1. Филиппыослы 2:3 лыдэ басьтыса, кызьы зӥбыт-востэм сям юрттэ милемлы мукетъёсыныз умой кусыпъёс возьыны?

 МИ ЗӤБЫТ-ВОСТЭМЕН Иеговалэсь кылзӥськиськомы, малы ке шуоно валаськомы: со котьку тодэ, мар милемлы пайда вае (Еф. 4:22—24). Зӥбыт-востэм сям милесьтым мылкыдмес ӝутэ Иеговалэсь эриксэ улонамы самой кулэен лыдъяны но малпаны, мукетъёсыз асьмелэсь умойгес луо шуыса. Солы луыса ми Иеговаен, озьы ик вын-агайёсынымы но сузэр-апайёсынымы умой кусыпъёс возиськомы. (Лыдӟе Филиппыослы 2:3.)

2. Маин соглаш вал апостол Павел? Мае ми эскеромы та статьяын?

² Ми ӧм ке чаклаське, соку та дуннеысь вылтӥяськись но асьсэды гинэ яратӥсь адямиослэн мылкыдзы милемлы но пыӵалоз b. Ӵапак озьы ик луиз, дыр, нырысетӥ даурысь куд-ог христианъёсын, малы ке шуоно апостол Павел Римъёслы гожтэтаз вераз: «Котькуддылы мон шуисько: кӧня сётэмын, солэсь вылӥе асьтэдыз эн пуктэ. ...Зӥбыт-востэм кариськыса, визьмо малпанэн улэ» (Рим. 12:3). Павел соглаш вал, ачид сярысь малпаны кулэ шуыса. Нош ачид шоры шонер учкон понна, зӥбыт-востэм сям кулэ. Та статьяын ми эскеромы куинь удысъёсты, кудъёсаз зӥбыт-востэм сям юрттоз милемлы асьмеды вылӥе пуктытэк улыны: 1) кузпалъяськон, 2) Иеговалэн организацияз дано ужъёсты быдэсъян но 3) социальной сетьёсты уже кутон.

3. Малы семьяын шуг-секытъёс кылдыны быгато но кызьы соос шоры куд-ог кузпалъёс учко?

³ Иеговалэн потэ, кузпалъёс шудоесь мед луозы шуыса. Нош вань адямиос тырбыдэстэмесь бере, семьяын валамтэос кылдыны быгато. Павел гожтӥз, кузпалъяськемъёслэн выль шуг-секытъёссы кылдозы шуыса (1 Кор. 7:28). Куд-ог кузпалъёс ялан споръяськыса уло, соин ик малпаны кутско, ог-огзылы чик но уг тупало шуыса. Нош мар луоз, кузпалъёс семьязы шоры та дуннеысь адямиос сямен учкизы ке? Соос малпалозы, кылдэм югдурысьтызы люкиськыса гинэ потыны быгато шуыса но, нимаз улыса гинэ, шудо луозы шуыса.

4. Кыӵе малпанъёслэсь милемлы палэнсконо?

⁴ Ноку но эн малпалэ, тӥляд кузпалъяськемды янгыш вал шуыса. Вунэтоно ӧвӧл: Инмарлэн малпамезъя, люкиськыны луэ одӥг муген гинэ — одӥгез кузпаллэн азон-калгон сьӧлыке пыремез сэрен (Матф. 5:32). Соин ик, куке тӥ пумиськоды шуг-секытъёсын, кудъёсыз сярысь Павел гожъяз, вылтӥяськонлы сётскыса, эн малпалэ: «Кулэ-а вал мыным та адямиен кузпалъяськыны? Возьмай-а мон таӵе яратонэз? Оло нош, мон мукет адямиен шудогес луо?» Адями, кудӥзлэн таӵе юанъёсыз кылдо, ачиз сярысь гинэ малпа. Та дуннеысь адямиослэн верамзыя, аслэсьтыд сюлэмдэ кылзоно но лэсьтоно сое, мар тыныд шуд ваёз, со понна люкиськоно луиз ке но. Нош Иеговалэн верамезъя, ас сярысьтыд гинэ сюлмаськоно ӧвӧл, мукетъёсыз сярысь но сюлмаськоно (Флп. 2:4). Инмарлэн потэ, тӥ ӵош мед улоды, медад люкиське шуыса (Матф. 19:6). Солэн потэ, ужпумъёс кутыкуды, тӥ солэсь возетъёссэ лыдэ мед басьтоды, нош ас мылпотонъёстыя гинэ медад улэ шуыса.

5. Ефесъёслы 5:33 лыдэ басьтыса, кызьы картлы но кышнолы асьсэды ог-огенызы возёно?

⁵ Карт но кышно ог-огзэс яратыны но гажаны кулэ. (Лыдӟе Ефесъёслы 5:33.) Библия милемыз дышетэ: «Басьтон сярысь, сётыны  умойгес» (Ап. уж. 20:35). Мар юрттоз кузпалъёслы ог-огзэс яратыса но гажаса улыны? Зӥбыт-востэм сям. Картъёс но кышноос, кудъёсыз та сямез возьмато, кылзӥсько Библиысь визь-кенешлэсь: «Нокин но аслыз пайда медаз утча, мукетызлы мед утчалоз» (1 Кор. 10:24).

6. Малы тӥ дышетскыны быгатӥськоды Стивенлэн но Стефанилэн верамъёсысьтызы?

⁶ Зӥбыт-востэм сям христиан луись трос кузпалъёслы шудогес луыны юрттӥз. Тани мар вера Стивен агай: «Тӥ одӥг команда луиськоды ке, тӥ ваньзэ ӵош лэсьтоды, тужгес но соку, куке шуг-секытъёс кылдо. Тӥ уд малпалэ: „Мар мон понна умойгес луоз?“. Со интые, тӥ малпалоды: „Мар ми понна умойгес луоз?“». Солэн Стефани кышноез тазьы ик малпа. Со вера: «Нокинлэн уг поты улэмез адямиен, кудӥз тонэн ноку соглаш уг луы. Куке валамтэос кылдо, ми малпаськиськомы, малы со озьы луиз. Собере ми вӧсяськиськомы, эскериськомы милемыз сюлмаськытӥсь юанэз но вераськиськомы, кызьы сое сэрттоно-пертчоно. Ми шуг-секытэн нюръяськиськомы, нош ог-огенымы ум». Картъёс но кышноос, кудъёсыз асьсэды вылӥе уг пукто, зэмзэ ик шудоесь.

7. Кыӵе мылкыдыз луыны кулэ агайлэн, кудзэ кенешын дано ужъёсты быдэсъяны куро?

⁷ Иеговалы ужаны-тыршыны кыӵе гинэ луонлык медаз кылды, ми понна со бадӟым дан (Пс. 26:4; 83:11). Туж ушъямон, куке агай Иеговалэн организацияз дано ужъёсты быдэсъяны дась. Библия валэктэ, сыӵе адями «ӟеч уж лэсьтыны мылкыд каре» шуыса (1 Тим. 3:1). Нош куке агайлы кыӵе ке уж сёто, солы ачиз сярысь укыр трос малпано ӧвӧл (Лука 17:7—10). Солэн одӥг гинэ ужпумез луыны кулэ — зӥбыт-востэмен мукетъёсыз понна ужаны-тыршыны (2 Кор. 12:15).

8. Малы дышето милемыз Диотрефлэн, Озиялэн но Авессаломлэн учыръёссы?

⁸ Библиысь лыдӟыны луэ адямиос сярысь, кудъёсыз асьсэды туж вылӥе пуктӥзы. Диотрефлы востэм сям ӧз тырмы, кенешын со азьпалъяськыса улыны тыршиз (3 Иоанн 9). Озия ас вылаз оскиськиз но басьтӥськиз уж борды, кудзэ Иегова солы ӧз сёты вал (2 Пар. 26:16—21). Авессаломлэн эксэй луэмез потӥз, соин ик со калыклэсь сюлэмзэ кескич амалэн ас палаз берыктыны тыршиз (2 Экс. 15:2—6). Та учыръёсысь умой адӟиське: Иеговалы уг кельшо адямиос, кудъёсыз асьсэлы дан утчало (Мад. 25:27). Вылтӥяськон сям но данэз яратон урод бервылъёсы вутто (Мад. 16:18).

9. Кыӵе адӟем карон возьматӥз милемлы Иисус?

⁹ Табере малпаськомы Иисус сярысь, кудӥз, та вылтӥяськись адямиосын ӵошатыса, чылкак мукет вал. «Со Инмарлэн тусыз-образэз луыса вылысь Инмарен огкадь луон борды кутӥськыса ӧз улы» (Флп. 2:6). Иеговалэн вань кылдытэмъёсыз пӧлысь Иисуслэсь кужмогес нокин ӧвӧл. Озьы ке но Иисус ачиз сярысь укыр трос малпаса уг улы. Дышетскисьёсызлы со вераз: «Уго тӥ пӧлысь кин ваньмызлэсь покчи, со ваньмызлэсь быдӟым луоз» (Лука 9:48). Ми туж шумпотӥськомы ужаны-тыршыны пионеръёсын, кенешлы юрттӥсьёсын, тӧроосын но ёросэз чакласьёсын ӵош, кудъёсыз, Иисус сямен, зӥбыт-востэм луыны тыршо! Иеговалэн зӥбыт-востэм ужась-тыршисьёсыз ог-огзылы яратонзэс возьмато, соя Инмарлэсь организацизэ тодманы луэ (Иоанн 13:35).

10. Мар кароно, тӥ малпаськоды ке, кенешын шуг-секытъёс вань шуыса, нош тӧроос, сое сэрттон-пертчон понна, ваньзэ уг лэсьто?

¹⁰ Мар кароно, тӥ малпаськоды ке, кенешын шуг-секытъёс вань шуыса, нош тӧроос, сое сэрттон-пертчон понна, ваньзэ уг лэсьто? Ӝожтӥськыса улоно ӧвӧл, со интые, зӥбыт-востэм сямез возьматоно но юрттоно соослы,  кинъёс кенешын ас вылазы кивалтэт басьто (Евр. 13:17). Мар со понна кароно? Юалэ асьтэлэсь: «Зэм ик-а та юанэз одно ик сэрттыны-пертчыны кулэ? Тупа-а али солы дыр? Яра-а мыным та уже пыриськыны? Зэмзэ вераса, мар сярысь мон тросгес сюлмаськисько: тыршисько-а мон кенешын огкылысь улонэз утьыны яке аслым саклык висъяны?»

11. Ефесъёслы 4:2, 3 лыдэ басьтыса, кыӵе пайда ваёз, куке ми Иеговалы зӥбыт-востэмен ужаськомы-тыршиськомы?

¹¹ Быгатонлыкъёс сярысь, Иеговалы дуногес потэ зӥбыт-востэм сям, нош ужан-тыршонын трос лэсьтон сярысь — огкылысь улон. Соин ик вань сюлмысьтыды тырше Иеговалы зӥбыт-востэмен ужаны-тыршыны. Солы луыса кенеш огкылысь улоз. (Лыдӟе Ефесъёслы 4:2, 3.) Ӟырдыт мылкыдын ужалэ-тырше. Утчалэ луонлык мукетъёссэ шумпоттыны. Куное ӧте вын-агайёсты но сузэр-апайёсты, озьы ик соосты но, кинъёс кенешын дано ужъёсты уг быдэсъяло (Матф. 6:1—4; Лука 14:12—14). Тӥ зӥбыт-востэмен вын-агайёсын но сузэр-апайёсын ӵош ужаськоды-тыршиськоды ке, соку быгатонлыкъёстэс сяна, соос зӥбыт-востэм луэмдэс но адӟозы.

12. Мар вераське Библиын эшъяськон сярысь?

¹² Иеговалэн потэ: ми шумпотон мед басьтомы, семьяенымы но эшъёсынымы дырмес ортчытыса (Пс. 132:1). Куке Иисус музъем вылын улӥз, солэн умой эшъёсыз вал (Иоанн 15:15). Библиын вераське, зэмос эшъёс туж дуно луо шуыса (Мад. 17:17; 18:25). Озьы ик отын пусйиське, мукет адямиослэсь палэнсконо ӧвӧл шуыса (Мад. 18:1). Тросэз малпало, социальной сетьёслы луыса соос тросгес эшъёс шедьтыны быгатозы но огназы уз кыле  шуыса. Нош социальной сетьёсты уже кутыку, чакласькыны кулэ.

13. Малы куд-огъёсыз, кинъёс социальной сетьёсты уже куто, шӧдо, соос огназы кылемын но соослэн мылкыдзы куашкамын шуыса?

¹³ Кызьы возьмато эскеронъёс, адямиос, кудъёсыз трос дырзэс социальной сетьёсын ортчыто, ӵем дыръя шӧдо, соос огназы кылемын но соослэн мылкыдзы куашкамын шуыса. Со озьы луыны быгатэ, малы ке шуоно адямиос интернетэ ӵемысь потто улонысьтызы тужгес но яркыт учыръёсын туспуктэмъёссэс. Отысь адӟыны луэ соосты асьсэды, соослэсь эшъёссэс но тунсыко интыосты, кытын соос дырзэс ортчытӥзы. Та туспуктэмъёсты учкыса, адями малпаны быгатэ, мукетъёсыныз ӵошатыса, солэн улонэз огшоры но мӧзмыт шуыса. Тани мар вера 19 аресъем сузэр: «Мынам кӧты туж ӝож луэ вал, куке адӟылӥ, мукетъёсыз шутэтскон нуналъёссэс шулдыръяськыса ортчытъязы шуыса, нош мон дорам мӧзмыса пуки».

14. Кызьы 1 Пётрлэн 3:8 гожтэм визь-кенеш, социальной сетьёсты визьмо уже кутыны юрттэ?

¹⁴ Зэм но, социальной сетьёс пайда ваё: соосты уже кутыса, ӵыжы-выжыосынымы но эшъёсынымы вераськыны луэ. Нош адӟылӥды-а тӥ: куддыръя адямиос социальной сетьёсты уже куто, асьсэды ушъян понна? Соос вераны тыршо кадь: «Учке мон шоры!» Нош куд-огъёсыз асьсэлэн яке мукетъёсызлэн туспуктэмъёссы улын лек но кырсь кылъёсты гожъяло. Со пумит луэ Библиысь визь-кенешлы, кудӥз вера, зӥбыт-востэм сямез но яратонэз возьматоно шуыса. (Лыдӟе 1 Пётрлэсь 3:8.)

15. Кызьы Библия юрттэ милемлы вылтӥяськытэк улыны?

¹⁵ Тӥ социальной сетьёсты уже кутӥськоды ке, юалэ асьтэлэсь: «Куке адямиос интернетэ поттэм кылъёсме, туспуктэмъёсме но видеоме адӟо, уг малпало-а соос, мон ушъяськисько шуыса? Соосты адӟыса, соос вожъяськыны уг кутско-а?» Библиын гожтэмын: «Уго ваньмыз, мар вань дунне вылын — лулмугорлэн ортчыт кужмо кулэ каронъёсыз, синъёслэн уродлы синмаськонзы, вылтӥяськыса улон — Атайлэсь ӧвӧл, со та дуннелэсь луэ» (1 Иоанн 2:16). Библиез эскерись одӥг тодосчилэн верамезъя, «вылтӥяськыса улон» кылъёс герӟаськемын адямиен, кудӥз ассэ даноенгес возьматыны тырше, нош ачиз сыӵе ӧвӧл ке но.  Христианъёс мукетъёсыз азьын данъяськыны уг тыршо. Соос кылзӥсько Библиысь визь-кенешлэсь: «Ушъямез-данъямез яратыса ум улэ. Ойдолэ, огмес огмы ум керӟегъяськытэ, огмылы огмы ум вожъяське» (Гал. 5:26). Зӥбыт-востэм сям юрттоз милемлы та дуннеысь адямиослэн мылкыдзылэсь палэнскыны, кудъёсыз асьсэды мукетъёсызлэсь вылӥе пуктыны тыршо.

16. Малы вылтӥяськись луыны уг яра?

¹⁶ Милемлы зӥбыт-востэм сямез будэтоно, малы ке шуоно вылтӥяськись адямиос «зӥбыт-востэм кариськыса, визьмо малпанэн» улыны уг быгато (Рим. 12:3). Вылтӥяськись адямиос споръяськыны ярато но асьсэос сярысь гинэ малпасько. Соослэн малпаськон амалзы но ужъёссы ӵем дыръя асьсэлы но, мукетъёсызлы но вӧсь каро. Соос мукет сямен малпаськыны ӧз ке кутске, Шайтан азьланяз но соослэсь визьзэс тугаса возёз (2 Кор. 4:4; 11:3). Нош зӥбыт-востэм адями «визьмо малпанэн улэ». Со ачиз шоры шонер учке но вала, мукетъёсыз трос удысъёсын солэсь умойгес луо шуыса (Флп. 2:3). Сыӵе адями тодэ, «вылӥ мылкыдоослы Инмар пумит кариське, нош зӥбыт-востэм улӥсьёслы дэлет сётэ» шуыса (1 Пётр 5:5). Соослэн, кинъёс «визьмо малпанэн» уло, уг поты, Иегова соослы пумит мед кариськоз шуыса.

17. Мар милемлы кароно, азьланяз но зӥбыт-востэм луон понна?

¹⁷ Азьланяз но зӥбыт-востэм луон понна, милемлы Библиысь визь-кенешлэсь кылзӥськоно, кудӥз вера, «вужмем адямилэсь» дӥськутсэ кыльыса, «выль адями» луоно шуыса (Кол. 3:9, 10). Милемлы Иисус сярысь тросгес тодоно но котьма ласянь солэсь адӟем карыны тыршоно (1 Пётр 2:21). Озьы лэсьтӥмы ке, со милемлы трос пайда ваёз. Зӥбыт-востэм сямез будэтыса, милям семьямы шудогес луоз, кенешмы огкылысь улоз, озьы ик ми социальной сетьёсты визьмо уже кутомы. Нош тужгес но кулэез — ми Иеговалы ярамон луомы но, со милемыз бакель кароз.