БИБЛИЫН «асьмеос кадь ик» адямиослэн сюлмысь верам кылъёссы гожтэмын (Иак. 5:17). Кылсярысь, милемлы капчи валаны, мар сярысь вераз Павел таӵе кылъёсын: «Ӟечез лэсьтэме потыку, мон борды урод думиське. [...] Куанер мискинь адями мон!» (Рим. 7:21—24). Солэн пӧяськытэк верам кылъёсыз милемыз туж юнматыны быгато, куке ми асьмелэн тырмымтэосынымы нюръяськиськомы.

Со сяна, Павел мукет шӧдонъёсыз сярысь вераз на. Кылсярысь, со шуиз: «[Иисус] монэ яратӥз но Ассэ мон понна курбонлы сётӥз» (Гал. 2:20). Павел солы юн оскиз. Вань-а тӥляд но сыӵе ик шӧдонъёсты? Котьку ик ӧвӧл, дыр.

Ми азьвыл лэсьтэм сьӧлыкъёсмы сэрен асьмеос сярысь умойтэм малпаськомы ке, милемлы оскыны секыт, вылды, Иегова милемыз яратэ но простить каре шуыса. Уката но оскыны секыт, дыр, мозмытӥсь курбон ми понна ваемын вал шуыса. Зэм-а Иисуслэн потэ, ми солэн курбонэз шоры кузьым шоры кадь мед учкомы шуыса? Потэ ке, малы оскыны луэ, со озьы шуыса? Ойдолэ эскеромы та кык юанъёсты.

Иисуслэн зэмзэ но потэ: ми мед валаломы, солэн курбонэз ми пӧлысь котькудӥз понна ваемын шуыса. Малы солы оскыны луэ? Тырше син азяды пуктыны сое, мар сярысь гожтэмын Лукалэсь 23:39—43. Иисусэн артэ юбо борды пиосмурт кортӵогамын. Со пиосмурт вала, урод уж лэсьтӥз шуыса. Сое юбо борды кортӵогаса виизы бере, со туж кышкыт йыруж лэсьтӥз, дыр. Со адями туж сюлмаське но Иисусэз сюлворыса куре: «Аслад Эксэйлыкад вуид ке, монэ буре вай».

Мар солы Иисус вераз? Пуктэ син азяды, кызьы, вӧсь луэмзэ чидаса, Иисус йырзэ берыктэ но пиосмурт шоры учке. Иисус пальпотэ но йыруж лэсьтӥсьлы лякытэн вера, со соин райын луоз шуыса. Иисус солы тодаз гинэ вайытыны быгатэ вал, «Адями Пи... Аслэсьтыз лулзэ сётыса, троссэ сьӧлыкъёслэсь мозмытыны лыктӥз» шуыса (Матф. 20:28). Со интые, Иисус та пиосмуртлы валаны юрттӥз, курбонэз со понна вае шуыса. Иисус туж ӟеч луэмзэ возьматӥз, куке «тыныд», «монэн» но «тон» кылъёсты вераськоназ кутӥз. Озьы ик Иисус «тон» кылэз кутӥз, куке пиосмуртлы вераз, со рай музъем вылын улоз шуыса.

Веранэз ик ӧвӧл, Иисуслэн потэ вал: пиосмурт мед валалоз, Иисуслэн кулэмез солы пайда ваёз шуыса. Малпаське: Иисуслэн тае валэктэмез потэ вал йыруж лэсьтӥсьлы, кудӥз солэн дышетскисез но ӧй вал. Соин ик Иисуслэн уката но потэ, Инмарлэн пылатӥськем ужась-тыршисьёсыз талы мед оскозы шуыса. Азьвыл лэсьтэм сьӧлыкъёсмы шоры учкытэк, мар юрттоз милемлы оскыны, Иисус ми пӧлысь котькудӥз понна кулӥз шуыса?

Иисус Павелэз тодытон уже пыриськыны куриз бере, Павел валаз, Иисус со понна кулӥз шуыса. Со гожтӥз: «Мыным кужым  сётӥсь... Иисус Христослы тау карисько: Со монэ оскиськымон луисько шуыса лыдъяз но та ужез быдэсъяны пуктӥз,— монэ, азьвыл Аслыз пумитъяськисез, вӧсяськисьёсты улляса-ёртыса, ӝоже уськытъяса возисез» (1 Тим. 1:12—14). Павел валаз: Иисус солы уж сётӥз бере, Иисус солы оске, сое яратэ но гажа-жаля. Иисус ми пӧлысь котькудмес тодытон уже пыриськыны куриз (Матф. 28:19, 20). Юрттэ-а та малпан валаны тӥледлы, Иисус тӥ понна но кулӥз шуыса?

Альберт, кудӥз ог 34 ар ӵоже кенешысь поттэмын вал, вера: «Мынам сьӧлыкъёсы котьку син азям. Нош куке мон тодытон уже пыриськисько, апостол Павел сямен, шӧдӥсько: мон быдэстӥсько ужез, кудзэ Иисус мыным сётӥз. Со монэ юнматэ но ас шорам шонер учкыны юрттэ. Табере мон тодӥсько, малы улӥсько, но мынам пырак улыны осконэ вань» (Пс. 50:5).

Аллан нимо пиосмурт, кудӥз йыружъёс но лек ужъёс лэсьтыса улӥз, вера: «Мон та дырозь тодам вайылӥсько, макем трос лек ужъёс мон адямиослы лэсьтӥ. Соин сэрен куддыръя мынам мылкыды куашка. Нош макем бадӟым тау мон Иеговалы карисько, мыным, сьӧлыко адямилы, ӟеч иворез вераны лэземез понна! Куке мон адӟисько, кызьы соос та иворез кылзо, мон малпаськисько со сярысь, кыӵе Иегова ӟечлыко но яратӥсь. Мон шӧдӥсько: мон пыр со юрттэ соослы, кинъёс мон сямен улӥзы».

Куке ми тодытон уже пыриськиськомы, ми умой ужъёс лэсьтӥськомы но умоез сярысь малпаськиськомы. Иисус милемлы та ужез сётӥз бере, со милемлы оске, милемыз яратэ но гажа-жаля.

Шайтанлэн дуннеез бырытозь, азьвыл лэсьтэм сьӧлыкъёсмы понна сюлэммы выльысь но выльысь милемыз курланы быгатэ. Кызьы нюръяськоно сыӵе шӧдонъёсын?

Джин нимо сузэрез ӵем дыръя возьытлыкез йыръе, малы ке шуоно со егит дыръяз семьяяз но школаын ассэ одӥг сямен возиз, нош огъёзъёсыныз мукет сямен. Со вера: «Мон туж шумпотӥсько, „Инмар асьмелэн сюлэммылэсь бадӟымгес“ шуыса!» (1 Иоанн 3:19, 20). Милемыз но буйгатыны быгатэ малпан, Иегова но Иисус милемыз, сьӧлыко адямиосыз, милесьтым но умойгес валало шуыса. Тодады возе: курбон тырбыдэс адямиос понна сётэмын ӧй вал, нош сьӧлыко адямиос понна, кудъёсыз ӧпкелё (1 Тим. 1:15).

Сюлэммы талы мед оскоз шуыса, милемлы вӧсяськоно но малпаськоно со сярысь, кызьы Иисус тырбыдэстэм адямиос шоры учке, озьы ик вань сюлмысьтымы тодытон уже пыриськоно. Солы луыса ми, Павел сямен, вераны быгатомы: «[Иисус] монэ яратӥз но Ассэ мон понна курбонлы сётӥз».