1. Кыӵе мылкыдмы вань милям котькудмылэн?

 КЫӴЕ тӥляд шӧдонъёсты кылдысалзы, тӥледыз умой тодӥсь но гажась адями тӥлесьтыд нимдэс вунэтысал ке, уката ик тӥледыз асьтэдыз но? Тӥ ӝоже усьысалды, дыр. Малы ке шуоно нокинлэн уг поты, сое мед вунэтозы шуыса. Милям потэ, мукетъёсыз мед тодозы, кыӵе ми адямиос но кыӵе азинсконъёс ми лэсьтӥмы (Лыд. 11:16; Иов 31:6).

2, 3. Малы дано луыны мылкыд шонертэм луыны быгатэ? (Учке статья кутсконысь суредэз.)

² Но тырбыдэстэм луэменымы, со мылкыдмы шонертэм луыны быгатэ. Соин сэрен милям потоз, милемыз мед данъялозы но сӥлы мед карозы шуыса. Шайтанлэн дуннеез адямиослэсь со умойтэм мылкыдзэс пуромытэ но вунэтыны косэ сое, кинэ зэмзэ ик данъяно,— инмысь Атаймес, Иеговаез (Усьт. 4:11).

³ Иисус музъем вылын улыку, куд-ог религиозной кивалтӥсьёслэн туж потэ вал, соосты мед данъялозы но сӥлы мед карозы шуыса. Иисус аслаз  дышетскисьёсызлы вераз: «Чаклаське книга тодӥсьёслэсь: соос кузь дӥськутэн ветлыны ярато, калык люкаськон интыосын ӟечкыламез, сӥнагогаосын азьпалан пуконэз, сиён-юонъёс дыръя нырысетӥ радъёсын улонэз ярато». Озьы ик, со вераз на: «Соос эшшо но юнгес судить каремын луозы» (Лука 20:46, 47). Со дыре ик Иисус ушъяз куанер палкышноез, кудӥз коньдон понӥз но ӧз возьма, сое адӟозы но со понна сое ушъялозы шуыса (Лука 21:1—4). Кызьы адӟиське, Иисус дано луон шоры чылкак мукет сямен учке вал. Ойдолэ эскеромы, мар юрттоз милемлы дано луон шоры шонер учкыны, озьы, кызьы учке Иегова.

4. Кинлы милемлы нырысь ик ярамон луыны тыршоно но малы?

⁴ Мукет адямиослы ярамон луон понна, адямиос тыршо вылӥ образование басьтыны, азинлыко ужбергатӥсь яке тодмо адями луыны. Но кинлы милемлы нырысь ик ярамон луыны тыршоно? Тодады вае апостол Павеллэсь кылъёссэ: «Али зэм Инмарез тодыса вылысь — тӥледыз Ачиз Инмар тодӥз ни бере, малы тӥ нош ик со кужымтэм, пайдатэм законъёс борды берытскиськоды но асьтэдыз соослы эшшо но ляльчи-медо карыны тыршиськоды на?» (Гал. 4:9). Макем бадӟым дан со — милемыз ачиз Инмар тодыны быгатэ, быдэс Дуннеен Вылӥ кивалтӥсь! Иегова тодэ милемыз, яратэ, но солэн потэ, ми солы матэ мед кариськомы шуыса. Со милемыз кылдытӥз озьы, ми солэн эшъёсыз луыны мед быгатомы шуыса (Екк. 12:13, 14).

5. Мар милемлы кароно, Иегова милемыз аслаз эшъёсыныз мед лыдъялоз шуыса?

⁵ Иегова Моисеез аслаз эшеныз лыдъяз. Куке Моисей куриз Иеговаез аслэсьтыз сюресъёссэ усьтыны, Инмар шуиз: «Мар сярысь тон верад, Мон сое лэсьто, малы ке шуоно Мынам син азям тон ӟеч эрик басьтӥд, тонэ Мон нимыдъя тодӥсько» (Пот. 33:12—17). Иегова милемыз но тодыны быгатэ. Мар кароно со понна? Вань сюлмысьтымы Инмарез яратоно но солы улонмес сӥзёно. (Лыдӟе 1 Коринфъёслы 8:3.)

6, 7. Малы милям Иеговаен кусыпъёсмы сӧриськыны быгато?

⁶ Инмысь Атаенымы эшъяськыны луонлыкез дунъяны кулэ, малы ке шуоно со туж дуно. Галатияысь христианъёслы выллем, кудъёсызлы гожъяз Павел, милемлы чакласьконо, ми та дуннелэн «кужымтэм, пайдатэм законъёсызлэн» ляльчиосыз медам луэ шуыса. Со законъёс пӧлы пыртыны луоз дано но азинлыко луыны тыршонэз (Гал. 4:9). Галатияысь вын-агайёс но сузэр-апайёс Инмарен матысь кусыпъёс тупатӥзы, но собере берытскизы со борды, мае кулэтэм, пайдатэм шуыны луоз. Мукет кылъёсын вераса, Павел соослы шуиз: «Малы тӥ берытскиськоды со визьтэм но пайдатэм ужъёс борды, кудъёссэ куке но кельтӥды вал?»

⁷ Милемын но озьы луыны быгатэ-а? Быгатэ. Павел сямен ик, Иеговаез тодэммы бере милям Шайтанлэн  дуннеяз сӥё-дано луэммы ӧз поты. (Лыдӟе Филиппыослы 3:7, 8.) Кин ке но вылӥ образование басьтыны ӧз мыны, кин ке но та дуннеысь ужын азинлыко луыны ӧз тыршы яке йырыныз валче коньдон поттонэ ӧз выйы. Нош кин ке но тодмо но узыр луыны быгатысал крезьгур яке спорт удысын, но со мукет сюрес бырйиз (Евр. 11:24—27). Шонертэм луысал со сярысь малпаны, ми мае ке туж дунозэ ыштӥмы шуыса. Озьы малпасалмы ке, ми берытскысалмы та дуннелэн «кужымтэм, пайдатэм законъёсыз» борды.

8. Мар юрттоз милемлы Иеговалы ярамон луыны?

⁸ Мар юрттоз милемлы, та дуннеысь адямиослы ярамон луон интые, Инмарлы ярамон луыны? Милемлы юрттоз кык кулэ луись зэмлыкъёс вылын малпаськон. Нырысетӥез — Иегова котьку тодаз возе но дунъя соосты, кинъёс солы оскымон ужало-тыршо. (Лыдӟе Еврейёслы 6:10; 11:6.) Иегова дунъя котькуд ужась-тыршисьсэ. Соин ик, солы оскымон муртлэсь тыршемзэ со санэ понытэк уг кельты. Санэ понытэк кельтысал ке, со понна со шонерлыктэм уж кадь луысал. Иегова аслэсьтызъёссэ тодэ (2 Тим. 2:19). Со «шонер улӥсьёслэсь сюрессэс» тодэ, озьы ик со тодэ, кызьы соосты визь сынаськонъёслэсь мозмытыны (Пс. 1:6; 2 Пётр 2:9).

9. Кызьы Иегова возьматъяз, аслэсьтыз калыксэ дунъя шуыса? Вералэ примеръёс.

⁹ Куддыръя Иегова аслэсьтыз калыксэ дунъямзэ возьматъяз, паймымон ужъёс лэсьтыса (2 Пар. 20:20, 29). Тодамы ваёмы, кызьы со Горд Кам зарезь дорын израиль пиосты утиз, куке фараонлэн ожгарчиосыз соосты шымыртӥзы вал ини (Пот. 14:21—30; Пс. 105:9—11). Иегова паймымон амалэн израиль пиосты утиз. Соин ик со палъёсын улӥсь адямиос, ог 40 ар ортчыса но, сое тодазы вайылӥзы на (Иис. Н. 2:9—11). Ми малпаськимы ке, кызьы Иегова аслэсьтыз яратэмзэ но кужмо луэмзэ возьматъяз, со юрттоз милемлы, куке Магог музъемысь Гог ми вылэ урдскоз (Иез. 38:8—12). Макем ми соку шумпотомы, та дуннеысь адямиослы ӧвӧл, нош Инмарлы ярамон луыны тыршимы шуыса!

10. Кызьы Иегова возьматыны быгатэ, ми солы ярамон луиськомы шуыса?

¹⁰ Кыкетӥез — Иегова возьматыны быгатэ, ми солы ярамон луиськомы шуыса, озьы, кызьы ми ум но возьмаське. Библия возьматэ, со адямилы, кудӥз ӟеч ужъёсты мукетъёсыз азьын чеберъяськыса лэсьтэ, Иегова мед-кузьым уз сёты шуыса. Малы? Малы ке шуоно со аслэсьтыз медзэ-кузьымзэ басьтӥз ини — адямиослэсь данъямзэс. (Лыдӟе Матфейлэсь 6:1—5.) Иисус вераз, солэн Атаез лушкемен чакла шуыса соосты, кинъёсты адямиос уг данъяло ӟеч ужъёс лэсьтэмзы понна. Иегова ваньзэ сое адӟе но сыӵе адямиосты бакель каре. Куддыръя со бакель каре озьы, кызьы ми ум но возьмаське. Эскеромы примеръёсты.

11. Кыӵе дан сётӥз Иегова Мариялы?

¹¹ Иегова бырйиз Мария нимо зӥбыт-востэм нылэз, со Пиезлэн анаез мед луоз шуыса, кудӥз музъем вылын вордскыны кулэ вал. Мария пичи гинэ Назарет карын улӥз, Иерусалимлэсь но отысь бадӟым чебер храмлэсь кыдёкын. (Лыдӟе Лукалэсь 1:26—33.) Малы солы сыӵе дан сётэмын вал? Гавриил кылчин верамъя, со «Инмар дорын дэлет басьтӥз». Иегова Мариялэн матысь эшез вал шуыса, адӟиське Мариялэн Елисаветаен вераськемысьтыз (Лука 1:46—55). Иегова Мариялэсь улэмзэ чаклаз но оскымон луэмез понна бакель кариз озьы, кызьы со ӧз но возьма.

12, 13. Кызьы Иегова Иисусэз данъяз вордӥськемез бере но 40 нунал ортчыса, куке сое храме вайизы?

¹² Иисуслэн вордӥськемез сярысь Иегова Иерусалимысь но Вифлеемысь сӥё-дано адямиослы но кивалтӥсьёслы ӧз вера. Со ыстӥз кылчинъёсты огшоры адямиос, пудо возьмасьёс, доры, кудъёсыз Вифлеем дорын ыжъёсты возьмазы (Лука 2:8—14). Собере пудо возьмасьёс мынӥзы нуныез учкыны (Лука 2:15—17). Мария но Иосиф паймизы но шумпотӥзы, луоз, Иисуслы сыӵе дан сётэмын вал шуыса. Нош табере малпалэ, макем пӧртэм асьсэды возё Иегова но Шайтан. Куке Шайтан ыстӥз визьмочиосты Иисус но солэн анай-атаез доры, Иисуслэн вордӥськемез сярысь быдэс Иерусалим кылӥз но куалектӥз (Матф. 2:3). Соин сэрен трос чик янгыштэм нылпиос быдтэмын вал (Матф. 2:16).

¹³ Иисус вордӥськем бере 40 нунал ортчыса, Мария Иеговалы курбон сётыны кулэ вал Иерусалимысь храмын, кудӥз Вифлеем дорысь ог 9 иськем кемын интыяськемын вал (Лука 2:22—24). Сюрес вылэ Мария потӥз Иосифен но пичи Иисусэн ӵош.  Мыныкуз со малпаськиз, дыр, вералоз-а меда священник со сярысь, мар карыны кулэ Иисус азьланяз. Но Мариялэн малпамез ӧз быдэсмы. Вордскем нуны сӥзем Мессия, Христос, луоз шуыса ваньмызлы ивортон понна, Иегова бырйиз шонер, Инмарлы оскыса улӥсь Симеонэз но Анна нимо нылкышно пророкез, ог тямыстон ньыль аресъем палкышноез (Лука 2:25—38).

14. Кызьы Иегова Марияез бакель кариз?

¹⁴ Нош мар вераны луоз Мария сярысь? Азьланяз но Иегова бакель кариз-а Марияез, солэсь Пизэ утемез-вордэмез понна? Одно ик. Инмарлэн духезлэн кивалтэмез улсын Библиын гожтэмын вал Мариялэн кылъёсыз но ужъёсыз сярысь. Мария ӧз быгаты, луоз, Иисусэн ӵош куинь но ӝыны ар ӵоже пӧртэм интыостӥ ветлыны но ӟеч иворез вераны. Со дырлы со палкышно кылемын ни вал, соин ик, вылды, солы Назаретын улоно луиз. Солы шуд ӧз усьы ас синмыныз адӟыны троссэ со пӧлысь, мар кариз Иисус ужакуз-тыршыкуз. Но, Иисус кулыку, со соин артэ вал (Иоанн 19:26). Берлогес, Витьтонэтӥ нунал праздник дыръя святой духен зырӟон азьын, Мария Христослэн мукет дышетскисьёсыныз ӵош Иерусалимын вал (Ап. уж. 1:13, 14). Со но святой духен зырӟемын вал, вылды. Озьыен, вераны луоз, солэн осконэз вал шуыса, Иисусэн ӵош инмын пырак дауръёс ӵоже улыны. Макем паймымон амалэн со бакель каремын вал оскымон ужамез-тыршемез понна!

15. Кызьы Иегова возьматӥз, аслэсьтыз Пизэ дунъя шуыса, куке Иисус музъем вылын улӥз?

¹⁵ Иисус религия но политика удысысь кивалтӥсьёслэн син азязы  ярамон луыны ӧз тыршы. Но валаны луэ, макем со шумпотӥз, куке кылӥз, кызьы Иегова инмысен куинь пол сое ушъяз. Иисус Иордан шурын пылатӥськем бере ик Иегова вераз: «Та Мынам Яратоно Пие, Со бордын Мынам ӟеч эрике» (Матф. 3:17). Та кылъёсты, Иисус сяна, Иоанн Пылатӥсь гинэ кылӥз, луоз. Собере, Иисуслэн кулэмезлэсь ар пала азьлогес, солэн куинь апостолъёсыз кылӥзы, кызьы Иегова Иисус сярысь вера: «Та Мынам Яратоно Пие, Со бордын Мынам ӟеч эрике, Солэсь кылзӥське» (Матф. 17:5). Мукетаз учыре, Иисуслэн кулэмезлэсь кӧня ке нуналлы азьлогес, Иегова нош ик солы инмысен вазиськиз (Иоанн 12:28).

16, 17. Кызьы Иегова возьматӥз, вылӥ дунъя шуыса ваньзэ сое, мае кариз Иисус?

¹⁶ Иисус тодэ вал, сое, Инмарез сантэма шуыса, янгыше уськытозы но виёзы шуыса. Озьы ке но, со вӧсяськиз: «Мыным кызьы кулэ, озьы эн кар, озьы кар, кызьы Тыныд кулэ» (Матф. 26:39, 42). Иисус, ултӥянлэсь кышкатэк, юбо вылын курадӟонэз чидаз. Солэн Инмарлы ярамон луэмез потэ вал, нош та дуннелэн данъямез солы кулэ ӧй вал (Евр. 12:2). Кызьы Иегова возьматӥз, сое дунъя шуыса?

¹⁷ Одӥг пол Иисус куриз Атайзэ: «Ас данэныд данъя, кудӥз дунне кылдэмлэсь азьвыл ик Мынам Тонэн огазьын дыръям вал» (Иоанн 17:5). Библиын нокытыназ но верамын ӧвӧл, Иисус оске вал, солы тросгес сётэмын луоз шуыса. Со уг возьма вал, сое инмын «вылӥе пуктозы» шуыса. Нош мар кариз Иегова? Со Иисусэз возьмамтэ амалэн данъяз. Иисусэз улӟытыса, Иегова сое вылӥе пуктӥз но сётӥз сое, мар азьвыл нокинлы но сётэмын ӧй вал,— ноку кулытэк инмын пумтэм вапумъёсы улон! a (Флп. 2:9; 1 Тим. 6:16). Макем паймымон амалэн Иегова возьматӥз, Пизэ дунъя шуыса!

18. Мар кароно, милям мылкыдмы медаз луы шуыса, та дуннеысь адямиослэн син азязы ярамон луыны?

¹⁸ Мар кароно, милям мылкыдмы медаз луы шуыса, та дуннеысь адямиослэн син азязы ярамон луыны? Ноку но эн вунэтэ, Иегова котьку бакель каре шуыса соосты, кинъёс солы оскымон ужало-тыршо, но ӵемысь бакель каре возьмамтэ амалэн. Азьланяз милемыз паймымон бакель каронъёс возьмало. Нош али, Шайтанлэн дуннеяз шуг-секытъёсын но визь сынаськонъёсын пумиськыса, ойдолэ котьку тодамы возёмы, таиз дунне но ваньмыз, мае со ӵектэ, пыраклы ортчозы-бырозы шуыса (1 Иоанн 2:17). Милям яратӥсь Атаймы сярысь верамын: «Инмар шонер лэсьтӥсьтэм ӧвӧл уго, Со уг вунэты тӥлесьтыд уждэс, яратондэс, кудзэ тӥ Солэн нимыз понна ужаса-тыршыса возьматӥды» (Евр. 6:10). Со милемыз одно ик бакель кароз — оло нош озьы, кызьы ми ум но малпаське!