1. Кызьы ассэ возьыны быгатэ адями, ӵошатскон мылкыдлы сётскыса?

 АСЬМЕ нуналъёсы та дуннеысь тросэз адямиос вань кужмысьтызы тыршо мукетъёсызлэсь умойгес луыны. Ужбергатӥсь, нокин шоры учкытэк, аслыз гинэ пайда утча. Вожвылъяськонэ пыриськисьёс вормон понна ог-огзэс юри вӧсь карыны но быгато. Нош дышетскись, умой университетын дышетскон понна, экзаменъёс дыръя дышетӥсьёссэ пӧяны но быгатэ. Нош Библия сыӵе ужъёсты «лулмугорлэн сьӧлыко ужъёсыз» шуыса нима (Гал. 5:19—21). Ми валаськомы, христианъёслы асьсэды озьы возьыны уг яра шуыса. Нош быгатэ-а Иеговалэн ужась-тыршисез, ачиз но валатэк, кенешысь вын-агайёслэсь но сузэр-апайёслэсь ӵошатскон мылкыдзэс ӝутыны? Милемлы та юанлы валэктонэз шедьтыны кулэ, малы ке шуоно ӵошатскон мылкыд кенешысь огкылысь улонэз сӧрыны быгатэ.

2. Мае ми эскеромы та статьяын?

² Та статьяын ми эскеромы кык урод сямъёсты, кудъёсыз милесьтым ӵошатскон мылкыдмес ӝутыны быгато. Озьы ик ми вераськомы Инмарлэн оскымон ужась-тыршисьёсыз сярысь, кудъёсыз мукетъёсызлэсь умойгес луыны ӧз тырше. Но нырысь ойдолэ малпаськомы, мар милесьтым мылкыдмес ӝутэ Иеговалы ужаны-тыршыны.

3. Кыӵе юанъёс аслыд сётыны кулэ?

³ Ми пӧлысь котькудӥзлы куддыръя ассэ эскерыны кулэ. Юалэ асьтэлэсь: «Малы мон ачим сярысь умоен яке уродэн малпаськисько? Малы ке шуоно асме мукетъёсыныз ӵошатӥсько?  Нош малы мон кенешын мыным сётэм ужъёсты тыршыса быдэсъясько? Потэ-а мынам возьматэме, мон мукетъёсызлэсь умойгес шуыса яке кыӵе ке агайлэсь яке сузэрлэсь умойгес шуыса? Яке мынам потэ Иеговалы самой умойзэ сётэме?» Малы аслыд таӵе юанъёс сётъяны кулэ? Ойдолэ саклыкмес висъяломы солы, мар гожтэмын Библиын.

4. Малы ми асьмеды мукетъёсыныз ӵошатыны кулэ ӧвӧл, Галатъёслы 6:3, 4 лыдэ басьтыса?

⁴ Библиын вераське, астэ мукетъёсыныз ӵошатоно ӧвӧл шуыса. (Лыдӟе Галатъёслы 6:3, 4.) Малы? Ми асьмеды мукетъёсызлэсь умойгес шуыса лыдъяськомы ке, соку вылтӥяськыны кутскомы. Нош ми валамы ке, мукетъёсыз милесьтым умойгес луо шуыса, милям мылкыдмы куашканы быгатэ. Кызьы гинэ медам луы, озьы малпаны шонер ӧвӧл (Рим. 12:3). Грециысь Катерина b сузэр вера: «Азьвыл мон асме мукет сузэръёсын ӵошатӥсько вал. Мон малпай, соос мынэсьтым чебересьгес, умойгес тодытыны но мукетъёсыныз эшъяськыны быгато шуыса. Собере мон асме номырлы ярасьтэм адямиен шӧдӥ». Но ойдолэ ум вунэтэ: Иегова милемыз ас дораз ӧз вайы, милям чебер вылтусмы, трос эшъёсмы яке умой вераськыны быгатонлыкмы вань шуыса. Нош со милемыз ас дораз вайиз, малы ке шуоно ми дась вал сое яратыны но солэн Пиезлэсь кылзӥськыны (Иоанн 6:44; 1 Кор. 1:26—31).

5. Малы дышетэ тӥледыз Хюн агайлэн учырез?

⁵ Тани эшшо мар сярысь аслэсьтыд юаны кулэ на: «Мар мон сярысь мукетъёсыз малпало: мон тупаса улонэз утисько яке ӵем дыръя мукетъёсыныз соглаш уг луиськы?» Эскеромы, мар луиз Лымшор Кореяысь Хюн нимо тӧроен. Азьвыл со мукет кылкутӥсь вын-агайёслэсь ассэ вылӥегес пуктыны турттэ вал. Хюн вера: «Мон соосты пыкылӥсько вал но соосын соглаш уг луиськы вал». Кытчы со вуттӥз? Со вера: «Мон понна кенешын огкылысь улон сӧриськиз». Шумпотыса вераны луэ, Хюн агайлэн эшъёсыз солы валаны юрттӥзы, со ассэ шонертэм возе шуыса. Хюн аслэсьтыз мылкыдзэ тупатӥз. Али со туж умой тӧро. Ми валамы ке, мукетъёсыныз огкылысь улэм интые, милям соосын ӵошатскыны мылкыдмы вань шуыса, милемлы ӝегатскытэк мар ке но кароно.

6. Малы адямилэн мылкыдыз ӝутскыны быгатэ мукетъёсыныз ӵошатскыса улыны, Галатъёслы 5:26 лыдэ басьтоно ке?

⁶ Лыдӟе Галатъёслы 5:26. Мар адямилэсь мылкыдзэ ӝутыны быгатэ мукетъёсыныз ӵошатскыса улыны? Нырысетӥез, ушъямез-данъямез яратон. Сыӵе адями вылтӥяське но ассэ гинэ яратэ. Кыкетӥез, вожъяськон. Вожъяськись адямилэн потэ, солэн мед луоз шуыса соиз, маиз мукет адямилэн вань. Со сяна, солэн потэ, со адямилэн соиз медаз луы ини шуыса. Озьыен, вожъяськон адӟемпотостэм карон пӧлы пыре. Тӥни малы ушъямез-данъямез яратонлэсь но вожъяськонлэсь кышкыт черлэсь кадь пегӟоно!

7. Кыӵе изъян вае ушъямез-данъямез яратон но вожъяськон? Вералэ пример.

⁷ Ушъямез-данъямез яратон но вожъяськон кырсь топливо кадь. Сыӵе топливоен самолёт лобӟыны быгатоз, нош музъем вылэ умоен пуксьыны уз быгаты, дыр. Топливо кырсь вал бере, самолётлэн двигательёсыз умой уз ужалэ, соин ик со пазьгиськоз. Ӵапак озьы ик вылтӥяськись адями но Иеговалы кӧня ке дыр ӵоже ужаны-тыршыны быгатэ. Но со ӧз воштӥськы ке, вераны луоз, со но пазьгиськоз (Мад. 16:18). Со Иеговалы ужамысь-тыршемысь дугдоз, аслыз но, мукетъёсызлы но изъян ваёз. Соку мар кароно,  ушъямез-данъямез медам яратэ шуыса но мукетъёсызлы медам вожъяське шуыса?

8. Мар милемлы кароно, ушъямез-данъямез медам яратэ шуыса?

⁸ Ушъямез-данъямез медам яратэ шуыса, милемлы тодамы возёно апостол Павеллэсь кылъёссэ: «Номыре но эн лэсьтэ, асьтэлы гинэ пайда басьтыны турттыса, ушъян-данъянэз эн яратэ. Асьтэдыз покчи каре, нош мукетъёссэ асьтэ сярысь умоесьгес шуыса лыдъялэ» (Флп. 2:3). Ми мукетъёссэ милесьтым умоесьгес шуыса лыдъяськомы ке, соку ум ӵошатске со агайёсын но сузэръёсын, кудъёсыз мае ке но милесьтым умойгес лэсьтыны быгато. Со интые, ми соос понна шумпотомы. Тужгес но ми шумпотомы, соос быгатонлыкъёсынызы Иеговаез данъязы ке. Нош быгатӥсь агайёс но сузэръёс асьсэос но мукетъёссэ асьсэ сярысь вылӥегес пуктӥзы ке, соос но милесьтым мае ке умойзэ адӟозы но милемыз со понна дунъялозы. Озьыен, ми пӧлысь котькудӥз кенешлы тупаса но огкылысь улыны юрттоз.

9. Мар кароно, вожъяськон мылкыдэз вормон понна?

⁹ Вожъяськон мылкыдэз вормон понна, зӥбыт-востэм сяммес будэтоно, яке валано, ми ваньзэ лэсьтыны ум быгатӥське шуыса. Зӥбыт-востэм адями ноку уз тыршы возьматыны, со мукетъёсызлэсь умойгес но быгатӥсьгес шуыса. Со интые, со вала, мукетъёсызлэн но умой сямъёссы вань шуыса, озьы ик со соослэсь дышетскыны тырше. Шуом, кенешысьтыды кыӵе ке агай, умой речьёс вера. Быгатӥськоды-а тӥ солэсь юаны, кызьы со речьёссэ дася? Яке кыӵе ке сузэр умой пӧраське. Быгатӥськоды-а тӥ солэсь визь-кенеш курыны? Нош кенешысь куд-ог егитъёслы мукетъёсыныз эшъяськыны секыт ке, соос быгато визь-кенеш курыны соослэсь, кинъёслы мукетъёсыныз эшъяськыны капчи. Соку вожъяськонлы нокыӵе инты уз кыльы ни. Со сяна, ми малы ке умоезлы но дышетскомы.

10. Кыӵе секыт учыре сюриз Гедеон?

¹⁰ Ойдолэ эскеромы мар луиз Гедеонэн но Ефрем выжыысь ожгарчиосын. Гедеон Манассия выжыысь вал. Иеговалэн юрттэменыз, со 300 ожгарчиосыныз ӵош Инмарлэсь  тушмонъёссэ вормиз. Соос интыын кин ке но данъяськыны но быгатысал. Ӵапак соку Гедеон доры Ефрем выжыысь адямиос лыкто. Но соос Гедеонэз ӧз ушъялэ. Со интые, соос соин ченгешыны малпазы. Малы? Гедеон соосты соин ӵош ожмаськыны ӧз ӧтьы бере, соослэн туж вожзы потӥз. Соос тыршизы асьсэлэсь выжызэс данъяны но вунэтӥзы валтӥсьсэ: Инмарлэсь тушмонъёссэ вормыса, Гедеон Иеговалэсь нимзэ данъяз но солэсь калыксэ утиз (Суд. 8:1).

11. Мар вераз Гедеон Ефрем выжыысь ожгарчиослы?

¹¹ Гедеон Ефрем выжыысь ожгарчиослы зӥбыт-востэмен вераз: «Мае ке но сыӵезэ мон лэсьтӥ-а, мае тӥ туннэ лэсьтӥды?» Собере со соослы тодазы вайытӥз, макем бадӟым вормон соос асьсэос басьтӥзы Иеговалэн юрттэменыз. Та кылъёсты верамез бере Ефрем ожгарчиослэн вожпотонзы сӥяз (Суд. 8:2, 3). Соосын вераськыкуз, Гедеон нокӧня но ӧз вылтӥяськы, солы луыса со юрттӥз Инмарлэн калыкезлы тупаса улыны.

12. Малы ми дышетскыны быгатӥськомы Ефрем ожгарчиослэсь но Гедеонлэсь?

¹² Малы дышетскыны луэ та учырысь? Ефрем ожгарчиос сярысь малпаськоно ке, адӟиське: астэ данъян интые, Иеговаез данъяны кулэ. Нош Гедеон туж умой пример возьматӥз семьяослэн йыръёссылы но тӧроослы. Тӥ вылэ кин ке но куатаськиз ке, тырше валаны, малы со куатаськиз. Сыӵе адямиез азинсконъёсыз понна ушъяны луоз. Со понна туж кулэ зӥбыт-востэм сям, тужгес но соку, куке со адямилэн тӥ вылэ куатаськыны мугъёсыз ӧй вал. Но астэ шонере поттэм интые, трослы кулэгес вын-агайёсын но сузэр-апайёсын тупаса улыны.

13. Кыӵе шуг-секытэн пумиськиз Анна но мар со кариз, со пыр потон понна?

¹³ Малпаськомы Анна сярысь. Со быземын вал Елкана нимо левитлы. Но Елканалэн вал на эшшо одӥг кышноез, Феннана. Озьы ке но Елкана золгес яратӥз Аннаез. Феннаналэн вал нылпиосыз, нош Анналэн ӧй вал. Соин сэрен Феннана Аннаез серем карылӥз но ялан сое ӝоже уськытылӥз. Анналы сокем секыт вал, со «бӧрдэ, уг но сиськы вал» (1 Экс. 1:2, 6, 7). Озьы ке но Библиын нокытын гожтэмын ӧвӧл, Анна Феннаналы кызьы ке пунэмзэ берыктыны тыршиз шуыса. Иеговалы ӟырдыт вӧсяськыкуз, со солы сюлэмзэ усьтӥз но быдэсак солы оскиськиз. Дугдӥз-а Феннана Аннаез ӝоже уськытъямысь? Библия со сярысь уг вера. Но ми тодӥськомы, вӧсяськемез бере Анналэн сюлмыз буйгаз но солэн «ымнырыз ӝож тусъем ӧй ни вал» (1 Экс. 1:10, 18).

14. Малы ми дышетскиськомы Анналэсь?

¹⁴ Малы ми дышетскиськомы Анналэсь? Кин ке но ассэ тӥлесьтыд вылӥе пуктыны турттэ ке, тӥ бырйыны быгатӥськоды, кызьы асьтэды возёно: со адямиен ӵошатсконо-а, ӧвӧл-а? Сыӵе учыре уродлы пумит уродэн эн берыктэ, нош вань кужмысьтыды тырше со  адямиен тупаса улыны (Рим. 12:17—21). Со адями ӧз воштӥськы ке но, тӥляд сюлэмды каньыл луоз.

15. Маин ог-огзылы кельшо вал Аполлос но Павел?

¹⁵ Табере ойдолэ эскеромы, малы ми дышетскыны быгатӥськомы Аполлослэсь но Павеллэсь. Соос кыкназы но туж умой тодӥзы Священной Гожтэмез, кыкназы но туж умой дышетӥсьёс вал, кыкназы но трос адямиослы юрттӥзы Христослэн дышетскисьёсыз луыны. Озьы ке но соос ог-огенызы ӵошатскыса ӧз улэ.

16. Кызьы тӥ валэктысалды, кыӵе адями вал Аполлос?

¹⁶ Аполлос вордӥськиз Александрия карын. Со дыре отын самой умой дышетскон интыос вал. Аполлос кыллы усто вал, озьы ик Гожтэмез умой тодӥз, дыр (Ап. уж. 18:24). Коринфын улыкуз, со кенешысь вын-агайёс но сузэр-апайёс ватытэк веразы, апостол Павелэн но мукет вын-агайёсын ӵошатыса, Аполлосэз золгес ярато шуыса (1 Кор. 1:12, 13). Соглаш кариськиз-а Аполлос соослэн веранъёсынызы, кудъёсыз кенешез люко вал? Нокызьы но ӧз. Ойдолэ малпаськомы: куке Аполлос Коринфысь кошкиз, апостол Павел туж куриз сое нош ик берытскыны (1 Кор. 16:12). Курысал-а Павел Аполлосэз берытскыны, малпасал ке, со кенешез люке шуыса? Адӟиське, Аполлос быгатонлыкъёссэ шонер уже кутӥз, со адямиослы Инмар сярысь вералляз но вын-агайёсты юнматылӥз. Со сяна, оскыны луэ, Аполлос зӥбыт-востэм адями вал шуыса. Кылсярысь, Библиын нокытын гожтэмын ӧвӧл, солэн вожез потӥз шуыса, куке Акилла но Прискилла «солы Кузё-Инмарлэн сюресэз сярысь эшшо но шонергес валэктӥзы» (Ап. уж. 18:24—28).

17. Мар кариз апостол Павел, кенешын тупаса улон мед луоз шуыса?

¹⁷ Павел умой тодӥз Аполлослэн умой ужъёсыз  сярысь. Озьы ке но со ӧз сюлмаськы, мукетъёсыз Аполлосэз со сярысь вылӥегес пуктозы шуыса. Павел зӥбыт-востэм но визьмо адями вал. Сое адӟыны луэ кылъёсысь, кудъёссэ со гожтӥз Коринфысь кенешлы. Куке со кенешысь христианъёс веразы «Мон — Павеллэн», Павеллы со нокӧня но уг кельшы вал. Вань саклыксэ со висъяз Иегова Инмарлы но Иисус Христослы (1 Кор. 3:3—6).

18. Малы ми дышетскыны быгатӥськомы Аполлослэсь но Павеллэсь, 1 Коринфъёслы 4:6, 7 лыдэ басьтыса?

¹⁸ Малы ми дышетскыны быгатӥськомы Аполлослэсь но Павеллэсь? Христиан мурт вань кужмысьтыз Иеговалы ужа-тырше ке, озьы ик трос адямиослы Иеговалэн ужась-тыршисьёсыз луыны юрттӥз ке, солы валаны кулэ: ваньзэ тае со лэсьтыны быгатӥз Иеговалэн юрттэменыз гинэ. Со сяна, Иеговалэн организацияз милемлы трос оскемын ке, соку милям трос луонлыкъёсмы вань кенешлы юрттыны тупаса но огкылысь улыны. Ми туж тау кариськомы кылкутӥсь агайёслы, соос ӵапак озьы асьсэды возё шуыса. Соос кенешез ас тодэмзыя уг дышето, нош Инмарлэн Кылыз вылэ пыкиськыса дышето. Озьы ик соос кенешлы юртто Иисуслэсь адӟем карыны. (Лыдӟе 1 Коринфъёслы 4:6, 7.)

19. Мар карыны быгатэ ми пӧлысь котькудӥз? (Озьы ик учке « Ог-огдылэсь ӵошатскон мылкыддэс эн ӝутэ» рамкаез.)

¹⁹ Инмар ми пӧлысь котькудӥзлы быгатонлыкъёс сётӥз. Ми быгатӥськомы соосты уже кутыны, ог-огмылы юрттӥськон понна (1 Пётр 4:10). Кин ке но малпаны быгатэ, кенешлы огкылысь улыны юрттон понна, со трос лэсьтыны уг быгаты шуыса. Но малпаське: коркаез пуктон понна, трос кирпичъёс кулэ. Озьы ик ӟеч ужъёсмы но, соос пичиесь ке но, быдэс кенешез огазеяны быгато. Ваньмылы милемлы ӵошатскон мылкыдын нюръяськоно. Ойдолэ лэсьтомы ваньзэ, мае быгатӥськомы, кенешын тупаса но огкылысь улонэз утён понна (Еф. 4:3).