегова — со зэмос Инмар, нош Давид — солэн быръем адямиез шуыса. Давид туж шумпотэ вал, дыр, со вӧзын сыӵе оскымон адямиос вал шуыса!