1. Мар шумпотон вае Иеговалэн ужась-тыршисьёсызлы, 3 Иоаннлэсь 3, 4 лыдэ басьтоно ке?

 ПУКТЭ син азяды, кыӵе шумпотӥз апостол Иоанн, куке кылӥз, соос, кинъёслы со зэмлыкен тодматскыны юрттӥз, азьланяз но оскымон ужало-тыршо шуыса. Соос трос шуг-секытъёсын пумиськизы, нош Иоанн лэсьтӥз ваньзэ, мае быгатӥз, та оскымон христианъёслэсь осконзэс юнматон понна. Соос шоры Иоанн учкиз аслаз нылпиосыз шоры кадь. Ми но туж шумпотӥськомы, куке милям нылпиосмы яке соос, кинъёслы ми зэмлыкен тодматскыны юрттӥмы, улонзэс Иеговалы сӥзё но солы оскымон ужало-тыршо. (Лыдӟе 3 Иоаннлэсь 3, 4.)

2. Кыӵе ужпумен Иоанн куинь гожтэтъёссэ гожтӥз?

² Патмос шормуӵысь пытсэтын пукемез бере, Иоанн Ефес карын яке со котырын улыны интыяськиз, вылды. Со дыре, асьме вакытысь 98-тӥ ар котырын, Иеговалэн святой духез солэсь мылкыдзэ ӝутӥз куинь гожтэтъёс гожтыны. Та гожтэтъёслэн ужпумзы — юрттыны оскымон христианъёслы Иисуслы осконзэс юнматыны, озьы ик азьланяз но зэмлык бордын улыны.

3. Кыӵе юанъёслы валэктонъёс ми шедьтомы?

³ Иоанн берпуметӥез апостол вал. Со сюлмаськиз, ӧрекчи дышетӥсьёс кенешез зэмлыклэсь палэнтыны тыршо шуыса (1 Иоанн 2:18, 19, 26) b. Та зэмос йыбырттонлэсь палэнскемъёс Инмарез тодо шуыса веразы ке но, зэмзэ вераса, солэн катъёсызъя ӧз улэ. Ойдолэ эскеромы, кыӵе визь-кенешъёс сётӥз апостол Иоанн христианъёслы, святой духлэн валтэмез улсын. Озьы ик валэктонъёс шедьтомы куинь юанъёслы:  мар кароно, зэмлык бордын улон понна? Мар милемлы люкетыны быгатэ? Но кызьы ми ог-огмылы юрттыны быгатӥськомы зэмлык бордын улыны?

4. Мар кароно, зэмлык бордын улон понна, 1 Иоаннлэсь 2:3—6 но 2 Иоаннлэсь 4, 6 лыдэ басьтыса?

⁴ Зэмлык бордын улон понна, милемлы тодоно зэмлыкез, кудӥз гожтэмын Инмарлэн Кылаз, Библиын. Со сяна, милемлы Иеговалэн курон-косонъёсызъя улоно. (Лыдӟе 1 Иоаннлэсь 2:3—6; 2 Иоаннлэсь 4, 6.) Иисус тужгес но умой адӟем карон возьматӥз, кызьы Иеговалэсь кылзӥськоно. Соин ик, Иеговалэсь кылзӥськон понна, милемлы Иисуслэн «пытьы кузяз» мыныны тыршоно (Иоанн 8:29; 1 Пётр 2:21).

5. Кыӵе зэмлыкъёслы ми юн оскыны кулэ?

⁵ Азьланяз но зэмлык бордын улон понна, милемлы юн осконо: Иегова — зэмлыклэн Инмарез но ваньмыз, мар гожтэмын Библиын, зэм луэ. Озьы ик ми оскыны кулэ: Иисус — со Мессия, кудӥз сярысь азьло ик верамын вал. Туннэ тросэз адямиос Иисусэз Инмарлэн Эксэйлыказ пуктэм Эксэен уг лыдъяло. Аслаз гожтэтаз Иоанн алӥз, «трос визь тугасьёс... потӥзы» шуыса, кудъёсыз пӧяны быгато соосты, кинъёс Иегова но Иисус сярысь зэмлыклы юн уг оско (2 Иоанн 7—11). Со гожтӥз: «Ӧрекчаськись ӧвӧл-а со, кин Иисусэз Христос ӧвӧл шуыса лыдъя?» (1 Иоанн 2:22). Инмарлэсь Кылзэ эскерыса гинэ, ми быгатомы пӧяськонлэсь утиськыны. Соку гинэ ми быгатомы Иегова но Иисус сярысь тодон-валан басьтыны (Иоанн 17:3). Но соку гинэ адӟомы, зэмлыкез тодӥськомы шуыса.

6. Кыӵе шуг-секытэн егит христианъёс пумиськыло?

⁶ Вань христианъёслы чакласьконо, та дуннеын вӧлмем учконъёс ми вылэ медаз пыӵалэ шуыса (1 Иоанн 2:26). Та кышкытлык сярысь тужгес но тодазы возёно егитъёслы. Тани мар вера Алексья c, Франциысь 25-аресъем сузэр: «Школаын милемыз дышетӥзы эволюцилы но мукет вӧлмем дышетонъёслы. Соослы луыса зэмлыклы мон сокем юн ӧй оскы ни. Но мон малпай: шонертэм луысал палэнтыны сое, малы дышетэ Библия, но оскыны ваньмызлы, мае верало дышетӥсьёсы». Алексья сак лыдӟиз «Улон — кызьы со кылдӥз? Эволюцилы яке кылдытонлы луыса?» книгаез. Кӧня ке арняос  ортчыса, солэн осконэз юнмаз. Со вера: «Мон валай, Библиын зэмлык гожтэмын шуыса но, солэн курон-косонъёсызъя улыса, мон шумпотыса но каньыл сюлмын улыны быгато шуыса».

7. Малэсь милемлы чакласьконо но малы?

⁷ Ми пӧлысь нокудмылы — егитъёслы но, арлыдоослы но — Иеговалы ужам-тыршемъяськыны но со дыре ик урод ужъёс лэсьтыса улыны уг яра. Иоанн пусйиз: ми ум быгатӥське зэмлык бордын улыны но со дыре ик Инмарлэсь катъёссэ тӥяны (1 Иоанн 1:6). Иеговалы ярамон луэммы потэ ке, милемлы котьку тодамы возёно: со адӟе ваньзэ, мае ми лэсьтӥськомы. Сое, мае ми лушкемен лэсьтӥськомы, адямиос уг адӟо ке но, Иегова ваньзэ адӟе (Евр. 4:13).

8. Малэсь милемлы палэнсконо?

⁸ Милемлы палэнсконо солэсь, кызьы та дунне сьӧлык шоры учке. Апостол Иоанн гожтӥз: «Сьӧлыкмы ӧвӧл шуиськомы ке, соку асьмемыз асьмеос ӧрекчаськомы» (1 Иоанн 1:8). Иоанн улон нуналъёсы зэмос йыбырттонлэсь палэнскемъёс малпало вал: валаса вылысь сьӧлыканы луэ но со дыре ик Инмарен матысь кусыпъёс возьыны луэ. Туннэ тросэз адямиос озьы ик малпало. Соос верало, Инмарлы оско шуыса, нош асьсэос соглаш уг луо соин, кызьы Иегова учке сьӧлык шоры, тужгес но соку, куке вераськон мынэ азон-калгон сярысь. Иегова сое сьӧлыкен лыдъя, нош адямиос малпало, отын номыр умойтэмез ӧвӧл но сыӵе ужъёсын вырыны быгато шуыса.

9. Кыӵе пайда вае егит христианъёслы Библиысь возетъёсъя улэмзы?

⁹ Егит христианъёслы секыт луыны быгатэ, куке ӵош дышетскисьёссы яке ӵош ужасьёссы азон-калгон шоры учкемзэс воштыны тыршо. Тани мае тодаз вае Александр нимо агай: «Школаын вал нылъёс, кудъёсыз мыным кужмысь секс ӵектӥзы. Соос веразы: „Тынад нылашед ӧвӧл бере, соку тон гей, дыр“». Тӥ но та выллем учырен пумиськиды  ке, тодады возе: Библиысь курон-косонъёсъя улыса, тӥ асьтэды гажамысь уд дугдэ, тазалыктэс утёды, сюлэмшугъяськытэк улоды но Иеговаен кусыпъёстэс уд ыштэ. Визь сынаськонъёсын пумиськыса, тӥ юн сылӥськоды ке, азьланяз шонер ужъёс лэсьтыны тӥледлы капчигес луоз. Эн вунэтэ: секс шоры шонертэм учкон Шайтан бордысь потэ. Соин ик, Библиысь возетъёсъя улыса, тӥ «уродлыклэсь кузёзэ» вормиськоды (1 Иоанн 2:14).

10. Кызьы 1 Иоаннлэн 1:9 гожтэм кылъёс юртто милемлы чылкыт возьытлыкен Иеговалы ужаны-тыршыны?

¹⁰ Ми валаськомы: Иеговалэн правоез вань ужпум кутыны, мае сьӧлыкен лыдъяны. Ми туж тыршиськомы сьӧлыкатэк улыны. Нош сьӧлыкаськомы ке, вӧсяськыкумы со сярысь Иеговалы вераськомы. (Лыдӟе 1 Иоаннлэсь 1:9.) Нош куке секыт сьӧлык лэсьтӥськомы, ми юрттэт куриськомы тӧроослэсь, кудъёссэ Иегова ми сярысь сюлмаськыны пуктӥз (Иак. 5:14—16). Озьы ке но азьвыл лэсьтэм янгышъёсмы сэрен милемыз возьытлыкмы йырйыны кулэ ӧвӧл. Малы? Малы ке шуоно милям яратӥсь Атаймы аслэсьтыз Пизэ курбонлы сётӥз, милесьтым сьӧлыкъёсмес простить карон понна. Куке Иегова ӧпкелись муртэ простить карыны кылзэ сётэ, со верамзэ быдэстэ. Озьыен, Иеговалы чылкыт возьытлыкен ужаны-тыршыны милемлы номыр люкетыны уг быгаты (1 Иоанн 2:1, 2, 12; 3:19, 20).

11. Кызьы утиськоно солэсь, мар осконмес лябӟытыны быгатэ?

¹¹ Милемлы кылзоно ӧвӧл сое, малы дышето зэмос йыбырттонлэсь палэнскемъёс. Шайтан котьку но тырше оскымон христианъёслэсь осконзэс лябӟытыны. Соин ик милемлы тодыны кулэ, кызьы зэмлыкез пӧяськонлэсь висъяно d. Милям тушмонъёсмы интернет пыр ми сярысь шонертэмзэ верало,  Иеговалы осконмес но вын-агайёсмес яратонмес лябӟытон понна. Эн оске пӧяськонлы, кудӥз Шайтан бордысь потэ (1 Иоанн 4:1, 6; Усьт. 12:9).

12. Малы милемлы осконмес юнматоно со зэмлыкъёслы, кудъёссэ ми тодӥмы?

¹² Шайтан милесьтым осконмес лябӟытыны медаз быгаты шуыса, ми Иисуслы осконмес юнматыны кулэ. Озьы ик умой валано, кызьы Иегова Иисусэз кутэ, аслэсьтыз эриксэ быдэстон понна. Со сяна, оскыны кулэ оскиськымон визьмо ляльчилы, кудӥз пыр туннэ Иегова аслаз организациеныз кивалтэ (Матф. 24:45—47). Ми осконмес юнматыны быгатӥськомы, Инмарлэсь Кылзэ ялан эскерыса. Соку осконмы луоз писпу выллем, кудӥзлэн выжыосыз музъеме мур пыро. Таӵе ик малпанэз вераз Павел Колоссы карысь кенешлы гожтэтаз. Со гожтӥз: «Иисус Христосэз кабыл басьтӥды бере, Со бордын улэ. Со борды выжыдэс лэзе, ӝужалэ-пушъе, оскондэс юнматэ» (Кол. 2:6, 7). Христиан мурт осконзэ юнматэ ке, соку Шайтан но соос, кинъёсын со кивалтэ, солэсь осконзэ лябӟытыны уз быгатэ (2 Иоанн 8, 9).

13. Мар милемыз паймытыны кулэ ӧвӧл но малы?

¹³ Милемлы паймоно ӧвӧл, дунне милемыз адӟемпотостэм каре шуыса (1 Иоанн 3:13). Иоанн гожтӥз: «Та дуннелэн адямиосыз шайтанлэн киулаз возисько» (1 Иоанн 5:19). Та дуннелэн пумыз матэктэмъя, Шайтан ассэ эшшо но лек возе (Усьт. 12:12). Куддыръя со милемыз лушкемен Инмарлэсь палэнтыны тырше, кылсярысь, со сьӧлыко мылпотонъёсмес ӝутэ но зэмос йыбырттонлэсь палэнскемъёслы оскытыны тырше. Озьы ик Шайтан Иеговалэн ужась-тыршисьёсыз вылэ ватскытэк урдскылэ. Со тодэ: тодытон ужмес дугдытон но осконмес куашкатон понна, солэн туж ӧжыт дырыз кылемын. Соин ик ми ум паймиське, куке куд-ог шаеръёсысь кивалтӥсьёс ужмылы люкето яке сое нуыны уг лэзё. Озьы ке но та шаеръёсысь вын-агайёсмы но сузэр-апайёсмы Иеговалы оскымон ужало-тыршо. Ас улонэнызы соос возьмато: кызьы гинэ Шайтан медаз тыршы, ми быгатӥськомы сое вормыны!

14. Кызьы юрттоно вын-агайёслы но сузэр-апайёслы зэмлык бордын улыны?

¹⁴ Вын-агайёсмылы но сузэр-апайёсмылы зэмлык бордын улыны юрттон понна, ми соослы гажан-жалянмес возьматыны кулэ (1 Иоанн 3:10, 11, 16—18). Ми ог-огмес яратыны кулэ умой дыръёсы но, секыт дыръёсы но. Кылсярысь, кенешын кинлэн ке но матысь адямиез кулӥз ке, быгатӥськоды-а тӥ сое буйгатыны яке солы кызьы ке юрттыны? Яке тӥ тодӥды ке, вын-агайёс но сузэр-апайёс инкуазь шимучырен пумиськизы шуыса, быгатӥськоды-а тӥ соослы юрттыны коркаоссэс но Эксэйлык юртъёссэс тупатыны? Мур яратонмес но гажан-жалянмес ми кылъёсынымы гинэ ум возьматӥське, нош эшшо но кулэезгес, ужъёсынымы но.

15. Мар милемлы кароно, 1 Иоаннлэсь 4:7, 8 лыдэ басьтоно ке?

¹⁵ Ми вын-агайёсмес но сузэр-апайёсмес яратӥськомы ке, соку инмысь Атаймылэсь адӟем кариськомы. (Лыдӟе 1 Иоаннлэсь 4:7, 8.) Нош яратонмес возьматон понна, ог-огмес простить карыны дась луоно. Милемыз кин ке вӧсь кариз ке, милемлы та адямиез простить кароно но солэсь янгышсэ тодамы вайылоно ӧвӧл — озьы ми возьматомы, сое яратӥськомы шуыса (Кол. 3:13). Тани мар луиз Альдо нимо агаен. Одӥг пол сое вӧсь каризы мукет агайлэн кылъёсыз, кудзэ со туж гажа вал. Та агай вӧсь карись кылъёс вераз со сярысь, кыӵе калыкысь потӥз Альдо. «Мон ялан Иеговалэсь юрттэт  кури, та агай сярысь урод медам малпа шуыса»,— вера Альдо. Нош та ваньмыз ӧвӧл на. Альдо ужпум кутӥз та агаез ӧтьыны тодытон уже ӵош пыриськыны. Солы луыса Альдо вераны быгатӥз агайлы со сярысь, мар сое вӧсь кариз. Альдо тодаз вае: «Куке агай валаз, макем вӧсь каризы монэ солэн кылъёсыз, со куриз сое простить карыны. Солэн куараезъя валаны луиз, со туж ӧпкеле шуыса. Вань урод шӧдонъёсмес ми вунэтыны тыршимы но эшъяськонмес утьыны быгатӥмы».

16, 17. Мар карыны милям мылкыдмы луыны кулэ?

¹⁶ Куке ми лыдӟиськомы апостол Иоаннлэсь гожтэтъёссэ, кудъёссэ со гожтӥз святой духлэн валтэмез улсын, ми адӟиськомы: со туж яратӥз вын-агайёсты но сузэр-апайёсты. Озьы ик солэн туж потэ вал, соослэн юн осконзы мед луоз шуыса. Ми туж шумпотӥськомы, сыӵе ик сямо ужась-тыршисьёс Христосэн ӵош инмын кивалтозы шуыса! (1 Иоанн 2:27).

¹⁷ Ойдолэ тодамы возёмы сое, мае тодӥмы та статьяысь, озьы ик азьланяз но зэмлык бордын уломы, котьку но котькытын Иеговалэсь кылзӥськыса. Эскере Инмарлэсь Кылзэ но оске солы, мар отын гожтэмын. Юнматэ Иисуслы оскондэс. Эн сётске та дуннеын вӧлмем дышетонъёслы но зэмос йыбырттонлэсь палэнскемъёслэн малпанъёссылы. Тодады возе: уг луы огдыре ик Иеговалы ужаны-тыршыны но со дыре ик солэсь катъёссэ тӥяса улыны. Соин ик эн сётске соослы, кинъёс тӥлесьтыд мылкыддэс ӝуто сьӧлык лэсьтыны. Улэ Иеговалэн вылӥ эсэпъёсызъя. Тӥледыз вӧсь карисьёсты простить каре но юнматэ соосты, кинъёслы юрттэт кулэ,— озьы соос юн луыны быгатозы. Соку, нокыӵе шуг-секытъёс шоры учкытэк, ми быгатомы зэмлык бордын улыны.