1. Кызьы тӥ учкиськоды зэмлык шоры?

 ИЕГОВАЛЭН ужась-тыршисьёсыз Библиысь зэмлыкез ярато. Со вылэ милям осконмы пыкиське (Рим. 10:17). Ми юн оскиськомы, Иегова христиан кенешез кылдытӥз, «со зэмлыклэн юбоез, инъетэз» мед луоз шуыса (1 Тим. 3:15). Ми дась луыса кылзӥськиськомы агайёслэсь, кудъёсыз ми пӧлын кивалтон ужез нуо. Соос милемлы юртто Библиез валаны но Инмарлэсь эриксэ быдэсъяны (Евр. 13:17).

2. Мар луыны быгатэ зэмлыкен тодматскеммы бере, Иаковлэсь 5:19 лыдэ басьтыса?

² Ми зэмлыкез но Инмарлэсь организацизэ яратӥськомы. Но со уг возьматы, ми шонер сюрес вылысь ноку ум коже шуыса. (Лыдӟе Иаковлэсь 5:19.) Шайтан сое гинэ возьма. Со туж шумпотысал, Библилы яке Инмарлэн организациезлэсь кивалтэтэзлы осконмес лябӟытыны быгатысал ке (Еф. 4:14).

3. Малы милемлы зэмлыкъя улыны кулэ? (Ефесъёслы 6:13, 14).

³ Лыдӟе Ефесъёслы 6:13, 14. Ӝоген Шайтан калыкъёсты пӧялоз но соосты Иеговалы пумит султытоз (Усьт. 16:13, 14). Озьы ик со эшшо но зол тыршоз Инмарлэсь ужась-тыршисьёссэ пӧяны (Усьт. 12:9). Соин ик милемлы дышетскыны кулэ пӧяськонэз зэмлыклэсь висъяны но зэмлыкъя улыны (1 Пётр 1:22; Рим. 6:17). Соку гинэ  ми быгатомы бадӟым куректон пыр потыны.

4. Мае ми эскеромы та статьяын?

⁴ Та статьяын ми эскеромы кык сямъёсты, кудъёсыз милемлы юрттозы пӧяськонэз зэмлыклэсь висъяны но Инмарлэн организациезлы оскыны. Озьы ик ми эскеромы куинь визь-кенешъёсты, кудъёсыз юрттозы зэмлыкъя улыны.

МАР ЮРТТОЗ ВАЛАНЫ, КЫТЫН ЗЭМЛЫК, НОШ КЫТЫН ПӦЯСЬКОН

5. Кызьы Иеговалэсь кышкан валаны юрттэ, кытын зэмлык, нош кытын пӧяськон?

⁵ Иеговалэсь кышкан. Иеговалэсь кышкан но сое яратон туж герӟаськемын. Ми Инмарез туж яратӥськомы, соин ик сое ӝоже уськытэммы уг поты. Ми понна валтӥсез — Иеговалы ярамон луыны. Соин ик милям дышетскеммы потэ ӟечез но уродэз, зэмлыкез но пӧяськонэз висъяны (Мад. 2:3—6; Евр. 5:14). Тыршоно, адямиослэсь кышкан Иеговаез яратонлэсь золгес медаз луы шуыса. Малы ке шуоно ӵем дыръя со, мар адямиослы кельше, Иеговалы уг кельшы.

6. Кызьы адямиослэсь кышкаменызы израиль калык пӧлысь дас учкись-чакласьёс зэмлыкез суразы-пожазы?

⁶ Ми, Инмар сярысь, адямиослэсь золгес кышкамы ке, соку пӧяськонлы оскыны кутскомы. Тодамы ваёмы, мар луиз, куке Моисей 12 пиосмуртъёсты ыстӥз Сӥзем музъемез учкыны-чакланы. Соос пӧлысь дасэз хананей калыклэсь кышказы. Адямиослэсь кышканзы Иеговаез яратонзылэсь кужмогес вал. Соос израиль калыклы шуизы: «Со калыклы пумит мыныны ум быгатӥське, соос асьмелэсь кужмоесьгес ук» (Лыд. 13:28—32). Зэм но, адями синмын учкыса, хананей калык израиль калыклэсь кужмогес вал. Но луэ вал-а вераны, израиль калык  тушмонъёссэ уз вормы шуыса? Озьы вераны быгатэ вал со гинэ, кин Иегова сярысь воксё вунэтӥз! Дас учкись-чакласьёслы саклыксэс висъяно вал Инмарлэн эрикезлы. Нош солэн потэ вал, израиль калык Сӥзем музъемез мед киултоз шуыса. Озьы ик соослы вунэтоно ӧй вал, кызьы Иегова али гинэ аслэсьтыз калыксэ утиз. Соос тодазы возьысалзы ке, макем кужмо Иегова, соку валасалзы, хананей калыклэсь кышканэз ик ӧвӧл шуыса. Нош Иисус Навин но Халев понна валтӥсез вал Иеговалы ярамон луыны. Соос калыклы шуизы: «Кузё-Инмар асьмемыз гажаз-жаляз ке, со музъеме асьмеды пыртоз но сое... асьмелы сётоз» (Лыд. 14:6—9).

7. Мар юрттоз, адямиослэсь сярысь, Иеговалэсь золгес кышканы? (Озьы ик учке суредэз.)

⁷ Мар юрттоз, адямиослэсь сярысь, Иеговалэсь золгес кышканы? Ужпум кутыкуды, котьку малпаське Инмарлэн шӧдонъёсыз сярысь (Пс. 15:8). Библиез лыдӟыкуды, юалэ асьтэлэсь: «Мар мон карысал, сыӵе ик учыре сюрысал ке?» Кылсярысь, пуктэ син азяды, тӥ израиль калык пӧлын сылӥськоды но дас учкись-чакласьёслэсь верамзэс кылӥськоды. Тӥ соослы оскысалды-а? Кышкасалды-а? Яке, адямиослэсь кышкан сярысь, Иеговаез яратонды юнгес луысал-а? Иисус Навин но Халев зэмлыкез веразы ке но, калык соослы ӧз оскы. Соин ик со выжыысь, Иисус Навин но Халев сяна, нокин но Сӥзем музъеме ӧз пыры (Лыд. 14:10, 22, 23).

8. Кыӵе сямез будэтыны тыршоно но малы?

⁸ Зӥбыт-востэм сям. Иегова зэмлыкез усьтэ зӥбыт-востэм адямиослы гинэ (Матф. 11:25). Куке милемлы Библиез дышетыны ӵектӥзы, ми зӥбыт-востэм сяммес возьматӥмы но соглаш кариськимы, милемлы зэмлыкез валаны мед юрттозы шуыса (Ап. уж. 8:30, 31). Но чакласькыны кулэ, вылтӥяськисесь медам луэ шуыса. Малы ке шуоно вылтӥяськисесь луимы ке, Библиысь возетъёс но Иеговалэн организациезлэсь кивалтэтэз интые, ми асьмелэсь малпанъёсмес нырысетӥ интые пуктыны кутскомы.

9. Мар милемлы юрттоз азьланяз но зӥбыт-востэмесь луыны?

⁹ Азьланяз но зӥбыт-востэмесь луон понна, милемлы тодамы возёно, Иеговаен ӵошатыса, ми туж пичиесь шуыса (Пс. 8:4, 5). Озьы ик вӧсяськоно, со милемлы эшшо но зӥбыт-востэмесь луыны мед юрттоз но солэсь дышетскыны мылкыд мед сётоз шуыса. Иегова милемыз дышетэ аслаз Кылыз пыр но организациезлэн публикациосыз пыр. Инмар милемлы юрттоз солэсь дышетэмзэ дунъяны но солэсь малпанъёссэ асьмелэн малпанъёсмылэсь вылӥегес пуктыны. Библиез лыдӟыса, адӟыны тырше, Иегова зӥбыт-востэм сямез яратэ, нош вылтӥяськон сямез адӟемпотостэм каре шуыса. Тужгес но кулэ зӥбыт-востэмесь луыны, куке милемлы дано ужъёс сёто.

МАР ЮРТТОЗ ЗЭМЛЫКЪЯ УЛЫНЫ

10. Кин пыр Иегова кивалтӥз азьвыл но кин пыр со кивалтэ туннэ?

¹⁰ Котьку кылзӥське Иеговалэн организациезлэсь. Нырысь Иегова аслаз калыкезлы кивалтэт сётэ вал Моисей пыр, нош собере — Иисус Навин пыр (Иис. Н. 1:16, 17). Израиль калык оскыны кулэ вал, та пиосмуртъёс пыр Инмар кивалтэ шуыса, но соосты гажаны кулэ вал. Озьы лэсьтыкузы,  Иегова соосты бакель карылӥз. Дауръёс ортчыса, христиан кенеш кылдытэмын вал. Нырысь Иегова кивалтэ вал 12 апостолъёс пыр (Ап. уж. 8:14, 15). Собере Иерусалимысь мукет тӧроос пыр но. Куке христианъёс та оскымон пиосмуртъёслэсь кылзӥсько вал, кенешъёс «юнмазы, нуналлы быдэ соослэн лыдзы тросгес но тросгес луиз» (Ап. уж. 16:4, 5). Ӵапак озьы ик туннэ но Иегова милемыз бакель кароз, ми солэн организациезлэсь кылзӥськимы ке. Мар шӧдысал Иегова, ми ӧм ке кылзӥськысалмы соослэсь, кинъёсты со пуктӥз ми сярысь сюлмаськыны? Тае валан понна, ойдолэ эскеромы, мар луиз израиль калыкен, Сӥзем музъеме мыныкуз.

11. Мар луиз израиль калык пӧлысь куд-огъёсыныз, кудъёсыз Моисеез ӧз гажалэ? (Озьы ик учке суредэз.)

¹¹ Сӥзем музъеме мыныкузы, куд-ог сӥё-дано пиосмуртъёс вераны кутскизы, калыкен кивалтыны Моисейлэн гинэ правоез ӧвӧл шуыса. Соос веразы: «Вань калык [Моисей гинэ ӧвӧл], ваньмыз дун-чылкытэсь, соос пӧлын Кузё-Инмар!» (Лыд. 16:1—3). Зэм но, Иегова «вань калыкез» дун-чылкытэн лыдъяз, но израиль калыкен кивалтыны со Моисеез пуктӥз (Лыд. 16:28). Моисейлы пумит ӝутскыса, соос Иеговалы пумит ӝутскизы. Инмарлэсь эриксэ лыдэ басьтэм интые, соос ас мылпотонъёссы сярысь малпаськизы. Соослэн потэ вал эшшо но вылӥ инты басьтэмзы но эшшо но дано луэмзы. Инмар бугыръяськисьёсты но соос пала кариськисьёсты быдтӥз (Лыд. 16:30—35, 41, 49). Туннэ но номыр ӧз воштӥськы: кин ке но Иеговалэн организациезлэсь кивалтэтсэ уг гажа ке, Иеговалы со уг кельшы.

12. Малы ми Иеговалэн организациезлы оскыны быгатӥськомы?

¹² Ми быгатӥськомы Иеговалэн организациезлы оскыны. Малы? Куке агайёс  адӟо, Библиысь кыӵе ке зэмлыкез мукет сямен валано яке Эксэйлыклэсь ужзэ мукет сямен радъяно шуыса, соос ӝегатскытэк кулэ луись воштӥськонъёс лэсьто (Мад. 4:18). Соос понна валтӥсез — Иеговалы ярамон луыны. Озьы ик соос, ужпумъёс кутыкузы, котьку но Библия вылэ пыкисько.

13. Мар со сыӵе «визьмо дышетон» но малы соя улыны кулэ?

¹³ «Визьмо дышетонъя» улэ (2 Тим. 1:13). «Визьмо дышетон» — со Библиысь дышетонъёс (Иоанн 17:17). Соос вылэ пыкиське ваньмыз, малы ми оскиськомы. Иеговалэн организациез дышетэ милемыз со дышетонъя улыны. Соку со милемыз утёз.

14. Кызьы нырысетӥ даурын куд-ог христианъёс «визьмо дышетонъя» улэмысь дугдӥзы?

¹⁴ Мар луоз, ми «визьмо дышетонъя» ӧм улэ ке? Эскеромы тае одӥг учыр вылын. Нырысетӥ даурын христиан кенешын вераськонъёс ветлӥзы, Иеговалэн нуналыз вуиз ини шуыса (2 Фес. 2:2, ВД). Сыӵе вераськонъёс кылдӥзы, вылды, гожтэт сэрен, кудзэ, верало вал, Павел гожтӥз шуыса. Фессалоникаысь куд-ог христианъёс, ваньзэ пыр-поч эскерытэк, со гожтэтлы оскизы но со сярысь мукетъёсызлы вераны кутскизы. Соос тодазы возьысалзы ке, малы соосты Павел азьвыл дышетӥз, соку со гожтэтлы ӧй оскысалзы (2 Фес. 2:1—5). Соин ик Павел вын-агайёсызлы тодазы вайытӥз, ваньмызлы осконо ӧвӧл шуыса. Соос азьланяз зэмлыкез пӧяськонлэсь висъяны мед быгатозы шуыса, Павел Фессалоникаослы 2-тӥ гожтэтсэ тазьы йылпумъяз: «Котькуд ыстэм гожтэтэлэсь ӟечкылан люкетсэ мон, Павел, ас киыным гожтыса, тазьы йылпумъясько» (2 Фес. 3:17).

15. Кызьы ми пӧяськонлэсь утиськыны быгатӥськомы? Вералэ пример. (Озьы ик учке суредэз.)

¹⁵ Малы милемыз дышето апостол Павеллэн кылъёсыз, кудъёссэ со Фессалоника карысь кенешлы гожтӥз? Ми но кылыны быгатӥськомы кыӵе ке паймытӥсь  иворез яке сое, мар Библиысь зэмлыклы пумит мынэ. Соку туж сак луоно. Огпол Совето Союзысь агайёс гожтэт басьтӥзы. Верамын вал, со валтӥсь кивалтонниысь шуыса. Агайёслэсь мылкыдзэс ӝуто вал нимаз организация кылдытыны. Со гожтэт тушмонъёслэсь вал ке но, малпан кылдыны быгатэ вал, со агайёслэсь шуыса. Но оскымон агайёс ӧз пӧяське. Соос валазы, гожтэт пумит мынэ шуыса солы, малы соосты азьвыл организацимы дышетӥз. Туннэ но тушмонъёсмы туала технологиосты кутыны быгато, милемыз суран но ог-огмылэсь люкон понна. Соин ик туж сак луоно но дыртоно ӧвӧл. Пӧяськонлэсь утиськон понна, туж сак малпано, со, мае ми лыдӟиськомы но кылӥськомы, пумит ӧвӧл-а зэмлыклы, кудзэ ми тодӥськомы ини (2 Фес. 2:2; 1 Иоанн 4:1).

16. Мар милемлы кароно, кин ке но зэмлыклы пумит дышетыны кутске ке? (Римъёслы 16:17, 18).

¹⁶ Иеговалэн оскымон ужась-тыршисьёсыныз огкылысь улэ. Инмарлэн потэ, вань ужась-тыршисьёсыз солы огкылысь мед йыбыртъялозы шуыса. Зэмлыкъя улыса гинэ, ми огкылысь уломы. Кин ке но зэмлыклы пумит дышетыны кутске ке, кенешын люкиськылонъёс кылдо. Соин ик Инмар милемыз куре сыӵе адямиослэсь палэнскыны. Ӧм ке палэнске, ми шонер сюрес вылысь кожомы, вылды. (Лыдӟе Римъёслы 16:17, 18.)

17. Малы кулэ зэмлыкез валаны но соя улыны?

¹⁷ Ми валаськомы ке, кытын зэмлык, но соя улӥськомы ке, соку Иеговаен кусыпъёсмы матынэсь луозы но осконмы юн луоз (Еф. 4:15, 16). Со сяна, ми Шайтанлэн пӧяськонэзлы ум оске, нош бадӟым куректон дыръя Иегова милемлы юрттоз. Зэмлыкъя улэ, соку «каньыллык вайись Инмар тӥледын валче луоз»! (Флп. 4:8, 9).