1. Мае Иегова тон понна лэсьтӥз?

 КЫЗЬЫ тон Иеговалэн Адӟись-Ивортӥсез луид? Нырысь тон Библиысь шумпотон иворез кылӥд. Сое тыныд веразы, дыр, анай-атаед, ӵош ужасед, ӵош дышетскисед яке Адӟись-Ивортӥсьёс, кудъёсыз коркась корка ветлыса тодытӥзы (Марк 13:10). Собере кин ке но трос дырзэ но кужымзэ быдтӥз, тонэн Библиез дышетыса. Дышетыкуд тон Иеговаез яратӥд но валад, со тонэ яратэ шуыса. Иегова возьматӥз тыныд, макем паймымон луэ зэмлык. Христослэн дышетскисез луыса, тон оскыны быгатӥськод пырак улыны (Иоанн 6:44). Зэм но, тон Иеговаез тау кариськод, малы ке шуоно со кинлэсь ке но мылкыдзэ ӝутӥз тонэн Библиез дышетыны но лэзиз тыныд солэн ужась-тыршисез луыны.

2. Мае ми эскеромы та статьяын?

² Табере ми тодӥськомы зэмлыкез но мынӥськомы сюрес вылтӥ, кудӥз пырак улонэ нуэ. Иегова оскиз милемлы дано уж — юрттыны мукетъёсызлы та сюрес вылтӥ ик мыныны. Куд-огъёсыз коркась корка ветлыса тодытыны уг кышкало, нош кинлы ке но Библия дышетонэз адямиослы ӵектыны но соосын дышетыны кышкыт потэ. Тӥляд но таӵе ик шӧдонъёсты луо ке, соку та статьяысь тӥ асьтэлы пайдаё малпанъёс шедьтоды, дыр. Ми эскеромы, мар милесьтым мылкыдмес ӝутэ дышетскисьёсты дасян уже пыриськыны. Озьы ик ми вераськомы, малы куд-огъёсызлы Библия дышетонъёс ортчытъяны секыт потэ. Озьы ик тодомы, мар соослы юрттыны быгатэ. Нош нырысь ойдолэ вераськомы, малы милемлы тодытӥсьёс гинэ луоно ӧвӧл, нош озьы ик дышетӥсьёс но.

3. Малы ми тодытӥськомы?

³ Курон-косонэ, кудзэ Иисус аслаз дышетскисьёсызлы сётӥз, пыре вал кык люкет. Нырысетӥез, Иисус косӥз дышетскисьёссэ тодытыны Эксэйлык сярысь иворез но возьматӥз, кызьы сое лэсьтоно (Матф. 10:7; Лука 8:1). Иисус азьло ик вераз дышетскисьёсызлы, адямиос соосты котьку ик уз кылзэ шуыса (Лука 9:2—5). Озьы ик Иисус вераз, солэн дышетскисьёсыз быдэс дунне вылын та иворез вералозы но сое вань калыкъёс кылозы шуыса (Матф. 24:14; Ап. уж. 1:8). Адямиос кылзозы-а, уз-а, Иисуслэн дышетскисьёсыз адямиослы вераны кулэ вал Инмарлэн Эксэйлыкез сярысь но со сярысь, мае со лэсьтоз.

4. Эксэйлык сярысь тодытэм сяна, мар милемлы карыны кулэ, Матфейлэсь 28:18—20 лыдэ басьтыса?

⁴ Кыкетӥез, Иисус дышетскисьёсызлы курон-косон сётӥз — дышетыны адямиосты быдэсъяны ваньзэ, мае со соосты косӥз. Куд-огъёсыз малпало, та курон-косонзэ Иисус сётӥз со дышетскисьёсызлы гинэ, кудъёсыз нырысетӥ даурын улӥзы. Нош зэмзэ вераса, со озьы ӧвӧл. Иисус валэктӥз: тодытон но дышетскисьёсты дасян уж нуиськоз асьме дырозь — «вань нуналъёсы, дунне бырытозь». (Лыдӟе Матфейлэсь 28:18—20.) Иисус та курон-косонэз сётӥз, дыр, куке «вить сюлэсь трос агай-вынъёслы ваньзылы ӵош возьматскиз» (1 Кор. 15:6). Озьы ик, кызьы гожтэмын Усьтӥськон книгаын, Христослэн вань дышетскисьёсыз мукетъёсызлы юрттыны кулэ Иегова сярысь тодон-валан басьтыны (Усьт. 22:17).

5. Кыӵе пример вылын Павел возьматӥз, кызьы ог-огенызы герӟаськемын тодытон но дышетскисьёсты дасян? (1 Коринфъёслы 3:6—9).

⁵ Апостол Павел дышетскисьёсты дасян ужез ӵошатӥз емышъёсты будэтонэн. Та пример возьматэ, кидысъёсты кизьыны гинэ тырмыт ӧвӧл шуыса. Ассэ но, Аполлосэз но, Павел ӵошатӥз бусыын ужасьёсын. Со гожтӥз: «Мон мерттӥ, Аполлос ву киськаз». Нош Коринфын улӥсьёсты со ӵошатӥз кизем бусыен, со соосты «Инмарлэн бусыез» шуыса нимаз. (Лыдӟе 1 Коринфъёслы 3:6—9.) «Инмарлэн ужасьёсыз» луыса, ми кидысъёсты гинэ ум кизиське, куке тодытӥськомы, нош озьы ик соос вылэ ву но киськаськомы, куке Библия дышетонъёс ортчытъяськомы (Иоанн 4:35). Нош со дыре ик ми валаськомы, зэмлык кидысъёсты, Инмар будэтэ шуыса. Ӵапак со адямиосты ас дораз вае.

6. Мар милемлы кароно, дышетскисьлы юрттон понна?

⁶ Ми утчаськомы соосты, кинъёс дась кылзыны зэмлыкез, кудӥз пырак улонэ нуэ (Ап. уж. 13:48, ВД). Соос Христослэн дышетскисьёсыз мед луозы шуыса, милемлы соослы юрттоно: 1) валаны, 2) оскыны но 3) уже кутыны сое, мае соос Библиысь тодо (Иоанн 17:3; Кол. 2:6, 7; 1 Фес. 2:13). Кенешысь котькудӥз дышетскисьлы юрттыны быгатэ Инмарен кусыпъёссэ юнматыны. Кылсярысь, ваньмы ми соосты шумпотыса пумитаськомы, куке соос кенешлэн пумиськонъёсаз лыкто, но возьматӥськомы соослы, кызьы ог-огмес яратоно (Иоанн 13:35). Солы, кин Библия дышетонэз ортчытэ, трос дыр но кужым кулэ, адямилы куштӥськыны юрттон понна мур пыӵам сямъёсызлэсь но солэсь, малы со азьло оске вал (2 Кор. 10:4, 5). Адями пылатӥськыны дась луытозь, трос дыр ортчыны быгатэ. Нош тыршон бакель каронъёс вае!

7. Мар милесьтым мылкыдмес ӝутэ тодытыны но дышетскисьёсты дасяны?

⁷ Мар милесьтым мылкыдмес ӝутэ тодытыны но дышетскисьёсты дасяны? Нырысетӥез, Иеговаез яратон. Вань сюлмысьтыды тодытыса но дышетскисьёсты дасяса, тӥ возьматӥськоды, Иеговаез яратӥськоды шуыса (1 Иоанн 5:3). Малпаське, Иеговаез яратэменыды,  тӥ коркась корка ветлыса тодытыны кутскиды. Капчи-а вал тӥледлы кылзӥськыны та куронлэсь? Ӧй вал, дыр. Нош тодӥськоды на-а, кыӵе шӧдонъёсты тӥляд вал, куке тодытыкуды, нырысетӥзэ ӧсэ жингыртоно вал? Кышкады-а? Веранэз ӧвӧл! Но тӥ валады, Иисус косӥз тодытыны, соин ик тӥ солэсь кылзӥськиды. Нош дыр ортчыса, тӥледлы тодытыны капчигес луиз. Нош мае тӥ шӧдӥськоды, куке валаськоды, дышетскисьёсты дасяны кулэ шуыса? Сюлмаськиськоды-а тӥ, куке малпаськоды, кинэн ке но Библиез дышетоно шуыса? Озьы ке, Иеговалэсь кужым куре сюлмаськондэс вормыны но адямиослы Библия дышетонэз кышкатэк ӵектыны. Соку Иегова юрттоз тӥледлы ӟырдыт мылкыдын но вань сюлмысьтыды дышетскисьёсты дасян уже пыриськыны.

8. Мар милесьтым мылкыдмес ӝутэ адямиосты зэмлыклы дышетыны, Марклэсь 6:34 гожтэмъя?

⁸ Кыкетӥез, милесьтым мылкыдмес ӝутэ адямиосты яратон. Тодамы ваёмы, мар одӥг пол луиз Иисусэн но солэн дышетскисьёсыныз. Лумбыт ужамзы-тыршемзы бере соос туж жадизы но шутэтскыны малпазы. Нош со интыын, кытын соос асьсэ понназы кыльыны малпало вал, соосты трос калык возьмаз. Соосты адӟыса, Иисуслы соос жаль потӥзы, соин ик со «соосты трос дышетыса улӥз». (Лыдӟе Марклэсь 6:34.) Иисус жадемын вал ке но, со туж тыршиз. Малы? Иисус ассэ мукет адямиос интые пуктӥз. Со адӟиз, макем соослы секыт вал но макем соослы вуоноезлы оскон кулэ вал. Соин ик Иисуслэн соослы юрттэмез потӥз. Туннэ но адямиослэн пӧртэм шуг-секытъёссы вань. Майбыр улэмзы шоры учкыса, эн малпалэ, соослэн ваньмыз умой шуыса. Зэмзэ вераса, соослы юрттэт кулэ, малы ке шуоно соос «возьмаськисьтэк кылем ыжъёс кадесь». Апостол Павел гожтӥз, сыӵе адямиос Инмартэк уло но соослэн вуоноезлы оскиськонзы ӧвӧл шуыса (Еф. 2:12). Учконо ке, соос «быронэ нуись сюрес вылтӥ» мыно! (Матф. 7:13). Малпаське: макем кулэ тӥ палан улӥсь адямиослы Инмар сярысь кылыны. Соку адямиосты яратон но жалян тӥлесьтыд мылкыддэс ӝутоз соослы юрттыны. Нош тужгес но умой амал юрттыны — ӵектыны соослы Библиез дышетыны.

9. Кызьы Иегова тӥледлы юрттыны быгатэ, Филиппыослы 2:13 гожтэмъя?

⁹ Оло нош, тӥ уд дӥсьтӥське Библия дышетонэз ӵектыны, малы ке шуоно валаськоды, кинэн ке дышетон понна но солы дасяськон понна, трос дыр висъяно луоз шуыса. Озьы ке, асьтэлэн шӧдонъёсты сярысь Иеговалы вералэ. Куре Иеговаез мылкыддэс ӝутыны сыӵе адямиез шедьтыны, кудӥныз тӥ Библиез дышетыны быгатысалды. (Лыдӟе Филиппыослы 2:13.) Библия оскытэ: Инмар кылэ вӧсяськонъёсмес, кудъёсыз солэн эрикезъя луо (1 Иоанн 5:14, 15). Соин ик юн оске: Иегова одно ик мылкыддэс ӝутоз дышетскисьёсты дасян уже пыриськыны.

10, 11. Малы куд-огъёсыз уг дӥсьто кинэн ке Библиез дышетыны?

¹⁰ Ми валаськомы, адямиосты Библиысь зэмлыклы дышетыны туж кулэ шуыса. Озьы ке но вань трос шуг-секытъёс, кудъёсыз люкето милемлы та уже пыриськыны сомында, кӧня милям потэ. Ойдолэ эскеромы соос пӧлысь куд-огъёссэ но тодомы, кызьы соос пыр потыны луэ.

¹¹ Секыт югдуръёс. Куд-ог вын-агайёс но сузэр-апайёс арлыдоесь ини яке соослэн тазалыксы ляб. Тӥ но соос пӧлы пыриськоды ке, малпаське, малы ваньмы ми дышетскимы COVID-19 пандемия дыръя? Ми валамы, кинэн ке но Библиез дышетыны интернет пыр луэ шуыса. Озьыен, дорысь потатэк но  Библия дышетонэз кутскыны но сое азинлыко ортчытыны луэ. Эшшо ми валамы: куд-ог адямиослэн Библиез дышетэмзы потэ, но соослы уг тупа дыр, куке ми тодытӥськомы. Нош соос дышетыны дась вазь ӵукна яке бер ӝыт. Быгатӥськоды-а тӥ дышетон ортчытыны соку, куке адямиослэн дырзы вань? Кылсярысь, Иисус Никодимез уйин дышетӥз, малы ке шуоно со ӵапак та дырез бырйиз (Иоанн 3:1, 2).

12. Мар милемыз оскытыны быгатэ, ми дышетыны быгатӥськомы шуыса?

¹² Тӥ уд оскиське, дышетыны быгатӥськоды шуыса. Кин ке но малпаны быгатэ, мукетъёсты дышетон понна, солы трос тодон-валан но быгатонлыкъёс люкано шуыса. Тӥ но озьы малпаськоды ке, асьтэлы тодады вайытэ куинь зэмлыкъёс сярысь, кудъёсыз тӥледыз юнматозы. Нырысетӥез, Иегова ачиз вера, тӥ мукетъёссэ дышетыны быгатӥськоды шуыса (2 Кор. 3:5). Кыкетӥез, та ужез тӥледлы Иисус сётӥз, кудӥзлы «инмын но, музъем вылын но... котькыӵе кужым сётэмын» (Матф. 28:18). Но куинетӥез, тӥ котьку но оскыны быгатӥськоды, тӥледлы Иегова, вын-агайёс но сузэр-апайёс юрттозы шуыса. Иегова Иисуслы валэктӥз, мае верано но малы дышетоно. Со милемыз но дышетэ (Иоанн 8:28; 12:49). Со сяна, кызьы вераськонэз кутскыны но кызьы Библия дышетонэз ортчытыны тӥледлы юрттыны быгатэ тодытон понна группаысьтыды тӧро, быгатӥсь ивортӥсь яке пионер. Куре соосты тӥледыз Библия дышетонъёсазы ӧтьыны. Та юрттоз тӥледлы эшшо но быгатысагес дышетыны.

13. Кыӵе выль амалъёсты но тӥрлыкъёсты милемлы уже кутоно, дышетонъёсты ортчытыкумы?

¹³ Выль амалъёс но тӥрлыкъёс. Али ми мукет сямен Библия дышетонъёсты ортчытъяськомы. «Пумтэм вапумъёс ӵоже шумпотыса улэ!» книга али валтӥсь тӥрлык луиз. Табере ми мукет сямен дышетонлы дасяськиськомы но сое ортчытъяськомы. Дышетонъёс ортчытыку, тросгес дыр висъяськомы, абзацъёсты лыдӟем интые, темаез эскеронлы. Дышетыкумы ми ӵем уже кутӥськомы видеороликъёсты, сайтысьтымы материалъёсты но JW Library^® приложениез. Тӥледлы секыт ке та тӥрлыкъёсты уже кутыны, куре кинэ ке но тӥледлы юрттыны. Верало, выль пытьы лёгыны котьку секыт шуыса. Зэм но, выль амалъёсты уже кутыны капчи ӧвӧл. Но Иеговалэн, вын-агайёслэн но сузэр-апайёслэн юрттэмзылы луыса тӥ быгатоды дышыны. Озьы ик тӥледлы кельшоз дышетонэз выль амалэн ортчытыны. Кызьы вераз одӥг пионер, таӵе амалэн дышетон тунсыкогес луиз дышетскисьлы но, дышетӥсьлы но.

14. Мар сярысь тодады возёно, тӥ палан улӥсь адямиос зэмлыкез уг кылзо ке, но кыӵе кулэ луись малпан гожтэмын 1 Коринфъёслы 3:6, 7?

¹⁴ Адямиос уг кылзо. Оло нош, тӥ палан улӥсь адямиослэн уг поты Библиысь зэмлыкез кылзэмзы яке соос тӥледлы пумитъясько но. Мар юрттоз тӥледлы умой мылкыдын улыны? Тодады возе, та дуннеын ваньмыз ӝог воштӥське, озьы ик адямиослэн югдурзы но. Соин ик соослэн, кинъёс азьло зэмлыкез ӧз кылзэ, мылкыдзы ӝутскыны быгатэ сое кылзыны (Матф. 5:3, ВД). Куддыръя Библиез дышетыны соглаш луо соос но, кинъёс ноку но публикациосмес ӧз басьтылэ. Озьы ик ми тодӥськомы, Иегова — аранлэн Кузёез шуыса (Матф. 9:38). Со косэ милемыз зэмлыклэсь кидысъёссэ кизьыны но соос вылэ ву киськаны. Нош соослэн будэмзы понна со ачиз кыл кутэ (1 Кор. 3:6, 7). Ми али нокинэн Библиез ум дышетӥське ке но, ми шумпотӥськомы, Иегова бакель каре тыршеммес, нош кӧня адямиен Библия дышетэммы понна уг b!

15. Мае шӧдэ Иегова, куке адями соглаш луэ Библиез дышетыны но басьтэм тодон-валанзэ улоназ пыртэ?

¹⁵ Иеговалы кельше, куке адями Библиысь зэмлыкез кылзэ но со сярысь мукетъёсызлы вераны кутске (Мад. 23:15, 16). Макем Иегова шумпотэ, куке адӟе, кызьы солэн калыкез ӟырдыт мылкыдын тодытэ но адямиосты дышетэ! Кылсярысь, пандемия шоры учкытэк, 2020-тӥ ужан-тыршон арын 7 705 765 Библия дышетонъёс ортчытъяськизы. Солы луыса 241 994 адямиос асьсэлэсь улонзэс Иеговалы сӥзизы но пылатӥськизы. Нош та вын-агайёс но сузэр-апайёс асьсэос но Библия дышетонъёс ортчытъялозы но выль дышетскисьёсты дасялозы (Лука 6:40). Тодады возе: ми Иеговаез шумпоттӥськомы, куке дышетскисьёсты дасян уже пыриськиськомы.

16. Кыӵе ужпум пуктыны умой луысал?

¹⁶ Дышетскисьёсты дасяны капчи ӧвӧл, нош Иеговалэн юрттэменыз ми быгатомы выль адямиосты дышетыны Инмысь атаймес яратыны. Быгатӥськоды-а тӥ асьтэлы ужпум пуктыны шедьтыны но ортчытъяны одӥг ке но Библия дышетонэз? Тӥ паймоды, дыр, мар луыны быгатэ, котькуд тупась учыре адямиослы Библиез дышетыны ӵектӥды ке. Зэм но, Иегова тыршеммес бакель кароз!

17. Кыӵе шӧдонъёсмы луо, адямиен Библиез дышетыкумы?

¹⁷ Тодытыны но мукетъёссэ зэмлыклы дышетыны — со бадӟым дан! Та ужез быдэсъян милемлы зэмос шумпотон вае! Апостол Павел, кудӥз Фессалоникаысь трос адямиослы Христослэн дышетскисез луыны юрттӥз, аслэсьтыз шӧдонъёссэ тазьы вераз: «Уго Кузё-Инмармы Иисус Христос азьын, Солэн лыктон дыръяз, тӥ сяна, кин милям оскиськонмы, шумпотонмы, данъяськонмылэн венец изьыез? Тӥ ук милям данъяськонмы, шумпотонмы» (1 Фес. 2:19, 20; Ап. уж. 17:1—4). Тросэз вын-агайёс но сузэр-апайёс соглаш солэн кылъёсыныз. Стефани, кудӥз картэныз ӵош трос адямиослы Иеговалэн пылатӥськем ужась-тыршисьёсыз луыны юрттӥз, вера: «Куке адямилы аслэсьтыз улонзэ Иеговалы сӥзьыны юрттӥськод, со трос шумпотон вае. Солэсь но бадӟым шумпотон ӧвӧл ини».